Tony Blair electionum victor - linguae - HOME



NUNTII LATINI HELSINKIENSES: (Broadcasts can be listened to on-line or downloaded and the texts of the most recent ones read at .)

The text of most bulletins from 6 May 2005 onwards is given below and audiofiles from September 2006 are saved in the same directory on my home computer and on a `semi-public’ page of the `linguae’ website: . An archive of some of the broadcasts from May 2000 to June 2013 is available on-line at (scripts only) and the section of this for 2000 – 2005 is also available as a single word document downloadable from the `Linguae’ site. German annotation and translation of some reports is provided on a German grammar school’s website at: .

English glosses to some of the words could formerly be found via the Web Reader on the Word Champ site (). They included all words used in the bulletins from 16 February 2007 till mid-April 2013, when Wordchamp announced they would be closing. The database has been retained by the former site owner and might be made available again at some point in the future. There is still a description of how the glosses were used at and also at The Nuntii site itself now has a glossary at giving equivalents in Finnish, English and German for the more difficult vocabulary in some of the recent bulletins.

14/6/19

USA et Mexicum de immigratione coercenda consentiunt

USA et Mexicum consensionem immigrationis coercendae invenerunt. Itaque USA portoria quinque centesimarum, sicut ante minitabatur, mercibus Mexicanis non imponet. Mexicum autem ad fines suos milites collocat, qui immigratores per Mexicum in USA venientes coerceant. Praeterea promisit se illos immigratores recepturum esse, quos magistratus Americani remitterent.

Putin et Xi Jinping de commercio pactiones fecerunt

Praesidens Russiae Vladimir Putin et Xi Jinping, praesidens Sinarum, complures pactiones commerciales in Foro commerciali Petropolitano fecerunt, cui die Veneris (7.6.) intererant. Putin Americanos de egoismo oeconomico accusavit, bella commercialia et sanctiones damnavit atque vituperavit, quod illi societatem Huawei ex mercatu mundano extrudere vellent. Xi Jinping autem fuit in verbis moderatior. Censebat ordinem oeconomiae mundanae mutandum esse, ut inaequalitates superarentur. Addidit fieri non posse, ut populi impedirentur, ne meliorem vitam affectarent. Russiam laudabat, quod utilem cooperationem cum mutua aestimatione et aequalitate creare niteretur.

Febris suina Africana etiam Finniae imminet

Febris suina Africana est morbus subus et apris letalis, qui ante quadraginta annos in Europam meridionalem-occidentalem transiit. Hodie in Asia meridionali-orientali vulgatur et iam in Sinis grassatur atque in Estonia et Russia prope confinium Finniae invenitur. In homines contagione non transit, sed oeconomiae suinae etiam apud Finnos male imminet.

Ingentes naves periegetas in Finniam portant

Hac aestate in portus Helsinkienses trecentae novem (309) naves internationales exspectantur, quae quingenta quinquaginta quinque milia (550 000) periegetarum portant, inter quos numerus Asiaticorum usque crescit. Maximae naves sunt longitudine trecenta sexaginta (360) metrorum. Etiam commeatus ex Finnia in Suetiam et Estoniam gratiam apud homines feriatos servavit.

Septem ad bonam vitam consilia

Professor Seppo Koskinen, qui per decennia valetudinem Finnorum investigavit, hominibus quadraginta fere annorum septem consilia dat, quid illis faciendum sit, ut per reliquam vitam bene valeant nec infirmi et decrepiti in asylo marcescant. Primo: tabacum denique relinque. Secundo: memento te alcoholum non tolerare sicut ante. Tertio: dormi septem vel octo horas. Quarto: praefer legumina et fructus, cave carnem rubram. Quinto: cotidie vel ambulando corpus exerce. Sexto: cholesterolum et pressionem sanguinis observa. Septimo: operam da, ut tempus commune cum proximis habeas. – Interrogante professore Koskinen, quid in vita neglexissent, homines veteres plerumque responderunt: ”societatem cum proximis”.

Nuntii Latini finiti

Nuntii Latini Radiophoniae Finnicae Generalis, qui inde ab anno millesimo nongentesimo undenonagesimo (1989) iam triginta annos septimanatim emittuntur, post hanc emissionem finiuntur et decreto moderatorum radiophonicorum post ferias aestivas non continuabuntur. Auscultatoribus, quorum grex ad omnes orbis continentes amplificatus est, propter fidelitatem gratias quam maximas agimus et valedicimus.

Tuomo Pekkanen

7/6/19

Finis anni scholasticii

Kalendis Iuniis (1.6.) in Finlandia finis anni scholastici celebrabatur. Tum amplius quingenta milia scholarium ad ferias aestivas agendas dimissa sunt. Viginti quinque milia studentium in examine maturitatis approbata sunt, octoginta milia specimina scholae professionalis absolverunt. Qui numerus quinque milibus maior est quam anno praeterito.

(Satu Tuominen)

Regimen Finlandiae

Die Lunae (3.6.) Finlandia novum regimen accepit, cui praeest Antti Rinne, moderator factionis democratarum socialium. Nova coalitio ex quinque factionibus et undeviginti ministris constat. Socialistae in administratione septem ministros habent, factio centralis quinque, prasini tres, cum foedus sinistrum et factio popularis Suetica ibi binas sedes occupent.

(Reijo Pitkäranta)

Trump in Britannia

Septimana ineunte praesidens Americanorum Donald Trump coniuge comitatus visitationem statalem in Britanniam fecit, ubi regina Elisabet II eum ritu sollemni recepit. Multi Britanni huic itineri adversabantur, cum censerent praesidentem verbis suis ante adventum factis rebus Britannorum internis se interposuisse. Itaque magna multitudo hominum ei reclamantium in vias Londinii convenit.

(Reijo Pitkäranta)

De oeconomia mundana

Anno proximo oeconomia mundana tribus fere centesimis crevit. Hoc anno illud incrementum aliquanto minus esse videtur, ut ex relatione Argentariae mundanae apparet. In causa sunt discordiae commerciales, quae inter maximas nationes mundi ortae sunt. Constat Americanos non solum cum Sinensibus, sed etiam cum Mexicanis de rebus commercialibus rixari.

(Reijo Pitkäranta)

Nomina aerodromorum

Praesidens Russiae Vladimir Putin documento subscripsit, quo decernitur, ut circiter quadraginta aeriportus Russici novum nomen accipiant. Id fit ad honorem imperatorum et scriptorum nec non eorum, qui de re aeronautica et spatio cosmico cognoscendo optime sunt meriti. Itaque unus ex aerodromis Moscuensibus ex Alexandro Pushkin appellatur.

(Reijo Pitkäranta)

Nova lex venandi

Kalendis Iuniis (1.6.) in Finlandia nova lex valere coepit, ex qua aliquot animalium genera pro bestiis alienis et noxiis habentur. Quam ob rem venatoribus licentia data est ea per totum annum variorum armorum ope petendi, dummodo ne ea veneno aut vi electrica occiderent. In his anímalibus sunt nyctereutes, ondatra, procyon. 

(Reijo Pitkäranta)

De re pedifollica

Hodie sive die septimo mensis Iunii (7.6.) Lutetiae Parisiorum ludi mundani pedifollii feminarum initium capiunt, cum grex Francogalliae prima lusione Coreanis Meridianis occurrit. His certationibus viginti quattuor manus nationales in sex sectiones sortitae intersunt. Certamen finale Nonis Iuliis (7.7.) in stadio Lugdunensi instituetur. 

(Reijo Pitkäranta)

31/5/19

Comitia Europaea

Comitia, quibus delegati ad proximum quinquennium (2019-2024) in parlamentum Europaeum eligebantur, septimana vergente in omnibus membris Unionis Europaeae facta sunt. Ex duodetriginta nationibus septingenti quinquaginta unus (751) delegati, inter eos tredecim Finni, designati sunt. In Finnia paene quadraginta tres centesimae (42,7%) ex civibus suffragium habentibus ad urnas accesserunt.

Ex delegatis Finnis feminae sunt septem, viri sex. Conservativi tres delegatos habent, socio-democratae, prasini, centrales, Finnique fundamentales binos, factio sinistra et popularis Suetica singulos. Maximum apud Finnos numerum suffragiorum accepit Eero Heinäluoma (128 007), pristinus praeses factionis socio-democraticae et praeses parlamenti Finniae.

Eventus comitiorum ostendit vires politicas inter se oppositas in Europa surrexisse. Magnae factiones traditionales, ut centrales et socio-democraticae, descenderunt, nationalistae dextri et prasini ascenderunt. Praecipue in Europa orientali prasini in comitiis victorias conspicuas reportaverunt. Numerus suffragium habentium in Unione Europaea erat quadringentae viginti septem miliones.

Theresa May munus deponet

Theresa May nuntiavit se die septimo mensis Iunii (7.6.) praesidatum factionis conservativae deposituram esse sed munere primae ministrae functuram, donec novus praeses factioni crearetur. Successor Theresae May, qui etiam proximus primus minister Britanniae fiet, a conservativis exeunte mense Iulio creabitur. Iam octo candidati nuntiaverunt se munus competituros esse.

Promotiones Ordinis Philosophorum

Ordo Philosophorum sive Facultas Philosophica Universitatis Helsinkiensis sollemnes promotiones (24.5.) celebravit. Magistri et doctores, qui examinibus ad gradum obtinendum necessariis approbati erant, insignibus academicis ritu antiquo ornati sunt. Magistri coronam lauream et anulum aureum, doctores pileum et gladium, omnes diploma Latinum acceperunt. Qui ante quinquaginta annos (1969) in eadem facultate promoti erant, titulo magistri aut doctoris semisaecularis sunt decorati. Doctores honoris causa promoti sunt novem homines studiis scientificis insignes. Profestrix Marja-Liisa Riekkola, promotrix legitime constituta, promovendis insignia academica obtulit. Celebrationes triduanas saltatio festiva clausit.

Finni in hocceo glaciali magistri

Ludi mundani hoccei glacialis, in Slovakia facti, die Dominico (26.5.) finiti sunt. Superatis tam Suetis quam Russis Finni in certamen finale venerant. Victis Canadensibus numeris tria ad unum (3-1) aurea nomismata obtinuerunt. In certamine de nomismatis aeneis Russi de Tzekis victoriam reportaverunt. Ubi primum eventus certaminum pro certo constitit, cives, qui ludos per televisionem spectaverant, in variis patriae partibus victoriam Finnorum celebrare coeperunt. In foro mercatorio Helsinkiensi circiter decem milia hominum usque ad multam noctem comissabantur et sequenti die, cum lusores in patriam revertissent, in urbis viridario festum populare in gregis honorem institutum est.

Tuomo Pekkanen

24/5/19

Quid Niinistö dixerit

In Finlandia de inaequalitate regionali disputatum est. Hanc quaestionem etiam praesidens Sauli Niinistö tetigit, cum iter provinciale in urbem Joensuu suscepisset. ”Rei publicae”, inquit, ”plurimi interest, ut tota terra incolatur et ruri iuvenes agricolae habitent, qui cibariis proferendis operam dent et de silvis nostris diligenter curent”.

(Reijo Pitkäranta)

De Consilio Europaeo

Maior pars civitatum Consilii Europaei sperat fore, ut Russia in Consilio remaneat. Russi abhinc duos annos pretia societatis exsolvere desierunt, cum Crimaea capta iis in sessionibus generalibus venia loquendi non data esset. In conventu Helsinkii nuper habito statutum est, ut officia Russiae praestanda essent, si particeps negotiorum Consilii esse desideraret.

(Saara Honkanen)

Comitia in Australia

Septimana vergente in Australia comitia parlamentaria habita sunt. Victoriam eorum reportaverunt conservativi et liberales, ex quorum coalitione regimen Australiae hodiernum constat. Eventus suffragii inopinatus erat, nam ex percontationibus opinionum ante electiones factis apparuit factionem operariorum ceteris partibus praevalere. Colloquia comitialia imprimis ad oeconomiam et mutationem climaticam pertinebant.

(Reijo Pitkäranta)

Scandalum Austriae

In Austria scandalum politicum ortum est, quod effecit, ut regimen dissolveretur et in civitate mense Septembri nova comitia haberentur. Causa et origo huius rei est Heinz-Christian Strache, vice-cancellarius foederalis et praeses Factionis libertatis Austriae. Is enim repertus est cum oligarchis Russiae collusisse, ut ab iis diversa commoda acquireret. 

(Reijo Pitkäranta)

De ebola in Congo

Magistratus sanitarii solliciti sunt de febri haemorrhagica periculosissima, quae iam per multos menses in Congo grassatur. Ex eo morbo Ebola vulgo dicto post mensem Augustum amplius mille homines mortui sunt, et numerus contagiorum usque augeri videtur. Opera medicorum aegrotos curantium difficilior redditur conflictibus militaribus, qui illam regionem vexant.

(Reijo Pitkäranta)

Nuntius ex Polonia

In Polonia quaedam mulier senos liberos simul peperit, ut e nosocomio Cracoviensi nuntiatum est. Casus tam rarus est, ut tale quid semel in quattuor aut quinque miliardis partubus fere fiat. Infantes, e quibus quattuor filiae, duo autem filii sunt, per sectionem caesaream in mundum venerunt. Mater et liberi bene valere dicuntur.

(Reijo Pitkäranta)

Dinosaurus alatus

In Bavaria Germanorum novum dinosauri genus repertum est. Ex fossili eius alato apparet illum animantem avis similem fuisse, quippe qui in modum avium hodiernarum alas agitare posset. Quam ob rem inventum recens factum multum ad investigationem volatus avium conferre existimatur.

(Reijo Pitkäranta)

17/5/19

De novo tegimine componendo

Antti Rinne, praeses factionis socio-democratarum, postquam colloquia cum omnium factionum praesidibus habuit, ad consultationes quattuor partes convocavit, quae cum socio-democratis regimen componerent, scilicet Factionem centralem, Prasinos, Sinistram, Sueticam. In oppositione manebunt Conservativi, Democratae Christiani atque Finni veri sive fundamentales, quos Rinne ex consultationibus exclusit. Si hoc consilium perfectum erit, regimen in parlamento ducentorum delegatorum centum septendecim (117) delegatos habebit, oppositio autem octoginta tres (83). Propositum est, ut novum regimen ante Kalendas Iunias a praesidente rei publicae nominari possit, nam a Kalendis Iuliis praesidatus Unionis Europaeae in Finniam ex Romania transibit.

Praesidens Niinistö matres decoravit

Die matrum (12.5.) triginta quinque matres de liberis et familiis optime meritae praemiatae sunt, cum in festo Helsinkii celebrato a praesidente rei publicae Sauli Niinistö nomismata primae classis ordinis Rosae Candidae Finniae acceperunt. Nomisma est matribus indicio laboris pretiosi, quem in sua familia aut in societate praestiterunt.

Ars Samica in Biennali Veneziano exposita

Biennale Venezianum (La Biennale di Venezia) artifices et activistas sociales ex toto orbe terrarum alternis annis Veneziam colligit. Hoc anno in Biennali Veneziano, die Sabbato (11.5.) inaugurato, etiam ars Samica sive Lapponica praesto est. Inter artifices eminent pictrix Outi Pieski et moderatrix documentariorum Suvi West. Outi Pieski exposuit opus ”Ovdavázzit – Forewalkers”, id est ”Praeambulatores”, nominatum. In eo tollit certamen, quod Sami trans limites nationales pro autodeterminatione in terras et aquas ipsorum agunt, atque affirmat necesse esse, ut vita in stabili et durabili cohabitatione cum necessitatibus naturae fundam

entum habeat.

Sinenses et Americani portoria invicem posuerunt

Cum consultationes commerciales inter Sinenses et Americanos (11.5.) rebus infectis finitae essent, praesidens Donald Trump portoria mercium Sinensium ad viginti quinque centesimas auxit. Quae portoria ad quinque milia septingentas (5700) merces pertinent, quarum pretium in commercio mutuo est circiter ducenta miliarda dollarorum. Quo facto ministerium aerarii publici Sinensium contra nuntiavit se mercibus Americanis portoria sexaginta miliardorum dollarorum sive plus quinquaginta trium miliardorum euronum impositurum esse, quae a Kalendis Iuniis valerent. Merces Americanae, ad quas nova portoria pertinent, quinque milia centum quadraginta numerantur.

Papa: abusus sexuales sacerdotum palam faciendi

Papa Franciscus motu proprio litteras apostolicas contra abusus sacerdotum sexuales dedit: Omnes ministri ecclesiae de abusibus sexualibus et suspicionibus sibi notis superioribus nuntiarent; haec pertinere ad acta sexualia contra liberos aliosque homines vulnerabiles, ad materiam pornographicam asservandam, ad crimina sexualia occultanda. Decretum papae etiam ad suspiciones regressivas attinet.

Tuomo Pekkanen

10/5/19

Consilium Articum

Duobus annis proxime praeteritis Finlandia Consilio Arctico praefuit, qui ordo ex octo civitatibus constat. Die Lunae (6.5.) ministri terrarum illius Consilii sociarum in urbem Rovaniemi convenerunt, ut documentum finale ad res arcticas pertinens divulgarent. In participantibus erant Mike Pompeo, minister a rebus exteris Americanorum, et Sergei Lavrov, collega eius Russus. Conventus parum successit, nam ministris non contigit, ut pronuntiationem communem efficerent.

(Reijo Pitkäranta)

Nuntius ex Irania

Praesidens Iraniae nuntiavit civitatem suam recusare, quominus omnes leges tractatus nuclearis internationalis observaret. Nondum autem aperuit, quo modo Irania illud pactum violatura esset. Americani eundem tractatum iam antea servare desierunt, quod praesidens Donald Trump eum suis noxium habebat. Iraniani etiam flagitaverunt, ut sanctiones sibi impositae leviores redderentur. 

(Reijo Pitkäranta)

Oratio imperatoris

Naruhito, imperator novus Iaponiae, cives suos hortatus est, ut cum peregrinis paci gentium conciliandae operam darent. Orationem primam in maeniano palatii Tokiensis multitudine auditorum acclamante habuit. Familia imperatoria nova die Saturni sexies in publicum prodiit. Dies festus inaugurationis mense Octobri agetur.

(Satu Tuominen)

De calamitate aëria

Unus et quadraginta homines vitam amiserunt calamitate aëria, quae die Dominico vesperi in aeriportu Moscuensi accidit. Aeroplanum Russicum, cum iter Murmanskam versus faceret, Moscuam redire coactum est. Ad terram descendens igne correptum est, quo factum est, ut amplius dimidia pars duodeoctoginta vectorum interiret. 

(Reijo Pitkäranta)

Leonardo celebratus

Postridie Kalendas Maias (2.5.) quingenti anni acti erant, cum Leonardo da Vinci, artifex et polyhistor celeberrimus Italianus mortuus est. Ad memoriam eius recolendam Ambaciae, in urbe Francogalliae, sollemnitas celebrata est, cui praesidentes Italiae et Francogalliae intererant. 

(Reijo Pitkäranta)

Status naturae orbis

Paene quingenti investigatores internationales examinaverunt, qualis esset status naturae orbis terrarum. Relatione illius studii edita existimant condicionem naturae globi terrestris tanta velocitate debilitari, ut saltem tertia pars eius ante annum bis millesimum quinquagesimum pereat. Neque illum interitum solum ad herbas pertinere, sed etiam ad omnia animantium genera.

(Reijo Pitkäranta)

Sationes vernae

Mense Maio ineunte hiems gelida cum nivibus et imbribus in Finlandiam rediit, quo factum est, ut progressus veris paulisper tardaretur. Quae quamvis ita essent, sationes vernae in regionibus terrae meridianis iam ad finem fere sunt adductae. Id inde fit, quod ultimi mensis Aprilis dies ad sementem faciendam agricolis idonei erant. 

(Reijo Pitkäranta)

3/5/19

Imperator Iaponiae Akihito potestatem deposuit

Imperator Iaponiae Akihito potestatem deposuit. Kalendis Mais Naruhito filius maximus natu illi successit. In Iaponia imperator his ducentis annis numquam se munere abdicavit, sed petitu imperatoris Akihito, qui octoginta quinque annos natus valetudine laborat, lex mutata est. Dynastia Iaponiae, quae potestatem inde a quinto saeculo tenet, est in mundo vetustissima.

Kim et Putin convenerunt

Vladimir Putin, praesidens Russiae, et moderator Coreae septentrionalis Kim Jong-un Vladivostokii die Iovis (25.4.) convenerunt. Kim censebat pacem in paeninsula Coreana de USA dependere et consilia dolosa, quae Americani in conventu mense Februario in Vietnamia habito ostendissent, durissimis verbis vituperavit. Praesidentem Putin invitavit, ut Coream septentrionalem visitaret.

Novum parlamentum inauguratum

Praesidens Sauli Niinistö novum parlamentum Finniae die Iovis (25.4.) oratione sollemni inauguravit. Politicos annorum proximorum reprehendit, cum dixit eos officia intermisisse et de captis consiliis collegas ministros accusavisse. Hoc decennio iam quinquies administrationem patriae mutatam esse.

Dies veteranorum in Finnia celebratus

Dies militum veteranorum vicesimo septimo mensis Aprilis (27.4.) apud Finnos celebratur, nam illo die anni millesimi nongentesimi quadragesimi quinti (1945) bellum in Lapponia contra Germanos finitum est. Hodie tantum circiter novem milia octingenti veterani Finni vivunt, quorum aetas media est nonaginta quattuor annorum.

Populatio rhinocerotum periclitatur

Numerus rhinocerotum in mundo inter centum quindecim et centum triginta milia esse censetur. Populationi imminent venatores clandestini, habitationes rarescentes, inquinatio morbique. Ante duos annos plus ducenti rhinocerotes in Namibia anthrace perierunt. In viridario nationali Aethiopiae mense Aprili duodetriginta rhinocerotes de causa adhuc ignota mortui reperti sunt.

Interitus silvarum tropicalium imminet

Ordo Global Forest Watch annuam de statu silvarum tropicalium relationem nuper divulgavit. Anno proximo (2018) area silvarum maior quam Belgium disparuit. Silvae maximam partem delentur, ut alimenta, sicut caro bovina, oleum palmarum, socolata producantur. Investigatores praecipue propter silvas pluviales solliciti sunt. Plurimae silvae naturales caesae sunt in Brasilia. In ultimis silvis Brasiliensibus vivunt aborigines, qui numquam cum hominibus occidentalibus consuetudines habuerunt et silvis deletis habitationes perdunt. Magnus est interitus silvarum etiam in Columbia, Bolivia, Africa occidentali. In Ghana et Litore Eburneo etiam propter aurifodinas et culturam cacaonis silvae caeduntur.

Caelum Finniae mane et vesperi rubet

Hoc tempore, sole horizonti appropinquante, caelum Finniae insolito modo rubet. Primum putabatur causam phaenomeni esse pulverem Saharae, qui tempestatibus in altitudinem efferretur et usque ad terras septentriones extenderetur. Postea compertum est diluculum et crepusculum amplissima nube colorari, quae ex polline et cinere incendiorum Russiae et Belorussiae oriretur.

Tuomo Pekkanen

26/4/19

Strages in Srilanca

Die Dominico (21.4.) sive eo ipso die, cum Christiani ubique terrarum festum festorum celebrabant, in Srilanca octo ictus terroristici facti sunt, quibus amplius trecenti homines vitam amiserunt et circiter quingenti vulnerati sunt. Impetus praesertim ad ecclesias catholicas, ubi populus magna multitudine missam sollemnem agebat, nec non ad deversoria viatoribus grata directi erant. Inter mortuos amplius triginta peregrini erant.

(Reijo Pitkäranta)

Impetus condemantur

'Ex octo displosionibus Srilancae omnino sex in urbe principe Colombo acciderunt, sed omnium funestissima facta est in Negombo. Qui fuerint auctores illarum stragium, nondum constat. Sunt autem, qui putent aggressiones alicui gregi islamistico locali attribuendas esse. Papa Franciscus una cum compluribus aliis moderatoribus mundi illos ictus vehementer condemnavit.

(Reijo Pitkäranta)

Novus praesidens Ucrainae

In Ucraina comitia praesidentialia habita sunt, quorum victor manifestissimus evasit Volodymur Zelenskyi. Is enim septuaginta tres centesimas (73%) suffragiorum sibi paravit, cum adversarius eius Petro Poroshenko, praesidens hodiernus, nonnisi viginti quattuor centesimas (24%) acciperet. Zelenskyi est actor fabularum comicarum quadraginta unum annos natus sed etiam iuris consultus.

(Reijo Pitkäranta)

Quid Merkel dixerit

Moderatores Unionis Europaeae Ucrainam laudaverunt, quod per tota comitia leges democraticas et principia legitimitatis observavisset. Angela Merkel, cancellaria foederalis Germaniae, praesidenti Zelenskyi recens electo gratulata est sperans fore, ut res Ucrainae eventu comitiorum stabilirentur. ”Regimen Germaniae”, inquit, ”etiam posthac eo tendit, ut integritas Ucrainae servetur.”

(Reijo Pitkäranta)

De rebus Aegypti

Suffragatores Aegypti mutationes legis fundamentalis approbaverunt, quae potentiam praesidentis et exercitus civitatis augent. Quae cum ita sint, praesidens Abdul Fattah al-Sisi, qui abhinc quinque annos munus iniit, usque ad annum bis millesimum tricesimum (2013) rem publicam administrare potest. Etiam parlamentum Aegypti novas leges accepit.

(Reijo Pitkäranta)

De infarctu cordis

Adhuc pauciores Americani infarctu cordis laborant eoque moriuntur ut ex investigatione recens facta apparet. Hic progressus prosperrimus, qui etiam in Finlandia conspicitur, e multis modis vivendi mutatis ortus est. In his causis sunt fumificatio deminuta, copia cholesteroli inferior reddita, pressio sanguinis minor.

(Reijo Pitkäranta)

Horticultura verna

Quamquam dimidium Finlandiae nive tectum est, in partibus terrae australibus ver tam adolevit, ut labores hortenses inciperentur. Amatores horticulturae consumptionem plasticae deminuere volunt, quam ob rem usum materiarum naturalium in areis hoc anno crebrescere creditur. Horticultores etiam biodiversitatem fovere conantur inserendis plantis, quae papiliones et apes attrahunt.

(Saara Honkanen)

19.4.19

Comiita Finniae parlementaria

In comitiis Dominica palmarum factis in parlamentum Finnorum ducenti delegati in quadriennium creati sunt. De maximo delegatorum numero Socio-democratae et Finni fundamentales et Conservativi diu ex aequo certabant. Suffragiis computatis apparuit Socio-democratas quadraginta (40) delegatis acceptis Finnos fundamentales, qui undequadraginta (39) ceperunt, duabus centesimae decimis suffragiorum superavisse. Tertium locum ceperunt Conservativi (37 delegati), quos sequuntur Factio centralis (31), Prasini (20), Foederatio sinistra (16), Factio popularis Suetica (10), Democratae Christiani (5) ceterique minores. Maximam cladem accepit Factio centralis, quae, cum in priore parlamento undequinquaginta delegatos habuisset, in novo tantum unum et triginta habebit. Eventus comitiorum ostendit campum politicum in Finnia mutatum esse. Iam non sunt tres factiones ceteris superiores sed tres vel etiam quinque admodum magnae factiones et multae minores. Partes centesimae suffragiorum et Socio-democratis et Finnis fundamentalibus et Conservativis datae sunt prope aequales (17,7 – 17,5 – 17%).

Novum regimen componere difficile

Apud Finnos mos est, ut comitiis parlamentariis factis praeses maximae factionis regimen componere conetur. Quod munus nunc pertinet ad praesidem socio-democratarum, qui est Antti Rinne. At ille, sicut et praeses conservativorum Petteri Orpo, ante comitia dixit se cum Finnis fundamentalibus et praeside eorum Jussi Halla-aho vix cooperari posse.

Pars feminarum in novo parlamento aucta

In novum parlamentum plures feminae creatae sunt quam umquam ante. Numerus earum est quattuor et nonaginta (94), quae sunt quadraginta septem centesimae (47%). Ex viginti delegatis prasinorum feminae sunt septendecim, ex quadraginta delegatis Socio-democratarum viginti tres. Inter feminas creatas praeses Foederationis sinistrae Li Andersson viginti quattuor milibus suffragiorum excellit.

Certamen finale hoccei glacialis feminarum

Dominica palmarum in stadio Esboensi certamen finale ludorum mundanorum hoccei glacialis feminarum inter USA et Finniam factum est. Cum feminae Finniae retibus duo ad unum (2-1) superiores factae essent, arbitri recens rete illarum reiecerunt. Plerique hoccei glacialis periti censent victoriam a feminis Finnis inique raptam esse.

Incendium in Notre Dame

In Notre Dame, ecclesia cathedrali Parisiensi, sero die Lunae (15.4.) saevum incendium ortum est. Tectum et turris altissima in eo aedificata corruerunt. Notre Dame, cathedralis plus octingentorum quinquaginta annorum, cor historiae et culturae Parisiensis habetur. Incendium ex laboribus tecti renovandi ortum esse aestimatur. Siphonarii circiter quingenti ignem coercebant et opera artis, quae plurima intra ecclesiam erant, tutabantur. Die Martis flamma et fumus iam non videbantur. Praesidens Emmanuel Macron pollicitus est ecclesiam Notre Dame in pristinum statum restitutum iri. Multae societates et homines privati auxilium ad sumptus renovationis iam promiserunt.

(Tuomo Pekkanen)

12.4.19

Memoria stragis Ruandae

Die Dominico (7.4.) viginti quinque anni acti erant, cum genocidium in Ruanda initium cepit. Die enim septimo mensis Aprilis anno millesimo nongentesimo nonagesimo quarto (7.4.1994) accidit, ut princeps minister´Ruandae, qui e gente Hutuorum erat, a militibus Tutsorum occideretur. Secuta est strages centum dierum, quo tempore octingenta fere milia Tutsorum interfecta sunt.

(Reijo Pitkäranta)

Quid Niinistö dixerit

Die Martis (9.4.) praesidens Finlandiae Sauli Niinistö praesidentem Russiae Vladimir Putin convenit. Hoc factum est Petropoli, ubi conventus Fori Arctici habitus est. Niinistö interrogatus, quid de sanctionibus ab Unione Europaea Russis impositis censeret, ait eas tamdiu valere, quamdiu Russi paeninsulam Crimaeam tenerent et in Ucraina bellum gereretur.

(Reijo Pitkäranta)

Rerum in Libya status

Consilium securitatis Nationum Unitarum exercitum Libyae nationale hortatum est, ne in urbem principem Tripolim invaderet. De petitione impetus intermittendi concorditer decreverat. Regimine ducis Muammar Gaddafi oppresso copiae, quibus dux generalis Khalifa Haftar praeest, regionem orientalem expugaverunt. Hic Haftar administrationem suam cum regimine Tripolitano contendentem habet.

(Satu Tuominen)

Comitia in Israele facta

Die Martis (9.4.) in Israele comitia parlamentaria facta sunt, quorum victor evasit Banjamin Netanjahu, praeses factionis dextrae nomine Likud. Parlamentum Israelis centum viginti sedes habet, e quibus Likud triginta quinque sibi conciliavit. Totidem sibi paravit Unio comitialis caeruleo-alba, quae dicitur. Factio autem Likud una cum partibus sociis principatum parlamenti obtinuit.

(Reijo Pitkäranta)

Inundationes Iraniae

Iam complures septimanae sunt, cum Irania magnis imbribus et inundationibus vexatur. Pessima damna acceperunt regiones civitatis occidentales. Calamitas iam tanta fuit, ut circiter septuaginta homines aquis et labinis terrae vitam amitterent. Paene duo milia vicorum et oppidorum in periculo versantur, et octoginta quinque milia civium domum relinquere coacta sunt.

(Reijo Pitkäranta)

Finlandia urbanior fit

Adhuc plures Finlandenses in maiores urbes migrant. Sunt, qui putent anno bis millesimo quadragesimo (2040) apud nos tres tantum urbes crescentes fore. Alicubi, praecipue in paroechiis ruralibus, numerus incolarum usque deminui videtur. Qui rerum progressus imprimis nativitati decrescenti tribuendus est.

(Reijo Pitkäranta)

De suffragio anticipato

Postridie Idus Apriles (14.4.) sive die Dominico proxime futuro in Finlandia comitia parlamentaria instituentur. More solito civibus occasio data est iam in antecessum suffragandi, qua facultate tertius quisque suffragator usus est. Ante diem enim electoralem plus decies centena milia hominum sententiam tulerunt. 

(Reijo Pitkäranta)

5.4.19

Zuzana Čaputová praesidens Slovakiae

Zuzana Čaputová, candidata factionis Slovakiae Progressivae, praesidens Slovakiae designata est, cum in altero suffragio plus duodesexaginta centesimas sententiarum sibi collegit. In primo suffragio plus quadraginta centesimas acceperat. Čaputová est prima praesidens femina Slovakiae. In ambitione praesidentiali sententiola praeconialis eius erat: ”Surge contra malignitatem”. Fautoribus suis pollicita est se culturam patriae politicam purgaturam esse. Dixit se eventu suffragii gaudere, sed maxime eo, quod fieri potuisset, ut veritas patefieret et studium hominum etiam sine verbis aggressivis suscitaretur. Ambitionem suam ostendisse humanismum, solidaritatem, veritatem esse valores, qui in societate civili magni haberentur.

Immigratores navem petroleariam occupaverunt

Milites exercitus Melitensis impetu facto navem petroleariam ceperunt, quam profugi Africani occupaverant. Navis in portum Valettae, urbis principis Melitae, gubernata est. Petrolearia, in Turciam ascripta, ex aquis litoralibus Libyae centum octo homines servaverat, sed cum profugi comperissent se in Libyam remissum iri, pars eorum navem occupavit. Nauarcho imperavit, ut in Europam, aut in Melitam aut in Lampedusam, insulam Italiae navigaret. At inter navigationem nauarchus exercitum Melitensem appellavit, qui tribus navibus bellicis et helicoptero succurrit. Relatum non est, an in petrolearia occupanda vis adhibita esset. Abductores tamen manicis ligati in carcerem Valettensem coniecti sunt.

Eventus Hora Mundi (Earth Hour)

In eventu ”Hora Mundi” appellato lumina aedificiorum publicorum in variis mundi partibus ad unam horam exstincta sunt. Actio vespere Sabbati, hora locali octava cum dimidio (20.30), in singulis terris iniit. Propositum actionis, iam tertium decimum ab ordine WWF (World Wildlife Fund) institutae, est moderatores mundi de climatis mutatione commonere.

Delphini mortui in litus Galliae eiecti

Numerus insolitus delphinorum mortuorum in litus Galliae Atlanticum hoc anno eiectus est. Iam tribus mensibus huius anni plures delphini in oram eiecti sunt quam toto anno proximo, nam a mense Ianuario saltem mille centum cadavera reperta sunt. Causa mortis plerumque est, quod delphini retibus piscatorum implicati suffocantur.

Numerus civium Finniae paululum crevit

Numerus civium Finniae anno proximo minus quinque milibus hominum (4789) crevit. His quinquaginta annis incrementum tam lentum non fuit. Proximo quinquennio numerus eorum, quorum sermo patrius erat Finnicus, Sueticus aut Samicus, triginta sex milibus decrevit. Eodem tempore numerus linguis peregrinis loquentium circiter centum milibus crevit. Exeunte anno bis millesimo duodevicesimo (2018) plus quam quinta pars populi Finniae sexaginta quinque annos compleverat. Illi autem, qui nondum quindecim annorum erant, octingenta octoginta duo milia (882 000) numerabantur. Numerus officialis populi Finniae anno proximo exeunte fuit plus quinque miliones et dimidium (5 517 919).

Tuomo Pekkanen

29.3.19

Quid Niinistö dixerit

In Finlandia mense Aprili comitia parlamentaria habebuntur. Praesidens Sauli Niinistö una cum praesidibus omnium factionum flagitat, ut in civitate pax comitialis servetur. ”Nemo”, inquit, ”candidatos ullis minationibus aut actibus violentis perturbet!” Constat his diebus apud nos bis evenisse, ut quis alicui politico vim inferre conaretur.

(Reijo Pitkäranta)

Trump non accusatur

Robert Mueller, accusator specialis Americanus, postquam in actiones praesidendis Donald Trump duos annos inquisivit, opus suum perfecit. Ei propositum erat investigare, num Trump, dum praesidatum ambit, cum Russis collusisset. William Barr, minister iustitiae, negavit in relatione recens facta ulla argumenta inveniri, quae probarent praesidentem contra legem egisse. 

(Reijo Pitkäranta)

Isis tandem devictus

Isis, ordo islamitarum terroristicus, iam devictus est. Ultimus locus, ubi bellatores eius adhuc vehementer resistebant, erat vicus nomine Baghuz in confinio Iraquiae et Syriae situs. Copiis Americanis et militibus Syriae democraticis multos menses pugnandum erat, ante quam iis contigit, ut illum vicum in libertatem vindicarent.

(Reijo Pitkäranta)

Reclamationes Algeriae

In Algeria reclamationes vehementes contra praesidentem Abdelaziz Bouteflika continuantur. Bouteflika, qui Algeriae iam per duo decennia praeest, cives suos ad iram irritavit, cum nuntiaret se in proximis comitiis praesidentatum denuo petiturum esse. Quamvis consilio suo deinde destiterit, id non satis putant protestatores, qui postulent, ut Bouteflika statim munus deponat.

(Saara Honkanen)

Navis in periculo maritimo

Die Saturni (23.3.) navis nomine Viking Sky in ora Norvegiae circumvagans in periculum maritimum vocata est. Accidit enim, ut omnia quattuor motra eius mari vehementer fluctuante fungi desinerent. In navi circiter mille quadringenti viatores erant, quorum magna pars helicopteris in tutum deportata est. Maior tamen calamitas evitari potuit. 

(Reijo Pitkäranta)

Siccitas Californiae remisit

In California, quae est una e civitatibus Americae Unitis, hac hieme pluviae solito maiores ceciderunt. Quam ob rem meteorologi septimana proxima nuntiaverunt siccitatem, qua illa regio per septem annos continuos laboravisset, iam praeterisse. Quae mutatio rerum imprimis herbis regionum montanarum profuit, quae magnifice florere coeperunt.

(Reijo Pitkäranta)

De signis veris obviis

In natura Finlandiae iam signa veris apparent. Ornithophili narraverunt se aliquot grues et anseres silvestres in itineribus suis vidisse. Huc accedunt observationes de laris et de cycnis canoris factae, ex quibus patet has aves iam in regiones septentrionales redisse. In locis calidis etiam quidam serpentes et insecta in conspectum venerunt. 

(Reijo Pitkäranta)

22.3.19

Ictus in duas meschitas Novae Zelandiae

In urbe Christchurch Novae Zelandiae Idibus Martiis (15.3.) ictus terroristicus in duas meschitas factus est, in quibus inter preces postmeridianas quinquaginta homines sclopetando occisi, totidem fere vulnerati sunt. Inter victimas erant Pakistani, Turci, Arabes Saudiani, Indonesiani, Malesiani. Auctor sceleris est iuvenis Australianus duodetriginta annorum. Occisor brevi captus et carceratus est. In interreti descripserat se nationalistam et razistam et negaverat se ad ullum ordinem aut gregem pertinere. Se voluisse ulcisci mortem Europaeorum, qui in ictibus terroristicis aggressorum islamicorum perissent. Nuntiavit se advocatum in iudicio nolle et semet ipsum rem suam acturum esse.

Volatus Boeing 737 MAX 8 vetiti

Postquam aeroplanum Boeing 737 MAX 8 nuper (10.3.) in Aethiopia magna cum strage cecidit, volatus eius generis aeroplani primum in tota Europa, deinde in USA et multis aliis in terris vetiti sunt. In similem calamitatem simile aeroplanum Boeing mense Octobri in Indonesia inciderat. Utraque calamitas paulo post, quam aeroplanum ascendit, accidit, et primae investigationes, de quibus Wall Street Journal rettulit, indicant alias quoque similitudines in his infortuniis esse. Quia securitas aeroplani ita in dubium vocata est, volatus eius intermissi erunt, donec causis calamitatis certius cognitis reparationes necessariae in eo perficiantur.

Sculptura Leonardi da Vinci reperta?

In museo Londiniensi (Victoria & Albert Museum) est sculptura ”Virgo et puer ridens”, quam experti Italiani censent a Leonardo da Vinci factam esse. Si recte sentiunt, sculptura est unica, quae ex operibus sculptilibus Leonardi restat. Semper constabat Leonardum sculpturas fecisse, sed nulla ex illis adhuc agnita est. Virgo Maria est in sculptura largis et multiplicibus vestibus induta, quae per crura eius demanant. Eodem tempore, quo opus factum esse creditur, Leonardo da Vinci similes Virginis imagines delineavit. Altera indicatio auctoris est vultus pueri ridentis, cui similes etiam in picturis linearibus Leonardi apparent.

Lex de matrimonio mutatur

Matrimonium ex lege Finniae ab aetate duodeviginti annorum iungi potest. Certis de causis licentia matrimonii etiam minus duodeviginti annos natis concedi potuit, sed nunc hac licentia desistitur. Causa mutationis est sollicitudo de salute liberorum. Exempli gratia causae religiosae aut culturales ad licentiam concedendam non habentur satis bonae. Usum, ex quo matrimonium a minorennibus iungi possit, omnes fere terrae septentrionales iam deposuerunt aut depositurae sunt. Quae cum ita sint, minorennes nulla licentia exceptionali nubere vel coniugem ducere poterunt. Mutatio legis matrimonialis Finnorum, a praesidente rei publicae confirmata, Kalendis Iuniis valere incipiet.

Tuomo Pekkanen

15.3.19

Regimen Finlandiae cecidit

Regimen Finlandiae munere suo fungi desiit. Hoc factum est postridie Nonas Martias (8. 3.), cum princeps minister Juha Sipilä praesidenti rei publicae Sauli Niinistö petitionem dimissionis proposuit. Qui quidem veniam petenti dedit, sed eum rogavit, ut administratio eius, quamvis potestate politica careret, negotia publica expedire pergeret. 

(Reijo Pitkäranta)

Quid Juha Sipilä dixerit

Causa, cur regimen principis ministri Juha Sipilä caderet, ibi invenitur, quod ei non contigit, ut renovationem rei socialis et sanitatis ad effecrum perduceret. Sipilä, cum rationem decreti sui publice redderet, ait se vocem suam internam in consilio faciendo audivisse. Idem dixit se memorem fuisse sententiae, quae diceret ”exitum acta probare’. 

(Reijo Pitkäranta)

De rebus Venetiolae

Res Venetiolae in maximam confusionem vocatae sunt, ut vel inde apparet, quod illa civitas in praesenti a binis praesidentibus administratur. Quorum unus est Nicolas Maduro, alter Juan Guaidó, dux oppositionis. Incolae Venetiolae his septimanis fame, inopia medicamentorum, intermissionibus electricitatis laboraverunt. Ministri tamen recusaverunt, quominus ab Americanis auxilium peterent.

(Reijo Pitkäranta)

De Estonibus in Finlandia

Estones, qui ab anno bis millesimo in Finlandiam immigraverunt, inopiam operariorum hic levant. Hodie quidem plures sunt, qui in patriam redeunt. In Finlandia habitare illis ut antea non iam libet, quod mercedes in Estonia auctae sunt, cum sumptus victuales in Finlandia magni pretii essent.

(Satu Tuominen)

De natura Finlandiae

Natura Finlandiae usque pauperescit, ut ex investigatione nuper divulgata patet. Ex generibus herbarum et animantium duodecim fere centesimae in periculum adductae sunt. Abhinc decem annos illa copia paene duabus centesimis minor erat. Interitus praesertim ad aves pertinet, quam ob rem verbi causa Passer domesticus e Finlandia omnino evanescere videtur.

(Reijo Pitkäranta)

Memoria Rembrandtiana

Hoc anno trecenti quinquaginta anni acti sunt, cum Rembrandt, artifex Nederlandensis celeberrimus, mortuus est. Ad memoriam eius recolendam in Nederlandia per totum annum complures expositiones instituuntur, quibus opera eius in publico proposita sunt. Rembrandt omnino quadringentas fere picturas et magnum numerum aliorum operum artis post se reliquit.

(Reijo Pitkäranta)

Res athletica renovatur

Ambulatio quinquaginta chiliometrorum ex eventibus athleticis maioibus auferetur. Ita constitutum est in conventu, quem Foedus internationale athleticae levis (IAAF) Quatariae habuit. Id decretum post ludos Olympicos in urbe Tokio futuros (2020) valere incipiet. Postea de principatu ambulandi tantum in spatiis brevioribus certabitur.

(Reijo Pitkäranta)

8.3.19

Comitia in Estonia parlamentaria

In comitiis die Dominico actis Estonienses in novum parlamentum unum et centum (101) delegatos creaverunt. Factio dextra-liberalis reformativa triginta quattuor (34) delegatos accepit, factio centralis viginti sex (26), factio patria-conservativa duodecim (12), democratae sociales decem (10). Plurimum crevit EKRE (Eesti Konservatiivne Rahvaerakond), factio populi conservativa, quae sedibus in novo parlamento duplicatis undeviginti (19) delegatos habet. Maximum votorum numerum accepit Kaja Kallas, praeses factionis reformativae, cui viginti milia octoginta tria (20 083) suffragia data sunt. Probabile videtur, ut illa regimini futuro praesideatur. Constitutio autem novi regiminis difficile erit, nam et factio reformativa et democratae sociales iam recusaverunt, quominus cum conservativis (EKRE) cooperarentur.

USA et Corea Meridiana exercitia militaria restringunt.

Exercitia militaria Coreae Meridianae et Americanorum, quibus etiam ducenta triginta milia militum interesse solebant, restringuntur. Ministri defensionis utriusque terrae rem in colloquio telephonico die Sabbati confirmaverunt. Consilium ad id spectat, ut labores ad arma nuclearia Coreae Septentrionalis exuenda sustineantur et tensio militaris in paeninsula Coreana mitigetur.

Venetiae pretium aditus periegetis imposuerunt

Carnevalia Venetiarum hornotina post celebrationes duarum septimanarum die Martis ad finem venerunt. Neque tantum illis diebus sed per totum annum illa urbs amoena et romantica periegetas attrahit. Circiter vicenae quinae miliones viatorum quotannis Venetias visitant, ex quibus autem quaternae denae miliones unum tantum diem ibi versantur. Nuperrime Venetiis constitutum est, ut viatoribus diurnis pretium aditus trium euronum imponeretur. Proximo anno pretium inter sex et decem (6-10) eurones variabit. Sumptus annui purgationis mediae urbis et monumentorum sunt tricenae miliones euronum.

Certamina in Seefeld hiberna

Certamina mundialia athleticae hibernae in Seefeld Austriae finita sunt. Finni, qui praesertim scridatione et desultura scridatoria olim excellebant, rem pessime gesserunt, cum unum tantum nomisma idque aeneum reportaverunt. Inter athletas Finnos optimus fuit Iivo Niskanen, qui certamine scridationis quindecim chiliometrorum tertius fuit.

Lapponia peregrinos usque attrahit

Mense Ianuario pernoctationes peregrinorum in Lapponia circiter ducenta sexaginta septem milia (267.000) numerabantur, quod quinque fere centesimis (5%) plus erat quam anno ante. Plurimos periegetas Lapponia ex Francia attraxit, sed etiam numerus Asiaticorum plus quindecim centesimis (15%) crevit. Numerus autem Britannorum et Russorum in Lapponia paulo minor erat quam ante.

Aer in Finnia purus

Ex relatione de qualitate aeris (2018 World Air Quality), quam ordines Greenpeace et Airvisual hac septimana divulgaverunt, nonaginta centesimae (90%) hominum aerem inquinatum spirant. Finnia autem qualitate aeris secundo loco post Islandiam posita est. Pessima est qualitas aeris in Bangladesa, Pakistania, India, Afganistania, optima, praeter Islandiam et Finniam, in Australia, Estonia 

1.3.19

Kim et Trump convenerunt

Kim Jong-un, dux Coreae Septentrionalis, et praesidens Donald Trump in Vietnamia convenerunt de dearmatione nucleari collocuturi. Nec tamen iis contigit, ut concordiam invenirent, sed rebus infectis ex conventu domum redierunt. Id inopinate factum est, quod Kim paulo ante dixerat se ad arma nuclearia exuenda paratum esse. Trump autem censuit illum id tantum voluisse, ut sanctiones Coreanis impositae tollerentur.

(Reijo Pitkäranta)

India Pakistaniam aggressa

Aëroplana militaria Indiae impetum in fines Pakistaniae fecerunt. Agitur de prima aggressione, postquam illae terrae anno millesimo nongentesimo septuagesimo primo (1971) inter se bellum gesserunt. Propositum erat, ut castra exercitationis, quae musulmani in locis montuosis Casmiriae habebant, bombardationibus delerentur. Dicuntur trecenti fere bellatores islamistae illa incursione vitam amisisse. 

(Reijo Pitkäranta)

Comitia in Nigeria facta

In Nigeria comitia praesidentialia habita sunt. Suffragiis enumeratis apparuit praesidentem hodiernum Muhammadu Buhari quinquaginta sex centesimas (56%) suffragiorum sibi conciliavisse itaque effecisse, ut munus obire pergeret. Ad urnas nonnisi tertius quisque civis adiit. Observatores internationales tamen de multis vitiis in electionibus conspicuis narraverunt.

(Reijo Pitkäranta)

Insulae Ovinae reparantur

Ultima septimana mensis Aprilis viatores peregrini ab Insulis Ovinis omnino prohibebuntur. Tum enim nonnisi centum homines voluntarii illuc admittentur, qui insulanis indigenis in variis operibus publicis auxilium ferant. Eorum erit inter alia calles et semitas reparare, signa viarum erigere, varia loca damnis affecta in pristinum statum restituere. 

(Reijo Pitkäranta)

Niinistö sectionem subiit

Nuntiatum est praesidentem Finlandiae Sauli Niinistö vitio articulari laborare, quam ob rem die Mercurii (27.2.) operationem coxae chirurgicam subiret. Negatur tamen eam sectionem impedire, quominus munera sua praesidentialia solito more exsequatur. Vetitus est tamen itinera aëria septimanis proxime futuris facere. 

(Reijo Pitkäranta)

Institutum Romanum Finlandiae

Septimana vergente Fundatio Institutum Romanum Finlandiae anniversarium octogesimum in urbe Helsinki agebat. Quod opus eo spectat, ut civibus academicis Finlandiae occasio detur studia antiquitatis in urbe Roma exercendi. Inter cenam sollemnem Eva Margareta Steinby, profestrix de illa fundatione optime merita, nomismate argenteo honorata est.

(Reijo Pitkäranta)

Glacies in Finlandia minuuntur

Tempus, quo aquae glacie duratae sunt, in Finlandia manifeste contractum est. Quod apparet ex dissertatione in Universitate Helsinkiensi nuper divulgata. In investigatione etiam notatum est propter calefactionem climatis difficilius esse quam ante firmitatem glaciei aestimare. Commonetur glaciem in magna parte Finlandiae australis interdum per totam hiemem periculosam remanere.

(Saara Honkanen)

22.3.19

Comitia in Hispania praematurae

Pedro Sanchez, minister primarius Hispaniae, nuntiavit comitia parlamentaria praematura exeunte mense Aprili futura esse. Regimen socialistarum, quod tantum octo menses potestatem apud Hispanos habuit, intra quattuor annos iam tertia coalitio fuit. Dispensatio regiminis oeconomica in parlamento reiecta est, cum partes Catalonienses eam non sustinerent. Cataloniensibus non suppetebat, quod Sanchez pedetemptim cum eis consultare conabatur, sed Quim Torra, dux regionis, flagitavit, ut in colloquiis autonomia Cataloniae tractaretur. Id Sanchez accipere noluit.

Praeterea Catalonienses aegre ferebant, quod ducibus eorum, qui independentiam Cataloniae agebant, crimen seditionis in iudicio illatum est.

Trump statum necssitatis declaravit

Praesidens Donald Trump, postquam se statum necessitatis declaraturum esse diu minitatus est, denique (15.2.) rem exsecutus est. Causa necessitatis interposita ille pecunias ministeriorum et defensionis et aerarii publici ad murum contra Mexicum aedificandum transferre conatur. Consilium praesidentis animos tam republicanorum quam democratarum sollicitat. Ex constitutione Americanorum pecuniae publicae tantum ad res a legiferis definitas adhiberi possunt. Praesidens autem ad publicam dispensionem oeconomicam potestatem non habet – nisi necessitate urgente. Itaque declaratio praesidentis institutiones democratiae Americanae labefactat. Veri similiter legalitas declarationis praesidentis in iudicio examinabitur.

El Chapo in iudicio

Joaquín Guzmán, Mexicanus dominus drogarum et pristinus dux chartelli Sinaloa, vulgo ”El Chapo” (”salaputium”) appellatus, in iudicio Brooklinensi reus omnium criminum, quibus accusabatur, compertus est. Inter viginti quinque annos centum quinquaginta quinque tonnas cocaini ex Mexico in USA furtim importandas curavisse dicitur.

Applicatio telephonica feminas custodit

Ordines iuribus humanis defendendis atque politici Americani applicationem telephonicam reprehenderunt, qua viri in Arabia Saudiana feminas earumque motus melius quam ante sequi possunt. Regimen autem Saudianum asseverat illam applicationem tantum ad servitia electronica expedienda spectare, exempli gratia ad syngraphos visaque petenda.

Ursi maritimi in Nova Semlia famelici tumultuantur

In Nova Semlia, quae ex duabus insulis in Mari Glaciali Arctico positis constat, greges famelici ursorum maritimorum cibum quaerentes etiam in domos incolarum penetrare coeperunt. Homines timent neque parentes filios in scholam mittere audent. Cibus principalis ursorum maritimorum est phoca, quae glaciariis arcticis decrescentibus difficilius captatur.

Mare Mortuum arescit

Mare Mortuum, quod est inter Iordaniam et Israelem, quadringentis triginta metris infra superficiem maris iacet. Aquam ex flumine Iordane accipit sed emissarium non habet. Propter nimium aquae usum et evaporationem siccitate auctam superficies eius quotannis circiter metrum descendit et ante annum bis millesimum quinquagesimum omnino disparere aestimatur.

Tuomo Pekkanen

15.2.19

Cura senum neglecta

Animi Finnorum his diebus commoti sunt nuntiis, quibus narratur, quam male et indiligenter senes in gerontocomiis curentur. Valetudini et sanitati eorum nonnumquam tam male provideri dicitur, ut non multum abesse videatur, quin curatores sceleris accusati in ius vocari possint. Huc pertinet, quod medici in his institutis laborantes non satis saepe senes aegrotos visere dignantur.

(Reijo Pitkäranta)

De rebus Iraniae mutatis

Die Lunae (11.2.) quadraginta anni acti erant, cum res in Irania eversae sunt. Anno millesimo nongentesimo undeoctogesimo (1979) accidit, ut Mohammad Reza Pahlavi potestate amissa in exilium proficisci cogeretur, et regnum eius in rem publicam islamicam mutaretur. Primus dux Iraniae novi ordinis erat antistes shiitarum Ruhollah Khomeini.

(Reijo Pitkäranta)

Sinae a Turcis accusatae

Moderatores Turciae Sinas accusaverunt, quod Uiguros male tractarent eosque in castra carceralia inclusissent. Hami Aksoy, orator ministerii a rebus exteris Turciae, ait facinora a magistratibus Sinarum in Uiguros commissa generi humano pudori esse. Constat Uiguros, quorum lingua sermoni Turcico similis est, in regione Sinarum autonomica nomine Xinjiang habitare. 

(Reijo Pitkäranta)

Forsström socia Academiae

Tua Forsström, poetria Finlandensis septuaginta unum annos nata, nova socia Academiae Suetiae electa est. Illius Academiae est inter alia de Nobelistis litteraturae decernere. Nemo civis Finlandensis umquam ante eodem honore affectus est. Vacabat munus, cum Katarina Frostenson id deponere coacta esset.

(Reijo Pitkäranta)

Morbilli increbruerunt

Octoginta duo fere milia hominum anno praeterito morbillis in Europa implicita sunt, ut ex Ordine mundi sanitario dicitur. Numerus eorum tunc triplex factus est maximusque erat hoc decennio. Maximopere auctus est, cum morbilli in Ucraina vehementer diffunderentur. Ibi quinquaginta tria milia hominum morbo illo affecta sunt.

(Satu Tuominen)

Insecta mundi rarescunt

Copia insectorum in orbe terrarum celerrime deminuitur, ut ex investigatione internationali nuper divulgata patet. Nisi huic regressui finis impositus erit, periculum est, ne omnia insecta centum annis ex globo terrestri evanescant. Interitus eorum efficiet, ut systema oecologicum totius mundi ad summum discrimen adducatur. 

(Reijo Pitkäranta)

Quid Philipp decreverit

Princeps Philip, coniux reginae Britanniae Elisabeth II, licentiam vehicula gubernandi sua sponte deposuit. Mense Ianuario dux Edinburgensis nonaginta septem annos natus autocinetum suum in aliud vehiculum illiserat, quo factum est, ut aliquot vectores leviter laederentur. Paulo post a custode publico de usu baltei securitatis neglecto reprehensus erat.

(Reijo Pitkäranta)

8.2.19

Papa Franciscus emitatus Arabicos visit

Papa Franciscus inter triduum (4.-7.2.) emiratus Arabicos visit. Fuit primus papa, qui in paeninsulam Arabicam iter fecit. Propositum itineris principale erat colloquium inter religiones promovere. In Abu Dhabi die Martis missam sub divo celebravit, ad quam auscultandam circiter centum septuaginta milia hominum convenerant. Maior conventus publicus in emiratibus Arabicis numquam fuisse dicitur. Quamquam plerique homines, qui in emiratibus vivunt, sunt musulmani, nihilo minus paene decies centena milia catholicorum in eis habitare aestimantur. Ex quibus maior pars ab India aut Philippinis insulis oriunda est.

USA ad finem Mexici paene 4000 militum submittit

Pentagon nuntiavit paene quattuor milia militum Americanorum custodibus limitis Mexicani submissum iri, qui immigrationem arcerent. Die Dominico (3.2.) praesidens Donald Trump denuo flagitabat, ut securitas limitis firmaretur et murus contra Mexicum aedificaretur. Ait nullam sine muro esse securitatem, sed tantum clandestinum hominum commercium, drogas, omnis generis criminales.

Indignatio civium in Russia crescit

Levada, quod centrum est demoscopiis et investigationibus sociologicis in Russia faciundis, rettulit indignationem civium in politicam huius temporis celeriter crevisse. Quadraginta quinque centesimis (45%) civium cursum politicae hodiernum displicere, cum anno ante centesimae indignantium essent duodetriginta (28%). Maxime indignationem civium movent condiciones vitae in peius mutatae. Nam reditus familiarum decreverunt eodem tempore, quo vectigal valoris adiuncti auctum est. Praecipue ingratum civibus fuit, quod aetas in pensionem dimittendi quinque annis aucta est. Quo fit, ut etiam praesidens Vladimir Putin minore apud populum gratia valeat quam ante.

In Aegypto quinquaginta mumiae repertae

Quinquaginta mumiae aetatis Ptolemaicae (305-30 a.Chr.n.) ab archaeologis Aegyptiis repertae sunt. Iacebant in cella sepulcrali subterranea in oppido Minya, quod circiter ducenta sexaginta chiliometra in meridiem ab urbe Cairo distat. Investigatores censent in cella sepultam esse familiam, cuius membra in societate insignem statum habuerint. Praeter feminas virosque, inter mumias sunt duodecim pueri et sex animalia, imprimis canes. Quaedam ex mumiis in arcis saxeis linteis involutae iacebant, aliae in terra positae erant. Canes ibi sepulti veri similiter deliciae defunctorum fuerant. Aetatem sepulcri archaeologi testulis et fragmentis papyrorum ibidem repertis definire potuerunt.

Matti Nykänen morte peremptus

Matti Nykänen Finnus, quater Olympionices in desultura scridatoria, inopinanter domi suae nocte post diem Dominicam mortuus est. Erat quinquaginta quinque annos natus. In genere suo in optimis omnium temporum agonistis habetur, qui praeter victorias Olympicas sexies magister mundi et quater victor tropaei mundi factus est.

Tuomo Pekkanen

1.2.19

Löfven Helsinkium visit

Septimana ineunte Stefan Löfven, princeps minister Suetiae recens delectus, iter in Finlandiam suscepit. Die Lunae (28.1.) praesidentem Sauli Niinistö, postridie eius diei collegam suum Juha Sipilä in urbe Helsinki convenit. In colloquiis eorum relationes mutuae tractabantur, sed etiam summae quaestiones ad Unionem Europaeam pertinentes propositae erant.

(Reijo Pitkäranta)

Novum nomen Macedoniae

Parlamentum Graeciae pactum historicum probavit, ex quo civitati Macedoniae nova appellatio Macedonia Septentrionalis inderetur. Decursu annorum Graeci nomini terrae vicinae hodierno tam vehementer adversabantur, ut inter alia impedirent, ne Macedonia in societatem Unionis Europaeae accederet. Consensus auxilio Nationum Unitarum factus finem imponit discordiae, quae relationes internationales per tria decennia arrosit.

(Saara Honkanen)

Rerum in Venetiola status

In Venetiola contentio de potestate inter praesidentem Nicolás Maduro et ducem oppositionis Juan Guaidó orta est. Discordia eo venit, ut Guaidó se praesidentem civitatis profiteretur. Etiam moderatores nationum praepotentium se illi discrimini immiscuerunt. Russi enim regimini hodierno favent, Americani autem cum adversario eius stant. 

(Reijo Pitkäranta)

De rebus Afganistaniae

In urbe Quataria pactum de bello in Afganistania componendo adumbratum est. Dicunt inter Talibanos et legatum specialem Americanorum convenisse, ut copiae peregrinae ex Afganistania reducerentur idque duodeviginti mensibus post, quam foedus pacis approbatum esset. Talibani polliciti sunt se impedituros esse, ne ordo terroristicus al-Qaida in Afganistania consideret.

(Reijo Pitkäranta)

De conventu climatico

Quinque terrae septentrionales viribus coniunctis mutationem climaticam coercere et in hac re ceteris civitatibus exemplo esse conantur. Ministri Finlandiae, Suetiae, Norvegiae, Daniae, Islandiae conventu in urbe Helsinki habito edictum divulgaverunt, quo alias nationes hortantur, ut pacto climatico Parisiensi servato eo spectent, ne temperatura media annis futuris sesquigradum Celsianum excedat.

(Reijo Pitkäranta)

Hispania in ius vocatur

Fieri potest, ut Regnum Hispania ab Unione Europaea in ius vocetur, quod regioni uliginosae nomine Doñana tutandae non satis bene providerit. Agitur de viridario nationali in provincia Vandalicia sito, quod multis herbis et animalibus rarissimis excellit. Dicuntur iam complures anni esse, cum Hispani de natura illius loci protegenda nihil curent. 

(Reijo Pitkäranta)

Dania minime corrupta

Hac septimana novissimus index corruptionis palam factus est. Centum octoginta quinque civitatibus inter se comparatis apparuit Daniam anno proximo corruptione purissimam fuisse. Secundum locum obtinuit Nova Zelandia, tertium Finlandia una cum Suetia, Singapura Helvetiaque.

(Reijo Pitkäranta)

25.1.19

Stefan Löfven primus minister Suetiae

Stefan Löfven, praeses factionis socio-democraticae, a parlamento Suetiae primus minister creatus est. Qui quidem eodem munere etiam in priore regimine fungebatur. Löfven novum regimen una cum factione prasinorum constituit. Postquam comitia parlamentaria mense Septembri facta sunt, de novo regimine componendo inter partes politicas diu frustra consultatum est. Maxima causa morae fuit, quod ceterae partes politicae cum factione Sueco-democratica consultare noluerunt. Denique factiones et centralis et liberalis, ut Sueco-democratas excluderent, se Stefanum Löfven sustenturas esse promiserunt. Factio Sueco-democratica, quae immigrationi obsistit, his annis re vera ad colloquium politicum in Suetia haud parvam vim habuit.

Limitatio velocitas in vias Germaniae autocineticas proponitur

Commissio, quam Ministerium Germaniae commeatus publici posuit, suadet, ut in viis autocineticis Germaniae velocitas horalis ad centum triginta chiliometra circumscribatur. In quibusdam viis velocitas iam ad centum viginti aut centum triginta chiliometra limitata est, sed in plerisque stratis autocineticis velocitas nullo modo circumscribitur. Argumentum commissionis est, quod emissiones commeatus minui non potuerunt sed his annis usque creverunt. Ergasteria autem autocinetica et autoraedarii Germaniae circumscriptionibus vehementer obstiterunt. Velocitas horalis inter centum quinquaginta et centum octoginta (150-180) chiliometra est in viis autocineticis admodum communis et autoraedarii ducenta chiliometra superantes haud raro in Germania occurrunt.

Methanum ex glaciariis continentalibus solvitur

Propter calefactionem climatis liquefactio glaciariorum continentalium magis acceleratur quam antea praevisum erat. Liquefactione fit, ut superficies maris surgat et vitae hominum in ora maritima habitantium immineat. Dum aquae ex glaciariis continentalibus solvantur, magnae copiae methani in atmosphaeram continenter liberantur. Methanum autem est gasum thermogenum, quod clima vel vicies fortius calefacit quam carboneum dioxydatum. Ita in regione arctica ortus est periculosus circulus vitiosus: calefactio climatis glaciem solvit, unde in atmosphaeram methanum liberatur, et methanum clima magis calefacit. Haec investigatoribus Universitatis Bristoliensis debemus.

Potio cafeae valetudini prodest

Investigationes in variis terris factae ostendunt cafeam multis modis valetudini prodesse. Cafea corpus recreat et moderate sumpta etiam mortem praematuram et morbos cardiovasculares prohibere potest. Ut bonus effectus potionis quam maximus sit, cavendum est, ne in cafeam saccarum et cremum addantur neve crustula vel placentulae una sumantur.

Iivo Niskanen agonista anni 2018

De optimo in Finnia athleta anni proximi (2018) a moderatoribus actorum athleticorum suffragium factum est. Primo loco positus est scridator Iivo Niskanen, qui ab Olympiis hiemalibus in Corea Meridiana celebratis nomisma aureum certaminis quinquaginta chiliometrorum reportavit. Secundum locum cepit scridatrix Krista Pärmäkoski, tertium biathleta Kaisa Mäkäräinen.

Tuomo Pekkanen.

18. 1.19

Suffragium in parlamento

Die Martis (15.1.) in parlamento Britanniae suffragium latum est de pactione, quam princeps ministra Theresa May cum Unione Europaea fecerat. Agebatur de condicionibus, quibus Britannia ex Unione Europaea exiret. Sententiis computatis apparuit conventionem a parlamento manifestissime improbatam esse. Quin etiam quadringenti triginta duo (432) delegati pactioni adversati sunt, cum nonnisi ducenti duo (202) eam approbarent.

(Reijo Pitkäranta)

May fiduciam accepit

Die Mercurii (16.1.) princeps ministra Britanniae Theresa May a parlamento fiduciam accepit. Quo facto affirmavit se id agere pergere, ut Britannia a societate Unionis Europaeae secederet. Legatos parlamentares hortata est, ut viribus coniunctis in hoc opere se adiuvarent.

(Reijo Pitkäranta)

Niinistö iter in Sinas fecit

Septimana ineunte praesidens Finlandiae Sauli Niinistö cum coniuge iter officiale biduanum in Sinas fecit, ubi collegam Xi Jinping convenit. Colloquia praesidentium ad rationes inter utramque nationem intercedentes, ad necessitudines civitatum praepotentium, ad alia argumenta internationalia pertinebant. Etiam quaestio, qualis esset status iurum humanorum in Sinis, in promptu fuisse dicitur.

(Reijo Pitkäranta)

De Curilibus consultatur

Russi cum Iaponiensibus de pace consultare coeperunt, ut discordiam de Insulis Curilibus iam abhinc multa decennia ortam componerent. Primus conventus die Lunae (14.1.) Moscuae habitus est. Colloquia de pace initium ceperunt, cum praesidens Vladimir Putin primum ministrum Iaponiae mense Novembri convenisset.

(Reijo Pitkäranta)

Quid Kim Jong-un dixerit

Kim Jong-un, dux Coreae Septentrionalis, praesidentem Sinarum Xi Jinping Pekini visitavit. Promisit ex conventu cum praesidente Donald Trump futuro secuturum esse, ut civitates per totum mundum contentae essent. Speravit enim fore, ut discrimen ad paeninsulam Coreanam pertinens solveretur. Praesidens Xi Jinping dixit Coreanis nunc opportunitatem memorabilem oblatam esse. 

(Satu Tuominen)

Quid praesidens dixerit

Animi Finnorum commoti sunt stupris et violationibus, quibus puellae minorennes in urbe Oulu et Helsinki expositae sunt. Neque abest suspicio, quin illa scelera ab hominibus alienigenis commissa sint. Sauli Niinistö, praesidens Finlandiae, sententia publica divulgata negavit permitti posse, ut immigrantes, qui in Finlandia asylum accepissent, civitatem intutam redderent. 

(Reijo Pitkäranta)

Nives in media Europa

Nives his septimanis in media Europa cadentes effecerunt, ut amplius viginti homines labinis nivium aut aliis calamitatibus morerentur. Quantae tempestates nivosae in Austria saevierint, vel inde apparet, quod acervi nivium ibidem tria fere metra alti sunt. Bavariae status necessitatis propter caeli asperitatem paulisper indictus est.

(Reijo Pitkäranta)

11/1/19

Annus 2018 quartus inter calidissimos

nter historiam climaticam statisticis conditam mundus numquam fuit calidior quam proximis quattuor annis. Omnium calidissimus fuit annus bis millesimus sextus decimus (2016), quo regionem Oceani Pacifici phaenomenon ”El Nino” appellatum calefecit. Ceteri anni calidissimi fuerunt bis millesimus septimus decimus (2017) et bis millesimus quintus decimus (2015). Proximus annus (2018) quartus inter calidissimos fuit. Ex quo sequitur, ut quadriennium a bis millesimo quinto decimo ad bis millesimum duodevicesimum (2015-2018) fuerit calidissimum statisticis conditum. Sollicitudinem paravit, quod clima etiam in regionibus arcticis calidius fiebat. Et Australia inter magnam anni partem aestu et siccitate laboravit.

Irania naves bellicas in Oceanum Atlanticum occidentalem mittet

Sedes Iraniae nuntiis divulgandis rettulit naves bellicas in Oceanum Atlanticum occidentalem primo vere ab Iranis missum iri. Iter, quod quinque menses durabit, tres aut quattuor naves suscipient, quae Venezuelam aliasque terras visitabunt. Iraniam vexat, quod naves aeroplanigerae Americanorum continuo in Sinu Persico adsunt. Ideo Irania iam diu modum quaerit, quo ad has minas sibi ab USA intentas respondeat. Mense Decembri summus officiarius nauticus a parte Iraniae monuit naves Iranicas in aquis Americanis propinquis navigare posse, quia etiam Americani prope Iraniam navigarent.

Samsung de exitu praemonuit

Samsung, societas technologica Coreana, de exitu minus fausto praemonuit: Lucrum ultimorum trium mensium anni praeteriti fuisse paene triginta centesimis minus quam eodem tempore anni superioris. Societas rettulit venditionem decem centesimis decrescere et praemonuit etiam lucrum anni currentis minus fore quam ante.

Finni plus quam ante peregrinantur

Finni plus quam ante peregrinantur neque calefactio climatis consuetudines feriandi mutavisse adhuc videtur. Pecuniae Britanniae, Turciae Suetiaeque peregrinis sunt proficuae ideoque itinera in illas terras a quinque centesimis usque ad decem centesimas (5-10%) hoc anno augescere aestimantur. Etiam Graecia, Bulgaria, Aegyptus plures quam ante viatores attrahunt. Thailandia autem, ubi pecunia baht est admodum cara in relatione ad euronem, et Hispania aliquantum ex pristina gratia amiserunt. In Turcia inflatio fuit vehemens, nam libra Turcica dimidium valoris biennio perdidit, quod pretiis mercium celeriter augescentibus difficultates indigenis paravit.

Iuvenes Finni magistri mundani hoccei glacialis.

Ludi mundani hoccei glacialis iuvenum Vancuverii ad finem venerunt. In certamine finali die Epiphaniae (6.1.) facto grex Finnorum Americanos retibus tribus ad duo (3-2) superavit. Neque id primum factum est, nam iam quater antea iuvenes Finni eandem palmam ex ludis mundanis reportaverunt. Tertium locum occupavit Russia, quae Helvetiam quinque retibus ad duo (5-2) vicit.

Tuomo Pekkanen

4/1/19

Quid Niinistö dixerit

Sauli Niinistö, praesidens Finlandiae, Kalendis Ianuariis more solito nationi orationem publicam habuit. Monuit Europaeos de iis ipsis rebus, quas in pretio haberent, vehementer rixari coepisse. Valde dolebat, quod Lutetiae Parisiorum, in eadem urbe, ubi finis primi belli mundani paulo ante celebratus esset, motus violenti orti essent.

(Reijo Pitkäranta)

Continuatio orationis

Praesidens Niinistö, dum orationem continuat, haec quoque sibi sollicitudini esse dixit: potentiam Sinarum usque augeri, Russos se rursus armis munire, Americanos de medio internationali recedere. Huc accedere, quod condicio climatis totius mundi in peius mutaretur et immigratio populorum vix iam coerceri posset. Quae quamvis ita essent, in mundo etiam multas res laude dignas inveniri.

(Reijo Pitkäranta)

Nuntiatio fausti anni

Praesidens Russiae Vladimir Putin collegae suo Americano Donald Trump bonum annum novum exoptavit. Quo nuntio divulgato dixit Russos paratos esse de quibusvis negotiis cum Americanis colloqui. Anno praeterito ineunte similem pronuntiationem ediderat, qua speravit fore, ut relationes inter utramque nationem intercedentes in statum quo ante restituerentur.

(Reijo Pitkäranta)

Praesidatus Unionis Europaeae

Kalendis Ianuariis (1.1.) praesidatus Unionis Europaeae ex Austria in Romaniam transiit. Civitatis praesidis est de legibus in Consilio Europaeo scribendis curare et ad modum conciliatricis id agere, ut terrae sociae inter se sine discordia cooperentur. Inde a Kalendis Iuliis usque ad finem huius anni Finlandia Unioni Europaeae praeerit.

(Reijo Pitkäranta)

De tempestate hiberna

Novo anno ineunte regiones maritimae Finlandiae et totius Scandinaviae tempestate saevissima affligebantur. Vis ventorum tanta erat, ut non multum abesset, quin illa procella typhon appellaretur. Velocitas tempestatis amplius tricenorum, passim etiam quadragenorum metrorum singulis secundis erat et altitudo fluctuum complura metra effecit. Imprimis loca Alandiae multa damna acceperunt.¨’

(Reijo Pitkäranta)

Equus Pompeiis repertus

Equus currui iunctus in terra cineris plena egregie conservatus Pompeiis repertus est. Stabulum, ubi equus una cum duobus aut tribus aliis equis iacebat, in lucem venit, cum archaeologi excavationes in vicinitate cuiusdam villae antiquae facerent. Existimatur possessor horum aedificiorum dux magni ponderis in exercitu Romano fuisse.

(Saara Honkanen)

Olli luctatrix optima

Petra Olli, athleta Finlandensis, luctatrix anno proximo optima renuntiata est. Hunc honorem ei Foedus luctationis internationale anno vergente concessit. Illud praemium decem milium francorum Helveticorum est. Constat Petram mense Octobri in serie feminarum sexaginta quinque chiliogrammatum principatum luctandi mundanum consecutam esse.

(Reijo Pitkäranta)

28.12.18

Colloquium informaticum praesidentis Putin

Praesidens Russiae Vladimir Putin colloquium annuum diurnariis edocendis Moscuae (20.12.) habuit. Initio monuit renovationes technologicas in Russia necessarias esse. Cum diurnarius Ucrainus de conflictu in freto Kerts facto interrogavisset, Putin repetivit, quod antea dixerat, ibi agi de provocatione Ucrainae, quae ad gratiam praesidentis Poroshenko augendam spectaret. Iaponicus autem diurnarius de insulis Curilibus meridianis quaesivit, quot ex eis Iaponiae redderentur. Putin dixit arma in eis insulis collocata esse defensiva, statum hodiernum non esse normalem et se credere pactum de eis inter partes fieri posse. Rem autem esse complicatam. Ad quaestionem de sanctionibus oeconomicis Putin respondit: Russiam sanctionibus et bellis commercialibus propter historiam suam assuefactam esse. Sanctiones potius oeconomiam illarum terrarum miseram reddidisse, quae eas posuissent. Denique, cum interrogaretur, an matrimonio iunctus esset, Putin dixit se esse virum probum, qui ocius serius de ea re curaret. De Afganistania censebat necesse esse talibanos ad consultationes de pace admittere, quia tantam partem terrae administrarent. Dixit etiam se sperare fore, ut relationes cum Britannia in normalem statum reducerentur; Theresam May nullam aliam facultatem nisi voluntatem populi auscultandi et exitum ex Unione Europaea pergendi habere.

Mattis Aedes Albas relicturus

James Mattis, minister a defensione Americanorum, ante novum annum Aedes Albas relicturus est. Causa esse dicitur, quod de rebus gerendis cum praesidente Donaldo Trump dissentit. Ita se in numerum illorum hominum adiunxit, qui ex grege interiore praesidentis sua sponte abierunt aut dimissi sunt. Mattis dicebatur fuisse ”ultimus vir adultus” administrationis, qui praesidenti Trump obsistere potuisset. Pertinacia eius iam diu praesidentem irritaverat. Mattis censet bonas ad foederatos relationes Americanis esse necessarias. Inter regimen praesidentis Trump consuetudines Americanorum cum compluribus terris Europaeis multum variaverunt.

Dies iam fiunt longiores

Die vicesimo secundo (22.12.) fuit solstitium brumale, quo tempore in hemisphaerio septentrionali dies est totius anni brevissimus, nox longissima. In partibus Finniae maxime septentrionalibus nox hiemalis usque ad medium mensem Ianuarium durat. In urbe Helsinki aliisque regionibus Finnorum meridionalibus brevissimus anni dies fuit minus sex horarum.

Novum annum faustum exoptamus

Nuntii Latini a Radiophonia Finnica Generali iam plus undetriginta annos septimanatim emittuntur et novo anno bis millesimo undevicesimo more solito tam radiophonice quam in interreti continuabuntur. Restat, ut auscultatoribus Nuntiorum Latinorum gratias pro fidelitate eorum agamus et novum annum faustum felicem fortunatumque exoptemus.

21.12.18

De bello civili Syriae

Donald Trump, praesidens Civitatum Americae Unitarum, copias Americanas ex Syria domum revocaturus est. Americani non iam eo spectare videntur, ut regimen praesidentis Bashar al-Assad evertatur. Dicunt eos administrationem novam et hodiernae dissimillimam in Syria videre velle, sed iis in animo non esse praesidentem al-Assad munere demovere. 

(Reijo Pitkäranta)

Tumultus in Hungaria

His diebus multa milia hominum in Hungaria ministro principi Viktor Orbán et regimini eius vehementer reclamitaverunt. Agmina tumultuantium ante sedem societatis radiophoniae generalis congregata dictis probrosis editis televisionem publicam de mendaciis accusaverunt. Tumultus initium ceperunt, cum lex rogata esset, ut tempus laborandi annuum longius redderetur.

(Reijo Pitkäranta)

De ecclesia Ucrainae

Ecclesia Ucrainae orthodoxa, quae plus trecentos annos patriarchatui Moscuensi subiecta erat, coniunctionem cum Russis dissolvere et sui iuris fieri constituit. Hoc decretum factum est in Ecclesia cathedrali Sanctae Sophiae in urbe Kiovia sita, quo synodus episcoporum et sacerdotum Ucrainae convenerat. Illi concilio etiam Petro Poroshenko, praesidens civitatis, interfuit.

(Reijo Pitkäranta)

Investigatio oecologica

Centum fere agricolae Finlandenses investigationem internationalem nomine Carbon Action participant. Eorum est explorare, quo modo carboneum dioxydatum ex atmosphaera in humum agrorum et pastionum transferatur. Ex agricultura enim hodierna sequitur, ut emissiones carbonei dioxydati usque augeantur. Inter hanc investigationem experti diversarum disciplinarum civitatumque observationes agricolarum examinabunt.

(Satu Tuominen)

Valetudo Finlandensium

Finlandia valetudine civium in duas partes dividi videtur, ut ex pensionibus socialibus incolis solutis apparet. Linea, qua hae partes separantur, limitem pacis Notteburgensis anno millesimo trecentesimo vicesimo tertio (1323) factae fere sequitur. Constat eos, qui in regionibus civitatis septentrionalibus et orientalibus vivunt, saepius et gravius aegrotare quam eos, qui in provinciis meridianis et occidentalibus habitant.

(Reijo Pitkäranta)

Sepulcrum priscum inventum

In Aegypto prope urbem Cairum sepulcrum priscum optime conservatum inventum est. Hoc monumentum tam statuis quam litteris hieroglyphicis coloratis ornatum circiter quattuor milia quadringentos annos habere existimatur. Insunt in illo sepulcro integro et a direptoribus intacto omnino quinque cellae, quarum investigatio adhuc continuatur.

(Reijo Pitkäranta)

Dermophis donalditrumpi

In Panama non ita pridem nova species ranae reperta est, cui nomen scientificum ex praesidente Donald Trump datum est. Animal caecum, quod caput in arenam abdere solet, officialiter Dermophis donalditrumpi vocatur. Appellatione indicatur praesidentem eadem caecitate ad mutationem climaticam esse atque illam ranam.

(Reijo Pitkäranta)

14.12.18

Declaratio de iuribus humanis LXX annorum

Die Lunae (10.12.) septuaginta anni ab eo die acti erant, quo conventus generalis Nationum Unitarum declarationem universalem de iuribus humanis Parisiis comprobavit. In praefatione declarationis de atrocitatibus belli mundani secundi, quod ante aliquot tantum annos finitum erat, his verbis monetur: ”Cum iura humana despicerentur aut neglegerentur, facinora barbarica acciderunt, quae conscientiam generis humani concusserunt.” Principia fundamentalia iurum humanorum in declaratione triginta thesibus sive articulis summatim exprimuntur. In primo articulo declarationis ratio, in qua iura humana consistunt, ita definitur: ”Omnes homines nascuntur liberi atque dignitate iuribusque aequales. Data est illis intellegentia et conscientia, et in spiritu fraternitatis inter se agere debent.” Statim postea monetur iura humana ad omnes pertinere neque de nationalitate, stirpe aut religione pendere. In articulis sequentibus iura singillatim enumerantur.

Nova praeses factionis CDU electa

Annegret Kramp-Karrenbauer nova praeses Unionis Democraticae Christianae (CDU) Germaniae electa est. Succedit Angelae Merkel, quae Unioni duodeviginti annos praefuit. Merkel, quae praesidatum deposuit, tamen cancellaria foederalis mansura est. In conventu Hamburgi habito mille unus (1001) delegati aderant, a quibus Kramp-Karrenbauer maiorem sententiarum partem accepit.

Tumultus in Francia continuabantur

Manifestationes tumultuosae Parisiis et in aliis Franciae regionibus die Sabbati (8.12.) continuabantur. Autoraedae cremabantur et fenestrae tabernarum frangebantur. Damna Parisiis maiora erant quam ante septimanam. Bruno Le Maire, minister ab aerario publico, violentiam tumultuantium oeconomiae catastrophicam appellavit. Praesertim mercatores, cauponarii et gestores deversoriorum damna ceperunt.

Macron orationem habuit

Emmanuel Macron, praesidens Franciae, die Lunae (10.12.) civibus orationem televisificam habuit, qua animos reclamantium pacare conabatur. Stipendia minima a Kalendis Ianuariis centum euronibus augere promisit et dixit augmentum vectigalium, antea nuntiatum, ad eos non pertinere, quorum stipendium duo milia euronum non superaret. Confessus est se errores fecisse et responsalitatem de eis habere. - Oratio praesidentis publica fuit prima, qua ad acerrimas reprehensiones respondere temptavit. Ante duodeviginti menses Macron magna cum gratia populari praesidens factus est, sed nunc tantum quinta pars ex sexaginta septem civium milionibus illi favet.

Suffragium de exitu Britanniae procrastinatum

Theresa May, prima ministra Britanniae decrevit, ut suffragium, quod die Martis (11.12.) de exitu Britanniae in parlamento Britanniae fieri debebat, procrastinaretur. Tum pars delegatorum factionis conservativae flagitavit, ut de fiducia illius factio suffragaretur, sed suffragio facto May votis ducentis contra centum septendecim (200-117) superior discessit.

Tuomo Pekkanen

7.12.18

George Bush mortuus

George Bush maior, pristinus praesidens Civitatum Americae Unitarum, pridie Kalendas Decembres (30.11.) diem supremum obiit nonaginta quattuor annos natus. Munere praesidentis Americanorum inde ab anno millesimo nongentesimo undenonagesimo usque ad annum millesimum nongentesimum nonagesimum tertium (1989-1993) functus est. Ultimis vitae suae annis Parkinsonismo laborabat.

(Reijo Pitkäranta)

De conventu climatico

In urbe Katovice, quae in Polonia est, conventus climaticus Nationum Unitarum initium cepit. Participes huius eventus internationalis maximi intra duas septimanas rationes invenire conantur, quarum ope pactum climaticum Parisiense ad effectum adducatur. Id enim anno bis millesimo vicesimo (2010) valere incipiet, sed de regulis eius nondum convenit.

(Reijo Pitkäranta)

Usus belli in Ucraina

Ucraina copias suas subsidiarias ad exercitium militare extraordinarium convocavit. In causa est periculum belli, quod sibi a Russis imminere dicunt. De ea re decrevit Petro Poroshenko, praesidens civitatis. Nec tamen patefecit, quantus esset numerus eorum, qui ad arma concurrerent. Exercitatio belli in Ucraina ad viginti dies producitur.

(Reijo Pitkäranta)

Societas Hanseatica nova

In Europa iterum de civitatibus Hanseaticis loqui coeptum est. Imprimis ministri Francogalliae terras Unionis Europaeae septentrionales accusaverunt, quod novam quandam societatem Hanseaticam fecissent. Octo nationes Hollandiensibus ducibus id agere, ut leges oeconomicae in Europa duriores redderentur. Quare metuendum esse, ne Europa in partem septentrionalem et meridionalem divideretur.

(Reijo Pitkäranta)

Turris Pisarum stabilis

Experti turrim Pisarum obliquam nunc stabilem et etiam erectiorem quam ante existimant. Operibus aedificandi anno millesimo centesimo septuagesimo tertio (1173) susceptis moles statim inclinari coepit, cum solum nimis molle esset. Annis praeteritis a circumiectu huius aedificii celeberrimi complures metretae terrae amotae sunt, quo facto constructio fragilis firma reddita est.

(Saara Honkanen)

Nova bibliotheca Ode

Die Mercurii in urbe Helsinki nova bibliotheca nomine Ode inaugurata est. Hae aedes lautissimae ex tribus tabulatis constant, quorum primum incolis urbis loca ad conveniendum commoda praebet, secundum autem spatia operando et studendo idonea. In tertio tabulato est bibliotheca proprie sic dicta, ubi centum quadraginta milia librorum insunt.

(Reijo Pitkäranta)

Dies independentiae

Die Iovis (6.12.) in Finlandia dies independentiae more solito celebrabatur. Vesperi facto ad duo milia hospitum in palatium praesidentiale convenerunt, ubi caput civitatis Sauli Niinistö cum coniuge eos recepit. Vestis sollemnis, quam coniux praesidentis Jenni Haukio gestabat, eo peculiaris erat, quod textile eius ex ligno betulino confectum erat.

(Reijo Pitkäranta)

30.11.18

Conflictus Russiae et Ucrainae

Copiae speciales Russiae die Dominico (25.11.) tres naves Ucrainae occupaverunt, quae ex Ponto Euxino in mare Asoviense per Bosporum Cimmerium sive fretum Kerts tendebant. Russi autumant illas naves in suas aquas nationales penetravisse. Ucraini autem negant naves ipsorum quicquam illiciti fecisse. Parlamentum Ucrainae in partes Ucrainae, quae sunt prope Russiam, statum extraordinarium declaravit. Americani in Consilio securitatis Russos de conflictu accusaverunt. Praesidens Donald Trump de responsalitate Europaeorum monuit. Jens Stoltenberg, secretarius generalis Natonis, a Russia flagitavit, ut naves occupatas cum nautis Ucrainae redderet.

Pactio de exitu Britanniae a moderatoribus Pactum probata

Moderatores Unionis Europaeae die Dominico (25.11.) Bruxellis brevi conventu habito pactum de exitu Britanniae comprobaverunt. Postea pactum in parlamento Britanniae tractabitur. Moderatores Europaei unanimiter censebant pactum esse tam bonum quam esse posset. Debet autem a parlamento Britanniae accipi, antequam europarlamentum de illo suffragabitur.

Reclamationes Parisiis tumultuosi 

Reclamationes contra pretia combustibilium et politicam regiminis oeconomicam apud Francos in tumultus vehementes versae sunt. Reclamatores flavis colobis induti vias Parisienses passim occluserunt et receptoria purgamentorum cremaverunt. Aderant tria milia custodum publicorum, qui turbas tumultuantes iaculatris aquaticis et gaso lacrimifero coercebant. Neque tantum Parisiis sed etiam in variis Franciae partibus homines contra auctos sumptus victuales et vectigal combustibilium reclamitaverunt. Motus reclamationis ducem non habet neque de partibus politicis aut societatibus opificum pendet. Homines iusto iure censent usque maiorem partem redituum in vectigalia solvi et inopiam quaestus non remitti.

Artificia ex Africa deportata redduntur

Praesidens Emmanuel Macron nuper relationem accepit, qua commendatur, ut artificia et alia materia culturalis inter colonialismum ex Africa deportata in pristinas colonias quam amplissime remittantur. Quo facto cancellaria praesidentis nuntiavit viginti sex artificia ex Francia in rem publicam Beninum (antea Dahomey) redditum iri. In museis et collectionibus Europaeis, praesertim Parisiis et Londinii, etiam nonaginta centesimas ex rebus culturalibus Africanis esse creditur. Nationes occidentales plerumque obstiterunt, ne artificia restituerentur, asseverantes fieri non posse, ut in terris, unde ablata essent, pecuniis deficientibus rite et diligenter curarentur.

Monumentum praesidentis Koivisto inauguratum

Monumentum sepulcrale praesidentis Mauno Koivisto (1923-2017) in sepulcreto Hietaniemi die Dominico (25.11.) inauguratum est. Verba inauguralia fecit praesidens rei publicae Sauli Niinistö, orationem habuit Timo Soini, minister a rebus exteris. Monumentum designavit et fecit artifex Perttu Saksa. Constat ex nigro lapide novem tonnarum, cuius superficies sulcis inauratis decoratur.

Tuomo Pekkanen.

23.11.18

Quis Trump dixerit

Praesidens Americanorum Donald Trump regiones Californiae septentrionalis incendiis silvestribus deletas invisit. Ibi incolas hortatus est, ut exemplum Finlandensium in silvis curandis sequerentur. Dixit enim hos loca naturalia sua rastello purgare solere. Incendia illa ex silvis male curatis arboribusque mortuis secuta esse. Septuaginta fere homines iam calamitate perierunt.

(Satu Tuominen)

Brexit praeparatum

Iam in eo est, ut edictum de relatione futura, quae inter Britanniam et Unionem Europaeam intercedet, publice divulgetur. Omnes enim viginti septem civitates Unionis Europaeae pactioni Brexit vulgo dictae cum Britannis adumbratae favent. Etiam Finlandia eas condiciones, quae in consultationibus inter utramque partem convenerunt, approbare parata est.

(Reijo Pitkäranta)

De consilio Europaeo

Die Mercurii (21.11.) praesidatus Consilii Europaei semestris ad Finlandiam transiit. Agitur de ordine cooperationis, cuius sociae omnes fere civitates Europae sunt. In rebus maximi momenti est quaestio, quid de societate Russorum faciendum sit. Illi enim, cum propter Crimaeam occupatam sanctionibus puniti essent, recusaverunt, quominus suam pecuniam annuam Consilio Europaeo expenderent.

(Reijo Pitkäranta)

Iubilaeum Lettoniae

Die Dominico (18.11.) centum anni acti erant, cum Lettonia sui iuris facta est. Iubilaeum saeculare Rigae, in capite civitatis, cum pompa militari instituta celebrabatur. Multa milia hominum ad monumentum libertatis convenerant, ubi sollemnitas flores apponendi acta est. Huic caerimoniae etiam praesidens Finlandiae Sauli Niinistö intererat.

(Reijo Pitkäranta)

De Academia Suetiae

Academia Suetiae novum collegium condidit, cuius est praemium Nobelianum litteraturae anno proxime futuro attribuere. Constat ex decem sociis, quorum quinque sodales Academiae sunt, reliqui quinque homines extranei litteraturae periti. Academia Suetiae non ita pridem gravissimo scandalo infamata est, quam ob rem fieri non potuit, quin renovaretur. 

(Reijo Pitkäranta)

Nidificatio aquilae

Nidificatio aquilae in Finlandia hoc anno pessime successit, ut magistratus administrationis rei silvestris narrant. In causa dicitur esse, quod et hieme et vere his alitibus parum nutrimenti praesto erat. Maior pars aquilarum in regionibus Finlandiae septentrionalibus habitat ac quidem ita, ut nonaginta centesimae (90%) earum in Lapponia nidos faciant. 

(Reijo Pitkäranta)

Finlandia nivibus caret

Quamquam mensis November iam in finem vergit, Finlandia tota nivibus fere caret, quod his sexaginta annis numquam accidit. Septimana ineunte apud nos tria tantum loca eaque in Lapponia sita inventa sunt, quae tantis nivibus tecta erant, ut stratum earum mensurari posset. Neque tegimen nivium quinque centimetris altius erat.

(Reijo Pitkäranta)

16.11.18

Manfred Weber candidatus principalis factionis EPP

Manfred Weber Germanus erit candidatus principalis Factionis Popularis Europae (The European People´s Party, EPP), cum novum europarlamentum mense Maio creabitur. In conventu factionis in urbe Helsinki nuper habito sescenti viginti unus (621) delegati suffragia dederunt, ex quibus Weber paene quingenta (492) accepit; aemulo eius Alexandro Stubb Finlandensi centum viginti septem (127) suffragia data sunt.

Primum bellum mundanum ante centum annos finitum

Die Dominico (1.11.) centum anni acti erant, ex quo primum bellum mundanum finitum est. Festivitates principales factae sunt Parisiis, quo septuaginta moderatores civitatum convenerant. Praesidens Emmanuel Macron cum coniuge Brigitte hospites in Palatio Elysée recepit, unde moderatores ad Arcum triumphalem pedibus processerunt. 

In caerimonia commemorationis ibi facta praesidens Macron orationem habuit, qua moderatores mundi hortatus est, ut pro pace coniunctim contenderent. Monuit de cooperatione internationali, qua mutatio climatis, damna naturae, fames, morbi averterentur. Dixit spem nobis potius creandam esse quam metum mutuum incitandum.

Festivitates, apud Arcum triumphalem celebratae, erant culmen septimanae, qua bellum mundanum ante centum annos finitum commemorabatur. Illud bellum, quo a quindecim milionibus usque ad undeviginti miliones hominum interierunt, tractatu pacis hora undecima Parisiensi subscripto, die undecimo mensis Novembris anno millesimo nongentesimo duodevicesimo (1918) finitum est.

Forum pacis Parisiense

Caerimoniis apud Arcum triumphalem finitis secutum est Forum pacis Parisiense, cui maior pars moderatorum interfuit. Forum inauguratum est a praesidente Macron et Angela Merkel, cancellaria foederali Germaniae. Merkel oratione inaugurali pro pace verbis gravissimis appellavit. Ait primum bellum mundanum ostendisse, quo superbia militaris atque defectus communicationis et compromissorum ducerent.

Tertius orator erat Antonio Guterres, secretarius generalis Nationum Unitarum, qui de similitudinibus inter quartum decennium saeculi proximi (1930-1940) et dies hodiernos praemonuit. Aderat etiam Vladimir Putin, praesidens Russiae, sed praesidens Donald Trump, qui coemeterium militum Americanorum Parisiis visit, Foro pacis non intererat.

De antisemitismo redivivo

Mense Novembri ineunte de antisemitismo multa praesertim in Germania dicta sunt, nam die nono (9.11.) octoginta anni acti erant a nocte, quae dicitur crystallina, cum Germania nazistica cives ad crimina antisemitica incitavit. Fenestrae ubique in Germania frangebantur, cum multitudines iratae synagogas, tabernas, domos Iudaeorum deleverunt.

Nocte inter nonum et decimum diem mensis Novembris mille quadringentae synagogae et oratoria atque plus septem milia tabernarum et domuum deleta sunt. Ab ea nocte antisemitismus factus est systematicus et a regimine nazistico comprobatus. Caedes septem milionum Iudaeorum adhuc mentes novorum saeculorum gravat, sed eodem tempore sermones antisemitici passim surgere incipiunt.

Tuomo Pekkanen.

9.11.18

De comitiis congressus

Die Martis (6.11.) in Civitatibus Americae Unitis comitia congressus facta sunt. Congressus Americanus duas cameras continet, quarum inferior ex quadringentis triginta quinque delegatis constat, cum senatus sive camera superior centum senatores habeat. Sententiis computatis apparuit democratas in camera delegatorum superiores evasisse, republicanos autem in senatu victoriam reportavisse. 

(Reijo Pitkäranta)

Trump cladem accepit

Fautores utriusque factionis Americanae magna multitudine iure suffragandi usi sunt. Cives enim eodem tempore occasionem habebant aestimandi, quo modo praesidens Donald Trump munus suum gessisset. Ex eventu comitiorum videre licet populum Americanum non velle, ut administratio rei publicae in xenophobia et odio immigrantium posita sit.

(Reijo Pitkäranta)

De rationario Italiae

Ministri civitatum Unionis Europaeae collegas suos Italianos monuerunt, ut rationarium publicum Italiae ad annum proximum praecogitatum rescriberent. In causa esse, quod consilium eorum legibus Unionis oeconomicis repugnaret. Novam dispensationem, in qua pactiones de stabilitate Europae oeconomica serverentur, ante Idus Novembres (13.11.) ad Commissionem Europaeam deferrent.

(Reijo Pitkäranta)

Status novae Caledoniae

Nova Caledonia, quae regio insularis in Oceano Pacifico iacet, etiam posthac pars Francogalliae erit. Suffragio populi die Dominico (4.11.) facto apparuit maiorem incolarum partem (56,4%) velle, ut patria sua cum Francogallia coniuncta maneret neve sui iuris fieret. Studium suffragandi tantum erat, ut paene octoginta centesimae civium ad sententiam ferendam properarent.

(Reijo Pitkäranta)

Commercium animalium

Regimen Sinarum consilium cepit, ut venditio partium tigrium et rhinocerotum in quibusdam casibus permitteretur. Licebit inter alia pulverem ex ossibus eorum confectum ad usum medicinalem offerre, quamvis investigationibus effectus remedii demonstrari non potuerit. Ordo mundi naturae tuendae (WWF) timet, ne consilium cladem immensam animalibus in periculum adductis afferat.

(Saara Honkanen)

De tribus dinosauris

In Argentina reliquiae novae dinosaurorum speciei repertae sunt. Agitur de partibus trium dinosaurorum, quorum unus, cum viveret, duodecim metrorum erat, ceteri duo iuvenculi sex aut septem metra alti. Species inventa ad sauropoda sive ad animalia herbivora longo collo praedita pertinet, quibus maiores beluae in terra numquam fuerunt. 

(Reijo Pitkäranta)

Dies Finno-Suetorum

Die Martis (6.11.) in Finlandia cultura et litterae Sueticae celebrabantur, ut quotannis fieri solet. Dies festus eo spectat, ut ius Finno-Suetorum sua lingua utendi recolatur. Est etiam dies memorialis regis Gustavi Adolfi II, qui in Germania bellum gerens postridie Nonas Novembres anno millesimo sescentesimo tricesimo secundo (1632) occisus est.

(Reijo Pitkäranta)

2.11.18

Antiqua navis in fundo Ponti Euxini reperta

Archaeologi in fundo Ponti Euxini navem mercatoriam antiquissimam reppererunt, quae ex investigatione carbonica iam ante duo milia quadringentos annos aedificata est. Similes naves antea tantum ex picturis vasorum antiquorum notae erant. Illa navis et merces, quas portabat, suo loco in profunditate restant. Tantum particula ad investigationes faciendas deportata est. Grex archaeologorum duo milia chiliometra quadrata de fundo Ponti Euxini investigavit et inter tres annos sexaginta naves fractas invenit, in his illam navem Graecam, quae illaesa manserat. In photographematis factis apparent inter alia arbor mali, transtra remigiumque. Cum aqua in imo mari oxygenio careat, partes navis ligneae per saecula prope integrae conservatae sunt. In investigatione, cui Universitas Southamptoniensis et Academia Scientifica Bulgarica intererant, fundus Ponti Euxini novissimis apparatibus photographicis in profunditate plus duorum chiliometrorum photographari potuit.

Oleg Sentsov a Parlamento Europaeo praemiatus

Parlamentum Europaeum praemium Saharovianum Ucraino Oleg Sentsov tribuit, qui in paeninsula Jamal Sibiriae septentrionalis incarceratus est. Illud praemium, quod valet quinquaginta milia euronum, homini de iuribus humanis et de libertate sententiarum bene merito quotannis datur. Sentsov, quem Russia civem suum habet, de terrorismo a Russis accusatus est.

Aeriportus maximus apud Constantinopolim perficietur

Novus aeriportus, qui in ora Ponti Euxini apud Constantinopolim perficietur, futurus est maximus orbis terrarum. Initio per illum nonagenae miliones viatorum quotannis transibunt, sed propositum est, ut operibus perfectis sint ducentenae miliones. Tum singula aeroplana intervallis quindenarum secundarum illuc descendere aut inde ascendere poterunt.

Natalitas apud Finnos minima

Natalitas in Finnia hoc anno minor fuit quam umquam post annum millesimum nongentesimum (1900), ex quo statistica natorum componi coepta est. Primis decem huius anni mensibus triginta sex milia centum septuaginta sex (36.176) infantes nati sunt, scilicet duobus milibus pauciores quam eisdem mensibus anno ante. Una ex causis natalitatis decrescentis est, quod voluntaria orbitas liberorum crebrescit. Altera, quod coniuges, qui liberos volunt, eos tarde parare incipiunt. Sed fecunditas feminarum post aetatem triginta quinque annorum rapide minuit, etsi sunt differentiae individuales. Praeterea natalitatem morantur causae oeconomicae: inopia quaestus, parva stipendia, incertitudo generalis.

Expositio cattorum universalis 27.-28.10.

Expositio cattorum universalis septimana vergente (27-28.10.) Tammerforsiae (vulgo Tampere), in urbe Finniae, instituta est. Expositi erant plus mille quingenti catti, qui ex viginti septem terris cum possessoribus aut curatoribus venerant. Genera, in quibus de titulo pulcherrimi et electissimi catti certabatur, erant quadraginta septem.

Tuomo Pekkanen

26.10.18

Cedes diurnarii Khashoggi

Praesidens Turciae Recep Tayyip Erdogan ait diurnarium Saudianum Jamal Khashoggi in sede diplomatica, quam Arabes Saudiani Constantinopoli habent, crudeliter occisum esse. Scelus diligentissime praecogitatum et e causis politicis commissum esse. Iam ante homicidium postridie Kalendas Octobres factum ex Arabia Saudiana emissarios Constantinopolim venisse, qui locum ad corpus abscondendum idoneum quaererent.

(Reijo Pitkäranta)

Quid Trum nuntiaverit

Praesidens Donald Trump nuntiavit se pactum, quod missilia nuclearia mediae distantiae vetaret, non iam servaturum esse. Neque hoc decretum miraris, si respicis iam quattuor fere annos esse, cum Americani Russos de illa pactione violata accusant. Dicunt Russos novum genus missilium circumvagantium a terra emittendorum fabricatos esse. 

(Reijo Pitkäranta)

Quid Theresa May dixerit

Non iam multum abest, quin consultationes de Brexit sive de excessu Britanniae ex Unione Europaea ad finem perductae sint. Hunc nuntium dedit Theresa May, prima ministra Britanniae, quae a suis iam accusabatur, quod Unioni Europaeae nimias concessiones fecisset. Eadem negavit propositum de confinio Irlandiae factum approbari posse. 

(Reijo Pitkäranta)

Pons maritimus longissimus

Die Martis (23.10.) in Mari Sinensi pons maritimus omnium longissimus commeatui publico apertus est. Caerimoniae inaugurali praefuit praesidens Sinarum Xi Jingping. Illo ponte quinquaginta quinque chiliometra longo Honcongum et Macaum inter se et cum continenti Sinensi coniunguntur. Quod opus maximum anno bis millesimo nono (2009 susceptum est.

(Reijo Pitkäranta)

Museum artis Amos Rex

Museum artis nomine Amos Rex in media urbe Helsinki inauguratum est. Ibi opera artis tam modernae quam culturarum antiquarum proponuntur. In museo loca expositionis varia et officina artis puerorum iuvenumque insunt. In cinemate eventus diversarum artium festaque cinematographica parantur, et in finibus septimanae pelliculae emittuntur.

(Satu Tuominen)

Chorus Esboënsis victor

Venetiis, in urbe Italiae, certamen cantus choralis puerorum a Claudio Monteverdi appellatum institutum est. Huic certationi duodecim chori e diversis terris oriundi intererant. Victoriam reportavit chorus Finlandensis nomine CandoMini, cuius domicilium in urbe Esboa est. Nec solum in serie puerorum, sed etiam in toto certamine primo loco positus est.

(Reijo Pitkäranta)

De animalibus deliciis

Progressus artis veterinariae effecit, ut morbi animalium familiarium cum bono successu curarentur. Agitur vel de cancris et glaucomatis felium et canum sanandis et de prothesibus iis applicandis. Possessores animalium domesticorum etiam magnam pecuniam veterinariis solvere volunt, dummodo illas delicias in sanitatem restituant.

(Reijo Pitkäranta)

19.10.18

Forum argentarium in mundo vacillavit

Mense Octobri ineunte valores actionum per orbem terrarum male minui coeperunt. In bursa Helsinkiensi mutatio fuit abruptior quam alibi, nam actiones maiorum societatum paucis diebus decem fere centesimis viliores factae sunt. Causa mutationis videtur esse, quod investitores propter fenora aucta et bellum commerciale inter USA et Sinas ortum sollicitantur. Fenoribus auctis collybistae pecunias suas ex foro argentario detrahunt et spe lucri melioris fenerant. Sollicitudinem auxit praesidens Donald Trump, qui Argentarium Americanorum centrale (Federal Reserv Bank) de pretiis actionum deminutis accusavit eiusque nova consilia fenoris adhuc augendi ridicula et vaesana appellavit.

Casus Khashoggi

Praesidens Trump Arabiae Saudianae poenam severam intentavit, si modo palam factum esset illam terram curavisse, ut Jamal Khashoggi, redactor Saudianus, interficeretur. Khashoggi, qui de administratione Saudiana critice scripserat, postridie Kalendas Octobres in legationem Saudianam Constantinopoli sitam intravit sed exire non est visus. Magistratus Turci Arabiam Saudianam de occisione redactoris Khashoggi accusaverunt. Saudiani, qui petroleo abundant, sunt in Oriente Proximo diutini foederati Americanorum. Ad minas sibi a Trump intentatas responderunt se omnia conamina statum suum labefaciendi, quaecumque essent, penitus repulsuros esse.

Imbres vicos Franciae inundaverunt

In regione Aude Franciae meridionalis-occidentalis, circa oppidum Carcasonem (vulgo Carcassonne), torrentes imbribus concepti septimana ineunte domos inundaverunt, pontes et vias abruperunt, totos vicos circumcinxerunt. Arbores torrentibus dereptae cursum aquarum passim ita clauserunt, ut imbre iam desinente inundatio adhuc cresceret. Saltem tredecim homines in calamitate perierunt.

Oscar Romero canonizatus

Oscar Romero, archiepiscopus Salvatorianus, a Papa Francisco in numerum sanctorum die Dominico (14.10.) relatus est. In patria Salvatoria pauperes defendit atque violentiae exercitus et copiarum semimilitarium obstitit. Anno millesimo nongentesimo octogesimo (1980) a sicariis occisus est. Simul cum archiepiscopo Romero Papa Paulus VI (1963-1978) sanctificatus est.

Feriatio in patria magis quam ante placuit

Cum aestas solito calidior esset, Finni ferias magis quam ante in patria egerunt. Inter menses Maium et Augustum, ut statistica indicat, feriationes Finnorum in deversoriis patriis plus tres miliones numerabantur. Nihilo minus etiam aestate Europa meridiana plures Finnos quam ante alliciebat. Italia hoc anno Finnis magis placuit quam Hispania et Graecia, in quae plura itinera suscipi solent quam in alias terras peregrinas. Finni, inter quindecim et octoginta quattuor annos nati, aestate huius anni in summa plus viginti duo miliones itinera peregre fecerunt.

Tuomo Pekkanen

12.10.18

Monitio de climate facta

Rerum periti a Nationibus Unitis delecti moderatores mundi graviter monuerunt, ut curarent, ne globus terrestris plus uno et dimidio gradu Celsiano calefieret. Nisi id fecissent, naturam orbis terrarum magnis periculis expositum iri. Si temperatura caeli aucta esset, iam impediri non posse, quin aestus vel in hemisphaera septentrionali fervidiores fierent, segetes deminuerentur, multa genera animalium emorerentur.

(Reijo Pitkäranta)

De emissionibus Hollandiae

Tribunal Hollandiense statuit regimini civitatis providendum esse, ut emissiones caelum calefacientes velocius coercerentur quam ministri cogitavissent. Officium administrationis ex lege esse cives ab incommodis mutationis climaticae tutari. Constat pollutiones aerias in Hollandia annis proxime praeteritis non satis deminutas esse.

(Reijo Pitkäranta)

Rerum in Iemenio condicio

Amplius tres anni sunt, cum in Iemenio bellum intestinum geritur. Rerum condicio ibidem tam mala est, ut ordines auxiliares operarios suos eo non iam mittere audeant. Itaque necesse est, Iemenienses ipsi auxilium peregre sibi missum inter se distribuant. Periculum autem est, ne subsidium civibus destinatum ad usus privatos convertatur.

(Reijo Pitkäranta)

Montserrat Caballé mortua

Montserrat Caballé, cantatrix dramatum melicorum Hispana, de vita decessit octoginta quinque annos nata. Diem supremum obiit pridie Nonas Octobres (6.10.) in nosocomio Barcinonensi, quo mense Septembri deportata erat. Insignis erat sua pulcherrima voce acuta, quae toto fere orbe terrarum nota erat. 

(Reijo Pitkäranta)

De pluviis in Australia

His diebus regiones Australiae pluviis largis recreatae sunt. Hoc praecipue agricolae et educatores pecorum diu exspectaverant, cum praedia eorum per totum annum siccitatibus pessime laborarent. Quae cum ita essent, frumentum in agris parum processit et magna copia pecoris pabulo deficiente ad lanienam adducta est.

(Reijo Pitkäranta)

Praemium Nobelianum pacis

Praemium Nobelianum pacis hoc anno inter medicum Congensem Denis Mukwege et activistam ex Iraquia oriundam Nadia Murad dividitur. Praemio ornati a Commissione Nobeliana laudati sunt, quod feminas in bello violentiae sexuali subiectas adiuvarent. Murad, quam ordo Isis tres menses in captivitate tenuit, non amplius viginti quinque annos habet.

(Saara Honkanen)

Dies natalis Alexis Kivi

Die Mercurii (10.10.) in Finlandia dies natalis scriptoris Alexis Kivi vexillis propositis celebrabatur. Is apud nos tanti aestimatur, ut pater litterarum Finnicarum appelletur. Comoedia sua, cui nomen ’Sutores rustici’, anno millesimo octingentesimo sexagesimo quinto (1865) praemium statale accepit. Opus autem eius principale est fabula, qui ’Septem fratres’ inscribuntur.

(Reijo Pitkäranta)

5.10.18

Obama Finniam visit.

Barack Obama, pristinus praesidens Americanorum, in Europa peregrinans Helsinkium breviter (27.9.) visit. In conventu negotiatorum (Nordic Business Forum), ubi plus septem milia participum ex quadraginta terris aderant, orationem habuit. 

Summa orationis erat: nihilo minus in mundo plus boni esse quam mali. Finniam aliasque terras Scandinaviae felices laudavit, quia cives admodum aequales essent et educatio scholastica gratuita omnibus pateret. Finniam esse felicissimam, multa ex illa terra disci posse. Historiam generis humani in universum aestimanti in melius processisse sed interdum in chaos delapsam esse. Mundum autem numquam opulentiorem fuisse quam hodie.

Tsunami in Indonesiam incidit

Plus mille quadringenti homines perierunt, cum fluctus tsunami ex motu terrae ortus in insulam Sulawesi Indonesiae (28.9.) incidisset. Magistratus timent, ne numerus victimarum in multa milia ascendat. Maxime afflicta est urbs Palu et proxima illi Donggala. In regione motui terrae et fluctui exposita circiter sescenta milia hominum habitant.

Climate calefacto herbae arcticae fiunt altiores

In regionibus arcticis herbae altiores quam ante fiunt. Causa mutationis partim est, quod genera altiora in septentrionem diffunduntur, partim quod herbae iam exsistentes melius crescunt. Etiam floritio primo vere tempestivior facta est. Variationem localem affert etiam numerus animalium herbivororum. Exempli gratia in Finnia, ubi plus trandrorum pascuntur quam in tundra aliarum terrarum, tarandri impediunt, ne altiores herbae in montes diffundantur. Proprietates herbarum in regionibus montuosis Alascae, Canadae, Russiae, Islandiae, Suetiae, Norvegiae, Finniae mensuratae sunt. Apparuit vegetationem tundrae climate calefacto altiorem factam esse.

Proventus fungorum optimus

Timendum erat, ne aestas in Finnia sicca et solito longior proventum fungorum deminueret. At evenit, ut fungi propter siccitatem uno quidem mense serius sed abundanter in silvis provenirent. Praesertim boletus specie edulis legitur et in Italiam, ubi habetur in deliciis, exportatur. Alter fungus, qui in Finnia pullulat, est Tricholoma matsutake, qui nomen speciminis habet Iaponicum, quia in Iaponia tanti aestimatur, ut pro chiliogrammate etiam quattuor milia euronum solvantur. Exportatio autem ex Finnia in Iaponiam est difficilis, nam Iapones volunt, ut fungus intra duos dies postquam carptus est, in mensam portetur.

Charles Aznavour obiit

Charles Aznavour, cantor nonaginta quattuor annorum, Parisiis ex parentibus Armeniis natus, Kalendis Octobribus diem obiit supremum. Inter curriculum septuaginta fere annorum unus ex cantoribus Franciae maxime popularibus factus est, qui plus mille cantiones scripsit. Numerus discorum eius, qui venierunt, centum octoginta miliones superat. Praeterea in octoginta pelliculis recitavit.

Tuomo Pekkanen

Ecclesia incendio deleta

Die Dominico (23.9.) multo mane in Kiihtelysvaara, quae pars urbis Joensuu est, ecclesia lignea ducentorum quinquaginta fere annorum incendio deleta est. Neque abest suspicio, quin aliquis ei dolo malo ignem subiecerit. Quamvis aedes solo aequaretur, custodi tamen templi mirum in modum contigit, ut picturam altarium et vasa sacra pretiosissima e flammis servaret.

(Reijo Pitkäranta)

Quid Donald Trump dixerit

Hac septimana in urbe New York conventus generalis Nationum Unitarum agitur. Praesidens Donald Trump oratione habita ducem Coreae Septentrionalis Kim Jong-un valde laudavit, sed Iraniam vehementer reprehendit. Risum auditorum movit dicens se iam maiores res gessisse quam quemquam alium e suis praedecessoribus. 

(Reijo Pitkäranta)

Norlén praeses parlamenti

Die Lunae (24.9.) praeses parlamenti Suetiae creatus est Andreas Norlén, fautor factionis dextrae moderatae. Quo facto Stefan Löfven, democrata socialis, principatum regiminis amisit. Officium parlamenti est de principe ministro eligendo suffragari, quam ob rem Norlén cum diversis partibus de candidatis inveniendis colloqui coepit.

(Reijo Pitkäranta)

Papa in terris Balticis

Septimana vergente papa Franciscus iter quadriduanum in terras Balticas fecit, ut anniversarium earum centesimum honoraret. Die Dominico in urbe Lituaniae Caunas missae sollemni praefuit, cui multa dena milia hominum adfuerunt. Ex Lituania in Lettoniam ire perrexit, donec die Martis in Estoniam venit, ubi visitationi finem fecit.

(Reijo Pitkäranta)

De copa eiectamentorum

Fieri potest, ut copia eiectamentorum triginta annis in mundo etiam septuaginta centesimis augeatur, ut ex investigatione Argentariae mundanae apparet. Incolae terrarum opulentarum trientem reliquiarum pariunt. Plerumque quidem operam dant, ut copiam earum deminuant et fructum ex iis capiant. Apud populos egentiores autem maior pars purgamentorum omnino non deletur.

(Satu Tuominen)

Numeris tigrium auctus

Numerus tigrium in Nepalia intra novem annos duplex fere factus est. Ex investigatione recens divulgata patet ibidem hodie amplius ducentos tigres inveniri, cum multitudo eorum anno bis millesimo nono (2009) centum viginti fuerit. Qui nuntius tutoribus naturae novam spem ad animalia moribunda servanda dat.

(Reijo Pitkäranta)

Modric et Marta victores

Lusor pedifollicus hoc anno omnium optimus electus est Luca Modric natione Croatus. Ei maxime id tribuitur, quod grex Croatorum in certaminibus mundialibus hac aestate Parisiis factis nomisma argenteum consecutus est. In serie feminarum victoriam reportavit Marta sive Marta Vieira da Silva, sphaerista Brasiliensis triginta duos annos nata.

(Reijo Pitkäranta)

21.9.18

Niinistö acyis diurnis FAZ respondit

Praesidens Sauli Niinistö diurnarium actorum Germanicorum Frankfurter Allgemeine Zeitung recepit et ad illius interrogationes de rebus futuris Europae, de Donaldo Trump, de Finniae in Russiam relationibus respondit. De praesidente Russiae Niinistö dixit Putinum ad colloquia bene praeparatum semper venire ideoque cum illo magna prudentia agendum esse. Monuit se et Putinum bonam consuetudinem habere atque de summis rebus facile colloqui. Finniam limitem mille trecentorum chiliometrorum cum Russia communem habere, quam ob rem opus esset, ut relationes mutuae in bono statu permanerent. Rebus sic stantibus Finnos societatem cum Natone non esse petituros. Cum diurnarius de praesidente Trump interrogavisset, qui Europam pro aemula, etiam pro hoste haberet, Niinistö respondit nunc primum post secundum bellum mundanum problemata tam difficilia in relationibus transatlanticis orta esse. Antea dubium non fuisse, quin illae relationes pretiosae essent. Praesidentem Trump id mutavisse.

Maximae bellandi exercitationes

In Russia orientali maximae post Unionem Sovieticam dissolutam exercitationes bellandi nuper (11.-16.9.) factae sunt. Intererant trecenta milia militum, triginta sex milia vehiculorum militarium, mille aeroplana aut helicoptera, octoginta naves bellicae. Intererant etiam tria milia ducenti milites Sinenses, quod testimonium est cooperationis inter Russos et Sinenses.

Tempestates saevierunt

Typhon, Florence nominatus, in ora orientali Americae Septentrionalis saeviit. Inundatio, quam sustulit, in Carolina Septentrionali urbem Wilmington plus centum milium incolarum insulavit, cum vias eo ducentes et aeriportum cooperuit. Dum Florence Americanos procellis furentibus castigat, alter typhon nomine Mangkhut in Oceano Pacifico ortus est. In insulis Philippinis et Sinis meridianis maxima damna fecit. Cursus traminum revocati et viae publicae clausae sunt. Periculo imminente plus tres miliones Sinenses ex regionibus typhoni expositis deportati sunt. Pro certo nuntiatum est saltem sexaginta quinque homines in tempestate interisse et complures denos incolas labinis terrae obrutos esse.

Pestis suina subus Finnorum imminet

Pestis suina Africana, morbus letalis, qui facile vagatur, in Russia occidentali haud procul a confinio Finniae occurrit. Periculum est, ne apri, quorum greges limitem transeunt, contagionem in sues Finnorum importent. Ideo ministerium agriculturae praecepit, ut investigaretur, quo modo transitus aprorum saepimento in limite posito impediretur.

De cattis Russorum

In Russia plures quam in aliis terris catti esse dicuntur, quorum dies nationalis Kalendis Martiis apud Russos celebratur. Partes conspicuas agunt catti in museis viventes, qui curant, ne mures tabulis aliisque artificiis damna faciant. Exempli gratia in clarissimo museo Ermitage Petropolitano complures deni catti operantur.

Tuomo Pekkanen.

14.9.18

Comitia in Suetia

Die Dominico (9.9.) in Suetia comitia parlamentaria habita sunt. Quorum victoriam

manifestam reportaverunt democratae Sueti, cum favorem amplius septendecim centesimarum

(17,6%) sibi paraverunt itaque partes magnitudine tertiae evaserunt. Democratae sociales

cladem acceperunt, quamquam adhuc auram popularem ceteris maiorem habent suffragiorum

plus duodetriginta centesimas (28,4%) consecuti. Conservativi moderati paene viginti

(19,8%), factio centralis amplius octo (8,6%), partes sinistrae paene octo (7,9%) centesimas

sententiarum obtinuerunt.

(Reijo Pitkäranta)

Corea 70 annorum

Corea Septentrionalis, quae res publica popularis democratica dicitur, die Dominico (9.9.)

septuaginta annos complevit. Ad honorem eius rei in urbe capite pompa militaris instituta est,

cui tamen missilia ballistica intercontinentalia deerant. Etiam alioquin milites in illa

ostentatione minus conspicui erant quam ante.

(Reijo Pitkäranta)

Quid Obama dixerit

Barack Obama, pristinus praesidens Civitatum Americae Unitarum, oratione habita mirum

quam vehementer praesidentem hodiernum Donald Trump reprehendit. Antea adversus eum

locutus verbis moderatioribus usus erat. Nunc autem imprimis id praesidenti vitio dedit, quod

ministerium iustitiae diversis modis vexavisset. Trump respondit se orationem quidem

audivisse sed inter eam obdormivisse.

(Reijo Pitkäranta)

Orban verba fecit

Victor Orbán, princeps minister Hungariae, in parlamento Europaeo orationem habuit.

Censuit par non esse, ut Unio Europaea decretis regiminis, quod populus elegisset, ullo modo

interveniret. Constat Hungariam de legibus fundamentalibus Unionis violatis accusari.

(Reijo Pitkäranta)

De usu oceanorum

Die Martis (11.9.) civitates Nationum Unitarum sociae consultare coeperunt, quanam ratione

opes oceanorum orbis terrarum optime consumerentur et saluti naturae eorum provideretur.

Rerum periti enim de statu marium magnorum solliciti sunt monentes animantia marina iam

nunc ex nimia piscatura, mutatione climatica, aliis damnis ab homine allatis laborare.

(Reijo Pitkäranta)

Exercitatio corporis

Plus quam quarta pars hominum non satis corpus exercet, ut aestimat Ordo mundi sanitarius

(WHO). Ex statisticis apparet adultos praecipue in terris opulentis parum se movere.

Investigatores monent exercitationem corporis nemini neglegendam esse, cum corpore

movendo periculum morborum cardiovascularium, diabetae, cancri valde deminui possit.

(Saara Honkanen)

Viridaria nationalia

Viridaria Finlandiae nationalia magna ex parte in debili statu sunt. Quod imprimis ad eorum

locorum transitus pertinet, quae ponticulo ligneo coniuncta sunt. Res mense Iulio in medium

venit, cum pons pensilis in Lapinsalmi factus vetustate collapsus est. Post calamitatem

administratores silvarum investigare coeperunt, cuius condicionis diversa viridaria essent.

(Reijo Pitkäranta)

7.9.18

Commissio Europaea horm aestivam abiectura

Commissio Europaea suadet, ut hora aestiva absistatur neque horologia bis in anno mutentur. Cum

de hora mutanda interrogatio publica in Unione Europaea facta esset, octoginta quattuor centesimae

(84%) ex eis, qui responderunt, censebant morem hodiernum horae mutandae deponendum esse.

Numerus respondentium erat quattuor miliones sescenta milia. Ex Finnis sententiam rogatis

nonaginta quinque centesimae (95%) horam aestivam reicere volebant. Hora aestiva in Europa

ultimo die Dominico mensis Martii incipit et ultimo Dominico die Octobris in hiemalem mutatur.

Apud Finnos hora aestiva primum suscepta est mense Martio anno millesimo nongentesimo

octogesimo primo (1981).

Malum et minus malum

Praesidens Donald Trump monuit se posse efficere, ut USA ex Ordine mundi commerciali (WTO)

separaretur. Iam antea lamentatus est Americanos in commercio internationali inique tractari, idque

Ordine mundi commerciali permittente fieri. Unionem Europaeam esse paene tam malam quam

essent Sinae, tantum minorem.

Meschita feminarum Hafniae condita

Plerumque in meschitis, quae sunt templa religionis Islamicae, caerimoniis sacris viri praesunt.

Hafniae autem, in urbe capite Danorum, est meschita, in qua tantum feminae orationes moderantur.

Illam ante duos annos Sherin Khankan condidit, filia matris Finlandensis et patris Syrii. Sherin

Khankan sociologiae religiosae et imprimis religioni Islamicae studuit. Dicit sibi claruisse feminas

septimo saeculo, aetate profetae Mohammed, munere magistrarum, militum, imamorum functas

esse. Sed alium chalifam, nomine Omar, vetuisse, ne ita fieret, et musulmanos potius chalifam

quam prophetam secutos esse.

Damna pulmonum diaeta parantur

Pulmones hominis iam aetate triginta fere annorum attenuari incipiunt, sed quam cito attenuatio

procedat, de valetudine hominis pendet. Maxima damna facit fumificatio tabaci, quae causa

principalis est stenoseos pulmonum. Ordo mundi sanitarius (WHO) aestimat pulmonum stenosi plus

trinas hominum miliones singulis annis perire. Stenosim, sicut alios morbos, imprimis incolas

terrarum egentiorum necare. Investigatio in universitate Americana Johns Hopkins facta ostendit

damna pulmonum diaeta posse attenuari et deminui: defectionem et attenuationem actionis

pulmonum lentiorem quam aliis esse eis, qui multum lycopersicorum et fructuum recentium

comederent.

Museum nationale Brasiliae incendio deletum

Museum nationale urbis Rio de Janeiro incendio deletum est. Aliquantum ex rebus ibi

conservatis, quae plus viginti miliones numerantur, salvari potuit. Erat unum ex

maximis museis historiae naturalis et anthropologiae, idemque vetustissimum institutum

scientificum Brasiliae, quod etiam bibliothecam quingentorum fere milium librorum

habebat.

Tuomo Pekkanen.

31.8.8

Calamitas in Kuopio gravis

Die Veneris proximae septimanae (24.8.) in urbe Kuopio calamitas viaria gravissima accidit,

cum autoraeda longa de ponte viae autocineticae in orbitam ferriviariam decidit. Quattuor

homines mortui et complures male vulnerati sunt. Ante illum casum vehiculum quinque

autocinetis privatis impactum erat. Causa calamitatis nondum constat, sed suspicio est

autoraedam nimia velocitate vectam esse.

(Reijo Pitkäranta)

Macron in Finlandiam venit

Die Mercurii (29.8.) vesperi Emmanuel Macron, praesidens Francogalliae, cum coniuge

Brigitte in Finlandiam venit. Postridie eius diei mane collegam suum Sauli Niinistö in palatio

praesidentiali convenit, ubi imprimis de quaestionibus ad Unionem Europaeam pertinentibus

colloquebantur. Meridie etiam cum ministro principe Finlandiae Juha Sipilä sermonem

contulit.

(Reijo Pitkäranta)

Quid Donald Trump dixerit

Donald Trump, praesidens Civitatum Americae Unitarum, iter ministri a rebus exteris Mike

Pompeo in Coream Septentrionalem revocavit. Causam decreti dixit esse, quod dearmatio

nuclearis ibidem nec satis magnos nec satis celeres progressus fecisset. Addidit se non credere

Coreanos a Sinensibus in armis atomicis abolendis adiutum iri.

(Reijo Pitkäranta)

Sauli Niinistö gratia valet

Sauli Niinistö, praesidens Finlandiae, qui nuper septuaginta annos complevit, magnam

gratiam apud populum sibi conciliavit. Munus suum tam bene praestat, ut cives eum plurimi

aestiment. Ex paucorum sententia praesidens potestate politica interiore tantum ad ea officia

gerenda uti debet, quae lege constitutionali praescripta sunt.

(Satu Tuominen)

Novae frumenti species

Agricultura Finlandiae, quae paucis tantum frumenti generibus dedicata est, hac aestate

siccitatibus valde laboravit. Melius successerunt species frumenti minus usitatae et herbae ad

vescendum aptae, quae magnos calores bene patiuntur. In iis sunt quinoa, milium, vicia faba.

Rerum periti agricolis suadent, ut culturam rariorum herbarum esculentarum augeant.

(Reijo Pitkäranta)

Nova praenomina Finnica

Ad calendarium Finnicum, quod anno bis millesimo vicesimo (2020) divulgabitur, triginta

quinque nova praenomina addentur. Suum diem onomasticum accipient verbi causa Daniela

et Felix, quae nomina peregrinae originis sunt. Approbatae sunt etiam quaedam variationes

veterum praenominum domesticorum, quales sunt Iita et Venni.

(Reijo Pitkäranta)

Tigris prothesin accipiet

In India factum est, ut tigris quidam Bengalensis, postquam in pedicam venatorum

occultorum incidit, pedem amitteret. Ex eo tempore aegrotat et doloribus laborat. Quam ob

rem aliquot chirurgi e diversis terris oriundi decreverunt ad eum prothesin applicare. Neque

umquam ante accidit, ut tigri membrum arte factum imponeretur.

(Reijo Pitkäranta)

24.8.18

De conventuSotsieni

Die Mercurii (22.8.) Sauli Niinistö, praesidens Finlandiae, in urbem Sotsium profectus est

praesidentem Russiae Vladimir Putin in villa eius aestiva conventurus. Eidem itineri etiam

Timo Soini, minister a rebus exteris, interfuit. Colloquia praesidentium imprimis ad incepta

utriusque nationis communia pertinebant. Tales quaestiones erant mercatura, tutela naturae,

opera in regione arctica coniuncta.

(Reijo Pitkäranta)

Kofi Annan mortuus

Kofi Annan, pristinus secretarius generalis Nationum Unitarum, diem supremum obiit

octoginta annos natus. Nuntiatum est eum die Saturni (18.8.) Bernae, in urbe Helvetiae, post

brevem aegrotationem mortuum esse. Annan, vir ex Gana oriundus, Ordini Nationum

Unitarum inde ab anno millesimo nongentesimo nonagesimo septimo usque ad annum bis

millesimum sextum (1997-2006) praefuit.

(Reijo Pitkäranta)

Discrimen in Venetiola

Iam duae miliones incolarum Venetiolae annis proxime praeteritis patriam reliquerunt. Celeris

inflatio monetalis et penuria alimentorum medicinarumque causae sunt fugae, quae una ex

migrationibus in historia Americae Australis maximis esse existimatur. Numerus

Venetiolanorum, qui in Aequatoriam venerunt, hoc anno decies maior est quam Afrorum, qui

ad oras Europae adnaverunt.

(Saara Honkannen)

Inundationes Indiae

Pluviae monsoniae modo torrentium fluminum his septimanis cadentes in regione Indiae

nomine Kerala ingentes inundationes effecerunt. Quibus in aquis saltem ducenti homines

perierunt. Calamitas tanta erat, ut amplius decies centena mília incolarum in castra auxiliaria

confugerent. Quinquaginta fere milia domuum deleta esse dicuntur.

(Reijo Pitkäranta)

De familiis Coreanis

E bello Coreano annis quinquagesimis saeculi praeteriti gesto secutum est, ut non solum illa

paeninsula in duas partes divideretur, sed etiam complures familiae inter se separarentur. Hac

septimana autem multis Coreanis aetate provectis licentia data est proximos suos in Corea

Septentrionali conveniendi, quod illis maximo gaudio erat.

(Reijo Pitkäranta)

Memoria occupationis

Die Martis (21.8.) quinquaginta anni acti erant, cum Tzecoslovakia a copiis Unionis

Sovieticae et Foederis Varsaviae occupata est. Die enim vicesimo primo mensis Augusti anno

millesimo nongentesimo duodeseptuagesimo (21.8.1968) currus loricati Sovietici in vias

Pragae processerunt itaque conatibus Tzecoslovachiensium maioris libertatis consequendae

finem fecerunt.

(Reijo Pitkäranta)

De nova culina Romana

Multi Romani etiam hodie morem antiquum in cibis praeparandis servare volunt. Quam ob

rem tabernae cafeariae internationales in Italia parum profecerunt. Nunc autem aliquot

iuvenes coqui Romani culinam Italianam renovare decreverunt. Huc pertinet, quod pastam

antiquitus traditam vel urtica vel alio holere inusitato condiendam esse censent.

(Reijo Pitkäranta)

17.8.18

Calamitas Genuae gravis

Die Martis (14.8.) in Italia calamitas gravissima accidit, cum pons in via autocinetica prope

urbem Genuam factus ex inopinato collapsus est.Pons ille in altitudine quadraginta quinque

metrorum situs maximam partem in orbitas subiacentes ruinas fecit. Qua clade saltem

duodequadraginta homines mortui et complures vulnerati sunt, ut nuntiavit Matteo Salvini,

minister a rebus domesticis.

(Reijo Pitkäranta)

Tempus lugendi Italiae

Italiae tempus lugendi biduanum indictum est propter pontem viarium apud Genuam

delapsum. Rerum periti censent debilitatem structurae pontis in causa esse, cur strages facta

sit. Constat illum pontem, quem calamitate accidente viginti fere vehicula transibant, annis

sexagesimis saeculi praeteriti aedificatum esse, sed abhinc duos annos refectum.

(Reijo Pitkäranta)

Kim et Moon convenient

Kim Jong-un, dux Coreae Septentrionalis, et Moon Jae-in, praesidens Coreae Meridianae,

mense Septembri summum conventum Pyongyangae, in capite Coreae Septentrionalis,

habebunt. Cum mense Aprili convenerunt, constituerunt, ut conventus novus autumno

pararetur. Quas res inter se acturi sint, nondum constat, sed creditur eos saltem de armis

nuclearibus collocuturos esse.

(Satu Tuominen)

Reclamationes Romaniae

Bucarestiis, in capite Romaniae, multa milia civium corruptioni publicae reclamitaverunt.

Multitudo in mediam urbem congregata magna voce flagitavit, ut regimen civitatis munus

deponeret et in terra nova comitia parlamentaria instituerentur. Custodes publici adversus

homines tumultuantes iaculatra aquatica et gasum lacrimogenum adhibuerunt, quo facto multi

eorum in nosocomium deportati sunt.

(Reijo Pitkäranta)

Vindobona urbs victrix

Vindobona, caput Austriae, urbs in orbe terrarum habitatu omnium commodissima est, si

comparationi internationali nuper factae fides habetur. Melburnum, quod per multos annos

primum locum tenebat, secundum tulit. Osaka, urbs Iaponiensium, in hoc certamine tertia

evasit. Urbs Helsinki autem in optimis decem non numeratur.

(Reijo Pitkäranta)

De proventu bacarum

Proventus bacarum in silvis nostris hac aestate modestior, quam fieri solet, esse videtur. In

causa sunt siccitates longae et aestus fervidi, quibus tota natura laboravit. Haec inopia

imprimis ad rubum chamaemorum pertinet, cuius copia miserrima describitur. Paulo

prosperius successerunt myrtillus et vitis idaea, quorum bacae tamen solito minores sunt.

(Reijo Pitkäranta)

Certamina Berolinensia

Die Dominico (12.8.) certamina Europaea athleticae generalis, quae Berolini septem diebus

habita sunt, ad finem venerunt. Omnium optime contenderunt Britanni, cum sibi duodeviginti

nomismata conciliaverunt. Minus prospere athletae Finni succedebant, quippe qui tam

adverso Marte certarent, ut ne unum quidem nomisma domum reportarent.

(Reijo Pitkäranta)

10.8.18

Ebola denuo in Congo vagatur

Ebola, haemorrhagica febris, in Congo denuo vagari coepit. Saltem viginti homines post medium

mensem Iulium ex ea mortui sunt. Ille morbus anno millesimo nongentesimo septuagesimo sexto

(1976) apud flumen Ebola, ex quo nomen invenit, primum identificatus est. Victimae forti

haemorrhagia interna et externa laborant. Initio quidem symptomata sunt incerta, scilicet febris,

myalgia, diarrhoea, dysphoria, sed maior pars morbo affectorum moritur. Ante duos annos plus

undecim milia trecenti homines, imprimis in Guinea, Monte Leonino (vulgo Sierra Leone), Liberia

morbo Ebola perierunt.

Corea Septentrionalis experimenta nuclearia continuat

Relatio recens Consilii securitatis Nationum Unitarum narrat Coream Septentrionalem experimentis

nuclearibus finem non imposuisse et sanctiones illi positas violavisse. Onera petrolearia ex una nave in alteram in alto mari transferta et producta sanctionibus vetita peregre, exempli gratia in

Sinas et in Indiam, exportata esse.

Harvey Weinstein in iudicio se defendit

Harvey Weinstein, productor Hollywoodensis olim maximae auctoritatis, in iudicio de molestia

sexuali et stupris accusatus omnia crimina infitiatur. Plus septuaginta feminae illum molestiae

accusaverunt, sed Weinstein ipse negat se ullam feminam stupravisse et omnes res, de quibus

accusatur, communi consensu factas esse asseverat. Advocati eius ad epistulas electronicas

provocant, quas Weinstein a quadam femina, quae eum de stupro accusavit, post factum accepisset.

Facinora, quae Weinstein commisisset, mense Octobri anni proximi palam facta sunt. Brevi ex eis

orta est actio #MeToo appellata, quae in instrumentis communicatoriis per totum orbem pervulgata

est.

Sepulcrum dictatoris Franco transferetur

Regimen socialisticum Hispaniae corpus dictatoris Francisco Franco ex monumento belli civilis

tollere et in sepulcrum familiare transferre in animo habet. Illud monumentum est ecclesia in monte

cavatum nomine ”Abbatia a Sancta Cruce Vallis Caducorum” aut brevius ”Vallis caducorum ”

(Valle de los Caídos). Sepulcrum dictatoris, gravissimo lapide coopertum, est ante altaria ecclesiae.

Primus minister Pedro Sánchez medio mense Iulio coram parlamento monuit nullam democratiam

posse monumenta in honorem dictaturae sustinere.

Iam anno proximo (2017) parlamento Hispaniae placuit, ut sepulcrum transferretur sed regimen

partium dextrarum sententiam parlamenti exsecuta non est. Mense Iulio octoginta duo anni a bello

civili in Hispania orto exacti erant. Duce Francisco Franco confoederatio exercitus, ecclesiae et

phalangitarum dictaturam condidit, quae usque ad mortem Franconis duravit. Anno millesimo

nongentesimo septuagesimo quinto (1975) Franco in Valle Caducorum intra monumentum

sepultus est, quod ipse in animo adumbraverat.

Tuomo Pekkanen

3.8.18

Feriae aestivae ad finem vergunt

Feriae aestivae, quae a plerisque Finnis mense Iulio aguntur, iam ad finem vergunt. Post pausam sex septimanarum etiam Nuntii Latini, annum iam tricesimum incipientes, continuantur. Ex rebus mense Iulio gestis memorabiles fuerunt conventus praesidentium Putin et Trump atque ludi mundani pedifollii, ex quibus Francia trophaeum reportavit.

Canicula flagrat, dum clima mutatur

In omnibus partibus hemisphaerii septentrionalis hac aestate ardor solis fuit insolitus et complures centeni homines calore et incendiis perierunt. In Graecia plus nonaginta homines vitam in silvarum incendiis amiserunt. In Suetia incendia in duodeviginti regionibus grassantur, etsi pluviis cadentibus passim remittunt. Decem terrae Unionis Europaeae Suetis auxilium ad ignes exstinguendos praebuerunt, ex quibus terris siphonarii cum vehiculis et helicopteris in Suetiam venerunt. Ex Finnia grex triginta siphonariorum in Suetiam profectus est. Alia phaenomena extraordinaria huius temporis fuerunt typhones exitiosi atque siccitas.

Sicilia incendiis ex siccitate ortis male laborat, in Iaponia autem octoginta fere homines nimio calore perierunt. Per se mutatio climatis singula phaenomena calamitosa non efficit, sed investigationes ostendunt medio calore augescente aestus caniculares fieri frequentiores et longiores. In regione Arctica calefactio fuit celerior quam alibi.

Bellum commerciale iam non imminere videtur

Praeses Commissionis Europaeae Jean-Claude Juncker et Cecilia Malmström, commissaria a commercio, praesidentem Donaldum Trump in Aedibus Albis nuper (25.7.) convenerunt. Inopinanter praesidens Trump illis nuntiavit Americanos cum Unione Europaea velle cooperari, ut portoria et subventiones tollerentur, exceptis tamen productis industriae autovehicularis. Addidit portoria servitiorum, productorum chemicorum, medicamentorum et soiae fore minora et commercium eorum auctum iri. Praeterea pollicitus est portoria aluminii et chalybis, quae USA nuper Unioni Europaeae posuerat, retractatum iri. His rebus dictis videtur bellum commerciale inter USA et UE iam non imminere.

Trump a Putino Moscuam invitatus

Postquam praesidentes Vladimir Putin et Donald Trump Helsinkii mense Iulio (16.7.) convenerunt, Putin rettulit se praesidentem Trump Moscuam invitavisse. Itemque Putin a praesidente Trump in USA invitatus est, sed dies itineris procrastinatus est, quia adhuc investigatur, an Russia comitiis praesidentialibus Americanorum intervenerit.

In Kenia sacci plastici vetiti

In Kenia olim tempestate pluviosa cloacae obturabantur, quia sacci ex plastica facti in eis inhaerescebant. In ventre vaccarum sacci plastici inveniebantur et piscatores retibus plus plasticae quam piscium capiebant. Anno proximo (2017) in Kenia lex lata est, qua fabricatio et usus saccorum plasticorum omnino vetantur.

(Tuomo Pekkanen)

15.6.18

Conventus Singapurae historicus

Praesidens Donald Trump et dux Coreae Septentrionalis Kim Yong-un in insula Sentosa Singapurae

die Martis (12.6.) convenerunt. USA et Corea Septentrionalis relationes diplomaticas non habent et

officialiter in bello sunt. Tractabatur imprimis de bello inter utramque Coream componendo et de

armis nuclearibus in paeninsula Coreana exuendis. Ad conclusionem conventus Trump et Kim

pacto subscripserunt, quo partes, desideria pacis et opulentiae utriusque terrae observantes, ad novas relationes creandas se obstringunt. Corea Septentrionalis se obligat, ut dearmationi nucleari in

paeninsula Coreana operam det. Trump per sponsionem ad securitatem Coreae Septentrionalis se

obstringit.

Austria imamos expellit et meschitas claudit

Austria ordines musulmanicos, qui proposita politica habent, non approbat. Septuaginta imami,

quibus Turcia pecuniam praestat, ex Austria expellentur. Praeterea septem meschitae, de

radicalizzatione musulmanorum accusatae, claudentur. Cancellarius foederalis Sebastian Kurz die

Veneris (8.6.) nuntiavit illa consilia partem esse rationum, quibus ”islamismus politicus”

coerceretur. Quae rationes, ut ait cancellarius foederalis, in lege anno bis millesimo quinto decimo

accepta consistunt. Illa lex vetat, ne communitates religiosae a nationibus peregrinis pecuniam

capiant, et postulat, ut communitates musulmanorum erga societatem civilem Austriacam

consuetudines positivas sustineant.

De methano in Marte reperto

NASA (National Aeronautics and Space Administration) nuperrime (7.6.) nuntiavit se

animadvertisse quantitatem methani in planeta Marte variare. Iam antea constabat methanum in

atmosphaera Martis existere, sed nova res est, quod quantitas eius variis anni temporibus differt.

Investigatores non consentiunt, quae causa sit huius variationis. Methanum potest oriri ex glacie aut

esse originis biologicae. In Tellure maior pars methani, quod est in atmosphaera, oritur ex herbis et

animalibus, sed copia methani etiam in glacie perenni reposita est. Si methanum Martis biologicae

originis esse probaretur, testimonium esset, quod ibi existeret aut exstitisset vita microbica.

Ludi pedifollii mundani 2018

Ludi pedifollii mundani, heri inaugurati, Petropoli et in decem aliis urbibus Russiae fiunt. In

Russiam ad ludos spectandos multae miliones peregrinorum veniunt. Praeterea certamina, numero

sexaginta quattuor, a centenis hominum milionibus per televisionem spectantur. Finale erit die

quinto decimo mensis Iulii (15.7.).

Nuntii Latini usque ad 3.8.2018 intermittuntur

Nuntii Latini Radiophoniae Finnicae Generalis, qui inde ab anno millesimo nongentesimo

undenonagesimo (1989) septimanatim emittuntur, propter ferias aestivas usque ad mensem

Augustum intermittuntur. Quae cum ita sint, prima post ferias emissio Latina fiet ante diem tertium

Nonas Augustas sive die tertio mensis Augusti.

Auscultatoribus nuntiorum Latinorum iucundissimas ferias aestivas exoptamus.

(Tuomo Pekkanen)

8.6.2018

Novus archiepiscopus

Tapio Luoma, doctor theologiae quinquaginta sex annos natus, die Dominico (3.6.) novus

archiepiscopus ecclesiae evangelico-Lutheranae Finlandiae consecratus est. Hoc factum est in

Ecclesia cathedrali Aboënsi per benedictionem et impositionem manuum. Inter caerimoniam,

cui etiam praesidens Sauli Niinistö interfuit, ei crux et baculum pastorale ut insignia illius

muneris tradita sunt.

(Reijo Pitkäranta)

De novis regiminibus

Mense Iunio ineunte Italia novum regimen accepit, cum factio popularis nomine ”Motus

quinque stellarum” et partes dextimae ”La Lega” terram administrare coeperunt. In Hispania

autem principi ministro Mariano Rajoy, postquam fidem parlamenti amisit, munus

deponendum erat. In locum eius successit Pedro Sanchez, fautor socialistarum.

(Reijo Pitkäranta)

In Libya comitia fient

Factiones de principatu Libyae certantes pactae sunt, ut in terra comitia parlamentaria et

praesidentialia mense Decembri huius anni haberentur. Concordia constituta est in conventu

Parisiis acto, ubi rationes quaesitae sunt ad perturbationem civitatis mitigandam. Dictatore

Muammar Gaddafi abhinc septem annos de potestate deiecto futura Libyae obscura remanent.

(Saara Honkanen)

De bello commerciali

Inter Americanos et Europaeos bellum commerciale exarsisse videtur. Decrevit enim

praesidens Donald Trump, ut metallis ex Europa in Civitates Americae Unitas importandis

portorium imponeretur. Solutio pro chalybe erit vicenarum quinarum, pro aluminio autem

denarum centesimarum. Iam terrae Unionis Europaeae sui defendendi causa Americanis suum

indicem mercium vectigalium praeparant.

(Reijo Pitkäranta)

Eruptio vulcanica

In Guatimalia, civitate in America Media sita, eruptio vulcanica facta est, qua circiter centum

homines vitam amiserunt. Numerus mortuorum sine dubio etiam maior est, nam multi cives

adhuc quaeruntur. Complures vici lava et cineribus obruti sunt, cum vulcanus nomine Fuego

ignem et massam ardentem e faucibus suis evomere coepisset.

(Reijo Pitkäranta)

Nova lex in Dania data

Parlamentum Daniae legem approbavit, quae vestimentis vultum obtegentibus uti vetat. Nova

lex, quae mense Augusto ineunte valere incipiet, imprimis ad velamina mulierum

islamistarum pertinet. Interdicitur civibus Danis etiam usu cucullorum et barbae arte factae,

nisi quis causam manifestam ad tales res adhibendas indicare potest.

(Reijo Pitkäranta)

Oceanus Pacificus tranatur

Ben Lecomte, vir Francogallus quinquaginta unum annos natus, Oceanum Pacificum

tranaturus est. Itaque Nonis Iuniis (5.6.) in ora Iaponiae mare ingressus est, ut itinere novem

fere milium chiliometrorum confecto in urbem Franciscopolim perveniret. Putat se illam

natationem novem mensibus absolvere posse.

(Reijo Pitkäranta)

1.6.2018

Trump conventum cum Kin convocavit

Praesidens Donald Trump nuntiavit conventum cum Kim Yong-un, duce Coreae Septentrionalis,

revocatum esse. Epistula, quam ille huic scripserat, ab Aedibus Albis (24.5.) divulgata est. Causam

revocationis Trump scripsit esse apertam inimicitiam, quam Kim in recentissima sententia

ostendisset. Nihilo minus se exspectare, ut aliquo die Kim conveniret. Sedes nuntiis divulgandis

Coreae Septentrionalis rettulit Coream Septentrionalem ad colloquia cum USA adhuc paratam esse.

Antonio Guterres, secretarius generalis Nationum Unitarum, dixit se conventu revocato dolere et

desiderare, ut controversiae in paeninsula Coreana pacifice dirimerentur. Similiter multae aliae

nationes censebant. Quo facto (25.5.) Trump iam professus est adhuc fieri posse, ut summus

conventus institueretur et postridie (26.5.) mane per Twitter narravit prospera colloquia cum Corea

Septentrionali de futuro conventu in cursu esse. Primum consilium fuit, ut Trump et Kim die

duodecimo mensis Iunii (12.6.) Singapurae convenirent.

Laminae solares in California obligatoriae

In California Commissio a Politica Energiae constituit, ut novae domus laminis solaribus ad vim

electricam producendam ab initio anni bis millesimi vicesimi (2020) ornarentur. Constitutio ad

omnes domus maxime trium tabulatorum pertinet. Propositum est emissiones carbonei dioxydati

minuere et calefactionem climatis impedire.

Typhon imbres in deserta Arabiae attulit

Mane Sabbati (25.5.) typhon tropicus parti meridionali paeninsulae Arabiae impegit. Velocitas

ventorum erat in medio quinquagena quina metra singulis secundis. Imbres typhone allati oram

Omaniae prope urbem Salalam biduo verberaverunt. Meteorologi aestimant in illa regione biduo

ducenta millimetra pluisse, quae pluvias desertorum biennales superant. Salala est regio viridissima,

quae a periegetis frequentissimis petitur. Nunc autem et aerodromus et portus clausi sunt. Effectus

typhonis etiam in Iemenio et in insula eius Socotra sentiuntur, quae hereditas mundi ab Unesco

declarata est, quia ibi sunt indigenae herbae, cochleae serpentesque, quae nusquam alibi occurrunt.

Lagoena vini centum milibus euronum veniit

Die Sabbati (26.5.) in Francia orientali lagoena vini sub hasta centum tribus milibus septingentis

(103 700) euronibus veniit, quo carius pretium numquam pro una lagoena solutum est. Uvae ad

illud vinum lectae sunt anno millesimo septingentesimo septuagesimo quarto (1774), Ludovico XVI

in Francia regnante.

Real Madrid – Liverpool 3-1

Certamen finale Confoederationis campionum Kioviae, in urbe Ucrainae, vespere Sabbati (26.5.)

factum est. Conflixerunt greges Real Madrid Hispaniae et Liverpool Britanniae. Liverpool initio

egregie ludebat, sed postquam Mohamed Salah, optimus eius lusor, vulneratus ex certamine exire

coactus est, Hispani superiores esse coeperunt et retibus tribus ad unum (3-1) trophaeum

reportaverunt.

Tuomo Pekkanen

25.5.18

Memoria bellis caducorum

Die Dominico (20.5.) in Finlandia more solito memoria militum bello caducorum celebrabatur. Hoc anno in Ecclesia cathedrali Aboënsi sollemnitas specialis instituta est, qua civibus bello domestico abhinc centum annos mortuis aut supplicio affectis honor habebatur. Caerimoniae, cui praefuit archiepiscopus Kari Mäkinen, inter alios praesidens Sauli Niinistö et princeps minister Juha Sipilä interfuerunt.

(Reijo Pitkäranta)

De sanctionibus oeconomicis

Mike Pompeo, minister a rebus exteris Civitatum Americae Unitarum, de gravissimis sanctionibus oeconomicis Iraniae imponendis narravit. Terras Europaeas praemonuit, ne illas leges violarent. Si id fecissent, rationem eius rei Americanis redderent. Quae cum ita sint, civitatibus Europae decernendum est, utrum cum Iranianis an Americanis mercaturam exerceant.

(Reijo Pitkäranta)

Maduro victor comitiorum

Victor comitiorum praesidentialium Venetiolae declaratus est Nicolas Maduro, dominus imperiosus huius terrae. Paene septuaginta centesimis suffragiorum acceptis munus sex annorum iterum initurus est. Partes quidem oppositae socialistas rerum obscurarum accusant neque comitia credibilia fuisse putant. Henri Falcon, candidatus adversarius, dicit populum a regimine coactum esse, ut praesidenti Maduro suffragaretur.

(Satu Tuominen)

Investigatio hydrologica

Nasa sive administratio spatialis Americanorum amplam investigationem hydrologicam faciendam curavit ad cognoscendum, quibusnam mutationibus opes aquarum globi terrestris his annis affectae essent. Generatim dici potest imbres in partibus septentrionalibus et prope aequatorem augeri, cum metuendum sit, ne terrae inter illas regiones intercedentes exsiccentur.

(Reijo Pitkäranta)

Novum opus Rembrandtii

Mercator quidam artis nomine Jan Six Amstelodami picturam antea ignotam exposuit, cuius auctor est Rembrandt, unus ex artificibus omnium temporum celeberrimis. Tabula imaginem iuvenis ignoti figurat et partem operis amplioris constituere videtur. Rerum periti eam anno millesimo sescentesimo tricesimo quarto (1634) pictam esse credunt.

(Reijo Pitkäranta)

Puellae bene certarunt

In Lituania certamina pedifollica Europaea puellarum septendecim annis minorum posita sunt. Grex Finlandiae, postquam cohortem Angliae punctis duobus ad unum (2-1) superavit, locum tertium consecutus est. Ita sibi aditum ad certamina mundialia mense Novembri in Uruguaia futura paravit. Neque nostrates umquam in hoc athleticae genere tantum successum habuerunt.

(Reijo Pitkäranta)

De tempestate Mensis Maii

Mensis Maius apud nos tam calidus fuit, ut numerus dierum aestuosorum amplius decem esset. Sunt, qui tempestate aestiva gaudeant et in aprico libenter versentur, sed aestibus etiam factum est, ut agri sitirent et natura siccitate laborans pluvias recreantes exspectaret. Huc accedit, quod periculum incendiorum terrestrium in incremento est.

(Reijo Pitkäranta)

18.5.18

Coreae Septentrionali auxilium oeconomicum praebetur

Si Corea Septentrionalis armis nuclearibus abstiterit, USA et Corea Meridiana ei auxilium oeconomicum dabunt. Mike Pompeo, minister a rebus exteris Americanorum, in paeninsula Coreana primum Kim Yong-un, dictatorem Coreae Septentrionalis, deinde Kang Kyung-whan, ministrum a rebus exteris Coreae Meridianae, convenit.

Adhuc ante paucos menses moderatores Americani et Coreani Septentrionales inter se contumelias dicebant. Nunc autem Pompeo narravit se cum Kim ”bona colloquia” habuisse. Sed tam Pompeo quam Kang affirmabant condicionem auxilii oeconomici esse, quod Corea Septentrionalis ”plane, permanenter et probate” armis nuclearibus absisteret.

Israel et Irania in Syria conflixerunt

Postquam Irania copias suas in Syriam induxit, verendum erat, ne Israeliani et Irani confligerent. Neque frustra, nam vigilia Ascensionis (10.5.) copiae Iranianae in stationes Israelis, quae sunt in collibus Golan, circiter viginti missilia miserunt. Israel nuntiavit se pleraque ex eis avertisse neque milites suos damna cepisse. Deinde Israel in complures locos, quos milites Irani tenebant, ictus aerios fecit. Illi impetus ab Israelianis in Syriam facti fuerunt fortissimi post bellum Jom Kippur anno millesimo nongentesimo septuagesimo tertio (1973) confectum. Unio Europaea flagitavit, ut omnes partes in conflictu Israelis et Iraniae moderationem observarent.

Siccitas Keniae in eluviones mutata

Adhuc mense Februario magistratus Keniani et ordines internationales auxilium ad difficultates petiverunt, quas siccitas in Keniam attulisset. Nunc autem causa difficultatum sunt inundationes et morbi, quos aquae diluviales forsitan portant. Siccitas exceptionalis in Africa orientali multos annos duravit.

At mense Martio tempestas in contrariam mutata est. Imbribus factum est, ut viae multarum urbium diluvio cooperirentur et in Kenia multi lacus artificiales aquis complerentur. Primo vere in Kenia ducenta quadraginta quattuor milia (244 000) hominum aquas diluviales fugere coacta sunt. Aquis in urbibus fluctuantibus Nationes Unitae de periculo morborum monuerunt.

Balaena in Sinu Finnico nassa haesit

Sabbato (12.5.) nuntiatum est balaenam in angustissima parte Sinus Finnici nassa piscatorum haerere. Salvatores maritimi ad locum advocati balaenam liberaverunt, quae tamen in propinquitate mansit. Deinde tam prope navigium salvatorum natavit, ut illi reliquias retis, quae in balaena adhuc haerebant, tollere possent. Postea salvatores balaenam in altum mare comitati sunt.

Investigatores censent fieri potuisse, ut balaena ingenite ita se gereret et consulto ad salvatores veniret, cum intellegeret se auxilium accepturam esse. - Erat specie ”Megaptera novaeangliae”, quae in aquis Finniae septentrionalibus bis tantum antea visa est.

(Tuomo Pekkanen)

11.5.18

Quid Donald Trump dixerit

Praesidens Donald Trump nuntiavit se pactum nucleare cum Irania factum non servaturum esse. Quam ob rem sanctiones Iraniae impositas restitutum iri. ”Pactione sublata”, inquit, ”prohibetur, ne apparatio armorum nuclearium in Oriente Proximo acceleretur”. Idem dixit se sperare fore, ut una cum civitatibus sociis rationem inveniret, cuius ope discrimen´Iranianum solveretur.

(Reijo Pitkäranta)

Putin quartum praesidens

Nonis Maiis (7.5.) Vladimir Putin quartum praesidens Russiae factus est, cum iuramentum officii meridie in Cremlino dedit. Oratione habita censuit Russis summo studio id agendum esse, ut oeconomia patriae et qualitas vitae civium meliores redderentur. Paucis diebus ante inaugurationem mille sescenti fere homines praesidenti Putin adversantes Moscuae et in aliis Russiae locis deprehensi sunt.

(Reijo Pitkäranta)

De epidemia morbillorum

Epidemia morbillorum in Europa apud populum non vaccinatum grassatur. Ex statisticis apparet in Romania his duobus annis plus undecim milia hominum morbo affecta esse. In Graecia duo milia et in Italia quinque milia casuum nuperrime reperta sunt. Contagioni expositi sunt praecipue zingari, quia perpauci ex eis vaccinationem contra morbillos habent.

(Saara Honkanen)

De Academia Suetiae

Collegium Academiae Suetiae decrevit, ne praemium Nobelianum litteraturae hoc anno distribueretur. Inde fit, ut anno bismillesimo undevicesimo (2019) illud praemium bis detur. In causa dilationis sunt multa scandala, propter quae fides et auctoritas eius academiae in dubium vocatae sunt.

(Reijo Pitkäranta)

De conventu Latino

Septimana vergente societas nomine Academia Latinitati Fovendae (ALF) conventum annuum Romae celebravit. Argumentum principale erat lexicographia, quam ob rem socii Finni auditoribus de Nuntiis Latinis narraverunt necnon Lexicon neolatinum in Finlandia hoc anno editum proposuerunt. 

(Reijo Pitkäranta)

Aër in Finlandia purus

Qualitas aëris in Finlandia omnium optima est, ut ex investigatione ab Ordine sanitatis mundi (WHO) nuper facta patet. Copia enim particularum minimarum pro singulis metris cubicis apud nos minor est quam usquam alibi. Eadem fere puritate sunt Estonia, Suetia, Canada, cum rerum condicio in Quataria pessima sit.

(Reijo Pitkäranta)

Petra Olli victrix

In urbe Russiae nomine Kaspijsk certamina de principatu luctandi Europaeo instituta sunt. In serie feminarum sexaginta quinque chiliogrammatum nomismate aureo potita est Petra Olli, athleta Finlandensis viginti trium annorum. Adversaria eius, quam in luctatione finali duobus punctis superavit, erat Elis Manolova, femina ex Azerbaigiania oriunda.

(Reijo Pitkäranta)

4.5.18

Conventus historicus principum

Duces Coreae Septentrionalis et Meridianae convenerunt. Ex parte Coreae Septentrionalis aderant, praeter dictatorem Kim Yong-un, soror eius Kim Yo-jong et Kim Yong-chol, pristinus praefectus explorationis. Delegatis Coreae Meridianae praeerat praesidens Moon Jae-in. Duces constituerunt, ut statui belli inter Coreas finiendo operam darent.

Summa declarationis

Duces Corearum declarationi subscripserunt, cuius summa haec fuit: Propositum in paeninsula Coreana esse totalem dearmationem nuclearem; foedus pacis esse faciendum et statum belli finiendum; grapheum communicationis in Kaesong Coreae Septentrionalis condendum; programma ad familias uniendas redintegrandum; conventus moderatorum constanter repetendos; actiones propagatorias in confinio Corearum finiendas. 

Inter Coream Septentrionalem et Meridianam est adhuc nomine status belli. Nunc autem, ut declaratum est, omnes actus inimici tam terra marique quam in aere finiuntur. Duces alter alterum amplexabantur et Kim Yong-un monuit Coreanos esse eiusdem sanguinis populos, qui separatim vivere non possent.

Unio Europaea insecticidas neonicotinoides vetuit

Unio Europaea vetuit, ne insecticidae neonicotinoides in agris adhiberentur. Quod utile erit apibus et forsitan impediet, ne species avicularum exstinguantur. Cultores autem betarum vulgarium et plantarum oleosarum damna capient. Ordo internationalis avibus tuendis (Birdlife international) in relatione nuper divulgata monuit octavam quamque speciem avium in periculo esse, ne exstirparetur.

Electrificina nuclearis in Sibiriam navigat

Electrificina nuclearis ex navalibus Petroburgensibus in Sinum Finnicum deducta per Mare Balticum et Fretum Danicum praeter oram Norvegiae occidentalem in portum Murmanskensem remulcabitur, ubi combustibili nucleari onerabitur. Inde perget iuxta oram Russiae usque ad oppidum Pevek, portum remotissimum Sibiriae septentrionalis-orientalis. 

Illa electrificina est prima in suo genere. Ab autumno huius anni reactorium eius electricitatem regionibus Russiae remotissimis, aditu difficillimis, generare incipiet. Pevek est oppidum tam Russiae quam totius Asiae maxime septentrionale, celebre etiam campis carceralibus, in quibus captivi aetate Staliniana uranium fodiebant.

Dies veteranorum

Dies veteranorum apud Finnos die vicesimo septimo mensis Aprilis (27.4.) celebratur, quo die anni millesimi nongentesimi quadragesimi quinti (1945) bellum contra Germanos in Lapponia finitum est. Thema principale hornotini diei festi fuit considerare, quo modo hereditas veteranorum, qui hodie in Finnia quattuordecim milia numerantur, generationibus futuris transmitteretur. 

Aetas media militum veteranorum est nonaginta trium annorum. In secundo bello mundano Finni contra Unionem Sovieticam bis pugnaverunt, primum (1939-1940) soli, deinde (1941-1944) una cum Germanis, denique (1944-1945) in Lapponia contra Germanos. In his tribus bellis in parte Finnorum sescenta milia virorum et centum milia feminarum interfuerunt.

(Tuomo Pekkanen)

27.4.18

Iter praesidentis Macron

Emmanuel Macron, praesidens Francogalliae, cum coniuge iter officiale triduanum in Civitates Americae Unitas suscepit, ubi collegam suum Donald Trump et uxorem eius convenit. Praesidentes alter alterum salutantes in modum optimorum fratrum se gesserunt dextris inter se firmiter iunctis et multis osculis utrimque datis. Macron ab Americanis tanti aestimabatur, ut apud congressum eorum orationem anglice habere sineretur.

(Reijo Pitkäranta)

Novus Cubae praesidens

Miguel Diaz-Canel successor praesidentis Cubanorum Raul Castro est, ut administratores huius terrae confirmaverunt. Iuramentum officii statim dedit, postquam conventus nationalis se eum praesidentem creavisse pronuntiavit. Quamquam Castro se officio abdicavit, eum tamen potestatem in factione principali conservaturum esse dicunt. Cuba civitas a partibus communisticis recta adhuc manebit.

(Satu Tuominen)

Tensio Graeco-Turcica

Tensio politica et militaris inter Graeciam et Turciam augeri videtur. Nam singulis fere diebus de aliquo novo conflictu inter eas orto nuntiatur. Turci imprimis id graviter ferunt, quod regimen Graeciae recusavit, quominus milites seditiosos e Turcia profugos domum remitteret. 

(Reijo Pitkäranta)

Quid Ahtisaari dixerit

Martti Ahtisaari, praesidens olim Finlandiae, et Nationes Unitas et civitates praepotentes de inertia in bello Syriaco componendo reprehendit. Monuit ordini Nationum Unitarum magnum munus fuisse, ut efficeret, ut res Syriae in pristinum statum restituerentur. Ei tamen non contigisse, ut his septem annis officium suum apte praestaret.

(Reijo Pitkäranta)

Quid Toronti acciderit

Toronti, in urbe Canadae, autocinetum per corpora peditum transiit, quo factum est, ut decem homines morerentur et sedecim graviter vulnerarentur. Testes oculati narraverunt vehiculum onerarium ex improviso in viam pedestrem deversum esse ibique per longum spatium provectum magnum detrimentum attulisse. Auctor sceleris paulo post a vigilibus publicis deprehensus est.

(Reijo Pitkäranta)

Status linguae liberae

Iam altero deinceps anno status Finlandiae in indice libertatis rei diurnariae descendit. In praesentia locum quartum obtinet, cum abhinc aliquot annos lingua Finnorum omnium liberrima habita sit. Anno proxime praeterito nostrates in hac comparatione tertii erant. Illum indicem ordo internationalis nomine Redactores sine limitibus divulgare solet.

(Reijo Pitkäranta)

Nova formicae species

Grex investigatorum in Borneo novam formicae speciem invenit, quae se explodendo communitatem suam defendit. Nomen scientificum eius est Colobopsis explodens. Si quae bestia his formicis imminet, aliquot earum membra sua tantopere intendunt, ut totum corpus dissolvatur et hostis veneno inde effuso interficiatur.

(Reijo Pitkäranta)

20.4.18

Foederatio occidentalis Syriam missilibus percussit

USA, Britannia, Francia mane Sabbati plus centum missilia in tres metas Syriacas miserunt, in quibus arma chemica conficiebantur et tractabantur. Una meta erat Damasci, duae extra urbem Homs. Impetus fuit responsum ad ictum gasalem ante septimanam prope Damascum factum, cuius auctor regimen Syriae habetur. Propositum foederationis non fuit praesidentem Bashar-al-Assad ex potestate expellere sed prohibere, ne regimen Syriae arma chemica amplius adhiberet. Pentagon, ministerium defensionis Americanorum, nuntiavit omnia missilia scopos suos tetigisse et rem gestam esse. Vladimir Putin, praesidens Russiae, ictus statim damnavit et Consilium Securitatis ad conventum necessitatis convocavit

.

Barcinonenses flagitabant, ut duces incarcerati liberarentur

Complura centena hominum in viis Barcinonis nuper reclamitaverunt flagitantes, ut moderatores Cataloniae incarcerati liberarentur. Reclamitatores censent duces motus independentiae esse captivos politicos. In his est Jordi Sanchez, qui de incitatione civium et motu rebelli accusatur. Si novus dux regionalis mense Maio creatus non erit, nova comitia in Catalonia instituentur.

Praesidentem Trump ”feminas ut frusta carnis tractare”

James Comey, pristinus moderator Foederalis Officii Investigationis (FBI), praesidentem Donaldum Trump in colloquio televisifico acerrime vituperavit: ”Feminas ut frusta carnis tractat, de parvis et magnis rebus iterum iterumque mentitur et ab Americanis flagitat, ut credant. Homo illius generis moribus ad munus praesidentis Americanorum aptus non est.”

Polonia inquinationem aeris deminuere studet

Ordo mundi sanitarius (WHO) confirmavit ex quinquaginta urbibus Europae inquinatissimis triginta tres esse in Polonia. Inquinatio, quae pessima est mensibus hiemalibus, praesertim ex eo oritur, quod Poloni ad calefactionem multum carbonis fossilis adhibent. In domibus praeterea eiectamenta et purgamenta comburuntur. Nunc autem regimen Poloniae programma ”stop smog” incohavit. Insulatio caloris in domibus meliorabitur et puriores modi calefactionis excogitabuntur, ut quantitas energiae ad calefactionem necessaria, deminuatur.

Oeconomia Finniae opinione celerius crescit

Ministerium aerarii publici praevidet oeconomiam Finniae hoc anno duabus virgula sex centesimis (2,6%) crescere, quod paulo plus est quam antea putabatur. Melior occupatio et consilia, quibus augmentum sumptuum coercebitur, oeconomiam publicam etiam annis proximis confirmabunt. Hodiernus gradus occupationis iam prope unam et septuaginta centesimas (71%) ascendit.

Valetudo Finnorum minus prospera

Ex investigatione recenti apparet valetudinem Finnorum non tam prospere quam ante provenire. Obesitas et symptoma depressionis crebrescunt atque alta pressio sanguinis et cholesterolum nimis altum sunt adhuc communia. Ex viris viginti sex centesimae, duodetriginta ex feminis sunt pingues. Qualitas autem vitae hominum seniorum est melior quam ante.

(Tuomo Pekkanen)

13.4.18

Quid in Syria factum sit

ie Saturni (7.4.) in regione prope Damascum sita ictus gasalis factus est, quo complures cives mortui sunt. Communitas internationalis hac aggressione regiminis Syriae valde commota est. Sauli Niinistö, praesidens Finlandiae, censuit usum armorum chemicorum in quovis casu vehementissime condemnandum esse. Iam periculum esse, ne id, quod in Syria accidisset, paci internationali immineret.

(Reijo Pitkäranta)

Quid Coreani proposuerint

Coreani septentrionales nuntiaverunt se ad consultandum paratos esse de quaestione, quo modo paenisula Corea armis nuclearibus exueretur. Propositum est, ut colloquia de ea re inter ducem Kim Jong-un et praesidentem Donald Trump haberentur. De illo conventu instituendo Coreani cum Americanis iam sermones occultos contulerunt, ut a magistratibus fide dignis patefactum est.

(Reijo Pitkäranta)

Rationes Americano-Mexicanae

Mexicani omne genus cooperationem cum Americanis denuo aestimaturi sunt. Graviter enim tulerunt, quod praesidens Trump milites cohortis nationalis ad confinium Mexici mittere decrevit, quorum est mercaturam drogarum occultam et immigrationem illegalem impedire.

(Reijo Pitkäranta)

Scandalum Academiae Suetiae

Academia Suetiae, cuius est de praemiis Nobealianis litteraturae decernere, in pessimum discrimen vocata est. Tres enim scriptores pernoti, scilicet Peter Englund, Klas Östergren, Kjell Espmark, se de societate Academiae discesserunt. In causa scandali est homo quidam culturalis, quem complures mulieres in Academia laborantes de molestia sexuali accusaverunt.

(Reijo Pitkäranta)

Area in Vesijärvi archaeologica

In paroechia Finlandiae Vesilahti prope Villam Laukko locus sepulcrorum veterum repertus est, qui a saeculo p.Chr.n. sexto originem trahit. Ibi ossa mortuorum nec non cuspides telorum et varia ornamenta in lucem venerunt. Antea illam regionem ad aetatem Vicingorum pertinere credebatur, sed ex novis excavationibus archaeologicis apparet eam multo vetustiorem esse.

(Reijo Pitkäranta)

Björgen certare desinit

Marit Björgen, scridatrix Norvegiensis omnium temporum praestantissima, se rei athleticae vale dicere nuntiavit. Nec decretum illud mirandum est, si respicis, quot et quantas res iam gesserit: est Olympionica octies, quae et quattuor nomismata argentea et tria aenea ex Olympiis domum reportavit. Huc accedit, quod omnino duodeviginti primatus scridationis mundanos consecuta est.

(Reijo Pitkäranta)

Tempestas mensis Martii

Mensis Martius in Finlandia duobus et in quibusdam regionibus etiam quinque gradibus Celsianis frigidior fuit quam fieri consuevit. In multis partibus nives mensuram consuetam excesserunt. Caelum gelidissimum erat in communi Utsjoki, ubi temperatura ad triginta sex gradus infra zerum descendit. Sol autem solito magis lucens homines tempestate glaciali vexatos laetificabat.

(Saara Honkanen)

6.4.18

Statio spatialis Sinensium praecipitavit

Tiangong-1, statio spatialis Sinensium, Kalendis Aprilibus multo mane in regionem meridianam Oceani Pacifici praecipitavit. Illa statio quidem erat pondo octo metretarum, sed maiore parte eius in atmosphaera exusta, paucissima scruta in oceanum ceciderunt. Statio Tiangong-1 anno bis millesimo undecimo (2011) in spatium missa erat.

Sinae telonia mercibus Americanis imposuerunt

Sinenses nuntiaverunt se vectigalia telonialia viginti quinque centesimarum (25%) plus centum mercibus Americanis imponere, imprimis productis agriculturae, aeroplanis, autovehiculis. Causa est, quod praesidens Donald Trump decreverat, ut vectigalia eiusdem magnitudinis chalybi et aluminio Sinensium imponerentur. Deinde in indicem mercium plus mille trecenta producta ab USA addita sunt.

Russia, Irania, Turcia vires coniungunt

Moderatores Russiae, Iraniae, Turciae nuper Ancyrae convenerunt. Recep Tayyip Erdogan, praesidens Turciae, Vladimirum Putin, praesidentem Russiae, et Iraniae praesidentem Hassan Ruhani ad colloquia Ancyrae habenda invitaverat. Propositum moderatorum erat imprimis condicionem rerum Syriae tractare atque mutuas relationes oeconomicas corroborare. Russia et Turcia, quae cum terris occidentalibus dissensiones habent, discordiis inter se praetermissis fortes relationes oeconomicas volunt coniungere. Electrificina nuclearis Russica, quae in urbe Akkuyu aedificatur, praesente Putino celebrabatur. Praeterea ductus gasalis, quo Russi gasum Turcis ducent, iam praeparatur. Cum praesidente Hassan Ruhani Putin Ancyrae de programmate nucleari Iraniae consulebat. Imprimis USA Iraniam accusavit, quod pactum nucleare duobus annis ante factum, violavisset. Illo pacto Irania se obligavit, ne arma nuclearia faceret, dummodo communitas internationalis sanctionibus oeconomicis contra Iraniam positis absisteret.

Hospites in Aedibus Albis

Ex Cremlino nuntiatum est praesidentem Trump Vladimirum Putin in Aedes Albas invitavisse. At propter novas discordias Americani tergiversantur neque ad conventum praesidentium efficiendum quicquam factum est. Praesidentes autem Estoniae, Lettoniae, Lituaniae in Aedibus Albis a praesidente Donaldo Trump die Martis (3.4.) recepti sunt.

Via Crucis – ambulatio paschalis Helsinkiensis

Plus quindecim milia hominum vespere Sabbati (31.4.) Viam Crucis, ambulationem oecumenicam, in media urbe Helsinki participaverunt. Ambulatio, anno millesimo nongentesimo nonagesimo sexto (1996) primum instituta, crucifixione symbolica in scalis Cathedralis Helsinkiensis finita est. Partes Iesu, personae ambulationis principalis, egit cantor dramaticus Waltteri Torikka.

Teivas Oksala diem obiit supremum

Professor Teivas Oksala, subtilis interpres et investigator sedulus litterarum classicarum, postridie Kalendas Martias annos natus duos et octoginta diem obiit supremum. Operam poetis praesertim Romanis in patrium sermonem vertendis dedit. Libros divulgavit, quae ad culturam classicam in patria propagandam spectant, et ad institutionem Latinam renovandam multa contulit. 

Requiem aeternam dona ei, Domine, et lux perpetua luceat ei.[1]

(Tuomo Pekkanen)

30.03.18

Legati Russi expelluntur

Amplius centum legati Russi e terris occidentalibus domum expelluntur, ut die Lunae (26.3.) nuntiatum est. Haec poena illis solvenda est ictus veneni nervalis, quem Russi in Britannia perpetraverunt. Unus legatus etiam ex Finlandia exire iussus est, quamquam tale decretum facere nostratibus difficillimum fuisse dicitur. 

(Reijo Pitkäranta)

Kim in Sinas iter suscepit

Hac septimana ineunte Kim Jong-un, dux Coreae Septentrionalis, una cum coniuge iter secretum Pekinum suscepit, ubi praesidentem Sinarum Xi Jinping convenit. Vehebatur eodem tramine bene munito, quo pater eius antea usus erat. Patefactum est eos de pace et stabilitate in paeninsula Corea servanda collocutos esse. Inter visitationem Kim confirmavit civitatem suam dearmatione nucleari obligatam esse.

(Reijo Pitkäranta)

Incendium in Sibiria grave

Die Dominico (25.3.) in urbe Kemerovo in media Sibiria sita calamitas funestissima accidit. Amplius sexaginta homines, in iis complures parvuli, vitam amiserunt incendio saevo in magno mercium emporio coorto. Verisimile est ignem in cinematographeo accensum esse, quod in summo tabulato illius aedificii iacebat.

(Reijo Pitkäranta)

De eiectamentis plasticis

In regione maritima inter Californiam et Insulas Havaianas patente tanta eiectamentorum plasticorum copia fluctuat, ut magnitudine aream Francogalliae ter excedat. Vertex massae illius paene octoginta milia metretarum efficit. Ordo Hollandiensis nomine Ocean Cleanup aestate proxima actiones incepturus est, quibus mare a re plastica paulatim purgetur.

(Reijo Pitkäranta)

Aviculae cito rarescunt

Multae aviculae in Europa moribundae sunt. Numerus earum vel in Francogallia saltem tertia parte deminutus est. Biologus Benoit Fontaine, qui in populationes avium inquisivit, rerum condicionem pessimam esse censet. ”Iam in eo est”, inquit, ”ut rura nostra in deserta mutentur”. In causa est, quod insecta, quae avibus victui sunt, ab agricolis veneno delentur.

(Reijo Pitkäranta)

Monitio ad ambulandum

Regimen Finlandiae valetudinem nationalem meliorem redditurum est, cum cives ad ambulandum et birotandum hortatur. Pecuniam quinque milionum euronum municipiis reservavit, qua vias birotarias reficerent. Spes est, ut cura valetudinis publica ex ambulatione et birotatione aucta compendium multorum miliardorum faciat. 

(Satu Tuominen)

Kaisa Mäkäräinen victrix

Kaisa Mäkäräinen, femina Finlandensis triginta quinque annos nata, in eo athleticae genere, quod biathlon dicitur, hac hieme omnium praestantissima erat. Namque ex omnibus certaminibus internationalibus octingenta viginti duo (822) puncta tulit, cum Anastasia Kuzmina, athleta ex Slovakia oriunda, tribus punctis inferior esset.

(Reijo Pitkäranta)

23.03.18

Putin in quartum praeisentatum creatus

In comitiis Russiae die Dominico (17.3.) factis Vladimir Putin in quartum praesidentatum creatus est. Ex suffragiis datis quinquaginta quinque miliones sive prope septuaginta septem centesimas (76,65%) accepit. In comitiis ante sex annos factis numerus suffragiorum illi datorum fuit quadraginta quinque miliones sive prope sexaginta quattuor centesimae (63,6%). Inter competitores primi erant Pavel Grudinin (11,81%), Vladimir Zhirinovski (5,67%), Ksenija Sobtsak (1,66%). Ex civibus suffragium habentibus circiter sexaginta septem centesimae (67%) ad urnas venerunt, quae duabus fere centesimis plus sunt quam in comitiis praesidentialibus anno bis millesimo duodecimo factis.

Crisis inter Russos et Britannos diplomatica

Postquam Britannia viginti tres legatos diplomaticos Russos domum remisit, Russia nuntiavit se totidem legatos Britannos expellere; neque Britanniae consulatum Petropoli condere permitteretur atque British Council, centrum culturae et educationis, actiones in Russia finiret. Ad haec Theresa May, prima ministra Britanniae, respondit: ”Ferendum non est, quod regimen Russiae vitae civium Britannorum aut aliorum in solo Britanniae imminet.” Britanni enim censent venenum nervale, quo Sergei Skripal et filia eius Salisburiae infecti sunt, in pristina Unione Sovietica factum esse. Quo modo illud venenum in Britanniam portatum sit, nondum constat.

Colloquia de Corea Septentrionali Helsinkiensia

Colloquia arcana et inofficialia de Corea Septentrionali septimana incipiente in Finnia facta sunt. Choi Kang Il, diplomaticus Coreae Septentrionalis, die Dominico Helsinkium venit, sed de aliis colloquiorum participibus, qui dicuntur esse magistratus aut homines academici, singula non sunt nota.

Argentaria Nordea sedem principalem in Finniam transfert

Argentaria Nordea in conventu societatis Idibus Martiis habito decrevit, ut sedem principalem ex Suetia in Finniam transferret. Causa erat, quod Suetia non est membrum in Unione Argentaria Unionis Europaeae. Consilium a societate captum in actis diurnis Suetiae acerrime vituperabatur et moderatores eius superbiae accusabantur.

Finnia terra felicissima

In relatione Nationum Unitarum (The World Happiness Report), nuper (14.3.) divulgata, Finnia inter centum quinquaginta sex terras felicissima iudicatur. Respiciuntur in hac relatione inter alia productio pro capite nationalis, securitas socialis, valetudo, longitudo vitae, libertas eligendi. In singulis terris minime mille homines interrogabantur. In hac relatione, anno bis millesimo duodecimo (2012) primum divulgata, terrae septentrionales primos locos occupaverunt. Hoc anno Norvegia secundum locum vindicat, etiam Suetia, Islandia Daniaque inter primas decem terras numerantur. Extra Europam excellent Nova Zelandia et Canada; USA de loco quarto decimo, quem ante habebat, in duodevicesimum decidit.

(Tuomo Pekkanen)

16.03.18

Quid Salisburiae acciderit

Moderatores Britanniae viginti tres legatos Russiae domum remittunt. Accusant enim regimen eorum sceleris, quod in Sergei Skripal, pristinum speculatorem Russum, et in eius filiam adultam Iuliam commissum est. Inventi sunt in media urbe Salisburia moribundi propter venenum nervale, cuius vestigia in corporibus eorum videre erant. Condicio utriusque adhuc gravissima esse describitur.

(Reijo Pitkäranta)

Tillerson munus deponit

Donald Trump, praesidens Civitatum Americae Unitarum, ministrum a rebus exteris Rex Tillerson a magistratu amovit, cum merita eius erga patriam laudaret. Dicuntur sententiae eorum de variis rebus politicis iam diu inter se differre. In locum eius succedit Mike Pompeo, praefectus Sedis rei exploratoriae (CIA).

(Reijo Pitkäranta)

Kim et Trump convenient

Kim Jong-un, dux Coreae Septentrionalis, praesidentem Americanorum Donald Trump convenire vult. Ait se ad colloquium de experimentis missilium intermittendis paratum esse. Nuntius eius rei in epistula inclusus erat, quam delegati Coreae Meridianae in urbe Washington divulgaverunt. Praesidens Trump se invitationem accipere nuntiavit. 

(Reijo Pitkäranta)

Xi Jinping dux sempiternus

Congressus popularis Sinarum legem iussit, qua cavetur, ne praesidenti viventi munus adimatur. Quae cum ita sint, nihil iam obstat, quin Xi Jinping, dux hodiernus, civitati per totam vitam praesit. E tribus fere milibus delegatorum, qui suffragio parlamenti intererant, nonnisi duo illi rogationi adversati sunt.

(Reijo Pitkäranta)

Stephen Hawking mortuus

Stephen Hawking, physicus et cosmologus celeberrimus Britannus, diem supremum obiit septuaginta sex annos natus. Per multos annos morbo amyotrophico laborabat, quam ob rem se movere non poterat. In rebus physicis perscrutandis tam acutus erat, ut Einstein nostri aevi appellaretur. Investigationes eius imprimis ad lacunas nigras spatii cosmici pertinebant.

(Reijo Pitkäranta)

De Mari Baltico tuendo

Ordo naturae mundi tuendae relationem de statu programmatis Maris Baltici protegendi divulgavit. Investigatum est, quomodo diversae nationes accolae maris luxuriationem et pollutionem avertissent et biodiversitatem fovissent. In comparatione primum locum obtinuit Suetia, quam secuta est Finlandia. Experti autem dicunt rationes nationum nondum sufficere ad mare servandum.

(Saara Honkanen)

Hiems nivibus plena fuit

Hiems in hemisphaerio orbis terrarum septentrionali hoc anno mirum quam nivosa fuit. Annis proxime praeteritis copia nivium in regionibus arctois multum variavit, ut patet e mensionibus Instituti meteorologici Finlandiae. Rem autem in universum spectanti casus nivium ultimis decenniis deminuti esse videntur.

(Reijo Pitkäranta)

9.03.18

Oratio de statu nationis presidentis Putin

Vladimir Putin, praesidens Russiae, de statu nationis orationem fecit, in qua condiciones sociales, evolutionem oeconomicam et praecipue potentiam militarem, quomodo augeretur, pertractavit. Confirmavit Russis nullum propositum in ullam terram invadendi esse et evolutionem armorum tantum ad pacem in toto terrarum orbe conciliandam spectare. Praesidens censebat necesse esse paupertatem in Russia proximis sex annis dimidiare et efficere, ut natalitas aequaliter cresceret. Se paratum esse programmata ad prosperitatem populi pertinentia quadraginta centesimis augere. Oratio de statu nationis praesidentis etiam ad comitia praesidentialia spectabat, quorum primum suffragium post decem dies (18.3.) fiet.

Germani tandem novum regimen habebunt

Factio socio-democratica Germaniae (SPD) suffragio facto decrevit, ut cum conservativis, quibus Angela Merkel praeest, administrationem susciperet. Itaque democratae sociales una cum democratis Christianis (CDU/CSU) novum Germaniae regimen constituent. Numquam ante constitutio regiminis tam diu duravit, nam comitia foederalia iam mense Septembri facta erant.

Comitia Italiae

In comitiis Italiae die Dominico factis cives non tantum delegatos in parlamentum creaverunt nam eodem die etiam electiones regionales factae sunt. Plurima suffragia accepit coalitio dextra centralis, in qua sunt factio Forza Italia et foederati eius. Ex singulis partibus politicis plurima suffragia accepit motus Quinque stellarum.

Novus archiepiscopus creatus

Doctor theologiae Tapio Luoma novus archiepiscopus ecclesiae Finnicae evangelico-Lutheranae creatus est, cum trecenta septuaginta quattuor suffragia (374) sive maiorem ex eis partem (56,17%) obtinuit. Hodie episcopus est dioecesis Esboënsis. Tapio Luoma munus archiepiscopi Kalendis Iuniis suscipiet, quo die archiepiscopus hodiernus Kari Mäkinen rude donabitur.

In Scotia nova reperta archaeologica

In Scotia septentrionali-orientali apud suburbium Milltimber urbis Aberdeen, vestigia habitationis humanae inde ab aetate mesolithica excavationibus recentibus reperta sunt. Antiquissima ex eis sunt quindecim milium annorum, sed notabilia imprimis sunt testimonia praesentiae Romanorum, in his nonaginta furni ad panes coquendos constructi. Illi furni, ut archaeologi credunt, a militibus Romanis anno octogesimo tertio vel quarto facti sunt, cum copiae Romanorum duce Gnaeo Iulio Agricola in partes Britanniae septentrionales penetrabant, ut imperium Romanum dilatarent. Quod autem illis non contigit et Romani ex Scotia se recipere coacti sunt.

Signum veris: ursi ex somno excitantur

Ursi in vivario Helsinkiensi habitantes ex nido hiemali Kalendis Martiis exierunt. Frigora ursos non perturbant sed lumen solis in dies augescens eos allicit. Somnus ursorum hiemalis plerumque mense Martio vel Aprili finitur, in Europa meridiana, ubi cibus per totum annum facilius invenitur, ursi hieme non omnino dormiunt.

(Tuomo Pekkanen)

2.03.18

Rerum in Syria condicio

Praesidens Vladimir Putin, decreto Consilii securitatis Nationum Unitarum oboediens, copiis Russis in Syria bellantibus ignistitium imperavit: pugnae singulis diebus ad quinas horas intermitterentur, ut cives e regione Damasci borbardationibus vexata effugere possent et iis remedia et auxilium humanitarium suppeditarentur. Milites tamen regiminis Syriae ignistitio neglecto impetus cruentos in illa loca facere perrexerunt.

(Reijo Pitkäranta)

Quid Poloni fecerint

Tribunal Unionis Europaeae iudicavit Polonos leges de qualitate aeris violavisse. Iussit eos sine mora edictis obsequi incipere; aliter illos pecunia multatum iri. Iam complures annos modos emissionum particularum venenosarum excedunt, ut e sententia apparet. E Sede circumiectali Europaea dicitur quinquaginta milia hominum in Polonia quotannis propter pollutiones aerias praemature mori.

(Satu Tuominen)

Europa frigoribus alget

Hac septimana tota fere Europa frigoribus arcticis ex Sibiria diffusis laborat. Vis eorum tanta fuit, ut etiam Romae nives caderent, quam ob rem plurimae scholae clausae sunt et commeatus publicus in magnas difficultates vocatus est. Neque Romani post annum bis millesimum duodecimum (2012) hiemem tam asperam experti sunt.

(Reijo Pitkäranta)

Antidepressiva utilia

Rerum periti diu litigabant, utrum remedia antidepressiva ad mentem sanandam adiuvarent, necne. Ex amplissima investigatione internationali nuper divulgata patet ea re vera illi morbo avertendo conferre. Quantam autem vim in diversis casibus habeant et quales effectus secundarios secum ferant, e qualitate singulorum medicamentorum pendere videtur.

(Reijo Pitkäranta)

Turku Pompeii Finlandiae

Aboae sive in urbe Turku, quod olim caput Finlandiae erat, ruinae urbis mediaevalis in lucem venerunt. Reficiebatur palaestra Scholae cathedralis Aboënsis, cum sub pavimento partes viae stratae veteris et constructiones duarum domuum apparuerunt. Huc accesserunt fornices cellarum et fragmenta quaedam vasorum. Sunt iam, qui dicant Aböenses suos proprios Pompeios habere.

(Reijo Pitkäranta)

Finis Olympiorum hiemalium

Die Dominico (25.2.) Olympiis hiemalibus in urbe PyeongChang habitis finis impositus est. Longe optimo successu certaverunt athletae Norvegiae: hi enim sibi omnino undequadraginta nomismata conciliaverunt, in iis quattuordecim aurea. Secundum locum obtinuit Germania uno et triginta nomismatis acceptis.

(Reijo Pitkäranta)

Iivo Niskanen Olympionices

Athletae Finlandenses in Olympiis hiemalibus rem bene gesserunt, si respicis eos sex nomismata domum reportavisse. In cursu campestri quinquaginta chiliometrorum, quod certamen regium dicitur, Iivo Niskanen cum ingenti suorum gaudio Olympionices evasit. In scridatione autem feminarum Krista Pärmäkoski tribus nomismatis potita est, e quibus unum argenteum erat, duo aenea. 

(Reijo Pitkäranta)

23.02.18

Bellum omnium contra omnes

Bellum in Syria paene septem annos geritur. USA et Turcia, membra Natonis, partes inter se adversas sustinent. Intersunt etiam Russia et multae aliae terrae gregesque. Turci mense Ianuario impetus in Syriam susceperunt, quia Curdos, qui confinium septentrionale Syriae tenent, terroristas habent. In Turcia insignis minoritas Curdorum habitat ideoque praesidens Erdogan timet, ne potestas eorum corroboretur. USA autem Curdos sustinet, qui fortiter contra ordinem Isis pugnaverunt. Russia regimen praesidentis Bashar al-Assad adiuvat, sed Turcia eum gradu demovere velit. Al-Assad iam dicitur

Curdos contra Turcos pugnantes adiuvare.

Conventus de securitate Monacensis

In conventu de securitate Monacensi de operatione pacis in Ucraina orientali tuendae disputatum est. Sigmar Gabriel, minister a rebus exteris Germaniae, arbitrabatur (17.2.) sanctiones Russiae impositas laxari posse, si de illa operatione conventum esset. Propositum erat, ut tutatores ex eis terris colligerentur, quae membra Natonis non essent. Anders Fogh Rasmussen, pristinus secretarius generalis Natonis, inter illas terras Finniam, Suetiam Austriamque nominaverat. Praesidens Sauli Niinistö, de hac re diurnariis Finlandensibus locutus bellum Ucrainae maximum in Europa problema esse censebat, ad quod solvendum, si fieri posse videretur, Finniam adesse debere.

Estonia saeculum independentiae celebrat

Die vicesimo quarto mensis Februarii (24.2.2018) Res publica Estoniae independentiam centum annorum officialiter celebrat, sed festivitates iam mense Aprili anni superioris (2017) incohatae sunt, quo centum anni ex eo tempore lapsi erant, quo partes ab Estoniensibus habitatae in unum iunctae sunt. Celebratio usque ad diem secundum mensis Februarii anni bis millesimi vicesimi (2.2.2012) continuabitur, qui dies anniversarius centesimus erit pacis Dorpatensis. Lituania independens facta est decem fere diebus ante, Lettonia duabus septimanis post quam Estonia. 

Eodem anno (11.11.1918) declaratum est etiam Poloniam limitibus pristinis acceptis conditam esse.

Res periegetica in Finnia crescit

Anno superiore (2017) plures in Finniam periegetae venerunt quam umquam ante, nam res periegetica quattuordecim centesimis (14%) crevit, cum numerus apud Finnos pernoctantium sex miliones et dimidium superavit. Plerique periegetae ex Russia, Germania, Suetia, Britannia, Sinis venerunt. Longe plurimi urbem Helsinki cum regionibus adiacentibus et Lapponiam petiverunt.) Augmentum rei viatoriae est pars progressus globalis, nam oeconomia crescente plures quam antea potestatem peregrinandi habent. In multis locis, quibus viatores in Europa favere solent, nimia hominum frequentia requiem petentibus est iam molesta. Extensione vitae urbanae proximitas naturae atque amplum spatium et silentium periegetas in terras septentrionales attrahunt.

(Tuomo Pekkanen)

16.02.18

Calamitas aëria in Russia

Die Dominico (12.2.) in Russia gravis calamitas aeria facta est, cum aëroplanum, quod in urbem Orsk versus volabat, prope Moscuam in terram decidit. Omnes unus et septuaginta insessores vitam amiserunt. Testes oculati narraverunt aëroplanum iam ante praecipitationem flammis correptum et in aëre displosum esse. Causa calamitatis vitium quoddam technicum esse existimatur.

(Reijo Pitkäranta)

De invitatione inopinata

Moon Jae-in, praesidens Coreae Meridianae, in Coream Septentrionalem hospitio invitatus est. Vocationem proposuit soror dictatoris Kim Jong-un, quae die Saturni (10.2.) praesidentem Moon in palatio praesidentiali convenit. Epistulae invitatoriae ipse Kim Jong-un subscripserat. 

(Reijo Pitkäranta)

Quid Guterres dixerit

António Guterres, secretarius generalis Nationum Unitarum, censet communitatis internationalis esse Iraquiam adiuvare propter ea gravissima damna, quae inter bellum contra ordinem Isis gerendum pertulerit. ”Totus orbis terrarum”, inquit, ”vobis multum debet pro vestra pugna adversus hostem acerrimum et omni mundo minacem”. 

(Reijo Pitkäranta)

De commercio servorum

In Britannia custodes publici tres viros deprehenderunt, quos de ducentis hominibus in servitute tenendis suspectos habent. Scelus gravissimum in lucem venit, cum immigrantes in quodam latifundio Cornubiensi laborantes auxilium ab operariis Exercitus salvifici petivissent. Magistratus existimant in Britannia saltem tredecim milia hominum esse, qui ad opus servile coguntur.

(Saara Honkanen)

Qualitas aëris Germaniae

Regimen Germaniae quinque urbes delegit, in quibus commeatus publicus omnino gratuitus esset. Quae sunt Bonna, Manhemum, Essendia, Herrenbergium, Ruotlingia. Experimentum eo spectat, ut usu autocinetorum privatorum deminuto qualitas aëris melior reddatur. Unio Europaea de pollutionibus aëriis Germanorum tam sollicita est, ut illis actiones contrarias minitetur, nisi copiam emissionum contrahant. 

(Reijo Pitkäranta)

Dies linguae surdorum

Dies Lunae (12.12.) in Finlandia linguae gesticulatoriae dedicatus erat. Celebrabatur enim tunc dies natalis Caroli Oscar Malm, qui pridie Idus Februarias anno millesimo octingentesimo vicesimo sexto (1826) natus est. Ille vir apud nos pater institutionis surdorum habetur, quippe qui linguam gesticulatoriam promoverit et in urbe Borgoa primam scholam surdis docendis condiderit.

(Reijo Pitkäranta)

De Olympiis hiemalibus

Die nono mensis Februarii (9.2.) in urbe PyeongChang Coreae Meridianae Olympia hiemalia inaugurata sunt. His ludis e Finlandia centum fere athletae intersunt. Primis quidem diebus nostrates admodum bono successu certaverunt. Krista Pärmäkoski in scridatione feminarum iam duo nomismata aenea sibi conciliavit, et Enni Rukajärvi in certamine slopestyle appellato itidem locum tertium consecuta est.

(Reijo Pitkäranta)

09.02.18

Presidens Niinistö filiolo auctus salva coniuge

Postridie Kalendas Februarias primo vespere praesidens Sauli Niinistö filiolo auctus est salva coniuge Jenni Haukio. Pater, qui partui aderat, et matrem et infantulum bene valere nuntiavit. Numquam antea in Finnia factum est, ut praesidens rei publicae munere fungens pater fieret. Multa milia civium parentibus variis modis gratulabantur. In multimediis non tantum de recenti partu sed etiam de septimana praesidentis negotiosa narrabatur, nam Niinistö die Dominico (28.1.) in alterum praesidentatum primo suffragio creatus erat atque pridie ante filiolum natum (1.2.) munus praesidentis inierat et sollemne ius iurandum ante parlamentum dederat.

Praesidatus parlamenti creatus

Praeses parlamenti Finniae creata est Paula Risikko, factionis conservativae, adhuc ministra a rebus domesticis. Primus vicepraeses est Mauri Pekkarinen, factionis centralis, qui etiam in priore praesidatu eundem locum tenuit. In tertium a praeside locum est creata Tuula Haatainen, legata parlamentaris socio-democratica. Comitia die Martis (6.2.) inaugurata sunt.

Anniversarium victoriae Stalingradi

Dies anniversarius victoriae Stalingradi in Russia celebratus est. Proelium Stalingradense, quod inter cruentissima belli mundani secundi numeratur, finitum est, cum marescalcus campi Fridericus Paulus et nonaginta unum milia militum Germanorum postridie Kalendas Februarias anno millesimo nongentesimo quadragesimo tertio (2.2.1943) in deditionem venerunt. Stalingrad, mortuo iam Stalino Volgograd appellatum, fuit velut cardo belli, unde clades Germanorum incohata est. Magnae erant utrimque clades. In certaminibus, quae dimidium anni duraverunt, urbs ipsa deleta est. A parte Sovietica paene quingenta milia militum ceciderunt, ex Germanis eorumque foederatis saltem ducenta quinquaginta milia.

In Guatemala monumenta culturae Maya reperta

Archaeologi in Guatemala sub silva pluviali complura dena milia aedificiorum, pyramides munitionesque Mayarum antiquorum reppererunt, ex quibus apparet in regione Péten Guatemalae septentrionalis vel decem hominum miliones olim habitare potuisse, quod etiam ter quaterve plus est quam adhuc praesumptum est. Ex novissimis repertis apparet, ut investigatores censent, in Media America amplissimum cultum humanum floruisse, qui cum pristino cultu Sinensium aut Graecorum posset comparari. Investigatio technica Lidar laseriana ex aeroplanis et helicopteris facta est. Area investigata duo milia centum metra quadra patet. Cultura Maya in Mexico meridiano, Guatemala, Beliza, Salvatoria, Honduria illa fere aetate floruit, quae iniit mille annis ante Christum natum et causa ignota decimo saeculo ineunte exstincta est. Mayae praeter Astecos maxime insignes aborigines Americae habentur. Ars eorum erat egregiae qualitatis, suam scripturam habebant, calendaria accurata faciebant.

(Tuomo Pekkanen)

02.02.18

Niinistö comitiorum victor

Die Dominico (28.1.) in Finlandia comitia praesidentialia habita sunt. Omnino octo candidati inter se certabant, quis eorum civitati proximo sexennio praefuturus esset. Victoriam manifestissimam reportavit Sauli Niinistö, praesidens hodiernus, qui paene sexaginta tres centesimas (62,7%) suffragiorum sibi conciliavit. Hic eventus eo sensu historicus erat, quod nunc primum accidit, ut praesidens iam primo suffragio eligeretur

(Reijo Pitkäranta)

Putin inter gratulatores

Moderatores multarum civitatum praesidenti Sauli Niinistö de victoria comitiorum gratulati sunt. Unus eorum erat praesidens Vladimir Putin, qui in salutatione sua animum ad magnam auram popularem, qua ille frueretur, animum advertit. Idem dixit Russiam paratam esse id agere, ut necessitudines inter utramque civitatem intercedentes sustentarentur et stabilitas securitasque corroborarentur.

(Reijo Pitkäranta)

Bellum civile commemoratur

Die Lunae sive die vicesimo septimo huius mensis (27.1.) centum anni acti erant, cum bellum civile in Finlandia exarsit. Eo bello cruento rerum novatores, qui russati dicebantur, adversus albatos sive copias parlamenti et senatus dimicaverunt. Pax restituta est Idibus Maiis (15.5.), postquam duodequadraginta fere milia civium in pugnis vitam amiserunt.

(Reijo Pitkäranta)

Silentium parlamenti triste 

Die Veneris septimanae proximae (26.1.) in parlamento Finlandiae silentium triste actum est ad memoriam belli civilis recolendam. Paulo ante praesides omnium factionum suam quisque partem orationis communis recitaverant, ubi concorditer democratiam, reconciliationem, integritatem civitatis defendebant. Sperabant fore, ne patria umquam tantam calamitatem acciperet.

(Reijo Pitkäranta)

Oratio praesidentis Trump

Praesidens Donald Trump congressui Americano orationem de statu nationis habuit. Primum quidem Americanos ad concordiam reconciliandam hortatus est nec non incrementum oeconomicum laudavit. Monuit etiam, quantopere inopia quaestus se praesidente decrevisset et quantum renovatio rei tributariae civibus prodesset. Insuper nuntiavit campum carceralem, qui in Guantanamo est, etiam posthac in usu fore.

(Reijo Pitkäranta)

Oblatio Britannis facta

Moderatores Unionis Europaeae Britannis occasionem e societate Unionis paulatim exeundi obtulerunt. Proposuerunt enim, ut illi usque ad finem anni bis millesimi vicesimi (2020) in mercatu interno manerent et ius libere commeandi haberent. Eodem tempore stipem societatis expenderent et legibus Unionis obtemperarent.

(Reijo Pitkäranta)

De hora aestiva reicienda

Administratores Finlandenses operam daturi sunt, ut consuetudine horae aestivae Unionis Europaeae desistatur. Sententiam ceterarum terrarum et parlamenti Europaei primum explorabunt. Legati parlamentares nostri mense Novembri petitionem civilem huius rei agebant. Quam quidem repudiaverunt, cum hora aestiva directivo Europaeo constituta esset. 

(Satu Tuominen)

26.1.18

Macron tapete Baiocense Britannis commodabit

Emmanuel Macron, praesidens Franciae, Britanniam nuper (18.1.) visitans cum prima ministra Theresa May imprimis migrationem et Britanniae ex Unione Europaea exitum tractavit, sed maximi apud Britannos habebatur, quod Macron Tapete Baiocense, quo expugnatio Britanniae et pugna Hastingensis (a. 1066) illustrantur, in Britanniam commodatum iri pollicitus est. Illud tapete est linteum undecimi saeculi septuaginta tria metra longum et quinquaginta fere centimetra altum, filis multicoloribus variegatum, quod in museo urbis Bayeux (ant. Augustodurum) Normandiae conservatur. Sunt in tapeti plus sescenti homines, praeterea aedificia, naves, canes aliaque animalia, quae figuris et textibus Latinis variegatis descripta sunt.

De causa interitus Astecorum

Populus Astecorum, qui in planitie edita Mexicana vivebat, saeculo sexto decimo paene omnino disparuit. Investigatores credunt causam interitus tandem repertam esse. Cum sceleti undetriginta Astecorum examine acidi nucleici (DNA < DeoxyriboNucleicum Acidum) investigarentur, apparuit causam mortis probabiliter fuisse bacterium, cui nomen est Salmonella enterica. Illud bacterium febrim altissimam, dolorem capitis, haemorrhagiam ex oculis, ore nasoque efficit et sic affectis brevi tempore mortem affert. Paucis annis quindecim miliones Astecorum, quae octoginta fere centesimae totius populi fuisse aestimantur, ita perierunt. Investigatio facta est in Universitate Tubingensi.

Siccitas Promuntoriopolitanis imminet

Promuntoriopolis Africae Australis (vulgo Cape Town, Kapstadt) siccitate nostri saeculi gravissima vexatur. Iam timetur, ne aqua in epitoniis aquariis omnino deficiat. Itaque usus aquae cotidianus in octogena septena litra pro capite iam restrictus est et mense Februario non plus quam quinquagena litra singulis permittentur. Penuria aquae imminente officinae, in quibus sal ex aqua marina separatur, propere aedificantur atque de novis puteis profundis terebrandis deliberatur. Promuntoriopoli sunt tres miliones quingenta milia incolarum, praeterea paene binae miliones peregrinorum, quibus lavatio pluvia in balneis deversoriorum ad duas minutas restricta est, urbem annuatim visitant.

Papa gastronomiae obiit

Paul Bocuse, coquus Francus Lugdunensis in orbe terrarum clarissimus et papa gastronomiae appellatus, unum et nonaginta annos natus diem (20.1.) obiit supremum. Novam culinam, quae minus opulenta et calorifica est quam culina classica traditionalis, promovit neque de materia cibariorum recentissima et optimae qualitatis, quanti sit aestimanda, monere desiit. Bocuse praecepta ciborum ingeniosa creavit, libros culinarios scripsit, coquos erudivit, summas cauponas constituit, certamen ”Bocuse d’or” condidit, quod velut certamen mundanum artis culinariae habetur. Etiam coqui Finni in illo certamine bonum successum habuerunt et effectus Pauli Bocuse in culinam Finnicam magni aestimatur.

(Tuomo Pekkanen)

19.1.18

Bulgaria Unioni praeest

Novo anno ineunte praesidatus Unionis Europaeae ad Bulgariam transiit. Sollemnitates inaugurales ibi habitae reclamationibus obscuratae sunt, quibus cives ostenderunt, quantopere actionum virorum politicorum se pigeret. Etiam moderatores Unionis solliciti sunt de criminalitate ordinata, qua Bulgaria vexatur nec non paupertate admodum gravi, qua illa civitas laborat.

(Reijo Pitkäranta)

Tunesia nivibus tecta

Hac hieme tempestates insolitae Tunesienses temptaverunt. Quamquam initium anni calidius erat, quam fieri consuevit, his septimanis pleraque loca Tunesiae nivibus densis obruta sunt. Inter nimbos nivales aquarum agmina de caelo tam acriter ceciderunt, ut diluvia efficerent. Pluit etiam locis desertis, ubi quadraginta annis pluviae omnino defuerant.

(Saara Honkanen)

Madsen caedis accusatur

Inventor Danus nomine Peter Madsen accusatur, quod redactricem Suetam Kim Wall occiderit. Accusator monet de scelere gravissimo agi et flagitat, ut is aut vinculis sempiternis damnetur aut ad curam sanitatis mentis cogatur. Mense Augusto Wall ad navem subaqaneam Madsenii spectandam profecta est, et postea partes corporis eius in mari inventae sunt.

(Reijo Pitkäranta)

Helsinki emporium maximum

Helsinki, caput Finlandiae, respectu multitudinis viatorum, emporium Europae et totius orbis terrarum frequentissimum evasit. Anno enim proximo per portus eius amplius duodecim miliones hominum transierunt. Causa principalis eius rei videtur esse, quod magna pars itinerantium per Helsinkium viam in urbem Tallinnam facit.

(Reijo Pitkäranta)

Z. Topelius celebratur

Die Dominico (14.1.) ducenti anni acti erant, cum Zacharias Topelius, unus e viris in historia Finlandiae maximis, natus est. Is non solum scriptor subtilissimus variarum rerum historicarum erat, sed etiam diurnarius praestantissimus. Libris et scriptis editis effecit, ut in animis civium sensus patriae nasceretur et illi intellegerent, quam amoena esset terra Finlandia. 

(Reijo Pitkäranta)

Pandae e Sinis venerunt

Ailuropoda melanoleuca est appellatio scientifica animalis urso similis, quod nomine pandae notum est. Die Iovis (18.1.) meridie e Sinis duo pandae Helsinkium advecti sunt, ut inter praesidentes Sauli Niinistö et Xi Jinping anno ante convenerat. Inde illi advenae iter in viridarium oppidi Ähtäri continuaverunt, ubi posterius in omnium conspectu erunt.

(Reijo Pitkäranta)

Novus ordo naturae

In Finlandia novus ordo conditus est, qui naturae intactae defendendae operam navat. Fautores inter alia id agere volunt, ut magna animalia in naturam nostram restituantur. Censent vel bisontem Europaeum et equum silvaticum, nisi ab homine tota Europa expulsi essent, etiam hodie in silvis nostris futuros fuisse.

(Reijo Pitkäranta)

12.1.18

Ignis et furor in Aedibus Albis

Michael Wolff, redactor Americanus, qui de praesidente Donaldo Trump librum revelationum scripsit, credit fore, ut ille propter imperitiam munus deponere probabiliter cogatur. In libro ”Fire and Fury: Inside the Trump White House” opiniones multorum hominum prope praesidentem versantium referuntur, qui de eius peritia dubitant. Omnes ex eis idem sentire.

At Rex Tillerson, minister a rebus exteris, censet praesidentem Trump ad munus exsequendum plane competentem esse. Sibi numquam causam fuisse de sanitate mentali praesidentis dubitare. Trump ipse monuit indolem stabilem et ingeniosam maximas suas esse virtutes.

Globulus nuclearis maior et minor

Kim Jong-un, dictator Coreae Septentrionalis, cum Kalendis Ianuariis orationem televisificam haberet, ”Omnes Civitates Americae Unitae,” inquit, ”intra iactum missilium nostrorum nuclearium iacent et globulus impressorius ad illa missilia emittenda in scriptorio meo semper est. Haec est veritas, non minatio.”

His verbis auditis praesidens Donald Trump biduo post per servitium twitter ita respondit: ”Ego quoque similem globulum nuclearem habeo et ille est multo maior et fortior.” - Mense Novembri Coreani Septentrionales experimentum fecerunt, quo missile in altitudinem quattuor milium et quingentorum chiliometrorum emiserunt.

December in regione arctica calidior

Mense Decembri temperatura media in regione Maris glacialis erat solito calidior, in Alasca et in Sibiria septentrionali-orientali prorsus decem gradibus. Spatium glaciei maritimae erat ibi Decembri mense decies centenis milibus chiliometris quadratis angustius quam fuerat ante decem annos. Decennio spatium glaciei in medio tribus virgula septem centesimis (3,7%) decrevit.

Arbores in urbe celerius quam ruri crescunt

Crederes arbores in tranquillitate ruris procul sordibus optime crescere, sed ex investigatione recenti res est contraria. In magnis urbibus calor solis ita conservatur, ut nocturno tempore aer etiam decem gradibus calidior sit quam ruri. Praeterea etiam generalis calefactio climatis incrementum arborum nutrit. Calefactione climatis fit, ut arbores post annum millesimum nongentesimum sexagesimum (1960) septendecim centesimis (17%) celerius crescant. In urbibus autem etiam viginti quinque centesimis (25%) celerius quam ruri crescere possunt, nam calor et maior copia carbonei dioxydati in aere urbium photosynthesim adiuvat.

Bursa Helsinkiensis crescit, dividenda annotinis largiora

Bursa monetaria Helsinkiensis his sex annis (2012-2017) paene octoginta centesimis crevit. Faenora fuerunt minima, quam ob rem investitores pecunias suas tam in Finnia quam in aliis terris in actionibus bursariis posuerunt. Plerique oeconomistae censent hunc annum iam septimum fore quo aestimationes titulorum augescant.

(Tuomo Pekkanen)

5.1.18

Quid Sauli Niinistö dixerit

Sauli Niinistö, praesidens Finlandiae, Kalendis Ianuariis nationi orationem televisificam habuit. Primum quidem res domesticas attingebat monens, quam dulce esset anni Finnorum iubilaei nuper praeteriti reminisci. Valde tamen dolendum esse, quod patria paulo post, quam sui iuris facta esset, in atrox bellum civile ruisset, cuius vulneribus etiam hodie laboraret.

(Reijo Pitkäranta)

Altera pars orationis

In ea orationis parte, quae ad negotia extera pertinebat, Niinistö se de dominatione nationum praepotentium sollicitum esse dixit. ”In dies”, inquit, ”clarius patet, quantum Sinae, Russia, Civitates Americae Unitae ceteris civitatibus praevaleant in rebus politicis magni momenti tractandis. Unio Europaea secundas partes agit, et auctoritas Ordinis Nationum Unitarum deminuta est.”

(Reijo Pitkäranta)

Rerum in Corea status

Die Mercurii mane (3.1.) duces Coreae Septentrionalis et Coreae Meridianae telephonice inter se collocuti sunt. Quem sermonem per lineam calidam sic dictam habuerunt. Via consultationibus ita patefacta speratur fore, ut tensio politica inter utramque civitatem paulatim remittat. Convenit iam, ut Corea Septentrionalis athletas´ad Olympia hiberna mitteret.

(Reijo Pitkäranta)

Israel ab UNESCO secedet

Moderatores Israelis nuntiaverunt civitatem suam ab UNESCO sive Ordine educationis, scientiae, culturae Nationum Unitarum secessuram esse. In causa esse, quod ordo ille iterum atque iterum Israelem aggressus esset. Decretum anno proximo exeunte valere incipiet. Constat in suffragiis saepe accidisse, ut fautores Israelis cladem acciperent terris Arabicis iis adversantibus.

(Reijo Pitkäranta)

De maribus tuendis

Nationes Unitae consultaturae sunt, ut pactio de maribus utendis et tuendis ante annum bis millesimum vicesimum (2020) perficiatur. Saltem centum quadraginta terrae illi consilio favent. Pactio ad regiones maritimas extra fines nationales sitas attinebit, ubi difficultates propter actiones oeconomicas nimis liberas ortae sunt.

(Satu Tuominen)

De quattuor depontanis

Unus modus novi anni incipiendi est de ponte Romano nomine Cavour in Tiberim desilire. Qui mos anno millesimo nongentesimo quadragesimo sexto (1946) initium cepit, cum quidam vir opere destitutus se in flumen praecipitavit, ut artem et audaciam suam publice monstraret. Hoc anno vergente quattuor homines eandem rem gesserunt.

(Reijo Pitkäranta)

Studium linguae cornicum

Investigatores Americani linguam cornicum discere cupiunt. Arbitrantur enim illas aves magna voce crocitantes aliquo modo inter se colloqui. Ad examinandum, quidnam vociferationes earum sibi vellent, in tecto cuiusdam universitatis urbis Washington instrumenta collocata sunt, quae voces cornicum ad usum scientificum taenia imprimerent. 

(Reijo Pitkäranta)

29.12.15

Quomodo Nuntii Latini creverint

Nuntii Latini a Radiophonia Finnica Generali a Kalendis Septembribus anni millesimi nongentesimi undenonagesimi (1989) transmittuntur. Ut linguae Latinae amatores nuntios domi cum bona pace legere possent, textus sequenti anno in Televisionem Finniae textualem accepti sunt, quae etiam in terris septentrionalibus Finniae proximis visibilis est. 

Postquam complures diurnarii et societates radiophonicae peregrinae certiora de Nuntiis Latinis scire volentes textus transmissionum identidem petiverunt, consilium de eis in formam libri redigendis captum est. Itaque nuntii inter primos decem annos redacti a Societate Litterarum Finnicarum in quinque voluminibus editi sunt. 

Principio emissiones extra Finniam undis brevibus fiebant, quas auscultatores haud facile captare poterant, ut ex epistulis redactoribus allatis apparuit. Sed postquam nuntii in interreti divulgari coepti sunt, homines in omnibus orbis terrarum partibus habitantes meliores facultates nuntios legendi et auscultandi habebant. 

Iam primo nuntiorum biennio redactio epistulas ex triginta septem terris peregrinis accepit. Quinto biennio exeunte (1999) terrae erant iam quinquginta sex. Hodie Nuntii Latini in omnibus fere terris Europaeis et in omnibus partibus orbis terrarum auscultatores habent, ut ostendunt petitiones, quae his septimanis in interreti divulgatae sunt.

Finis transmissioni Latinae imminebat

Mense Novembri (23.11.) redactoribus Latinis inopinanter dictum est nuntios Latinos novo anno (2018) a Radiophonia Finnica iam non divulgatum iri. Cum finis nuntiorum imminens brevi tempore notuisset, fautores nuntiorum in interreti sponte sua petitionem posuerunt (): “Appellate, ut nuntii Latini continuentur.” 

Tria milia trecenti tredecim (3313) homines, ex quinquaginta terris oriundi, illi petitioni subscripserunt. Sunt inter illas triginta tres terrae Europaeae et septendecim ex aliis mundi partibus. Permulti subscriptores sunt ex Civitatibus Unitis Americae Septentrionalis (USA), multi etiam ex Canada et America Australi. 

Auscultatores Nuntii Latini habent etiam in Australia et in Re publica Africae Australis, singulos praeterea in Abu Dhabi, insulis Caribicis, Georgia, Israele, Indonesia, Iaponia, Sinis (Hong Kong), Thailandia, Vietnam. Cum ita apparuisset Nuntios Latinos esse vinculum, quod latinistas totius orbis coniunxerit, fieri non potuit, quin consilium nuntios finiendi revocaretur. 

Itaque Nuntii Latini anno bis millesimo duodevicesimo (2018) continuabuntur et sicut ante, tam radiophonice quam interretialiter septimanatim divulgabuntur. Restat, ut auscultatoribus in omnibus orbis terrarum partibus viventibus pro eorum fidelitate et subsidio gratias quam maximas agamus et novum annum faustum et Latinissimum exoptemus.

Tuomo Pekkanen. 

22.12.15

Trump et Puti collocuti

Donald Trump, praesidens Civitatum Americae Unitarum, et Vladimir Putin, praesidens Russiae, de quaestionibus politicis telephonice collocuti sunt. Praecipue de consiliis consultaverunt, quibus programmati nucleari Coreae Septentrionalis intervenirent. Nonnulla verba etiam de relationibus inter Americanos et Russos promovendis commutaverunt. Trump collegae gratias egit, quod in instrumentis communicativis oeconomiam Americanorum nuper laudavisset.

(Saara Honkanen)

Pax in Columbia facta

Conflictus militaris, qui inter regimen Columbiae et bellatores tectos ordinis Farc amplius quinquaginta annos intercedebat, tandem compositus est. Illo bello plus ducenta milia hominum vitam amiserunt. Propositum est, ut arma posita in tres statuas pacis funderentur, quarum una Bogotae, altera Habanae, tertia Novi-Eboraci collocaretur.

(Reijo Pitkäranta)

De regimine Austriae

In Austria, ubi abhinc duos menses comitia parlamentaria facta sunt, novum regimen formatur. Sebastian Kurz, praeses conservativorum nuntiavit inter se et partes dextras extremas de civitate administranda convenisse. Factio libertatis, quo nomine extremistae dextimi se appellant, iam hoc saeculo ineunte duce Georgio Haider regimini Austriae intererat.

(Reijo Pitkäranta)

Comitia praesidentialia

Anno proxime futuro in Finlandia comitia praesidentialia habebuntur, ad quae omnino octo candidati nomen dederunt. Unus eorum est Sauli Niinistö, praesidens hodiernus, qui apud populum tantum gratia valet, ut non multum abesse videatur, quin iam primo suffragio ad munus eligatur. 

(Reijo Pitkäranta)

Ovidio ius restitutum

Hoc anno vel futuro duo milia annorum acta sunt, cum Publius Ovidius Naso, poeta Romanus, mortuus est. Constat eum ab imperatore Augusto propter ”carmen et errorem”, ut poeta ipse scripsit, patria expulsum esse. Nunc autem Consilium urbanum Romae decrevit, ut illa poena auferretur et Ovidio nomine linguae liberae ius restitueretur.

(Reijo Pitkäranta)

Bethlehem patria Iesu

Bethlehem, ubi Iesus natus est, est hodie oppidum triginta fere milium incolarum, quod in regione Palaestinensium situm decem chiliometra a Hierosolymis abest. Consilium praesidentis Donald Trump, ut Hierosolyma caput Israelis fiant, Bethlehemitis eo magis displicet, quod metuendum est, ne numerus viatorum in locum natalem Christi venientium propter tumultum politicum deminuatur.

(Reijo Pitkäranta)

De arboribus nataliciis

In Finlandia amplius decies centena milia domuum sunt, in quas ad diem natalem Christi celebrandum abies natalicia comparatur. Quarum decima fere pars originis peregrinae est. Quanti singulae arbores emptoribus constent, in magnitudine, in qualitate, in loco vendendi positum est. Plerique id agere conantur, ut arbor natalicia usque ad festum trium regum viridis remaneat.

(Reijo Pitkäranta)

Lectoribus nostris Bonum diem nativitatis Christi exoptamus!

15.12.17

Ordo Isis devictus

Haider al-Abadi, princeps minister Iraquiae, patriam suam a potestate ordinis Isis liberam esse declaravit. Nuntiavit enim die Saturni bellum confectum esse, quod confinium Iraquiae et Syriae a copiis regiminis Iraquiae expugnatum esset. Ultimus locus, quem Isis sub dicione sua tenebat, erat Rawa, urbs ad flumen Euphtraten sita. 

(Reijo Pitkäranta)

Quid Trump dixerit

Consilium securitatis Nationum Unitarum decreto praesidentis Trump obstitit, ex quo urbs Hierosolyma caput Israelis esset. Legati enim quattuordecim terrarum eius consilii sociarum dixerunt illud propositum cum decretis prioribus Consilii securitatis discrepare. Itaque Americanis solis placitum suum in conventu necessitatis defendendum erat.

(Satu Tuominen)

Comitia in Corsica

In insula Corsica, quae iam per ducentos undequinquaginta annos ad Francogalliam pertinet, comitia regionalia habita sunt. Victoriam reportavit coalitio factionum autonomiae Corsicae faventium, cum amplius dimidiam partem sententiarum sibi conciliavit. Eventus comitiorum praesidenti Francogalliae Emmanuel Macron sollicitudini esse existimatur, quamquam Corsi patriam suam in meram libertatem nondum vindicant. 

(Reijo Pitkäranta)

Incendia Californiae

Iam duae fere septimanae sunt, cum civitas California vehementissimis incendiis silvestribus vastatur. In praesenti fines in amplitudinem mille fere chiliometrorum quadratorum patentes flammis exhausti et saltem octingenta aedificia igne consumpta sunt. Incendium, cui nomen Thomas datum est, etiam aliquot urbibus imminet, quam ob rem multa milia incolarum domum relinquere iussa sunt.

(Reijo Pitkäranta)

Pizza magni aestimatur

UNESCO sive Ordo educationis, scientiae, culturae Nationum Unitarum constituit, ut esca Italiana a Neapoli oriunda, quae ’pizza Napolitana’ vulgo dicitur, pro patrimonio mundi haberetur. Id ideo factum esse, quod in illo cibo praeparando de arte pistoria antiquitus tradita ageretur, quae ad populum uniendum conferret eumque cum pristinis generationibus coniungeret.

(Reijo Pitkäranta)

Russia a ludis exclusa

Septimana proxima accidit, ut Consilium Olympicum internationale Russos ab Olympiis hiemalibus excluderet. Causa erat, quod illi in ludis superioribus medicamentis vetitis usi erant. Iis autem, qui se innocentes fraudis praebuerunt, licentia certamina participandi conceditur, dummodo ne sub vexillo Russico certent.

(Reijo Pitkäranta)

Festum Sanctae Luciae

Die Mercurii (13.12.) in Finlandia Lucialia more solito celebrabantur. Lucia erat virgo Christiana, quae saeculo p.Chr.n. quarto Syracusis pro fide sua mortem obiit. Hoc anno virgo Lucia, cuius est lucem in tenebras brumales afferre, electa est Anna Kajsa Edström. Ea in ecclesia cathedrali Helsinkiensi corona candelis ardentibus ornata redimita est.

(Reijo Pitkäranta)

8.12.17

Anniversarium centesimum independentiae Finnorum

Postridie Nonas Decembres (6.12.2017) anniversarium independentiae Finnorum solito maiore pompa celebratum est, nam centum anni exacti erant ex eo die, quo parlamentum declarationem de independentia Finniae probavit. Senatus Finniae, cui Pehr Evind Svinhufvud praesidebat, biduo ante parlamento Finniae illam declarationem probandam dederat, qua patria ex Russia independens fieret.

Ab anno millesimo octingentesimo nono (1809) usque ad annum millesimum nongentesimum septimum decimum (1917) Finnia pars imperii Russiae fuerat, sed autonomiam habebat. Inde a duodecimo saeculo Finni expeditionibus cruce signatorum ad regnum Suetiae adnexi erant. Illo autem tempore nomen Finniae imprimis ad partes occidentales Suetiae propinquiores spectabat. Patrio sermone Finnia appellatur Suomi et incolae eius suomalaiset. 

Nomen Finni vel Fenni ante duodecimum saeculum semper Lappones sive Samos significabat. Iam Tacitus anno duodecentesimo (98 p.Chr.n.) de Fennis narrat et in documentis mediaevalibus descriptiones Finnorum, Fennorum vel Scridifinnorum sunt admodum frequentes. Quae cum ita sint, Finnia, ut res publica independens, est centum annorum; si ab initio autonomiae computamus, est ducentorum octo annorum. At nomen Finni, Fenni a peregrinis usurpatum, iam viginti saecula in documentis historicis invenitur, etsi usque ad duodecimum saeculum tantum ad Lappones pertinebat.

Spectacula luminosa

Festum Finniae centenariae per totum orbem ita notabatur, ut in triginta fere terris plus quinquaginta loca aut monumenta vulgo nota coloribus vexilli Finniae illuminarentur. In Enontekiö communi Finniae septentrionalis Saana, mons sacer Lapponum, a die Lunae biduo (4-5.12.) caeruleus lucebat. Peregre coloribus albo et caeruleo illuminata sunt inter alia Colosseum urbis Romae et Arcus triumphalis Hadriani, quae est Athenis, porro Niagara cataracta in Canada, Belém turris Olisiponis in Lusitania, Fortaleza castellum Mozambici, Statua Christi Redemptoris in monte Corcovado urbis Rio de Janeiro Brasiliae, Globen arena Stockholmiae.

Caerimoniae diei festi

Caerimoniae diei festi erant translaticiae. In ecclesia cathedrali Helsinkiensi actum est officium divinum oecumenicum praesentibus delegatis parlamentariis, regimine, praesidente rei publicae. Heroes bello caduci ita memorabantur, ut custodes honorarii in omnibus sepulcretis stabant iuvenes tot fere annos nati, quot erant milites ibidem sepulti, cum ceciderunt. Pompa militaris, cuius symbolum erat sententia “Patriam defendere omnium est”, facta est in urbe Kuopio. Erant in pompa mille ducenti homines, duodequinquaginta vehicula militaria et triginta septem aeroplana aut helicoptera. Eventum diei maxime exspectatum fuit receptio in palatio praesidentis rei publicae. Festivitates clausit spectaculum pyrotechnicum.

Tuomo Pekkanen

1.12.17

Vulcanus in Bali activis

In insula Bali Indonesiae ex vulcano Agung cineres in altitudinem quattuor fere chiliometrorum erumpentes commeatum aereum impediunt. Itaque magistratus aeriportum urbis Denpasar interim claudere decreverunt et homines, qui minus quam decem chiliometra a vulcano distantes vivunt, hortati sunt, ut domos suas relinquerent. In regione evacuanda centum fere milia hominum habitant. Terra prope montem continuo tremit, quod maiorem eruptionem portendere potest. Itaque magistratus censent eruptionem aut prorsus explosionem montis calamitosam quavis hora fieri posse. Anno millesimo nongentesimo sexagesimo tertio (1963), cum proxima eruptio facta erat, plus mille homines interierunt.

Societates tabacariae de periculis tabaci monent

Magnae societates tabacariae in USA tandem adducti sunt, ut nuntiis divulgandis de periculis tabaci in actis diurnis monerent. De verbis in monitionibus adhibendis pro tribunali undecim annos disputatum est. In nuntiis refertur millenos ducenos (1200) in medio Americanos singulis diebus fumificatione perire.

Praeterea pro comperto affirmatur quotannis plures homines solo tabaco mori quam communiter homicidio, sida, suicidio, drogis, calamitatibus viariis, alcoholo. Illi nuntii a societatibus tabacariis in actis diurnis quinquaginta magnarum urbium et in tribus magnis canalibus televisificis usque ad finem mensis Aprilis divulgabuntur.

Vaccae lactariae in valle Padana pessime tractantur

Ordo animalibus tuendis (Compassion in World Farming) videomateriam in valle fluminis Padi factam divulgavit, unde patet vaccas lactarias pessime tractari. Materia cinematographata est in novem praediis, in quibus lac ad caseos Parmenses faciendos producitur. Delegatus productorum concedit quidem valetudinem vaccarum non respici sed asseverat eam minime ad qualitatem caseorum pertinere.

Plus centum tarandri traminibus interfecti

Magnus numerus tarandrorum nuperrime in Norvegia septentrionali traminibus interfectus est. Die Sabbato (25.11.), cum tramen in gregem in orbita versantem impegit, sexaginta quinque (65) animalia mortua sunt. Eadem septimana paulo ante unus et quadraginta (41) tarandri eodem modo traminibus perculsi perierunt. Tarandri tramina silentio currentia non audiunt et, si audiunt, in orbita procurrentes fugere conantur. Neque calamitates huius generis aliis in partibus septentrionalibus, in quibus tarandri pascuntur, insolitae sunt. Tarandri in silvis Finniae vagantes sunt hodie circiter ducenta milia, in Norvegia plus ducenta quinquaginta milia.

Tenebrae in Lappiam venerunt

In communi Utsjoki Finniae maxime septentrionalis sol die Dominico (26.11.) post horizontem disparuit non ante quam septimo decimo die mensis Ianuarii oriturus. Sole deficiente Aurora borealis, Luna stellaeque terras nive tectas satis illuminant. Tenebris hiemalibus obortis Finni septentrionales dicere solent solem in nidum suum se recepisse.

(Tuomo Pekkanen)

24.11.17

Mugabe munere amotus

Die Dominico (19.11.) Robert Mugabe, praesidens Zimbabuae nonaginta tres annos natus, postquam suis triginta septem annos praefuit, munus deponere coactus est. De ea re decrevit factio principalis eiusdem civitatis, sed praefecti militum iam paucis diebus ante praesidenti potestatem eripuerant. Etiam coniugi Grace Mugabe, quae in locum mariti successura esse existimabatur, munia publica relinquenda erant.

(Reijo Pitkäranta)

Merkel in discrimine

Angela Merkel, cancellaria foederalis Germaniae, in discrimen politicum vocata est, cum consultationes de novo regimine formando in irritum cecidissent. Propositum erat, ut democratae Christiani una cum prasinis et liberalibus coalitionem administrativam componerent. Hoc consilium tamen praeter spem evenit, quoniam liberales colloquia interruperunt.

(Reijo Pitkäranta)

Mladic Hagae damnatus

Ratko Mladic, dux generalis Serbianus, in iudicio Hagensi vinculis sempiternis damnatus est decem scelerum bellicorum convictus. Iudicibus persuasum erat bello Bosniensi factum esse, ut copiae Serborum eo duce amplius septem milia virum et puerorum musulmanorum occiderent. Huc accedit, quod Mladic obsidioni urbis Sarajevo cum strage multorum civium praeerat.

(Reijo Pitkäranta)

Quid Brexit effecerit

Magistratus a medicamentis Unionis Europaeae (EMA) Londinio Amstelodamum migrabunt. Nam propter Brexit ita dictum caput Britanniae praetorium eorum non iam esse potest. Cum decerneretur, ubi sedes nova futura esset, duae urbes, scilicet Amstelodamum et Mediolanum, totidem vota acceperunt. Sortitione facta victoriam reportavit Amstelodamum. 

(Reijo Pitkäranta)

Pictura plurimi vendita

Auctione Novi Eboraci facta pictura veniit, quae una esse iudicatur ex viginti fere tabulis, quas Leonardo da Vinci propria manu confecit. Opus ”Salvator mundi” appellatum figurat Iesum, qui dextra benedictionem dat sinistraque sphaeram crystallinam tenet. Pretium venditionis in trecentas octoginta miliones euronum ascendit et omnium temporum maximum esse existimatur.

(Satu Tuominen)

Milites bibere vetantur

Moderatores Americani omnibus militibus suis, qui in Iaponia sunt, usu alcoholi interdixerunt. In causa est eventus in insula Okinava factus: ibi enim incola quidam vitam amisit, cum autoraeda, quam miles Americanus isque ebrius vehebat, per corpus eius transiit. Iam diu est, cum Okinavenses Americanis in insula sua militantibus adversantur.

(Reijo Pitkäranta)

Nova linea metropolitana

Die Saturni (18.11.) mane inter Helsinkium et Esboam, urbem ei vicinam, tramen subterraneum commeare coepit. Quam lineam potius submarinam appellaveris, nam maior pars huius viae triginta quinque chiliometra longae sub mari munita est. Prima tramina refertissima erant vectorum novo commeatu metropolitano exsultantium.

(Reijo Pitkäranta)

17.11.17

Tramen onerarium e Finnia in Sinas

Primum tramen onerarium ab urbe Kouvola Finniae orientalis in urbem Xian Sinarum die Veneris (10.11.) profectum est. Iter est circiter octo milium chiliometrorum, quod illud tramen decem fere diebus perficiet. Est octingenta metra longum et uno et quadraginta contentris oneratum. Machina traminis vectoria bis mutatur, primum in limite Finniae et Russiae, iterum in limite Russiae et Cazastaniae. In statione Khorgos contentra in aliud tramen tollenonibus tolluntur, quia in Sinis latitudo orbitarum differt. Hoc anno quinque tramina eius generis inter Finniam et Sinas commeant.

Barcinone reclamationes continuantur

Septimana vergente complura centena hominum milia in viis Barcinonis reclamitabant flagitantes, ut decem duces regionales, comprehensi et in carcerem coniecti, liberarentur. Octo ex comprehensis sunt membra regiminis regionalis, quod administratio Hispaniae dissolverat. Magistratus Hispaniae eos accusant, quod illegale suffragium populi mense Octobri instituerint. Praeterea sex homines de eadem re suspecti vadimonio constituto liberati sunt. Carles Puigdemont, auctor motus independentiae et praeses depositus regiminis regionalis, magistratus Hispanos cum quattuor ministris in Belgio fugitat. Regimen Hispaniae decrevit, ut nova suffragia regionalia in Catalonia exeunte mense Decembri fierent.

Motus terrae in confinio Iraniae et Iraquiae

Sero die Dominico in confinio Iraniae et Iraquiae motus terrae factus est, quo plus quingenti homines mortui sunt. Saltem triginta milia domuum corruerunt. In regione montuosa labinae opera succurrentium remorantur. Pessime afflicta est urbs Iraniae Sarpol-Zahabin, quae a limite Iraquiae quindecim chiliometra distat.

Bellum Syriacum militariter non componi

Praesidentes Putin et Trump consentiunt bellum in Syria militariter componi non posse; finem belli nisi per consultationes politicas non fore. USA et Russia in bello Syriaco partes inter se oppositas sustinent. Ideo praesidentes de communi canali communicationis condendo nuntiaverunt, ut conflictus fortuiti inter aeroplana Russica et Americana evitarentur.

USA et Corea Meridiana exercitia militaria habent

Corea Meridiana et USA communia exercitia militaria in Oceano Pacifico occidentali susceperunt. Intersunt exercitiis navalibus septem naves longae Coreae Meridianae et tres naves aeroplanorum vectoriae Americanorum. Propositum exercitiorum est minas nuclearias et missilisticas Coreae Septentrionalis ostentatione virium deterrere.

Dies patris celebratus

Dies matris apud Finnos ab anno millesimo nongentesimo undevicesimo (1919) celebratus est. Patris dies festus, qui secundo die Dominico mensis Novembris agitur, ante quadraginta fere annos ex USA in Finniam acceptus est. Ex viris Finnis plus sexaginta quattuor annos natis octoginta fere centesimae sunt patres.

(Tuomo Pekkanen)

10.11.17

Quid Trump dixerit

Die Dominico (5.11.) praesidens Donald Trump iter Asiaticum duarum fere septimanarum suscepit primumque in Iaponiam volavit. Ibi dixit se ad dictatorem Coreae Septentrionalis Kim Jong-un conveniendum paratum esse, dum ille id fieri vellet. ”Cum quovis homine” inquit, ”ad colloquendum assidere possum. Ibi de firmitate aut debilitate non agitur”.

(Reijo Pitkäranta)

Rerum condicio in Iemenio

Ordo Nationum Unitarum flagitavit obsidioni Iemenio illatae finem imponendum esse. Inde enim sequi, ut multae miliones hominum fame laborantium auxilio humanitario privarentur. Discrimen initium cepit, cum e Iemenio in Arabiam Saudianam missile emissum est, quo facto Saudi effecerunt, ut Iemenienses terra, mari, aëre intercluderentur.

(Reijo Pitkäranta)

De prima cosmonauta Laika

Tertio die mensis Novembris (3.11.) sexaginta anni acti erant ex eo, cum canis Laika a Sovietis satelliti spatiali Sputnik II imposita in orbitam Telluris missa est. Laika, prima animans in spatium cosmicum emissa, canis mixticia erat in viis Moscuae inventa. Calore at anxietate animi paucis horis post emissionem interiit.

(Satu Tuominen)

Suetia natio beneficentissima

Suetia maiora beneficia in populos peregrinos confert quam ulla alia orbis terrarum natio. Finlandia in hac comparatione loco septimo collocata est. Hoc patet ex indice, in quo componendo septem res respiciebantur, ut salus, aequalitas, studia pacis provehendae, auxilium populis egentioribus praebitum.

(Reijo Pitkäranta)

Cella secreta in pyramide

In magna pyramide Gizae cella secreta et antea incognita inest, ut investigatores ope radiorum cosmicorum cognoverunt. Cui autem rei conclave triginta fere metra longum inserviverit, nondum constat. Pyramis illa abhinc amplius quattuor milia annorum constructa in septem miraculis mundi numeratur et eorum omnium vetustissima est. 

(Reijo Pitkäranta)

Aestas agricolis importuna

Agricolae Finlandiae e sationibus huius aestatis detrimentum plus centum milionum euronum ceperunt. Talem nuntium dedit Sari Peltonen, rei rusticae consulta ex ordine ProAgria appellato. ”Quid aliud”, inquit, ”expectaveris, cum nivibus cadentibus et sementis facta et messis peracta sit”. Huc accedit, quod sumptus in frumentum siccandum impensi solito maiores erant.

(Reijo Pitkäranta)

Statua leonis in Ruokilahti

Kalendis Novembribus in media paroechia Ruokolahti statua leonis marmorea posita est. Abhinc enim viginti quinque annos ibi accidit, ut quidam saltuarius in via silvestri ambulans ex inopinato leoni occurreret. Sunt, qui dubitent, an ille re vera regem animalium viderit. Attamen vestigia leonis similia in illa regione postea reperiebantur.

(Reijo Pitkäranta)

3.11.17

Anniversarium quingentesimum reformationis Lutheranae

Pridie Kalendas Novembres (31.10.2017) quingenti anni exacti erant ex die (31.10.1517), quo Martinus Luther nonaginta quinque theses contra indulgentias pontificias Wittembergae divulgavit. Ita initium cepit reformatio et ecclesia Lutherana orta est. Anno ante (31.10.2016), iubilaeum reformationis caerimoniis oecumenicis in Cathedrali Lundensi Suetiae praesente papa Francisco incohatum est.

De condicione rerum Cataloniae

Res Cataloniae in discrimen verterunt, cum moderatores Hispaniae die Sabbati (28.10.) nuntiavissent se administratores regionales Cataloniae magistratu amovisse et Cataloniam in suam administrationem redacturos esse. Nova comitia mense Decembri fore. Eodem die, paulo ante, parlamentum Cataloniae unilateraliter regionem suam independentem declaraverat. Die Dominico homines Barcinone in utramque partem reclamitabant. Vexillis Hispaniae et Unionis Europaeae velati adversarii independentiae insignia portabant, quibus monuerunt Cataloniam esse omnium Hispanorum. Sed etiam clamores "Vivat Catalonia!" audiebantur.

De hora mutanda in Europa dissensio

Hora aestiva in Europa ultimo die Dominico mensis Martii incipit et ultimo Dominico die mensis Octobris in hiemalem horam mutatur. Nunc autem grex septingentorum europarlamentariorum vult, ut ille usus horologia rursum prorsum mutandi finiatur. Illi nuper (25.10.) Argentorati (vulgo Strasbourg) de ea re propositum divulgaverunt. Omnes tredecim europarlamentarii Finniae proposito subscripserunt. Apud Finnos hora aestiva primum suscepta est mense Martio anno millesimo nongentesimo octogesimo primo (1981). De hora aestiva suscipienda in directiva Unionis Europaeae praecipitur. Ad illam mutandam parlamentum Europaeum potestatem non habet. Tantum Commissio Europaea directivam mutare potest.

Funus regis Bhumipol celebratum

Bhumipol, rex Thailandiae, anno proximo (13.10.2016) mortuus, Bankokii die Iovis (26.10.2017) crematus est. Finito luctu unius anni exsequiae per quinque dies celebratae sunt. Corpus regis ex palatio, ubi fuerat, in regium crematorium ad hoc aedificatum sollemniter portatum est. Pyram, quinquaginta metra altam, filius et successor regis accendit.

Pueri Finni extra domum liberiores et tutiores

Anno bis millesimo quinto decimo, investigatio internationalis facta est, in qua de libertate extra domum versandi puerorum et puellarum quaerebatur. In sedecim terris liberi minime septem - maxime quindecim annorum respiciebantur. Exitus investigationis fuit, quod liberi Finnorum optimas extra domum versandi possibilitates habent. Parentes illis permittunt, ut in proximitate ambulent aut birota vehantur, scholam frequentent, vias principales transeant, in tenebris exeant. Proximitas domicilii apud Finnos tuta habetur, securitatem etiam commeatus admodum tranquillus auget, nam pedites et birotarii observantur. Minimam ad independentes ambulationes potestatem habent liberi in Francia, Israele, Srilanca.

Tuomo Pekkanen

27.10.17

De autonomia Cataloniae

Moderatores Hispaniae de autonomia Cataloniae circumscribenda decreverunt senatus consultum de ea re exspectantes. Ad hoc consilium perficiendum paragrapho centesima quinquagesima quinta legis fundamentalis usu recipiunt. Etiam socialistae, partes oppositae principales, se illam rationem sustentare nuntiaverunt. Decretum eo spectat, ut parlamentum Cataloniae custodiae subiciatur, principes regionis magistratu moveantur ibique nova comitia habeantur.

(Reijo Pitkäranta)

Xi Jinping potentiam auxit

Potentia praesidentis Sinarum Xi Jinping in conventu factionis communisticae non solum stabilita, sed etiam firmior facta est. Id vel inde patet, quod doctrina nomen eius gerens consensu omnium ad leges fundamentales eiusdem factionis addita est.

(Reijo Pitkäranta)

Raqqa ex ordine Isis libera

Urbs Raqqa e potestate ordinis Isis liberata est, ut copiae democraticae Syriae (SDF) septimana vergente sollemniter nuntiaverunt. Hic exercitus, quem milites Americani sustentant, maximam partem e Curdis Syriae constat, sed in eo etiam milites Arabes et Christiani insunt. Raqqa inde ab anno bis millesimo quarto decimo (2014) pro capite ordinis Isis habebatur. 

(Reijo Pitkäranta)

De documentis secretis

Praesidens Donald Trump se permissurum esse promisit, ut pars documentorum clandestinorum ad caedem pristini praesidentis John F. Kennedy pertinentium in publico poneretur. Haec acta, quae in Archivo Americanorum nationali asservantur, mille trecentis paginis continentur. Speratur fore, ut iis patefactis scelus Dallasiense multis obscuritatibus involutum aliquo modo illustretur.

(Reijo Pitkäranta)

Quid in Italia acciderit

In Italia septentrionali suffragium populi de maiore autonomia Lombardiae et regioni Venetorum concedenda habitum est. Incolae illarum provinciarum graviter ferunt, quod pro tributis rei publicae solutis parum pecuniae recipiant. In illis partibus Italiae urbes opulentissimae sunt, ut Mediolanum, sedes principalis oeconomica, et Venetiae, quo viatores undique confluunt.

(Reijo Pitkäranta)

De aëroplano Malaesiensi

Malaesia et societas nomine Ocean Infinity pactae sunt, ut aëroplanum, quod abhinc tres annos et dimidium disparuit, denuo quaereretur. Investigatores nullam remunerationem accepturos esse, si locus calamitatis non inveniretur. Aëroplanum ex Cuala Lumpuria Pekinum versus iter faciebat, cum in mare delapsum est ducentos undequadraginta homines ad mortem ducens.

(Saara Honkanen)

Dani apothetas condunt

Legati parlamentares Daniae rogationem de apothetis condendis accepturi sunt. Agitur de locis, ubi puerperae infantem recens natum impune exponere possunt. Propositum est, ut parvulus a matre desertus alicui instituto educandus traderetur. Putant talem modum operandi iis matribus auxilio fore, quae liberos suos curare non valeant.

(Reijo Pitkäranta)

20.10.17

Suetia inspectionibus in limitibus continuare vult

Suetia Commissioni Europaeae nuntiavit se velle, ut inspectiones in limite Daniae et Suetiae continuarentur, etsi tempus duorum annorum inspectionibus ab Unione Europaea constitutum mense Novembri finitum esset. Cum plurimi petitores asyli in Europam per Balcaniam venissent, inspectiones autumno anni bis millesimi quinti decimi (2015) susceptae sunt.

USA et Russia stationem spatialem prope Lunam aedificabunt

USA et Russia stationem spatialem circumlunarem aedificabunt, unde systema solare investigetur. Nondum constat, quam partem NASA (National Aeronautics and Space Administration) quamque Roskosmos, ordo spatialis Russorum, in operibus habeat. Propositum est, ut statio illa spatialis, cui nomen datum est “Porta profundi spatii” (Deep Space Gateway), intra decem annos perficiatur.

Naves antiquae in fundo Ponti Euxini repertae

Grex archaeologorum maritimorum Universitatis Southhamptoniensis in fundo Ponti Euxini sexaginta naves antiquas repperit. Naves Romanorum, Byzantinorum, Othomanorum in tenebris maris miro modo conservatae sunt. Antiquissima ex illis est prope duorum milium quingentorum annorum, sive quattuor vel quinque saeculis a.Chr.n. constructa.

Molestatores ad virgas!

Quattuor ex quinque feminis in Arabia Saudiana dixerunt se molestia sexuali affectas esse. Itaque rex Salman nuper praecepit, ut sexualis molestia poena coerceretur. Ex lege, quae in Ministerio rerum domesticarum praeparatur et intra sexaginta dies valere incipiet, molestatores feminarum carcere aut ad virgas damnnabuntur.

Trecenta milia anserum in uno agro

Anser specie Branta leucopsis apud Mare Glaciale nidificat, unde ad Mare Germanicum et Balticum hiematum migrat. In toto orbe terrarum plus decies centena milia horum anserum esse existimatur. Tertia fere pars totius populationis die Sabbati (14.10.) in uno agro Finniae meridionalis visa est. Post largas pluvias ille ager, in valle fluminis Kymi situs, idoneum locum requiescendi anseribus etiam antea praebuit. Populatio anserina in annos crescit atque etiam in Finnia meridionali singula paria passim hiemant. Excrementa anserum in litoribus urbanis homines irritant, sed venatio lege non permittitur.

Inquisitio in moderatores societatum tabacariarum

Grex medicorum et aliorum expertorum in moderatores societatum tabacariarum inquisitionem in Finnia intendit. Ille grex triginta trium hominum petivit, ut inquireretur, an moderatores societatum tabacariarum maletractationes et homicidia commisissent, cum affirmantes sigarella levia saluti non nocere consumptores in errorem ducerent. Sigarella levia in Finnia triginta annos venibant, donec anno bis millesimo secundo vetita sunt. In petitione experti aestimant circiter sexaginta milia Finnorum propter illa sigarella mortem obisse. Quamvis moderatores societatum tabacariarum scirent dimidiam fere partem consumptorum saluti gravissima damna capturam esse, mendacem propagationem continuatam esse.

(Tuomo Pekkanen)

13.10.17

Quid Puigdemont dixerit

Die Martis (10.10.) vesperi Carles Puigdemont, praeses regiminis regionalis Cataloniae, orationem habuit, quam omnes intenti exspectaverant. In opinione enim erat eum de Catalonia sui iuris facta nuntiaturum esse. Neque tamen hoc fecit, sed id se acturum esse dixit, ut consultationes cum administratoribus Hispaniae de illa re inciperentur. Necesse esse, ut voluntas populi Cataloniensis in independentiam respiceretur.

(Reijo Pitkäranta)

Quid Rajoy responderit

Regimen Hispaniae conventum necessitatis de discrimine Cataloniae habuit. Quo facto princeps minister Mariano Rajoy nuntiavit decretum esse, ut Catalonienses interrogarentur, quidnam Carles Puigdemont oratione sua dicere voluisset. Incertum enim esse, utrum illi se in libertatem vindicavissent necne. Cum respondissent, Hispaniam deliberaturam esse, quem potissimum cursum sequi vellet.

(Reijo Pitkäranta)

Pestilentia in Madagascaria

His duobus mensibus in Madagascaria amplius ducenti casus pestilentiae reperti sunt, e quibus saltem triginta tres morti fuerunt. Agitur plerumque de pestilentia pulmonum, quae contagione per guttas minimas facta latius patet. Ad epidemiam compescendam Ordo sanitarius Mundi (WHO) in Madagascariam magnam copiam antibioticorum misit. 

(Reijo Pitkäranta)

Incendia terrestria Californiae

In California incendia terrestria conflata sunt, quae amplas regiones vini feraces vastant. Insuper multa centena domuum flammis absumpta sunt, quo factum est, ut magna multitudo incolarum tecta sua relinquere cogeretur. Venti procellosi, siccitas, tempestas calida in causa sunt, cur illa incendia passim rabide diffundantur.

(Reijo Pitkäranta)

Praemium Nobelianum pacis

Praemium Nobelianum pacis hoc anno ordini ICAN tributum est, qui armis nuclearibus obsistit. Monet haec arma periculum ingens generi humano efficere. Operam dat, ut omnes terrae pactionem de armis nuclearibus vetandis comprobent. Centum fere terrae huic pactioni favent, sed nulla civitas armis atomicis instructa inter eas est.

(Satu Tuominen)

Messis frumentaria infecunda

Messis frumentaria in Finlandia hoc anno infecundior est. In causa sunt imbres assidui, quibus effectum est, ut segetes humi iacerent neque temperi maturarentur. Propter tempestatem foedam messoribus difficile erat frumentum machinis exterere et proventum agri in horreum congerere. Aliquot locis dimidia annonae pars amissa est.

(Reijo Pitkäranta)

Sauli et Jenni infantem habebunt

Praesidenti Finlandiae Sauli Niinistö et coniugi eius Jenni Haukio mense Februario infans nascetur, ut die Lunae publice nuntiatum est. Iam multos annos esse, cum par praesidentiale familiam suam filiolo aut filiola auctum iri speraret. Gaudium utriusque nunc eo maius esse, quod initium graviditatis difficile et importunum fuisset.

(Reijo Pitkäranta)

Catalonia pro independentia sententiam tulit

6.10.17

Longe maior pars Cataloniensium, qui ad urnas venerunt, in suffragio populi Kalendis Octobribus facto pro independentia sententiam tulit. Regimen et tribunal constitutionale Hispaniae illud suffragium illegale iudicaverunt. In tumultibus violentis inter comitia ortis permulti vulnerati sunt. Prope octingenti homines in sedibus medicis aut valetudinariis curabantur. (2) Testes oculati narraverunt custodes publicos a regimine Hispaniae missos contra suffragantes fustes et glandes cummeas adhibuisse et urnas cum sententiis datis retinuisse. Carles Puigdemont, dux regionis Cataloniae, dixit Catalonienses suffragando ius independentiae vindicavisse et ita ianuam ad declarationem unilateralem independentiae aperuisse. (3)

Guterres musulmanos rohingyas defendit

Antonio Guterres, secretarius generalis Nationum Unitarum, flagitavit, ut regimen Birmaniae operationes militares statim interrumperet, propter quas semimilio musulmanorum rohingyarum Birmaniae septentrionalis in Bangladesam effugisset. Agi de discrimine humanitario, quod fundamentum radicalizationi, criminalitati, commercioque hominum praepararet. Condicionem rohingyarum Guterres incubonem humanitarium appellavit. (4)

Sinae sanctiones exsequuntur

Sinae sanctiones exsequuntur, quas Nationes Unitae contra Coream Septentrionalem probaverunt. Omnes societates mercatoriae, quas Corea Septentrionalis in Sinis habet, intra centum viginti dies negotia sua finire debent. Exportatio benzini et gasi in Coream Septentrionalem limitatur; importatio textilium, carbonis, ferri, piscium in Sinas vetatur. (5)

Russia ultima arma chemica delevit

Praesidens Vladimir Putin Russiam ultima arma chemica delevisse in televisione rettulit et Americanos hortatus est, ut exemplum Russiae sequerentur. Inter bellum frigidum Russia et USA magnam armorum chemicorum copiam collegerunt, quam deinde, cum se pacto de illis armis vetandis adiunxissent, delere promiserunt. (6) Initio arma chemica ante mensem Aprilem anni bis millesimi duodecimi (2012) delenda erant, sed utraque pars nuntiavit sibi procrastinatione opus esse. Americani rettulerunt se suum opus ante annum bis millesimum vicesimum tertium (2023) finituros esse. Ordo internationalis de armis chemicis vetandis (OPCW, Organisation for the Prohibition of Chemical Weapons) illa arma a Russis deleta esse confirmavit. (7)

Lupi ad Romam reverterunt

Propter nimiam venationem populatio lupina in Italia proximo saeculo paene exstirpata est, nam ante quinquaginta annos tantum centum vel maxime centum quinquaginta lupi ibi restabant. Deinde venatione vetita populatio usque ad mille sescentos lupos aucta est. Nuper lupi etiam ad Romam reverterunt, ubi his centum annis visi non erant. (8) Unus ex his lupis nominatus est Romulus, sicut appellabatur alter ex fratribus geminis, quos lupa olim lactavit, ut fabula narrat; Faustulum pastorem Romulum et fratrem geminum Remum invenisse et uxori Larentiae educandos dedisse. Condita Roma et occiso fratre Romulum postea primum Romae regem (753-715) factum esse. (9)

– Vox populi, vox dei.

– Lupus est homo homini.

– Lupus non curat numerum ovium.

29.9.17

Comitia parlamentaria

Die Dominico (24.9.) in Germania comitia parlamentaria habita sunt. Quorum victoriam reportaverunt democratae Christiani, qui tertiam suffragiorum partem (33%) sibi conciliaverunt. Hinc sequitur, ut Angela Merkel, praeses factionis, cancellaria foederalis quater fiat. Secundum locum consecuti sunt democratae sociales, quibus praeest Martin Schulz, cum viginti fere centesimas (20%) sententiarum acceperunt. Locum tertium obtinuit factio dextima, cui nomen ’Optio Germaniae’, tredecim centesimas (13%) suffragiorum adepta.

(Reijo Pitkäranta)

Res Germaniae mutatae

Rerum periti, cum de eventu comitiorum Germaniae disputarent, imprimis duas maiores mutationes factas esse monuerunt: unam earum esse, quod Angela Merkel nonnihil pristinae aurae popularis amisisset, alteram, quod extremistis dextimis primum post secundum bellum mundanum contigisset, ut legati sui in parlamentum deligerentur. 

(Reijo Pitkäranta)

Iter praesidentis Italiae

Die Martis (26.9.) praesidens Italiae Sergio Mattarella itinere tridui suscepto in Finlandiam venit filia Laura comitatus. Postridie eius diei hospites a praesidente Sauli Niinistö et coniuge eius in Palatio praesidentiali sollemniter recepti sunt. Postea etiam praesidem parlamenti Maria Lohela et principem ministrum Juha Sipilä salutaverunt.

(Reijo Pitkäranta)

Lex Arabiae Saudianae

Rex Arabiae Saudianae Salman edixit, ut feminis licentia autocinetum regendi concederetur. Decrevit enim constitutiones ad commeatum publicum pertinentes ita renovandas esse, ut tam viri quam feminae sibi diploma vehiculis gubernandis acquirere possent. Nova lex, cui scribendae collegium magistratuum institutum est, mense Iunio valere incipiet.

(Reijo Pitkäranta)

De historia notae zeri

Nota numeri, cum zerum significat, multis saeculis vetustior esse videtur quam antea creditum est. Documentum enim Indicum, in quo illud signum occurrit, iam tertio p.Chr. n. saeculo conscriptum est, non saeculo duodecimo, ut superius existimabatur. Hanc rem investigatores Universitatis Oxoniensis computatione radiocarbonica usi compererunt.

(Reijo Pitkäranta)

De insectis edendis

In Finlandia magistratus in animo habent saginam et venditionem insectorum ad mensas escarias permittere. Antea lex Unionis Europaeae vetuit alimenta ex insectis parata vendere, sed interpretatio legis sensim mutata est. Speratur fore, ut insectis, quae proteino abundant, penuria cibariorum in diversis partibus mundi leniri possit.

(Saara Honkanen)

De nidificatione avium

Loca, ubi aves in Finlandia nidificant, quotannis paene duo chiliometra ad septentrionem versus transferuntur. Causa et origo huius rei est caelum usque calefiens. In praesenti apud nos ducenta triginta quinque genera avium nidulantur, quorum tertia pars regionem vivendi iam amplificavit. Hoc patet ex investigatione ornithologica nuper divulgata.

(Reijo Pitkäranta)

22.9.17

Conventus generalis Nationum Unitarum

Nationes Unitae conventum generalem hac septimana in urbe New York habuerunt. Oratione, quam in conventu fecit, praesidens Donald Trump labores Nationum Unitarum pro pace et securitate laudavit sed nimiam ordinis byrocratiam vituperavit. Monuit importunum programma nucleare Coreae Septentrionalis mundo imminere, dum cives fame perirent et cruciatum paterentur.

Explosio in tramine Londiniensi

In tramine metropolitano Londiniensi die Veneris (15.9.) inter frequentiam matutinam apud stationem Parsons Green bomba in situla plastica posita explosa est. Effectus explosionis fuit admodum moderatus, etsi triginta viatores leviter vulnerati sunt. Plerique ex eis combustiones acceperunt. De illo scelere suspiciuntur duo homines, ex quibus unus, vir duodeviginti annos natus, captus est in portu Dover, alter, iuvenis unius et viginti annorum, in suburbio Houslow Londiniensi. Ordo Isis nuntiavit se ictum fecisse, qui est iam quintus in Britannia hoc anno factus.

Curdi civitatem independentem condituri

Curdi, qui in Iraquia septentrionali regionem habent autonomam, civitatem sui iuris vindicant. Parlamentum Curdorum decrevit, ut de ea re suffragium populi die vicesimo quinto huius mensis (25.9.) fieret. Regimen Iraquiae, sicut etiam Irania et Turcia nec non USA, independentiae Curdorum obsistunt. Irani et Turci timent, ne secessionis studium etiam inter cives Curdos in ipsorum terris habitantes extendatur. Americani autem flagitant, ut suffragium de independentia revocetur, quod censent illud suis cum Turcia relationibus nocivum esse et pugnam contra ordinem Isis impedire.

Principissa Victoria Finniam visitavit

Principissa Victoria, heres regni Suetiae, septimana vergente Finniam visitavit, ut anniversarium centesimum Finniae independentis honoraret. In Theatro Melodramatico Helsinkiensi principissa spectaculo operae ”Sonata autumni” adfuit. Partes principales cantavit semisuprana Anne Sofie von Otter. Illa opera originem ex pellicula eiusdem nominis ducit, cuius auctor et moderator fuit Ingmar Bergman.

Finni salubrius edunt quam ante

Diaeta Finnorum hoc decennio in partem salubriorem mutata est. Consumptio carnis rubrae minuitur, legumina, nuces, olera, fructus plus quam ante eduntur. Praeterea gratus est civibus panis ex avena factus. Loco lactis potiones speciales, e.g. avena aut soia conditae, magis magisque bibuntur.

Autumnus progreditur

Autumnus progreditur. Hac septimana grues in meridiem migrant. Quia caelum fuit sudum, in Finnia meridiana temperatura nocturna passim iam infra zerum decidit. Mutationes etiam in eo visibiles sunt, quod vesperae obscurefiunt, cum dies singulis septimanis in meridione plus semihora, in septentrione plus hora brevior fiat.

15-9-17

De initiis typhonis Irma

Pridie Kalendas Septembres (31.8.) in Oceano Atlantico tempestas, cui nomen Irma inditum est, vires colligere coepit. Paucis diebus post tam fortis facta est, ut procella quinti gradus sive omnium periculosissima aestimaretur turbinibus venti amplius octoginta metra in secundo saevientibus. Primum quidem, id est postridie Nonas Septembres (6.9.), insulae Maris Caribici, ut Barbuda, typhone pessime vastatae sunt. 

(Reijo Pitkäranta)

Procella iter continuavit

Die nono mensis Septembris (9.9.) tempestas Irma, postquam saltem viginti quinque hominibus perniciei fuit, civitates insulares Portum Divitem, Rem publicam Dominicianam, Haitiam praeteriit. Inde cursum ad oram Cubae versus continuavit, ubi effecit, ut minimum decem homines vitam amitterent et urbs Habana inundationibus obrueretur.

(Reijo Pitkäranta)

Florida admodum afflicta

Die decimo huius mensis (10.9.) typhon Irma Floridam consecutus est. Interitus, quem huic regioni attulit, etiam maior fuisset, nisi tota fere civitas iussu magistratuum hominibus vacuefacta esset. Duodecim cives mortui sunt atque urbes et oppida tam inundationibus quam ventis procellosis maxima damna acceperunt. Post Floridam occidentalem afflictam furor tempestatis paulatim remisit.

(Reijo Pitkäranta)

Comitia in Norvegia facta

Die Lunae (11.9.) in Norvegia comitia parlamentaria habita sunt. Suffragiis computatis apparuit conservativos una cum aliis factionibus administrantibus fidem populi sibi conciliavisse. Partes autem operariorum cladem acerbissimam acceperunt. Ministra princeps Erna Solberg, cum eventum comitiorum pronuntiaret, victoriam reportatam toti ministrorum coalitioni attribuit. 

(Reijo Pitkäranta)

Exercitium bellicum parlamenti

Exercitus Finlandiae exercitio bellico hoc mense in Suetia interest. Quod in multis regionibus huius terrae cooperationis militaris causa paratur. Trecenti fere milites Finlandenses ad exercitationem missi sunt, cum undeviginti milia Suetorum eam participarent. Praeterea copiae ex aliis terris Europaeis et Civitatibus Americae Unitis adsunt.

(Satu Tuominen)

Refectio Aedium parlamenti

Restitutio Aedium parlamenti Finlandiae nuperrime ad finem est adducta. Nonis enim Septembribus (5.9.) tribuni plebis, qui hoc biennio in alieno convenire coacti erant, in Collem Arcadium, ut ille locus dicitur, redire potuerunt. Domus parlamenti e granite aedificata ab architecto Iohanne Siren delineata est. 

(Reijo Pitkäranta)

Cursus 'La Parisienne'

Iam viginti anni sunt, cum Lutetiae Parisiorum cursus feminarum in tota Europa omnium maximus nomine 'La Parisienne' instituitur. Hoc anno illi cursurae plus centum feminae ex Finlandia oriundae interfuerunt. Omnes earum vestibus caeruleis et albis indutae erant, ut hoc ornatu patriam suam abhinc centum annos sui iuris factam celebrarent. 

(Reijo Pitkäranta)

8-9-17

Corea septentrionali bombam hydrogenicam probavit

Corea Septentrionalis nuntiavit se bombam hydrogenicam, quae in missili poni posset, feliciter probavisse. Stationes sismographicae etiam in Finnia explosionem notaverunt. Ex instituto meteorologico Iaponiae dictum est tremorem terrae decies fortiorem fuisse quam mense Septembri, cum Corea Septentrionalis proximum experimentum nucleare fecisset. Si res ita se habet, bomba quater vel quinquies maior fuit quam bomba atomica secundo bello mundano exeunte in urbem Nagasaki Iaponiae demissa. 

Sinae, Russia, Iaponia, USA et nationes Europaeae experimentum bombae hydrogenicae unanimiter damnaverunt. Consilium securitatis Nationum Unitarum ad rem tractandam convocatum est. Praesidens Donald Trump nuntiavit Americanos de omni commercio cum illis terris finiendo deliberare, quae cum Corea Septentrionali mercatum exercerent. Malcolm Turnbull, primus minister Australiae, censebat paeninsulam Coreanam post bellum ibi gestum numquam his sexaginta annis tam prope novum bellum fuisse.

In Bosporo Cimmerio pons construitur 

Russi, postquam Crimaeam occupaverunt, pontem in Bosporo Cimmerio facere constituerunt. Pons, qui erit undeviginti chiliometra longus, iungit paeninsulam Taman Russiae cum oppido Kerts, quod est in Crimaea. Propositum est, ut pons, commeatui tam vehiculario quam ferriviario destinatus, intra proximum annum perficiatur.

Oppidum antiquum in mari repertum

Archaeologi oppidum antiquum aetatis Romanorum in mari apud Nabeul, urbem Tunesiae, reppererunt. Oppidum, a Graecis quinto a.Chr.n. saeculo conditum, fuit olim nomine Neapolis. Urinatores in ruinis praeter vias et monumenta circiter centum amphoras invenerunt, in quibus fuerat garum, condimentum ex piscibus factum, quod Romani amabant.

Vinum sex milium annorum 

Ex novis investigationibus apparet vinum in Europa iam ante sex milia annorum in usu fuisse. In seriis figulinis, in aliquot speluncis Siciliae occidentalis repertis, sunt residua vini, quod ante sex milia annorum factum esse constat, nam ex analysi residuorum patet vinum initio quarti a.Chr.n. millenii productum esse.

Desertum Atacama florescit 

Desertum Atacama Chiliae occidentalis, quod in toto mundo siccissimum habetur, hoc tempore floribus operitur. Nuper ibi urceatim pluebat, quo factum est, ut desertum in ingentes campos floridos mutaretur. Semina et bulbi, quae in sicca terra per multos annos conservantur, imbribus cadentibus celeriter germinant et florescunt. Pulcherrimum tempus a mense Septembri usque ad Novembrem durat neque pluviae saepius quam quinto, sexto vel septimo quoque anno cadere solent. Hoc autem anno imbres maturiores fuerunt, nam anno bis millesimo quinto decimo (2015) desertum Atacama insolito splendore post largissimos imbres mensis Martii floruit.

Tuomo Pekkanen.

1-9-17

Conventus praesidentium

Die Lunae (28.8.) praesidens Finlandiae Sauli Niinistö collegam suum Americanum Donald Trump in Aedibus Albis convenit. Praesidens Trump hospiti suo gratias egit, quod Finlandenses militibus Americanis et sociis eorum in Afganistaniam missis auxilio fuissent. Idem dixit se et suos propter ictum terroristicum in urbe Turku factum dolere et virtutem Finlandensium in bello contra terrorismum gerendo laudavit. 

(Reijo Pitkäranta)

Quid Timo Soini dixerit

Timo Soini, minister a rebus exteris Finlandiae, conventum inter Niinistö et Trump habitum insignem et bonum habet. In colloquiis argumenta magni momenti tractata esse, in quibus res tam ad sodalitatem Consociationis Atlanticae et Mare Balticum quam ad Russiam et orbem arctoum pertinentes excellerent.

(Reijo Pitkäranta)

Typhon Harvey dictus

Septimana vergente in Sinu Mexicano tempestas vehementissima orta est. Quae procella, nomine Harvey, postquam in oram civitatis Texiae pervenit, illi regioni maxima detrimenta intulit. Ex eo typhone ingentes inundationes secutae sunt, quibus Hustonia, metropolis celeberrima, tota fere obruta est. Neque Americani umquam tantos imbres viderunt.

(Reijo Pitkäranta)

Missile Iaponiae imminens

Die Lunae (28.8.) ex Corea Septentrionali missile ballisticum sublime emissum est, quod Iaponiam septentrionalem supervolavit. Deinde in tres partes diruptum in mare decidit in loco, qui circiter mille ducenta chiliometra ab insula Hokaido abest. Omnes civitates, in iis Russia et Sinae, illud experimentum vehementer condemnaverunt.

(Reijo Pitkäranta)

Res in Amazonia metallica

Regimen Brasiliae novas auri et aliorum mineralium fodinas in Amazonia constituere permittit. Silvae ad rem metallicam nunc destinatae tertiam fere partem areae silvestris flumini Amazonio circumiectae tegunt. Tutores naturae decreto vehementer reclamant; timent, ne ex hoc sequatur, ut regiones silvarum et aquae copiae corrumpantur, biodiversitas naturae dilabatur, communitates locales dissolvantur.

(Saara Honkanen)

Memoria principissae Dianae

Pridie Kalendas Septembres (31.8.) viginti anni acti erant, cum Diana, principissa Valliae, calamitate viaria Lutetiae Parisiorum facta vitam amisit. In causa erat, quod autocinetum eius propter nimiam velocitatem ad parietem cuniculi viarii illisum est. Memoria Dianae in Britannia variis modis recolebatur, et in honorem eius statua ponetur.

(Reijo Pitkäranta)

Tempus ursos caedendi

Die Dominico (27.8.) in Finlandia tempus ursos caedendi iniit. Numerus eorum in silvis nostris vagantium mille septingentorum fere esse existimatur, quam ob rem venatoribus licentia data est ducentos viginti quinque eorum sternendi. Agitatio ursorum partim eo spectat, ut iis metus hominis et rerum humanarum iniciatur.

(Reijo Pitkäranta)

25-8-17

Strages in Catalonia terroristicae

Die Iovis (17.8.) in urbe Barcinone tredecim homines mortui et plus quam centum vulnerati sunt, cum terrorista, origine Marochinus, in via La Rambla, quae ambulatio est frequentatissima, autocinetum contra turbam consulto gubernavit. Vecturarius effugit sed die Lunae (21.8.) repertus et a vigilibus interfectus est.

In oppido maritimo Cambrils, quod centum viginti chiliometra a Barcinone distat, alter ictus postridie factus est. Quinque terroristae autocinetum in turbam simili modo impegerunt et homines cultris perfodere coeperunt. Illum autem impetum vigiles omnibus aggressoribus interfectis represserunt. Una tamen femina in illo ictu mortua est.

Magistratus Hispani credunt terroristas etiam maiorem stragem Barcinone faciendam praeparavisse. Illud autem consilium non successit, cum officina, quam illi in oppido Alcanar habebant, proxima nocte explosione deleta esset. In ruinis repertae sunt centum sex bombylae butani aliaeque materiae explosivae, quibus terroristae in stragibus uti solent.

Post Barcinonem Turku

Die Veneris (18.8.), quarta fere hora postmeridiana, iuvenis Marochinus, qui anno ante in Finniam venerat et asylum petiverat, in mercatum urbis Turku repente cucurrit et furibundus homines cultro perfodere coepit. Imprimis feminas petebat et, antequam a vigilibus sclopetando reprimeretur, octo homines vulneravit et duos interfecit. Ex mortuis utraque est femina. Ex vulneratis duo sunt viri, qui victimis succurrebant. Homicida Marochinus et quattuor concives eius postea deprehensi a vigilibus interrogantur et relationes eorum cum terrorismo internationali examinantur. In Finnia die Dominico in memoriam victimarum silentium triste unius minutae observatum est.

Cur auctores sint Marochini, quaeritur

Auctores non tantum stragis Turkuensis et Barcinonensis sed etiam multarum aliarum in Europa nuper factarum fuerunt viri ex Marochia oriundi. Mense Iunio Londinii, anno proxime praeterito in aeriportu et statione metropolitana Bruxellensi, duobus annis ante in theatro Bataclan Parisiensi inter auctores ictuum imprimis Marochini fuerunt.

Quaeritur, cur tot ex Marochia, terra triginta trium milionum incolarum. Aestimatum est circiter quattuor miliones homines ex Marochia imprimis in Europam ad meliorem vitam quaerendam emigrasse et mille sescentos homines in ordinem Isis profectos esse. Constat etiam ibi multos greges extremistarum islamicorum exstitisse, etsi regimen eos coercere conatur.

In Finniam paucissimi immigratores ex Marochia venerunt. His duodecim mensibus tantum sedecim Marochini asylum acceperunt. Uni et triginta petitoribus asylum negatum est. Ex omnibus petitionibus pars Marochinorum tantum dimidium centesimae (0,5%) fuit. Nullum bellum in Marochia geritur, nullum discrimen notabile ibi fuit. Etiam ad ferias agendas peregrini in Marochiam itinera faciunt.

(Tuomo Pekkanen)

18-8-17

Quid Wahlström dīxerit

Margot Wahlström, ministra a rebus exteris Suetiae, dixit nationem suam adiuvare posse, ut discrimen inter Civitates Americae Unitas et Coream Septentrionalem ortum solveretur. Ait sedem legationis, quam Sueti primi omnium Europaeorum occidentalium in Corea Septentrionali condidissent, locum maxime idoneum esse ad colloquia pacis inter utramque partem habenda.

(Reijo Pitkäranta)

Trump de abusu opioidum

Praesidens Donald Trump Americanis statum necessitatis indixit propter nimium opioidum usum. In his sunt complura remedia stupefactiva ut heroinum et analgetica sive medicamenta ad dolorem compescendum efficacia. Abusu horum narcoticorum factum est, ut anno proxime praeterito sexaginta fere milia hominum in Civitatibus Americae Unitis vitam amitterent.

(Reijo Pitkäranta)

Ova gallinae venenosa

In compluribus civitatibus Europae ingens copia ovorum gallinae ex mercatu detrahenda et omnino delenda erat, postquam in iis insecticidium venenosum repertum est. Scandalum, quod pecuariis et rei negotiali magna detrimenta intulit, in Hollandia erupit. Ibi enim societas quaedam in gallinis agricolarum localium curandis insecticidium nomine fiprinilum, illicite usurpaverat.

(Reijo Pitkäranta)

De servitute hodierna

Periculum servitutis et laboris coacti anno proximo in terris Unionis Europaeae magnopere crevit. Quod ex discrimine profugorum sequi dicitur, cum ex numero illorum solito maiore occasio operariis abutendi offeratur. Ergo redemptores operis, consumptores, administratores vigilare oportet. In Dacoromania, Italia, Cypro, Bulgaria periculum operae servae maximum est.

(Satu Tuominen)

Vienna antiqua reperta

Archaeologi Francogalli Viennam, urbem antiquam in Gallia Narbonensi sitam, in lucem protulerunt. Locus repertionis est in vico, qui hodie nomine Sainte-Colombe notus est. Nova area archaeologica tanti aestimatur, ut a quibusdam ’parvi Pompeii’ appellentur. Agitur de urbe Allobrogum, cuius mentionem Caesar in Commnetariis de bello Gallico (7,9,3) facit.

(Reijo Pitkäranta)

Big Ben ad tempus silescit

Big Ben, horologium celeberrimum, quod ad campanile Domus parlamenti Londiniensis applicatum est, in quadriennium sonare desinit. Constitutum enim est, ut illa turris in meliorem condicionem reficeretur. Una tamen ex quattuor tabulis horariis inter reparationem in usu erit, ut homines praetereuntes omni tempore, quota hora sit, videre possint.

(Reijo Pitkäranta)

Certamina Londiniensia

Die Dominico sive Idibus Augustis (13.8.) certamina athleticae generalis mundialia Londinii posita finem ceperunt. Successus Finnorum modestus erat, cum nostri ne unum quidem nomisma domum reportaverunt. Optimus athleta noster, ut iam ante exspectabatur, erat Tero Pitkämäki, qui in iaculo emittendo quintum locum consecutus est.

(Reijo Pitkäranta)

11-8-17

Npovae in Coream Septentrionalem sanctiones

Consilium securitatis Nationum Unitarum novas contra Coream Septentrionalem sanctiones probavit. In sententia, quam USA composuit, inter alias res importatio carbonis fossilis et ferri ex Corea Septentrionali vetatur. Praeterea terris peregrinis non licebit consilia cooperationis cum Corea Septentrionali capere et novos operarios inde conducere. Novae sanctiones, quibus etiam Sinenses et Russi favebant, propter recentiora experimenta missilium impositae sunt. Moderatores autem Coreae Septentrionalis nuntiaverunt se a programmatis suis nuclearibus non esse recessuros, immo vero milies illas sanctiones ulturos esse. Neque tamen palam fecerunt, quae consilia ulciscendi capturi essent. Ri Yong-ho, minister a rebus exteris Coreae Septentrionalis, nuntiavit arma nuclearia patriae suae contra USA directa esse. Consilium autem mutatum iri, si qua alia terra cum Americanis confoederata securitati suorum minitaretur. - Sanctiones efficient, ut reditus exportationis Coreae Septentrionalis singulis annis vel miliardo dollarorum minuantur.

Lucifer Europam meridianam cruciat

Aestus fervidissimus, quo regiones Europae meridianae laborant, praesertim Italos et incolas Balcaniae cruciavit, sed tempestas calidissima usque ad Poloniam meridianam porrigitur. Calor insolitus, cui nomen Lucifer datum est, silvas incendit et agros in multis partibus vastavit. In Italia temperatura passim quadraginta gradus superavit. In Sardinia quadraginta quattuor, Romae quadraginta tres caloris gradus mensurati sunt. Magistratus homines hortati sunt, ut intus manerent et multum aquae biberent. Lucifer iam multos homines occidit et imminet imprimis senibus et infantibus et eis, qui morbis cardiovascularibus affecti sunt.

Ricinus, insectum periculosum

Ricinus (Ixodes ricinus, Ital. zecca, Franc. tique, ixode), qui mensibus aestivis in pratis et nemoribus pullulat, a multis periculosissimum animal Finniae habetur, quia encephalitim et borreliosim (Eng. Lyme disease) propagat. Numero caprearum et tarandorum augente ricini celeriter in septentrionem versus extenduntur et eodem passu casus encephalitis et borrelioseos multiplicantur. Ricinus enim ad pellem animalis adhaerescit, ut sanguinem sugat, ibique aliquot dies manet, antequam decidat. Facillime etiam homini, in nemoribus et pratis ambulanti, affigitur. Borreliosim facit bacterium, quod antibioticis curatur; encephalitis autem, quam facit virus (TBE), medicamentis non curatur et difficulter sanatur.

Princeps Philippus, dux Edimburgi, in pensionem

Princeps Philippus, maritus Elisabethae, reginae Britannorum, nonaginta sex annos natus ab officiis publicis dimissus postridie Kalendas Augustas (2.8.2017) pensionem obtinuit. Postquam Elisabeth in thronum ascendit, Philippus plus viginti milia officia curavit, circiter sescenta itinera fecit, patronus fautorque fuit septingentorum octoginta quinque ordinum.

Tuomo Pekkanen.

4-8-17

Putin in Finlandia

Septimana proxime praeterita praesidens Vladimir Putin iter unius diei in Finlandiam suscepit. Is, postquam helicoptero vectus in aeriportum Arcis Savonum pervenit, collegam suum Sauli Niinistö in deversorio Punkaharju convenit. Ibi praesidentes inter alia de securitate Maris Baltici et de rebus oeconomicis collocuti sunt. Deinde navi vaporaria conscensa ad Castellum Olai vecti sunt, ut ibidem drama musicum Jolanta spectarent. 

(Reijo Pitkäranta)

Quid Putin dixerit

Praesidens Putin negavit exercitationes navales, quas Russi una cum Sinis in Mari Baltico instituerent, cuiquam imminere.”Opera communia”, inquit, ”illius generis stabilitatem toti mundo praestant. Neque nobis in animo est novas confoederationes militares condere”. Ei consensit praesidens Niinistö dicens tamdiu exercitia bellica parari, quamdiu arma in orbe invenirentur.

(Reijo Pitkäranta)

Mike Pence in Baltia

Die Dominico (30.7.) Mike Pence, vicepraesidens Civitatum Americae Unitarum, Tallinnam, caput Estoniae, visitavit. Ibi nomine praesidentis Donald Trump moderatores terrarum Balticarum salutavit affirmans Estoniam, Lettoniam, Lituaniam ab Americanis contra omnes aggressiones defensum iri. Hanc orationem ideo habuit, quod Balti solliciti de sua securitate fuerant.

(Reijo Pitkäranta)

Quid Tillerson dixerit

Civitatibus Americae Unitis propositum non est regimen Coreae Septentrionalis evertere, ut dixit Rex Tillerson, minister a rebus exteris. Ait Americanos ad consultationes cum Coreanis paratos esse, dummodo illi programma suum nucleare deponerent. Ita censuit paucis diebus post, quam Corea Septentrionalis experimentum missilium fecerat.

(Reijo Pitkäranta)

De regimine Suetiae

Stefan Löfven, primus minister Suetiae, nuntiavit regimen suum de protectione datorum neglecta accusatum dimissionem non petiturum esse. Compositionem tamen ita mutari, ut Anna Johansson, ministra a substructionibus publicis, et Stefan Ygeman, minister a rebus domesticis, magistratu se abdicarent, sed Peter Hultqvist, minister defensionis, in munere maneret.

(Saara Honkanen)

Canis saluti prodest

Canis familiaris, ut rerum periti censent, ad valetudinem hominis multum confert. Si pellem eius permulcemus, pressio sanguinis descendit, et cum canis in oculos nostros intuetur, statim nos animo melius valere sentimus. Canis etiam corpori exercendo nonnihil prodest, quod fieri non potest, quin possessor cotidie cum eo sub divo ambulet.

(Reijo Pitkäranta)

Certamina Londiniensia

Hodie (4.8.) in stadio Olympico Londiniensi certamina athleticae generalis mundialia initium capiunt. Grex Finnorum eis interfuturus admodum parvus est, quippe qui tantum ex duodecim athletis constet. Quanto successu nostrates certaverint, Idibus Augustis (13.8.) patebit, cum illis ludis finis impositus erit.

(Reijo Pitkäranta)

16-6-17

Quid in Jyväskylä acciderit

Die Lunae (12.6.) in eo erat, ut regimen Finlandiae caderet. Causa et origo huius rei erat conventus factionis Finnorum fundamentalium in urbe Jyväskylä habitus. Ibi enim duces partium omnino permutati sunt, cum praeses electus est Jussi Halla-aho et vicepraesides tres fautores eius creati sunt. Constabat victores suffragii de multis rebus aliter sentire ac eiusdem factionis ministros regiminis civitatis participes. 

(Reijo Pitkäranta)

Regimen iam casurum erat

Post conventum Jyväskyläensem princeps minister Juha Sipilä nuntiavit fieri non posse, ut Jussi Halla-aho cum suis ad regimen admitteretur. Tum ii eiusdem factionis socii, qui administrationi hodiernae favebant, suum gregem parlamentarem condiderunt, cui nomen Nova optio inditum est. Quo facto pristina coalitio regiminis servari potuit. 

(Reijo Pitkäranta)

Comitia in Britannia facta

Die octavo mensis Iunii (8.6.) in Britannia comitia parlamentaria instituta sunt, ut ministra princeps Theresa May victoria freta antea iusserat. Praeter opinionem tamen factio conservativa maioritatem in parlamento amisit, quo factum est, ut ei, si administrare pergere vellet, auxilio alieno opus esset. Partes autem operariorum magnam victoriam reportaverunt.

(Reijo Pitkäranta)

Lex Iaponiensis de imperatore

Camera superior parlamenti Iaponiae legem accepit, qua efficitur, ut imperator Akihito munus deponat. Ille senex octoginta trium annorum valetudine adversa laborat, qua de causa speravit fore, ut se imperio abdicare posset. Princeps Naruhito imperator novus fore videtur. Diurnarii Iaponienses eum mense Decembri anni proximi munus initurum esse arbitrantur. 

(Satu Tuominen)

De promotione theologorum

Die nono mensis Iunii (9.6.) in Universitate Helsinkiensi promotio sollemnis Ordinis theologorum celebrabatur, cui praefuit Aila Lauha, profestrix historiae ecclesiasticae. Omnino nonaginta cives academici doctores aut doctrices theologiae creati sunt. Dignitatem doctoris honoris causa acceperunt septem homines de theologia optime meriti. Caerimoniae etiam duo doctores semisaeculares interfuerunt.

(Reijo Pitkäranta)

Lupi in Finlandia rariores

In Finlandia hoc tempore saltem centum quinquaginta lupi inveniuntur, ut e Sede opum naturae existimatur. Copia eorum intra annum quarta fere parte deminuta est. Greges harum bestiarum omnino unus et viginti reperti sunt, quorum septem in confinio Russiae et Finlandiae versantur, quattuordecim in aliis terrae partibus.

(Reijo Pitkäranta)

Nuntii Latini ad ferias abeunt

Nuntii Latini ob ferias aestivas ad sex septimanas intermittuntur, quam ob rem proxima emissio non ante quam die quarto mensis Augusti (4.8.) fiet. Restat, ut lectoribus nostris gratias quam maximas agamus et aestatem quam iucundissimam exoptemus.

(Reijo Pitkäranta)

09-06-17

Tractatus de climate a Trump reiectus

Praesidens Donald Trump decrevit, ut USA a tractatu de climate Parisiensi discederet. Paene ducentae terrae se ad hunc tractatum obligaverunt, ut calefactio climatis coerceretur. Ex demoscopia recens facta septuaginta centesimae Americanorum tractatum probant et maior pars eorum non infitiatur climatis calefactionem actis hominum accelerari. Trump autem curare non videtur, quid plerique Americani, quidve ceteri homines cogitent. Dixit se patriam suam suosque cives defendere, quia tractatus Parisiensis iniquus et durissimus contra USA esset et ceteris nationibus plus quam Americanis prodesset. Praeter USA tantum Syria et Nicaragua tractatum reiecerunt.

Theresa May: "Iam sufficit"

Post ictum terroristicum Londinii recens (4.6.) factum Theresa May, prima ministra Britanniae, orationem his fere verbis habuit: "Iam sufficit", inquit. "Denuo ferox in nos impetus factus est. Hic iam tertius intra tres menses ictus fuit. Varii motus extremistarum apud Britannos nimis tolerantur." Monuit necesse esse, ut crimina terroristica durioribus poenis castigarentur. Post mensem Martium vigiles Britanniae quinque ictus terroristarum impedivisse, qui quidem nullo modo inter se cohaererent, nisi quod eadem mala ideologia, versio depravata islamismi, eis esset communis. Motibus extremistarum omnibus modis resistendum esse.

Dies festus exercitus

Dies festus exercitus Finnici quarto die mensis Iunii (4.6.) celebratur. Ille dies natalis est Marescalci Finniae Mannerheim (1867-1951), qui imperator exercitus et sextus praesidens Finniae fuit. Hoc anno dies festus solito maiore pompa celebrabatur, quia agitur annus post Mannerheim natum centesimus quinquagesimus itemque anniversarium centesimum rei publicae Finniae. Praesidens Sauli Niinistö copiis in media urbe Helsinki congregatis orationem festivam habuit, qua monuit permagni referre, ut exercitus a toto populo sustineretur. Inde pompa militaris per vias urbis principales denis civium milibus acclamantibus turmatim processit. Thema pompae fuit: “Omnium est patriam defendere”.

Real Madrid – Iuventus 4-1

Certamen finale Confoederationis campionum Cardiffae, in urbe Britanniae, vespere Sabbati (3.6.) factum est. Conflixerunt greges Iuventus Taurinorum et Real Madrid Hispaniae. Iuventus initio fortiter rem gessit sed ludo procedente Matritenses superiores esse coeperunt et retibus quattuor ad unum (4-1) trophaeum reportaverunt. In media platea Augustae Taurinorum (vulgo Torino) multa milia hominum congregata erant, ut certamen per televisionem spectarent, cum omnes repente timore panico capti tam temere fugere coeperunt, ut circiter mille quingenti homines in turba laederentur. Adhuc nescitur, quae prima causa repentini timoris fuerit.

(Tuomo Pekkanen)

02-06-17

De visitatione regia

Die Iovis (1.6.) summi principes terrarum septentrionalium Helsinkium venerunt, ut Finlandiae ante centum annos sui iuris factae congratularentur. Ex Dania venit regina Margareta II, e Suetia rex Carolus XVI Gustavus et regina Silvia, e Norvegia rex Haraldus V cum regina Sonia. Praeter hospites regios in comitatu erant praesidens Islandiae et coniux eius. 

(Reijo Pitkäranta)

Niinistö nomen dedit

Sauli Niinistö, praesidens Finlandiae, iterum in munus creari vult. Hoc decretum die Lunae (29.5.) in habitatione officiali Mäntyniemi palam fecit. Recusavit tamen, quominus candidatus ullius factionis esset, sed speravit fore, ut petitioni suae a consociatione electorum faveretur. Ita conspici posse, quantum apud populum gratia valeret. 

(Reijo Pitkäranta)

Iter praesidentis Trump

Mense Maio exeunte praesidens Donald Trump peregrinationem novem dierum in Medium Orientem et in Europam fecit. Illud iter in Arabia Saudiana et in Israele initium cepit et inde Romam et in Civitatem Vaticanam continuatum est. Bruxellis regem Belgii et moderatores Unionis Europaeae convenit. Ad extremum in Siciliam volavit, ut conventui principum septem nationum industrialium interesset.

(Reijo Pitkäranta)

Oratio Angelae Merkel

Angela Merkel, cancellaria foederalis Germaniae, fortissime pro integritate Unionis Europaeae locuta est. Vix praesidens Trump e circuitu orbis terrarum domum reverterat, cum Merkel oratione Monoeci habita negavit iam fieri posse, ut civitates Europaeae auxilio alieno confiderent. Paulo ante Trump Confoederationem Atlanticam reprehenderat, quod parum pecuniae in defensionem impenderet.

(Reijo Pitkäranta)

Quid Stoltenberg dixerit

Nato sive Confoederatio Atlantica societatem cum nationibus contra ordinem Isis in Syria et Iraquia pugnantibus factura est, ut Jens Stoltenberg, secretarius generalis, nuntiavit. Negavit tamen foedus significare, ut Nato copias suas ad hostem mitteret. Praecipue Donald Trump, praesidens Americanorum, flagitavit, ut Nato terrorismum vehementius oppugnaret.

(Saara Honkanen)

Explosio Caburensis

Die Mercurii (31.5.) mane Caburae, in urbe principe Afganistaniae, bomba autocineto imposita explosa est stragem octoginta hominum efficiens. Displosio tanta erat, ut vis eius etiam in aedificiis procul stantibus manifeste sentiretur: fenestrae enim eorum diruptae et cardines ianuarum funditus evulsi sunt.

(Reijo Pitkäranta)

Novae herbae inventae

Regius hortus botanicus Britanniae relationem de statu plantarum orbis terrae divulgavit. E documento apparet anno proximo mille septingenta triginta nova genera herbarum inventa esse. Tanta copia extraordinaria non habetur, nam in globo terrestri adhuc amplissimae regiones inveniuntur, quarum herbae rerum peritis incognitae sunt.

(Reijo Pitkäranta)

Praesidens Mauno Koivisto public sumptu elatus est

26.5.17

Praesidens Mauno Koivisto, qui ante duas septimanas (12.5.) diem obiit supremum, die Ascensionis Christi publico sumptu elatus est. Episcopus urbis emeritus Eero Huovinen missam funebrem in ecclesia cathedrali Helsinkiensi celebravit. Funebrem laudationem praesidens rei publicae Sauli Niinistö dixit. Generales exercitus et praefecti classis arcam ex ecclesia exportaverunt. Inter pompam funebrem, quae per vias urbis in sepulcretum Hietaniemi ducta est, campanae omnium urbis ecclesiarum Lutheranarum sonabant. Ibi praesidens Koivisto inter pristinos praesidentes Urho Kekkonen et Risto Ryti sepultus est. In commemoratione post sepulturam verba fecerunt primus minister Juha Sipilä et pristinus primus minister Paavo Lipponen. In funus praesidentis circiter quingenti hospites invitati erant. In viis, quibus pompa funebris processit, complura dena milia, forsitan complura centena milia civium aderant. Vigiles urbis et milites securitatem custodiebant, sed dignitas et reverentia effecerunt, ut nullae fere perturbationes fierent.

Britannia terrorismo temptatur

In urbe Mancestria (vulgo Manchester), quae in Britannia septentrionali – occidentali sita est, sero die Lunae (22.5.) inter concentum cantatricis Arianae Grande explosio facta est, qua viginti duo homines, in his multi pueri et puellae, mortui et undesexaginta vulnerati sunt. Explosio habetur scelus terroristicum. Inter hos duodecim annos (2005-2017) complura scelera, quae inter impetus terroristarum numerantur, in variis Britanniae partibus facta sunt. Pars scelerum ad singulos homines spectaverunt, aliis sceleribus auctores civibus maxima damna efficere temptaverunt. In libera societate, ut censuit minister Timo Soini, fieri non potest, ut ictus omnino impediantur.

Vir viginti trium annorum deprehensus

Acta Britannica iam die Martis narraverunt virum viginti trium annorum, de ictu Mancestriensi praeparando suspectum, a vigilibus deprehensum esse; id factum esse prope pantopolium in suburbio urbis meridionali, ubi vigiles armati eum cepissent. Illum autem, qui ictum fecisset, in explosione interisse.

Academia Latinitati Fovendae convenit

Academia Latinitati Fovendae, cui propositum est usum vivum linguae Latinae ubique terrarum omnibus modis fovere, nuper conventum biduanum (20-21.5.) praeside professore Theodorico Sacré Romae habuit. Postquam de novis sodalibus cooptandis et de novis Academiae inceptis disceptatum est, dies in caupona urbis clausus est. Die sequenti ante meridiem fuit conventiculum, in quo argumentum « De profugis » tractatum est. Post meridiem in oppidum Praeneste, hodie Palestrina, vectum est, ubi duce Curtio Smolak mirabilia locorum lustrabantur. Inde sodales in Academiam Vivarii Novi vectos ad cenam adhibuit illius academiae praeses Aloisius Miraglia.

(Tuomo Pekkanen)

19.5.17

Mauno Kivisto mortuus

Mauno Koivisto, pristinus praesidens rei publicae Finlandiae, die duodecimo huius mensis (12.5.) de vita decessit nonaginta tres annos natus. Munere praesidentis per duodecim annos functus est, scilicet ab anno millesimo nongentesimo octogesimo secundo usque ad annum millesimum nongentesimum nonagesimum quartum (1982-1994). Antequam praesidens electus est, princeps minister erat et Argentariae Finnicae praefuit.

(Reijo Pitkäranta)

Quid Sauli Niinistö dixerit

Die Saturni (13.5.) praesidens Sauli Niinistö oratione habita res gestas praesidentis Mauno Koivisto recordatus est. Ait eum ultimum virum politicum eius generationis fuisse, quae bellis interfuisset et post pacem restitutam ad patriam reaedificandam contulisset. ”Gratiam”, inquit, ”ei habemus pro labore, quo pro sua parte effecit, ut Finlandia hodie terra maxime stabilis esset.”

(Reijo Pitkäranta)

Koivisto magni aestimatur

Complures cives interrogati, quid de praesidente defuncto Mauno Koivisto sentirent, eum virum popularem fuisse descripserunt: eo duce Finlandiam ad novam aetatem transisse, qua auctoritas parlamenti in re publica plus valeret quam ante. Vitam eius documento esse etiam hominem de plebe in fastigium cursus honorum pervenire posse.

(Reijo Pitkäranta)

Trump Russis secreta aperuit

Donald Trump, praesidens Americanorum, notitias maxime clandestinas legato et ministro rerum exterarum Russiae prodidisse dicitur. Hoc eo tempore factum esse, cum illi praesidentem in Aedibus Albis convenirent. Illas res tam secretas esse, ut Americani eas etiam socios sibi proximos celavisse videantur.

(Reijo Pitkäranta)

De conventu Berolinensi

Emmanuel Macron, novus praesidens Francogalliae, et Angela Merkel, cancellaria foederalis Germaniae, Idibus Maiis (15.5.) Berolini convenerunt. Inter eos consensum est, ut consilium commune de Unione Europaea promovenda caperetur. Censuerunt nihil impedire, quin, si res posceret, pacta Europaea mutarentur. 

(Reijo Pitkäranta)

Praesidatus Consilii arctici

Finlandia praesidatum Consilii arctici die undecimo mensis Maii (11.5.) accepit. Rex Tillerson, minister Americanus, munus illud collegae Timo Soini in Fairbanks Alascae tradidit, ubi octo ministri territorii Maris Glacialis convenerant. Dicuntur Finlandenses operam daturi esse, ut in regione arctica mutatio climatica prohibeatur et opes eruditioni tribuantur.

(Satu Tuominen)

Animalia Novae Zelandiae

Moderatores Novae Zelandiae omnes rattos, mustelas, animalia marsupialia insulae suae deleturi sunt. Ministra Maggie Barry: ”Vicatim”, inquit, ”et oppidatim vires nostras ad hoc consilium persequendum coniungemus”. Venatio illa eo spectat, ut aves huius regionis peculiares, quarum iam amplius quadraginta genera emortua sunt, ex bestiis nocivis serventur.

(Reijo Pitkäranta)

12.5.17

Emmanuel Macron, praesidens Franciae creatus

In altero suffragio comitiorum praesidentialium Emmanuel Macron sexaginta sex centesimis votorum acceptis praesidens Francorum in proximum quinquennium creatus est. Competitrix Marine Le Pen, cui triginta quattuor centesimae suffragantium favebant, de victoria illi gratulata est sed affirmabat se certamen continuaturam esse. Complura dena milia hominum Parisiis apud musaeum Louvre eventum comitiorum celebrabant. Macron turbam his fere verbis allocutus est: “Quod fecimus, numquam ante factum est neque par illi exstat. Non cedimus lineis divisionis nec timoribus. Inter quinquennium meum omnia faciam, ne quis causam partibus extremis suffragandi habeat.” Dixit se non solum suis fautoribus et illis verba facere, quorum suffragia ideo accepisset, quod competitrici Le Pen adversarentur, sed etiam civibus, qui illam votis sustinuissent. Turba sponte plaudebat, cum mentionem coniugis Birgittae (Brigitte) et familiae suae fecisset, iterumque cum libertatem, fraternitatem, aequitatem defendere promisisset. Macron, undequadraginta annos natus, est iunior quam quisquam ante eum praesidens Franciae. Studiis in Schola nationali administrationis (ENA) perfectis argentarius investionum factus est, dein (2014) minister a rebus oeconomicis in regimine praesidentis Hollande. Quo munere relicto (2016) motum politicum nomine “En marche” condidit.

Praesidens Niinistö: Bonus nuntius Europaeis

Praesidens Finniae Sauli Niinistö censebat victoriam Macronis esse bonum nuntium Europaeis. Illum aliquid novi in Europam allaturum esse, cum quaestiones oeconomiae et securitatis magni haberet. Integrationem Europae fieri posse solidiorem, quod etiam Finnis prodesset. Itemque Juha Sipilä, primus minister Finniae, eventum gratum habebat.

Juncker: Lingua Anglica in Europa minus valebit

Jean-Claude Juncker, praeses Commissionis Europaeae, in conventu nuper (5.5.) Florentiae facto orationem inauguralem Francogallice habuit, etsi in coetibus internationalibus sermones Anglice facere solet. Nuntiavit causam esse, quod, postquam Britannia ab Unione Europaea exire constituisset, Anglica lingua minorem in Europa quam antea vim haberet.

Princeps Philippus ex officiis publicis se recipiet

Princeps Philippus, maritus reginae Britanniae, autumno proximo ex officiis publicis se recipiet. Philippus, dux Edimburgi nonaginta quinque annorum, septuaginta fere annos iuxta Reginam Elisabeth officia repraesentationis curavit. Fuit origine princeps Graeciae et Daniae. Familia eius ex Graecia expulsa in Francia et postea in Britannia vixit.

Russi periegetae in Finniam fluunt

Dies victoriae, qui nono die mensis Maii (9.5.) celebratur, dies festus maximi momenti in Russia est. Tum plurimi periegetae Russi in Finniam ad merces emendas aut ferias agendas veniunt. Hoc anno iam circa Kalendas Maias plus centum milia Russorum Finniam frequentabant et hac septimana totidem venire aestimantur.

(Tuomo Pekkanen)

5.5.17

Quid Trump dixerit

Die Saturni (29.4.) centum dies acti erant, cum Donald Trump Civitatibus Americae Unitis praeesse coepit. Ad honorem eius rei in Pennsilvania orationem habuit, qua initium muneris sui fructuosum descripsit et populum hortatus est, ut ad pugnas magnas et victoriosas se pararet. Idem promisit se brevi decreta ad pactum climaticum Parisiense pertinentia facturum esse. 

(Reijo Pitkäranta)

Propositum Francisci

Papa Franciscus proposuit, ut discrimen inter Coream Septentrionalem et Civitates Americae Unitas ortum per aliquam terram conciliatricem solveretur. Aptissimam ad hoc esse vel Norvegiam, quae rerum condicionem nimis calefactam refrigerare posset. Sententiam suam diurnariis in aeroplano aperuit, cum ex Aegypto in Civitatem Vaticanam rediret. 

(Reijo Pitkäranta)

De rebus Venetiolae

Iam multi menses sunt, cum Venetiola tumultibus vehementibus vexatur. Quam ob rem praesidens Nicolas Maduro oratione Caracis habita sensit, ut civitati nova lex fundamentalis scriberetur. Sperabat fore, ut res publica ea ratione pacaretur et eversio civilis evitaretur. ”Bellum intestinum”, inquit, ”exardescere nolo”. 

(Reijo Pitkäranta)

Hamas mentem mutavit

Ordo islamicus Hamas nuntiavit se mentem ita mutavisse, ut non iam Israelem delendum esse censeret, quamquam illam rem publicam adhuc infitias iret. Nihil impedire, quin de tali Palaestina consultaretur, quae totam regionem historicam non contineret, sed in iis finibus posita esset, quos ante bellum sex dierum habuisset.

(Reijo Pitkäranta)

De societate Altitalia

Alitalia, societas aeria Italica, decoxit. Quam rem administratores comprobaverunt et huic creditum dederunt, ut sex fere menses operam continuare posset. Abhinc plus septuaginta annos condita in veterrimis societatibus nationalibus Europaeis numeratur. Duodecim fere milia hominum sub hac operantur, qua de causa Alitalia societas magni momenti apud Italos fuit.

(Satu Tuominen)

De dentibus Finnorum

Dentes Finnorum deteriores fieri videntur, quamquam populus hac re in duas partes dividitur. Sunt, quorum dentes optimae condicionis sint, cum alii curam eorum omnino neglegant. Sanitas oris et dentium magni ponderis esse existimatur, quod valetudo eorum non solum ad salutem generalem, sed etiam ad alios morbos multam vim habet. 

(Reijo Pitkäranta)

Mensis Aprilis frigidus

Tempestas mensis Aprilis in multis regionibus Finlandiae uno vel duobus gradibus Celsianis frigidior erat, quam fieri consuevit. Imbres quoque ultra modum ceciderunt, imprimis in Cajania, ubi copia pluviarum altero tanto maior erat quam fere solet. Huc accedit, quod mense exeunte pleraque loca Finlandiae nivibus obruta erant. 

(Reijo Pitkäranta)

28.4.17

Macron et Le Pen superiors

In comitiis Francorum praesidentialibus, die Dominico (23.4.) factis, ex undecim candidatis superiores discesserunt Emmanuel Macron et Marine Le Pen Frontis Popularis. Macron, relicto regimine socialistarum mense Augusto anni proximi, suum motum politicum condidit, quem nec dextra nec sinistra esse dicit. Altera suffragia, quibus alteruter ex his praesidens eligetur, fient Nonis Maiis (7.5.). Ex demoscopiis Macron tum fautores aliarum partium sibi conciliaturus et viginti fere centesimis (20%) aemulam Le Pen superaturus esse aestimatur. Praesidentatus apud Francos est quinquennis et quinquennio finito praesidens semel tantum recreari potest.

Moderatores Europae eventu comitiorum gaudent

Moderatores Europaei eventu comitiorum gaudebant, quia Emmanuelem Macron, Unioni Europaeae faventem, iam praesidentem futurum habent. Jean-Claude Juncker, praeses Commissionis Europaeae, Federica Mogherini, delegata a rebus exteris Unionis, aliique illi gratulabantur. Martin Schulz, aemulus cancellariae Angelae Merkel, omnes democratas Franciae hortatus est, ut vires coniungerent.

Bursae argentariae crescere coeperunt

Mercatus monetarius ante comitia Francorum vacillabat, quia timebatur, ne Jean-Luc Mélenchon, candidatus Factionis sinistrae, in altera suffragia evaderet et praesidens fieret. Quo timore sublato bursae argentariae in plerisque terris Europaeis magis crescebant quam umquam hoc anno et in mercatu Asiatico valor euronis auctus est.

Difficultates, quibus novus praesidens occurret

Praesidens Francois Hollande apud cives minore gratia valet quam ullus ante eum praesidens Franciae. Causa est, quod quae inter ambitionem promiserat, efficere non potuit. Oeconomiam non recreavit, numerum opere carentium non minuit, sumptus publicos non coercuit. Successor eius eisdem difficultatibus occurret. Maximum problema est, quod incrementum oeconomicum est minus quam in aliis terris maioribus, sicut in Germania, Britannia, USA. Opere destituti sunt plus decem centesimae totius populi et viginti quattuor centesimae iuventutis. Suburbia paupertate, tumultibus, criminalitate laborant, terrorismus cives sollicitat et populus in ditiores et pauperes divisus est.

Corea Septentrionalis minitabunda

Experimenta nuclearia et missilia ballistica Coreae Septentrionalis in Extremo oriente sollicitudinem auxerunt. Minister a rebus exteris Australiae monuit programma nucleare Coreae Septentrionalis esse securitati magnum periculum, cui societas internationalis intervenire deberet. Corea Septentrionalis tum minitabatur se Australiam armis nuclearibus aggressuram esse, nisi illa Americanis adulari desisset. Praesidens Sinarum Xi Jinping cum praesidente Donaldo Trump telephonice collocutus dixit Sinenses velle, ut omnes terrae tales res evitarent, quibus excitatio in paeninsula Corea cresceret. Wang Yi, minister a rebus exteris Sinarum, affirmavit Sinenses proposita sustinere, quibus id ageretur, ut armis nuclearibus in Corea Septentrionali expediendis finis imponeretur.

Tuomo Pekkanen

21.4.17

Pyongyang jubilat

Die Saturni (15.4.) Pyongyang, urbs princeps Coreae Septentrionalis, supellectili militari et magna multitudine hominum laetitia exsultantium abundabat. Tum enim centum quinque anni elapsi erant, cum Kim Il-sung, conditor civitatis, natus est. Caerimonia appropinquante multi peregrini metuebant, ne illi ad iubilaeum augendum experimentum nucleare facerent, sed id non accidit. 

(Reijo Pitkäranta)

Populi scitum Turciae

Die Dominico (16.4.) in Turcia suffragium populi institutum est, quo cives legem de potestate praesidentis valde amplificanda approbaverunt. Clades tamen adversariorum tam exigua erat, ut dici posset populum Turciae in duas partes divisum esse. Post populi scitum praesidens Recep Tayyip Erdogan nuntiavit legem fundamentalem Turciae mutatum iri. Sunt, qui censeant illum mox rerum potiturum esse.

(Reijo Pitkäranta)

De comitiis Britanniae

Die Martis (18.4.) Theresa May, princeps ministra Britanniae, praeter exspectationem civitati comitia parlamentaria praematura in diem octavum mensis Iunii (8.6.) indixit. Ait ita fieri posse, ut consultationes de discessu Britanniae ab Unione Europaea pacate agerentur neque instabilitate rerum politicarum perturbarentur.

(Reijo Pitkäranta)

California non iam sicca

Jerry Brown, gubernator Californiae, nuntiavit siccitatem longissimam exisse. Nam hoc anno imbres hiemales maximi ceciderunt. Status necessitatis propter siccitatem anno bis millesimo quarto decimo (2014) edictus est. Temporibus aridissimis Californiani monebantur, ut usum aquae deminuerent, cum lavarentur et pratum domesticum irrigarent. Multis locis etiam putei exhausti sunt.

(Satu Tuominen)

Alphabetum Latinum

Constat Cazastaniam esse terram, ubi alphabetum Cyrillicum adhibetur, ut Russis quoque moris est. Nunc autem Nursultan Nazarbajev, praesidens Cazastaniae, decrevit, ut in lingua huius civitatis litterae Latinae usu reciperentur. Illam renovationem gradatim ante annum bis millesimum vicesimum quintum (2025) absolutum iri. 

(Reijo Pitkäranta)

Apri Romae cursitant

Apri in viis Romae valde increbruerunt, quod vix verum esse credideris. Attamen commeatui publico iam periculo esse coeperunt. Quam ob rem moderatores urbis moniti sunt, ut huic malo mederentur: una cum administris regionalibus et aliis magistratibus rationes invenirent, quibus numerus aprorum media urbe cursitantium coerceretur.

(Reijo Pitkäranta)

Avena agricolis accepta

Avena sativa apud agricolas Finlandiae magna gratia esse coepit. Copia enim eius ex agris exarata iam vim secalis fere aequiperat. Neque tamen eundem favorem nondum assecuta est ac triticum, quod e generibus frumenti apud nos plurimum valet. Una e causis, cur avena tantopere percrebruerit, videtur esse, quod facilis ad colendum est.

14.4.17

Apud Finnos Dominica palmarum (9.4.) comitia communalia facta sunt. Maximum numerum votorum accepit Factio conservativa (20,7%), quam sequebantur Democratae sociales (19,4%), Factio centralis (17,5), Prasini (12,4%), Finni fundamentales (8%), Factio sinistra (8%), Factio popularis Suetica (4,9%), Democratae Christiani (4,1%). Plurimum aucti sunt Prasini, maximam cladem acceperunt Finni fundamentales. Inter omnes candidatos maximum suffragiorum numerum, scilicet duodetriginta milia centum viginti quinque (28 125), tulit Jan Vapaavuori Factionis conservativae, qui veri similiter a consilio communali Helsinkiensi burgimagister urbis Helsinki creabitur. Conservativi enim comitiis factis in Consilio maximum delegatorum numerum habent, a quibus burgimagister eligetur.

Autocarrus in turbam hominum Holmiae invectus

Die Veneris (7.4.) homo Usbekistanus autocarro, quem media urbe Stockholmia furto rapuerat, in turbam hominum et denique in parietem pantopolii invectus est. Quo ictu terroristico quattuor homines mortui sunt, quindecim vulnerati, ex quibus octo in nosocomio manent. Auctor stragis eodem die deprehensus est. Est nomine Rahmat Akilov, pater quattuor filiorum, cuius familia in Usbekistania adhuc habitat. In Suetiam anno bis millesimo quarto decimo (2014) venerat et permissionem commorandi petiverat. Quae illi anno praeterito negata est. Iussus est, ut intra quattuor septimanas ex Suetia exiret, quod non fecit sed latitavit. Pelliculas ordinis Isis in Facebook distribuerat et colloquia de explosivis cum sodalibus illius ordinis habuerat. Strage facta dolebat, quod res sibi bene non contigisset, quia satis multos homines non occidisset. Interrogatoribus scelus confessus est et se contentum esse affirmavit, quia fecisset, quod voluisset.

Missilia circumvagantia ab Americanis in Syriam missa

Americani iussu praesidentis Donaldi Trump missilibus circumvagantibus in Syriam impetum fecerunt, de quo Russiam praemonuerant. Undesexaginta missilia Tomahawk ex navibus longis Americanis, in orientali parte Maris Mediterranei navigantibus, missa sunt. Meta missilium erat statio Shayrat exercitus aerii praesidentis al-Assad, quae iacet prope urbem Homs. Impetus factus est, ut usus armorum chemicorum coerceretur. Est enim causa suspicandi illa arma exitialia a moderatoribus Syriae adhibita esse. Nam die Martis (4.5.) in Idlib, provinciam Syriae, impetus gaso sarino factus erat, quo plus octoginta homines, inter quos multi infantes, perierunt. Foederati ictum Americanorum in Syriam factum probaverunt, in his Britannia, Francia, Iaponia, Germania, Turcia, Arabia Saudiana. At Russia et Irania impetum damnaverunt. Russia flagitavit, ut Consilium Securitatis Nationum Unitarum convocaretur. Sinenses autem, etsi usum armorum chemicorum damnaverunt, sperant fore, ut in bello Syriaco moderatio habeatur.

Tuomo Pekkanen

7.4.17

Ictus teroristicus

Die Lunae (3.4.) post meridiem in media urbe Petropoli ictus terroristicus factus est. In tramine subterraneo bomba displosa est, cuius vis tanta erat, ut quattuordecim homines occiderentur et amplius quinquaginta vulnerarentur. Agebatur de aggressione suicidiali, ut magistratus postea confirmaverunt. Post stragem ferrivia subterranea totius urbis clausa est et mille ducenti homines loco discedere iussi sunt. Petropoli tridui tempus lugendi indictum est.

(Reijo Pitkäranta)

Quid Trump dixerit

Donald Trump, praesidens Civitatum Americae Unitarum, collegae suo Russo Vladimir Putin dolorem suum ob ictum terroristicum Petropoli factum expressit. Inter se consenserunt necesse esse, ut adversus terrorismum viribus coniunctis strenue pugnaretur. Trump pollicitus est Russos in hac re ab Americanis omnimodis adiutum iri.

(Reijo Pitkäranta)

Xi Jinping in Finlandia

Die Martis (4.4.) praesidens Sinarum Xi Jinping in Finlandiam venit. In urbe Helsinki eum recepit praesidens Sauli Niinistö cum coniuge. Colloquia praesidentium tam ad rationes politicas et oeconomicas utriusque civitatis quam ad summas res internationales pertinebant. Die Iovis (6.4.) hospes Sinensis iter in Civitates Americae Unitas versus continuavit.

(Reijo Pitkäranta)

Quid Duterte fecerit

Rodrigo Duterte, praesidens Philippinarum, bellum crudelissimum cum mercatoribus narcoticorum gerit. Amplius octo milia hominum vitam amisisse existimantur, postquam ille mense Iunio munus suscepit. Parlamentum Europaeum a Consilio Nationum Unitarum a iuribus humanis postulavit, ut cognosceret, num Duterte in suos saeviens iura humana violaret.

(Reijo Pitkäranta)

Quid Venetiis acciderit

Vigiles publici Italiani Venetiis tres viros comprehenderunt, qui se pontem Rialto explosuros esse minati erant. Magistratus narraverunt viros captos e Kosovia legaliter in Italiam immigravisse sensimque in fautores ordinis Isis conversos esse. Rialto, qui ex pontibus Venetiarum veterrimus et clarissimus est, cotidie multa centena hominum ad se allicit.

(Saara Honkanen)

De tutatoribus pacis

Kalendis Aprilibus (1.4.) circiter centum sexaginta novi milites Finlandenses paci tuendae in Libano officium suum praestare coeperunt. Propositum est, ut copiis Francogallorum adiuncti ibi per quattuor menses stipendia mererent. In praesenti in Libano omnino trecenti quadraginta tutatores pacis Finlandenses militant.

(Reijo Pitkäranta)

De eiulatu infantium

Infantes in Britannia, Canada Italiaque nati primis duabus septimanis plus plorant quam in aliis terris industrialibus fieri solet. Singulis diebus enim, si plurimum, quinas horas eiulant. Minimum autem, scilicet cotidie nonnisi semihoram, vagiunt neonati Dani, Germani, Iaponienses. Hoc ex investigatione In Britannia divulgata patet.

(Reijo Pitkäranta)

31.3.17

Vetus Pactum Romanum

Die Saturni sive die vicesimo quinto mensis Martii (25.3.) sexaginta anni a Pacto Romano divulgato elapsi erant. Illa conventione factum est, ut Communitas oeconomica Europaea oreretur et aetas mercatus communis initium caperet. Unio Europaea, qualis hodie est, anno millesimo nongentesimo nonagesimo secundo (1992) nata esse existimatur: tum enim tractatus Maastrichtensis approbatus est.

(Reijo Pitkäranta)

Novum Edictum Romanum

Septimana vergente principes viginti septem civitatum Unionis Europaeae Romam convenerunt, ut memoriam Pacti Romani recolerent. Eodem tempore edicto subscripserunt, quo se obligaverunt, ut iter Europaeum una continuarent eundem cursum tenentes. Caerimonia in Capitolio acta est eaque in iisdem aedibus, ubi Pactum Romanum sexaginta annis ante editum erat. 

(Reijo Pitkäranta)

Discessus Britanniae

Theresa May, princeps ministra Britanniae, Londinii litteris subscripsit, quibus Britanniam a societate Unionis Europaeae discessuram esse nuntiatur. Quod documentum Bruxellas delatum est, ubi Donald Tusk, praeses Consilii Europaei id officialiter recepit. Saltem biennii tempore opus esse aestimatur, antequam omnes res ad discedendum pertinentes expeditae erunt.

(Reijo Pitkäranta)

Trump cladem accepit

Donald Trump, praesidens Civitatum Americae Unitarum, moderatores factionis republicanorum hortatus est, ne rogatio sua de cura sanitaria renovanda in congressu tractaretur. Id ideo fecit, quod verisimile erat novam legem suffragio repudiatum iri. Quae cum ita sint, pristina lex sanitaria, Obamacare vulgo dicta, etiam posthac valebit.

(Reijo Pitkäranta)

Navalnyi deprehensus

In diversis partibus Russiae cives magna multitudine in vias et plateas congregati sunt corruptioni publicae reclamitantes. Cum talis conventus popularis Moscuae fieret, Alexei Navalnyi, dux partium regimini oppositarum inter multos alios a custodibus publicis deprehensus est. Constat eum eo tendere, ut comitiis proximo anno futuris praesidens Russiae eligatur.

(Reijo Pitkäranta)

Norvegia asylum dedit

Norvegia multis praefectis militum Turciae asylum dedit. Qui enim, postquam seditio mense Iulio in Turcia facta male successit, in exsilium ierunt. In patriam redire recusant, cum Turcae a Norvegis petiverint, ut illos remitterent. Ministerium Turcicum a rebus exteris decretum asyli graviter ferens legatum Norvegiae ad se vocavit, ut eum alloqueretur.

(Satu Tuominen)

Novum nomen aeriportus

Aeriportus internationalis Materiae, quae vulgo Madeira dicitur, nomen novum accepit. Inde a die Mercurii proxime praeterito Christiano Ronaldo appellatur ex lusore pedifollico celeberrimo in illa insula nato. Iam antea in honorem eius ibidem statua posita, museum institutum, deversorium erectum est. 

(Reijo Pitkäranta)

24.3.17

Carnes inquinatae de Brasilia exportatae

Vigiles Brasiliani patefecerunt productores carnis per multos annos largitione magistratus et politicos corrupisse, ne exportatio carnis inquinatae ab illis impediretur. Brasilia bubulam et pecus volatile in plus centum quinquaginta terras exportat, etiam in Unionem Europaeam.

Praesidens Brasiliae Michel Temer affirmavit scandalum tantum ad minimam partem exportationis carnium pertinere. De abusu quidem unum et viginti instituta suspici, sed ex his tantum sex carnes his sexaginta diebus exportavisse. Praeterea ex undecim milibus inspectorum non plures quam triginta tres esse, qui de crimine inquirerentur. Praesidens Temer affirmavit se qualitati carnis Brasilianae confidere.

Inundationes in Peruvia continuantur

Inundationes perniciosae, quibus dimidia pars Peruviae laborat, adhuc duas per septimanas duraturae esse existimantur. Causa calamitatis est insolita temperatura superficiei Oceani Pacifici, quae partim sex gradus ascendit. Simile phaenomenon centum fere annis ante visum est. Temperatura aucta largos imbres effecit, quibus multa milia domorum deleta sunt.

Papa de maritis ad sacerdotium probandis deliberat

Papa Franciscus dixit se paratum esse de maritis ad sacerdotium probandis deliberare. Una ex causis est, quod in ecclesia catholica sacerdotes deficiunt. Mutationi, de qua summus pontifex deliberat, multi ecclesiastici veri similiter obsistent. Neque tamen illa mutatio, si facta erit, sacerdotibus iam consecratis licentiam uxorem ducendi conferet.

Erdogan poenam capitis restituturus

Recep Tayyip Erdogan, praesidens Turciae, poenam capitis restituere vult. Die Sabbati (18.3.) dixit se exspectaturum esse, ut post plebis scitum, die sexto decimo mensis Aprilis (16.4.) futurum, parlamento Turcorum restitutio capitis poenae placeret. Turci enim proximo mense de nova lege fundamentali suffragabuntur, qua potestas praesidentis augetur.

Erdogan addidit se illi legi sine ulla dubitatione subscripturum esse. Anno bis millesimo quarto (2004) Turcia poena capitis abstitit. Commissio Europaea iterum iterumque Turciam hortata est, ne poenam capitis restitueret. Si id factum esset, consultationes de Turcia in Unionem Europaeam asciscenda finitum iri.

Dies natalis Minnae Canth, dies aequalitatis

Minna Canth (1844-1897) fuit scriptrix Finlandensis, quae operibus suis condicionem feminarum et educationem magnopere promovit. Dies eius natalis, undevicesimus mensis Martii (19.3.), dies aequalitatis nominatur et vexillis expositis commemoratur, quem honorem adhuc illa sola ex feminis Finlandensibus accepit.

In operibus eius excellunt decem fabulae scaenicae. In illis vitam pauperum et praecipue feminarum describere voluit. Stilus eius realisticus omnibus non placuit, sed homines, de quibus narravit, et condiciones, in quibus vivebant, penitus cognoverat. Die scriptricis natali praesidens Sauli Niinistö cum coniuge urbem Kuopio, ubi Minna Canth scholam frequentavit, visitavit et concentui memoriali adfuit.

Tuomo Pekkanen.

17.3.17

De suffragiis Hollandiae

Idibus Martiis (15.3.) in Hollandia comitia parlamentaria habita sunt. Et domi et foris multi intenti exspectabant, qualem successum factio populistica ’Libertas’ et eius praeses Geert Wilders habituri essent. Suffragiis numeratis apparuit partes ministri principis Mark Rutte victoriam reportavisse, cum e sedibus amplius triginta sibi conciliavissent. Wildersiani autem nonnisi undeviginti locis parlamentaribus potiti cladem acceperunt. 

(Reijo Pitkäranta)

Park munus deposuit

Iudicium constitutionale Coreae Meridianae de praesidente civitatis amovenda sententiam dedit. Confirmavit crimen delicti in munere commissi, quod parlamentum ei antea intulerat. Praesidens Park Geun-hye, cum amplae corruptioni interfuisse convicta esset, munus deponere coacta est. 

(Reijo Pitkäranta)

Rixa Turco-Hollandica

Inter Hollandiam et Turciam rixa vehementissima orta est. Accidit enim, ut Mevlet Cavusoglu, minister Turciae a rebus exteris, intra fines Hollandiae ingredi vetaretur. Is enim in animo habebat Roterodami orationem habere, qua Turcis in Hollandia habitantibus novam legem fundamentalem defenderet. Aditu prohibitus tanta ira incensus est, ut Hollandiam domicilium fascistarum appellaret.

(Reijo Pitkäranta)

Nova arma Russiae

Ex praetorio exercitus Civitatum Americae Unitarum nuntiatum est Russiam nova missilia circumvagantia mediae distantiae usu recepisse. Americani dicunt regimen Russiae talibus armis, ut quae membris Confoederationis Atlanticae immineant, pacta internationalia de armis imminuendis violare. Quales actiones contrarias praesidens Donald Trump praeparet, nondum pro certo constat.

(Saara Honkanen)

Lutetia purior fiet

Anne Hidalgo, praefecta Lutetiae Parisiorum, consilium decies partitum proposuit, quo urbs mundior et purior redderetur. Sesquialtera milio euronum in novis muscipulis comparandis collocabitur, ut ratti deleantur. Huc accedit, quod ad eiectamenta colligenda in viis et plateis plura excipula purgatoria ponentur et ad usum fumatorum in locis publicis maior cinerariorum copia suppeditetur. 

(Reijo Pitkäranta)

De historia Finlandiae

Fides Christiana in Finlandiam iam saeculo nono advenisse videtur sive ducentis fere annis prius quam antea aestimatum est. Id inde conici potest, quod mortui iam tunc ad orientem versus fere sepeliebantur, cum pagani in sepulturis signa Solis et Lunae observarent. Novus ritus ex investigatione aero-archaeologica apparet, quam Marianna Ridderstad ex Universitate Helsinkiensi nuper divulgavit.

(Reijo Pitkäranta)

Merkel doctrix h.c.

Ordo philosophorum Universitatis Helsinkiensis mense Maio promotionem sollemnem celebrabit. Inter doctores philosophiae honoris causa erit Angela Merkel, cancellaria confoederalis Germaniae. Neque tamen ad caerimoniam venire poterit, sed dignitatem cum diplomate et aliis insignibus absens recipiet.

(Reijo Pitkäranta)

10.3.17

Fiducia in scridatoribus Finnis restituta

Ludi mundani scridationis, in urbe Lahti per duodecim dies (22.2.-5.3.) celebrati, fiduciam Finnorum in scridatoribus suis restituit. Nostri quinque nomismata ceperunt, scilicet unum aureum, unum argenteum, tria aënea. Cursus quinquaginta chiliometrorum, quod certamen principale scridationis habetur, die Dominico ludos clausit. Primus quidem in metam venit Alex Harvey Canadensis et secundus Sergei Ustjugov Russus, sed Matti Heikkinen, aëneo nomismate praemiatus, omnes Suecos et Norvegos, qui acerrimi aemuli sunt Finnorum, superavit. Etiam feminae Finlandenses, inter quas Kerttu Niskanen, Krista Pärmäkoski, Aino-Kaisa Saarinen excellebant, magna cum laude rem gesserunt.

Timo Soini praesidatu absistet

Timo Soini, qui viginti annos factioni Finnorum fundamentalium praefuit, nuntiavit se nolle denuo praesidatum petere. Novus praeses factionis in conventu mense Iunio (10-11.6.) futuro creabitur. In comitiis parlamentaribus anno bis millesimo undecimo (2011) factio Finnorum fundamentalium magnam victoriam reportavit et quattuor annis post (2015) Soini minister rerum exterarum factus est.

Sinenses inquinationem coërcebunt

Sinenses hac hieme pessima inquinatione aëris laboraverunt. Li Keqiang, primus minister Sinarum, in sessione parlamenti inaugurali de inquinatione in patria gravescente locutus est. Pollicitus est Sinenses investiones in pura energia aucturos et eos qui inquinarent, punituros esse. “Caelum denuo caeruleum faciemus”, affirmavit.

Trump Obamam accusat

Donald Trump, praesidens Americanorum, praedecessorem suum Barack Obama multis nuntiis per servitium Twitter missis accusavit, quod ille telephonemata sua inter ambitionem praesidentialem clam auscultavisset. Id factum esse in aedificio Trump Tower, quod possidet. At nemo asseverationem praesidentis affirmavit neque ipse dixit, unde de tali auscultatione comperisset. 

Ben Rhodes, adiutor pristini praesidentis, illas accusationes indignabatur et per Twitter respondit: Fieri non posse, ut praesidens Americanorum, quivis esset, auscultationem clandestinam mandaret. Quam restrictionem ideo factam esse, ut cives ab hominibus praesidenti Trump similibus tueretur.

Hospites ex caupona effugerunt

In vico Bembibre Hispaniae factum est, ut circiter centum viginti hospites, qui ad baptismum celebrandum in cauponam convenerant, nummis pro cena non solutis inopinanter exirent et autoraedis celerrime effugerent. Prima et secunda fercula multis cum vinis iam sumpserant sed ministratoribus bellaria apparantibus repente disparuerunt. Cauponarius damnum duorum milium euronum cepit, etsi hospites, qui cenam falso nomine reservaverant, in antecessum nongentos eurones solverant. Erant, ut cauponarius autumat, ex Europa orientali oriundi. El País, acta diurna Hispanica, narrat in cauponis et thermopoliis Hispaniae fraudes et rapinas quinta quaque minuta fieri.

3.3.17

Quid Trump dixerit

Donald Trump, praesidens Civitatum Americae Unitarum, sumptus defensionis nationales amplius quinquaginta miliardis dollariorum aucturus est. Ait id ad securitatem Americanorum praestandam factum iri. Is, dum consilium suum historicum describit, se etiam de variis operibus publicis curaturum esse promisit, cum plus pecuniae vel in viis et pontibus aedificandis consumeretur.

(Reijo Pitkäranta)

Syri non puniuntur

Consilium securitatis Nationum Unitarum de sanctionibus Syriae imponendis suffragatum est. Lex accepta non est, quod duae civitates sociae, scilicet Russia et Sinae, quae ius vetandi habebant, eam repudiaverunt. Rogatio a Britannis et Francogallis facta eo spectabat, ut Syri usus armorum chemicorum poenas darent.

(Reijo Pitkäranta)

Exercitium militare

Die Lunae (27.2.) classis Iraniae in Freto Hormusio, quod Sinum Persicum a Sinu Omaniensi dirimit, exercitium militare biduanum suscepit. Agitur de prima exercitatione post praesidentem Americanorum mutatum. Cohors revolutionaria, quacum Americani conflictus in illa regione habuerunt, illi exercitio non interfuit.

(Reijo Pitkäranta)

De vi superbacterii

Bacterium potentissimum, superbacterium vulgo dictum, quod in pecore et cibo invenitur, valetudinem hominum animaliumque periculo committit. Ex relatione Unionis Europaeae apparet viginti quinque milia hominum in regione Unionis illo quotannis mori. Usus antibioticorum nimius efficit, ut bacteria huius generis cooriantur. Quae cum etiam valentiora fiunt, morbos curare difficilius est.

(Satu Tuominen)

Finni Unionis fautores

Tres partes populi Finlandiae tam Unioni Monetali Europaeae (EMU) quam pecuniae communi, qui euro dicitur, favere videntur. Censent enim Unionem sibi occasionem opportunam praebere, ut in Europa libere peregrinentur ibique studia exerceant et opus faciant. Solliciti tamen sunt de rebus ad immigrationem pertinentibus nec non de condicione oeconomiae publicae.

(Reijo Pitkäranta)

Apri in Finlandia crebri

Numerus aprorum annis proxime praeteritis in Finlandia multiplex factus est. In praesenti in silvis nostris eorum duo aut etiam tria milia habitant, ut magistratus feris bestiis curandis arbitrantur. Neque incrementum horum animalium prohiberi potuit, quamquam venatio eorum facilior reddita est et etiam alia consilia ad multitudinem eorum deminuendam inita sunt.

(Reijo Pitkäranta)

Iivo Niskanen victor

In urbe Lahti ludi mundani scridationis ad finem vergunt. Die Mercurii (1.3.) de principatu cursus quindecim chiliometrorum certatum est. Victoriam cum magno suo et suorum gaudio reportavit Iivo Niskanen, scridator Finlandensis viginti quinque annos natus, cum adversarios Norvegos Martin Sundby et Niklas Dyrhaug manifeste superavit.

(Reijo Pitkäranta)

Nuntii Latini 3.3.2017

24.2.17

De consilio Monacensi

Septimana vergente Monaci, in urbe Germaniae, conventus securitatis internationalis institutus est, cui magna multitudo principum civitatum interfuit. Ante omnia responsum ad quaestionem exspectabatur, quid Donald Trump, praesidens Americanorum, de defensione Europae et de rationibus inter nationes praepotentes intercedentibus cogitaret. Interrogabatur enim, possetne fieri, ut Europaei cum Americanis etiam posthac vinculis fidei et societatis coniungantur. 

(Reijo Pitkäranta)

Quid Mike Pence dixerit

Orationem a parte Americanorum in conventu Monacensi habuit Mike Pence, vicepraesidens Civitatum Americae Unitarum. Is nomine praesidentis Trump verba faciens ait dubium non esse, quin Americani cum Confoederatione Atlantica firmiter starent et postero quoque tempore staturi essent. Necesse tamen esse, ut civitates sociae plus pecuniae ad communes sumptus necessarios conferrent.

(Reijo Pitkäranta)

Proelium de Mausilio

Exercitus Iraquiae una cum copiis confoederatorum urbem Mausilium (vulgo Mosul) ex potestate ordinis Isis liberare parat. Hoc proelium longum et crudelissimum fore videtur. Restant enim in urbe adhuc circiter duo milia bellatorum illius ordinis, qui sedes et stationes suas contra vim maiorem tenacissime defensuri esse existimantur. 

(Reijo Pitkäranta)

Pacipoli reclamitatur

Pacipoli, in capite Boliviae, cultores fruticis cocae (Erythroxylum coca) cum custodibus publicis violenter conflixerunt. Die Martis centum quinquaginta fere homines administris reclamitantes deprehensi sunt, quippe qui in vigiles dynamiten, materiam pyrotechnicam, lapidesque iactavissent. Ira incensi sunt, quod regimen praesidentis Evo Morales cultum cocae circumscribere vult. 

(Reijo Pitkäranta)

Saepes turris Eiffelianae

Turris Eiffeliana Parisiensis inde ab aestate praeterita humili saepimento metallico cingitur. Autumno autem proxime futuro in loco eius saepes vitrea et glandibus impervia aedificabitur. Omnibus, qui illam turrim obituri sunt, inspectio securitatis subeunda est. Quae rationes ad facinora terroristica avertenda spectant.

(Reijo Pitkäranta)

Gemina civitas Finnica

In Finlandia gemina civitas militum et magistratuum, qui munera magna obeunt, multam disceptationem movet. Jarmo Lindberg, imperator exercitus, de hac re interrogatus, aestimare noluit periculum, quod securitati nationali a gemina civitate impenderet. Dixit tamen se timere, ne res publicae alienae opinionibus Finnorum negotia patriae secreta tractantium moderari possent.

(Saara Honkanen)

Ludi scridandi in Lahti

In praesenti in urbe Lahti, quae in Finlandia est, de principatu mundano scridandi certatur. His ludis, qui ex uno et viginti generibus certaminum constant, paene septingenti athletae ex sexaginta fere civitatibus oriundi intersunt. Certamina die quinto mensis Martii (5.3.) finem capient. 

(Reijo Pitkäranta)

17.2.17

De experiment missilium

Pridie Idus Februarias (12.2.) multo mane accidit, ut Corea Septentrionalis experimentum missilium mediocris distantiae faceret. De re narravit Sedes Coreana nuntiis divulgandis, quae illum conatum prospere successisse descripsit. Ipse dux civitatis Kim Jong-un experimentum in mare Iaponicum directum suis oculis secutus esse dicitur.

(Reijo Pitkäranta)

Kim Jong-nam interfectus

Kim Jong-nam, frater dictatoris Coreae Septentrionalis eodem patre natus, in aeriportu Cualae Lumpuriae inter sicarios occisus est. Quomodo vitam amiserit, non ita perspicuum est, sed sunt, qui dicant eum a duabus feminis petitum acubus venenatis aut liquore erodenti interfectum esse. Is, cum tyrannidem fratris Kim Jong-un reprehendisset, vitae suae metuens patria profugerat.

(Reijo Pitkäranta)

Steinmeier novus praesidens

Novus praesidens foederalis Germaniae electus est Frank-Walter Steinmeier, pristinus minister a rebus exteris et fautor factionis democratarum socialium. Ille vir unum et sexaginta annos natus suffragio in conventu foederali facto sibi tres partes sententiarum conciliavit. Joachim Gauck, praesidens hodiernus, propter aetatem provectam recusaverat, quominus munus denuo peteret.

(Reijo Pitkäranta)

Tubus petrolearius Dacotae

In Dacota Septentrionali Civitatum Americae Unitarum discordia de tubo petroleario faciendo orta est. Opera eius intermissa sunt, cum populus indigenarum nomine Standung Rock Sioux diceret tubum perniciosum et suis aquis et locis sacris fore. Iam multi anni sunt, cum aborigines tubo ducendo reclamitant. Constat praesidentem Donals Trump opera aedificandi maturavisse.

(Satu Tuominen)

Malmoea urbs famosa facta

Malmoea, urbs in Suetia meridiana sita, propter numerum homicidiorum valde auctum famosa esse coepit. Anno proximo singulis fere mensibus in viis eius caedes facta est, et hoc anno ineunte ibidem iam tres iuvenes occisi sunt. Dubium non esse videtur, quin illa scelera criminalitati ordinatae tribuenda sint.

(Reijo Pitkäranta)

De diebus festis Venetianis

Sollemnia antequadragesimalia, quae vulgo carnevalia dicuntur, die undecimo mensis Februarii (11.2.) Venetiis initium ceperunt. Primus eventus maioris momenti erat Festum Venetianum sic dictum: tum videres inter alia, ut cymbae variis coloribus ornatae Canalem Magnum pernavigarent. Feriae huius generis Venetiis iam saeculo duodecimo celebrari coeptae sunt.

(Reijo Pitkäranta)

De munere pastoris ovium

Mirum quam multi cives Finlandiae pastores ovium fieri volunt. Nam paene quinque milia hominum, cum audissent talem locum operandi in viridariis nationalibus vacare, se petitioni dederunt. Greges ovium custodire eo spectat, ut haec pecora bene valeant et, dum per herbas pascuntur, naturam puram putam teneant.

(Reijo Pitkäranta)

10.2.17

Die nationalis Samorum

In communi Inari, quod maxime septentrionale est Finniae, Sami sive Lappones die Lunae (6.2.) festum nationale celebrabant. Hoc anno causa fuit specialis, nam ante centum annos (6.2.1917) in urbe Norvegiae Nidrosia sive Trondheim primus conventus erat, ex quo cooperatio Samorum in Norvegia, Suetia, Finnia Russiaque habitantium iniit. Festum cooperationis Samorum saecularis Nidrosiae praesente Haraldo VI, rege Norvegiae, celebrabatur. In Finnia Sami circiter decem milia numerantur, ex quibus plus sexaginta centesimae extra Lapponiam, maxime in regione Helsinkiensi habitant. Omnino in terris septentrionalibus sunt paene centum milia Samorum, plurimi in Norvegia.

Elisabeth II annum sapphirinum celebravit

Regina Elisabeth II diutius quam quisquam ante in Britannia regnavit. Cum rex Georgius VI die sexto mensis Februarii anno millesimo nongentesimo quinquagesimo secundo (6.2.1952) mortuus esset, Elisabeth in regnum ascendit neque in toto terrarum orbe hodie alius monarcha tamdiu quam illa potestatem regiam tenet. Regina, quae mense Aprili (21.4.) nonaginta annos complevit, diem festum in palatio Sandringham tranquillo egit, sed anniversarium eius in variis Britanniae partibus celebrabatur. Annus festus sexagesimus quintus appellatur annus sapphirinus ideoque domus regia efficiem reginae pingendam curavit, in qua illa ornamenta habet sapphirina.

Navis Romana amphoris onerata prope Maioricam reperta

Apud insulam Cabreram, quae a Maiorica (vulgo Mallorca) minus viginti chiliometra distat, in profunditate septuaginta metrorum navis Romana amphoris onerata reperta est. Res est singularis, quia amphorae, quae prope duo milia numerantur, sunt integrae et intactae. Continere putantur garum, condimentum de piscibus factum, quod Romani amabant. Pleraeque amphorae sunt longitudine unius metri et veri similiter ex Africa septentrionali portabantur. Minores amphorae forsitan ex Lusitania meridionali veniebant. Navis, quae in fundo maris sub amphoris iacet, est viginti fere metra longa. Inter Africam septentrionalem et Hispaniam, forsitan etiam Galliam, commeavit et apud insulas Baleares tempestate orta naufragavit.

Balaena moribunda in litus Norvegiae navit

Apud urbem Bergen Norvegiae nuper factum est, ut balaena (zool. Ziphius cavirostradis) ad litus nataret, quamvis siphonarii saepius illam in altum mare ducere frustra conarentur. Male se habebat, iamiam moribunda. Cum in institutum investigationis portata esset, investigatores ventrem eius aperuerunt. Ibi triginta fere sacculos plasticos aliamque materiam plasticam invenerunt, qua intestina obstructa erant. Balaena erat solito levior et in intestinis eius nullus cibus inerat. Causa mortis videntur esse reliquiae plasticae a hominibus in mare iactae, quas balaena pro cibo habens devoraverat.

Tuomo Pekkanen

3.2.17

Quid Niinistö dixerit

Donald Trump, novus praesidens Americanorum, edixit, ut cives septem terrarum musulmanarum aditu in Civitates Americae Unitas prohiberentur. Sauli Niinistö, collega eius Finlandensis, illud decretum vehementer reprehendit dicens nefas esse homines propter genus aut nationem nota ignominiae imprimere. Id et iuri gentium et moribus occidentalibus maxime repugnare. 

(Reijo Pitkäranta)

Designatio iudicis

Praesidens Donald Trump participem iudicii supremi Civitatum Americae Unitarum iudicem Neil Gorsuch designavit. Qui vir undequinquaginta annos natus et plane conservativus habitus antea in iudicio appellatorio munus obibat. Praesidens candidatum suum hominem mentis sanae et iuris consultissimum descripsit, qui dignus esset, ut tam a democratis quam a republicanis approbaretur.

(Reijo Pitkäranta)

Ictus in terroristas

Die Mercurii (1.2.) mane custodes publici Germaniae Francofurti, Darmstadii, Visbadae alibique magnum impetum antiterroristicum fecerunt. Qua actione, cui amplius mille vigiles interfuerunt, rete terroristicum longe lateque diffusum deletum est. Ita magistratibus contigit, ut aggressio nationi funestissima, quam grex ille islamitarum parabat, feliciter praeveniretur. 

(Reijo Pitkäranta)

Hiems maribus mitis

Hiems in orbe Arctoi hoc anno tam mitis fuit, ut non multum abesset, quin Mare Balticum glacie omnino careret. Navigatio tamen hiemalis difficultatibus non carebat, nam mensis Ianuarius ventosissimus erat. In Mari Bothnico auxilio navium glacifragarum nonnumquam opus erat, cum glacies flatibus Favonii propulsae ex litoribus Suetiae in oram Finlandiae constiparentur.

(Reijo Pitkäranta)

Partus in Finlandia

Anno proxime praeterito in Finlandia numerus civium mortuorum aliquatenus maior erat quam neonatorum, quod numquam ante in pace accidit. Iam septimus annus est, cum partus apud nos decrescunt. Neque tamen numerus incolarum propter eam rem deminutus est, immo vero quindecim fere milibus auctus. Id immigrationi tribuendum est.

(Reijo Pitkäranta)

De cibis salubribus

Diaeta mediterranea ad salutem provehendam multum conferre dicitur. Quae quamvis ita sint, etiam iis cibis, quos incolae terrarum septentrionalium libenter edunt, magna vis medicatrix inesse videtur. Ut ex investigatione in Dania divulgata videre licet, in talibus alimentis salubribus numerantur piscis, puls avenacea, panis secalicius, bulbi herbarum, brassica, malum. 

(Reijo Pitkäranta)

Qualis sit memoria felis

Feles in probationibus memoriae aeque ac canes se expediunt, quod ex investigatione in universitate Kiotensi in Iaponia facta patet. Apparuit feles casus iucundos memoriae infigere posse et recordatione eorum in condicionibus novis recte agere valere. Investigatores nunc credunt felem, canem, hominem facultatem similem habere eventa memoria tenendi.

(Saara Honkanen)

27.1.17

Trump in munere constitutus

Donald Trump, quadragesimus quintus praesidens Civitatum Unitarum Americae, in munere solitis caerimoniis Washingtoniae (20.1.) constitutus est. Sollemnia inaugurationis officio divino in ecclesia S. Johannis (St. John’s) celebrato incohata sunt. Iure iurando apud Capitolium sive aedes congressus ante meridiem praestito Trump orationem habuit. Eadem argumenta, quae inter ambitionem praesidentialem protulerat, in inaugurali oratione repetivit: se pro populo contra optimates pugnare; summam potestatem non tantum ab una factione alteri translatam sed ex urbe Washingtonia populo restitutam esse; hucusque patriam suam ceteras nationes locupletavisse; posthac autem exactione vectigalium imprimis familias et societates mercatorias Americanas tuendas esse. Denique promisit se sedes operum et opes Americanis reportaturum esse. "Facimus", inquit, "ut homines ex tutela sociali in opera facienda restituamus." Orationem sententia ex ambitione ipsius praesidentiali nota conclusit: "Americam rursus magnam facimus."

De numero praesentium dissensio

Praesidens Trump censet inter inaugurationem suam apud Capitolium quindecies centena milia hominum adfuisse. Photographemata autem ex aere facta ostendunt multitudinem fuisse aliquot centenorum milium, quod est tertia fere pars ex eis, qui anno bis millesimo nono (2009) inaugurationem praesidentis Obamae spectaverunt.

Ingentes contra Trump reclamationes

Postridie diei inaugurationis reclamationes contra praesidentem Trump et regimen eius in centenis urbibus Americanis et in variis mundi partibus institutae sunt. Frequentissimas protestationes defensores iurum feminarum convocaverant. Maxima turba convenerat Washingtoniae, ubi circiter quingenta milia hominum, imprimis feminarum, pro iustitia sociali reclamitaverunt.

Labina nivium deversorium in Italia delevit

Deversorium Rigopiano, quod iacet prope oppidum Farindolam in regione Abrutiensi prope montem Grande Italiae Saxum (vulgo Gran Sasso d’Italiae), die Mercurii (18.1.) labina nivium obrutum est, cum hospites et operarii ibi habitantes exspectabant, ut propter motus terrae regionem quatientes inde deportarentur. Nives altissimae lineas electricas et telephonicas interruperant atque vias ita obstruxerant, ut auxilia non ante quam sequenti die advenirent. Erant in deversorio duodetriginta hospites et duodecim operarii vel ministratores. Ex his undecim homines superstites evaserunt, undetriginta mortui sunt.

Panis secalicius – cibus Finnorum nationalis

Suffragio autumno anni proximi facto, Finni decreverunt, ut cibus nationalis Finniae, annum centesimum independentiae celebrantis, esset panis ex secali factus. Secundum locum obtinuit assum Carelicum, quod carnibus suinis et bovinis mixtis in furno assatur. Sententiam in suffragio rogati sunt circiter quinquaginta milia civium.

(Tuomo Pekkanen)

20.1.17

Praesidatus Melitae

Anno vergente praesidatus Unionis Europaeae ad regimen Melitae transiit. Argumenta, quae tempore semestri proxime futuro potissimum tractabuntur, ad quaestiones immigrandi nec non ad mercatum Unionis internum pertinent. Id quoque summa vi agetur, ut fides civium in Unionem Europaeam restituatur. 

(Reijo Pitkäranta)

Oratio Theresae May

Theresa May, princeps ministra Britanniae, negavit patriam suam, cum ex Unione Europaea exisset, in mercatu eiusdem interno mansuram esse. Ait Britanniam eo tendere, ut pactionem de libera mercatura quam maxime posset amplam cum Unione iniret. Immigrationem autem talem esse debere, ut summo bono publico Britanniae prodesset. 

(Reijo Pitkäranta)

De valoribus Europaeis

Sergei Lavrov, minister Russiae a rebus exteris, colloquio diurnariis peregrinis dato valores occidentalium hodiernos valde reprehendit. ”Eae res”, inquit, ”quas Europaei in praesenti plurimi ducunt et quae ubique laudantur, non eaedem sunt, quas maiores et patres eorum sequebantur. Sunt enim mores novi et mutati, tales, quos postchristianos appellaveris”. 

(Reijo Pitkäranta)

Quid Obama fecerit

Chelsea Manning, qui ante sexum mutatum Bradley Manning appellabatur, iam mense Maio e carcere liberabitur. Constat illum hominem, cum ingentem documentorum clandestinorum copiam paginis interretialibus Wikileaks prodidisset, vinculis triginta quinque annorum damnatum esse. Praesidens Barack Obama tamen paulo ante, quam munus deposuit, ei veniam facti concessit.

(Reijo Pitkäranta)

Imbres in California

Incolae Californiae his diebus imbribus et nivibus, quae ibi urceatim ceciderunt, valde gavisi sunt. Id ideo fecerunt, quod civitas eorum iam diu siccitate pessime laborat. Sunt enim ibi regiones, ubi quinque aut etiam decem annis pluviae omnino fere defuerunt. Itaque mirum non est tempestates nuperrime coortas civibus acceptissimas fuisse. 

(Reijo Pitkäranta)

De pontibus viarum

Aliquot pontes in viis publicis Finlandiae erecti solito infirmiores se praebuerunt, ut ex inspectionibus fortuitis his sex annis factis apparet. Utrum hoc malum calcestro parum valido tribuendum sit an neglegentiae eorum, qui operibus muniendis praefuerunt, nondum constat. Illi pontes, quamvis ex aliqua parte vitiosi, tamen viatoribus tuti esse dicuntur. 

(Reijo Pitkäranta)

Lupi iam ante portas

Lupi in Finlandia etiam propius urbem Helsinki in conspectum veniunt. Namque inscipiunt, num spatium gregis novi generandi inveniatur, ut ex Societate naturae tuendae Finlandiae dicitur. Semper quidem pro certo non haberi potest, utrum de vestigiis lupi an canis agatur. Lupi soli errantes plerumque catuli sunt, qui nidum suum reliquerunt.

(Satu Tuominen)

13.1.17

Ater annus maris Mediterranei

Anno bis millesimo sexto decimo (2016) plus quinque milia profugorum in Mari Mediterraneo interierunt. Quod plus est quam umquam ante. Causa numeri victimarum crescentis habentur pessimae condiciones barcarum et nova consilia portitorum clandestinorum, qui laborem salvatorum difficiliorem faciunt, cum multas barcas simul in mare mittunt.

Antonio Guterres secretarius generalis NU

Antonio Guterres, olim primus minister Portugalliae, a Kalendis Ianuariis munere secretarii generalis Nationum Unitarum fungitur. Secretariatus est quinquennis neque idem secretarius diutius quam duo quinquennia in munere manere potest. Oratione, quam conventui generali Nationum Unitarum habuit, Guterres promisit se illum ordinem mundanum renovaturum esse.

Russiam comitiis Americanorum intervenisse

Servitia explorationis Americana relationem publicaverunt, ex qua Russia comitiis praesidentialibus Americanorum intervenire studebat, ut Donald Trump praesidens designaretur. Ad hoc efficiendum operationes interretiarias et varia instrumenta informationis statalia a Russis mandatu praesidentis Putin adhibita esse. Russia infitiatur id factum esse. Donald Trump de hac re interrogatus nuntiavit Russiam, Sinas aliasque quasdam terras vel greges hominum id quidem egisse, ut retia informationis Americanorum invaderent, sed ad exitum comitiorum nullam vim habuisse, quia suffragium electronicum intactum mansisset. Itaque dici non potest Donaldum Trump auxilio Russiae vicisse.

Obama abiturus, Trump venturus

Praesidens Barack Obama die Martis (10.1.) Chicagiae orationem valedictoriam habuit. Laudavit democratiam et eos, qui pro iuribus civilibus pugnaverunt. Res gestas praesidentatus sui recensuit et affirmavit patriam esse meliorem quam antea fuisset. Donald Trump die vicesimo mensis currentis (20.1.) munus praesidentis suscipiet. Barack et Michelle Obama sibi domum in urbe Washington paraverunt, ubi imprimis propter scholas et studia filiarum habitabunt. Habent autem Chicagiae fundationem, quae ibi Bibliothecam praesidentialem (Barack Obama Presidential Center) una cum Universitate Chicagiensi aedificat. Illud centrum anno bis millesimo vicesimo aut vicesimo primo (2020/21) perfectum iri putatur.

Europa frigore, Thailandia pluviis laborat

Tempestates nivosae et acria frigora homines in variis Europae partibus temptaverunt. His diebus plus triginta homines frigore acuto perierunt. In Polonia fuit frigus quattuordecim graduum Celsianorum, in vico Helvetico Le Brevine triginta, itemque Moscuae. Nives partes medias Italiae operuerunt et in Turcia quoque commeatum publicum obstruxerunt. In Thailandia autem pluviae insolitae et continuae effecerunt diluvia, quibus multa milia vicorum afflictantur. Plus minus septingenta milia hominum in regione diluviosa habitare aestimantur. Superficies aquae passim ad tecta domorum surrexit. Tempestates et pluviae proximis diebus in Birmaniam transire exspectantur.

(Tuomo Pekkanen)

30.12.16

Annus centesimus Finniae independentis

Anno bis millesimo septimo decimo (2017) Finnia independentiam saecularem celebrat. Festivitates, quae circiter duobus milibus inceptis constant, per totum annum tam in patria quam peregre instituentur. Finnia, olim pars regni Suecorum, anno millesimo octingentesimo nono (1809) factus est autonomus Magnus Ducatus imperii Russiae. Mense Decembri anno millesimo nongentesimo septimo decimo (1917), rebus in Russia inter bellum mundanum eversis et imperatore ex potestate expulso, Finnia se civitatem independentem declaravit, quod a parlamento Finnorum postridie Nonas Decembres (6.12.1917) probatum est. Annis sequentibus pleraeque nationes Finniam independentem agnoverunt.

Aeroplanum in Pontum Euxinum praecipitavit

Aeroplanum Russicum die Nativitatis (25.12.) multo mane in Pontum Euxinum praecipitavit. Portavit nonaginta duos homines, qui omnes in calamitate perierunt. Aeroplanum a Moscua profectum in aerodromum Adler-Sotši descenderat, unde iter in Syriam pergeret. Sed paulo post, quam inde avolavit, causa adhuc incognita ex radar disparuit. Ex viatoribus plus sexaginta quinque erant membra celeberrimi chori exercitus Russici, qui in stationem aeroplanorum Russiae prope Latakiam, oppidum Syriae, sitam iter intendebant, ut ibi in festivitatibus novi anni cantarent. Praesidens Vladimir Putin iussit, ut die Sancti Stephani (26.12.) luctus publicus in tota Russia esset.

Auctor stragis Berolinensis deprehensus et occisus

Iuvenis Tunisinus, qui Berolini nuper autocineto onerario in multitudinem hominum irruens magnam stragem fecerat, post fugam quadriduam die Veneris (23.12.) Mediolani a custodibus publicis deprehensus et occisus est. Erat nomine Anis Amri, natione Tunisinus, qui per Franciam in Italiam tramine iter fecerat. Cum duo custodes iuvenem retinuissent et petivissent, ut chartam identitatis ostenderet, ille pistolio ex pera extracto custodem in humerum vulneravit. Tum alter ex custodibus illum pistolio occidit. Amri iam antequam in Germaniam profectus est, in Italia tres annos et dimidium in carcere fuerat.

Gepardus prope emoriturus

Ex novissima investigatione internationali gepardus (zool. Acinonyx iubatus), velocissimum in mundo animal terrestre, est iam prope emoriturus. In natura adhuc tantum septem milia centum (7100) gepardi restant. Maior pars populationis per sex terras Africae meridionalis dispersa vivit, in Irania minus quinquaginta restare aestimantur. Magnum gepardis periculum est venatio clandestina et commercium pullorum. Pullus gepardus vivus in mercatu clandestino etiam decem milibus dollarorum constare potest. Inter hos decem annos ex Africa mille ducenti gepardi pulli clam exportati esse aestimantur, ex quibus maior pars in itinere perierunt.

(Tuomo Pekkanen)

23.12.16

Strages Berolini facta

Die Lunae (19.12.) vesperi in media urbe Berolino ictus terroristicus gravissimus factus est. In regione enim Charlottenburg accidit, ut autocinetum onerarium in multitudinem in forum natalicium congregatam tanta vi irrueret, ut duodecim homines vitam amitterent et quinquaginta fere vulnerarentur. Neque abest suspicio, quin iuvenis quidam Tunesiensis viginti trium annorum illud facinus perpetraverit.

(Reijo Pitkäranta)

Merkel nationi locuta

Angela Merkel, cancellaria foederalis Germaniae, se una cum propinquis et amicis eorum, qui strage Berolinensi mortui erant, dolere dixit. Se nolle Germanos metu malitiae deprimi. ”Etiam hac hora difficillima”, inquit, ”nobis vis invenienda est talem vitam vivendi, qualem eam esse volumus, scilicet liberam et apertam”. 

(Reijo Pitkäranta)

De regimine Poloniae

Commissio Unionis Europaeae de statu democratiae et rerum forensium in Polonia sollicita est. Quam ob rem ad regimen eius litteras misit, ad quas ei duobus mensibus respondendum est. Factio Poloniae administratrix leges perferendas curavit, quae operae iudicii constitutionalis obesse existimantur. Insuper opinio est aditum diurnariorum in parlamentum difficiliorem factum esse. 

(Reijo Pitkäranta)

Quid Obama de se dixerit

Barack Obama, praesidens Americanorum munus mox depositurus, conventum ultimum diurnariis edocendis habuit. Inter eum summam rerum a se his octo annis gestarum proposuit. Ait se eo, quod praesidens effecisset, contentum esse: oeconomiam nationalem in incremento esse et inopiam quaestus omni tempore decrescere. Id unum se graviter ferre, quod Amerícani admodum nihil pro Syria facere potuissent.

(Reijo Pitkäranta)

Res Sudaniae Meridionalis

Consilium securitatis Nationum Unitarum decrevit, ut actio paci in Sudania Meridionali tuendae uno anno continuaretur. Quae civitas e potestate Sudaniae liberata anno bis millesimo undecimo (2011) sui iuris facta est, donec biennio post in bellum civile ruit. In causa erant discordiae inter praesidentem et vicepraesidentem ortae. 

(Reijo Pitkäranta)

Putin auctoritate valet

Vladimir Putin, praesidens Russiae, vir maximae auctoritatis mundi est, ut ex indice annuo commentariorum Forbes apparet. Donald Trump, praesidens Civitatum Americae Unitarum designatus locum secundum obtinet, tertium autem Angela Merkel, cancellaria foederalis Germaniae.

(Satu Tuominen)

De aurifodinis Finlandiae

Pretium auri iam per quinque annos in mercatu iacet. Quo factum est, ut etiam auri fodinae, quae in Finlandia sunt, minus quaestuosae esse inciperent. Iam duo auri metalla portas omnino claudere coacta sunt. Melius res se in paroechia Kittilä habent, ubi auraria in Europa omnium maxima sita est.

(Reijo Pitkäranta)

16.12.16

Trump et Niinistö telephonice colloquebantur

Donald Trump, praesidens designatus Americanorum, nuper (8.12.) praesidentem rei publicae Finniae Sauli Niinistö telephonice appellavit. Argumenta colloquii erant relationes Finniae et USA, Russia atque Consilium Arcticum, cuius praesidatus ab Americanis primo vere Finnis transferetur. Denique Trump Finnos laudavit dicens eos esse populum magnificum (“great people”).

Sipilä et Medvedev Uloae convenerunt

Primus minister Russiae Dmitri Medvedev et Juha Sipilä, primus minister Finniae, in urbe Uloa (vulgo Oulu) die Veneris (9.12.) convenerunt. Colloquebantur de commercio aliisque rebus oeconomicis atque de mutuis relationibus. Tractabatur inter alia gasiductus Nord Stream 2, quem Russi ex Russia in Germaniam ducere volunt. Sermo erat etiam de capulo telecommunicativo, quod sub Oceano Glaciali per iter septentrionale-orientale telecommunicationem Europae et Asiae coniungeret. In colloquio utrique primo ministro placuit, ut Finnia domum Petropoli sitam emeret, in qua Institutum Finniae Petropolitanum et schola Finnica sedem habent.

Dies iurum humanorum

Dies internationalis iurum humanorum decimo mensis Decembris die (10.12.) quotannis celebratur sive eo die, quo conventus generalis Nationum Unitarum universalem de iuribus humanis declarationem anno millesimo nongentesimo duodequinquagesimo (1948) probavit. Ex hac declaratione quivis iura profugi, immigratoris, invalidi aut hominis cuiuslibet minoritatis defendere potest.

Productio petrolei restringitur

Mense Novembri Opec sive Ordo terrarum petroleum exportantium consensit, ut productionem petrolei duodecies centenis milibus (1,2 milionibus) barilium singulis diebus restringeret. Propositum erat copiam petrolei in mercatu deminuere et pretium eius augere. Itemque undecim terrae, quae in Opec non sunt, de productione diurna quingentis quinquaginta milibus (550.000) barilium restringenda nuperrime (10.12.) constituerunt. Pactum ab initio novi anni (2017) minime sex menses valebit. Quo factum est, ut pretium petrolei in mercatu mundano statim circiter quindecim centesimis auctum est. Hac septimana pretium petrolei Maris Germanici pro barili est plus quinquaginta sex dollara, cum mense Ianuario duodetriginta fuerit.

Saara Aalto in certamine X Factor secunda

Saara Aalto, cantatrix Finlandiensis, in certamine X factor televisionis Britannicae secundum locum obtinuit. Alter in certamen finale admissus fuit Matt Terry Britannus, qui suffragio Britannorum palmam reportavit, cum in ultimo suffragio duodequinquaginta centesimas (48,5%) sententiarum accepit, Saara Aalto quadraginta (40,4%). In televisione Finnica plus quam tredecies centena hominum milia (1,3 miliones) certamen finale spectavisse aestimantur, qui quidem ius suffragii non habebant. In Britannia spectatores quinque miliones et dimidium fuisse dicuntur. Certamine finito Saara Aalto competitori Matt Terry gratulabatur et se exitu contentam esse affirmavit.

(Tuomo Pekkanen)

9.12.16

Strages in urbe imatra

His diebus animi Finlandensium commoti sunt homicidio triplici in urbe Imatra nocte diei Dominici (4.12.) facto. Tum enim accidit, ut tres feminae ex taberna exeuntes sclopeto crudelissime occiderentur. Una e mortuis erat praeses delegatorum eiusdem urbis. Perpetrator caedium, iuvenis quidam viginti tres annos natus, statim deprehensus est. Cur autem illam stragem fecerit, nondum constat.

(Reijo Pitkäranta)

De sorte urbis Aleppo

Pars antiqua urbis Aleppo in potestatem exercitus Syriae redacta est. Copiae regiminis, postquam impetus in eas regiones facere coeperunt, omnes vicos, quos bellatores seditiosi obtinebant, sibi expugnaverunt. Pars vetus urbis Aleppo, quae bello civili Syriaco gravissima damna accepit, in patrimoniis totius orbis numeratur.

(Reijo Pitkäranta)

Quid Putin dixerit

Vladimir Putin, praesidens Russiae, orationem annuam de condicione patriae habuit, in qua vires nationis valde laudavit. Ministros suos hortatus est, ut rationem oeconomiae nationalis firmandae nulla mora interposita componerent. Quod ad res externas attinet, asseveravit Russos velle tensiones internationales lenire et relationes amicissimas ad Occidentem colere.

(Saara Honkanen)

Renzi munus deposuit

Matteo Renzi, princeps minister Italiae, munus deposuit et eodem tempore totum regimen eius cecidit. In causa est, quod rogatio eius de lege fundamentali renovanda et de potentia senatus deminuenda suffragio populi antiquata est. Quam evidens plebiscitum fuerit, inde apparet, quod sexaginta fere centesimae civium renovationi adversabantur.

(Reijo Pitkäranta)

Van der Bellen victor

Comitiis praesidentialibus in Austria iterum factis praesidens foederalis electus est Alexander Van der Bellen, candidatus prasinorum septuaginta duos annos natus. Is enim sententiarum multo maiorem partem sibi conciliavit. Adversarius eius Norbert Hofer, praeses partium dextimarum, quae Factio libertatis appellatur, cladem acerbissimam accepit.

(Reijo Pitkäranta)

Calendarium peculiare

Europol, ordo custodum publicorum Europae, inde a Kalendis Decembribus (1.12.) calendarium natalicium peculiare divulgat. In fenestris enim eius homines scelesti in Europa maxime quaesiti in publicum proponuntur ac quidem ita, ut cotidie imago novi fugitivi in locum prioris succedat. Omnes, qui calendario recipiuntur, scelera gravissima ut homicidia et delicta terroristica commiserunt.

(Reijo Pitkäranta)

Pertussis valde aucta

Numerus civium pertussi laborantium hoc anno in Finlandia trecentorum undeoctoginta fecit, quae multitudo duplo maior est quam anno praeterito. Agitur de inflammatione a bacteriis effecta, cuius signa principalia sunt difficultas respirandi et tusses impetuosae. Hic morbus imprimis infantibus periculosus, quin etiam capitalis esse potest.

(Reijo Pitkäranta)

2.12.16

Fidel Castro mortuus est

Fidel Castro, dux revolutionis Cubanorum, nonagenarius diem obiit supremum. Cubae paene quinquaginta annos praefuit. Ordo rebellium, quem condidit, anno millesimo nongentesimo undesexagesimo (1959) generalem Fulgencio Batista deposuit et Habanam expugnavit. Fuit primus minister (1959-1976) et praesidens (1976-2008), donec summam potestatem fratri Raúl tradidit. Fautores eum liberatorem Cubae habent, adversarii autem accusabant, quod oppositionem oppressit. Regimen Castronis operam dedit, ut omnes legere et scribere discerent, atque curam valetudinis melioravit. Ditiores autem Cubani spe decepti patriam reliquerunt, cum Castro bona eorum publicare coepisset et se marxistam esse pronuntiaret. Etiam societates Americanas et possessiones illarum socializavit atque relationes cum Unione Sovietica artiores iunxit. USA autem consuetudines in Cubam dirupit et Castronem ex potestate expellere et iterum iterumque insidiose occidere frustra conabatur. Neque ante quam anno bis millesimo quarto decimo (2014) Cuba et USA relationes mutuas restituere coeperunt. 

Anno millesimo nongentesimo sexagesimo secundo (1962) haud procul aberat, quin bellum nucleare oreretur, cum Castro Unioni Sovieticae permisisset, ut missilia nuclearia in Cuba collocaret. Discrimen finitum est, cum Unio Sovietica missilia ex Cuba deportavit et USA sua ex Turcia.

Fillon candidatus praesidentialis

In comitiis praeliminaribus Republicanorum Francorum candidatus praesidentialis creatus est François Fillon. Ex quo sequitur, ut ille in comitiis praesidentialibus post quinque menses futuris contra socialistas et extremam dextram certet. Iam veri simile videtur certamen de praesidentatu Franciae inter François Fillon et Marine Le Pen futurum esse.

Erdogan minitabundus

Praesidens Turciae Erdogan minitabatur se fugitivos, qui in Turcia essent, in Europam missurum esse, si consultationes de societate Turciae ab Unione Europaea adhuc tardatae essent. Has minas Erdogan postridie eius diei protulit, quo Parlamento Europaeo placuerat, ut illae consultationes interrumperentur. 

Parlamentum Europaeum censet Turciam usque longius a semita sua Europaea aberrare, cum purgationes politicas et immoderatas oppressiones post seditionem aestate factam susceperit. Constat in Turcia his mensibus plus centum milia civium deprehensa aut ex munere amota esse. Praeterea multa instrumenta communicativa clausa sunt et complures ordines civiles vetiti.

Tenebrae in Lappiam venerunt

In Nuorgam, qui vicus est maxime septentrionalis in Lapponia Finniae, die Veneris vicesimo quinto mensis Novembris (25.11.), tenebrae hiemales inceperunt. Sol supra horizonta ante diem septimum decimum mensis Ianuarii (17.1.) non surget. Neque res est iniucunda, nam sole deficiente Aurora borealis, Luna stellaeque terras nive tectas satis illuminant.

Tuomo Pekkanen

25.11.16

Trump mentem mutavit

Praesidens Americanorum designatus Donald Trump aliquot promissiones et minas, quas populum ambiens fecerat, revocare coepit. Hillary Clinton non iam de abusu cursus electronici accusatur neque ob eam rem in ius vocabitur. Ante comitia praesidentialia Trump se curaturum esse dictitabat, ut Hillary propter epistulas suas electronicas suspectas in vincula coniceretur. Etiam de rebus climaticis mentem mutavisse videtur.

(Reijo Pitkäranta)

Merkel nomen suum dedit

Angela Merkel, cancellaria foederalis Germaniae ter, ad electionem quartam aspirare constituit. Concessit decretum de candidatu difficillimum fuisse: ad extremum tamen se nomen dedisse, cum officium suum esse sentiret, ut patriae tempore arduo prodesset et unitati Germaniae consuleret. 

(Reijo Pitkäranta)

Murus limitaneus Hungariae

In confinio Hungariae et Serbiae saepimentum ductum est, quod eo spectat, ut profugi et immigrantes finibus arceantur. Quod opus metallicum tria metra altum et decem chiliometra longum captivis Hungaris construendum datum erat. Saepes illa ad limitem custodiendum nova technologia tam exquisita utitur, ut cives eum murum ingeniosum appellent.

(Reijo Pitkäranta)

Erdogan rectores nominat

Praesidens Turciae Recep Tayyip Erdogan potentia sua extraordinaria usus etiam rectores magnificos universitatum ad suum arbitrium eligere coepit. Hoc vel in Universitate Bosporica factum est, cuius rector quidam Mehmed Ozkan, quamvis inter candidatos non esset, a praesidente nominatus est. In Turcia omnino centum octoginta fere universitates sunt.

(Reijo Pitkäranta)

Antibiotica vim perdunt

Efficientia remediorum antibioticorum annis proxime praeteritis in Europa valde deminuta est, ut e Sede Unionis Europaeae a morbis infectiosis (ECDC) refertur. Eodem tempore bacteria, quae iis resistere possunt, novas vires recuperaverunt. Si antibiotica vigorem pristinum amittunt, metuendum est, ne salus hominum, securitas ciborum, progessus civitatum in periculum vocentur.

(Reijo Pitkäranta)

De Palatio Buckingham

Palatium Buckingham, domus reginae Britanniae et familiae eius, magna renovatione eget. Quod mirum non est, si respicis fistulas aquarias, fila electrica, apparatus calefaciendi harum aedium paulo post alterum bellum mundanum refecta esse. Sumptus restitutionis quadringentas quinquaginta fere miliones euronum efficient. Pecunia ex populo vectigali erogabitur.

(Reijo Pitkäranta)

Finlandia terra visu digna

Acta diurna a re viaria magni momenti nomine National Geographic Traveler Finlandiam in optimis terris visu dignis numerant. Dicunt eam viatoribus optime convenire, quod ibi voluptatem ex natura, tranquillitate, viridariis nationalibus capere possint. Etiam Lonely Planet, domus editoria librorum itinerariorum, eam unam e terris peregrinatoribus acceptissimis laudat. 

(Satu Tuominen)

18.11.16

Cives contra praesidentem designatum reclamitaverunt

Comitiis praesidentialibus in USA factis cives in multis partibus contra Donaldum Trump reclamitaverunt. Maximae turbae erant in Miamia, Atlanta, Philadelphia, Neo-Eboraci, Angelopoli, Oregonia, Colorato. Reclamatores de iuribus civilibus sollicitabantur et dicebant se adesse, ut illos sustinerent, qui pro suis vitae condicionibus timerent.

Trump immigratores illegales expulsurus

Donald Trump, praesidens designatus, affirmavit se tres miliones immigratorum illegalium quam primum ex USA expulsurum esse. Exempli gratia homines, qui crimina commisissent aut in gregibus nefariis interessent, expulsum iri. Addidit maximi esse limitem inter Mexicum et USA ita condensare, ut clam non superaretur. Ideo se murum in limite Mexici ducturum esse. 

Ambiguum autem est, utrum de vero muro in toto limite ducendo an de saepimento alicuius generis in quibusdam partibus praetendendo cogitaverit. Severior politica immigrationis erat unum ex argumentis principalibus, quae Trump in ambitione praesidentiali repetebat.

Hodorkovski Helsinkii conventum habuit

Mihail Hodorkovski, pristinus oligarchus et unus ex notissimis adversariis praesidentis Putin, ad finem septimanae Helsinkium venit, ubi conventum communicativum ordinis sui “Russia Aperta” habuit. Hodorkovski, qui in Helvetia et Britannia exsul vivit, id agit, ut democratia et iura humana in Russia in melius mutentur. Praeterea motus “Russia Aperta” operam dat, ut res diurnaria et investigatores meliores operandi possibilitates in Russia habeant. Aderant in conventu septuaginta quinque repraesentatores oppositionis Russiae. Hodorkovski, qui credit magnas in Russia mutationes annis proximis futuras esse, monuit ordinem suum non esse factionem politicam.

Ictus Parisienses commemorati

Die Dominico (13.11.) ictus terroristici Parisiis commemorabantur, in quibus anno ante centum triginta homines mortui atque complures centeni vulnerati sunt. Maior pars victimarum inter concentum periit, qui in odeo Bataclan fiebat. Die anniversario Sting, cantor Britannicus, ibidem concentum commemorativum familiaribus victimarum dedit.

Leonard Cohen obiit

Leonard Cohen, poeta et musicus Canadensis, Angelopoli (7.11.2016) octoginta duos annos natus mortuus est. Diu aegrotaverat et infirma fuerat valetudine, sed causa mortis a familiaribus nondum est palam facta.

Divulgavit tredecim libros sed imprimis ut musicus per orbem terrarum notuit. Ultimum album cantionum eius est “You Want It Darker”, quod ante tres septimanas publicatum est. Notissimum est etiam carmen “Hallelujah”. Textus, quos scripsit atque voce gravi et rauca interpretabatur, sunt profundi et ambigui, interdum etiam difficiles. In Finnia septies concentum publicum dedit.

(Tuomo Pekkanen)

11.11.16

Trump praesidens electus

Novus praesidens Civitatum Americae Unitarum designatus est Donald Trump, candidatus factionis republicanorum septuaginta annos natus. Comitiis enim praesidentialibus die Martis (9.11.) habitis amplius ducentos septuaginta (270) electores sibi conciliavit. Hillary Clinton, adversaria eius democrata, quam multi rerum periti victricem fore praedixerant, cladem acerbissimam accepit. Trump etiam in civitatibus Florida, Ohio, Carolina Septentrionali, ubi favor utriusque candidati aequalis fere erat, victoriam reportavit. 

(Reijo Pitkäranta)

Quid Donald Trum dixerit

Donald Trump, postquam eventus suffragii innotuit, oratione habita se praesidentem totius populi futurum esse confirmavit: iam tempus esse Americanos vulneribus discordiae obligatis in unam nationem coalescere. Experientiam, quam e rebus negotialibus sibi assumpsisset, ad summum bonum publicum provehendum adhibitum iri. In rebus internationalibus gerendis se societates, non conflictus, expetiturum esse.

(Reijo Pitkäranta)

Sauli Niinistö gratulatus

Praesidens Finlandiae Sauli Niinistö, ut complures alii principes civitatum, futuro collegae Americano Donald Trump omnia fausta precatus est. Monuit praesidentem Civitatum Americae Unitarum apud omnes gentes et potentia et auctoritate plurimum valere. Speravit fore, ut relationes inter Finlandiam et Civitates Americae Unitas intercedentes quam optimae servarentur. 

(Reijo Pitkäranta)

Pollutiones urbis Delii

Septimana vergente scholae Delii, capitis Indiae, tres dies clausae erant propter pollutiones aerias illam urbem velantes. Minister ei regioni praepositus ait rerum condicionem tam difficilem videri, ut ad periculum avertendum consiliis necessitatis opus esset. Incolas hortatus est, ut intra parietes manerent. 

(Reijo Pitkäranta)

De Cypro redintegranda

Praesidentes Cypri, quorum unus parti Graecae, alter Turcicae praeest, consilia de insula redintegranda inire coeperunt. Consultationes pacis eo spectant, ut huic discrimini amplius quadraginta annorum tandem finis fiat. Constat Cyprum anno millesimo nongentesimo septuagesimo quarto (1974) in duas partes divisam esse.

(Reijo Pitkäranta)

Wallenberg mortuus

Raoul Wallenberg, legatus publicus et benefactor Suetus, qui altero bello mundano multa milia Iudaeorum in Hungaria ex persecutionibus nazistarum servavit, nunc a magistratibus Suetis mortuus pronuntiatus est. Nemo certe scit, quando et quo modo vitam amiserit; veri simile autem est eum in carcere Moscuensi brevi post bellum defunctum esse.

(Saara Honkanen)

De curribus electricis

Delegati urbis Tampere currus electricos usu recipere decreverunt. Haec vehicula Tamperensibus nova sunt, sed Helsinkienses iis iam diu utuntur. Propositum est, ut currus in fabrica Caianeburgensi conficerentur et commeatui publico Tamperensi inde ab anno bis millesimo vicesimo primo (2021) inservirent. 

(Reijo Pitkäranta)

4.11.16

In media Italia terra vehementer movebatur

Die Dominico (30.10.) terra in Italia vehementius movebatur quam umquam post annum millesimum nongentesimum octogesimum (1980), quo in Hirpinia circiter tria milia hominum perierunt. Novissimus motus accidit in Media Italia circa urbem Perusiam, sed tremor terrae etiam Romae et prope fines Austriae sentiebatur. Aedificia multis locis corruerunt, sed nemo mortuus est, quia homines prioribus calamitatibus docti praecavere potuerant. Oppidum Nursia (vulgo Norcia), quod proximum epicentro motus iacet, maxima damna accepit. Ex basilica Sancti Benedicti, quarto decimo saeculo constructa, tantum frons suo loco mansit.

Hispania denique regimen habet

Mariano Rajoy, moderator factionis popularis dextrae, denuo creatus est, qui regimini Hispaniae praeesset. Suffragio in camera inferiore parlamenti facto centum septuaginta (170) delegati pro Rajoy, contra eum centum undecim (111) sententiam tulerunt. Cum duodeseptuaginta (68) delegati socialistarum vacuam schedulam dedissent, Rajoy maiorem partem sententiarum habuit. Socialistae divisi sunt, nam septendecim delegati eorum facere non potuerunt, quin contra regimen factionis dextrae suffragarentur. Quia partes politicae inter se consentire non poterant, Hispania a vicesimo die mensis Decembris anni proximi (20.12.2015), id est plus decem menses, sine regimine fuit.

Papa Franciscus Suetiam visit

Papa Franciscus die Lunae (31.10.) in Suetiam venit, ubi anniversarium quingentesimum Reformationis Lutheranae commemoratur. Interfuit caerimoniis oecumenicis in Cathedrali Lundensi celebratis atque urbem Malmö visit. Iubilaeum Reformationis pridie Kalendas Novembres (31.10.2016) iniit, scilicet undequingentis annis post eum diem (31.10.1517), quo Martinus Luther nonaginta theses contra indulgentias pontificias divulgavit. Iter Papae praeparatum erat ab Ecclesia Catholica atque Foederatione Mundi Lutherana (Lutheran World Federation). In Suetia papa moderatores ecclesiae Lutheranae et praesidentem foederationis Munib Younan convenit. Ex Finnia aderat archiepiscopus Kari Mäkinen. Franciscus habetur papa renovator et modestus, qui etiam de minoritatibus sexualibus tractandis sententiam suam palam fecit.

Siccitas Africae meridionalis gravescit

Africa meridionalis siccitate vastissima laborat, cuius causa habetur phaenomenon El Niño appellatum atque mutatio climatis. Calamitas, quae vitam duodeviginti milionum hominum in variis partibus Africae meridionalis viventium afficit, anno proximo ineunte gravissima fiet. In quibusdam partibus Mozambici tribus annis nullae pluviae ceciderunt.

Cur horologia prorsum et retrorsum moventur?

In Unione Europaea nocte Sabbati horologia in horam hiemalem, id est una hora retrorsum mutata sunt. Ultimo autem die Dominico mensis Martii una hora prorsum promovebuntur. In Finnia ita per triginta quinque annos factum est. At nemo pro certo scire videtur, cur hoc fiat. Mutatio horae valetudini est nociva et usus mutationis sunt dubii.

(Tuomo Pekkanen)

28.10.16

Bellum in Iraquia geritur

Hoc tempore bellum crudele non solum in Syria, sed etiam in Iraquia geritur. Hic imprimis de urbe Mosul possidenda vehementer pugnatur, cum copiae regiminis Iraquiae eam a potestate ordinis Isis recuperare conantur. Iam aliquot vicos haud longe a Mosul sitos expugnaverunt, sed ipsa urbe potiri difficile est propter multos laqueos et insidias ibidem collocatas. 

(Reijo Pitkäranta)

De decreto Vallonum

Parlamento regionali Valloniae efficere contigit, ut pactum commerciale, quod inter Unionem Europaeam et Canadam octo annos praeparatum erat, ad irritum redigeretur. Ita cives, qui ne unam quidem centesimam partem Unionis Europaeae faciunt, prohibere potuerunt, ne illud consilium magni momenti perficeretur.

(Reijo Pitkäranta)

De historia Hungariae

Die Dominico (23.10.) sexaginta anni acti erant, cum populus Hungariae regimini communistarum insurgere coepit. Primum quidem Budapestini accidit, ut quinquaginta milia studentium et operariorum ad Aedes parlamenti incederent et renovationes publicas postularent. Paulo post tamen illa rebellio a Russis crudeliter oppressa est, cum carri loricati in vias Budapestini penetraverunt. 

(Reijo Pitkäranta)

Quid Kenyatta edixerit

Uhuru Kenyatta, praesidens Keniae, poenam hominum capitis damnatorum ita mitigavit, ut scelera sua vinculis sempiternis expenderent. Quod edictum ad duo milia septingentos fere captivos pertinere dicitur. Eodem tempore centum duobus civibus, qui poenam diutinam ferebant, libertatem dedit. His decretis factis Kenia propius ad civitates humanas accedere existimatur.

(Reijo Pitkäranta)

Domus Hitleri diruitur

Regimen Austriae domum, ubi Adolfus Hitler natus est, diruendam esse statuit. Quod consilium ideo factum est, ut prohiberetur, ne neonazistae et alii, qui memoriam eius recolerent, ad illum locum adorandum convenirent. Neque hae aedes penitus diruentur, sed placuit fundamenta earum conservare, ut ibidem aliquod aedificium publicum exstrueretur.

(Reijo Pitkäranta)

De natura Finlandiae

Caelum calescere in natura Finlandiae ex herbis mutatis et glaciebus deminutis apparet, ut ex Ordine internationali naturae tuendae (WWF) refertur. Species animalium, quibus nives glaciesque necessariae ad vivendum sunt, praesertim ex temperatura hiemali crescente laborant. In his vel Vulpes arctica et Bubo scandiacus numerantur. Illa plane fere periit, hic nidum nonnisi raro facit.

(Satu Tuominen)

Grex Alandensis victor

Die Dominico (23.10.) patuit, quis ex gregibus pedifollicis Finlandiae hoc anno omnium optimus esset. Victoriam eamque in historia primam reportavit manus Mariae portus Alandensis. Sphaeristae enim eius ex triginta tribus ludis hac aestate factis sibi unum et sexaginta puncta conciliaverunt. 

(Reijo Pitkäranta)

21.10.16

Bhumipol, rex Thailandiae, decessit

Bhumipol Adulyadej, rex Thailandiae, in nosocomio Bancokiensi duodenonaginta annos natus diem obiit supremum. Re nuntiata primus minister luctum unius anni magistratibus imposuit. Cives hortatus est, ut exsultationibus et festis per unum mensem abstinerent eisque suasit, ut nomine patriae alter alterum diligerent.

Bhumipol diutius regnavit quam quisquam ex monarchis orbis terrarum hodiernis. Regnum eius septuaginta annorum mense Iulio (9.6.2016) in Thailandia celebrabatur. Succedit regi Bhumipol princeps hereditarius Vajralongkorn, filius eius unicus trium et sexaginta annorum, qui quidem tanta apud populum gratia non valet quam pater.

Campanae victimis Aleppi pulsantur

Ecclesia Helsinkiensis nuperrime (12.10.) consilium cepit, ut cotidie campanae victimis urbis Aleppo pulsarentur. Mox plus ducentae triginta ecclesiae Finnicae participes huius consilii ("Bells for Aleppo") factae sunt. Postea adiunctae sunt ecclesiae aliarum terrarum, ut Britanniae, Suetiae, Romaniae, Franciae, Germaniae, Estoniae, etiam Australiae et Americae Septentrionalis. Campanae cotidie post meridiem usque ad diem vicesimum quartum mensis currentis (24.10.) pulsabuntur. Tum non tantum dies erit Nationum Unitarum sed celebrabitur etiam dies pacis, iurum humanorum, responsalitatis internationalis. Apud Finnos campanae, quae dicuntur funerales, pulsari solent, cum homo vita defunctus in sepulcrum a proximis portatur.

Nobelista litterarum novi generis

Praemium Nobelianum litterarum ab Academia Suetiae musico populari Bob Dylan communi consilio concessum est. Sara Danius, ab epistulis Academiae, rettulit illum esse magnum poetam, qui in eadem traditione Anglica ire pergeret atque Milton et Blake. Amatores musicae popularis exsultabant, quod lyrica rock tandem pars litterarum humaniorum haberetur.

Dario Fo obiit

Dario Fo, scriptor, histrio, moderator scenarum Italicus, nobelista litterarum anni millesimi nongentesimi septimi (1997), nonaginta annos natus Mediolani decessit eodem die (13.10.), quo Bob Dylan honore Nobeliano ornatus est. Notissimum ex operibus eius est Mysterio Buffo, series soliloquiorum, quae fundamento comoediarum mediaevalium nituntur.

Johaug in excitatione drogaria deprehensa

Therese Johaug, scridatrix Norvega clarissima, quae his annis in omnibus fere certaminibus scridationis ceteras superavit, in excitatione drogaria deprehensa est. Foederatio Scridatoria Norvegiae (Norges Skiforbund) rettulit causam esse unguentum labiorum nomine Trofodermin, in quo clostebolum, steroides anabolicus athletis vetitus inesset.

Alius scridator Norvegus, nuper in drogis deprehensus, est Martin Johnrud Sundby, qui sabutamolum, medicamen asthmaticis praeparatum sed athletis vetitum sumpserat. Illud medicamen, quod respirationem iuvat, maior pars scridatorum Norvegiae, etiam qui asthmate non laborant, adhibere dicuntur. Sunt qui censeant Norvegiam in excitatione drogaria cum DDR iam comparandam esse.

(Tuomo Pekkanen.)

14/10/16

Holmström Nobelista factus

Praemium Nobelianum scientiae oeconomicae hoc anno duobus viris doctis conceditur: quorum unus est Bengt Holmström, professor ex Finlandia oriundus, qui iam diu munus docendi in Instituto technologico Massachusetano (MIT) habet; alter est Oliver Hart, professor Americanus ex universitate Harvardiana. Hoc summo honore afficiuntur, quod de doctrina pactionum investiganda optime sunt meriti.

(Reijo Pitkäranta)

De historia Nobelistarum

Primus Nobelista Finlandensis erat scriptor Frans Emil Sillanpää, qui anno millesimo nongentesimo undequadragesimo (1939) illo praemio decoratus est. Eum excepit sex annis post (1945) Artturi Ilmari Virtanen, vir chemiae peritus. Anno millesimo nongentesimo sexagesimo septimo (1967) Ragnar Granit praemium medicinae tulit. Abhinc octo annos (2008) praesidens Martti Ahtisaari praemio pacis ornatus est.

(Saara Honkanen)

Missilia in Kaliningradum

Russi non negant se missilia ballistica e nota Iskander in regionem Kaliningradum transtulisse. In causa sunt rationes eruditionis, ut ex ministerio defensionis Russiae nuntiatum est: eos, qui in copiis missilium militiam facerent, se in diversis Russiae partibus exercere atque ob eam rem longa itinera tam aere quam mari emetiri. 

(Reijo Pitkäranta)

Secretarius N.U. generalis

Consilium securitatis Nationum Unitarum proposuit, ut novus secretarius generalis eiusdem ordinis crearetur Antonio Guterres. Qui vir sexaginta septem annos natus antea princeps minister Portugalliae fuit, donec anno bismillesimo quinto (2005) parti Nationum Unitarum profugis adiuvandis praeesse coepit. Deinde eo munere undecim annos functus est.

(Reijo Pitkäranta)

Nova praesidens Estoniae

Nova praesidens Estoniae electa est Kersti Kaljulaid, femina quadraginta sex annos nata. Suffragio sexto in parlamento facto ex centum uno votis sibi unum et octoginta conciliavit. Septimana ante inter diversas factiones convenerat, ut Kaljulaid, quae eo tempore Luxemburgi opus faciebat, candidata omnium partium communis nominaretur. 

(Reijo Pitkäranta)

Partus apud nos deminuti

Iam quintus annus est, cum numerus infantium in Finlandia natorum decrescit. Anno praeterito puerperia amplius tribus centesimis deminuta sunt, neque rerum condicionem hoc anno meliorem fieri creditur. Quae cum ita sint, ratione neonatorum habita Finlandia inter Terras septentrionales infimum locum occupat.

(Reijo Pitkäranta)

Olympia aestiva futura

Mense Septembri decernetur, ubi Olympia aestiva anno bis millesimo vicesimo quarto (2024)instituantur. Ex urbibus, quae ius haec certamina ponendi petiverunt, restant tres, sc. Angelopolis, Lutetia Parisiorum, Budapestinum. Roma autem, quae nomen suum antea dederat, hac septimana rogationem renuntiavit, cum Virginia Raggi, praefecta urbi, ei consilio adversaretur.

(Reijo Pitkäranta)

7/10/16

Hungari de rata immigratorum parte sententiam tulerunt

Hungari die Dominico (2.10.) demoscopium habuerunt, in quo interrogatum est: "Visne, ut Unio Europaea Hungariae imperat, ut immigratores recipiat, etiam parlamento Hungariae non probante?" Duodecentum centesimae (98%) suffragantium ratae immigratorum parti obstiterunt. Cum autem pauciores quam dimidia pars (43,9%) ex civibus suffragium habentibus ad urnas venerint, eventus legalis non habetur.

Mapalia apud Caletum demoliuntur

Apud Caletum (vulgo Calais) est campus immigrantium, ubi septem vel etiam decem milia hominum in tuguriis aut mapalibus habitant. Maior pars eorum exspectat, ut occasione oblata in autocarrum clam ascendat, quo per cuniculum in Britanniam transeat. Sperant enim fore, ut ibi meliores vitae condiciones habeant.

Quia peregrini in campo Caletensi degentes tam commeatum publicum quam homines in vicinitate habitantes multis modis perturbant, magistratus iam saepius eos expellere frustra conati sunt. Tumultibus usque crescentibus praesidens Francois Hollande nuper affirmavit mapalia Caletensia ante finem anni dissolutum et incolas eorum in alias Franciae regiones transportatum iri.

Feminae in Carelia DCC annos pace et securitate gaudent

Regnum Suetiae tertio decimo saeculo in Finniam orientalem versus amplificabatur et magnam partem Careliae occupavit, ubi castrum Viburg (a. 1293) constructum est. Leges Suetiae de securitate etiam in Carelia applicari coeptae sunt, quo factum est, ut Birgerus, rex Suecorum, epistulam de securitate feminarum Careliae Latine scriberet. Illa epistula, Kalendis Octobribus anno millesimo trecentesimo sexto decimo (1.10.1316) data, est vetustissimum documentum officiale in Finnia conservatum.

Summa eius haec est: "Mulieres omnes seu feminae nostrae dicioni subiectae, iuxta castrum nostrum Viburg vel in terra Careliae habitantes, sint coniugatae, viduae, continentes aut virgines, plena debent pace et securitate gaudere, sicut in ipso regno nostro Suetiae, in rebus pariter et personis, acerbissima contra transgressores nostra vindicta regia procedente. Quare omnibus et singulis firmiter prohibemus, ne quis mulieres ... iniuriis aliquibus gravare vel molestare praesumat aut ipsis inferre violentiam aliquam corporalem…"

Arbor in Europa vetustissima

Vetustissima in Europa arbor, quae vivit, est pinus mille septuaginta quinque annorum, nomine Pinus heldreichii vel leucodermis, quae in monte Pindo Graeciae septentrionalis crescit. Investigatores illi nomen Adonidis imposuerunt. In eisdem montibus complures aliae quoque arbores inveniuntur, quae mille annos superaverunt.

In orbe terrarum vetustissimae sunt pinus (bot. Pinus aristata) in California et Nevada crescentes, ex quibus quasdam plus quinque milium annorum esse constat. In Finnia septentrionali anno bis millesimo sexto (2006) inventa est pinus septingentorum octoginta annorum, quae crescit in communi Sodankylä prope confinium Russiae.

(Tuomo Pekkanen)

30/9/16

Russi barbarismi accusati

Die Dominico (25.9.) Consilium securitatis ordinis Nationum Unitarum sessionem habuit, in qua res militares a Russis in Syria actae vehementer condemnatae sunt. Matthew Rycroft, legatus Britanniae, eos, cum in cives urbis Aleppo impetus fecissent, facinoris belli accusavit. Samantha Powers, legata Americanorum, Russos ob eandem causam barbaros appellavit. 

(Reijo Pitkäranta)

Shimon Peres mortuus

Shimon Peres, pristinus praesidens Israelis, diem supremum obiit nonaginta tres annos natus. Causa mortis erat haemorrhagia cerebri, qua duabus septimanis ante affectus erat. In multis et magnis meritis eius erat praemium Nobelianum pacis, quod anno millesimo nongentesimo nonagesimo quarto (1994) una cum Jitzhak Rabin et Jasser Arafat accepit.

(Reijo Pitkäranta)

De conventu Alandensi

Ministri principes Terrarum septentrionalium conventum annuum Portu Mariae, in urbe Alandiae, habuerunt. In rebus, quae in colloquiis tractabantur, erant quaestiones de securitate Maris Baltici, de exitu Britanniae ex Unione Europaea, de rationibus, quibus violentia a re publica excluderetur. Id quoque quaerebatur, quonam modo auctoritas Unionis Europaeae corroboraretur.

(Reijo Pitkäranta)

De scalis Hispaniensibus

Romae die Iovis septimanae proximae (22.9.) Gradus Hispanienses restituti celebrabantur. Scalae illae marmoreae saeculo duodevicesimo ineunte aedificatae in clarissimis locis Romae numerantur. Qui gradus, cum pollutione et squalore foedati essent, mense Octobri anni proximi renovari coepti sunt. Opera purgationis perfecta nunc optimae condicionis esse videntur.

(Satu Tuominen)

Factio a iuribus animalium

In Finlandia nova factio politica condita est, cuius est iura animalium defendere. Quot socios iam habeat, nondum constat, sed numerus fautorum omni tempore crescere nuntiatur. Dicunt factionem ad talem societatem spectare, ubi omnibus animantibus ius sit vitam suae speciei propriam vivendi et sua libertate fruendi.

(Reijo Pitkäranta)

Novus piscis suavis

Iam in eo est, ut in forum mercatorium Finlandiae nova species piscis veniat. Agitur de pisce coregono affini, qui Finnice nelma, ab ichthyologis autem Stenodus leucichthys appellatur. Abundat carne alba, quam ob rem ad edendum optimus habetur. In exspectatione est eum in locum salmonis maritimi e Norvegia importati successurum esse.

(Reijo Pitkäranta)

Expositio Helsinkiensis

Museum nationale Finlandiae in praesenti anniversarium centesimum celebrat. Qua re in Museo artis Athenaeo Helsinkiensi expositio operum aetatis artium renatarum inaugurata est. Propositae sunt picturae amplius viginti artificum celeberrimorum, quorum in numero sunt Raffaello et Tiziano. Expositio usque ad diem quintum decimum mensis Ianuarii (15.1.) adiri poterit. 

(Reijo Pitkäranta)

23.9.16

Comitia Russia parlamentaria

In Russia die Dominico (18.9.) comitia facta sunt. Quattuordecim factiones candidatos posuerant, sed tantum quattuor, quae iam ante comitia in parlamento fuerant, in novam Dumam creatae sunt. Russia Unita, factio quae praesidenti Vladimiro Putin favet, plus quinquaginta quattuor centesimas (54,8%) suffragiorum accepit. Ceterae factiones, in parlamentum admissae, sunt Communistae (13,45%), Democratae liberales (13,24%), Russia iusta (6,17%), quae quidem omnes praesidentem Putin sustentant. Ex quo sequitur, ut politica praesidentis etiam fortior quam ante continuetur. Suffragium in comitiis habebant centum undecim miliones civium, ex quibus minus quam dimidia pars (47%) ad urnas venit.

Concordia Bratislaviensis discors

Moderatores Unionis Europaeae nuper (16.9.) in Castellum Bratislaviae convenerunt, ut consulerent, quid de quaestionibus politicis post exitum Britanniae ortis faciendum esset. Quamquam plerique ex eis concordiam Unionis laudaverunt, tam de immigratione quam de politica oeconomica magnae erant inter eos discordiae. Victor Orbán, primus minister Hungariae, conventui Bratislaviensi non contigisse censebat, ut politicam Unionis de immigratione mutaret, quae ingenua et exitiosa esset. Jean Asselborn, minister a rebus exteris Luxemburgensis, iam ante conventum suaserat, ut Hungaria ex Unione Europaea expelleretur. Facile tamen fuit de rebus consentire, cum nihil constituendum esset.

Juncker crimen vinolentiae negat

Jean-Claude Juncker, praeses Commissionis Europaeae, in actis diurnis Francogallicis, quibus nomen est Libération, negavit immoderatum potionum alcoholicarum usum, de quo accusabatur. Dixit forsitan videri potuisse, ut ebrius esset, cum calamitate vehiculari olim vulneratus ambulans titubaret et in scalis epimedion manu teneret.

Alces in commeatu viario periculum

In Finnia cotidie circiter quinae calamitates viariae propter alces accidunt. Maxima frequentia calamitatum est inter menses Septembrem et Decembrem, nam periculum crescit, cum venatio alcium mense Septembri exeunte incipit. Sumptus calamitatum, quae quotannis circiter millena quingena (1500) eveniunt, sunt prope centum milionum euronum. Alces pondus septingentorum chiliogrammatum habere potest. Calamitate facta, si pessimum accidit, animal per vitrum anticum contra vectorem penetrat, qui tum vix vivus evadit, si velocitas est immoderata. In viis, in quibus de periculo alcium signis vialibus monetur, velocitas vehiculorum oportet sit octoginta chiliometrorum horalium aut minus.

Anseres litora Helsinkiensia occupaverunt

Litora Helsinkiensia non vacant, etsi autumnus natatores iam expulit, nam hoc tempore a magnis gregibus avium frequentantur. Inter cygnos aliasque aves aquatiles, ingentes greges anserum albifrontium (Zool. Branta leucopsis) dominantur. Cum anseres excrementis litora prorsus contegant, civibus non displicet, quod iam sunt hiematum abituri.

(Tuomo Pekkanen)

16.9.16

Ignistitium in Syria factum

Pridie Idus Septembres (12.9.) sole occidente in Syria ignistitium septem dierum valere coepit. De re convenerat inter ministrum Americanum John Kerry et collegam eius Russum Sergei Lavrov. Seditiosi moderati et regimen Syriae se illud pactum servaturos esse promiserunt. Islamitae autem extremi, in iis fautores ordinis Isis, recusaverunt, quominus condiciones illius conventionis approbarent.

(Reijo Pitkäranta)

De experimento nucleari

Die Veneris proxime praeterito (9.9.) Corea Septentrionalis experimentum nucleare fecit idque, ut nuntiatum est, bono successu. Constat eam explosionem iam ordine quintam esse et sub imperio dictatoris Kim Jong-un tertiam. Rerum periti Coreae Meridianae novissimum experimentum in illa civitate omnium temporum maximum fuisse aestimant.

(Reijo Pitkäranta)

Memoria ictus terroristici

Die Dominico (11.9.) quindecim anni acti erant ab eo impetu terroristico, qui ictus diei undecimi mensis Septembris appellari solet. Inter sollemnitatem memorialem in urbe New York actam nomina eorum trium milium hominum, qui illa aggressione vitam amiserant, publice recitata sunt. In Washington memoria mortuorum praesidente Barack Obama duce recolebatur.

(Reijo Pitkäranta)

Hillary pneumonia laborat

Hillary Clinton, candidata praesidentialis democratarum, in pneumoniam incidisse reperta est, quam ob rem populum ambire paulisper destitit. Valetudo eius die Dominico (11.9.) Americanis sollicitudini esse coepit: tum enim nausea laborans sollemnitatem memorialem, cuius mentionem supra fecimus, in medio relinquere coacta est.

(Reijo Pitkäranta)

Suetia neutrali [sic]remanebit

Regimen Suetiae politicam defensionis suam mutare non meditatur, ut Margot Wallström, ministra a rebus exteris Suetiae, nuper confirmavit relatione de securitate civitatis divulgata. Dixit Suetiam neutralitate fovenda, viribus augendis, cooperatione internationali corroboranda tutam servatum iri. Factiones dextras accusavit, quod societatem Confoederationis Atlanticae appetentes de re severissima iocarentur.

(Saara Honkanen)

Tauromachiis resistitur

Die Saturni magna multitudo Hispanorum in urbem Matritum convenit flagitans, ut tauromachiis in Hispania instituendis tandem finis fieret. Sunt, qui censeant pro probro nationali habendum esse boves per cruciatus occidere. Adversarii ludorum iam impetraverunt, ne faces ardentes ad cornua boum alligarentur. Ex interrogationibus patet maiorem partem Hispanorum tauromachiis resistere.

(Reijo Pitkäranta)

Solitudines decrescunt

Loca solitudinum, quae in orbe terrarum inveniuntur, his viginti quinque annis circiter decima parte deminuta sunt. Solitudo definitur regio oecologice intacta et effectu hominis omnino fere carens, sed ubi aborigines vivere possunt. Maxima damna acceperunt silvae pluviales in Amazonia sitae: ibi enim natura integra aream milionis chiliometrorum quadratorum amisit.

(Reijo Pitkäranta)

9.9.16

Sinenses et Americani Conventionem super mutatione climatis confirmaverunt

Primum Sinenses deinde Americani die Sabbati (3.9.) se Conventionem super mutatione climatis ratam habere nuntiaverunt. Inter ducentas fere terras mense Decembri anni proximi (2015) Parisiis convenit, ut calefactio climatis globalis infra duos gradus Celsianos sisteretur. Ante Americanos et Sinenses tantum viginti quattuor terrae Conventionem ratificaverant. Illae terrae tantum centesimam partem gasorum emittunt, quae effectum serrae faciunt. Pars autem Sinensium et Americanorum quadraginta fere centesimarum (40%) est. Conventio Parisiensis valere incipiet, simulac quinquaginta quinque terrae eam ratam fecerint. In Unione Europaea conventio confirmari debet a singulis Unionis membris, in parlamento Europaeo atque in sessione ministrorum circumiectalium.

Praesidens Usbekistaniae mortuus et sepultus

Islam Karimov, praesidens Usbekistaniae, mortuus est et die Sabbati Samarkandiae sepultus. Res, de qua primum rumores tantum ferebantur, ab administratione praesidentiali officialiter confirmata est. Karimov viginti septem annos Usbekistaniae crudelissime praefuit, cum oppositionem politicam prostravit, opus ordinum civilium impedivit, diurnarios in carcerem coniecit, incarceratos cruciavit. Etsi cives dura manu coercuit et iura humana violavit, illi contigit, ut relationes et in Russiam et in USA sustineret. Opes auri et gasi praesidenti maximas divitias paraverunt, sed maior pars populi in paupertate vivit. De successione praesidentis certamen veri similiter durissimum erit.

Norvegia saepimentum in confinio Russiae ducit

Norvegienses saepimentum ex reti adamanteo factum in statione Storskog limitis Russiae ducunt. Erit longitudine ducentorum metrorum, altitudine trium metrorum et dimidii. Storskog est unicus transitus in limite terrestri centum sexaginta chiliometrorum inter Russiam et Norvegiam. Anno proximo ea via circiter quinque milia quingenti (5500) asyli petitores in Norvegiam venerunt. Maior pars eorum ex Proximo oriente oriundi erant. Etsi fluctus immigrantium nunc est tranquillus, saepimentum ad securitatem et gubernationem regionis necessarium habetur, quia limes Norvegiae orientalis est etiam limes regionis Schengen. Storskog pertinet ad commune Varangiae Meridionalis (Sor Varanger) decem milium incolarum, cuius meditullium est portus Kirkenes.

Mater Teresa sanctificata

In caerimonia die Dominico in Platea Petriana Civitatis Vaticanae facta Papa Franciscus Matrem Teresam (1910-1997) in sanctorum numerum rettulit. Teresa fuit monacha ecclesiae catholicae, ex genitoribus Albaniensibus in hodierna Macedonia nata. Parvum ordinem monacharum condidit, qui pauperes, aegrotos moribundosque urbis Calcuttae adiuvare coepit. De opere misericordiae in India facto in toto orbe celebris fuit et anno millesimo nongentesimo undeoctogesimo (1979) praemium pacis Nobelianum cepit. Ecclesia catholica plus decem milia sanctorum habet, ex quibus multi per saecula canonizationem exspectaverunt. Teresae autem sanctificatio iam undecim post mortem annis obtigit.

(Tuomo Pekkanen)

2.9.16

De armis chemicis Syriae

Moderatores Britanniae et Francogalliae ordini Nationum Unitarum suadent, ut Syriae sanctiones imponantur. Accusant regimen eius de usu armorum chemicorum et gasorum venenatorum. Russi, quippe qui socii praesidentis Bashar al-Assad sint, huic consilio adversari existimantur. Quid autem Sinenses de ea re sentiant, nondum constat.

(Reijo Pitkäranta)

Pax in Columbia restituta

Inter regimen Columbiae et motum seditiosum FARC de pace restituenda convenit. Rodrigo Londono, dux seditiosorum, suos hortatus est, ut armis positis indutias permanentes facerent. In Columbia suffragium populi de foedere pacis approbando postridie Kalendas Octobres (2.10.) habebitur. Bellum domesticum in illa civitate amplius quinquaginta annos gestum est.

(Reijo Pitkäranta)

Pons duarum continentium

In Bosporo Thracio ingens pons pensilis factus est, quo Europa cum Asia coniungitur. Quantae magnitudinis illud opus sit, vel inde apparet, quod columna eius celsissima in altitudinem turris Eiffelianae fere erigitur. Patet in longitudinem sesquialterius chiliometri et in latitudinem undesexaginta metrorum. Per pontem octo curricula et duae ferriviae ducunt.

(Reijo Pitkäranta)

Turris ventorum antiqua

Turris ventorum, monumentum antiquum Athenis situm, iam vulgo aperta est. Agitur de aedificio octangulo ex marmore albo facto, quam primam stationem meteorologicam fere dixeris: erat enim in tecto eius ventilogium ad indicandum, unde ventus quoquo tempore flaret. In eadem turri etiam clepsydra et horologium solarium inveniebantur. 

(Reijo Pitkäranta)

Margarita mundi maxima

Fieri potest, ut piscator quidam Philippinus margaritam maximam mundi invenerit. Habet pondus plus triginta chiliogrammatum, et experti eam centum milionibus dollariorum aestimant. Piscator eam iam abhinc decem annos in concha ingenti inventam domi suae tenebat. Propositum est, ut margarita ad viatores in Philippinas alliciendos in publico collocetur.

(Satu Tuominen)

De spe messis frumentariae

Exspectationes messis frumentariae uberioris in Finlandia hoc autumno valde deminutae sunt. Ex imbribus enim assiduis secutum est, ut segetes multis locis humi iacerent et qualitas earum deterior fieret. Agricolis necesse est frumentum minus siccatum triturare, quod periculum infert, ne vis seminum decrescat. Ad annonam adhuc servandam caelo sereno opus est. 

(Reijo Pitkäranta)

De venatione ursorum

Numerus ursorum in silvis Finlandiae ambulantium tantopere crevit, ut iam pluribus venatoribus quam ante licentia eos caedendi daretur. Ursi in regionibus Finlandiae orientalibus semper frequentes fuerunt, sed nunc magistratus volunt, ut hae beluae etiam in partibus terrae occidentalibus increbrescant. 

(Reijo Pitkäranta)

26.8.16

Terra in media Italia tremuit

Die Mercurii (24.8.) multo mane motus terrae regionibus montuosis Mediae Italiae gravissima damna attulit. Pessime afflicta sunt oppidula Accumoli, Amatrice, Arquata del Tronto, in quibus ducenti quadraginta septem (247) homines perierunt et complures centeni vulnerati sunt. Quanta damna fuerint quotve victimae, nondum pro certo constat.

Estonia ante viginti XXV annos independentiam recuperavit

Estonienses anniversarium vicesimum quintum patriae iugo Sovietico liberatae celebraverunt. Estonia iam pace Dorpatensi (1920) independentiam obtinuerat, quam bello mundano secundo amisit, cum ad Unionem Sovieticam annexa est. Libertatem post unum et septuaginta annos Unione Sovietica iam collapsura recuperavit. Statuae moderatorum communistarum in purgamenta coniectae sunt.

Glacies arctica solito maturius solvitur

His decenniis glacies Oceani arctici propter mutationem climatis valde minuta est. Quam ob rem via maritima inter septentrionem et occasum solis supra continentem Americae septentrionalis per tres menses singulis annis facta est navigabilis. Primus quidem ea via iam anno millesimo nongentesimo sexto (1906) Roald Amundsen Norvegus navigavit. Nuper (16.8.) navis epibatica Crystal Serenity portu urbis Anchorage soluta est, ut per fretum Beringense et Groenlandiam usque ad Neo-Eboracum (vulgo New York) navigaret. Illa navigatio, prima traiectio commercialis eius itineris, erit circiter mille sescentorum chiliometrorum et triginta duos dies durare aestimatur.

Pons vitreus in Sinis apertus

In provincia Hunan Sinarum die Sabbati (20.8.) pons apertus est, cuius fundus ex undecentum vitreis laminis translucentibus constat. Longitudine quadringentorum triginta et latitudine sex metrorum fauces montium Zhangjiajie superat. Viatores, qui simul non plures quam octingenti esse possunt, imas fauces ex altitudine trecentorum metrorum spectare possunt. Singulis diebus numerus transgredientium ad octo milia limitatus est et tesserae aditiales in antecessum reservandae sunt. Architectus, qui pontem designavit, est Haim Dotan Israelianus. Magistratus Sinenses diurnariis firmitatem pontis multis modis, exempli gratia laminas vitreas malleo tundendo et autocarris pontem transvehendo, demonstraverunt.

Finni in Olympiis spe decepti

Olympia aestiva, in Rio de Janeiro celebrata, die Dominico (21.8.) ad finem venerunt. Finni ad ludos gregem quinquaginta quattuor athletarum miserant, qui in universum aestimanti rem minus prospere gesserunt. Mira Potkonen, mater familias triginta quinque annorum, in patriam unicum nomisma in pugillatione reportavit. Ne iaculo quidem, quo excellere solent, Finni meliore fortuna utebantur. Ex tribus iaculatoribus ad Olympia missis tantum Antti Ruuskanen in certamen finale admissus est, in quo sextum locum obtinuit. In hoc genere victor fuit Thomas Röhler Germanus, qui iaculum super nonaginta metra (90,30) vibravit.

(Tuomo Pekkanen)

19.8.16

Plus copiarum in Sudaniam

Ordo Nationum Unitarum plus copiarum in Sudaniam Meridianam pugnis vexatam missurus est. Consilium eo tendit, ut Iuba, urbs principalis eiusdem terrae, defendatur et stationibus militaribus Nationum Unitarum praesidium praestetur. Salva Kiirin, praesidens civitatis, tamen adventum militum non approbans recusavit, quominus cum iis opus commune faceret.

(Reijo Pitkäranta)

Sipilä et Soini Turciam monent

Juha Sipilä, princeps minister Finlandiae, et Timo Soini, minister a rebus exteris, Turciam hortantur, ut cursum ad democratiam versus denuo dirigat et iuribus humanis servandis operam det. Litteris publicis divulgatis scribunt moderatores Finlandiae iam per multos annos palam facere, quam magni momenti sit libertatem loquendi et scribendi inviolatam servare.

(Reijo Pitkäranta)

Limes Venetiolae et Columbiae

Regimina Venetiolae et Columbiae confinium civitatum partim aperient, ut sedes nuntiis divulgandis internationales nuntiaverunt. Nicolas Maduro, praesidens Venetiolae, id abhinc annum clausit copias semimilitares Columbianas accusans de incursionibus in custodes limitis factis. Reapse ius finem transeundi civibus suis abstulit, ne alimentorum penuria magna multitudine in terram vicinam pergerent.

(Saara Honkanen)

De calamitate Ludovicianae

In Ludoviciana, quae est civitas in America septentrionali sita, undecim homines mortui et quadraginta fere milia domuum deleta sunt propter inundationes ex imbribus maximis coortas. Imprimis partes eius regionis meridianae illa calamitate tanta detrimenta ceperunt, ut praesidens Barack Obama his finibus statum necessitatis indiceret.

(Reijo Pitkäranta)

Feminis burcinio interdicitur

In Francogallia iam complura loca natatoria publica sunt, ubi feminis musulmanis usu burcinii interdicitur. Agitur de veste balneari totum corpus operiente, cuius unam partem facit tunica manicata capillos velans et alteram partem bracae ad corpus arte accommodatae. Etiam Manuel Valls, princeps minister Francogalliae, se illi consilio favere dixit. 

(Reijo Pitkäranta)

Avena valetudini prodest

Avena sativa saluti hominis multum prodest, ut magistratus sanitarii Europae invenerunt. Curatores securitatis cibariae Europaeae huic frumento saltem tres effectus salutares tribuunt: avenam ad cholesterolum sanguinis temperandum nonnihil conferre, in aequilibrio glucosi servando valde adiuvare, purgationem alvi admodum provehere.

(Reijo Pitkäranta)

Bolt et Thomson victores

Olympia aestiva, quae in Rio de Janeiro celebrantur, iam in finem vergunt. E certaminibus apparuit homines in orbe terrarum omnium pernicissimos Iamaicanos esse. Namque in cursu centum metrorum Olympionices, isque iam ter, evasit Usain Bolt. In serie autem feminarum primas tulit Elaine Thomson. Constat utrumque eorum ex Iamaica oriundum esse.

(Reijo Pitkäranta)

12.8.16

Russia membra Natonis ad colloquia invitat

Ut relationes Russiae ad terras Natonis socias in Europa meliores fiant, ministerium defensionis Russiae delegatos harum terrarum Moscuam ad consultationes mense Septembri futuras invitat. Invitantur saltem Polonia et terrae Balticae, sed etiam Suetia et Finnia, quae membra Natonis non sunt. Inter res disputandas erit status rei militaris in Europa. Propositum est, ut sollicitudo generalis, propter motum militarem prope limites crescentem orta, deminuatur. Sermo erit etiam de securitate commeatus aerii, quod praesertim ad aeroplana militaria in regione Maris Baltici volantia spectat.

Austria consultationibus cum Turchia obsistit

Christian Kern, cancellarius foederalis Austriae, censet consultationes de Turchia in Unionem Europaeam asciscenda nihil esse nisi fictionem. Minister defensionis Hans-Peter Doskozil Turchiam dictaturam appellavit et monuit illam terram nullum locum in Unione Europaea habere, Sebastian Kurz, minister a rebus Austriae exteris, affirmavit se omnibus modis impedire, ne illae consultationes promoverentur.

Imperator Iaponiae orationem habuit

Imperator Iaponiae Akihito die Lunae (8.8.) orationem televisificam habuit, in qua de suis condicionibus futuris narravit. Ait se sollicitari, quo modo officia imperatoris ferre valeret. Akihito, qui valetudine laborat, iam viginti septem annos imperator est, sed lege fundamentali impeditur, ne abdicet. Cives valetudinem imperatoris labantem compertam habent et libenter permittant, ut emeritus fiat. Sunt rumores, ex quibus princeps hereditarius Naruhito et coniux eius aliquam partem ex officiis imperatoris suscipiant. Shinzo Abe, primus minister Iaponiae, affirmavit ea, quae imperator Akihito speraret, serio deliberatum iri.

Securitas in commeatu Finniae usque melior

Hoc anno in commeatu Finniae centum quinque (105) homines mortui sunt. Si alterum anni dimidium eodem modo successerit, securitas viaria erit melior quam umquam ante. His annis calamitates in commeatu publico usque rariores factae sunt. Ante quadraginta fere annos milleni homines in calamitatibus viariis annuatim interierunt.

Sari Essayah in Commissionem Olympicam internationalem

Sari Essayah, delegata parlamentaria et praeses factionis democraticae Christianae Finnorum, in Commissionem Olympicam internationalem electa est. Essayah excellit etiam in re athletica, nam anno millesimo nongentesimo nonagesimo tertio (1993) primatum mundanum et anno sequenti (1994) primatum Europaeum in ambulatione decem chiliometrorum obtinuit.

Semestre autumnale scholarum init

Semestre autumnale scholae fundamentalis hac septimana in Finnia init. Primam classem scholae inferioris, quae sex annos durat, circiter unum et sexaginta milia quingenti (61 500) pueri septem annorum incohant. Superiorem scholam fundamentalem, quae est trium annorum, circiter undesexaginta milia (59 000) iuvenum intrant.

(Tuomo Pekkanen)

5.8.16

Quid in Turcia acciderit

Medio mense Iulio non multum afuit, quin res in Turcia everterentur, sed consilia seditiosorum brevi ad irritum ceciderunt. Quo facto Recep Tayyip Erdogan, praesidens civitatis, cum imprimis exercitum proditionis accusaret, multa milia militum et praefectorum eorum capienda curavit. Postea etiam magna multitudo iudicum, medicorum, praeceptorum, professorum, diurnariorum comprehensa est.

(Reijo Pitkäranta)

Quid Hillary suis dixerit

In Civitatibus Americae Unitis Hillary Clinton candidata praesidentialis partium democraticarum facta est. Orationem in conventu factionis suae habuit, qua opiniones de futuro terrae suae proposuit. Dixit se ab adversario suo Donald Trump eo differre, quod concordiam hominum magni aestimaret. Se plus operae creare velle, ut statum oeconomicum meliorem redderet.

(Satu Tuominen)

Olympia aestiva ineunt

Hodie sive Nonis Augustis (5.8.) in urbe Brasiliae Flumine Ianuarii, vulgo Rio de Janeiro, Olympia aestiva inaugurantur. Ex Finlandia huc quinquaginta quattuor athletae missi sunt, quorum maior pars feminae. Honorem vexilli in stadium importandi habet Tuuli Petäjä-Sirén, quae ex ludis Londiniensibus nomisma argenteum domum reportavit.

(Reijo Pitkäranta)

Studentes arma gerentes

In Texia, quae est una e civitatibus Americae Septentrionalis, lex valere coepit, quae studentibus licentiam arma in auditoriis universitatum gerendi dat, dummodo ne ea in conspectu habeant. Neque desunt, qui tali legi resistant dicentes eam violentiam augere. Alii autem monent, quam magni studentium intersit se armis defendere posse.

(Reijo Pitkäranta)

Productio industrialis

Mense Iulio incrementum productionis industrialis in Unione Europaea tardius factum est. Navitas oeconomica in Germania, Austria, Hollandiaque quidem crevit, sed in Francogallia et Graecia productio deminuta est. In Britannia, quae mense Iunio a societate Unionis Europaeae secedere constituit, efficientia industrialis valde recessit.

(Reijo Pitkäranta)

Finlandia adhuc quieta

Hac aestate in Europa complures ictus terroristici facti sunt. Multi igitur iam cogitare coeperunt, ubinam gentium adhuc tuto iter facere possent. Itaque curatores rei viariae Finlandiae peregrinos hortantur, ut in nostram terram veniant, ubi omnia etiam nunc tuta et quieta sint. Quid esse iucundius, quam hic apud aliquem lacum tranquillitate naturae frui?

(Reijo Pitkäranta)

De annona huius anni

Exspectationes messis frumentariae hoc anno in Finlandia variant, cum caeli status in diversis partibus terrae mutabilis fuerit. In regionibus meridianis et occidentalibus annona admodum bona fore videtur, sed in Bothnia magni imbres segetibus maturescentibus detrimento fuerunt. Huc accedit, quod frumentum passim morbis plantis nocentibus laborare coepit.

(Reijo Pitkäranta)

17.6.16

Strages in caupona nocturna Floridiana

Undequinquaginta homines occisi sunt totidemque vel etiam plures vulnerati in caupona homosexualium nocturna urbis Orlandi Floridiana. Praesidens Barack Obama declaravit stragem fuisse ictum terroristicum. Ordo Daesch sive Isis nuntiavit auctorem fuisse unum ex suis pugnatoribus. Sclopetatio dicitur funestissima historiae recentioris Civitatum Americae Unitarum. Greges speciales custodum publicorum in cauponam mane Dominico (12.6.) irruperunt et occisorem interfecerunt. Hic erat vir Floridianus undetriginta annorum, cuius parentes sunt originis Afganae. Iam tribus annis ante, a custodibus publicis foederalibus de conexionibus Islamicis interrogatus, testimoniis deficientibus liberatus erat.

Estne Britannia ex Unione Europaea exitura?

Scitum populi de societate Britanniae cum Unione Europaea continuanda die vicesimo tertio mensis Iunii (23.6.) fiet. De eventu suffragii nihil certi conici potest, nam fautores et dissuasores ex demoscopiis, quae identidem fiunt, aequo fere Marte discedunt. In universum aestimanti obtrectatio in multis terris Unionis crescit.

De praesidentatu Clinton et Trump certant

Iam certum esse videtur candidata democratarum in comitiis praesidentialibus in USA fore Hillary Clinton, republicanorum autem Donald Trump. In comitiis mense Novembri (8.11.) futuris creabuntur electores, qui praesidentem et eius vicarium mense Decembri (6.12.) nominabunt. Novus praesidens die vicesimo mensis Ianuarii anni sequentis (20.1.2017) munus inibit.

Bhumibol LXX annos rex Thailandiae

Bhumibol, rex Thailandiae, qui anno millesimo nongentesimo quadragesimo sexto (1946) inthronizatus est, diutius regnavit quam quisquam ex monarchis orbis terrarum hodiernis. Regnum eius septuaginta annorum die Iovis (9.6.) in Thailandia celebrabatur. Rex Bhumibol est civibus suis gratus et in politica domestica magna valet auctoritate.

Novi praesides factionum

In Finnia factiones politicae praesides sibi creaverunt. In factione conservativa de hoc munere certaverunt ministri Alexander Stubb et Petteri Orpo, ex quibus superior factus est Orpo. Factio popularis Sueca, quae numquam antea praesidem feminam habuit, creavit delegatam parlamentariam Anna-Maja Henriksson. Factionis sinistrae nova praeses est Li Andersson.

Certamina Europaea pedifollica inierunt 

Certamina de primatu Europaeo pedifollii his septimanis in Francia fiunt. Ludi, die Veneris (10.6.) incepti, certamine finali die decimo mensis Iulii (10.7.) concludentur. Ad ludos admissi sunt viginti quattuor greges in sex sectiones divisi. Illi in decem stadiis variarum urbium certabunt, quorum securitatem quindecim milia vigilum aut militum custodiunt.

Nuntii Latini d. IV m.Aug. continuabuntur

Nuntii Latini Radiophoniae Finnicae Generalis, qui inde ab anno millesimo nongentesimo undenonagesimo (1989) septimanatim emittuntur, propter ferias aestivas usque ad mensem Augustum intermittuntur. Quae cum ita sint, prima post ferias emissio Latina fiet Nonis Augustis sive die quinto mensis Augusti.

Tuomo Pekkanen

10.6.16

NATO in aquis Finlandiae

Die Lunae (6.6.) mane copiae militum maritimorum Americanorum belli exercendi causa in oram Finlandiae invaserunt. Quod factum est in aquis urbis Hanko, ubi exercitatio militaris Consociationis Nato nomine Baltops initium cepit. Huic rei etiam Suetia, Hollandia, Italia, Britannia, Germania suis classiariis et naviculis missis interfuerunt. 

(Reijo Pitkäranta)

Soini et Lavrov collocuti

Timo Soini, minister a rebus exteris Finlandiae, collegam suum Russum Sergei Lavrov Moscuae convenit. Hic iterum atque iterum ait ea consilia communia, quae Finlandenses cum Confoederatione Atlantica haberent, sibi et suis non placere: exercitationes bellicas, quae prope fines Russiae fierent, ad animum Russis infestum incitandum spectare.

(Reijo Pitkäranta)

De damnis inundationum

In Europa saltem duodeviginti homines vitam amiserunt inundationibus ex imbribus assiduis exortis. Eluviones, quae verbi causa Francogalliam vexaverunt, iam paulatim subsidunt, sed ante aliquot dies aqua fluminis Sequanae, quod per Lutetiam Parisiorum fluit, plus sex metris altius accrevit quam fieri solet. 

(Reijo Pitkäranta)

Cuniculus Gotthardensis

Kalendis Iuniis (1.6.) in Helvetia cuniculus ferriviarius omnium temporum longissimus apertus est. Agitur de meatu subalpino Gotthardensi amplius quinguaginta septem chiliometrorum, qui abhinc septendecim annos muniri coeptus est. Quo opere absoluto effectum est, ut iter Mediolano in urbem Turicum una fere hora velocius fieret.

(Reijo Pitkäranta)

Pretium petrolei auctum

Petroleum hodie multo carius constat quam abhinc sex menses. Pretio ab initio anni octoginta fere centesimis aucto pro uno petrolei dolio nunc circiter quinquaginta dollara solvuntur. Productio petrolei lapidis sectilis Americanorum deminuta, tumultus in Nigeria conflati, incendia silvestria in Canada coorta in causa accessionis pretii esse existimantur.

(Saara Honkanen)

Sancta Elisabeth Sueta

Elisabeth Hesselblad, monacha ex Suetia oriunda, in numerum sanctorum recepta est. De re nuntiavit papa Franciscus caerimonia sollemni die Dominico (5.6). in Civitate Vaticana acta. Constat eam duo miracula fecisse et altero bello mundano complures familias Iudaeae gentis e morte servavisse, cum eas in quoddam monasterium abdidit. Mortua est Romae ante undesexaginta annos.

(Reijo Pitkäranta)

Muhammed Ali mortuus

Muhammad Ali, pugil Americanus omnibus fere notus, die tertio mensis Iunii (3.6.) de vita decessit septuaginta quattuor annos natus. Defunctus est in valetudinario, quo propter graves difficultates respirandi deportatus erat. Ali, antea Cassius Clay appellatus, erat Olympionices, qui deinde principatum pugilationis professionalis gravissimi ponderis ter consecutus est.

(Reijo Pitkäranta)

Obama Hiroshimam visit

3.6.16

Secundo bello mundano ad finem vergente, mense Augusto anni millesimi nongentesimi quadragesimi quinti (1945), USA bombam atomicam in urbem Hiroshimam deiecit, quo factum est, ut centum quadraginta milia hominum interirent. Barack Obama, praesidens Americanorum, primus munere fungens nuper Hiroshimam (27.5.) visit, ubi coronam ad monumentum victimarum posuit.

Dies internationalis tutatorum pacis

Conventus generalis Nationum Unitarum declaravit diem undetricesimum mensis Mai (29.5.) internationalem diem tutatorum pacis. Primi pacis tutatores iam anno millesimo nongentesimo duodequinquagesimo (1948) in officium venerunt, ex quo anno Nationes Unitae sexaginta septem operationes ad pacem tutandam habuerunt. Finni in his fuerunt plus triginta quinque milia.

Feminae in Finnia CX annos suffragium habent

Kalendis Iuniis centum decem anni acti sunt, ex quo lex de comitiis agendis et suffragio ab ordinibus Finniae accepta est. Ex illa lege omnes cives , tam viri quam feminae, qui viginti quattuor annos compleverant, universale et aequale ius suffragii habuerunt. In comitiis parlamentaribus, mense Martio anni sequentis (1907) factis, undeviginti delegatae feminae – in toto orbe terrarum primae - in novum parlamentum creatae sunt. Centesimo decimo die anniversario novae legis (1.6.2016) parlamentum Finniae in sessionem festivam ad suffragium feminarum celebrandum convenit, quae sessio per televisionem transmissa est.

Estne sepulcrum Aristotelis repertum?

Kostas Sismanidis, archaeologus Graecus, credit se sepulcrum Aristotelis, diu quaesitum, in ruinis Stagirae, urbis antiquae, denique repperisse. Aristoteles, clarissimus in mundo philosophus, anno trecentesimo octogesimo quarto a.Chr.n. Stagirae Macedoniae natus est. Diem obiit in Chalcide insulae Euboiae, unde cineres eius Stagiram translati esse putantur. Iam viginti annos excavationes Stagirae fiunt. Ianua ex marmore facta ducit in cameram sepulcralem, in qua inventi sunt nummi aetatis Alexandri Magni, cuius magister Aristoteles fuerat. Architectura et situs apud forum antiquum indicare videntur, ut Sismanidis opinatur, sepulcrum esse Aristotelis.

Real Madrid trophaeum cepit

In certamine finali Confoederationis Campionum (Champions League), quod vespere Sabbati (28.5.) in stadio Sancti Syri Mediolanensi factum est, duo greges Hispani, scilicet Real Madrid et Atletico Madrid, conflixerunt. Cum post ludum centum viginti minutarum status certaminis adhuc unum ad unum (1-1) esset, ictibus undecim metrorum decertatum est. Victor evasit Real Madrid, qui iam antea saepius eodem certamine trophaeum ceperat. Ludus televisifice in ducentas viginti terras transmissus est, in quibus circiter centum octoginta miliones spectatorum fuisse aestimatur. Ad ludum inaugurandum spectatoribus acroasis musicalis data est, cantantibus Alicia Keys et Andrea Bocelli.

(Tuomo Pekkanen)

27. 5.16

Impetus in urbem Falluja

Die Lunae (23.5.) exercitus Iraquiae cum auxiliis sociorum impetum magnum in urbem Falluja, quam ordo terroristicus Isis in potestate sua obtinet, facere coepit. Nonnisi septingentis civibus contigit, ut e mediis pugnis effugerent, cum multa milia incolarum in urbe remanerent. Isis autem minitatur eos, qui fuga salutem petere conentur, supplicio affectum iri.

(Reijo Pitkäranta)

Graecia adhuc adiuvatur

Inter ministros Unionis Europaeae de aere alieno Graeciae sublevando et de pecunia ei commodanda convenit. Versura, quae Graeciae conceditur et cuius prima pars mense Iunio solvetur, decem fere miliarda euronum efficit. Etiam Fundus monetarius internationalis Graeciae adiuvandae adhuc interest. Autumno autem proximo, qualis rerum condicio futura sit, denuo aestimabit. 

(Reijo Pitkäranta)

Novus praesidens Austriae

Novus praesidens Austriae electus est Alexander Van der Bellen, candidatus prasinorum septuaginta duos annos natus. Victoria eius maxime exigua erat: adversarium enim suum Norbert Hofer, fautorem partium dextimarum, nonnisi triginta milibus sententiarum superavit. Neque eventus comitiorum ante apparuit, quam septingenta milia suffragiorum in antecessum datorum enumerata erant.

(Reijo Pitkäranta)

Profugi ex mari servati

Hac septimana in Mari Mediterraneo complures actiones diversae institutae sunt, quibus amplius duo milia profugorum Europam petentium servata sunt. Immigrantes scaphis gummeis impositi praesertim in aquis Libyae et Melitae inveniebantur. Saluti eorum consuluerunt tam custodes litorales Italiae quam naves classis Irlandiae et nonnulli ordines beneficiarii.

(Reijo Pitkäranta)

Duces religiosi concordes

Die Lunae (23.5.) papa Franciscus summum ducem religiosum sunnitarum Ahmed al-Tayeb convenit. Constat necessitudinem islamitarum cum Civitate Vaticana intercedentem abhinc quinque annos abruptam esse, cum papa Benedictus XVI religionem Musulmanorum reprehendisset. Nunc autem utraque pars ad conventum pacis instituendum parata esse dicitur.

(Reijo Pitkäranta)

Graecia viatoribus grata

Cives Finlandenses ferias aestivas acturi ad aliquam terram apricam libenter proficiscuntur. Plurimum apud eos gratia valet Graecia, quo aestate proxima circiter centum octoginta milia itinerum factum iri existimantur. Turcia quoque, quamquam minus prospera fortuna utitur quam ante, pristinum favorem admodum bene servavit. Etiam Hispania et Italia viatoribus Finlandensibus in deliciis sunt. 

(Reijo Pitkäranta)

Res nova cursus publici

Cursores publici Finlandenses numero munerum solitorum deminuto negotium novum, id est ministerium graminis recidendi, nuper gerere coeperunt. Curatores rei cursualis mense Aprili exeunte de hac nova opportunitate nuntiaverunt: clientes, si vellent, tabellarium rogare posse, ut gramina ante domum crescentia tonderent.

(Satu Tuominen)

20.05.16

Praesidens Niinistö Washingtoniam visit

Praesidens Finniae Sauli Niinistö et moderatores aliarum terrarum Europae septentrionalis Washingtoniae apud praesidentem Barack Obama nuper (13.5.) convenerunt. Argumenta principalia colloquiorum erant securitas Europae septentrionalis et Russia. In oratione inaugurali Niinistö iam commemoravit in regione Maris Baltici et Europae septentrionalis discrimen auctum esse. Ad conclusionem USA et terrae Europae septentrionalis protulerunt sollicitudinem, quam aggressivitas Russiae attulisset, et repetiverunt sanctiones antea tolli non posse quam Russia condiciones pacis Miniscanae respexisset. Conventus Washingtoniensis, ut Niinistö censebat, ostendit praesidentem Obama et terras septentrionales eodem modo de securitate, aequitate, climate iudicare.

Status exceptionalis in Venezuela continuatur

Oppositio politica Venezuelae a comitiis autumno factis superior discessit, sed iudicium supremum, quod fautores praesidentis Nicolás Maduro tenent, impedivit, ne parlamentum sua potestate uteretur. Cives penuria cibi, medicamentorum, electricitatis laborant et his diebus turbae hominum tabernas mercatorum invaserunt, ut farinam, carnem vestesque sibi arriperent. Status necessitatis, quem praesidens mense Ianuario proclamavit, usque ad annum proximum continuabitur. Maduro causam esse dixit crisim oeconomicam et insidias tam patrias quam Americanorum ad regimen sinistrarum partium evertendum. Oppositio vult, ut suffragium populi de praesidente instituatur, sed Maduro recusat, quominus discedat.

In parlamento Italiae unio civilis accepta

Italia fuit ultima terra occidentalis, in qua pares homosexuales nullo modo legaliter comprobabantur. Denique septimana praeterita (11.5.) camera inferior parlamenti legem de unione civili accepit. Illa lex paribus homosexualibus ius confert, ex quo ut familiaris comparis agere, eodem nomine gentili uti atque pensionem compare mortuo habere possint.

Fugitivi Graeciam petentes pauciores

Pactum, quod Unio Europaea cum Turcia de profugis remittendis fecit, numerum hominum ex Turcia in Graeciam venientium valde minuit. Mense Aprili tantum duo milia septingenti (2700) homines venerunt, quod nonaginta centesimis (90%) minus est quam mense Martio. Plurimi ex Syria, Pakistania, Afganistania Iraquiaque oriundi erant.

Ucraina Eurocantionum victrix

Certamen finale cantionum Eurovisionis, in quod viginti sex terrae admissae erant, vespere Sabbati (14.5.) Stockholmiae factum est. Plurima suffragia cepit cantatrix Ucrainae Susana Dzamaladinova sive Jamala, quae ipsa et textum et melodiam ad cantionem de anno millesimo nongentesimo quadragesimo quarto (1944) scripserat. Illo anno Stalin, pristinus dictator Unionis Sovieticae, ducenta quinquaginta milia Tartarorum ex Crimaea in Sibiriam et Mediam Asiam deportanda curaverat. In his erat proavia cantatricis, de cuius sorte illa in cantione sua narrat. Secundum locum in certamine occupavit Australia, tertium Russia.

Tuomo Pekkanen

13.5.16

Rouseff in ius vocatur

Praesidens Brasiliae Dilma Rousseff in ius vocatur de delicto in munere commisso accusata. Suspicio est eam, cum cives ambiret, de condicione oeconomiae publicae verba falsa fecisse. Senatus Brasiliae, cum de re per multas horas disputasset, tandem consultum de praesidente accusanda fecit. Inde etiam sequitur, ut Dilma Rousseff munus in sex menses deponere cogatur. 

(Reijo Pitkäranta)

Quid Kim Jong dixerit

Pyongyangae, in urbe capite Coreae Septentrionalis, magnus conventus factionis operariorum actus est. Dictator Kim Jong-un oratione habita negavit civitatem suam armis nuclearibus usuram esse, nisi aliae terrae ius eius propriis legibus utendi violavissent. Idem monuit Coream Septentrionalem ad ea incepta paratam esse, quibus impediretur, ne arma atomica latius paterent.

(Reijo Pitkäranta)

De decretis Graecorum

Parlamentum Graeciae complures leges perferendas curavit, quibus condiciones vitae multorum civium deteriores fient. Die Dominico legati parlamentares ad multam noctem de rationibus parcendi vehementer disputabant. Decretum est inter alia, ut tributa et solutiones sociales augerentur et pensiones deminuerentur. 

(Reijo Pitkäranta)

Isis opibus labefactus

Bombardationes confoederationis internationalis effecerunt, ut Ordo Isis opibus labefieri inciperet. Illud corpus terroristicum anno praeterito tres miliones dollariorum cotidie accepisse existimatur, nunc autem reditus menstrui vix ad decem miliones ascendere putantur. Mercedibus militum deminutis ardor pugnandi debilitatus est, et novi bellatores difficilius quam ante conscribuntur.

(Saara Honkanen)

De exercitu Germaniae

Germani primum post alterum bellum mundanum exercitum suum corroboraturi sunt. Propositum enim est, ut septem annis proxime futuris numerus militum armatorum plus quattuordecim milibus et multitudo togatorum amplius quattuor milibus augeretur. Dicitur hoc incrementum copiarum eo spectare, ut Germania efficacius quam ante actionibus militaribus peregrinis interesse possit. 

(Reijo Pitkäranta)

Canada incendiis vexata

Alberta, provincia Canadensium, incendiis silvestribus omnium temporum maximis affligitur. Vis eorum tanta fuit, ut paene decies centena milia incolarum domos suas relinquere iuberentur. Calamitate pessime vexata est urbs Fort McMurray, quae productione petrolei insignis est. Incendia exstinguere laboris multorum mensium fore existimatur.

(Reijo Pitkäranta)

De natura pauperescente

Natura silvestris Finlandiae rapido passu pauperescit, ut Ordo mundi naturae tuendae (WWF) praemonet. Haec rerum mutatio imprimis ex silvicidiis efficacissime peractis secuta esse videtur. Quibus factum est, ut loca silvestria ad aves et herbas idonea rariora redderentur. Damna naturae vel inde patent, quod proventus myrtilli in silvis nostris his sexaginta annis ad dimidium redactus est.

(Reijo Pitkäranta)

Kalendae Maiae hilariter celebrantur

6.5.16

Kalendae Maiae sive dies Walpurgis olim erat dies festus internationalis imprimis operariorum, apud Finnos et Suetos etiam studentium academicorum. Hodie autem, etsi orationes politicae non sunt omnino depositae, dies Walpurgis est festum vernale omnium, quod epulis cantionibusque cum amicis et proximis celebratur. Iam vigilia diei festi homines ad convivia conveniunt, in quibus vinum spumans adventui aestatis propinatur et cibi delicati gustantur. His annis vinum spumans Italicum, quod prosecco appellatur, magnam gratiam paravit, nam in orbe terrarum iam plus spumantis prosecco emitur quam Campaniensis.

De Natone apud Finnos disputatur

In Finnia palam facta est aestimatio, in qua recensetur, utrum societas cum Natone Finnis prosit an noceat. Aestimatores opinantur illa societate politicam securitatis Finnorum et relationem, quam Finni in Russiam habeant, mutatum iri. Finnos, si sine Suetia in Natonem inierint, indefensos fore. Sin Sueti inierint sine Finnis, Finniam fore seclusam. Itaque de societate Finnis una cum Suetis constituendum esse. Sergei Lavrov, minister a rebus exteris Russiae, monuit Russiam consilia contraria capturam esse, si Suetia Natonem inisset. Neque tamen accuratius aperuit, quae illa contraria consilia re vera essent.

Magna copia nummorum Romanorum in Hispania reperta

Complura dena milia nummorum Romanorum prope urbem Hispalem (vulgo Sevilla) in viridario inter opera hydraulica reperta sunt. Plerique nummi, qui depositi erant in undeviginti amphoris, sunt aënei. In una parte singulorum nummorum est imago imperatoris Romani, in altera sunt symbola imperii. Neque adhuc constat, qui ex imperatoribus Romanis in nummis delineati sint, sed numismatici iudicant eos saeculis tertio et quarto cusos esse. Pretium archaeologicum est inaestimabile. Tanta copia similium nummorum numquam antea reperta est. Nummi depositi sunt in Museo archaeologico Hispalensi.

Academia Latinitati Fovendae convenit

Academia Latinitati Fovendae, cui propositum est usum vivum linguae Latinae fovere atque in omnia ad cultum civilem Latinum spectantia incumbere, sedem habet Romae ibique semel in anno convenit. Hornotinus Academiae conventus hodie incipit. Primum (6.5.) celebratur Conventiculum, in quo litterae Utopicae orationibus et disputationibus tractantur. Deinde (7.5.) erit Coetus Generalis, in quo de novis sodalibus cooptandis, de conventu Lexingtoniensi proximo anno celebrando, de libris edendis aliisque Academiae inceptis agetur. Novus praeses et consilium praesidiale in proximum triennium eligentur. Post meridiem fiet excursio in montes Albanos, ubi Villa Falconeria visitabitur.

Tuomo Pekkanen

29.4.16

Dies nationalis veteranorum

Die Mercurii (27.4.) in Finlandia dies nationalis veteranorum celebrabatur. Sollemnitas principalis, cui etiam praesidens rei publicae Sauli Niinistö aderat, in urbe Oulu acta est. Orationem festam habuit princeps minister Juha Sipilä, qui Finnos nostri temporis bellum hibernum suum ita gerere posse censuit, ut suo quisque labore bono publico prodesset.

(Reijo Pitkäranta)

Obama iter Europaeum fecit

Barack Obama, praesidens Americanorum, qui mense Novembri munus deponet, iter in Europam fecit. Primum quidem Londinium venit, ut reginam Elisabeth nonagenariam salutaret. Inde in Germaniam volavit, ubi cancellariam foederalem Angela Merkel convenit et Hannoverae maximas nundinas industriales inauguravit. Eodem tempore Germanis, quanta commoda pactio de libera mercatura secum ferret, persuadere conabatur.

(Reijo Pitkäranta)

Regimen Poloniae castigatur

Tres pristini praesidentes Poloniae, in iis Lech Walesa, edicto communi divulgato populum suum ad democratiam defendendam hortantur. Regimen partium dextrarum accusant, quod ordinem Poloniae legalem ad irritum redigat: administratores sententiis et actionibus suis antieuropaeis et peregrinis contrariis cum unitatem Europae debilitare tum commodis Russiae inservire.

(Reijo Pitkäranta)

Memoria Tshernobyliensis

Die Martis triginta anni acti erant a gravissima calamitate nucleari in Ucraina facta. Die enim vicesimo sexto mensis Aprilis anno millesimo nongentesimo octogesimo sexto (26.4.1986) accidit, ut quartum reactorium electrificinae in oppido Tshernobyl sitae exploderetur. Omnino quindecim aut etiam triginta milia hominum radiatione et morbis exinde ortis mortua esse existimantur.

(Reijo Pitkäranta)

Malaria iam rarescere coepit

Febris palustris, quae malaria vulgo dicitur, in variis orbis terrarum partibus iam minore vi quam ante grassatur. Anno proximo in tota Europa nullus huius morbi casus repertus est, et etiam in Africa sunt terrae, e quibus haec epidemia evanescere videtur. Idem valet ad civitates Americae Meridionalis. 

(Reijo Pitkäranta)

Aeroplanum ab energia solari

Aeroplanum, quod energia solari utitur, Oceano Pacifico superato in Californiam tuto descendit. Hoc iter ex Insulis Havaianis profectum partem constituit circumvolatus orbis terrarum, qui abhinc tredecim menses ab urbe Abu Dhabi initium cepit. Volatus eo tendit, ut usus energiae se renovantis usque augeatur. 

(Reijo Pitkäranta)

Rhinoceros unicornis Sibiricus

Elasmotherium est nomen scientificum rhinocerotis Sibirici, cuius a media fronte unum cornu exstiterat. Investigatores per decennia aestimabant illam bestiam villosam ante trecenta quinquaginta millennia extinctam esse. Cranium tamen in Cazastania nuper repertum ex computatione radiocarbonica tantum undetriginta milia annorum esse videtur. 

(Antti Ijäs)

22.4.16

Elizabetha II nonaginta annos nata

Elisabeth II, regina Britannorum, die vicesimo primo huius mensis (21.4.) natalicium nonagesimum cum familiaribus celebravit. Britanni ad festivitates publicas mense Maio et Iunio invitabuntur. Elisabeth II est monarcha sedecim nationum et caput Communitatis quinquaginta quattuor populorum, ex quibus quinquaginta duo olim membra erant imperii Britannici. Post abdicationem regis Edwardi VII, rex factus est frater eius Georgius VI, pater Elisabethae, cui mortuo die sexto mensis Februarii anno millesimo nongentesimo quinquagesimo secundo (6.2.1952) illa successit, cum esset viginti quinque annorum. Regnum illius sexaginta quattuor annorum est longissimum in historia Anglorum.

Papa Franciscus insulam Lesbon visit

Die Dominico (17.4.) Papa Franciscus aeroplano in insulam Lesbon venit ibique campum Moriam profugorum una cum patriarcha Constantinopolitano Bartholomaeo et archiepiscopo Hieronymo visit. Profugos monuit ne desperarent et Europaeos appellavit, ut historiae ipsorum recordarentur: “Europa est patria iurum humanorum et quicumque in terram Europaeam venit, potestatem id experiendi habere debet”. Aderat primus Graeciae minister Alexis Tsipras, qui Papae gratias egit pro verbis dictis, “cum ceteri moderatores Europae Christiani contra profugos muros ducerent”. Ex campo Papa secum in aeroplanum pontificale duodecim profugos Syros sumpsit, tres familias musulmanas, quae in civitate Vaticana, ecclesia catholica adiuvante, asylum habebunt.

Amnestia de condicione profugorum monet

Amnestia, ordo a iuribus humanis internationalis, monet condiciones vitae hominum, qui in Graecia clausi in refertis campis vivant, difficillimas esse. Calefactionem sufficientem et loca sanitaria saepe deesse atque homines, ex quibus maior pars sint feminae et pueri, sub divo dormire privata intimitate carentes.

Petrolei productores discordes

Conventus Dohae habitus nullam concordiam invenire potuit. Arabia Saudiana flagitaverat. ut omnes terrae productrices petrolei de productione concordarent, sed Irania ne delegatos quidem ad conventum misit neque suam productionem circumscribere vult. Itaque fieri poterit, ut pretium pro dolio petrolei infra quadragena dollara mox descendat.

A Morte Williami Shakespeare CCCC anni

William Shakespeare, celeberrimus scriptor scaenicarum fabularum, die vicesimo tertio mensis Aprilis anno millesimo sescentesimo sedecimo (23.4.1616), cum esset quinquaginta duos annos natus, diem obiit supremum. Scripsit Anglice duodequadraginta fabulas, centum quinquaginta quattuor soneta, duo carmina longiora. Opera eius in omnes linguas hodiernas maioris momenti versa sunt. Fabulae, inter quas “Romaeus et Iulia” atque “Hamlet” notissimae sunt, in theatris orbis terrarum usque dantur. Anniversarium mortis poetae quadringentesimum variis spectaculis praesertim in Britannia per totum annum celebratur. In Finnia tria opera Verdiana, Othello, Falstaff, Macbeth, in fabulas Sheakespeareanas composita, in urbe Savonlinna mense Iulio dabuntur.

(Tuomo Pekkanen)

15/4/16

De chartis Panamensibus

Animi civium vectigalium toto fere orbe terrarum concitati sunt chartis Panamensibus, quae dicuntur, nuper patefactis. Ex iis apparet multos homines magnae auctoritatis, quin etiam aliquot principes civitatum, reditus suos in computis clandestinis ita collocavisse, ut tributa aerario publico non penderent. Eos in illa fraude adhibenda sede advocatoria Panamensi nomine Mossack Fonseca auxilio usos esse.

(Reijo Pitkäranta)

Moderatores fraudis convicti

In iis moderatoribus civitatum, qui Panamensibus adiutoribus tributa evitavisse videntur, sunt praesidens Argentinae Mauricio Magri, rex Arabiae Saudianae Salman bin Abdul Aziz, praesidens Ucrainae Petro Poroshenko, princeps minister Britanniae David Cameron. Unus eorum est etiam princeps minister Islandiae Sigmundur Gunnlaugsson, qui paulo post fallaciam suam patefactam munus deponere coactus est. 

(Reijo Pitkäranta)

De cohorte nationali Russiae

Vladimir Putin, praesidens Russiae, nuntiavit se cohortem nationalem sibi subiectam constituturum esse, quae contra terrorismum sceleraque ordinata pugnaret. Nam fieri potest, ut discrimine oeconomico in Russia tumultus efficiantur. Victor Zolotov, vir sexaginta duorum annorum et familiaris praesidentis Putin, huic manui securitatis praefuturus est.

(Satu Tuominen)

Piraeus Sinensibus venditus

Piraeus, emporium Athenarum maximi momenti, in possessionem Sinensium venit. Hoc commercio facto Graeci creditoribus suis satisfacere student, qui postulant, ut bona publica Graeca magnam partem privata reddantur. Portus Piraeus a temporibus antiquitatis originem trahit: is enim saeculo a. Chr. natum quinto Themistocle auctore aedificatus est.

(Reijo Pitkäranta)

In Mari Rubro pons fiet

Aegyptus et Arabia Saudiana in Mari Rubro pontem facturae sunt, ut relationes publicas inter se intercedentes meliores reddant. Inceptum tribus aut etiam quattuor miliardis euronum constaturum esse existimatur. Locus exactus, ubi ille pons collocetur, nondum constat. 

(Reijo Pitkäranta)

Numerus tigrium auctus

Numerus tigrium orbis terrarum his decem annis viginti fere centesimis auctus est. Tale incrementum praesertim ad populationem tigrium in India, Russia, Nepalia, Butania viventium valet, cum rerum condicio in terris Asiae meridianae peior sit. Ordo mundi naturae tuendae (WWF) eo tendit, ut multitudo tigrium annis proxime futuris duplex fiat. 

(Reijo Pitkäranta)

Memoria calamitatis Lapuae

Die Mercurii sive Idibus Aprilibus (13.4.) quadraginta anni acti erant, cum officina proiectililibus fabricandis in oppido Lapua displosa est. Ea calamitate, quae in funestissimis in Finlandia factis numeratur, quadraginta homines, imprimis opifices feminae, vitam amiserunt. Die anniversario in sepulcreto Lapuae sollemnitas pia instituta est, qua memoria mortuorum recolebatur.

(Reijo Pitkäranta)

8.4.16

Conventus de securitate nucleari

In conventu de securitate nucleari, Washingtoniae Kalendis Aprilibus finito, de rationibus deliberabatur, quibus periculum terrorismi nuclearis depelleretur. Aderant delegati plus quinquaginta civitatum. Ex novem civitatibus, quae arma nuclearia habent, omnes, exceptis Russia et Corea Septentrionali, delegatos miserant. Praeerat conventui praesidens Barack Obama. In mundo circiter quindecim milia trecentae quinquaginta (15 350) cuspides nucleares esse aestimantur. Ex his plus quattuor milia ad res gerendas apta et parata sunt. Propria arma nuclearia in Europa habent Britannia et Francia, praeterea nuclearia arma Natonis in Belgio, Germania, Italia, Nederlandia conservantur. Omnes participes conventus Washingtoniensis affirmabant se contra propagationem armorum nuclearium et materiae ad ea facienda necessariae contendere. Multa tamen facienda restare, ne materia nuclearis in manus terroristarum perveniret. Terrorismum nuclearem securitati internationali maximo esse periculo, quod usque cresceret.

Immigratores remitti coepti sunt

Ex pacto, quod Unio Europaea cum Turcia fecit, immigratores, qui viis illegalibus in Graeciam venerant neque asylum petiverant, in Turciam die Lunae (4.4.) remitti coepti sunt. Remittuntur cives Bangladesae, Pakistaniae, Srilancae atque civitatum Africanarum. Ordines a iuribus humanis remissiones reprehenderunt, quod essent inhumanae et illegales. Ordo Amnestia Internationalis autumat Turciam non esse tutam, quia multa milia Syrorum in patriam bello afflictam remiserit. Turci autem negant id factum esse. Sicut constitutum erat, ut Unio Europaea totidem petitores asyli a Turcis acciperet, quot Turcia ex Graecia recepisset, primi Syri in Germaniam iam transportati sunt.

Isis suos pugnatores iugulavit

Ordo terroristicus Isis sive Daesh in Syria triginta quinque pugnatores suos die Saturni (2.4.) comprehendit, ex quibus quindecim, speculationis et corruptionis accusatos, prope urbem Raqqa iugulavit. Quod factum est, postquam Abu Hija al-Tunisi, unus ex ducibus ordinis, ictu aerio die Mercurii (30.3.) occisus est.

Acciaroli, vicus longaevorum

Investigatores credunt secretum vitae longae et felicis forsitan apud mare Tyrrhenum in vico Acciaroli inveniri posse. Ibi circiter mille homines habitant, ex quibus plus trecenti diutius quam centum annos vixerunt. De his centenariis forsitan viginti centesimae (20%) aetatem centum decem annorum iam superaverunt. Nunc investigatio Italo-Americana suscipitur, ut consuetudines vitae et hereditas genetica hominum huius vici accuratius exploretur. Multi quidem ex incolis senioribus superponderosi esse videntur et haud pauci tabacum fumificant. Sed cotidie fere in cibis habent sardinas et pro condimento rosmarinum. Praeterea multum in regione clivosa ambulant.

(Tuomo Pekkanen)

1.4.16

Ecclesia in Ylivieska combusta

Die Saturni hebdomadae sacrae (26.3.) in Finlandia casus tristissimus accidit, cum aedes sacra oppidi Ylivieska ad cineres redacta est. Neque dubium erat, quin incendium dolo malo conflatum esset. Auctor sceleris videtur esse iuvenis quidam triginta fere annorum, qui paulo post prope ruinas templi deprehensus est. Quibus rebus commotus Herostratus ille facinus suum commiserit, nondum constat.

(Reijo Pitkäranta)

Karadzic genocidio convictus

Radovan Karadzic, pristinus dux Serborum, a iudicibus Nationum Unitarum vinculis quadraginta annorum condemnatus est. Convictus erat genocidii anno millesimo nongentesimo nonagesimo quinto (1995) in Bosnia editi, quo octo fere milia virorum et puerorum Musulmanorum occisa sunt. Insuper noxium se praebuit obsidionis urbis Seraii, quae multis milibus civium perniciei fuit.

(Reijo Pitkäranta)

Cives Americani e Turcia abeunt

Administratores Civitatum Americae Unitarum familiis militum et legatorum in Turcia meridiana collocatorum imperaverunt, ut statim illam terram relinquerent. Idem suos praemonent, ne in Turciam itinera faciant propter condicionem securitatis ibi debilitatam.

(Reijo Pitkäranta)

Discrimen in Brasilia politicum

In Brasilia discrimen administrationis ortum est, quo status praesidentis Dilma Rousseff labefactatur. In causa est, quod maxima factio politica recusare decrevit, quominus operae regiminis iam interesset. Quo factum est, ut etiam praesidens civitatis potestatem suam amittere periclitatur. Neque enim munere suo fungi potest, nisi fidem tertiae partis congressus habet.

(Reijo Pitkäranta)

Palmyra ab Isis recuperata

Copiae regiminis Syriae Palmyram, urbem perveterem, ab ordine Isis recuperaverunt. Quo facto apparuit monumenta antiqua, quae ibi sunt, melioris condicionis esse quam metuebatur. Isis, postquam anno bis millesimo quinto decimo (2015) ea urbe potitus est, magnam multitudinem parietinarum et aliarum rerum antiquitatis delevisse dicebatur.

(Reijo Pitkäranta)

Memoria seditionis Irlandiae

Septimana vergente Dublini, in capite Irlandiae, pompa militaris magnifica instituta est. Tum enim centum anni acti erant ex seditione populari, quae ad libertatem Irlandiae aspirabat. Regimen Irlandiae edicto proposito nuntiavit illa sollemnitate omnium eorum memoriam recoli, qui pugnis anno millesimo nongentesimo sexto decimo (1916) factis vitam amisissent. 

(Reijo Pitkäranta)

Finlandia viatores allicit

Res viaria in Finlandia pulchre procedit. Una causa videtur esse, quod ictibus terroristicis in Media Europa factis et ora Maris Mediterranei ex cursu profugorum laborante viatores metas itineris novas quaerunt. In Finlandiam pergunt, quia tuta existimatur. Periegetae mores Finnicos cognoscere volunt: bacas colligunt, sauna utuntur, pistoria Carelica faciunt.

(Saara Honkanen)

25.3.16

Praesidens Niinistö Moscuma visit

Praesidens Finniae Sauli Niinistö die Martis (22.3.) Moscuae praesidentem Vladimirum Putin convenit. Praesidentes collocuti sunt de petitoribus asyli, qui via septentrionali ex Russia in Finniam venerunt. Putin affirmavit peregrinos, Russis et Bielorussis exceptis, illa via in Finniam iam non venturos esse. Tractabantur etiam quaestiones oeconomicae et commercium, quod propter sanctiones deminutum est, praeterea discrimen Ucrainae, bellum Syriacum atque terrorismus internationalis. Praesidentes sollicitabantur ictibus terroristicis illo ipso die Bruxellis factis. Uterque familiaribus victimarum dolorem suum declaravit et de cooperatione monuit, quam pugna contra terrorismum flagitaret.

Bruxellis tres explosiones

Die Martis mane in aeriportu Bruxellensi duae bombae exploserunt, una explosit in tramine metropolitano apud stationem Maelbeek, quae haud multum ab aedibus consilii Europaei distat. Unus et triginta homines perierunt, numerus vulneratorum ducentos septuaginta superat. Utramque stragem ordo Isis sibi vindicat. Auctores facinorum tres fuisse creduntur, ex quibus duo mortui sunt, unus quaeritur sed nondum repertus est. Bruxellis fuit domicilium etiam terroristarum, qui mense Novembri ictibus Parisiis factis centum sexaginta homines occiderunt. Salah Abdeslam, unus ex auctoribus illius stragis nuper (17.3.) Bruxellis in suburbio Molenbeek deprehensus est.

Pactum inter Turciam et Unionem Europaeam

Unio Europaea pactum de immigratoribus remittendis cum Turcia fecit. Illud pactum die Dominico (20.3.) valere coepit. Omnes immigratores, qui post hunc diem in Graeciam venerunt, in Turciam remittentur, si asylum non petent aut petitio eorum reicietur. Remissiones pridie Nonas Apriles (4.4.) incipient. Unio Europaea autem tot petitores asyli, quot in Turciam remissi erunt, ex eis, qui in Turcia iam sunt, in Europam acceptura est. Turciae praeterea pecunia solvetur atque colloquia de societate eius in Unione Europaea et de viso Turcis concedendo maturabuntur.

Sintne animalia in circensibus habenda

Germani deliberant, an vetandum sit, ne magna animalia fera in spectaculis circensibus habeantur. Agitur de elefantibus, ursis, tigribus, camelopardalibus sive girafis, rhinocerotibus, hippopotamisque. Sunt, qui etiam spectacula simiarum vetare velint. Propositum de his spectaculis vetandis a tribus civitatibus foederatis ad moderatores Germaniae relatum est.

Cerasi in Iaponia iam florent

In Iaponia Institutum Meteorologicum praevisiones divulgat, quo modo efflorescentia cerasorum ex meridie ad septentrionem progrediatur. Die Sabbati (19.3.) nuntiatum est aliquot cerasos in insulis Iaponiae principalibus iam florere, quod maturius fit quam assolet. Apud Iapones mos est ad flores cerasi spectandos sub arbores congregari diem vernalem celebrantes.

(Tuomo Pekkanen)

18.3.16

Consultationes pacis

Genavae, in urbe Helvetiae, consultationes pacis in Syria restituendae agi coeptae sunt. Staffan de Mistura, conciliator Nationum Unitarum, legatos omnium partium belligerantium separatim conventurus est. ”Agitur”, inquit, ”de ultimo occasionis momento. Si novissima quoque colloquia pacis ad irritum ceciderint, bellum in dies ingravescet”.

(Reijo Pitkäranta)

Russi ex Syria abeunt

Actio militaris, quam Russi mense Septembri exeunte in Syria susceperant, ad finem adducta est. Nuntiavit enim praesidens Vladimir Putin copias Russorum ex Syria reductum iri ea scilicet causa, quod mandatum suum ibidem perfecissent. Neque tamen omnes milites domum redibunt, sed aliquot cohortes stationibus militaribus, quas Russi in Syria habent, praesidio relinquentur.

(Reijo Pitkäranta)

Quid Obama dixerit

Animi Britannorum commoti sunt verbis acerbis, quibus praesidens Barack Obama eos reprehendit. Ait enim dictaturam Libyae auctoribus Americanis anno bis millesimo undecimo (2011) oppressam esse, sed civitates Europae de ea re parum curavisse. Principem ministrum Britanniae David Cameron paulo post animum ad alia negotia attendisse, unde factum esset, ut Libya in magnas perturbationes incideret.

(Reijo Pitkäranta)

Sancta mater Teresa

Mater Teresa, monacha celeberrima abhinc undeviginti annos mortua, mense Septembri consecrabitur, ut papa Franciscus Idibus Martiis (15.3.) nuntiavit. Rerum periti Civitatis Vaticanae censuerunt nihil iam impedire, quominus soror illa in numerum sanctorum referretur. Eam enim post mortem duo miracula fecisse, cum duos homines ex morbo letali sanaret.

(Reijo Pitkäranta)

Milites ordinis Isis

Circiter centum homines ex Finlandia peregre profecti sunt, ut in copiis Ordinis Isis pugnarent. Timo Soini, minister a rebus exteris, de ea re sollicitus monuit tantam multitudinem pro numero incolarum Finlandiae in maximis in Europa esse. Constat viginti fere ex illis militantibus in pugnis mortuos esse.

(Reijo Pitkäranta)

De urso americano

’Ursus americanus luteolus’ in silvis civitatum Ludovicianae et Mississippiae vivens non iam emori periclitatur. Abhinc viginti quattuor annos tantum centum quinquaginta ursi silvestres inveniebantur, hodie autem plus septingenti. Hoc animal clarum factum est, cum praesidens Theodore Roosevelt id frustra venatus urso vulnerato et ad arborem ligato pepercit.

(Satu Tuominen)

Petra Olli victrix

Rigae, in urbe Lettoniae, certamina de principatu luctandi Europaeo posita sunt. In serie feminarum sexaginta chiliogrammatum nomisma aureum consecuta est Petra Olli, athleta Finlandensis unius et viginti annorum. Superavit enim adversariam Ucrainam Oksana Herhel punctis octo ad duo (8-2).

(Reijo Pitkäranta)

11.3.16

Transitus profugorum in Lapponiam orientalem finites

Mense Novembri anni proximi numerus profugorum ex Russia ita crescere coepit, ut circiter centeni septimanatim in Finniam septentrionalem venirent. Maior pars asylum petentium oriundi erant ex Afganistania, India, Bangladesa, pauci ex Syria et Iraquia. Post Kalendas Martias ad limitem iam nulli ex Russia profugi venerunt. Russi nuntiaverunt se operationes impedivisse, quibus profugi ad limitem Finniae ducerentur. Etiam ex oppido Kantalahti apud Mare Album sito, in quod homines Finniam petituri convenerant, custodes publici eos expulerunt. Petteri Orpo, minister a rebus exteris Finniae, annotavit res in limite orientali ita processisse, ut Finni sperarent.

Donald Tusk: "Nolite venire in Europam!"

Donald Tusk, praeses Consilii Europaei, homines meliores vitae condiciones petentes monuit, ne in Europam venirent. "Omnes profugos illegales appellare volo”, inquit, "undecumque oriundi estis. Nolite venire in Europam. Nolite transportatoribus clandestinis confidere. Nolite vitam et pecunias vestras in discrimen committere. Omnia, quae habetis, amittetis."

Venezuela gravissima regressione laborat

Venezuela, terra undetriginta milionum incolarum, regressione oeconomica laborat. Habet quidem maximas opes petrolei, sed cum ante duos annos singula dolia petrolei Venezuelani centenis dollaris constarent, nunc minus tricenis constant. Venezuela nonaginta quinque centesimas (95%) redituum exportationis ex petroleo accipit. Pretio deminuto etiam reditus rei publicae deminuti sunt. Angustiae civium causam habent etiam in erroribus regiminis. Annis prosperioribus nihil repositum est, immo novum aes alienum contractum. Nunc cives rebus cotidie necessariis carentes apud tabernas in longissimis agminibus per multas horas exspectant, ut oleum, oryzam, saccharum, farinam, saponem aliaque necessaria emere possint.

Memoria stragis Virodunensis

Ante centum annos in regione oppidi Viroduni, vulgo Verdun, inter Francos et Germanos proelium commissum est, quod maximum belli mundani secundi fuisse aestimatur. Inter decem menses ancipiti proelio maximisque utrimque cladibus pugnatum est. Germani denique castellum Duaumont expugnaverunt, quod Franci postea recuperaverunt. Virodunum numquam expugnatum est.

Orangutani sunt plures quam antea

Orangutani (Pongones pygmaei) in Sumatra septentrionali plures vivunt quam antea credebatur. Computatum est numerum eorum esse quattuordecim milium sescentorum (14 600), qui octo milibus maior est quam ante septem annos. Nihilo minus periculum est, ne species exstinguatur, quia homines silvas delent, ut spatia ad culturam palmarum oleariarum (Elaeis guineensis) habeant. Periculum autem minus est quam timebatur. Videntur enim orangutani ad mutationes, etiam ad silvas caesas, melius assuescere quam putabatur. Orangutanus est maximum animalium mammiferorum in arboribus viventium. In arbore nidificat, in terram raro descendit, sed ex arbore in arborem se vibrans movetur.

Tuomo Pekkanen

4.3.16

Clinton et Trump victores

Die Martis (1.3.) in undecim civitatibus Americae septentrionalis comitia primaria praesidentialia habita sunt ad decernendum, quem ex omnibus petitoribus utraque factio suum candidatum nominaret. Inter democratas victoriam reportavit Hillary Clinton, cum Donald Trump republicanis acceptissimus esset. Uterque eorum suffragia septem civitatum sibi conciliavit.

(Reijo Pitkäranta)

Comitia in Irania facta

In Irania post pactum nucleare cum terris occidentalibus factum comitia parlamentaria instituta sunt. Sententiis computatis apparuit eos, qui una cum praesidente Hassan Rouhani rebus renovandis faverent, victores evasisse. Potiti enim sunt octoginta quinque sedibus, cum conservativi, qui antea in parlamento praevalebant, nonnisi duodesexaginta loca acciperent. Parlamentum Iraniae ex ducentis nonaginta legatis constat.

(Reijo Pitkäranta)

Memoria caedis Palme

Die Dominico (28.2.) triginta anni acti erant, cum Olof Palme, princeps minister Suetiae, media urbe Stockholmia occisus est. Quis auctor sceleris fuerit, adhuc non constat. Anno millesimo nongentesimo undenonagesimo (1989) vir nomine Christer Pettersson in iudicio regionali illius caedis vinculis sempiternis damnatus est, sed postea iudices superiores eum crimine absolverunt.

(Reijo Pitkäranta)

Fifa praesidem creavit

Socii Foederationis pedifollicae internationalis (FIFA) conventu Tiguri habito sibi novum praesidem creaverunt. Posthac illi ordini maximo praeerit Gianni Infantino, iuris consultus quadraginta quinque annorum in Helvetia natus. Ad eum eligendum duo suffragia ineunda erant, quibus legati ducentarum septem civitatum interfuerunt.

(Reijo Pitkäranta)

Vindobona urbs optima

In investigatione nuperrime divulgata multae orbis terrarum urbes inter se comparatae sunt ad explorandum, in qua urbe qualitas vitae optima esset. De rebus vitam incolarum afficientibus inter alia stabilitas politica, cura valetudinis, cultura urbana, sumptus habitationis inspiciebantur. Primum locum occupavit Vindobona, quam secuta sunt Tigurum, Auclandia et Monachium.

(Saara Honkanen)

Nummus pretiosissimus

In Museo nationali Finlandiae non ita pridem nummus pretiosissimus ante oculos positus erat. Agebatur de primo dollario Americano anno millesimo septingentesimo nonagesimo quarto (1794) Philadelphiae excuso. Hic nummulus argenteus, quae ‘Coma fluitans’ appellatur, cum ibi imago capitis Deae libertatis caelata sit, decem fere milionibus dollariorum valet.

(Reijo Pitkäranta)

Cimices valde aucti

His decem annis incommodum cimicum in terris septentrionalibus pessimum factum est. Causa huius mali videtur esse res viaria valde aucta: cimices enim imprimis in sarcinis hominum itinera facientium nidulantur indeque huc illuc diffunduntur. Qui his scarabaeis molestissimis liberari vult, sarcinas in balneo calidissimo per multas horas retineat.

(Reijo Pitkäranta)

26/2/16

Britannia et Unio Europaea concordiam invenerunt

David Cameron, primus minister Britanniae, et moderatores Unionis Europaeae concordiam de condicionibus invenerunt, quibus Britannia ex Unione Europaea non exiret. His condicionibus palam factis Daily Mail, acta diurna Britannica, demoscopium faciendum curavit, unde apparuit duodequinquaginta centesimas (48%) Britannorum velle, ut Britannia in UE maneret. Triginta tres centesimas (33%) Britanniae exitum malle, qui “brexit” vulgo dicitur. Cameron nuntiavit scitum populi de societate cum Unione Europaea continuanda die vicesimo tertio mensis Iunii (23.6.) futurum esse. Britannis suasit, ut societati continuandae suffragarentur, quia concordia cum Unione Europaea facta Britanniae statum specialem praebuisset. Boris Johnson, burgimagister Londinii magnae auctoritatis, nuntiavit se discessui Britanniae favere. Se velle, ut patria maiorem de suis rebus potestatem in Unione Europaea haberet. Primo ministro Cameron non contigisse, ut satis bonum de statu speciali Britanniae pactum consultando efficeret.

Quid Britannos in Unione Europaea irritet

Britannia est insula extra Europam, in quam mille annis expugnatores non venerunt. Ideo discessionis fautores credunt Fretum Gallicum adhuc patriam suam a motibus continentis defendere. Britannia fuit olim imperium praepotens, est membrum perpetuum Consilii Securitatis et speciales cum USA relationes habet. Multis displicet, quod Francia et Germania in Unione praevalent et quod immigratores in Britanniam influunt. Problemata oeconomica et inopia quaestus Euroregionis suspiciones Britannorum auxerunt. Dum oeconomia in Britannia crescit, homines nolunt suas fortunas cum Graecia, Francia, Italia aliisque terris eius generis coniungere.

Ignistitium in Syria futurum?

John Kerry, minister a rebus exteris Americanus, et Sergei Lavrov, a rebus exteris minister Russiae, concordiam de ignistitio in Syria faciendo invenerunt. Praesidentes Barack Obama et Vladimir Putin de ea re die Lunae (22.2.) telephonice collocuti sunt. Propositum est, ut ignistitium die Sabbati (27.2.) incipiat. Spectabit ad omnes greges belligerantium, exceptis illis ordinibus, quos Consilium Securitatis Nationum Unitarum terroristicos iudicavit. Ignistitium ab omnibus partibus, quae bellum gerunt, confirmandum erit, quod futurum est difficillimum. Russia aciem al-Nusra, quae pars est contra praesidentem al-Assad rebellantium, bombardare continuabit.

Profugi Iraquiani in patriam revertuntur

Circiter tria milia Iraquianorum, qui in Finniam asylum petentes venerant, in patriam reverterunt. Plurimi sua sponte suisque sumptibus Finniam reliquerunt. Hodie ex duobus profugis advenientibus unus abit. Illi, qui in patriam reverti volunt, aeroplanis epibaticis ex Finnia in Iraquiam septimanatim portantur.

(Tuomo Pekkanen)

19.2.16

Quid Medvedev dixerit

Russia et civitates occidentales ad novum bellum frigidum delapsae sunt, ut ait Dmitri Medvedev, princeps minister Russiae. Hanc sententiam pronuntiavit in conventu securitatis Monaci acto, quo magna multitudo moderatorum politicae internationalis congregata erat. Monuit rerum statum hodiernum a praesidente Vladimir Putin iam ante novem annos recte praedictum esse.

(Reijo Pitkäranta)

Quid Ahtisaari senserit

Martti Ahtisaari, praesidens olim Finlandiae idemque praemio Nobeliano pacis ornatus putat claves belli Syriaci componendi penes Russiam et Civitates Americae Unitas esse. Censuit in potestate earum esse, utrum discrimen, quo Syria iam quinque annos laborat, solvi posset, necne. Ahtisaari opinionem suam in colloquio cum diurnariis in urbe Helsinki habito palam fecit.

(Reijo Pitkäranta)

De profluvio methani

Ingens profluvium methani, quo urbs Angelopolis inde a mense Octobri afflicta erat, iam coercitum esse videtur. Nuntiatur enim fontem gasi erupti interim obturatum esse. Propositum est, ut foramen terebratorium calcestro repleretur ad prohibendum, ne methanum periculosum iam umquam ex ima terra sursum emanaret.

(Reijo Pitkäranta)

Mafiosi in Sicilia capti

Centum tres homines a custodibus publicis Italianis capti sunt, cum suspicio esset eos pecuniam extorsisse et alia scelera commisisse. Sunt ex familia mafiosa Laudani, quae iam multos annos Siciliam terret.Vel tres feminae accusantur, quod constanter pecuniam tutelarem mercatoribus aliisque extorserint. Enzo Bianco, praefectus urbi Cataniae, tribum Laudani cancrum urbis descripsit.

(Satu Tuominen)

Ehud Olmert in vinculis

Ehud Olmert, pristinus princeps minister Israelis septuaginta annos natus poenam carceris undeviginti mensium pati coepit. Convictus est anno bismillesimo quarto decimo (2014) largitionis acceptae et iuris obstructi. Crimen ad id tempus pertinet, quo Olmert, ante quam princeps minister factus est, munere praefecti urbis Hierosolymorum fungebatur.

(Reijo Pitkäranta)

Ikea fraudis accusatur

Commissio Unionis Europaeae cognitura est, num Ikea, complexus mercatorius supellectilis, dolo malo tributa effugerit. Fautores factionis prasinorum, qui in parlamento Unionis Europaeae sunt, hoc opus mercatorium de variis fraudibus accusant. Ita impetratum esse, ut Ikea spatio sex annorum tributa debita non solveret. 

(Reijo Pitkäranta)

De catarrho epidemico

Hac hieme catarrhus epidemicus solito gravior in Finlandiam invasit. Quanta fuerit vis morbi, vel inde apparet, quod iam undeviginti homines inde vitam amiserunt. In iis sunt infans duorum annorum et senex octoginta annos natus, sed etiam cives laboris patientes et bona valetudine plerumque gaudentes cura efficaciore eguerunt.

(Reijo Pitkäranta)

12.2.16

Praesidens Sauli Niinistö de immigratione

Oratione, quam parlamentum inaugurando (3.2.2016) habuit, praesidens Finniae Sauli Niinistö inter alia immigrationem tractavit. Monuit fluctum hominum, qui in Europam fieret, magnopere esse migrationem, qua non praesens periculum sed aliud fugeretur. “Is, qui vocabulum asyli dicere scit, in Europam admittitur et hoc vocabulo illi ius limitem transeundi datur .… Europa immigrationem immoderatam diu sustinere non valebit. … Dum bonum petitur, fit, ut omnibus malum afferatur… Qui sunt in periculo aut persecutionem patiuntur, illi nobis sunt adiuvandi. Eos autem adiuvare nunc non possumus, qui meliora quaerunt et vitam praesentem aut futuram in patria difficilem iudicant.”

Maior pars Finnorum recognitioni immigrantium favet

Ex demoscopia recenti apparuit plerisque Finnis placere, ut recognitiones in limitibus patriae susciperentur. Duodesexaginta centesimae (58%) civium recognitiones comprobant, una et triginta centesimae (31%) nolunt, undecim centesimae (11%) sententiam non dicunt. Propter crisim immigrationis fieri poterit, ut Finnia, sicut iam Suecia et Dania fecerunt, primo vere recognitiones suscipiat.

Papa Franciscus et patriarcha Kyrillos conveniunt

Anno millesimo quinquagesimo quarto (1054) in synodo Nicaeensi magnum schisma inter ecclesiam orthodoxam et catholicam ortum est. Constituendum erat de verbis confessionis fidei et disputabatur de Spiritu Sancto, unde ortus esset. Delegati ecclesiae occidentalis asseverabant Spiritum sanctum “ex Patre filioque” procedere, orientales autem vocabulum “filioque” non probabant. Tanta erat discordia, ut ecclesiae catholica et orthodoxa altera alteram excommunicarent. Excommunicatio non ante est revocata quam anno millesimo nongentesimo sexagesimo quinto (1965). Inter schisma papa catholicorum et patriarcha orthodoxorum numquam convenerunt. Hodie (12.2.) autem ecclesiarum moderatores primum post synodum Nicaeensem coram colloquuntur. Papa Franciscus et patriarcha Kyrillos (Kirill) in aeriportu Havannae conveniunt. Papa ibi descendit in Mexicum iter faciens, patriarcha autem his diebus Cubam visitat. Disserunt de condicione rerum hodierna, cum Christiani in multis terris persecutionem patiuntur. Propositum est, ut sententiae communi ad relationes ecclesiarum meliorandas subscribant.

Magna pars Africae siccitate laborat

Siccitas exceptionalis Africam septentrionalem, orientalem meridionalemque temptat. Complures hominum miliones domicilia relinquere et meliores condiciones vitae alibi quaerere coguntur. Pessima est siccitas in Zimbabuia, ubi quarta pars incolarum sive duo miliones et dimidium celeri auxilio cibario egent. Corruptio magistratuum et regimen ineptum rem gravant. Similiter se habent Malawium, Zambia, Mozambicum, ubi fluminibus siccatis armenta siti moriuntur. In Aethiopia et Somalia siccitas peior esse dicitur quam ineunte decennio nono saeculi proximi, cum complura centena milia hominum siccitate perierunt. Etiam in ora Maris Mediterranei, in Marokio, Algeria Tunesiaque, pluviae fuerunt minimae.

(Tuomo Pekkanen)

5.2.16

Sipilä et Medvedev collocuti

Juha Sipilä, princeps minister Finlandiae, collegam suum Russum Dmitri Medvedev Petropoli convenit. In colloquiis communibus maxime id deliberabant, quonam modo prohiberi posset, ne immigrantes ex Russia in Finlandiam illegaliter venirent. Medvedev dicta eorum refellit, qui contenderent profugos a Russis in Finlandiam consulto mitti, ut condicio Unionis Europaeae labefieret. 

(Reijo Pitkäranta)

Comitia primaria Americana

In Civitatibus Americae Unitis comitia praesidentialia primaria initium ceperunt. Suffragio in civitate Iowa habito victoriam certaminis candidatorum republicanorum reportavit senator Ted Cruz: is enim competitorem Donald Trump quattuor centesimis superavit. In democratis autem Hillary Clinton et Bernie Sanders tam aequo Marte dimicaverunt, ut, uter eorum palmam ferret, vix decerni potuerit.

(Reijo Pitkäranta)

Castro in Europam venit

Raul Castro, praesidens Cubae octoginta quattuor annos natus, Lutetiam Parisiorum venit, ut iter officiale unius septimanae in Europa incoharet. Cur proprie in Francogalliam advenerit, inde intellegitur, quod praesidens Francois Hollande ad interclusionem Cubae commercialem tollendam multum contulit. Praeterea memoria tenendum est eum anno proximo Cubam visitavisse.

(Reijo Pitkäranta)

Flavivirus grassari coepit

Epidemia nomine Flavivirus in multis terris Americae Latinae grassari et inde etiam aliorsum diffundi coepit. Hic morbus contagiosus feminis gravidis periculosissimus est, cum suspicio non absit, quin in infantibus neonatis microcephaliam et alias deformitates efficiat. Origo huius mali est idem insectum, per quod febris flava ab alio ad alium serpere solet. 

(Reijo Pitkäranta)

Dies festi Venetiis aguntur

Venetiis, in urbe Italiae pernota, his diebus sollemnia antequadragesimalia, vulgo carnevalia dicta, variis modis celebrantur. Constant imprimis ex pompis et spectaculis diversi generis, quorum partes principales homines personam conspicuam gerentes et veste versicolori induti agunt. Inter hos dies festos Venetias tres fere miliones viatorum obire existimantur.

(Reijo Pitkäranta)

Lapponia Americanos docet

Milites Americani in Lapponia una cum Finnis in re militari arctica se exercuerunt. Cursus a Brigata Venatoria institutus est. Participes didicerunt inter alia ex foramine glaciei evadere, per crustam glaciatae nivis scridare, tarandrum trucidatum sub divo coquere. Americani Finnorum peritiam temporum brumalium plurimi aestimant. 

(Antti Ijäs)

Novum culmen mundanum

Wilma Murto, puella Finlandensis septendecim annorum, perticae ope altitudinem quadringentorum septuaginta unius (471) centimetrorum superavit. Haec praestatio novum culmen mundanum in saltu perticario feminarum viginti annis minorum efficit. Certamen, ubi illam rem gessit, Bipontini sive in oppido Germanorum Zweibrücken, pridie Kalendas Februarias (31.1.) positum est.

(Reijo Pitkäranta)

29.1.16

Profugi novas vias quaerere coeperunt.

Postquam Hungaria, Austria, Slovenia aliaeque terrae Balcanicae immigrationem novis rationibus consiliisque restringere coeperunt, profugi alias vias in Europam septentrionalem quaerere coeperunt. Primum Moscuam veniunt, deinde aeroplanis aut traminibus petunt Murmanskam, in paeninsula Kola sitam, unde ad limitem Norvegiae aut Finniae autoraedis portantur. Cum Norvegi immigratores accuratius examinare et eos, qui sine iusta causa venerant, in Russiam remittere coepissent, petitores asyli cursum ad limitem Finniae mutaverunt. Antea per transitus Finniae septentrionales aliquot tantum homines in anno venerunt, mense Novembri numerus ita crescere coepit, ut circiter centeni septimanatim venirent. Maior pars sunt Afgani, Indi, Nepaliani, Iraniani. Ex Syria et Iraquia usque adhuc tantum viginti homines venerunt. Custos limitis Russiae rettulit servitium securitatis Russiae (FSB) una cum magistratibus regionalibus transportationem profugorum curare.

XV terrae Nationibus Unitis stipem annuam non contulerunt

Ban Ki-moon, secretarius generalis Nationum Unitarum, censet terras, quae societati stipem annuam solvere neglexerint, in coetu generali suffragium non habere. Suffragium autem permitti posse, si causa omissionis ex ipsis non pendeat. In his terris, quae quindecim numerantur, est Venezuela, membrum Consilii securitatis, quod mense proximo illi praesidebit.

Irania centena aeroplana emptura

Sanctionibus oeconomicis sublatis Irania complura centena aeroplana epibatica ex occidente emptura est. Dum praesidens Hassan Rouhani hac septimana Parisios visit, Irania iam centum quattuordecim aeroplana a societate Airbus emit. Proximo triennio quingenta nova Iraniae necesse erunt, ut minister commeatus Iraniae Abbas Akhoudi nuntiavit.

Calamitas in Bolivia oecologica

In Bolivia factum est, ut lacus Poopó, amplitudine mille fere chiliometrorum quadratorum, aresceret. Ex aquis eius non plus quam duae centesimae restant. Investigatores iudicant maximam causam calamitatis esse in politica magistratuum imprudenti. Poopó aquas suas ex lacu Titicaca per flumen Desaquadero cepit. Annis proxime praeteritis magistratus permiserunt, ut inde usque maiores aquae copias in usum agricolationis et industriae fodinariae ducerentur. Praeterea pluviae fuerunt rariores et mutatio climatis temperaturam caeli uno fere gradu auxit. Piscatores victum amiserunt et septuaginta quinque species avium eius regionis nova domicilia quaerere coactae sunt.

Stephen Hawking: Homines mundum delebunt

Stephen Hawking, celeberrimus physicus et cosmologus, censet bella nuclearia, mutationem climatis vel vira genetice mutata efficere posse, ut mundus pereat. Generi humano ante omnia imminere pericula, quae homines ipsi creaverint. Etsi calamitatem certo quodam anno non esse probabilem, tamen tempore labente periculum multiplicari et proximis mille annis aut decem milibus annorum prope inevitabile fore.

(Tuomo Pekkanen)

22.1.16

Obama et Putin collocuti

Barack Obama, praesidens Civitatum Americae Unitarum, et Vladimir Putin, praesidens Russiae, septimana praeterita diu de rebus internationalibus telephonice collocuti sunt, ut ex Domo Alba narratur. Primores civitatum discrimen Ucrainae egisse et futurum systema politicum Syriae cogitavisse. Chersoneso ad Russiam adiuncta relationes inter Russiam et nationes occidentales intercedentes redditae sunt frigidiores.

(Saara Honkanen)

Irania sanctionibus libera

Ordo internationalis ab energia atomica (IAEA) nuntiavit Iranianos omnes condiciones pactionis nuclearis mense Iulio factae secutos esse. Qua re audita Unio Europaea et Civitates Americae Unitae decreverunt, ut sanctiones oeconomicae illis impositae tolli possent. Neque enim iam metuere videntur, ne Iraniani intra breve tempus arma nuclearia praeparare valeant.

(Reijo Pitkäranta)

Res Poloniae aestimantur

Commissio Unionis Europaeae aestimare constituit, num regimen Poloniae principia civitatis in legibus positae violavisset. Id enim et aliquot moderatores Radiophoniae Polonicae generalis et quosdam iudices tribunalis constitutionalis a munere amovit eosque cum novis commutavit. Sunt tamen, qui consilio Unionis adversentur censentes de rebus Poloniae internis agi.

(Reijo Pitkäranta)

Forum oeconomicum mundi

Die Mercurii (20.1.) Forum oeconomicum mundi (WEF) Davosae, in oppido Helvetiae Alpino, conventum hornotinum celebrare coepit. Huic consessui circiter duo milia quingenti homines magnae auctoritatis e diversis orbis terrarum partibus intersunt. Colloquuntur de iis variis mutationibus, quibus totum genus humanum annis proxime futuris afficietur. 

(Reijo Pitkäranta)

Papa silvulam dono accepit

Episcopi ecclesiarum Finlandiae Lutheranae, catholicae, orthodoxae, itinere Romam una suscepto, in civitate Vaticana pontificem Romanum Franciscum convenerunt. Papa, quippe qui in orationibus saepe mentionem naturae tuendae fecisset, ab hospitibus partem silvae in Finlandia sitae dono accepit. Illud arboretum prope urbem Borgoam invenitur.

(Reijo Pitkäranta)

Athletica levis inquinata

Foedus athleticae levis Britanniae omnes primatus mundanos irritos faciendos esse censet. Dura consilia capiantur necesse esse, ut omnis suspicio fraudis ab athletica tandem removeatur. Ed Warner, praeses illius foederis minitans: ”Quisquis”, inquit, ”praestationes suas remediis vetitis adhibitis meliores reddere conatus erit, in aeternum a certaminibus excludatur.”

(Reijo Pitkäranta)

Nocti polari finis factus

Nox polaris tota Lapponia praeteriit. In Utsjoki enim, quae paroechia Finlandiae maxime septentrionalis est, die Dominico (17.1.) paulo ante meridiem sol, qui mense Novembri exeunte occiderat, rursus in conspectum venit. Primum quidem non nisi unam horam in caelo apparebat, sed posthac vis lucis ibidem tantopere augebitur, ut septimana proxima dies iam trium horarum sit.

(Reijo Pitkäranta)

15.1.16

Displosio Constantinopoli fortissima

In platea Sultanahmet urbis Constantinopolis, quam plateam periegetae frequentare solent, die Martis (12.1.) mane displosio fortissima facta est. Decem homines mortui sunt, quindecim vulnerati, inter quos Germani aliique peregrini. Praesidens Turciae Recep Tayyip Erdoğan iudicat displosionem fuisse ictum terroristae suicidae originis Syriacae.

Feminae vigilia novi anni molestabantur

Vigilia novi anni magnus numerus virorum, qui ex terris Arabicis oriundi esse videbantur, in media urbe Colonia feminas sexualiter aut aliis modis molestabant. Plus quam quingenta scelera huius generis magistratibus denuntiata sunt. Vigiles censent magnam partem ex aggressoribus fuisse asyli petitores. Erant inter eos etiam, qui illegaliter in Germania versarentur. Propter magnum numerum turbatorum vigiles urbis feminas defendere et rapinas impedire et delinquentes ilico deprehendere non potuerunt. Ob rem male gestam Wolfgang Albers, praefectus vigilum Coloniae, qui a civibus vehementer vituperabatur, a magistratu amotus est. Neque in Finnia similis feminarum molestatio defuit, immo frequentior facta est quam ante. Lasse Aapio, praefectus vigilum urbis Helsinki, rettulit custodibus publicis frequenter denuntiatum esse, quo modo viri peregrinae originis feminas violenter adire temptavissent. Modum delinquendi esse novum, cum illa scelera a gregibus virorum contra singulas feminas fierent.

Merkel sceleratis expellendis parata

Cancellaria Germaniae foederalis Angela Merkel, quam cives ob laxam politicam immigrationis culpaverunt, parata est criminis damnatos expellere. Factio eius (CDU) suadet, ne petitoribus asyli, criminis damnatis, residentia concedatur. Ex lege hodierna tantum poena carceris minime trium annorum ad causam sufficit, ut petitor expellatur, antequam petitio eius pertractata sit. Die Lunae (11.1.) multa hominum milia Lipsiae (Leipzig) contra politicam immigrationis Merkelianam agmine facto reclamitabant. Cancellariam accusabant, quod patriam deleret, cum anno praeterito undecies centena milia immigratorum in Germaniam admisisset. Similes reclamationes, quas fautores extremae dextrae instituerant, die Sabbati (9.1.) etiam Coloniae fiebant.

Putin: Iustum erat Crimaeam occupare

Praesidens Russiae Vladimir Putin a periodico Germanico Bild interrogatus occupationem paeninsulae Crimaeae defendit. Dixit voluntatem hominum maioris esse quam fines civitatis. Ideo se iustum iudicare, quod Crimaea ad Russiam adiuncta esset. Militum Russorum fuisse curare, ut incolae libere aperire possent, quid sentirent.

Sueci societati Natonis obsistunt

Maior pars Suecorum non vult, ut patria ad confoederationem Natonem adiungatur. Ex demoscopia recens facta quinquaginta centesimae (50%) Suecorum censent Sueciae extra Natonem manendum esse, triginta quattuor centesimae (34%) volunt, ut patria membrum Natonis fiat, reliqui ex respondentibus (14%) sunt incerti.

(Tuomo Pekkanen)

8.1.16

Bomba hydrogenica explosa

In Corea Septentrionali experimentum bombae hydrogenicae factum est, ut magistratus eius terrae die Mercurii (5.1.) nuntiaverunt. Nonnulli tamen rerum periti de indole eius rei dubitant censentes fieri posse, ut de explosione nucleari alterius generis agatur. Complures civitates, in iis Finlandia, experimentum Coreanorum vehementer condemnaverunt.

(Reijo Pitkäranta)

Doctrina Russiae militaris

Praesidens Russiae Vladimir Putin sub novum annum documento subscripsit, quo doctrina securitatis Russiae adumbratur. In hoc libello plane scriptum est consociationem militarem Nato incolumitati Russiae nationali imminere. Praeterea commemoratur Russis efficere contigisse, ut auctoritatem suam in conflictibus et discriminibus internationalibus solvendis augerent.

(Reijo Pitkäranta)

Discrimen Saudiano-Iranicum

Relationes inter Arabiam Saudianam et Iraniam intercedentes usque ad commercia legationum intermissa aggravatae sunt. In causa est supplicium, quod Saudiani doctrinam sunnitarum confitentes de duce religioso shiita summae dignitatis nuper sumpserunt. Qua re cognita Teherani, in urbe principe Iraniae, tumultus vehementes orti sunt, inter quos multitudo reclamitantium impetum in sedem legati Saudiani fecit.

(Reijo Pitkäranta)

De viatoribus inspiciendis

Administratores Suetiae custodiam limitis sui meridiani efficaciorem reddere constituerunt, ut numerum profugorum terram suam petentium deminuerent. Quam ob rem omnes viatores, qui aut autocineto aut tramine aut aeroplano in Suetiam adventuri sunt, iam in solo Daniae inspicientur. Mirum non est Danos propter illud statutum ira incensos esse.

(Reijo Pitkäranta)

Mao monumentum accepit

In regione rurali Sinarum immanis statua inaurata pristinum ducem Mao Zedong figurans erecta est. Hoc monumentum triginta septem metra altum et ex chalybe calcestroque factum sumptuosissimum esse dicitur. Mao, quamquam rerum potitus ingenti civium suorum numero perniciei fuit, tamen a multis Sinensibus magni aestimatur.

(Reijo Pitkäranta)

De fumatione in Finlandia

Fumatio tabaci in Finlandia inde ab annis septuagesimis valde deminuta est: cum abhinc quadraginta fere annos amplius dimidia pars virorum fumatores fuerint, hodie non nisi quindecim centesimae civium tabaco addictae sunt. Inde secutum esse videtur, ut numerus casuum cancri pulmonalis octoginta centesimis (80%) decresceret.

(Reijo Pitkäranta)

Hiems in Finlandiam venit

Novo anno ineunte hiems vera cum nivibus et frigoribus post longam exspectationem in Finlandiam venit. Ita etiam iis, qui in partibus terrae meridianis habitant, occasio data est in campis nivosis scridandi et in glacie maris et lacuum patinandi. Nonnullis locis vis frigoris etiam perturbationes in electricitate distribuenda effecit.

(Reijo Pitkäranta)

18.12.15

Concordia climatica inventa

Magnus conventus climaticus, qui Lutetiae Parisiorum per duas septimanas actus erat, pridie Idus Decembres (12.12.) ad finem venit. Eventum habuit felicissimum, nam moderatoribus centum nonaginta quinque civitatum contigit, ut concordiam de mutatione climatica coercenda invenirent. Inter participes pactum est variis actionibus eo niti, ne atmosphaera orbis terrarum amplius duobus gradibus Celsianis calefieret. Convenit etiam, ut terrae egentiores ad hanc rem consequendam a civitatibus industrialibus quotannis centena miliarda dollariorum acciperent.

(Reijo Pitkäranta)

Pactum climaticum laudatur

Primores civitatum pactum climaticum Parisiis factum certatim laudaverunt. Praesidens Barack Obama illam conventionem historicam descripsit, quae ad sidus nostrum servandum plurimum valeret. Idem fere dixit David Cameron, princeps minister Britanniae: ”Ex hac pactione”, inquit, ”nepotes nostri videbunt nos de salute liberorum nostrorum posterorumque eorum cogitavisse”.

(Reijo Pitkäranta)

Novus praesidens Argentinae

Argentina novum praesidentem accepit, cum Mauricio Macri septimana proxime praeterita munus iniit. Oratione inaugurali habita promisit se id acturum esse, ut civitas sua uniretur. Praeterea, quantum posset, paupertatem in patria deminuere, corruptioni efficaciter repugnare, numerum sedium operis augere se velle dixit. 

(Reijo Pitkäranta)

Islamitae foedus facturi sunt

Terrae religionem islamicam confitentes Arabia Saudiana duce foedus militare conditurae sunt, cuius erit contra terrorismum pugnare. Constabit illa confoederatio ex triginta quattuor nationibus, in quibus Aegyptus, Turcia, Pakistania, aliquot civitates in Africa sitae. Partes nuntiant suum esse nomen islamicum adversus omnes terroristarum greges tutari.

(Reijo Pitkäranta)

Persona anni: Angela Merkel

Angela Merkel, cancellaria foederalis Germaniae, persona huius anni commentariorum periodicorum Time electa est. In inscriptione ’Cancellaria orbis terrarum liberi’ appellatur. Causa creandi dicitur, quod ductu et auxilio eius fieri potuerit, ut Europa, quamquam discrimine oeconomico et profugorum laboraret, tamen limites apertos servaret.

(Satu Tuominen)

Arbor natalicia pulcherrima

In Finlandia civibus facultas data est eligendi, quis ex arboribus nataliciis in publico positis omnium pulcherrima esset. Victoriam reportavit abies in Foro centrali urbis Tampere collocata, quae amplius quinquaginta duo milia suffragiorum sibi conciliavit. Illa arbor in altitudinem viginti metrorum surgens centum fere annorum esse existimatur. 

(Reijo Pitkäranta)

Nuntii Latini ad ferias abeunt

Nuntii Latini propter ferias natalicias in tres septimanas intermittuntur, quam ob rem proxima emissio non ante quam die octavo mensis Ianuarii (8.1) fiet. Restat, ut auscultatoribus nostris Tranquillum festum nativitatis Domini et Annum Novum Bonum Faustum Felicem exoptemus.

(Reijo Pitkäranta)

11.12.15

In comitiis regionalibus Franciae FN victrix

In primo suffragio comitiorum regionalium apud Francos habitorum, Frons Nationalis (FN), factio extrema dextra, cui praeest Marine Le Pen, prope tertiam partem sententiarum conciliavit. Secundum locum recuperavit factio conservativa Nicolai Sarkozy, tertium factio socialistica praesidentis Francois Hollande. Altera suffragia Dominico proximo (13.12.) fient.

Pretium petrolei vilescere pergit

Organizatio terrarum petroleum exportantium (OPEC) pridie Nonas Decembres (4.12.) Vindobonae Austriae conventum habuit, in quo membra de productione petrolei circumscribenda inter se convenire non potuerunt. Quo fit, ut superproductio petrolei continuetur et pretium eius vilescat. Pretium, nunc quadraginta fere dollaria pro dolio, duodeviginti mensibus dimidiatum est.

Dies independentiae duodecentesimus celebratus

Dies independentiae Finniae postridie Nonas Decembres (6.12.) solitis caerimoniis celebratus est. Culmen sollemnitatis fuit receptio in palatio praesidentiali, in quam Sauli Niinistö, praesidens rei publicae, circiter mille octingentos hospites invitaverat. Primi in palatium intrabant milites veterani, qui hodie annos aetatis nonaginta vel plures numerant. Hodie veterani apud cives magni habentur, cum ante dissolutionem Unionis Sovieticae propter rationes politicas a praesidente in palatium non invitarentur et gesta eorum silerentur. Receptio praesidentis, per televisionem transmissa, plures spectatores habebat quam umquam ante, scilicet duas miliones sescenta milia.

Praesidens Niinistö de immigratione

Praesidens Sauli Niinistö, de immigratione usque crescente interrogatus, rem in petitoribus asyli accipiendis haud feliciter successisse censebat. Qui in Finniam venire et in Finnia esse vellent, valores Finnorum essentiales, ut democratiam, aequalitatem, iura humana, comprobarent. Condicionem, qua in Finnia versareris, esse illos valores comprobare et agnoscere. Finnis ipsis curandum esse, ut omnibus suam religionem et mores familiares servare liceret. Niinistö monuit etiam immigratores ex Russia venientes serio considerandos esse, nam commodum utriusque partis esse, ut res diligenter regeretur.

Anniversarium centesimum quinquagesimum Sibelianum

Hoc anno celebratur anniversarium centesimum quinquagesimum musicographi Jean Sibelius, qui natus est die octavo mensis Decembris anno millesimo octingentesimo sexagesimo quinto (8.12.1865). Ex operibus eius notissima sunt Valse triste, Andante festivo, Finlandia, septem symphoniae, concentus violinicus. Symphoniae Sibelianae post opera Beethoveniana a multis maximi aestimantur. Concentus eius violinicus saepius est disco impressus quam alii violinici concentus. Certamen violinicum Sibelianum, anniversario compositoris centesimo (1965) conditum, quod quinto quoque anno Helsinkii instituitur, inter maioris momenti certamina musica in toto orbe terrarum numeratur. In hornotino certamine, numero undecimo, palmam cepit Christel Lee Americana.

Tuomo Pekkanen

4.12.15

De odio ethnic aucto

Animi Finlandensium commoti sunt violationibus puellarum minorennium, quarum auctores in hominibus asylum petentibus esse videntur. Cum periculum esset, ne haec scelera ad odium ethnicum augendum adducerent, praesides omnium factionum epistulam divulgaverunt, qua cives hortabantur, ut irae temperarent neve omnibus peregrinis notam turpitudinis imprimerent.

(Reijo Pitkäranta)

Conventus climaticus iniit

Pridie Kalendas Decembres (30.11.) Lutetiae Parisiorum maximus conventus climaticus inauguratus est, cui omnes fere primores civitatum intersunt. Legationi Americanorum praeest Barack Obama, cum Russi praesidente Vladimir Putin duce Lutetiam venerint. Participes duabus septimanis rationes invenire conantur, quibus usi prohibeant, ne caeli status in orbe terrarum nimis calefiat.

(Reijo Pitkäranta)

Turcis opitulatio promissa

Civitates Unionis Europaeae Turcis opitulationem trium miliardorum euronum pollicitae sunt, ut iis in discrimine profugorum solvendo subvenirent. Turcia est terra, per quam confugientes in Europam maxime transire student. Insuper convenit, ut Turci libertatem visi syngraphi acciperent, si confinium suum efficacius custodirent.

(Reijo Pitkäranta)

De Cubanis patria profugis

Novus quoque orbis suum discrimen migrationis habet. Numerus enim Cubanorum, qui per terras Americae Latinae, quae dicitur, in Civitates Americae Unitas immigrare volunt, hoc anno iam quinquaginta fere milium esse existimatur. Causa, cur Cubani tanta multitudine patriam reliquerint, videtur esse, quod sperant fore, ut in America septentrionali liberius quam domi vivere possint.

(Reijo Pitkäranta)

De silvis pluvialibus

In Brasilia silvae pluviales, quae circa flumen Amazonium sunt, citius quam antea deleri videntur. Hoc anno circiter quinque milia octingenta (5 800) chiliometra quadrata vastata sunt. Quae rerum condicio ex inopinato nata est, nam regimen Brasiliae annis proxime praeteritis novas leges pertulit, ut caesiones silvarum illegales deminuerentur.

(Saara Honkanen)

Amicitia caprae et tigris

In vivario in Russia orientali sito res mira animadversa est: tigris Sibirianus nomine Amur capram vivam sibi ad victum datam non solum non interfecit, sed etiam pro amica habere coepit. Capra Amurem quoquoversus sequitur, ille eam omni modo tutatur. Amicitia eorum tanta est, ut capra in cubili tigris dormiat bestia in alium locum recedente. 

(Reijo Pitkäranta)

Klitshko cladem accepit

Die Saturni (28.11.) Dusseldorphii de principatu pugilationis gravissimi ponderis certatum est. Palmam certaminis tulit Tyson Fury, athleta professionalis Britannus, cum adversarium Vladimir Klitshko Ucrainum sententia omnium arbitrorum domuit. Victoria eius eo pluris habetur, quod Klitshko per undecim annos pugil insuperabilis erat. 

(Reijo Pitkäranta)

27.11.15

Unitae Nationes omnes terras ad pugnandum contra ISIS vocant

Consilium Securitatis Nationum Unitarum petit, ut omnes terrae, quantum fieri possit, pugnae contra ordinem ISIS sive Daesh in Syria et Iraquia intersint et duplico nisu contendant, ut ictus terroristarum posthac impediantur. Quam sententiam a Francia adumbratam Consilium Securitatis unanimiter probavit.

Duma Russiae severiores contra terrorismum poenas flagitavit

Parlamentum Russiae rationes severiores ad terroristas arcendos flagitavit. Capitis poenam usu recipiendam, potestatem Servitii securitatis amplificandam, cooperationem internationalem corroborandam esse. Delegati et senatores in sententia communi terrorismum cum nazismo comparaverunt eamque pestem huius saeculi appellaverunt, quae radicitus delenda esset.

Leges de immigratione in USA duriores

Camera delegatorum decrevit, ut condiciones, quibus fugitivi ex Syria et Iraquia venientes in USA admitterentur, notabiliter severiores redderentur. Praesidens Obama minitatus est se illam legem, iure vetandi usus, antiquaturum esse. Lex a Camera delegatorum data etiam in senatu tractari debet, ubi fieri poterit, ut repudietur.

Bruxellis status extraordinarius continuatur

Status extraordinarius propter imminens terrorismi periculum, die Sabbati (21.11.) Bruxellis constitutus, totam septimanam continuatur. Scholae autem die Mercurii denuo apertae sunt et commeatus metropolitanus post intermissionem incohatus est. Ex sedecim hominibus die Dominico deprehensis unus de strage Parisiensi accusatur, ceteri liberati sunt.

Dies Puerorum Universalis

Dies Puerorum Universalis, quem conventus generalis Nationum Unitarum omnibus terris observandum commendavit, die vicesimo mensis Novembris (20.11.) quotannis agitur. Conventus suasit, ut ille dies fraternitatis globalis et sympathiae inter pueros esset, quo salus et prosperitas puerorum in toto terrarum orbe promoveretur.

Angela Mercel decem annos cancellaria foederalis

Angela Merkel, quae femina maximae potestatis in Europa habetur, iam decem annos cancellaria foederalis Germaniae est. Auctoritas eius his decem annis usque crevit. De armistitio Ucrainae orientalis consultavit; permisit, ut Graecia oeconomice adiuvaretur; fugitivos in Europam venientes recepit. Merkel magna apud suos gratia valet, sed dimidia fere pars civium censet illam immigratoribus nimis liberalem fuisse, cum ceteras nationes Europaeas, imprimis Francos, non consuluisset, antequam petitores asyli invitaret, ut in Germaniam venirent. Immigratione augescente indignatio civium crevit, sed Merkel nullum sibi parem competitorem habet.

Supplementa ad historiam litterarum Britanniae

Supplementa antea ignota ad historiam litterarum Britanniae inopinanter reperta sunt. Fragmentum narrationis dramaticae et poematium, quae Charlotte Brontë (1816-1855) scripsit, erant inter paginas libri, quem familia quaedam Americana possidet. Utrumque est septuaginta fere linearum. Scripta sunt eodem fere tempore, cum scriptrix septendecim annorum esset.

(Tuomo Pekkanen)

20.11.15

Strages magna Parisiis factis

Idibus Novembribus (13.11.) vesperi Lutetiae Parisiorum impetus terroristicus atrocissimus factus est, quo circiter centum triginta homines occisi et amplius trecenti graviter vulnerati sunt. Dubium non est, quin haec strages auspiciis ordinis Isis effecta sit. Ictus bombici septem locis diversis perpetrati in aedes hominibus frequentes, ut in tabernas, in stadium pedifollicum, in magnam aulam concentuum, directi erant. Etiam Francois Hollande, praesidens Francogalliae, in periculo versabatur, quippe qui in cavea stadii a terroristis petiti sederet ludum pedifollicum spectans. Pro certo habetur illam aggressionem in Syria excogitatam et in Belgio praeparatam esse. Princeps auctor sceleris videtur esse Abdelhamid Alaaoud, vir triginta fere annos natus et e Bruxellis oriundus.

(Reijo Pitkäranta)

Aedificia tricoloria reddita

Plurimae civitates orbis terrarum se una cum Francogallis dolere diversis modis ostenderunt. Ad memoriam hominum ictu Parisiensi mortuorum multa aedificia publica coloribus vexilli Francogalliae illuminata sunt: luce tricolori obvoluta splendebant verbi causa Porta Brandenburgica Berolinensis, Theatrum lyricum Sydneiense, Aedes Finlandia urbis Helsinki. 

(Reijo Pitkäranta)

De cautelis securitatis

Ministri defensionis Unionis Europaeae consensu omnium cautelas securitatis in Europa usu recipere constituerunt. Ita Francogallis, qui sibi talem tutelam propter atrocitates Parisiis factas petiverant, veniam dederunt. Decretum eo facilius factu erat, quod inter civitates socias iam ante sex annos convenit, ut, si quis earum actione militari lacessita esset, a ceteris adiuvaretur.

(Reijo Pitkäranta)

Quid Sauli Niinistö dixerit

Praesidens Finlandiae Sauli Niinistö colloquio cum diurnariis habito pollicitus est populum Finnicum omnibus modis, quibus posset, Francogallis tantis malis laborantibus subventurum esse. Per leges tamen stare, quominus iis auxilium militare daret. ”Hoc genus adiumentum”, inquit, ”iis subministrare non possumus”.

(Reijo Pitkäranta)

Auxilium terrarum pauperum

Terrae septentrionales opitulationem populorum pauperum aut deminuturae sunt aut id iam fecerunt, ut pecuniam ad profugos adiuvandos transferrent. Ban Ki-moon, secretarius Nationum Unitarum generalis, censet facultates multarum milionum hominum ad vitam meliorem difficiliores redditum iri, si opes terris egentioribus destinatae ad opus profugorum conversae sint.

(Satu Tuominen)

Corpus caeleste remotissimum

Astronomi Americani se corpus caeleste in systemate solari omnium remotissimum repperisse nuntiaverunt. Agitur de planeta glaciali minutula, quae spatium quindecim fere miliardorum chiliometrorum a Sole abest. Qualis sit orbita huius stellae, nondum constat, sed diametros planetulae quingentorum vel etiam mille chiliometrorum esse existimatur.

(Reijo Pitkäranta)

13.11.15

Cura socialis et valetudinis in Finnia renovatur

Post longas consultationes regimen Finnorum de renovatione curae socialis et valetudinis concordiam invenit. Regiones autonomae, de servitiis responsales, erunt duodeviginti, sed servitia in tantum quindecim regionibus praebebuntur. Legislatio de libertate eligendi ita renovabitur, ut homines ipsi servitia publica aut privata aut alia eligere possint. Consultationes inter factiones, quae sunt in regimine, erant tam difficiles, ut iam in eo erat, ut regimen dissolveretur. Conservativi minorem numerum regionum autonomarum voluissent quam primus minister Juha Sipilä, factionis Centralis, proposuerat. Cum dissolutio regiminis commodo patriae non servisset, factio Conservativa numerum regionum sibi ingratam probavit.

Talebani inter se pugnant

Duo greges Talebanorum in Afganistania meridionali-orientali inter se pugnare coeperunt. Ex utroque grege complures deni viri armati mortui sunt. Grex, cui Mullah Rasool praeest, cum ordine Isis se iunxit, ut contra ducem Talebanorum officialem pugnaret. Neque antea factum est, ut rixae Talebanorum internae in pugnam haud dubiam mutarentur.

Volatus in Sinai interrupti

Postquam verisimile factum est, ut causa calamitatis aeroplani Russici in Sinai fuisset bomba in illud imposita, Russi et Britanni volatus in Sharm el-Sheik interruperunt. Utrique sua aeroplana miserunt, quae viatores domum reportarent. In Sharm el-Sheik plus octoginta milia Russorum ferias agentium atque multa milia Britannorum fuerunt.

Terrae Balticae a Russia satisfactionem postulant

Terrae Balticae a Russia satisfactionem postulare volunt damnorum, quae occupatio Unionis Sovieticae effecit. Russi autem asseverant terras Balticas sua sponte se ad Unionem Sovieticam adiunxisse. Urmas Reinsalu, minister iustitiae Estoniensium, censet fieri posse, ut satisfactiones postulentur, quia Russia Unioni Sovieticae legaliter successerit. Ministri iustitiae Estoniae, Lituaniae Lettoniaeque nuper (5.11.) in urbe Riga libello subscripserunt, quo de cooperatione in satisfactionibus postulandis constituerunt. Occupatio Unionis Sovieticae ab anno millesimo nongentesimo quadragesimo unum fere annum (1940-1941) et a bello in Europa finito usque ad annum millesimum nongentesimum nonagesimum primum (1945-1991) duravit.

Caelum calescit, paupertas augescit

Argentarium Mundanum (World Bank) commonet climate calefacto numerum pauperum in mundo ante annum bis millesimum tricesimum (2030) vel centum milionibus augeri posse. Climate calefiente morbos propagari, messes minui, plures homines in paupertatem impelli. Pauperrimum quemque extremis phaenomenis naturae plurimum affligi.

Dies patris celebrabatur

Dies festus patris in plus quam centum terris celebratur. Dies non est ubique idem. In terris septentrionalibus, excepta Dania, festum fit secundo die Dominico mensis Novembris. In calendarium Finnorum dies patris acceptus est octavo decennio saeculi millesimi nongentesimi.

6.11.15

Periculun terrorismi auctum

Periculum terrorismi in Finlandia auctum est, ut magistratus securitatis publicae nuntiaverunt. Petteri Orpo, minister a rebus domesticis, patefecit inter profugos asylum petentes tam pugnatores ordinis Isis inveniri quam eos, qui terroristas alio modo adiuvissent. Idem dixit actiones trecentorum fere advenarum a custodibus publicis diligenter observari. 

(Reijo Pitkäranta)

Calamitas aeria in Sinai facta

Die Saturni (31.10.) in paeninsula Sinai gravissima calamitas accidit, cum aeroplanum Russicum subito in terram praecipitavit. Omnes ducenti viginti quattuor homines, qui volatui aderant, vitam amiserunt. Quae fuerit causa illius mali, adhuc parum constat, sed sunt, qui putent calamitatem bomba in aeroplanum imposita effectam esse.

(Reijo Pitkäranta)

Regimen Romaniae discedit

Victor Ponta, princeps minister Romaniae, regimen suum ab officio discessurum esse nuntiavit. Illud decretum paucis horis post divulgavit, quam aliquot cives reclamantes dimissionem eius postulaverant. In causa non solum suspiciones corruptionis erant, sed etiam incendium in taberna nocturna Bucarestiensi nuper factum, quo triginta duo homines mortui sunt. 

(Reijo Pitkäranta)

Statio militaris Russorum

Magna statio militaris, quam Russi in Mari Barentsico aedificant, iam paene perfecta est. Ibi centum quinquaginta milites collocabuntur, qui sesquialterum annum sine commeatu vitam sustinere poterunt. Russi regiones septentrionales diligentius quam ante custodiunt, ut post glaciem in finibus polaribus deminutam opes naturales, quae ibi sunt, usu efficaciore recipiantur.

(Reijo Pitkäranta)

Ars nova pro eiectamentis

In diversis terris evenit, ut opera artis modernae, quae plurimi aestimantur, per errorem pro eiectamentis haberentur itaque e medio everrerentur. In Sinis illam sortem habuit pictura maximi pretii nomine Mons nivosus, quam purgatores tamquam sordes domesticas ex conspectu removerunt . Res eiusdem generis Caroloruhae, in urbe Germaniae, et Barii, in emporio Italiae, facta esse dicitur.

(Reijo Pitkäranta)

Numerus leonum deminutus

Ex investigatione nuper facta numerus leonum in multis partibus Africae quinquaginta centesimis (50 %) proximis viginti annis deminuetur. Rerum condicio in Africa occidentali, ubi tantum duae magnae populationes restant, pessima esse existimatur, sed etiam in media Africa et orientali leones in periculum adducti dicuntur. 

(Saara Honkanen)

Facultas legendi puerorum

Foedus parentium Finlandiae viros hortatur, ut paedagogia, scholas, bibliothecas legendi causa frequentent. Si id fecerint, fieri posse, ut imprimis pueri exemplum eorum secuti maiore studio libros legere incipiant. Animadversum enim est pueros Finlandiae scientia legendi puellis inferiores esse.

(Reijo Pitkäranta)

30.10.15

Donald Trump, qui candidatum republicanorum ad comitia praesidentialia Americanorum petit, censebat mundum futurum fuisse locum meliorem, si dictatores Saddam Hussein et Muammar Gaddafi summam apud suos potestatem adhuc tenerent. Saddamum quidem fuisse hominem atrocem, sed tempore illius condicionem rerum in Iraquia meliorem fuisse quam hodie. Saddam anno bis millesimo sexto (2006) laqueo suspensus est, Gaddafi post mutationem rerum anno bis millesimo undecimo (2011) occisus est. Etiam Tony Blair, olim primus minister Britanniae, dixit se pro erroribus in bello Iraquico factis dolere. Confoederationem non intellexisse, quid subverso regimine Saddami sequeretur.

Unio Europaea profugos in Balcania vagantes adiuvabit

Moderatores Unionis Europaeae et terrarum Balcanicarum die Dominico (25.10.) Bruxellis de profugis adiuvandis consultabant. Convenit, ut petitoribus asyli in Balcania vagantibus hospitia instituerentur, quae quinquaginta hominum milibus in Graecia sufficerent et totidem hominibus in aliis terris, ut in Macedonia et Serbia. Omnino septendecim rationes ad crisim profugorum mitigandam a moderatoribus comprobatae sunt. In his est, quod homines, quibus asylum negatum erit, celerius in patriam remittentur. Praeterea magistratus Graeciae in rebus ad immigratores spectantibus adiuvabuntur et numerus custodum publicorum in Slovenia augebitur.

Finnia plures milites in Mare Mediterraneum mittet

Praesidens Sauli Niinistö et Consilium ministrorum a politica Finniae externa et securitatis decrevit, ut Finnia plures milites in Mare Mediterraneum mitteret, qui operationibus Unionis Europaeae interessent, quibus importatio hominum clandestina impediretur. Iam octo praefecti Finni praetoriales in illo opere sunt, qui viginti aliis supplebuntur.

Commeatus ex Russia in Syriam crevit

Postquam Russia bello Syriaco interesse coepit, commeatus maritimus ex Russia in Syriam crevit. Russi in Syriam arma et alia in bello necessaria atque auxilium humanitarium mittunt. Inter unum mensem centum triginta naves ad portus Syriae Mediterraneos appulerunt, cum antea singulis mensibus singulae tantum venirent.

Comitia Poloniae

In comitiis parlamentariis in Polonia nuper (25.10.) factis longe superior fuit factio conservativa ”Lex et iustitia”, quae iam octo annos in oppositione fuit. Civibus promisit, ut sumptus publicos augeret et fructus oeconomiae crescentis aequius distribueret. Est factio eurosceptica, id est de Unione Europaea dubitat et immigrationi obstat. Profugos pro rata parte in terris Unionis collocandos non probat. Ex suffragiis datis tot accepit, ut sola maiorem partem delegatorum in parlamento habuerit. Novo regimini praeerit Beata Szydio. Communismo amoto nunc primum factum est, ut nulla factio sinistra in parlamentum Poloniae admitteretur.

(Tuomo Pekkanen)

23.10.15

Rousseff Finlandiam obiit

Dilma Rousseff, praesidens Brasiliae, itinere officiali in Finlandiam suscepto die Martis (20.10) collegam Sauli Niinistä in urbe Helsinki convenit. Colloquia eorum tam ad relationes utriusque civitatis attinebant quam id agebant, quonam modo opera communis in scientia, eruditione, arte technologica inter Brasiliam et Finlandiam promoveretur. Praeterea rerum in Ucraina et Syria condicionem deliberabant.

(Reijo Pitkäranta)

De ictibus in Syria aeriis

Inter Russos et Americanos de regulis convenit, quas utraque pars in ictibus aeriis in Syria faciendis observaret. Nituntur maxime, ut potestas calamitatum et conflictuum ibidem ad minimum redigatur. Timendum enim est, ne quid tale accidat, cum aeroplana Russorum et Americanorum in eodem fere spatio aerio impetus bombicos faciant.

(Reijo Pitkäranta)

Colloquia cum Turcis habita

Civitates Unionis Europaeae efficere conantur, ut Turci impediant, ne profugi in Europam confluant. Ministri principes colloquium cum Turcis continuare decreverunt eo spectantes, ut illi confinia sua custodiant et facultates habeant ad eos profugos adiuvandos, qui ibidem iam sint. Turci autem suis libertatem syngraphi postulant.

(Satu Tuominen)

Comitia in Helvetia facta

Die Dominico (18.10.) in Helvetia comitia facta sunt, quibus ducenti legati in parlamentum crearentur. Argumentum, quo populus maxime ambitus erat, ad quaestionem de profugis recipiendis pertinebat. Victoriam reportavit ’Factio Helvetiae popularis’, ut partes dexteriora petentes ibi nuncupantur: conciliavit sibi sexaginta quinque sedes.

(Reijo Pitkäranta)

Ban Iranianos monuit

Ban Ki-moon, secretarius generalis Nationum Unitarum, Iranianos hortatur, ut supplicia, quae de suis sumpturi sint, ad tempus intermittant. Ban eos adiit, quod in Irania intra duas septimanas duo iuvenes laqueo suspensi sunt. Constat ibidem hoc anno iam plus septingentos homines poena mortis affectos esse.

(Reijo Pitkäranta)

De venatoribus Italianis

In Italia venatoribus quotannis tot calamitates accidunt, ut plurimi cives eam occupationem in vetitis numerari velint. Inventum enim est etiam tricenos homines singulis venandi temporibus vitam amittere. Difficile tamen videtur esse Italianis venatu interdicere, cum decies centena milia eorum licentiam eius exercendi habeant.

(Reijo Pitkäranta)

Quid Alisa Vainio fecerit

Animi Finnorum delectati sunt re athletica, quam Alisa Vainio, puella septendecim annorum, nuper praestitit. Ea enim mense Septembri spatium cursus Marathonii duabus horis triginta tribus minutis, viginti quattuor secundis (2.33.24) emensa est. Hoc tempus consecuta ludis Olympiis futuris interesse posset, si aetate maior esset.

(Reijo Pitkäranta)

16.10.15

Manifestatio pro pace in stragem vertitur

Apud stationem ferriviariam urbis Ankara, quod caput est Turciae, homines die Sabbati (10.10.) cantantes et saltantes pro pace reclamitare parabant, cum media in multitudine intervallo aliquot secundarum duae explosiones fortissimae factae sunt, quibus nonaginta septem homines mortui et plus quingenti vulnerati sunt. In suspicione stragis sunt terroristae suicidae ordinis Isis. “Ictus unitatem, democratiam stabilitatemque Turciae violant”, ait Ahmet Davutoglu, primus minister Turcorum, et luctum publicum triduanum Turcis indixit. Violentia in Turcia aucta est, postquam Turci mense Iulio operationes militares in Iraquia et Syria susceperunt.

Turcia peregrinis admodum tuta

Aliquot milia Finnorum hoc tempore ferias autumnales in Turcia agunt. Ministerium a rebus exteris Finnorum aestimat Turciam adhuc viatoribus admodum tutam esse. Peregrini tamen monentur, ut turbas hominum vitent atque cautionem prudentiamque observent. Suadetur tamen, ne itinera in confinium Syriae et Iraquiae omnino suscipiantur.

Britannia de discessione ab UE quaerit

In Britannia investigatio suscipitur, qua quaeritur, quae sint commoda et incommoda oeconomica, si Britanni ab Unione Europaea discedere constituerint. Quaestiones principales sunt inter alias: Immigratores ex Unione venientes, quo modo oeconomiam Britanniae afficiant? Atque: Si Britannia non est pars Unionis, quo modo de tractatibus commercialibus consulere valeat? Suffragium populi de societate Britannorum cum Unione Europaea, si serissime, anno bis millesimo septimo decimo (2017) fiet. Ex demoscopia nuper facta quadraginta tres centesimae (43%) Britannorum discessionem sustinent. Wolfgang Schäuble, minister aerarii publici Germaniae, censet discessionem Britanniae calamitosam famae Unionis Europaeae futuram esse.

Lukasenka in munere pergit

Sicut praevisum erat, Aljaksandr Lukasenka, praesidens Belorussiae, in quintum praesidentatum creatus est, cum plus octoginta tres centesimas (83,49%) sententiarum obtinuit. Lukasenka, qui ultimus dictator Europae appellatur, dissidentes firma manu coercere noscitur. Oppositio politica cives hortata erat, ut comitia boikotizent.

Corea Septentrionalis, dictatura LXX annorum

Corea Septentrionalis anniversarium septuagesimum magna pompa celebravit. Die decimo mensis Octobris anno millesimo nongentesimo quadragesimo quinto (10.10.1945) Kim Il-sung, avus hodierni dictatoris Kim Jong-un, factionem operariorum condidit, quae dictatoriam rem publicam moderatur. Adversariis politicis, etiam proximis familiaribusque iugulatis, Kim Jong-un tranquillo animo anniversarium celebrare potuit.

Profugi in Suetia disparent

Dimidia fere pars profugorum, qui in Suetiam veniunt, asylum non petunt sed e conspectu magistratuum abeunt. Hoc autumno paene quadraginta milia hominum asylum in Suetia petiverunt. Totidem fere venisse aestimantur, qui asylum non petiverunt, neque notum est, ubi versentur.

(Tuomo Pekkanen)

9.10.15

De profugis in Finlandia

In Finlandiam hoc anno paene viginti milia peregrinorum asylum petentium advenerunt. Plurimi ex Iraquia profecti sunt, sed magna copia immigrantium etiam ex Somalia, Afganistania, Albania, Syriaque huc confugit. Quam ob rem in terra nostra iam octoginta sedes profugis recipiendis conditae sunt, ut illis tecto carentibus hospitium praeberetur.

(Reijo Pitkäranta)

Bellum Syriae internum

Die Mercurii (7.10.) bellum civile, quod in Syria iam multos annos geritur, denuo aggravescere coepit. Tum enim copiae regiminis impetum terrestrem in quattuor stationes rebellium in diversis partibus Syriae occidentalis dederunt. Aggressores a Russis adiuti sunt, qui illas incursiones ictibus aeriis et navalibus sustentabant. Agebatur de prima actione militari maiore, quam Syri et Russi viribus unitis contra rebelles fecerunt.

(Reijo Pitkäranta)

Rerum in Ucraina status

Rerum condicio in Ucraina orientali his diebus in melius conversa esse videtur. Inter Ucrainos enim et separatistas Russis faventes convenit, ut currus loricati et tormenta calibro centum millimetris minora ex acie removerentur. Quae concordia auxilio Ordinis de Securitate et cooperatione Europaea constituta est.

(Reijo Pitkäranta)

Politica energiae Indiae

Moderatores Indiae usum energiae efficaciorem reddere in animo habent mutationem climaticam impedituri. Propositum est, ut energia, qua Indi ad bona et servitia producenda egeant, anno bis millesimo tricesimo (2030) tertia parte minor quam hodie sit. Praeterea consumptionem combustibilium fossilium annis futuris valde deminuere volunt.

(Saara Honkanen)

Memoria Germaniae unitae

Die Saturni (3.10.) Germani anniversarium vicesimum quintum patriae redintegratae celebrabant. Sollemnitas principalis Francofurti acta est, sed etiam Berolini memoria integrationis magno gaudio recolebatur. Hodie duae fere partes Germanorum coniunctionem utriusque civitatis laudant. Nemo tamen infitias it Germanos occidentales opibus plus valere quam ii, qui in regionibus terrae orientalibus habitant.

(Reijo Pitkäranta)

Nobelistae artis medicae

Praemium Nobelianum artis medicae hoc anno tribus investigatoribus defertur. Qui sunt William Campbell Irlandiensis, Satoshi Omura Iaponiensis, Youyou Tu, femina ex Sinis oriunda. Campbell et Omura de infestationibus Nematodum curandis optime sunt meriti, cum Tu novam rationem malariae sanandae usu receperit.

(Reijo Pitkäranta)

Vertebrata marina deminuta

Numerus vertebratorum marinorum his quadraginta annis ad dimidium fere redactus est. Hoc patet ex relatione, quam Ordo mundi naturae tuendae (WWF) nuper divulgavit. In vertebratis pisces, aves et mammalia maritima, reptilia in mari viventia numerantur. Imprimis aquae tropicae inopia animalium marinorum laborare coeperunt.

(Reijo Pitkäranta)

2.10.15

Nationes Unitae LXX annorum

Post bellum mundanum secundum ordo Nationum Unitarum conditus est, ut mundum a novis bellis cooperatione defenderet. Ad anniversarium ordinis septuagesimum celebrandum conventus de securitate mundi habitus est, in quo summi moderatores gentium, in his praesidentes Barack Obama et Vladimir Putin, orationes habuerunt.

Obama: Bashar al-Assad tyrannus infanticida

Praesidens Barack Obama cooperationem internationalem suasit, ut bellum in Syria componeretur. Censebat praesidentem Bashar al-Assad esse tyrannum infanticidam et monuit Americanos cum quavis natione, etiam cum Russia et Irania, paratos esse cooperari, ut summa potestate in Syria moderate mutanda crisis solveretur. De sanctionibus Russiae positis dixit illas non ad bellum frigidum renovandum nec ad Russiam separandam spectare. Neque tamen fieri potuisse, ut mundus tranquillus spectaret, cum Russia integritatem regionalem et suverenitatem Ucrainae violaret. Si ex Crimaea ad Russiam adiuncta nihil sequeretur, idem cuivis membro Nationum Unitarum accidere posse.

Putin placabilius quam ante locutus

Praesidens Vladimir Putin placabilius quam ante locutus est. Commemoravit, quo modo Unio Sovietica suam revolutionem in alias terras per vim “effectibus tragicis” apportare conata esset, et id cum revolutionibus in terras Arabum apportatis comparavit. “Velim quaerere ab eis”, inquit, “qui has condiciones creaverunt, an intellegatis, quid feceritis?” Censebat contra ordinem Isis magnam coalitionem internationalem esse cogendam, in qua civitates Arabicae membra fundamentalia essent. Cooperandum esse cum praesidente Bashar al-Assad, nam aliis rationibus tantum terroristae sustinerentur. Putin in oratione sua bis monuit arma ab USA oppositioni Syriae ministrata in manus ordinis Isis incidisse.

Comitia Cataloniae regionalia

In Catalonia comitia ad parlamentum regionale creandum habita sunt. Cives independentiam Cataloniae desiderantes septuaginta duos (72) delegatos in parlamentum centum triginta quinque (135) delegatorum acceperunt. Apparet tamen ex demoscopiis plerosque Catalonienses se partem Hispaniae esse velle, si regioni remissiones vectigalium praebeantur et leges ferantur, quibus cultura et lingua Catalonica serventur. Mariano Rajoy, primus minister Hispaniae, se ad cooperationem cum novo regimine regionali Cataloniae paratum esse affirmavit. Ex legibus tamen consulendum esse neque unitatem aut suverenitatem nationalem Hispaniae in dubium vocari posse.

Complexus Volkswagen scandalo foedatus

Magistratus Americani palam fecerunt Volkswagen, complexum Germanicum autoraedis faciendis, fraudis deprehensum esse. In motris enim autoraedarum programma posuerat, quo emissiones ita falsificabantur, ut tertia parte vel dimidio minores viderentur quam re vera essent. Tale programma in undecim milionibus autoraedarum positum erat.

(Tuomo Pekkanen)

25.9.18

Syriza in xomitiis graeciae victrix

In comitiis parlamentariis Graeciae die Dominico (20.9.) factis Syriza victoriam reportavit, cum plus triginta quinque centesimas (35,47%) suffragiorum cepit. In parlamento centum quadraginta quinque (145) delegatos habebit. Quo facto Alexis Tsipras, moderator Syrizae, nuntiavit se una cum factione Graecorum Independentium (ANEL) novum regimen constituturum esse. Iuravit se certamen pro Graecia meliore continuaturum esse.

Mense Augusto Tsipras munus primi ministri deposuit, cum pars factionis ipsius contra condiciones oeconomicas ab Unione Europaea et debitoribus peregrinis positas rebellaret. Itaque fieri non potuit, quin nova comitia parlamentaria instituerentur.

Immigratio relationes civitatum temptat

Numerus immigratorum usque crescens praesertim terras Balcanicas gravat. Regimen Hungariae limitem contra Serbiam saepimento clausit, quo immigrationem impediret, et postea etiam in limite Croatiae fila ferrea spinosa ponenda curavit. Iuravit se fines patriae contra fugitivos praesertim ex Proximo Oriente et Asia venientes defensurum esse.

Croati primum fugitivis liberum transitum dederunt, sed postquam paucis diebus viginti milia hominum in Croatiam venerunt, patriam suam clausam esse nuntiaverunt et fugitivos autoraedis et traminibus ad confinium Hungariae et Sloveniae portare coeperunt. Primus minister Croatiae dixit propositum patriae suae non esse, ut centrum Europaeum fugitivorum fieret.

Hungari autem Croatiam vituperaverunt, quod advenas in tabulas non rettulisset. Ipsi quidem Hungari antea asyli petitores in nullas tabulas rettulerant et in Austriam miserant. Die Veneris (18.9.) factum est, ut vigiles Croati gaso lacrimogeno adhibito turbam hominum dispergerent, qui ex Croatia in Sloveniam penetrare conabantur.

Cur fugiant, quaeritur

Turbae fugitivorum, qui in Europam his temporibus veniunt, magnam partem ex viris et iuvenibus constare videntur. Cur fugiant, a multis quaeritur: inter bella virorum esse patriam suosque defendere, feminas cum pueris et infantibus, si necesse sit, fugam capere.

Milites Iraquiae in Europam fugiunt

Reuters, sedes informatica, rettulit complures milites et custodes securitatis Iraquianos his mensibus stationes suas reliquisse et ad turbas fugitivorum Europam petentium se adiunxisse, quia fiduciam in regimen Iraquiae amisissent. Numero virorum fugacium crescente futurum esse, ut res contra ordinem Isis minus efficaciter gereretur.

Unio Europaea leges suas non sequitur

Timo Soini, minister a rebus exteris Finnorum, monuit Unionem Europaeam leges suas non observare. Si commune consilium de condicionibus immigrationis non inveniretur, singulas terras suo modo acturas esse. Fieri non posse, ut confusio hodierna continuaretur. Finniam iam certas rationes ad commoda socialia advenarum restringenda praeparare.

(Tuomo Pekkanen)

18.9.15

Primus minister Sipilä ad cives appellavit

Oratione televisifica vespere Mercurii habita primus minister Juha Sipilä de oeconomia patriae publica locutus monuit debitum Finnorum publicum septem annos augescere. Ad cives et societates opificum appellavit, ut rationes ad sumptus publicos contrahendos quaererent. Petivit, ut cives renovationes a regimine propositas patienter acciperent.

Russia Suetiam praemonuit

Ministerium rerum exteriorum Russiae Suetiam de societate Natonis praemonuit. Si Suetia ad Natonem accessisset, novam rerum condicionem postulaturam esse, ut a parte Russiae responderetur. Sueti quidem non sunt militariter foederati, sed moderatores factionis centralis et democratarum Christianorum societatem cum Natone sustinere coeperunt.

Margot Wallström, ministra rerum exterarum Suetiae, dixit Suetos ipsos de politica sua exteriore et defensione consilia capere neque esse comprobandum, quod Russia Suetiae minitaretur. Relationes inter Russiam et Suetiam intercedentes his temporibus factae sunt frigidiores. Mense Augusto Sueti diplomatum Russum reppulerunt et Russi Suetum.

Papa abrogationem matrimonii faciliorem fecit

In ecclesia catholica matrimonium est insolubile sed certis de causis dissolvi sive abrogari potest. Processus abrogationis per saecula immutabilis mansit, sed nuper Papa Franciscus duabus epistulis motu proprio datis de mutationibus nuntiavit, quae ad introductionem processus brevioris et celerioris spectant. Utrique epistulae iam die Assumptionis Mariae (15.8.) subscripsit sed desideravit, ut die Nativitatis Mariae (8.9.) publicarentur.

Posthac matrimonium utraque parte volente statim abrogari poterit, cum antea abrogatio multos annos duraret. Nunc etiam gratuita esse debet. Postquam Papa Benedictus XIV (1740-1758) abrogationem renovavit, mutationes in illa factae non sunt.

Homo in spatio DCCCLXXVIIII dies

Sojuz, capsula spatialis Russorum, in Cazastaniam cum tribus cosmonautis feliciter descendit. Unus ex his erat Gennadi Padalka Russus, cosmonauta veteranus, qui in spatio diutius fuit quam quisquam ante eum, nam quinque volatibus factis octingentos undeoctoginta dies in statione siderali versatus est.

Creator commissarii Montalbano nonagenarius

Andreas Camilleri, auctor fabularum criminalium Sicilianus, nuper (6.9.) nonaginta annos complevit. Famam internationalem libris de commissario Montalbano obtinuit, ex quibus novissimus hoc anno editus est. Pelliculae televisificae ex his libris factae, in quibus primam personam agit Lucas Zingaretti, sunt etiam in Finnia celeberrimae.

Loca Siciliae, in quibus pelliculae factae sunt, ut platea principalis Ragusae veteris et domus commissarii in Lingula sicca (vulgo Punta secca) sita, visitatoribus ostenduntur. Camilleri, ut in colloquio televisifico die natali narravit, cotidie scribere pergit. Libri eius magnam partem lingua Siculorum scripti sunt, qua se etiam cogitare affirmavit.

(Tuomo Pekkanen)

11.9.15

Distributio profugorum

Moderatores Unionis Europaeae talem rationem in Europa introducendam esse censuerunt, ut profugi asylum petentes in diversas terras Unionis socias distribuerentur. Sperant omnes civitates illi consilio perficiendo interfuturas esse. Inceptum eo spectat, ut multitudo centum viginti milium fugitivorum, quae iam in Italia, Graecia Hungariaque est, in alias Unionis Europaeae regiones transferatur.

(Reijo Pitkäranta)

Quid Sipilä promiserit

Juha Sipilä, princeps minister Finlandiae, domum suam, quae in regione terrae septentrionali est, ad usum fugitivorum pollicitus est. Se ipsum iis aedibus minus egere, cum alterum quoque domicilium haberet et propter munus primi ministri in urbe Helsinki publico sumptu habitare posset. ”Spero fore”, inquit, ”ut ex consilio meo motus quidam popularis ad profugos adiuvandos oriatur.”

(Reijo Pitkäranta)

Kerry Russos monuit

Russi se milites in Syriam misisse concesserunt, qui copiis praesidentis Bashar al-Assad succurrerent. John Kerry, minister Americanus, id graviter ferens illos hortatus est, ne bello Syriaco ullo modo interessent. Si id fecissent, periculum fore, ne coalitio internationalis, quae contra ordinem Isis pugnaret, magnum detrimentum caperet.

(Reijo Pitkäranta)

Reclamatio agricolarum

Die Lunae (7.9.) multa milia agricolarum iratorum vias mediae urbis Bruxellarum machinis tractoriis pessime obstruxerunt. Qua reclamatione instituta ab Unione Europaea flagitabant, ut sibi pro alimentis, quae proferrent, maior pecunia solveretur. Aliquot cultores, qui reclamatum convenerant, ex Finlandia oriundi erant.

(Reijo Pitkäranta)

Dies insignis Elisabethae

Die Mercurii (9.9.) regina Elisabeth II omnes monarchas Britanniae diuturnitate regnandi superavit. Tum enim sexaginta tres annos, septem menses, duos dies in potestate fuerat sive diutius quam etiam regina Victoria. Diem illum memoria dignum Elisabeth in opere faciendo celebrabat, cum lineam quandam ferriviariam inauguravit.

(Reijo Pitkäranta)

De tramine nazistarum

Magistratus urbis Polonicae nomine Wałbrych confirmaverunt duos viros thesauros quaerentes in Silesia inferiore tramen militare historice insigne invenisse. Qui nuntius rem in eam opinionem adduxit, ut de tramine nazistarum fabuloso ageretur, quod auro oneratum esse diceretur. Neque locus exactus traminis reperti publice patefactus est.

(Satu Tuominen)

Opus Agathae optimum

Hoc mense (15.9.) centum viginti quinque anni acti sunt, cum Agatha Christie, scriptrix fabularum criminalium celeberrima, nata est. Ad honorem eius rei suffragium internationale institutum est de quaestione, quis ex libris eius omnium optimus esset. Palmam tulit opus anno millesimo nongentesimo undequadragesimo (1939) editum, quod ”Nec quisquam servatus est” inscribitur.

(Reijo Pitkäranta)

4.9.15

Ingens profugorum copia

Hoc anno amplius trecenta quinquaginta milia immigrantium Europam petentium Mare Mediterraneum transierunt. Qui numerus multo maior est quam toto anno proxime praeterito. Iter maritimum profugis tam perniciosum fuit, ut plus duo milia sescenti homines vitam amitterent. Plurimos fugitivos excepit Graecia, quo circiter ducenta viginti milia eorum pervenerunt.

(Reijo Pitkäranta)

Quid Barack Obama dixerit

In Alasca hac septimana conventus climaticus internationalis habitus est. Unus ex oratoribus erat praesidens Barack Obama: is participes docuit, quantopere omnium nationum interesset summa ope niti, ne atmosphaera totius orbis magis calesceret. Confessus est pollutiones aerias Civitatum Americae Unitarum multum ad condiciones climaticas conferre.

(Reijo Pitkäranta)

De relationibus Corearum

Kim Jong-un, dux Coreae Septentrionalis, concordiam cum Corea Meridiana nuperrime constitutam opibus bellicis terrae suae tribuendam esse dixit. Finem discidii novissimi inter Coreas orti terminum descripsit, qui utrique civitati viam consensus et fiduciae monstraret. Nisi autem Coreani meridiani arma ipsius nuclearia metuissent, futurum non fuisse, ut de pactione conveniret.

(Reijo Pitkäranta)

Area gasi terrestris reperta

Investigatores Italiani ante oram Aegypti in campum gasi terrestris incurrerunt, quo amplior in toto Mari Mediterraneo non inveniri videtur. Locus in profunditate sesquialterius chiliometri situs circuitu ad centum chiliometra quadrata patet. Area reperta tanta gasi terrestris copia abundare dicitur, ut usui Aegyptiorum ad multa decennia sufficiat.

(Reijo Pitkäranta)

De ludis Pekinensibus

Die Dominico (30.8.) certamina athletica omnium nationum Pekini ad finem sunt adducta. Ceteris terris praestantiores se praebuerunt Kenia, Jamaica, Civitates Americae Unitae. Grex Finlandensium successu mediocri certavit, quamquam Tero Pitkämäki nomisma aeneum in iaculatione obtinuit. E feminis nostris optima erat Minna Nikkanen, quae in saltu perticario decimum locum consecuta est.

(Reijo Pitkäranta)

Venetiana rursus celebrata

In Finlandia in morem venit mense Augusto exeunte aestatem praeteritam ludis sollemnibus paratis celebrare. Quae consuetudo imprimis ad urbes in litore Bothniae septentrionalis sitas valet. Celebrationes, quae Venetiana appellantur, maximam partem ex amplissimis spectaculis pyrotechnicis constant, quorum luce multicolori caelum tenebrescens collustratur.

(Reijo Pitkäranta)

Aves migrare coeperunt

Ornithophili Finni aves migrationem autumnalem coepisse nuntiant: Omnes fere longicrures iam in regiones meridianas evolavisse; ceteras etiam volantes, sicut hirundines, cuculos, sternas, magna multitudine caelum refrigescens in terras calidiores fugisse. Insectivoras quoque et aves rapaces nunc cum maxime alis se dare narrant.

(Saara Honkanen)

28.8.15

Profugi Europam petunt

Ordo Nationum Unitarum profugis adiuvandis (UNHCR) aestimat etiam tria milia fugitivorum singulis diebus in Macedoniam venire. Plurimi eorum ex Syria oriundi sunt, quae iam quattuor annos bello civili vexatur. Immigrantes maximam partem itinere Balcanico utuntur, cum per Graeciam, Macedoniam, Serbiam euntes Hungariam et Germaniam petunt.

(Reijo Pitkäranta)

Tsipras munus deposuit

Regimen Graeciae munus deposuit, ut princeps minister Alexis Tsipras nuntiavit. Idem dixit in Graecia mense Septembri nova comitia parlamentaria institutum iri. ”Ita”, inquit, ”civibus occasio dicendi dabitur, quid de auxilio pecuniario a creditoribus peregrinis mutuo sumpto sentiant”. Se ipsum sperare fore, ut suffragatores condiciones opitulationis acciperent et pactionem ratam facerent.

(Reijo Pitkäranta)

Irania et terrae occidentales

Relationes Iraniae et nationum occidentalium post conventionem de vi nucleari effectam celeriter meliores redditae sunt. Hoc vel inde patet, quod Philipp Hammond, minister Britanniae, iter officiale in Iraniam suscepit, ut Teherani sedem legati Britanniae rursus aperiret. Idem Iraniani eodem tempore Londinii fecerunt.

(Reijo Pitkäranta)

Le Pen de factione demotus

Jean-Marie le Pen, vir politicus Francogallus, de societate factionis dextimae, cui nomen Acies nationalis, demotus est. In causa erat, quod facinora horribilia in Germania nazistica commissa parvi aestimavisset. Filia Marine le Pen, praeses hodierna, suum patrem eumque praesidem factionis honorarium exauctorandum esse iamdudum postulabat.

(Satu Tuominen)

Quid Timo Soini dixerit

Timo Soini, minister a rebus exteris Finlandiae, oratione legatis peregrinis habita censuit patriae suae maxime interesse, ut cooperatio cum Russis continuaretur. ”Nobis quidem”, inquit, ”sanctiones Russis impositae respiciendae sunt, sed nihilominus illi in sodalibus nostris magni momenti numerantur. Utimur enim communi confinio longissimo et cotidianum fere commercium cum iis habemus”. 

(Reijo Pitkäranta)

Vetus lex in Utajärvi sublata

Utajärvi, paroechia Finlandiae, hoc anno centum quinquaginta annos complet. Ad honorem huius rei paroechiani veterem legem inde a saeculo undevicesimo valentem tollere decreverunt. Quae lex vetabat viros caelibes inter horam decimam vespertinam et quartam matutinam domo egredi. Interdictio ideo statuta erat, ne illi, si totam noctem foris comissati essent, mane nimis fessi ad opus venirent.

(Reijo Pitkäranta)

Certamina Pekini athletica

In stadio Olympico Pekinensi, qui Nidus avis appellatur, certamina omnium gentium athletica celebrantur. Die Dominico (23.8.) decretum est, quis in orbe terrarum pedibus pernicissimus esset. Talem se praebuit Usain Bolt, cursor Iamaicanus, quippe qui victoriam cursus centum metrorum reportaret.

(Reijo Pitkäranta)

21.8.15

Calamitas apud portum Tianjin

Displosiones, quae die Mercurii (12.8.) apud portum urbis Tianjin Sinarum factae sunt, ingentia damna fecerunt. Pars regionis circumiacentis deleta est, plus centum homines sunt mortui, circiter septingenti vulnerati. Praeterea nonaginta homines disparuerunt, ex quibus quinque et octoginta sunt siphonarii, qui ignes ex displosionibus ortos exstinguere conabantur. Calamitas originem habuit ex receptaculo portuensi, in quo maxima copia materiae toxicae et displosivae conservabatur. Tianjin, ubi sunt quindecim miliones incolarum, est emporium magni momenti et inter maximas Sinarum urbes numeratur. A Pekino, capite Sinarum, circiter centum quinquaginta chiliometra distat.

Bellum mundanum II in Iaponia commemorabatur

Die Sabbati (15.8.) septuaginta anni acti erant, ex quo bellum mundanum secundum in Iaponia finitum est. Imperator Akihito, filius imperatoris Hirohito, quo regnante Iaponia bellum gesserat, affirmavit se belli mundani secundi quam maxime paenitere et optavit, ne tragoedia belli iteraretur. Nationes vicinae flagitaverant, ut Iaponia veniam crudelitatum illius belli peteret. Sed Shinzo Abe, primus minister, monuit Iaponiam iterum iterumque sinceram paenitentiam rerum in bello mundano secundo gestarum expressisse. Censebat nullam causam esse, cur filii, nepotes generationesque futurae, quibus nihil negotii cum bello fuisset, ad veniam petendam cogerentur.

Investigatores linguarum Finno-Ugricarum convenerunt

In urbe Ulaburgo (vulgo Oulu) hac septimana investigatores linguarum Finno-Ugricarum convenerunt. Adsunt prope quadringenti homines ex variis nationibus oriundi. Maximae linguae Finno-Ugricae sunt Finnica, Estonica, Hungarica, sed ad eandem familiam pertinent etiam complures minores linguae, ex quibus pleraeque sunt parvorum populorum in Russia habitantium. Multae ex linguis Finno-Ugricis Russiae decenniis praeteritis omnino exstinctae sunt. Quae in Russia adhuc exstant Finno-Ugricae linguae, admodum procul distant a sermone Finnico. Populi, qui eis loquuntur, plerumque sunt nomades, apud quos condiciones vitae propter campos petrolei et gasi in terris eorum iacentes factae sunt difficiliores.

Cattus Carduroy viginti sex annorum

Vetustissimus in orbe terrarum cattus est Carduroy Oregoniensis, qui nuper aetatem viginti sex annorum superavit. Vivit ruri, caseum cheddar amat, mures libentissime petit. Multum sub divo versatur. Antea titulum catti vetustissimi tenebat Tiffany Two Didacopolitanus (vulgo San Diego Californiae), qui vixit annos viginti sex, dies ducentos quattuor.

Ludi mundani athleticae levis 2015

Ludi mundani athleticae levis, qui cras incipient, usque ad diem tricesimum Pekini fient. Postquam Londinium petitionem suam revocavit, Pekinum solum ad certamina mundana instituenda mansit. Ex Finnia septendecim athletae in ludos missi sunt sed perpauci ex eis nomismata adipisci poterunt. Summa spes Finnorum est in certamine iaculationis.

(Tuomo Pekkanen)

14.8.15

De duobus hostibus Turciae

Turci abhinc duas septimanas bellum duarum acierum gerere coeperunt. Aeroplana enim eorum bellica uno eodemque tempore impetus aerios et in Curdos et in milites ordinis Isis dederunt. Quorum hostium alteri ex montibus Iraquiae septentrionalis incursiones in fines Turciae faciunt, alteri in Syria cives innocentes ictibus terroristicis lacessunt.

(Reijo Pitkäranta)

De polo arctico possidendo

Russi ordini Nationum Unitarum argumenta proposuerunt, quibus innisi polum arcticum et regionem ei vicinam sibi vindicare student. Aliae nationes, quae de iisdem orbis arctoi partibus administrandis certant, sunt Norvegia, Canada, Dania, Civitates Americae Unitae. Plaga maxime septentrionalis studia harum civitatum eo magis excitat, quod copia glaciei deminuta ibi expeditius quam ante agere possunt.

(Reijo Pitkäranta)

Nova zona horaria Coreae

Die quinto decimo mensis Augusti (15.8.) Corea septentrionalis propriam zonam horariam usu recipiet. E consilio sequitur, ut indices horologiorum illo die dimidia hora moveantur. Causa renovationis est, quod Coreani septentrionales non iam eadem ratione horarum uti volunt ac Iaponienses, quos homines malevolos et imperii cupidos describunt.

(Reijo Pitkäranta)

Euripus Suesiensis dilatatus

Septimana praeterita in Aegypto caerimonia inaugurationis novi canalis Suesiensis magna pompa celebrata est. Euripus anno millesimo octingentesimo undeseptuagesimo (1869) in usum receptus dilatatus est, ut naves utroque eodem tempore navigare possent. Aedificationem immensam uno anno confecerunt.

(Saara Honkanen)

De felibus Australiae

Regimen Australiae ante annum bis millesimum vicesimum (2020) duas miliones felium silvestrium occisurum est. Decretum ad animalia minora tutanda spectat: magnum est enim periculum, ne amplius centum viginti genera animalium a felibus dilacerata omnino emoriantur. In Australia viginti duae fere miliones felium esse existimantur.

(Reijo Pitkäranta)

Res a Pekka Aalto gesta

In urbe New York certamen cursus paene quinque milium chiliometrorum positum est. Victor evasit Pekka Aalto, cursor Finlandensis spatiorum longissimorum. Is enim illud iter ingens quadraginta diebus totidemque noctibus emensus est. Ante certamen aestimabatur celerrimis cursoribus saltem quinquaginta duobus diebus et noctibus opus esse ad tantum spatium conficiendum.

(Reijo Pitkäranta)

Aestas in Finnia frigidior

Haec aestas agricolis Finlandiae parum favit, quamquam rerum condicio in diversis terrae partibus nonnihil variat. Nam caeli statu frigido et imbribus continuis effectum est, ut segetes multis septimanis serius maturescerent quam fieri solet. Quae cum ita sint, metuendum est, ne messis frumentaria hoc autumno solito minor fiat. Imprimis hordeum tempestate importuna laboravisse videtur.

(Reijo Pitkäranta)

7.8.15

Feriis ad finem vergentibus

Feriis aestivis ad finem vergentibus Nuntii Latini post intermissionem duorum mensium continuantur. Singulis septimanis nuntii a Radiophonia Finnica die Veneris emittuntur atque in televisione textuali (pagina 365) et in interreti simul divulgantur. Vicesimus septimus annus, ex quo prima emissio facta est, Kalendis Septembribus incipiet.

Numerus fugitivorum in dies crescit

Numerus fugitivorum, qui trans Mare Mediterraneum in Europam veniunt, magnopere crevit. Maxima quidem causa est bellum civile Syriae, sed  conversionibus politicis factum est, ut etiam aliae terrae Africae septentrionalis instabiles manerent.  Praesertim perturbatio Libyae, unde

brevissima in Italiam est traiectio, usui fuit clandestinis hominum vectoribus. Ad profectionem confert etiam, quod homines telephonulis portatilibus et per interrete de vitae condicionibus Europaeis et de aditu viisque certiora cognoverunt. Hoc anno plus mille nongenti homines in Mari Mediterraneo interierunt. In Unionem Europaeam circiter centum quinquaginta milia pervenerunt.

Crisis migrationis Caletensis

Greges migratorum, qui diversis viis ex Africa vel Asia in Europam venerunt, in proximitatem urbis Caleti (Calais) convenerunt, unde brevissima est in Britanniam per cuniculum traiectio. Circiter tria hominum milia apud aditum cuniculi manent, ut autocarris aut traminibus in Britanniam clam transeant.  His duobus annis custodes limitis Franciae plus quam undequadraginta milia migratorum illegalium impediverunt, ne Fretum Gallicum transirent. Portus Caletensis saepimento quinque metra alto protegitur et a vigilibus armatis defenditur, sed nihilo minus multis contingit, ut traminibus vel autocarris in Britanniam perveniant.

Pars aeroplani Malaesiani repertum

Ante duodeviginti menses (8.3.2014) aeroplanum Malaesianum (MH370), quod ex Cuala Lumpuriana in Pekinum volabat, in itinere inopinanter disparuit neque omni  communicatione interrupta sciri potuit, quid factum esset, neque ullum eius vestigium repertum erat. Causa calamitatis, qua ducenti undequadraginta homines perierunt, incognita mansit. Ex datis satelliticis coniectatum est illud aeroplanum in Oceanum Indicum in partibus ab Australia in occidentem vergentibus praecipitavisse. Nunc pars alae eiusdem generis aeroplani in litore Insulae Reunionis reperta est, quam partem experti ad aeroplanum calamitosum veri similiter pertinere censuerunt.

Ingentes greges locustarum in Russia meridionali

Ingentes greges locustarum regionem Stavropolis in Russia meridionali invaserunt. In illis partibus quotannis apparent sed plerumque temperi delentur. Hoc anno accidit, ut locustae ex regionibus vicinis repente venerunt neque a magistratibus retineri potuerunt. Greges instar nubium omnem messem comedere dicuntur. Nunc agris Russiae fertilissimis imminent.

(Tuomo Pekkanen)

12.6.15

Comitia in Turcia habita

Comitiis parlamentaribus in Turcia habitis factio Iuris et libertatis (AKP) quidem principatum servavit, sed maiorem suffragiorum partem non assecuta est. Ita praesidens Recep Tayyip Erdogan impeditus est, quominus lege constitutionali renovata potestatem suam augeret. Victores comitiorum evaserunt asseclae partium liberalium Curdis faventium. 

(Reijo Pitkäranta)

Quid Vladimir Putin dixerit

Praesidens Vladimir Putin in colloquio actis diurnis Corriere della Sera dato ait nullam esse causam, cur terrae occidentales Russos timerent. ”Nemo sanus”, inquit, ”ne in somniis quidem cogitare potest Russos subitum impetum in civitates Consociationis NATO facturos esse.” Addidit patriam suam solum id agere, ut se a periculis externis defenderet.

(Reijo Pitkäranta)

Guantanamo mox claudetur

Minister defensionis Civitatum Americae Unitarum, una cum magistratibus Aedium Albarum rogationem praeparare coepit, ut campus carceralis Guantanamo tandem clauderetur. Quae castra anno bis millesimo secundo (2002) ad eos retinendos condita sunt, qui in suspicionem terrorismi venerant. Etiam nunc ibidem centum viginti captivi, multi causa indicta, inclusi sunt.

(Reijo Pitkäranta)

MERS in Corea grassatur

Virus periculosissimum nomine MERS in Corea meridiana grassari coepit et iam magno hominum numero perniciei fuit. Agitur de infectione viarum respiratoriarum, ad quam sanandam adhuc nullum remedium inventum est. Propter hoc periculum multae scholae clausae sunt, et cives monentur, ne in publicum prodeant. Praeterea metuendum est, ne ille morbus inde in vicinas terras diffundatur.

(Reijo Pitkäranta)

Quid rector magnificus fecerit

In universitate urbis Romae certamen pulchritudinis institutum est ad iudicandum , quis ex studentibus omnium sapientissima et venustissima esset. In consilio arbitrorum etiam rector magnificus Eugenio Gaudio intererat. De ea re iratae complures profestrices publica epistula scripta eum vehementissime reprehenderunt censentes id, quod fecisset, universitati et toti Italiae dedecori esse.

(Satu Tuominen)

Barcinonenses victores facti

Die Saturni (6.5.) in stadio Berolinensi de cantharo optimorum in Europa gregum pedifollicorum dimicatum est. Quo in certamine manus Barcinonensis lusoribus societatis Juventutis se obiecit. Victoriam reportaverunt Barcinonenses follem in portam adversariorum ter ingerendo, cum Taurinenses hoc tantum semel efficere valerent

(Reijo Pitkäranta)

Nuntii Latini ad ferias abeunt

Nuntii Latini ob ferias aestivas in octo septimanas intermittuntur, quam ob rem proxima emissio non ante quam die septimo mensis Augusti (7.8.) fiet. Restat, ut auscultatoribus nostris gratias quam maximas agamus et aestatem quam iucundissimam exoptemus.

(Reijo Pitkäranta)

5.6.15

Russia aditum politicis Europaeis negavit

Russia in terras Unionis Europaeae indicem misit, in quo undenonaginta politici nominantur, quibus aditus in Russiam negatur. Sunt in indice pristini ministri rerum exterarum, europarlamentarii, magistratus a securitate. Ex terris septentrionalibus insunt tredecim homines, in his Heidi Hautala, delegata europarlamentaria Finnorum. Unio Europaea indicem a Russis compositum reprobavit eumque temerarium et improprium iudicavit. Timo Soini, novus minister a rebus exteris Finniae, censebat nullam causam esse exaggerandi, quia index nihil esset nisi responsum ad interdictiones, quas Unio Europaea propter crisim Ucrainae civibus Russis imposuisset.

Medvedev regimini Finniae gratulatus

Primus minister Russiae Dmitri Medvedev, primo ministro Finniae Juha Sipilä nuntium gratulatorium misit. Laudat relationes, quae inter Russiam et Finniam tradito more sunt amicales. Affirmat se in commercio, oeconomia, investionibus, scientia innnovationibusque ad cooperationem excolendam paratum esse. Nominat etiam res culturales et quaestiones humanitarias.

Conservativi Franciae posthac Republicani

Conservativi Franciae decreverunt, ut nomen mutarent. Factio, quae est Union pour un Mouvement Populaire (Unio Motus Popularis) sive UMP, erit posthac Les Republicains (Republicani). Nicolas Sarkozy, pristinus praesidens, qui huic factioni praeest, sperat fore, ut nomine mutato in comitiis anno bis millesimo septimo decimo (2017) futuris adiuvetur, ut denuo praesidens Francorum creetur.

Solar Impulse 2 terram circumvolat

Aeroplanum Solar Impulse 2 nominatum, quod tantum energia solari utitur, mense Martio ex Abu Dhabi iter suscepit, ut terram circumvolaret. Postquam in Omania, India, Birmania descendit, in Nanjing Sinarum venit, unde die Sabbati (30.5.) ad Insulas Havaianas versus trans Oceanum Pacificum perrexit. Sed iam post volatum triginta sex horarum aeronautae propter malam tempestatem in Nagoyam Iaponiae descenderunt ibique meliores condiciones meteorologicas exspectare constituerunt. Aeroplanum Solar Impulse est inceptum Helveticum, cuius auctores sunt André Borschberg et Bertrand Piccard, qui illud aeroplanum vicissim gubernant.

Contador in Circuitu Italiae victor

Albertus Contador, birotarius Hispanus, in Circuitu Italiae (Giro d’Italia) victor evasit. Secundus fuit Fabius Aruun Italicus. Contador iam anno bis millesimo octavo (2008) in eodem certamine victoriam adeptus est. Optimus erat etiam anno bis millesimo undecimo (2011), sed tum propter usum drogarum praemium amisit.

Annus scholasticus finites

A Kalendis Iuniis feriae aestivae scholarum in Finnia inierunt. Scholam fundamentalem perfecerunt duodesexaginta milia (58000) adulescentium, examine maturitatis approbatorum numerus erat paene viginti septem milium (27000). In scholis professionalibus studia perfecerunt duodeseptuaginta milia (68000). Novus annus scholasticus in Finnia inter dies decimum et tertium decimum mensis Augusti incipiet.

(Tuomo Pekkanen)

29.5.15

De novo Finnorum regimine

In comitiis Finniae parlamentaribus mense Aprili factis victores evaserunt factiones Centralis, Finni fundamentales, Conservativi, quarum factionum praesides Juha Sipilä, Timo Soini, Alexander Stubb de novo regimine constituendo et eius programmate inter se consultaverunt. Denique de novo regimine convenit, quod hodie a praesidente rei publicae nominatum est. Ministri in regimine sunt quattuordecim. Ex factione Centrali sunt sex ministri, ex Finnis fundamentalibus quattuor totidemque ex Conservativis. Primus minister est Juha Sipilä, minister rerum exterarum Timo Soini, minister aerarii publici Alexander Stubb. Principale propositum regiminis est oeconomiam patriae restituere, ne debitum publicum crescat sed paulatim minuatur. Communia et municipia posthac independentius quam ante de suis rebus administrandis constituere poterunt. Ad sumptus eorum deminuendos servitia, quae curare debent, amputantur. Tributa ex salariis solvenda non augentur, sed aequilibrium oeconomicum petitur tam parsimonia et vectigalibus quam incremento laboris.

ISIS Palmyram occupavit

Postquam copiae in praesidentem Bashar al-Assad fideles Palmyram reliquerunt, ordo ISIS urbem occupavit. Ex eo sequitur, ut ISIS aditum ad campos petrolei et gasi regionum Syriae mediarum habeat. Verendum est, ne monumenta antiqua aetatis Romanorum a pugnatoribus illis barbaris deleantur, sicut iam antea in Iraquia et Syria factum est. Palmyra erat olim statio commercialis itineris serici, quod aetate Augusti imperatoris ad imperium Romanorum annexa est. Secundo p.Chr.n. saeculo maxime floruit et anno ducentesimo duodecimo (212) ab imperatore Septimio Severo colonia Romana facta est. Templa et alia aedificia Palmyrae bene conservata inter monumenta archaeologica maximi momenti aestimantur.

Suecia in cantionibus Eurovisionis excellebat

Certamina cantionum Eurovisionis iam sexagies facta sunt. In hornotino certamine Vindobonae facto victoriam reportavit Suecia, secundum locum obtinuit Russia, tertium Italia. In certamen finale admissae erant viginti septem nationes. Cantionem Sueciae, ”Heroes” intitulatam, cecinit Måns Zelmerlöw. Finnia iam in semifinali ex certamine eliminata est.

Mathematicus John Nash mortuus est

Mathematicus John Nash, praemio Nobeliano ornatus, calamitate vehiculari in Nova Caesarea (vulgo New Jersey) interiit. Multos annos schizophrenia affectus erat. Quo modo cum morbo vixerit, describitur in pellicula cinematographica “A beautiful mind” anni bis millesimi primi (2001), quae quattuor praemia Oscar accepit.

Apes in USA gregatim moriuntur

In USA greges apium frequentius quam ante moriuntur. Inter mensem Aprilem huius anni et praeteriti cultores apium plus quam quadraginta centesimas examinum amiserunt. Sollicitudinem affert, quod nunc primum mortes aestivo tempore frequentiores erant quam hieme. Quae causa sit, cur apes ita gregatim moriantur, pro certo non constat.

(Tuomo Pekkanen.)

22.5,15

Quid UE decreverit

Ministri Unionis Europaeae consilium ceperunt, quo prohiberetur, ne immigrantes mari in Europam clam importarentur. Convenit de communi actione maritima suscipienda, qua contra negotiatores huiusmodi commercii pugnaretur. Placuit classem e copiis navalibus Unionis Europaeae instruere, cuius esset omnes naves, quae in aquis internationalibus sine vexillo ullius civitatis navigarent, statim occupare.

(Reijo Pitkäranta)

In Cypro de pace agitur

Nikos Anastasiades, praesidens Cypri, et Mustafa Akinci, dux Turcus partis eiusdem insulae septentrionalis, de pace in Cypro restituenda consultare coeperunt. Concordia, si inventa erit, et Graecis et Turcis magno emolumento fore existimatur. Cyprus inde ab anno millesimo nongentesimo septuagesimo quarto (1974) in duas partes divisa est.

(Reijo Pitkäranta)

Mursi capitis damnatus

Muhammed Mursi, pristinus praesidens Aegypti, una cum centum fere aliis sociis Ordinis fratrum Musulmanorum capitis damnatus est. Unio Europaea hanc sententiam a iudicibus Aegyptiis dictam valde reprehendit. Federica Mogherini, ministra Unionis a rebus exteris et securitatis negat poenam mortis cum iis postulatis congruere, quae ius internationale Aegyptiis imposuerit.

(Reijo Pitkäranta)

De re quadam viaria

Commeatus ferriviarius inter Estoniam et Russiam omnino desiit, postquam ultimum tramen, quod Moscua abierat, die Martis (19.5.) Tallinnum pervenit. Operae pretium non erat commeatum in eo itinere continuare, quod numerus viatorum hac ferrivia utentium valde deminutus erat.

(Reijo Pitkäranta)

De myopia iuvenum

Myopia sive difficultas longe videndi apud iuvenes Europaeos valde increbruit. Ex materia in diversis regionibus Europae collecta patet iam dimidiam fere partem hominum viginti quinque annis maiorum, sed undetriginta annis minorum illo vitio laborare. Constat iuventutem Asiae iam pridem oculos non satis prospicientes habere, et nunc eadem debilitas in Europam manavit.

(Reijo Pitkäranta)

De aestibus fervidis

His diebus tempestas in paeninsula Pyrenaea multo calidior fuit quam mense Maio fieri solet. Meteorologi novos primatus caloris in tabulas rettulerunt, cum temperatura in Portugallia meridiana usque ad quadraginta et in partibus Hispaniae orientalibus prope ad quadraginta tres gradus Celsianos ascendisset. Tales aestus ante mediam aestatem rarissime inveniuntur.

(Saara Honkanen)

Novi bibendi mores

Consumptio alcoholi in Finlandia etiam anno proxime praeterito descendit. Quod imprimis ad usum spiritus fortis, vini meri, vini pomarii pertinet, sed etiam cerevisia apud nos moderatius bibi coepta est. Talis progressus tam recessioni oeconomicae et tributis auctis quam moribus bibendi mutatis adscribendus est.

(Reijo Pitkäranta)

15.5.15

Dies victoriae celebratus

Die Saturni (9.5.) septuaginta anni a secundo bello mundano composito acti erant, et in Europa dies victoriae celebrabatur. Moscuae pompa militaris magnificentissima instituta est. Praesidens Vladimir Putin orationem habuit, qua praeter exspectationem non solum Russos, sed etiam socios eorum Britannos, Francogallos Americanosque propter victoriam e Germanis nazistis reportatam laudavit.

(Reijo Pitkäranta)

Conservativi victores

Comitiis parlamentaribus in Britannia habitis factio conservativa, cui praeest David Cameron, amplius dimidiam partem sedium legatorum sibi conciliavit. Inde sequitur, ut conservativis non iam aliis factionibus opus sit ad civitatem administrandam, sed novum regimen soli formare possint. Praesides trium factionum devictarum, in iis Ed Miliband, dux laboristarum, statim munus deponere decreverunt.

(Reijo Pitkäranta)

Castro papam convenit

Relationes inter Cubam et ecclesiam catholicam intercedentes meliores sunt quam umquam post res in Cuba abhinc quinquaginta sex annos eversas. Huc pertinet, quod praesidens Raul Castro die Dominico (10.5.) in Civitate Vaticana papam Franciscum convenit et cum eo amplius horam collocutus est. Sine interprete loqui poterant, quia uterque lingua Hispanica sermone patrio utebatur.

(Reijo Pitkäranta)

Liberia Ebola liberata

Liberia, res publica in Africa occidentali sita, civitas febri Ebola libera pronuntiata est. Iam enim quinquaginta fere dies elapsi sunt, cum ibi nulla contagio inventa est. Medici tamen cives ad caute vivendum hortantur, donec etiam terrae vicinae Guinea et Mons Leoninus huius morbi expertes fiant.

(Reijo Pitkäranta)

Epistula subsidiariis missa

Mense Maio procedente exercitus Finlandiae nongentis fere milibus subsidiariorum litteras mittit, ut unusquisque certior fiat, quod munus suum in ordine militari sit. Quibusdam est mandatum bello orto negotium civile agere. Epistulis missis curatores regionales etiam cognoscere volunt, num data subsidiantium personalia, quae in repertorio habeant, mendis careant.

(Antti Ijäs)

De invento archaeologico

Abhinc annum et sex menses repertum est sepulcrum mediaevale in Janakkala, communi Finniae. Una cum viro circiter anno millesimo trecentesimo mortuo etiam duo gladii humati erant, quorum unus ab aetate Vicingorum, alter ab expeditionum sacrarum temporibus originem trahit. Illum fortasse hereditate acceptum esse, hunc in usu proprio defuncti fuisse creditur.

(Antti Ijäs)

De sationibus vernis

Sationes vernae in Finlandia saltem sesquiseptimana serius factae sunt quam fieri solent. In causa sunt imbres, frigus, agri umidi. In partibus terrae septentrionalibus, ubi arva adhuc partim nivibus obruta sunt, condicio rerum etiam peior est.

(Reijo Pitkäranta)

8.5.15

Expo Milano 2015 – Expositio Universalis Mediolani

Expositio Universalis, in qua plus centum quadraginta nationes intersunt, Kalendis Maiis Mediolani aperta est. Per sex menses Mediolanum erit velut fenestra mercatoria, in qua nationes ad quaestionem respondent, quo modo cibus saluber omnibus in mundo populis praestetur et aequilibrium planetae conservetur. Inter expositionem in urbe Mediolano et in area expositionis, cuius amplitudo est unius fere milionis metrorum quadratorum, spectacula artistica et musicalia praebentur atque conventus et exhibitiones instituuntur. Primo die visitatores fere ducenta quinquaginta milia numerabantur. Omnino plus viginti miliones hospitum expositionem visitaturos esse aestimatur.

Maxima in Baltia exercitia militaria

Exercitia militaria, quibus maiora in regione Baltica post independentiam restitutam facta non sunt, quarto huius mensis die (4.5.) in Estonia initium habuerunt. Inter decem dies exercitiis intersunt plus tredecim milia militum. Adsunt observatores sedecim terrarum, inter quas Russia et Belorussia.

Bellum in Europa ante LXX annos finitum

Hodie (8.5.) septuaginta anni transacti sunt, ex quo Germania nazistica in deditionem venit et bellum mundanum secundum in Europa finitum est. Copiae exercitus rubri et confoederatorum occidentalium in flumine Albi (Elbe) iam die vicesimo quinto mensis Aprilis (25.4.) convenerant. Hitler, dictator Germanorum, pridie Kalendas Maias Berolini suicidium fecit.

Ducissa Catherine filiolam peperit

William, princeps Britanniae, et Catherine, ducissa Cantabrigensis, postridie Kalendas Maias (2.5.) filiola aucti sunt. Nomen infantis est Charlotte Elisabeth Diana. Post fratrem George, primogenitum anno bis millesimo tertio decimo (2013) natum, patrem William avumque Charles filiola in ordine heredum throni Britanniae quartum locum tenet.

Feriae in oriente viliores

Finito bello mundano secundo aulaeum ferreum, ut dicebatur, Europam in duas partes diu dividebat. Vestigia huius aulaei Europam adhuc ita dividunt, ut pretia in terris orientalibus sint viliora quam in Europa occidentali et septentrionali. Ideo itinera feriantium in Europam orientalem fiunt in annos frequentiora. In Lithuania, Polonia, Slovakia, Hungaria, Bulgaria eadem pecunia bis tot merces vel servitia quot in Finnia emi possunt. Anno proximo (2014) Finni paene octo miliones itinerum peregre fecerunt. Plurima itinera (29%) facta sunt in Estoniam, sed etiam in Poloniam et Hungariam Finni frequenter ad ferias agendas profecti sunt.

Ciconia primum in Finnia nidificat

In Koski, paroecia Finniae occidentalis-meridionalis, ciconia nidificat, quod numquam ante in Finnia evenit. Cum ante duos annos homines ciconiam ibi vidissent, turrim ad nidum faciendum idoneam aedificaverunt ea spe inducti, ut avis reverteretur. Neque spes eos fefellit, nam nuperrime ciconia revenit et cum coniuge ibi nidum facit.

(Tuomo Pekkanen)

24.4.15

Novum Finniae parlamentum creatum

In comitiis Finniae parlamentaribus die Dominico (19.4.) factis ex duobus milibus candidatorum ducenti in proximum quadriennium creati sunt. Factio centralis in novo parlamento undequinquaginta (49) delegatos habet, Finni fundamentales duodequadraginta (38), conservativi triginta septem (37), democratae sociales triginta quattuor (34), virides quindecim, confoederatio sinistra duodecim, factio popularis Sueca novem, democratae Christiani quinque. Democratae sociales, qui octo delegatos amiserunt, numquam ante magnitudine quarto loco in parlamento fuerunt. Ad urnas septuaginta centesimae ex civibus suffragium habentibus venerunt. Feminae in novo parlamento octoginta tres (83) numerantur. De novo regimine constituendo Juha Sipilä, praeses factionis centralis, cum praesidibus ceterarum factionum consultat

.

Calamitates in Mari Mediterraneo iterantur

Commissio Nationum Unitarum profugis adiuvandis (UNHCR) Unionem Europaeam hortatur, ut consilia capiat, quibus immigrantes naufragi in Mari Mediterraneo reperiantur et efficacius adiuventur. Anno proximo ducenta undeviginti milia (219 000) profugorum vel immigratorum Mediterraneum traiecti sunt, ex quibus tria milia quingenti(3 500) naufragiis interierunt. Hoc anno iam triginta quinque milia (35 000) in Europam venerunt et mille septingenti quinquaginta homines in mari vitam amiserunt. In dies calamitates fiunt frequentiores et numerus victimarum crescit. Septimana vergente (19.4.), cum navigium nimis oneratum prope oram Libyae cecidisset, plus nongenti homines interierunt.

Matteo Renzi, primus minister Italiae, petiit, ne Italia ad immigratores salvandos sola relinqueretur. Praesidens Franciae Francois Hollande flagitavit, ut itinera diligentius vigilarentur, quibus clandestini hominum importatores uterentur. Idem monuit pluribus navibus et aeroplanis opus esse, quibus importatio hominum clandestina impediretur. Erkki Tuomioja, minister a rebus exteris Finnorum, qui die Lunae in conventu ministrorum Unionis Europaeae interfuit, censebat causam immigrationis esse in difficillimis vitae condicionibus. Saeva paupertate, bellis gestis, iuribus humanis violatis nec non discriminatione homines impelli, ut domibus relictis vitam periclitarentur.

Putin ad cooperationem cum USA paratus

Vladimir Putin, praesidens Russiae, affirmavit se ad cooperationem cum Americanis paratum esse, quia Russia et USA multa studia et commoda communia haberent. Ad illa pertinere stabilitatem oeconomiae mundanae, democratizationem, eradicationem paupertatis atque coercitionem cum terrorismi et criminalitatis organizatae tum propagationis armorum internecivorum. Neque interesse, quis in comitiis anno proximo futuris praesidens Americanorum crearetur, nam cooperationem non ad personam sed ad civitatem spectare.

(Tuomo Pekkanen)

17.4.15

Quid Russi sensuerint

Ministerium Russiae a rebus exteris sententiam edixit, qua consilia terrarum septentrionalium sui communiter defendendi vehementer condemnavit: Russos vidisse, quae in actis diurnis Aftonbladet de illa re scripta essent. Ex talibus propositis adversus Russos adumbratis sequi posse, ut omnes fere fructus, quos illae una cum Russis peperissent, infeliciter perirent.

(Reijo Pitkäranta)

Obama et Castro collocuti

Die Saturni (11.4.) Barack Obama, praesidens Americanorum, et Raul Castro, dux Cubae, in urbe Panama convenerunt et per longum tempus collocuti sunt. Postea Obama diurnariis illum sermonem fructuosum descripsit, unde nova aetas in historia utriusque civitatis inire posset. ”Bellum frigidum”, inquit, ”compositum est, neque civitas Cubanorum saluti Americanorum iam imminet”. 

(Reijo Pitkäranta)

Isis paulatim regredi cogitur

Isis, ordo islamitarum, amplius quartam earum regionum partem, quas in Iraquia sub potestatem suam redegerat, iam amisit. Tribunus militum Steve Warren, cuius est notitias ex Pentago divulgare, nuntiat copias illas ex iis locis, quibus antea stabant, paulatim retrudi. Milites confoederationis, cui Americani praesunt, in Iraquiam et Syriam plus tria milia ictuum aeriorum fecerunt.

(Reijo Pitkäranta)

Calamitas ante Libyam maritima

Die Dominico (12.4.) ad oram Libyae calamitas maritima facta est, qua circiter quadringenti immigrantes illegales vitam amisisse existimantur. Custodes litorales Italiae nuntiaverunt sibi contigisse, ut centum quinquaginta fere homines e naufragio servarent. In navigio saltem quingenti vectores erant, in quibus multi pueri et puellae.

(Reijo Pitkäranta)

Index progressus socialis

Novus index progressus socialis divulgatus est. Hac statistica, quae quotannis de omnibus orbis terrarum civitatibus componitur, aestimari potest, quomodo quaeque res publica officia erga populum suum socialia expleat. Civitas optima hoc anno iudicatur Norvegia, quam sequitur Suetia. Finlandia septimum locum obtinuit.

(Saara Honkanen)

De comitiis parlamentaribus

Die undevicesimo huius mensis (19.4.) in Finlandia comitia parlamentaria instituentur. More solito civibus facultas in antecessum suffragandi oblata est, dummodo sententiam, si serissime, postridie Idus Apriles (14.4.) darent. Illo die vesperi apparuit amplius triginta centesimas hominum ius suffragii adhibuisse. 

(Reijo Pitkäranta)

Adventus veris inaequalis

Ver in Finlandiam hoc anno inaequaliter venit. Nives quidem et glacies solito maturius dissolutae sunt, sed adventus avium migratoriarum duabus fere septimanis serior est quam antea fuisse consuevit. In causa sunt venti septentrionales idemque frigidi et adversi, quibus factum est, ut maiora avium examina admodum cunctanter e regionibus meridianis redirent.

(Reijo Pitkäranta)

10.4.15

De programmate Iraniae nucleari convenit

De programmate nucleari inter Iraniam atque terras occidentales, Russiam Sinasque per duodecim annos consultatum est. Disputabatur, utrum Irania arma nuclearia an tantum nuclearem energiam parare vellet. Postridie Kalendas Apriles condiciones adeo convenerunt, ut concordia certa et definita mense Iunio inveniri posset. Irania se obligat, ne nuclearia arma acquirat, ex quo sequitur, ut sanctiones internationales ei impositae tollantur. Benjamin Netanjahu, primus minister Israelis, iudicavit concordiam factam exsistentiae patriae suae imminere. Barack Obama autem concordiam historicam appellavit, qua securitas Americanorum et foederatorum augeretur.

Graecia summa aerarii inopia laborat

De programmate debitorum continuando inter Graeciam et eurozonam nondum convenit. Ut discrimen oeconomicum sublevaret, Graecia a Germania ducenta undeoctoginta miliarda euronum ad damna sarcienda flagitavit, quae regimen nazisticum fecerat. At iam ante viginti quinque annos Graecia pactum probavit, ex quo nullae amplius compensationes reposcerentur aut redderentur.

Papa de pace appellavit

In oratione paschali Papa Franciscus de pace praesertim in Syria et Iraquia appellavit. “Communitas internationalis, ut speramus, non debet ante hanc ingentem tragoediam humanitariam iners manere”, ait Papa. Concordiam de programmate nucleari cum Irania factam laudavit et sperabat fore, ut orbis terrarum tutior fieret. Papa mentionem separatim fecit ictus terroristici nuper in Kenia facti, quo aggressores motus Al-Shabaab in campo Universitatis Garissae centum quadraginta septem homines, imprimis Christianos, interfecerunt. Passiones, quibus Christiani etiam in aliis mundi partibus subicerentur, memoravit et optavit, ut in angustiis sublevarentur.

Ucraina communismum vetitura

Regimen Ucrainae legem feret, qua ideologia, propaganda symbolaque communistica vetabuntur. Iam antea lex perlata est, qua recentiores pelliculae cinematographicae et televisificae, in quibus exercitus aut milites Russiae ut heroes praesentantur, vetitae sunt. Factio communistica in comitiis parlamentariis anno bis millesimo duodecimo (2012) tredecim centesimas (13%) suffragiorum in Ucraina accepit.

Ad emacerationem allicere illegitimum erit

Parlamentum Francorum additamentum ad legem de sanitate publica probavit, ex quo homines ad emacerationem ita allicere non liceret, ut in periculum mortis inciderent aut valetudine periclitarentur. Qui illam legem violavissent, multa decem milium euronum aut carcere unius anni punitum iri. Lex imprimis ad eas paginas interretiarias coercendas spectat, in quibus homines ad nimiam gracilitatem incitantur. Ad quadraginta milia Francorum, ex quibus maior pars sunt iuvenes feminae, adulescentulae aut puellae, anorexia laborant. Propositum legis etiam est, ne indutrices nimis macrae ad novos vestiendi modos praesentandos accipiantur.

(Tuomo Pekkanen)

3.4.15

Gubernator stragem fecit

Causa calamitatis aeriae in Alpibus factae iam constat. Pro certo enim habetur aeroplanum a gubernatore consulto deletum esse. Ipse pilota e diaeta parumper abisse videtur, quo facto gubernator Andreas Lubitz recusavit, quominus eum rursus intromitteret. Deinde aeroplanum cum omnium interitu in montem direxit.

(Satu Tuominen)

Merkel Helsinkium adiit

Angela Merkel, cancellaria foederalis Germaniae, die Lunae (30.3.) Helsinkium venit, ubi Alexander Stubb, princeps minister Finlandiae, eam hospitio recepit. Inter visitationem etiam praesidentem Sauli Niinistö convenit et particeps fuit colloquii, in quo de rebus Unionis Europaeae disceptabatur.

(Reijo Pitkäranta)

Dies Dominica palmarum

Hac septimana in ecclesia occidentali hebdomada sancta agitur. Initium cepit a Dominica palmarum (29.3), quae ad memoriam adventus Iesu in urbem Hierosolyma celebratur. Scriptum est turbam hominum eum salutantem ramos palmarum in via stravisse. Quare hoc die apud nos puellis moris est homines adultos virgis leviter caedere et cantilena recitata omnia bona exoptare.

Memoria ultimae cenae

Dies Iovis septimanae sanctae Christianos de ultima cena commonuit, quam Iesus cum discipulis sumpsit. Hic dies Latine dies viridium appellatur: tunc enim in ecclesia vetere iis, qui paenitentiam egerant, remissio peccatorum dabatur et hi tamquam rami virides in arborem ecclesiae denuo inserebantur.

Dies passionis Christi

Hodie (3.4.) diem passionis Christi habemus. Sunt, qui putent Iesum anno tricesimo tertio (33) in cruce fixum esse: tum enim in regione Hierosolymitana eclipsis solis fuit, cuius mentionem evangelistae inferre videntur. Si traditioni Graecae fidem tribuimus, crucifixio Iesu die vicesimo tertio mensis Martii (23.3.) facta est. Ii autem, qui memoriam Latinam sequuntur, eam biduo post sive die vicesimo quinto eiusdem mensis (25.3.) evenisse credunt.

De ignibus diei Saturni

Vulgo creditum est die Saturni sive postridie, quam Christus mortuus et sepultus est, malos spiritus in aere volitare. Ad eos depellendos in Finlandia occidentali eo die vesperi magnae lignorum strues comburuntur, quarum flammae in tenebris longe lateque elucent.

(Reijo Pitkäranta)

Dies resurrectionis Christi

In historia evangelica traditum est Iesum tertio die sive die Dominico mane e mortuis excitatum esse et postea discipulis suis apparuisse. Miraculum resurrectionis tantum est, ut non solum homines magno gaudio afficiat, sed etiam naturae laetitiam parare videatur. Est enim vetus opinio Solem illo mane orientem in caelo cum iubilatione saltare.

(Reijo Pitkäranta)

27.3.15

Tragoedia in Alpibus aeria

Aeroplanum societatis Germanwings, quod die Martis (24.3.) Barcinone Dusseldorpium volabat, in Alpibus Franciae contra montem praecipitavit. Omnes centum quinquaginta homines, qui ibi vehebantur, perierunt. Ante calamitatem aeroplanum per octo minutas descendebat, sed nullus nuntius necessitatis a pilotis missus est. Causa tragoediae adhuc est ignota.

Ex Finnia quinquaginta milites in Iraquiam

Praesidens Finniae Sauli Niinistö decrevit, ut in Iraquiam septentrionalem quinquaginta milites Finni mitterentur, qui copias Peshmerga Curdorum ad proelia contra ordinem ISIS committenda exercerent. Finni bello non intererunt neque in Iraquia diutius anno remanebunt. Partem maioris gregis internationalis facient, cui praeerit Germania. 

Finni, Sueci, Dani contentissimi

Cum in Unione Europaea quaereretur, qui homines vita sua contentissimi essent, apparuit Finnos una cum Suecis et Danis primum locum occupare. Investigatio effecta est ab Eurostat, officio statistico Unionis. Felicitatem plurimum auxit bona valetudo, sed magni erant etiam condiciones oeconomicae et relationes sociales. Miserrimi inventi sunt in Bulgaria. Inter posteriores erant etiam Graeci, Cyprii, Hungari, Portugalli. Praeterea apparuit iuvenes esse contentiores vita sua quam generationes seniores. Inter sexus nulla fere differentia reperta est, nam viri in Unione Europaea paululo tantum contentiores erant quam feminae.

Russia exercitia militaria ad finem perduxit

Russia exercitia militaria ad finem perduxit, quibus copias suas septentrionales comprobaverat. Intererant exercitiis, ut Russi nuntiaverant, plus octoginta milia militum ex variis Russiae partibus convocata, una et quadraginta naves bellicae, quindecim naves submarinae, plus ducenta aeroplana. Etiam brigata motorizata, in confinio Finniae nuper locata, parata esse debebat.

Unio Europae pauperibus Graeciae subveniet

Unio Europaea duo miliarda euronum Graeciae praebet, quibus pauperes, iuvenes opere destituti atque societates mercatoriae crisi oeconomica laborantes adiuventur. Illa subventio cum debitis

Graeciae internationalibus colligata non est sed ad opera spectat, quae augmentum oeconomicum creant et societatem Graecorum stabiliorem faciunt.

Potatores cafeae diutius vivere

Recens investigatio Iaponica ostendit potatores cafeae forsitan ceteris diutius vivere. In Iaponia nonaginta milia hominum inter undeviginti annos sequebantur. Compertum est letalitatem apud cafeae potatores decem, immo etiam viginti quinque centesimis (10-25%) minorem esse quam iis, qui cafeam vitant. Effectus notatus est iam in eis, qui unum pocillum cafeae singulis diebus sumebant, sed maior erat utilitas tria vel quattuor pocilla sumentibus. Similes conclusiones iam antea in aliis investigationibus factae sunt. Veri similiter cafea etiam periculum morborum cardiovascularium et diabetae minuere potest.

(Tuomo Pekkanen)

20.3.15

Putin in publicum rediit

Vladimir Putin, praesidens Russiae, cum decem dies conspectum omnium fugisset, postridie Idus Martias (16.3.) rursus in publicum prodiit. Tum enim Petropolim venit praesidentem Kirgisistaniae Almazbek Atambajev conventurus. Ita susurrationibus crebris, quae de sorte eius dissipari coeperant, tandem finis est factus. Ille, qui bona valetudine uti videbatur, diurnariis: ”Vita”, inquit, ”sine rumoribus tristis est”.

(Reijo Pitkäranta)

Vanuatu procella deleta

Septimana vergente Vanuatu, civitas insularis in Mari Pacifico sita, tam saeva procella afflicta est, ut paene omnia eius aedificia funditus delerentur. Tempestas summi gradus sive quintae classis fuisse existimabatur. Praesidens Baldwin Lansdale: ”Ad vitam publicam restituendam ”, inquit, ”a primis initiis proficiscendum est.”

(Reijo Pitkäranta)

Comitia in Israele habita

Die Martis (17.3.) in Israele comitia parlamentaria facta sunt. Victoriam eripuit Likud, factio dextra principis ministri Benjamin Netanjahu, cum ad quattuor et viginti centesimas suffragiorum sibi paravit. Foedus Sionistarum, quod cum Likud de principatu certabat, cladem accepit sententiarum undeviginti fere centesimis sibi conciliatis.

(Reijo Pitkäranta)

De pollutionibus aeriis

Copia carbonei dioxydati in aera emissi anno proximo non iam aucta est, ut ex Ordine ab energia mundi (IEA) narratur. Qui nuntius oecologis eo gratior et acceptior est, quod tales emissiones his quadraginta annis continenter fere creverunt. Condicio rerum nova imprimis Sinensibus tribuenda est, quippe qui pollutionibus aeriis deminuendis impensam operam dediderint.

(Reijo Pitkäranta)

Franciscus rude donari vult

Papa Franciscus septuaginta septem annos natus ait se idem facturum esse ac praedecessor Benedictus XVI: sibi enim propositum esse, ut, postquam octoginta annos complevisset, tamquam emeritus munus deponeret. Antea pontificibus Romanis moris erat in Sancta sede apostolica tamdiu manere, quoad diem supremum obirent

(Reijo Pitkäranta)

Statua Mahatmae Gandhi

Mahatma Gandhi, dux motus Indiae e dominatione Britanniae liberandae, iam suam statuam in media urbe Londinio habet. Pridie enim Idus Martias (14.3.) monumentum eius in area parlamentari collocatum ritu sollemni revelatum est. Interfuerunt huic caerimoniae inter alios David Cameron, princeps minister Britanniae, et Shri Gopalkrishna Gandhi, nepos Mahatmae.

(Reijo Pitkäranta)

De nuntiis Carelicis

Radiophonia Finnica Generalis nuntios Carelicos emittere coepit. Lingua Carelica genere proxima est Finnicae linguae, et circiter quinque milia hominum in Finnia habitare aestimatur, qui hoc sermone patrio in dialectos tres diviso cotidie utuntur. Nuntios colligit et Carelice reddit Natalia Giloeva, investigatrix Universitatis Finniae Orientalis.

(Antti Ijäs)

13.3.2015

De homicidio suspecti in Russia deprehensi.

Homines, qui Borim Nemtsov, ducem oppositionis Russiae, occidisse suspiciuntur, in Ingusia deprehensi et Moscuam missi sunt. Omnes sunt origine Tzetzeni. Unus ex his se participem caedis fuisse in iudicio Moscuensi confessus est. Tres culpam negaverunt. Quis caedem mandaverit, adhuc ignoratur.

Dies internationalis feminarum

In urbem New York multa milia hominum e diversis mundi regionibus ad diem internationalem feminarum celebrandum congregata erant. Ban Ki-moon, secretarius generalis Nationum Unitarum, sollicitus est praesertim, quod stupra feminis illata in bello pro armis adhibentur, exempli gratia in Nigeria, Iraquia, Syria. In Platea Petriana urbis Romae Papa Francisus monuit mundum sine feminis sterilem esse. “Feminae vitam portant”, inquit, “et vident longius. Nobis transferunt potestatem longius videndi et mundum aliis oculis intelligendi, corde magis creativo, patientiore, teneriore. Omnibus diebus feminae societatem humaniorem et hospitaliorem construere conantur.”

ISIS antiquitates Iraquiae diruit

Ordo ISIS antiquitates, quae hereditas culturalis totius mundi habentur, in Iraquia diripit. Nimrud, urbs antiqua, armis gravioribus deleta est et antiquitates multorum milium annorum in urbe Mosul et in Hatra direptae sunt. Maiora monumenta franguntur, res pretiosae mercatoribus clandestinis veneunt.

Russi bona immobilia in Finnia emunt

Peregrini bona immobilia in Finnia libere emere possunt. Praesertim Russi fundos et villas aestivas emerunt. Propter crisim Ucrainae politici deliberare coeperunt, an tutum esset peregrinis terras vendere, quae sunt prope loca strategica vel in insulis apud cursus navium maritimos iacentibus. Cum praesidens Sauli Niinistö in hanc rem animum intendisset, Carl Haglund, minister defensionis, suasit, ut in programmate novi regiminis, quod post comitia parlamentaria constitueretur, mutatio legis scriberetur, qua impediretur, ne bona immobilia in locis strategicis peregrinis ita venirent, ut securitas patriae periclitaretur.

Bellum hiemale ante LXXV annos finitum

Hodie (13.3.) septuaginta quinque anni acti sunt a die, quo bellum hiemale inter Finniam et Unionem Sovieticam finitum est. Unio Sovietica iussu Stalini bello non indicto Finniam invasit. Propositum erat Stalini totam Finniam expugnare sed gravibus cladibus acceptis post centum quinque dies incepto destitit. Finni plus viginti sex milia militum amiserunt, ex parte Unionis Sovieticae plus ducenta milia cecidisse aestimantur. Pacto pacis Moscuensis Finnia Unioni Sovieticae magnam partem Careliae et certas regiones Finniae orientalis cedere coacta est, praeterea insulas Sinus Finnici exteriores. Libertatem autem et independentiam servavit.

(Tuomo Pekkanen)

6.3.2015

Nemtsov Moscuae occisus

Boris Nemtsov, unus e notissimis adversariis regiminis Russiae, die Veneris vesperi (27.2) in media urbe Moscua occisus est. Nuntiatum est eum quattuor glandibus plumbeis ex autocineto praetervehente emissis mortem occubuisse. Nemtsov, qui gravissimus obiurgator praesidentis Vladimir Putin erat, annis nonagesimis munere principis ministri vicarii rei publicae Russiae fungebatur.

(Reijo Pitkäranta)

Visitatio regis et reginae

Die Martis (3.3.) rex Suetiae Carolus Gustavus XVI et regina Silvia in Finlandiam salutandi causa profecti sunt magna comitante caterva. Hospites regii, ubi Helsinkium advenerunt, a praesidente Sauli Niinistö et coniuge Jenni Haukio palatio praesidentiali sollemniter excepti sunt. In hoc itinere triduano etiam urbem Lappeenranta adierunt.

(Reijo Pitkäranta)

Pactum Israelis et Iordaniae

Moderatores Israelis et Iordaniae pactum inierunt, quo utrique civitati potestas dabitur magnam copiam aquae potabilis accipiendi. Convenit enim, ut in Iordania officina aedificaretur, cuius esset aquam e Sinu Arabico deductam sale purgare. Aqua dulcis ita elicita maximam partem in Israelem et in regiones Palaestinenses transferetur, cum Iordaniae plus aquae e flumine Iordane suppeditetur.

(Reijo Pitkäranta)

Museum Iraquiae nationale

In Iraquia primum his duodecim annis accidit, ut Museum nationale, quod Bagdati est, portas civibus aperiret. Hoc museum unum e celeberrimis habetur, quamquam saltem quindecim milia rerum archaeologicarum, quae ibi collectae erant, furto surrepta sunt. Rapinae id genus praesertim post praesidentem Saddam Hussein potestate expulsum factae sunt.

(Reijo Pitkäranta)

Comitia parlamentaria Estoniae

Kalendis Martiis (1.3.) in Estonia comitia parlamentaria habita sunt. Sententiis computatis apparuit reformistis, qui dicuntur, contigisse, ut statum maximae factionis in parlamento servarent. Paraverunt enim sibi triginta sedes parlamentares, cum fautores partium mediarum viginti septem et democratae sociales quindecim legatos sibi conciliarent.

(Reijo Pitkäranta)

Magna Charta DCCC annorum

Hoc anno octingenti anni acti sunt, cum Magna Charta Libertatum in Anglia edita est. Hoc documento anno millesimo ducentesimo quinto decimo (1215) dato cautum est, ne quis vir liber contra legem comprehenderetur neve civibus tributa extraordinaria comitiis publicis invitis imponerentur.

(Reijo Pitkäranta)

Mare Balticum prope apertum

Mare Balticum, quod hiemali tempore frigoribus concrescere solet, hoc anno glacie fere caret. Nunc solus Sinus Bothnicus extremusque Sinus Finnicus campis glacialibus obtecti sunt; area ea dimidio minor est quam anno praeterito. Glacies caelo leni vagantes rei navali valde offecisse dicuntur. Meteorologi hominibus suadent, ut ambulationem super glacie maris evitent.

(Saara Honkanen)

2.3.2015

Graeci oeconomiam renovaturi

Graecia creditoribus proposita de oeconomia sua renovanda tradidit. Renovationes erant condicio, sine qua programma debitorum continuari non potuit. Graeci reditus civitatis ita augere volunt, ut cryptopolium tabaci et benzinae coerceant, vectigalia non soluta a hominibus privatis et societatibus exigant, ditissimorum vectigalia augeant. His rebus effectis regimen reditus septem miliardorum euronum colligere vult. Inter crisim oeconomicam homines divites in Graecia ditiores facti sunt, pauperes autem peius quam ante vivunt. Postquam factio Syriza in potestatem venit, circiter bina miliarda euronum singulis septimanis ex Graecia peregre translata sunt.

Mutatio maioritatis in parlamento Hungariae

Factio Fidesz in parlamento Hungariae maioritatem qualificatam amisit, cum candidatus eius in comitiis complementaribus a candidato oppositionis victus est. Complementaria comitia in urbe Veszprem necessaria erant, quia Tibor Navracsics factionis Fidesz, ex illa urbe in parlamentum creatus, commissarius Hungariae in Unione Europaea factus est. Factio Fidesz, cui praeest Victor Orban, hucusque arbitrio suo res in parlamento gessit, quia anno bis millesimo decimo (2010) in comitiis parlamentariis Hungariae sustinentibus democratis Christianis maioritatem qualificatam sive duorum trientium paravit. Itaque factio ceteris neglectis legem Hungariae fundamentalem renovare et novas leges ferre potuit.

Incendium in turri altissima

Die Sabbati (21.2.) multo mane incendium in altissima turri Dubaiana ortum est. Illa turris, nomine Marina Torch, est domus habitabilis altitudine trecentorum triginta sex (336) metrorum et undenonaginta (89) tabulatorum. Ignis originem habuit ex quinquagesimo tabulato. Nemo graviter laesus est et siphonarii paucis horis incendium exstinxerunt.

Balneum Finnicum cor iuvat

Investigatio Finnica ostendit balneationem in sauna cordi et circulationi sanguinis utilem esse. Quo frequentius vir balneat et quo diutius in vapore manet, eo minus est periculum morborum cardiovascularium et mortis repentinae vel praematurae. Investigatio facta est de duobus milibus virorum, qui inter viginti annos observabantur. Multi de his viris cotidie in sauna balneabant. Temperatura in sauna non erat altissima sed in medio octoginta graduum Celsianorum. Incertum est, an eventus investigationis, quae de balneatione virorum facta est, etiam de feminis valeat. Investigationem moderabatur cardiologus Finnus Jari A. Laukkanen.

Ordo ISIS Romae minitatur

In videotransmissione recentissima ordo ISIS minitatur se Romam expugnaturum esse. Itali autem has minas in ludibrium verterunt. Distribuunt in Twitter itineraria, quibus facillime Romam venias, et culinam Italicam atque mores modosque in Italia vigentes venientibus commendant. “Colosseum venum damus”, scribunt, “chartas creditorias accipimus, pretia sunt remissa!”

(Tuomo Pekkanen)

20.2.2015

Caedes Hafniae perpetrate

Hafniae, in urbe Daniae, septimana vergente vir armatus duos homines sclopeto occidit et quinque vigiles vulneravit. Postea ipse a vigilibus interfectus est. Primum in conventum invasit, in quo de libertate loquendi et scribendi agebatur, et ibi unum hominem occidit. Forsitan imprimis petebat gryllographum Lars Vilks, ibi praesentem, qui salvus evasit. Postea idem vir nefarius apud synagogam virum Iudaeum occidit. Inde effugit, sed apud stationem ferriviariam Norrebro a vigilibus, quos sclopeto petebat, necatus est. Scelestus ille fuit iuvenis viginti duos annos natus, nomine Omar El-Hussein, natione Danus sed originis Arabicae, nuperrime carcere liberatus.

De armis Russorum testimonia

Pactum de ignistitio Minisci factum ostendit Russiam in rebus gestis Ucrainae orientalis interfuisse. In illo pacto constitutum est, ut arma gravia ex propinquitate aciei duabus septimanis removerentur. Inest in pacto etiam index accuratissimus illorum armorum. In indice nominatur systema rochetis mittendis Tornado-S. Nulla terra nisi Russia illud systema habet. Si rebelles re vera illud habuerunt, venire non potuit nisi ex Russia. Systema Tornado-S anno bis millesimo duodecimo in usum captum est neque Russi id aliis nationibus vendiderunt. Russia autem iterum iterumque negavit se arma et milites in Ucrainam orientalem misisse.

Ignistitium fragile

Neglecto ignistitio inter Ucrainam et rebelles facto, in urbe Debaltseve acerrime pugnatum est. Copiae regiminis ibi circumdatae paulatim se receperunt. Rebelles affirmant se totam urbem in suam potestatem redegisse. In aliis autem partibus Ucrainae orientalis ignistitium servatum esse videtur.

Novae contra Russiam sanctiones

Etsi spes pacis in Ucraina propter ignistitium aucta est, Unio Europaea decrevit, ut sanctiones contra Russiam et rebelles Ucrainae orientalis amplificaret. Causa est ictus funestus rochetis contra urbem Mariupolim factus, quo complures deni homines exeunte mense Ianuario interierunt. Russia novas sanctiones ridiculas et irrationales esse iudicat.

Evasio fiscalis oeconomiam Graeciae gravat

Crisis oeconomica Graeciae magnam causam in evasione fiscali habet. Ex investigatione nuper facta, Graecia singulis annis circiter tricena miliarda euronum perdit, quia vectigalia non solvuntur. Evasio fiscalis effecit, ut factio Syriza in comitiis parlamentariis magnam victoriam reportaret, cum Alexis Tsipras promisisset se evasores tandem coerciturum esse.

Registrum viatorum in UE praeparatur

Moderatores Unionis Europaeae de terrorismo oppugnando Bruxellis egerunt. Constituerunt, ut commutationem informationis tam inter membra Unionis quam inter Unionem et magistratus nationum exterarum efficaciorem redderent. Ad legislatores appellaverunt, ut registrum viatorum diu adumbratum probarent, quo facto de viatoribus informatio ab omnibus societatibus aeriis facile acciperetur.

(Tuomo Pekkanen)

13.2.2015

Conventus Minisci habitus

 Die Mercurii (11.2.) principes civitatum Ucrainae, Russiae, Germaniae, Francogalliae Miniscum, in urbem Belorussiae, convenerunt consultatum, quonam modo bello Ucrainae orientalis finis imponeretur. Primum quidem Petro Poroshenko, Vladimir Putin, Angela Merkel, Francois Hollande inter se de discrimine solvendo collocuti sunt, deinde numerus participantium ampliatus est.

(Reijo Pitkäranta)

 Ignistitium in Ucraina fit

 Postridie diei Mercurii mane (12.2.), postquam consultationes pacis per totam noctem continuatae sunt, nuntiatum est de ignistitio in Ucraina die Dominico mane faciendo convenisse. Praeterea consensum inventum esse, ut arma gravia e theatro belli biduo post ignistitium coeptum duabus septimanis reducerentur. Huc accedere, quod omnes homines bello capti intra undeviginti dies liberarentur.

(Reijo Pitkäranta)

 Quid Tsipras Germanis dixerit

 Alexis Tsipras, novus princeps minister Graeciae, a Germanis postulat, ut ea detrimenta, quae nazistae Graecis altero bello mundano attulerint, suis sarciant. Oratione legatis parlamentaribus habita: ”Germaniam”, inquit, compensationes damnorum belli flagitare nihil aliud est nisi officium iis praestare, qui contra nazistas pugnantes sanguinem pro patria profuderunt.”

(Reijo Pitkäranta)

Franciscus de castigatione

Papa Franciscus castigationem liberorum approbandam esse censet, dummodo dignitas eorum servetur. Dixit boni patris familias esse et ignoscere et filium animo praesenti corrigere neque animum eius frangere. Exemplum bonae disciplinae fecit patrem, qui dixisset se filiis interdum alapam ducere, ita tamen, ut numquam iis faciem tangeret, ne eos humiliaret.

(Satu Tuominen)

Confiscatio hippocamporum

In aeriportu internationali Francogalliae Charles de Gaulle appellato accidit, ut in merce quadam vecturali paene undeviginti milia hippocamporum siccatorum invenirentur. Quae merx ex Madagascaria emissa Honcongum pervenisset, nisi magistratus teloniales Francogalliae eam confiscavissent. Constat Sinenses ex caballionibus maritimis medicamenta diversi generis conficere.

(Reijo Pitkäranta)

Pisces Latine quoque vendendi

In Unione Europaea inde a mense Decembri lex valet, quae pisces, qui in tabernis veneunt, etiam nominibus Latinis notari iubet. Antea mercatoribus indicandum erat, ubi et quando piscis captus esset. Ex nova lege eos etiam nomina piscium scientifica et modum captandi emptoribus nuntiare oportet.

(Reijo Pitkäranta)

De feriis nostris scridatoriis

Mense Februario multi scholares Finlandiae ferias scridandi agere solent. Verbo scridandi indicamus artem soleis longis per nives labendi. Omnes fere nostrates hanc facultatem callent, quamquam de ea arte in scholis docenda lege sanctum non est. Plurimi enim pueri et puellae iam a parvo bene scridare sciunt.

(Reijo Pitkäranta)

6.2.15

Quid Stubbs et Ilves dixerint

Moderatores Finlandiae et Estoniae de auxilio militari Ucrainae ferendo inter se valde dissentiunt. Alexander Stubb, princeps minister Finlandiae, censuit optimam rationem discriminis solvendi esse sanctionibus oeconomicis Russiae impositis confidere. At Toomas Hendrik Ilves, praesidens Estoniae, ait Russos victoriam illius belli reportaturos esse, nisi Ucraini armis subministrandis adiuvarentur.

(Reijo Pitkäranta)

Isis aliquot clades accepit

Iam in eo est, ut milites ordinis islamitarum Isis ex urbe Curdorum Kobane, quae in Syria septentrionali sita est, pedem referant.

Copiis enim Curdorum auxilio Americanorum usis contigit, ut hostibus inde expulsis tredecim vicis potirentur. Islamitae, cum paulo ante de Kobane possidenda acerrime pugnaverint, iam spatium decem fere chiliometrorum ab ea urbe abesse nuntiantur.

(Reijo Pitkäranta)

Mattarella praesidens Italiae

Novus praesidens Italiae creatus est Sergio Mattarella, iudex Siciliensis septuaginta tres annos natus et fautor factionis democraticae. Electionem fecit collegium mille fere hominum, quod ex legatis parlamentaribus et suffragatoribus regionalibus constabat.

(Reijo Pitkäranta)

Mugabe praeses Unionis Africanae

Praeses Unionis Africanae electus est Robert Mugabe, praesidens Zimbabuiae nonaginta annos natus. Patriae suae iam ab anno millesimo nongentesimo octogesimo (1980) praeest terra ex potestate Magnae Britanniae liberata. Apud Afros in magno honore est, sed communitas internationalis eum vehementer reprehendit, quod oppositionem politicam penitus compresserit.

(Saara Honkanen)

Libri pretiosi incendio deleti

Abhinc unam septimanam in Bibliotheca universitaria Moscuensi incendium conflatum est, quo amplius decies centena milia librorum scientificorum interisse existimantur. Damnum eo gravius describitur, quod multa opera ita deleta e saeculo sexto decimo originem duxerint, itaque pretiosissima, quin etiam unica fuerint. Bibliothecam anno millesimo nongentesimo duodevicesimo (1918) conditam esse constat.

(Reijo Pitkäranta)

Vexillum Insularum Fisiensium

Principes civitatis Insularum Fisiensium e vexillo rei publicae suae omnia signa imperium Britanniae coloniale exhibentia ablaturi sunt. Censet princeps minister Voreqe Bainimarama tempus insignium potestatem Britanniae figurantium iam praeterisse. Monet se velle, ut novo vexillo, quod mense Octobri usu recipiatur, evidenter ostendatur, quam libera et huic tempori conveniens civitas Insulae Fisienses sint.

(Reijo Pitkäranta)

Statuae ab Michelangelo factae

In museo Cantabrigiensi Fitzwilliam appellato duo opera artis exposita sunt, quorum artifex ipse Michelangelo Buonarroti esse videtur. Agitur de pare statuarum metrum fere altarum, quarum utraque virum nudum panthera vehentem fingit. Neque ulla alia artis plasticae specimina, quae Michelangelo sculpsit, ad tempus nostrum servata sunt.

(Reijo Pitkäranta)

30.1.15

Rex Arabiae Saudianae diem obiit

Abdallah bin Abdalaziz al Saud, rex Arabiae Saudianae, nonaginta annos natus die Veneris (23.1.) mortuus est. Regnavit ab anno bis millesimo quinto. Illi successit Salman, princeps hereditarius. Rex Abdallah erat foederatus Americanorum, qui cum his terroristas gregis Al-Qaida et ordinem ISIS oppugnabat.  Arabiam Saudianam, regnum admodum coservativum, renovare studebat. Successor eius Salman se politicam et renovationes praedecessoris continuaturum atque patriam defensurum esse promisit. Arabia Saudiana maximam in orbe terrarum copiam petrolei exportat, cuius pretium, his mensibus valde deminutum, post mortem regis aliquantum auctum est.

Graeci novum parlamentum creaverunt

In comitiis parlamentariis Graeciae  Syriza, factio sinistra, magnam victoriam reportavit, cum ex trecentis sedibus centum undequinquaginta accepit. Quae quidem non sufficiebant, ut Syriza sola regimen Graeciae constitueret. Alexis Tsipras, praeses eius, pollicebatur Graeciam de debitis cum creditoribus ita consulturum esse, ut patria depressione oeconomica et miseria solveretur. Ait victoriam Syrizae esse omnium Europaeorum, qui contra paupertatem pugnarent. Partes sinistrae terrarum Europaearum eventu comitiorum Graeciae exsultabant. In Hispania factio Podemos censebat victoriam Syrizae initium esse magnarum mutationum. Francois Hollande, praesidens Franciae, praesidi Syrizae gratulatus cooperationem promisit, ut incrementum oeconomiae et stabilitas in Europa firmarentur. Jens Weidmann, moderator argentariae centralis Germaniae, monuit Graeciae prodesse renovationes continuare. David Cameron, primus minister Britanniae, censebat dubitationem et instabilitatem in Europa auctum iri. In Finnia Timo Soini, praeses factionis Finnorum fundamentalium, dixit comitia Graeciae ostendisse, quam falsa politica subventionum in Unione Europaea fuisset.

Auschwitz, campus carceralis, ante LXX annos liberatus

Die vicesimo septimo mensis Ianuarii anno millesimo nongentesimo quadragesimo quinto (27.1.1945)  copiae Unionis Sovieticae in Auschwitz venerunt, ubi adhuc paene octo milia captivorum tenebantur. Custodes nazistae antea circiter centum milia hominum inde in occidentem versus moverant, aegros et nimis debiles reliquerant. Quinquennio in campo Auschwitz-Birkenau plus decies centena milia hominum interierunt. Dies campi liberati iam decem annos ut “Internationalis dies holocausti commemorandi” in multis terris agitur, quo tragoedia camporum carceralium conventibus, orationibus, expositionibus caerimoniisque commemoratur. Caerimoniae principales commemorationis hoc anno ante portam Auschwitz principalem factae sunt.

Norvegia mendicationem vetitura

Aestate proxima communibus Norvegiae permissum est, ut mendicationem vetarent. Nunc autem in eo est, ut in toto regno vetetur, nam legem de mendicatione vetanda maior pars delegatorum in parlamento acceptura est. Factio centralis, quae est oppositionis, legem ea  condicione probat, ut mendicis subventiones oeconomicae conferantur. 

Tuomo Pekkanen

23.1.15

Novae in Ucraina pugnae

Ignistitium in Ucraina orientali factum abhinc aliquot dies interruptum est, cum separatistae exercitum regiminis Ucrainae novis ictibus lacessere coeperunt. De aeriportu urbis Donetsk possidendo tam acres pugnae commissae sunt, ut stationi eius terminali iam nihil reliqui esse videatur. Fama est Russos  novas copias subsidio separatistis misisse.

(Reijo Pitkäranta)

Oratio praesidentis Obama

Barack Obama, praesidens Civitatum Americae Unitarum, orationem de statu nationis apud congressum habuit. In ea ut metum Americanorum de oeconomia debili recessisse gaudebat, ita dolebat, quod discrimina opum inter divites et pauperes crevissent. Quam ob rem postulavit, ut hominibus locupletioribus maiora tributa imponerentur. In altera orationis parte quasdam quaestiones ad politicam externam pertinentes tractavit.

(Reijo Pitkäranta)

Amnesty Europaeos accusat

Amnesty International, Ordo iuribus humanis defendendis, civitates Europaeas ad confitendum hortatur, quales cruciatus una cum Americanis in terroristas deprehensos ediderint. Contendit Sedem centralem exploratoriam CIA carceres clandestinos in Lithuania, Polonia, Romania habuisse nec dubitandum esse, quin etiam Germani Britannique culpam iniuriarum sustineant.

(Reijo Pitkäranta)

Quid Franciscus dixerit

Papa Franciscus, dum Philippinas visitat, viros monuit, ut despectui feminarum finem facerent et magis quam ante verba earum audirent. ”Societatis hodiernae”, inquit, ”maxime  interest scire, quid feminae de rebus communibus censeant. Nos viri interdum tam avidi gloriae nostrae augendae sumus, ut ostentatores animi masculi vocemur.”

(Reijo Pitkäranta)

Napolitano munus deponit

Georgio Napolitano, praesidens Italiae undenonaginta annorum, munus deponere decrevit. Iam anno praeterito exeunte nuntiavit se difficultates negotiorum gerendorum propter aetatem habere. Napolitano inde ab anno bis millesimo sexto (2006) praesidens Italiae est.  Abdicatio eius principi ministro Matteo Renzi,  cui novus candidatus inveniendus est, tempora ardua significare putatur.

(Satu Tuominen)

De sceleribus commissis

Numerus scelerum in Finlandia commissorum, quae ad notitiam magistratuum pervenerunt, anno praeterito aliquantum deminutus est. Imprimis facinora contra vitam et salutem perpetrata rariora evaserunt, item delicta adversus securitatem viarum admissa. Aliter autem res se in furtis et fraudibus gravioribus habet, quippe quae frequentiora reperta sint quam anno superiore.

(Reijo Pitkäranta)

Silva saluti multum prodest

Quantam vim natura silvestris ad bene vivendum habeat, investigationibus nuper factis monstratum est. Quinque minutas in silva commorari sufficit, ut non solum corpus sed etiam mens hominis miro modo recreari incipiat. Huc accedunt diversi soni et odores silvae, qui efficiunt, ut pressio sanguinis remittat et angor animi relaxetur.

(Reijo Pitkäranta)

16.1.15

Auctores ictuum Parisiorum occisi

Custodes securitatis Francorum tres terroristas occiderunt et plerosque obsides eorum vespere Veneris (9.1.) liberaverunt. Inter septendecim victimas terroristarum erant gryllographi, vigiles publici et Iudaei. Impetus in redactionem hebdomadalis Charlie Hebdo atque in tabernam Hyper Casher Iudaeorum, qui ictus contra libertatem et democratiam habebantur, maximas manifestationes commoverunt.

Parisii, uno die caput totius mundi

In mediam urbem Parisiorum die Dominico (11.1.) quindecies centena milia hominum congregati sunt, ut ostenderent patriam terrore et violentia opprimi non posse. In variis partibus Franciae similibus manifestationibus quattuor fere miliones hominum interfuisse aestimantur. Numquam tanta frequentia eodem tempore in viis urbium apud Francos fuit. Etiam alibi in Europa, ut Berolini, Bruxellis,Vindobonae  Matritique, complura dena milia hominum in publicum prodierunt, ut Francos ictibus terroristarum afflictos sustinerent. Praesidens Francois Hollande censebat urbem Parisiorum die Dominico in terrorismo oppugnando et libertate defendenda caput totius mundi fuisse. Etiam moderatores civitatum ex variis orbis terrarum partibus Parisios convenerant, ut solidaritatem ostenderent. Erant inter illos David Cameron Britannus, Angela Merkel Germana, Sergei Lavrov Russus, Benjamin Netanjahu Israelianus, Mahmud Abbas Palestinensis. Finniam praesentabat primus minister Alexander Stubb. Securitatem eorum multa milia custodum et militum vigilabant.

Securitas in Francia firmatur

Decem milia militum ad securitatem in variis Franciae partibus firmandam convocati sunt. 

Ad scholas Iudaeorum vigilandas, quae sunt numero septingentae, quinque milia vigilum et militum mittuntur. Si opus erit, ut ait praesidens Hollande, synagogae et scholae nec non meschitae musulmanorum vel exercitu adiuvante defendentur.

De Janukovits mandatum comprehensorium

Ucraina vult, ut pristinus praesidens Victor Janukovits ad accusationes respondeat, quod una cum proximis suis ex aerario publico ingentes pecunias abstulerit. Itaque Interpol, ordo internationalis politiae iudiciariae, mandatum comprehensorium dedit, ut Janujkovits in Ucrainam traderetur.

Russia autem eum vix tradet. Mense Februario anni proximi, cum reclamationes Kioviae in rebellionem crevissent, Janukovits ex Ucraina in Russiam effugit. Tum palam factum est, quantas opes sibi arripuisset quantasque secum deportavisset. Itaque novi Ucrainae moderatores eum proximosque eius de pecuniis publicis per fraudem ablatis accusant.

Corea Septentrionalis Americanis colloquia proposuit

Coreani Septentrionales Americanis colloquia recta proposuerunt. Antea quidem illi nuntiaverant se de experimentis nuclearibus interrumpendis considerare posse, dummodo USA exercitia militaria cum Meridiana Corea revocaret. Americani autem ad haec responderunt se talem condicionem non accipere sed nihilo minus ad colloquia paratos esse.

Tuomo Pekkanen

9.1.15

Ictus Parisiis terroristicus

Die Mercurii (7.1.) Lutetiae Parisiorum ictus terroristicus factus est, quo saltem duodecim homines vitam amiserunt et totidem fere vulnerati sunt. Impetus ad redactores diarii hebdomadalis satirici nomine Charlie Hebdo spectabat. Testes oculati narrant duos viros cucullatos arma vibrantes et dicta islamica clamitantes in domum diurnariorum penetravisse et post stragem editam duobus vehiculis e loco effugisse.

(Reijo Pitkäranta)

Incendia terrestria Australiae

In partibus Australiae meridianae saevissima incendia terrestria conflata sunt. Multa milia incolarum, ut e periculo evaderent, domos relinquere coacta sunt. Magistratus describunt condicionem rerum in illa regione difficiliorem esse quam umquam his triginta annis. Difficultates ventis vehementibus et tempestate aestuosa augentur.

(Reijo Pitkäranta)

Oryza Fukushimae approbata

In Fukushima abhinc quattuor fere annos calamitas nuclearis gravissima facta est. Quam ob rem messes oryzae annis insequentibus ibidem peractae propter radiationem nimiam delendae erant. Nunc autem primum post illam cladem accidit, ut annona huius frugis ad mercatum approbaretur, cum vis radioactivitatis in oryza inventa modum a regimine constitutum non iam excederet

(Reijo Pitkäranta)

Pericula strepitus vehiculorum

Quartus quisque Europaeus nimio vehiculorum strepitu laborat, ut ex Sede circumiectali Europaea (EEA) nuntiatur. Quo effici, ut etiam decem milia hominum quotannis praemature moriantur. Numerum eorum, qui strepitui commeatus expositi sint, in urbibus Luxemburgi, Bulgariae, Belgii maximum esse.

(Reijo Pitkäranta)

De autocinetis electricis

Autocineta electrica maximam in Europa gratiam in Norvegia sibi conciliaverunt. Anno enim proximo ibidem amplius unum et viginti milia vehiculorum eius generis usu recepta sunt, quae copia duplo maior est quam anno superiore. Moderatores Norvegiae mercatui autoraedarum electricarum favent, cum sciant eas circumiectis minime nocere.

(Reijo Pitkäranta)

Quid Finni de Russia censeant

Ex interrogatione publica nuper divulgata apparet maiorem partem Finnorum tensionibus internationalibus crescentibus Russiam non timere. Plus sexaginta centesimae (60%) respondentium credebant periculum non esse, ne Russia in proximo futuro securitati Finniae immineret. Markku Kangaspuro, expertus rerum Russicarum, existimat eventum hunc ostendere Finnos opinionem de Russia realisticam habere.

(Saara Honkanen)

Impetus in sedes nummarias

Novo anno ineunte complures mensae nummariae in Finlandia aut vitiis laborabant aut omnino non fungebantur. Idem ad apparatus pecuniarios automaticos et ad usum chartarum argentariarum fere valebat. In causa erant impetus frequentes in ministeria interretialia sedium nummariarum, quo factum est, ut clientes aditum ad computos mensarios non haberent.

(Reijo Pitkäranta)

Finnia terra in mundo stabilissima

2.1.15

Ordo Americanus nomine Fund for Peace ex civitatibus orbis terrarum instabilibus annuatim indicem (Failed States) componit, in quo duodecim criteria, imprimis securitas, evolutio demographica, condiciones politicae, servitia publica respiciuntur. Finnia iam quater (2011-2014) est in hoc indice ultima, id est stabilissima omnium civitas aestimatur. Illam sequuntur Suetia, Dania, Norvegia, Helvetia, Nova Zelandia, Luxemeburgum. Instabilissimae iudicantur Sudania Meridiana, Somalia, Res publica Africae Mediae, Congum, Sudania. Ante Finniam stabilissimae civitatis titulum habebat Norvegia. Somaliae, quae inter sex annos continuos pessima fuit, nunc contigit, ut Sudaniam Meridianam superaret.

Finni institutionem Sueticae linguae obligatoriam nolunt

In schola Finniae fundamentali lingua Suetica est obligatoria. Ex demoscopia in Academia Aboensi (Åbo Akademi) recens facta tres Finni ex quattuor Sueticam linguam voluntariam malunt, quia alias linguas utiliores esse censent. Finni Suecophoni circiter trecenta milia numerantur. Schola fundamentalis apud Finnos ante quadraginta fere annos constituta est.

Papa Franciscus hypocrisim Curiae reprobavit

Papa Franciscus cardinales et superiores Curiae Romanae in aula Clementina Palatii Apostolici Vaticani recepit (22.12.) eisque orationem habuit, qua Curiam cum corpore humano comparans illam multis morbis laborare dixit. In his morbis, quos quindecim enumeravit, ait esse schizophreniam exsistentialem, Alzheimer spiritale, petrificationem mentalem. Cupiditatem dominandi et aspirationem ad commoda terrestria effecisse, ut cardinales, episcopi sacerdotesque muneris spiritalis obliviscerentur. Papa iam antea humilitatem ecclesiasticis commendaverat eosque de ineptis rumoribus spargendis et insidiis reprobaverat. In missa natalicia petivit, ut homines plus compassionis et clementiae erga eos haberent, qui difficultatibus laborarent.

Oppida Malesiae diluvio cooperiuntur

Plus centum sexaginta milia Malesianorum propter diluvia, tribus decenniis pessima, domos relinquere coacti sunt. In quibusdam regionibus afflictis vici et oppida aquis diluvialibus cooperiuntur neque facile est laborantibus subvenire, cum viae et connectiones informationis multis locis sint diruptae. Malesiani magistratus cunctationis in ope ferenda accusaverunt.

Nova doctrina militaris Russiae

Praesidens Vladimir Putin novam doctrinam militarem subscriptione confirmavit. Ex illa doctrina unum ex maximis periculis Russiae imminentibus est, quod confoederatio Nato corroboratur et extenditur. Russiam sollicitat etiam, quod systema missilium defensivorum Natonis firmatur.

Lithuani euronem ceperunt

Anno vergente Lithuani euronem in usum ceperunt. Ita terrae, quibus communis pecunia est euro, undeviginti numerantur. Tres terrae Balticae, scilicet Estonia, Lettonia, Lithuania, iam membra Natonis sunt. Nunc etiam pecunia communis illas ad occidentem iungit. Dania autem et Suetia coronas suas in eurones mutare noluerunt.

(Tuomo Pekkanen)

19.12.14

Strages in schola Pakistana

Die Martis (16.12.) in urbe Pakistaniae Peshawar ingens strages facta est, cum novem terroristae Talibani in quandam scholam ingressi centum triginta duos discipulos et novem homines adultos occiderunt. Caedes sine dubio etiam maior fuisset, nisi omnes aggressores a militibus Pakistanis tandem interfecti essent.

(Reijo Pitkäranta)

Relationes Cubano-Americanae

Relationes inter Cubam et Civitates Americae Unitas intercedentes, quae per multa decennia inimicissimae fuerunt, in integrum restituuntur. Praesidens Barack Obama oratione die Mercurii (17.12.) publice habita nuntiavit commercium legatorum inter utramque civitatem denuo susceptum et sanctiones Cubanis impositas paulatim mitigatum iri. Documentum tensionis politicae relaxatae dant captivi nuperrime commutati.

(Reijo Pitkäranta)

Aeroplana militaria Russorum

Ministri terrarum septentrionalium solliciti sunt de aeroplanis Russorum militaribus, quae in regione Maris Baltici machinis sensoriis exstinctis volant. Inde enim sequitur, ut instrumentis radaricis nequaquam conspiciantur cum magno periculo, ne aeroplanis civilibus collidantur. Itaque Russi illis volatibus caecis finem facere iubentur.

(Reijo Pitkäranta)

Favor duorum praesidentium

Praesidens Finlandiae Sauli Niinistö apud populum tantum gratia valet, ut octoginta fere centesimae (80%) civium eum aut optime aut admodum bene munus gerere censeant. Aliter res se in Francogallia habet, ubi praesidenti Francois Hollande non nisi tredecim centesimae (13%) incolarum favent. Nec quisquam praesidentium Francogalliae aura populari tam exigua umquam usus est.

(Reijo Pitkäranta)

De edicto Montis Leonini

In Monte Leonino sive in Sierra Leone populo interdictum est, ne sollemnitates natalicias publice celebraret. Quo edicto proposito magistratus impedire volunt, quominus ebola, quae pestis mortifera in illa civitate saevissime grassatur, latius diffundatur. Amplius quarta pars incolarum Montis Leonini religionem Christianam confitetur, quam ob rem caerimoniae nataliciae ibi usitatae sunt.

(Reijo Pitkäranta)

De animalibus circensibus

In Mexico nova lex valere coepit, quae usum animalium in spectaculis circensibus vetat. Quo fit, ut posthac non nisi homines et robota vice animalium fungentia in arenam prodire sinantur. Ita sanctum est, postquam innotuit beluas in circo male tractatas esse, ut ad ostentationes circenses aptiores essent.

(Reijo Pitkäranta) 

Olla natalicia capacissima

Die natali Christi appropinquante Exercitus salvificus in viis et plateis ollas collocare solet, in quas homines transeuntes nummos ad pauperes adiuvandos imponere possunt. Septimana proxima in statione ferriviaria urbis Helsinki olla natalicia posita est, quae omnium temporum capacissima esse dicitur. Speratur fore, ut pecunia in eam collecta etiam decies centena milia euronum efficiat.

(Satu Tuominen)

12.12.14

Finlandia LXXXXVII annos independens

Postridie Nonas Decembres (6.12.) anniversarium independentiae Finnorum nonagesimum septimum multis modis in variis patriae partibus celebratum est. In ecclesia cathedrali Helsinkiensi actum est officium divinum oecumenicum praesentibus delegatis parlamentariis, regimine, praesidente rei publicae. Agmen studentium faces ardentes portantium ab sepulcreto heroum bello caducorum in mediam urbem incessit. Praesidens Sauli Niinistö cum coniuge studentes ex maeniano palatii praesidentialis salutavit. In urbe Tavastburgo sive Hämeenlinna facta est pompa militaris, in qua intererant septingenti quinquaginta viri et feminae atque septuaginta vehicula militaria. Culmen celebrationum fuit receptio sollemnis praesidentis rei publicae, quam cives domi per televisionem spectabant.

Russiam difficultates superaturam

Vladimir Putin, praesidens Russiae, oratione in aula sollemni Cremlini habita affirmavit culpam discriminis Ucrainae esse in occidentalibus, Russiam esse innocentem. Crimaeam in aeternum partem Russiae inseparabilem fore. Tragoediam Ucrainae ostendere, quam iusta politica Cremlini fuisset. De oeconomia et valore rubli Putin sollicitus esse videbatur. Ait sanctiones oeconomicas omnibus esse nocivas, etiam illis, qui eas imposuissent. Ex sanctionibus tamen sequi, ut Russia in suam oeconomiam pulsum recreativum acciperet. Investitoribus Russis, qui patriam reliquerunt, Putin veniam praebebat, si reverterentur.

De marmoribus Parthenonis

Graecia iterum iterumque flagitavit, ut sculpturae Parthenonis sibi redderentur, quas Lord Elgin alias Thomas Bruce ineunte undevicesimo saeculo Londinium portavit et Museo Britannico (British Museum) vendidit. Nuper (5.12.) nuntiatum est unam ex his sculpturis Museo Eremitage Petropolitano commodatam esse. Numquam antea illa marmora ex Britannia peregre missa sunt. Antonis Samaras, primus minister Graecorum, consilium sculpturam Museo Eremitage commodandi reprobavit et dixit rem ipsam ostendere marmora illa Elginiana non esse nimis fragilia, ut in Graeciam reportarentur, sicut Museum Britannicum asseveravisset. Graecos tamen postulaturos non esse, ut Russi sculpturam sibi commodatam Athenas mitterent. David Hill, professor Britannus, censebat esse impetum non tantum contra populum Graecum sed etiam contra totam communionem internationalem, quod sculptura a Graecia deportata Petropolim mitteretur. Museum Britannicum opinionem Britanniae publicum et sententias doctorum penitus neglegere. Iam quindecim annos maiorem partem Britannorum voluisse, ut marmora Elginiana Athenas remitterentur.

Canes titulo herois honorati

Confoederatio Kennel Finniae duodeviginti canibus titulum canis heroici dedit. Praeterea septendecim canes mentione rerum ab eis gestarum facta honorati sunt. Titulus herois dari potest cani, qui vitam hominis salvavit. Canes hoc anno praemiati homines errantes invenerunt aut de incendiis et hominibus morbo implicatis temperi nuntiaverunt.

(Tuomo Pekkanen)

5.12.14

Regimen Suetiae cecidit

Die Mercurii (3.12.) regimen Suetiae, cui praeest Stefan Löfven, fautor socialistarum, fidem parlamenti amisit. Ex quo sequitur, ut in Suetia die vicesimo altero mensis Martii (22.3.) nova comitia parlamentaria instituantur. Res ad tantum discrimen venit, cum lex de dispensatione publica, quam regimen promulgaverat, a legatis parlamentaribus repudiata est.

(Reijo Pitkäranta)

Mubarak culpa liberatus

Hosni Mubarak, pristinus praesidens Aegypti, qui de strage suorum civium accusatus erat, omnibus criminibus absolutus est. Etiam minister eius a rebus domesticis et sex adiutores magnae auctoritatis huiusmodi accusationibus liberati sunt. Anno bis millesimo undecimo (2011), cum Mubarak a populo insurgente ex potestate expelleretur, plus octingenti homines vitam amiserunt. 

(Reijo Pitkäranta)

De oratione papae Francisci

Papa Franciscus itinere in Turciam suscepto praesidentem civitatis Recep Tayyip Erdogan convenit. Oratione inter visitationem habita monuit officium communitatis internationalis esse Turcos adiuvare, ad quos amplius decies centena milia profugorum ex Syria venissent. Idem scelera ab ordine Isis in Iraquia et Syria commissa vehementissime condemnavit.

(Reijo Pitkäranta)

Quid praesidens Nieto dixerit

Praesidentem Mexici Enrique Peña Nieto favor popularis defecit recentibus facinoribus violentis non solutis. Quam ob rem orationem habuit, in qua promisit se poenas sontibus impositurum, corruptionem a custodibus publicis amoturum, magistratus locales fide carentes dimissurum. Nuntiavit etiam de nova operatione securitatis, qua tumultus diversis partibus terrae orti sedarentur.

(Saara Honkanen)

Terrae integrae et corruptae

Finlandia tertio loco posita est in annua comparatione, qua investigabatur, quantopere quaeque civitas a corruptione vacaret. Terras omnium integerrimas se praestiterunt Dania et Nova Zelandia, cum Suetia et Norvegia post Finlandiam sedem quartam et quintam occuparent. Somalia autem et Corea Septentrionalis civitates moribus omnium corruptissimis esse inventae sunt.

(Reijo Pitkäranta)

Parlamentum in Kauhajoki

Die Dominico sive pridie Kalendas Decembres (30.11.) legati parlamentares Finlandiae in oppidum Kauhajoki convenerunt ad memoriam eius rei, quod septuaginta quinque annis ante parlamentum ex urbe Helsinki eo parumper migraverat. Tunc enim Russi primos impetus aerios in caput nostrum fecerunt, et ortus est conflictus cruentus, quod bellum hibernum appellari solet.

(Reijo Pitkäranta)

Venatio lyncum initium cepit

Hac septimana in Finlandia lynces agitari coepti sunt. Venatio eo quoque spectat, ut numerus harum bestiarum, quae apud nos iam tria fere milia sunt, admodum stabilis remaneat. Cavendum enim est, ne lynces, si hominibus nimis assuescant, imprimis animalibus domesticis imminere incipiant.

(Reijo Pitkäranta)

28/11/14

Obama immigrationem renovat

Barack Obama, praesidens Americanorum, quinque fere milionibus immigratorum illegalium licentiam laborandi concessurus est. Illa renovatione imprimis eorum immigratorum condiciones meliores reddentur, quorum liberi sunt cives Americani. In USA plus undecim miliones illegalium immigratorum esse aestimantur. Factio republicanorum nuntiavit se renovationi preaesidentis obsistere.

Putin: Revolutio in Russia impedienda est

Praesidens Vladimir Putin in consilio securitatis Russiae monuit, ne eversiones rerum, in quibusdam pristinis rebus publicis sovieticis factae, in Russia repeterentur. In Georgia (2003), Ucraina (2004) Kirgisiaque (2005) revolutiones, quae coloratae dicuntur, ad regimen corruptum evertendum spectabant. Putin autem tales revolutiones pro extremismo, civitati nocivo, habet. Flagitavit, ut in omnibus administrationis partibus cogitationes extremae systematice impedirentur et statim in principio exstirparentur. Omnibus ministeriis, institutis scholasticis, partibus politicis, ordinibus religiosis omnique societati civili in hac re cooperandum esse. Addidit quidem Russiam esse terram liberam et democraticam, in qua cives ius haberent suas opiniones habendi et dicendi.

Russia cooperationem de securitate nucleari finiet

Russi Americanis nuntiaverunt se cooperationem finituros esse, quae ad securitatem materiae nuclearis in Russia spectaret. USA autem vult, ut illa cooperatio, quae ab Unione Sovietica dissoluta durat, continuetur. Huc usque Americani pecuniam ministraverunt, qua triginta veteres submarinae nucleares tuto deletae sunt. Americanis adiuvantibus instrumenta in limitibus Russiae posita sunt, quibus clandestina exportatio materiae nuclearis impeditur. Etsi securitas nuclearis post aetatem Unionis Sovieticae magnopere meliorata est, nihilo minus plurima aedificia in Russia restant, in quibus conservatur materia, qua terroristae ad arma facienda uti possint.

Pretium petrolei corruit

Pretium petrolei in mercatu mundi his quinque mensibus triginta fere centesimis deminutum est. Anno bis millesimo undecimo pretium pro dolio erat etiam centum viginti quinque dollara, hodie tantum octoginta. Unde sequitur, ut terrae petroleum exportantes damna oeconomica capiant. Ordo earum Opec de consiliis deliberat, quibus pretium augeri possit.

Commissio NU matrimonia puellarum impedire vult

Commissio Nationum Unitarum propositum de matrimoniis puellarum impediendis probavit. Omnia membra monentur, ut leges ferant, quibus matrimonia puellarum vetentur. Mense Decembri de proposito commissionis in conventu generali decernetur. Omnibus annis circiter quinae denae miliones puellarum nubere coguntur, praesertim in Bangladesa et India et quibusdam Africae civitatibus.

(Tuomo Pekkanen)

21.11.2014

De novis sanctionibus

Ministri Unionis Europaeae Bruxellas congregati rerum in Ucraina orientali condicionem deliberaverunt. Dum haec geruntur, inter eos convenit, ut ducibus separatistarum, qui illic essent, diversae sanctiones imponerentur. Magistratuum Unionis erit indicem eorum componere, ad quos hoc decretum pertinet. Quicumque ea poena afficientur, in civitates Unionis Europaeae iter facere vetabuntur.

(Reijo Pitkäranta)

Strages Hierosolymis facta

Die Martis (18.11.) Hierosolymis strages peculiaris edita est, cum duo viri Palaestinenses pistoliis et securibus macellariis armati in synagogam impetum fecerunt. Qua aggressione quattuor rabbini vitam amiserunt et octo alii Iudaei vulnera gravia acceperunt. Paulo post ipsi occisores a custodibus publicis interfecti sunt.

(Reijo Pitkäranta)

Iohannis novus praesidens

Comitiis die Dominico (16.11.) in Dacoromania habitis novus praesidens civitatis electus est Klaus Iohannis, candidatus partium conservativarum. Is enim ad quinquaginta sex centesimas (55,8%) suffragiorum sibi conciliavit. Victoriam eius admodum inopinatam dixeris, si respicis adversarium eius fuisse principem ministrum Victorem Ponta, qui cum socialistis stabat. 

(Reijo Pitkäranta)

Quid David Cameron dixerit

Regimen Britanniae leges de terrorismo sanctas duriores redditurum est. Hoc propositum princeps minister David Cameron oratione Camberrae, in urbe Australiae, habita aperuit. Consilium vel ad eos cives Britannos attinet, qui ex pugnis in Syria aut in Iraquia commissis domum revertuntur.

(Satu Tuominen)

Nato copias delectas creabit

Confoederatio Atlantica Nato copias e militibus delectis constantes conditura est. Propositum est, ut haec legio quinque aut etiam septem milium militum esset et quovis fere gentium summum biduo transferri posset. Decretum ideo factum esse videtur, quod duces militares civitatum occidentalium de potentia armorum Russiae aucta solliciti sunt.

(Reijo Pitkäranta)

Europa imbribus vexatur

Septimana vergente saltem novem homines in Europa ex imbribus mortem occubuerunt. In Francogallia quinque cives interierunt, cum autocineta eorum inundationibus obruta sunt. In Helvetia et Italia autem labinae terrae ex imbribus ortae quattuor hominibus perniciei erant. Nonnullis locis Italiae septentrionalis duabus septimanis tantundem pluit quam uno anno fieri solet.

(Reijo Pitkäranta)

Canes Finlandiae heroici

Societas a canibus Finlandiae hoc anno viginti canibus titulum herois propter vitam hominis servatam concessit. In talem dignitatem nonnisi illi canes promoventur, qui in casu periculoso sua sponte ita egerunt, ut aliquis e media morte eriperetur. Unus ex novis heroibus est Risle, qui dominum suum undis submergi prohibuit caput eius rostro super aquam sustinendo.

(Reijo Pitkäranta)

14.11.14

Murus Berolinensis ante XXV annos deiectus

Die Dominico (9.11.) viginti quinque anni transacti erant, ex quo murus Berolinensis, qui urbem in duas partes diviserat, apertus est. Ille eventus Berolini per triduum commemorabatur. Celebrationibus aderat inter alios Mihail Gorbatsev, ultimus praesidens Unionis Sovieticae, cuius politica, perestroika appellata, viam ad bellum frigidum componendum praeparaverat. Murus, quo moderatores Germaniae orientalis impediebant, ne cives in occidentem fugerent, ante duodetriginta annos (1961) construi coeptus est. Erat longitudine centum quinquaginta quinque chiliometrorum, altitudine trium metrorum et dimidii, latitudine unius metri et dimidii. Custodibus limitis praeceptum erat, ut eos, qui fugere conarentur, sclopetando necarent. Ita saltem centum duodequadraginta (138) homines occisi sunt. Nihilo minus inter tria fere decennia circiter quinque milibus hominum contigit, ut evaderent, sed septuaginta quinque milia civium deprehensi et incarcerati sunt. Post bellum mundanum secundum, antequam murus ductus est, tres fere miliones hominum in occidentem effugerant.

Gorbatsev occidentem accusavit

Inter celebrationes Berolinenses Mihail Gorbatsev nationes occidentales de novo bello frigido praemonuit et hortatus est, ut colloquiis cum Russia factis fiducia restitueretur. Occidentales accusavit, quod Unione Sovietica collapsa et grege communistico dissoluto se victores belli frigidi declaravissent et debilitate Russiae abusi essent. Censebat Europam sine sodalitate Germaniae et Russiae tutam esse non posse. Suasit etiam, ut sanctiones Russiae et praesertim politicis Russis propter crisim Ucrainae impositae gradatim tollerentur. Gorbatsev, qui antea praesidentem Vladimirum Putin reprehenderat, nunc quaerit, ut illius de Ucraina politica melius intellegatur.

Iaponia energiam nuclearem in usum recipit

Calamitate nuclari anno bis millesimo undecimo (2011) in Fukushima facta, Iaponia omnes electrificinas nucleares clausit. Nuper autem Yuichiro Ito, gubernator regionis Kagoshimae, nuntiavit duo reactoria electrificinae Sendai denuo in usum recipi posse. Quod veri similiter ante annum proximum non fiet.

De condicione feminarum in Arabia Saudiana

Arabia Saudiana est unica terra, ubi feminis non licet autoraedam gubernare. Nunc autem, feminis reclamantibus, consilium Shura regimini suadet, ut certis condicionibus licentia gubernandi feminis plus triginta annos natis concedatur. Gubernationem tantum diurno tempore permitti et necesse esse, ut extra regionem urbanam curator feminam comitetur. Status feminarum apud Arabas Saudianos lente mutatur. Rex Abdullah inter alia permisit, ut feminae in Shura delegatas haberent. Etiam suffragari illis licet. Sed adhuc feminis impositus est curator, neque sine eius permissione itinera suscipere, extra domum laborare vel matrimonium iungere possunt.

(Tuomo Pekkanen)

7/11/14

Republicani victores

In Civitatibus Americae Unitis hac septimana comitia facta sunt. Quibus gestis factioni republicanorum contigit, ut victoriam et in senatu et in camera delegatorum reportaret. Ante suffragia lata democratae in senatu praevalebant,  cum  republicani alteri congressus camerae dominarentur. Rerum periti arbitrantur eventu comitiorum fieri posse, ut auctoritas praesidentis Barack Obama nonnihil debilitetur.

(Reijo Pitkäranta)

Suetia Palaestinam agnovit

Regimen Suetiae Palaestinam civitatem agnoscere constituit, ut nuntiavit Margot Wallström, ministra a rebus exteris. “Censemus” inquit”, iis condicionibus, quas  ius gentium novae civitati condendae ponit, a Palaestinensibus iam satisfactum esse: habent terram, populum, administratores.”  Negavit tamen Wallström decretum significare, ut Sueti in conflictibus Proximi Orientis Palaestinensibus faverent.

(Reijo Pitkäranta)

Ucraini gasum accipient

Ucraina et Russia deliberationibus ductu Unionis Europaeae Bruxellis habitis controversiam de gaso terrestri composuerunt. Nuntiatum est Russos gasi in Ucrainam translationem denuo hac hieme se incohaturos promisisse. Ucrainos ad debitum non solutum Russiae reddendum se obligavisse et in posterum gasum uno mense ante usum pretio fixo se empturos pollicitos esse

(Saara Honkanen)

Nova Commissio munus iniit

Nova commissio Unionis Europaeae, cui praeest Jean-Claude Juncker, Kalendis Novembribus (1.11.) munus iniit. Constat ex duodetriginta commissariis in quinque annos delectis, e quibus unus est Jyrki Katainen, pristinus princeps minister Finniae. Juncker nuntiavit commissionis maxime interesse, ut incrementum oeconomicum in Europa proveheretur et homines opere destituti quam celerrime adiuvarentur.

(Reijo Pitkäranta)

De suffragio in Catalonia

Iudicium constitutionale Hispaniae incolis Cataloniae interdixit, ne suffragium populi de libertate regionis suae haberent. Quod vetitum etiam ad suffragium inofficiale valet, quod illis in animo est die nono huius mensis (9.11.) instituere.  Constat regimen Hispaniae proposito Cataloniae sui iuris faciendae vehementissime adversari.

(Reijo Pitkäranta)

\

Aves in Europa rarescunt

Tribus decenniis proxime praeteritis numerus avium in Europa quadringentis fere milionibus deminutus est. Imprimis alauda, passer, sturnus aliaeque volucres, quae antea frequentissimae erant, valde rarescere coeperunt.  Actionibus autem tutelaribus effectum est, ut eodem tempore populationes aliquot rariorum avium increbrescerent.

(Reijo Pitkäranta)

De praemio architecturae

Praemium architecturae nomine Finlandia, quod hoc anno primum distribuitur, professori  Rainer Mahlamäki concessum est. Illo honore dignus iudicatus est, quod Museum historiae Iudaeorum Poloniae delineaverat. Hoc aedificium Polin appellatum in eadem regione Varsoviae invenitur, ubi clausus Iudaeorum vicus olim situs erat. Museum mense Octobri exeunte inauguratum est.

(Reijo Pitkäranta)

31.10.14

De comitiis Ucrainae

In comitiis Ucrainae sectatores praesidentis Petri Porosenko et primi ministri Arseni Jatsenjuk, qui ad occidentales tendunt, maiores factiones in parlamento efficiunt. Fautores pristini praesidentis Victoris Janukovits, qui ex potestate pulsus erat, decem fere centesimas suffragiorum acceperunt. Comitia non sunt facta in Crimea nec in partibus separatistarum. José Manuel Barroso, praeses commissionis Unionis Europaeae, censet comitia fuisse victoriam democratiae et renovationum. Sergei Lavrov, minister a rebus exteris Russiae, affirmavit Russiam exitum comitiorum comprobare et censebat maximi esse, quod in Ucraina tandem magistratus essent, qui inter se non certarent sed vera problemata tractarent.

Polonia milites in confinium orientale transferet

Propter crisim Ucrainae Polonia milites et arma in confinium orientale  ante annum bis millesimum septimum decimum  (2017) transferet. Maior pars exercitus Poloniae, in quo centum viginti milia militum sunt, est adhuc in confinio occidentali, ubi inter bellum frigidum collocata erat.

Dilma Roussef iterum praesidens

In comitiis praesidentialibus Brasiliae Dilma Roussef maiore  parte suffragiorum (51,60%) accepta praesidens in alterum quadriennium creata est. Plurimos fautores apud partes populi pauperiores habebat. Oratione suis  habita cives ad unitatem et concordiam hortata  nuntiavit se meliorem praesidentem fieri velle quam antea fuisset.

Vir armatus in parlamentum Canadae penetravit

Die Mercurii (22.10.) in urbe Ottava vir armatus in viridario prope parlamentum Canadae militem monumentum militare custodientem sclopetando occidit. Quo facto  autoraedam occupavit et iter ad ipsum parlamentum intendit, in quod penetravit et sclopetabat, donec a custode securitatis occisus est. Tres homines leviter vulnerati sunt. Stephen Harper, primus minister Canadae, erat tum in parlamento sed illaesus ex periculo evasit. Invasor erat civis Canadensis triginta annos natus, in islamismum conversus, qui iam antea de terrorismo suspectus erat ideoque syngraphum non acceperat. Socios sceleris non habuit.

Numerus aprorum celeriter augescit

In partibus Finniae, quae orientem et meridiem spectant, numerus aprorum celeriter augescit. Hodie iam circiter quingenti ibi numerantur, cum mense Martio non amplius  trecenti essent.  Quamquam primi apri ex parte Russiae venerunt, in populatione hodierna sunt iam porci indigenae, in Finnia nati.  Celeriter latius vagantur et iam greges eorum in Finnia interiore visi sunt. Venatio aprorum est quidem libera sed aprum feminam cum suis porcellis occidere non licet. Vetitum est etiam apros nutrire, quod venatoribus  est impedimento, nam si esca posita alliciuntur, venatio est efficacior.

(Tuomo Pekkanen)

24.10.2014

Navis submarina apud Stockholmiam quaerebatur

In archipelago Stockholmiae apud oram Suetiae orientalem activitates subaquaneae observatae sunt, quo factum est, ut exercitus Suecorum quaerere inciperet, an navis submarina peregrina ibi lateret. Adhibitis helicopteris navibusque aquae archipelagi per multos dies noctesque indagabantur, sed nihil certi repertum est.

Turcia milites Curdos adiuvat

Turcia die Lunae (20.10.) nuntiavit se permittere, ut copiae peshmerga Curdorum ad urbem Kobanen defendendam transirent.  Ordo Isis et Curdi de illa urbe, in confinio Turciae sita, ancipiti Marte iam mensem pugnant. Quamquam nationes occidentales flagitabant, Turci diu recusaverunt, quominus Curdos Cobanen tenentes adiuvarent.

De synodo episcoporum Vaticana

Synodus particularis episcoporum in Basilica Vaticana die septimo mensis Octobris (7.10.) missa Pontificali festiva aperta est. Propositum erat, ut praesertim res ad familiam et matrimonium pertinentes inter duas hebdomadas tractarentur. In homilia sua Papa Franciscus episcopos his verbis ad magnitudinem animi et humilitatem  adhortatus est:

” Conventus synodi”, inquit, “non instituti sunt, ut de cogitationibus pulchris et singularibus disceptaretur aut videretur, quis maiore gauderet intellegentia …Instituti sunt, ut vinea Domini melius coleretur et custodiretur … Dominus a nobis poscit, ut de familia sollicitudine affecti simus…”  Eventus autem synodi spem Papae fefellit, nam maior pars episcoporum consilium reiecit, quo homosexuales, matres  caelibes et coniuges post divortium denuo matrimonio iuncti  ab ecclesia catholica probarentur. Ita episcopi conservativi vicerunt liberales. Papa Franciscus quidem ipse de homosexualibus dixit: “Quis ego sum ad iudicandum”.

Conventus studiis Latinitatis provehendis

Diebus septimo et octavo mensis Novembris (7-8.11.) Pontificia Studiorum Universitas Salesiana conventum Romae habebit, qui imprimis ad cultores linguae Latinae et linguarum classicarum spectat. Oratores principales erunt professores Wilfried Stroh Monacensis, Kurt Smolak Vindobonensis, Dirk Sacré Lovaniensis, qui summi in orbe terrarum latinistae hodie iudicantur.

Argumenta orationum, quas illi Latine habebunt, erunt: primo “Sermo Latinus, sermo immortalis” (Stroh), secundo “Quantum ponderis quantamque vim lingua Latina habuerit ad sermonem effingendum, quo naturalis historiae studiosi per saecula et hominum aetates usi sunt” (Smolak), tertio “Qui Latinitatem recenti vel recentiore coluerint aetate” (Sacré).

Cygni ad migrationem congregantur

Hoc tempore cygni, in regionibus arcticis nidificantes, ad migrationem congregantur. In partibus Finniae septentrionalibus greges complurium centenorum cygnorum visi sunt, qui multos dies uno loco manentes ex fundo lacuum vel stagnorum cibum effodiunt et requiescunt. Aquis congelatis ad freta Daniae vel litora Suetiae meridionalis ad hiemandum proficiscuntur.

(Tuomo Pekkanen)

17/10.2014

Navis Alanda perturbata

17.10.2014

Russi nuperrime diversis modis impedire conati sunt, ne Aranda, navis Finnica mari perscrutando, in aquis internationalibus libere moveretur.  Primum quidem postridie Kalendas Augustas (2.8.) accidit, ut illi dominum huius navis prope Gotlandiam navigantis cursum mutare iuberent. Mense post eodem fere loco helicopterum Russicum Arandam minaciter bis circumvolavit.

(Reijo Pitkäranta)

Russi se recipere videntur

Copiae Russorum ex Ucraina pedem referre coeperunt. Hunc nuntium dedit John Kerry, minister Americanus, postquam collegam Russum Sergei Lavrov Parisiis convenit. Kerry condiciones enumeravit, sine quibus sanctiones Russis impositae mitigari non possent: omnes obsides et captivos liberarent et arma gravia ex Ucraina retraherent.

(Reijo Pitkäranta)

Stationes militares Turciae

Americani Turcos flagitaverunt, ut bello, quod cum ordine islamitarum Isis gereretur, efficacius interessent. Ictus enim aerii, quos civitates occidentales Americanis auctoribus in Isis fecerant, vim exspectatam non habuerunt. Credunt autem Americani se meliore successu cum hostibus pugnaturos esse, si sibi stationibus Turcorum militaribus ad impetus faciendos uti liceat.

(Reijo Pitkäranta)

De Gaza reaedificanda

Conventu internationali in urbe Cairo habito deliberatum est, quo modo regio Gaza reaedificaretur. Constat eam post bellum inter Israelem et ordinem Palaestinensem Hamas gestum prostratam et dirutam iacere. Iam variae civitates et consociationes, inter eas Unio Europaea, Civitates Americae Unitae, Quataria, grandem pecuniam ad incolas Gazae adiuvandos promiserunt.

(Reijo Pitkäranta)

Duo Nobelistae pacis

Novi Nobelistae pacis sunt Malala Yousafzai, puella Pakistana septendecim annorum, et Kailash Satyarthi, vir Indus sexaginta annos natus. Malala ius puellarum scholam frequentandi defendere ausa est, quamquam non multum afuit, quin ob eam rem occideretur. Satyarthi autem ordini praeest, cuius est pueros et puellas in servitutem redactos quaerere et ex labore coacto liberare.

(Reijo Pitkäranta)

September calidissimus

Mensis September nuper praeteritus in orbe terrarum calidior quam umquam ante fuit, ut statistica Administrationis Aeronauticae et Spatialis Americanae (NASA) indicant. Id imprimis maribus calefactis tribuendum  est, nam temperatura in continentibus inventa solito altior non erat.

(Reijo Pitkäranta)

Vis coffeae salutaris

Qui cotidie trina aut quaterna pocilla coffeae bibunt, paulo diutius quam alii vivere videntur. Haec opinio in ea materia consistit, quae ex una et viginti investigationibus paene quinquaginta annis factis orta est. Quae sit causa huius rei, non liquet, sed prioribus studiis comprobatum est fieri posse, ut coffea inter alia diabeten inhibeat.

(Satu Tuominen)

10.10.2014

Ebola iam in Europa

Iam periculum est, ne Ebola, febris haemorrhagica exitiosa, ex Africa occidentali in Europam diffundatur. Hac enim septimana primum contagium eius generis in Hispania occurrit, ubi quaedam nosocoma hoc morbo implicata esse inventa est. Quo diutius illa pestilentia in Africa grassabitur, eo verisimilius est eam latius patescere.

(Reijo Pitkäranta)

Ubinam Kim latet?

Qui negotia publica Coreae Septentrionalis observantur, valde mirantur, ubinam dictator Kim Jong-un lateat. Iam amplius quattuor septimanae sunt, cum in publico non apparet. Sunt, qui putent eum aliquam operationem chirurgicam subisse, quod tum, cum postremum in conspectu civium esset, pedibus claudicaret.

(Reijo Pitkäranta)

Novi Nobelistae

Praemium Nobelianum artis medicinae hoc anno in duas partes dividitur. Quarum unam accipit John O’Keefe, vir Americano-Britannus, alteram autem Maj-Britt et Edvard Moser, par coniugum Norvegicum. Illi in cerebro hominis cellulas nervorum reppererunt, quae nos conscios reddunt, ubinam quoque tempore simus et quo modo viam eo, quo tendamus, apte inveniamus.

(Reijo Pitkäranta)

Mercatus librarius

Francofurti, in urbe Germaniae, hac septimana mercatus librarius internationalis celebratur, quo maior in orbe terrarum non instituitur. Qui eventus hoc anno praesertim scriptoribus Finnis et libris eorum proponendis dedicatus est. Quam ob rem mercatui etiam praesidens Finniae Sauli Niinistö coniuge comitatus interfuit et ibidem die Martis vesperi (7.10.) orationem habuit.

(Reijo Pitkäranta)

De sacculis plasticis

Jerry Brown, gubernator Californiae, legi subscripsit, quae incolas huius civitatis sacculis plasticis uti vetat. Iam antea idem interdictum in nonnullis urbibus valere coeperat. Nova lex eo spectat, ut aquae et viridaria Californiae puriora fiant neve litora, nemora aut etiam Oceanus eiectamentis plasticis, quae in natura non dissolvantur, omnino repleantur.

(Reijo Pitkäranta)

Deminutio bestiarum

Numerus bestiarum ferarum in orbe terrarum quadraginta annis ad dimidium redactus est. Rerum processus multo velocior fuit, quam antea aestimabatur. Causae deminutionis sunt multae, quarum una esse videtur, quod loca naturae, ubi animalia vivunt, angustiora facta sunt. Huc accedunt venatio clandestina, piscatura nimia, status caeli calefactus.

(Reijo Pitkäranta)

De lingua Finnica

Finni linguam suam nimis difficilem esse putant, ut a peregrinis discatur. Causa difficultatum non est modo multitudo casuum et radices variae, sed etiam natura singularis linguae Finnicae, si hanc cum sermonibus patriis immigrantium comparaveris. Imprimis autem Finni ipsi in causa sunt, qui cum peregrinis libentius Anglice quam Finnice colloqui soleant.

(Antti Ijäs)

3.10.2014

Lavrov de sanctionibus

Sergei Lavrov, minister a rebus exteris Russiae, affirmavit Russiam nolle sanctionibus bellum contra occidentales continuare. Percontatione in televisione facta respondit Russos velle, ut relationes ad USA meliores fierent et in statum normalem redderentur. Narravit se usque cum ministro John Kerry consuetudines habere. “Nos non possumus Americanos cogere, ut sint amici nostri aut saltem nos audiant”, Lavrov lamentabatur. Hoc anno bello Ucrainico factum est, ut relationes Americanorum et Russorum magnopere frigescerent, cum milites Russi proeliis in Ucraina interessent et Russia rebelles armaret. Russia autem negat se participem belli esse.

Ontake lapides et cineres eructavit

Vulcanus Ontake, in media Iaponia situs, meridie Saturni inopinanter cineres lapidibus mixtos eructare coepit. Ille mons, plus tria milia metrorum altus, gratissima est meta ambulatoribus. Inter eruptionem circiter ducenti quinquaginta homines ibi erant, ex quibus plerisque contigit, ut salvi descenderent. Numerus victimarum pro certo non constat, nam quamquam pericula vulcanorum sunt nota, pauci ambulatores magistratibus praenuntiare solent se in montem ascensuros esse. Hucusque corpora duodequinquaginta hominum, toxicis vaporibus suffocatorum, in monte reperta sunt. Circiter mille milites, siphonarii vigilesque victimas calamitatis in monte quaerere pergunt.

Naufragium Estoniae comemorabatur

Die Dominico (28.9.) viginti anni a naufragio navis Estoniae acti erant. In illa calamitate octingenti quinquaginta duo homines (852) interierunt. Maior pars victimarum erant Sueti aut Estonienses. Navis illa traiectoria ex portu Tallinnae Stockholmiam iter faciebat, cum apud insulam Utö in saeva tempestate naufragium fecit. Causa calamitatis erat, quod bucula prorae vi tempestatis cardinibus fractis soluta est, quo facto tantum aquae in sentinam penetravit, ut navis stabilitate amissa naufragaret et brevi in profunditatem octoginta metrorum submergeretur. Tantum centum triginta septem (137) homines superstites evaserunt.

Venari necesse est

In Finnia sunt centum fere milia alcium, quarum numerus in condicionibus hodiernis celeriter augetur. Alces femina singulis annis singulos aut binos, rarius trinos hinnulos parit, quam ob rem populatio alcina annuatim facile duplicatur. Sine venatione numerus alcium iam triennio quadruplex fieret, si cum hodierno compares. Secundum statistica recentissima anno bis millesimo duodecimo (2012) alces causa erant mille trecentarum calamitatum vehicularium, ex quibus sumptus, societati solvendi, erant paene sexaginta milionum euronum. Numero alcium quadruplicato etiam illi sumptus quadruplicarentur. Ideo numerus alcium coercendus est. Venari necesse est.

(Tuomo Pekkanen)

26.9.14

De ignistitio Ucrainae

Die Lunae (22.9.) Ucraini rem tormentariam et alia gravium armorum genera ex acie Ucrainae orientalis reducere coeperunt. Eodem fere tempore etiam hostes eorum sive seditiosi Russorum amici suum instrumentum militare remotius transtulerunt, ut inter utramque partem aliquot diebus ante convenerat. Ignistitium, quod quidem iterum atque iterum violatum est, in Ucraina iam per tres septimanas valet.

(Reijo Pitkäranta)

Suffragium in Scotia

Die duodevicesimo huius mensis (18.9) in Scotia suffragium populi institutum est, quo cives interrogati sunt, utrum regionem suam etiam posthac cum Magna Britannia cohaerere vellent, necne. Sententiis computatis apparuit factionem ‘etiam’ dicentium maiorem partem suffragiorum sibi conciliasse. Illi autem, qui Scotiam sui iuris futuram esse speraverant, cladem acerbissimam acceperunt.

(Reijo Pitkäranta)

De rebus Afganistaniae

In Afganistania duo candidati praesidentiales post consultationes multorum mensium concordiam de potestate dividenda invenerunt. Pristini enim ministri Ashraf Ghani et Abdullah Abdullah pactioni subscripserunt, ut Ghani praesidens civitatis fieret et Abdullah munere ministri principis fungeretur. Ita rixae, quae his viris diu de eventu comitiorum praesidentialium fuerat, tandem finis factus est

(Reijo Pitkäranta)

De iudiciis Sinarum

Supremum dicasterium Sinarum nuper promisit etiam advenas ad iudicia observanda admissum iri. Hactenus in Sinis non solum ius plerumque ianuis clausis dictum est, sed etiam omnia acta forensia consuetudine celata sunt. Creditur nuntium hunc gratum esse imprimis iis negotiatoribus peregrinis, qui causarum apud iudices Sinenses agendarum participes sunt.

(Saara Honkanen)

Regimin Finniae mutatum

Numerus factionum, quae regimen Finniae constituunt, e sex ad quattuor redactus est. Die enim Saturni (20.9.) duo ministri partium prasinarum munus administrandi deposuerunt, cum confoederatio sinistra iam antea idem fecisset. Causa abeundi erat, quod ea, quae regimen de nova electrificina nucleari constituisset, a prasinis approbari non potuerunt.

(Reijo Pitkäranta)

Quid Niinistö dixerit

Finni eas actiones provehendas parati sunt, quibus communitas internationalis periculum ordinis islamici Isis arcere studet. Recusant tamen, quominus pugnis intersint aut bellantibus auxilium militare subministrent. Praesidens Sauli Niinistö una cum ministris delectis ait constantiam, varietatem rationum, cooperationem internationalem ad illud propositum perficiendum necessaria esse.

(Reijo Pitkäranta)

Polonia victoriam tulit

His septimanis in Polonia de principatu ludi follis volatici dimicatum est. Certamine finali in urbe Katovice posito victoriam reportavit grex Polonorum, qui Brasilianos tribus punctis ad unum profligavit. Tertium locum occupaverunt Germani, quippe qui ludo cum Francogallis facto superiores discederent.

(Reijo Pitkäranta)

19.9.2014

Comiita parlamentaria Suetiae

Sueti Idibus Septembribus (13.9.) novum parlamentum creaverunt. Sueco-democratae, qui immigrationi resistunt, prope tredecim centesimis (12,9%) sententiarum acceptis maximam victoriam adepti sunt. Factiones rubro-virides paene quadraginta quattuor centesimas (43,7%) obtinuerunt, partes dextrae cladem acceperunt, etsi prope quadraginta (39,3%) sententiarum centesimas tulerunt. Novum regimen constituet Stefan Löfven, praeses socio-democratarum.

Putin de sanctionibus

Postquam nationes occidentales Russiae novas sanctiones imposuerunt, Vladimir Putin, praesidens Russiae, monuit illas nullum effectum habituras esse, immo certa damna etiam eis, qui illas imposuissent, facturas esse. Censebat propositum sanctionum ab occidentalibus impositarum esse processum pacis in Ucraina perturbare. De sanctionibus contra occidentales contraponendis dixit illas tum tantum, si Russiae profuissent, ad effectum perductum iri. Quia omnino viginti quattuor magistratus Russi itinera in terras occidentales facere vetantur et opes eorum congelantur, Putin ait: “Quo pauciores magistratus Russi peregre proficiscuntur, eo melius est.”

Ignistitium fragile

Etsi ignistitium inter regimen Ucrainae et rebelles officialiter valet, proelia non desinunt. Arseni Jatsenjuk, primus minister Ucrainae, Russiam accusavit, quod novum conflictum gelatum crearet. “Sumus adhuc in bello”, inquit, “ et maximos impetus in nos facit Russia. Russia ordini mundi et securitati totius Europae imminet.” Jatsenjuk censebat adhuc praematurum esse de pace facienda loqui. Nam propositum Vladimiri Putin esse independentiam Ucrainae delere et Unionem Sovieticam restituere. Solam confoederationem Natonem posse Ucrainam defendere sed se intellegere brevi tempore fieri non posse, ut Ucraina ad Natonem adiungeretur.

Vinum in Toscana adulteratum

Vigiles Italiae ducenta viginti milia lagoenarum sequestraverunt, in quibus inerat vinum rubrum mediocre, quamquam pittacia indicabant inesse vinum ”Brunello di Montalcino” anni bis millesimi octavi (2008). Maior pars illius vini exportatur, etiam in Finniam, ubi singulae lagoenae circiter quinquagenis euronibus constant. Fraudatores lucrum plus quinque milionum euronum fecisse aestimantur. Vinum rubrum “Montalcino” in mercatum quinto anno post vindemiam mittitur, sed hoc tempore nimia copia in mercatu erat, si eam cum vindemia ante quinque annos facta compares.

Difficultates oeconomicae his annis copiam vini adulterati in Italia duplicaverunt.

Maximum in alea interretiaria lucrum

In alea interretiaria, cui nomen Eurojackpot, maximum omnium temporum lucrum septimana praeterita (12.9.) incidit in urbem Espoo Finniae meridionalis. Aleatori fortunato contingunt unus et sexaginta miliones (61.000.000) euronum, qui in rationem eius argentariam solvuntur. Alea illius generis, cui intersunt quattuordecim terrae Europae, ab anno bis millesimo duodecimo luditur.

Tuomo Pekkanen

12.9.2014

Ignistitium in Ucraina

Nonis Septembribus (5.9.) regimen Ucrainae et separatistae Russophili pactioni ignistitii eodem die vesperi ineundi subscripserunt. Condiciones Minisci, in urbe Belorussiae, convenerunt, quo utraque pars belli componendi causa congregata erat. Concordia inventa Petro Poroshenko, praesidens Ucrainae, exercitum suum pugnis finem facere iussit. Idem flagitavit, ut ignistitium ab observatoribus internationalibus custodiretur.  Etiam Russi se eventu consultationum  contentos esse nuntiaverunt monentes, ut pacta ab omnibus partibus servarentur. Quamquam arma in Ucraina fere siluerunt, Unio Europaea Russis novas sanctiones impositura est.

(Reijo Pitkäranta)

De schola Francogalliae

Mense Septembri ineunte in Francogallia nova lex valere coepit, quae scholam fundamentalem e quadriduana in quinqueduanam  mutat. Multae autem urbes et oppida renovationi vehementer adversantur, quam ob rem recusaverunt, quominus suas scholas die Mercurii aperirent. Hac in re etiam de hortationibus ministri institutionis publicae nihil curant.

(Reijo Pitkäranta)

Causa quaedam obesitatis

Homines adulti, si pueritia admodum dura usi sunt, maius periculum subeunt, ne obesitate afficiantur. Hoc compererunt investigatores Sueti, qui in Instituto Carolino operantur. Censent fieri posse, ut pueri, si male tractati sint, adulti facti non solum obesitate sed etiam affectibus tristibus, cogitatione prava, sanitate mentis instabili laborent.  Neque tamen omnes adultos, qui pueritiam infelicem habuerint, obesitate premi.

(Satu Tuominen)

Jack the Ripper detectus

Quaestio iam amplius centum annos versata, quisnam fuerit occisor serialis, Jack the Ripper vulgo nominatus, tandem soluta esse videtur.

Illa scelera commisit Aaron Kosminski, tonsor quidam Polonus, qui iam antea unus e suspectis erat.  Eum ope investigationis DNA detexit Jari Louhelainen, vir doctus ex Finnia oriundus, qui in universitate  Liverpulensi operam navat.

(Reijo Pitkäranta)

Inventum archaeologicum

In Dania haud procul ab urbe Hafnia reliquiae castelli in orbem circumacti repertae sunt.  Ruinae mille fere annorum esse et ad aetatem regis Vicingorum Haraldi Caerulidentis pertinere existimantur. Structura munitionis quattuor castellis antea inventis similis est, quam ob rem archaeologi omnia illa munimenta ab iisdem aedificatoribus constructa esse arbitrantur.

(Reijo Pitkäranta)

De equis bello caducis

Equi Finnici, qui bellis contra Unionem Sovieticam saeculo praeterito gestis ceciderunt, suum monumentum acceperunt. Hoc revelatum est inter sollemnitatem, quae Nonis Septembribus (5.9.) in Myllykoski celebrabatur. Opus illud memoriale ex lapide naturae factum est et speciem arcus lignei collo equorum impositi praebet. Existimantur viginti duo milia equorum Finnicorum illis bellis occisa esse.

(Reijo Pitkäranta)

5.9.14

Orbis terrarum ordinem ISIS oppugnet

John Kerry, minister a rebus exteris Americanorum, vult, ut orbis terrarum duce USA contra ordinem Isis viribus unitis pugnet. Isis est abbreviatio nominis  Anglici (< Islamic State of Iraq and Syria), quo appellatio ordinis Arabica vertitur. Isis operatur in Syria et Iraquia, in quibus magnas regiones occupavit. Jihadistae sive concertatores ordinis purgationes religiosas et ethnicas in Iraquia effecerunt. Isis et socii eius cotidie iura humana dire violant, cum homines regionum, quas occupaverunt, occidunt, vi et violentia adhibita convertunt, rapiunt, stuprant, in servitutem redigunt atque loca sacra eorum delent.

Donald Tusk praeses Consilii Europaei

Praeses Consilii Europaei creatus est Donald Tusk Polonus. Rebus Unionis Europaeae exteris praeerit Federica Mogherini Italica. Illius praedecessor est Herman Van Rompuy Belga, haec succedit Catharinae Ashton, natione  Britannicae. Tusk est ab anno bis millesimo septimo primus minister Poloniae, Mogherini a mense Februario anni currentis ministra a rebus exteris Italiae.

Suetia promptitudinem defensionis firmatura

Exercitus Suetiae nuntiat se promptitudinem in praetorio suo principali firmaturum et explorationem efficaciorem redditurum esse. Antea iam relatum erat exercitum Suetiae  aerium sexaginta nova aeroplana insectatoria empturum esse. Aeroplana nova necessaria quidem esse ad potestatem operandi corroborandam, sed causam esse etiam rerum in Ucraina condicionem. Etiam in Finnia operandi potestas et promptitudo exercitus aerii meliorata sunt. Aeroplana insectatoria in aerodromos meridionales transmota sunt, ut in varias partes melius quam ante operarentur. Promptitudo ita aucta est, quia factum est, ut aeroplana Russica una septimana ter spatium Finniae aerium offenderent.

Matres militum Russorum sollicitae

Ordo a iuribus humanis, qui constat ex matribus militum Russorum, rettulit his duobus mensibus etiam quindecim milia militum Russorum in Ucrainam missos esse et nunc ipsum plus septem milia eorum ibi esse. Hucusque saltem ducentos milites Russos in Ucraina mortem occubuisse. Nosocomium Rostoviae, quae urbs sita est prope confinium Ucrainae, plenissimum esse dicitur militum in bello Ucrainico vulneratorum. Matres militum de his rebus a familiaribus militum certiores fiunt. At confoederatio Nato non plus quam fere mille milites Russos in Ucraina esse aestimavit.

Dispensator pecuniis surreptis disparuit

Dispensator, qui opes ducis Coreae Septentrionalis Kim Jong-un curavit, peregre asylum quaerit. Acta Coreana Meridiana “JoongAng Ilbo” rettulerunt illum dispensatorem in Russia orientali septimana praeterita disparuisse, postquam secum summam quinque fere milionum dollarorum  ex iis pecuniis surripuisset, quas Kim Jong-un ad largitiones adhiberet.

(Tuomo Pekkanen)

29.8.14

Nuntii Latin XXV anni

Die Lunae proximo (1.9.) viginti quinque anni acti erunt, cum conspectus noster hebdomadalis , qui Nuntii Latini appellantur, divulgari coeptus est. Kalendis enim Septembribus anno millesimo nongentesimo undenonagesimo (1.9.1989) accidit, ut prima emissio nuntiorum  huius generis ex studio Radiophoniae Finnicae Generalis  foras exiret.  Inde mos initium cepit, qui deinceps iam per quartum saeculum continuatur.

Reijo Pitkäranta

Initium Nuntiorum Latinorum

Principium Nuntiorum Latinorum  in tempus incidit, quo res Europaeae valde mutabantur.  Iam enim in eo erat, ut communismus collaberetur et Unio Sovietica omnino corrueret. Quae cum ita essent, redactoribus huius programmatis occasio unica data est singulis septimanis describendi, qualis esset rerum politicarum progressus in Europa, quae in dies fere renasci videbatur.

Reijo Pitkäranta

Quid anno 1989 acciderit

Medio mense Novembri anno millesimo nongentesimo undenonagesimo (17.11.1989) conspectus Latinus his verbis iniit: Murus Berolinensis apertus est. Hanc brevem enuntiationem signum quoddam fuisse dixeris novam aetatem non solum Germaniae sed etiam toti Europae illuxisse.

Reijo Pitkäranta

Nuntii de Estonia et de  Diana

Bella, calamitates, mortes hominum, ut in nuntiis internationalibus, ita etiam in nostris saepe sunt tractata. Mense Septembri anno nonagesimo quarto (1994) nostrum erat de funestissimo naufragio navis Estoniae referre. Tribus annis post nuntiavimus Dianam, principissam Valliae, Parisiis calamitati vehiculari occubuisse.

Reijo Pitkäranta

Aliae magnae calamitates

Die undecimo mensis Septembris anno bismillesimo primo (11.9. 2001) exposuimus  turres geminas Neoeboracenses  propter ictum terroristarum ingentem ruinam dedisse. Anno autem bismillesimo quarto (2004) tsunamo in Asia coorto saltem octoginta milia hominum vitam amiserunt.

Reijo Pitkäranta

Nuntius anno 2008 editus

Moris est nobis unicuique emissioni, si fieri potest, unum nuntium ad res Finniae spectantes inserere, dummodo de tali re agatur, quam etiam peregrinis cognitione dignam esse arbitramur. Dubium non est, quin huc pertineat illud, quod  anno bismillesimo octavo (17.10.2008) palam fecimus: pristinum praesidentem Finniae Martti Ahtisaari praemio Nobeliano pacis affectum iri.

Reijo Pitkäranta

Quid Nuntii Latini sibi velint

Speramus nobis contigisse, ut Nuntiis Latinis divulgatis aliquid ad linguam Latinam colendam et augendam conferremus.  Etiam hoc erat in votis, ut ex argumentis selectis aliquam imaginem, quamvis imcompletam et dispersam, rerum hoc quarto saeculo in orbe gestarum adumbraremus atque amicis linguae Latinae occasionem in historiam recentissimam tam magnis gaudiis quam ingentibus doloribus repletam proscipiendi praeberemus.

Reijo Pitkäranta

22.8.14

Niinistö praesidentes Russiae et Ucrainae convenit

Praesidens Finniae Sauli Niinistö itinere in Russiam et Ucrainam facto praesidentem utriusque terrae convenit. Die Veneris (15.8.) in urbe Sotsi cum praesidente Russiae Vladimiro Putin, sequenti die Kioviae cum Petro Porosenko, praesidente Ucrainae, collocutus est. In patriam reversus rettulit se ex Russia in Ucrainam nuntium tulisse.  Neque tamen aperuit, qualis nuntius fuisset. Dixit iter suum ostendisse colloquiis et nuntiis inter  Ucrainam et Russiam ferendis opus esse. Niinistö monuit se non ad id spectare, ut pacis conciliator fieret. Finniam tamen omnibus modis discrimini  inter utramque partem dirimendo addictam esse.  At postea apparuit iter praesidentis Niinistö ad pacem in Ucraina conciliandam procul dubio profecisse. Nam Putin et Porosenko in urbe Minsk Belorussiae proxima septimana convenient, ut de rebus oeconomicis et de Ucraina orientali pacanda colloquantur. Intererunt etiam delegati Kazakstaniae, Belorussiae, Unionis Europaeae.

Ucraina auxilium militare petivit

Ucraina ab Unione Europaea et a Natone auxilium militare ad separatistas russophilos opprimendos petivit. Pavlo Klimkin, minister a rebus Ucrainae exteris,  affirmavit propositum non esse victoriam adipisci  sed indutias facere. At Nato, ut ait praefectus eius Philip Breedloven, auxilium militare non dat nisi membris confoederationis.  Adhuc ex terris occidentalibus tantum USA et Canada in Ucrainam materiam militarem suppeditaverunt. Rebellibus sive separatistis arma et alia ad bellum gerendum necessaria ex Russia subministrantur. Nihilo minus iam in eo est, ut separatistae in Ucraina orientali inferiores videantur.

Finni iaculo excellebant

Ludi Europaei athleticae levis Turici (vulgo Zürich), in urbe Helvetiae, septimana praeterita habiti sunt. Intererant ludis circiter mille quadringenti athletae ex quinquaginta nationibus oriundi. Finni hac vice solito melius rem gesserunt, nam duobus nomismatis acceptis inter nationes tertium decimum locum occupaverunt.  Sicut sperabatur, iaculatione excellebant. Primum locum et aureum nomisma obtinuit Antti Ruuskanen, qui duodenonaginta metra (88,01) iaculando Vitezslavum Vesely, natione Tzekum, plus tribus metris superavit.  Laude digni erant et ceteri iaculatores Finni, nam Tero Pitkämäki tertius factus aeneum nomisma accepit, Lasse Etelätalo fuit quartus.

Numerus centenariorum crescit

Longaevitas Finnorum in annos singulos augescit. Anno proximo (2013) septingenti sex (706) homines centum annos nati in Finnia erant. Nonagenarii circiter quinquaginta milia numerabantur.

Etsi longaevitas in certis familiis transferri videtur, consuetudines vitae et victus salutaris maiorem quam gena vim ad vitae longitudinem habent.

(Tuomo Pekkanen)

15.8.14

Sanctiones a Russia impetratae

Die septimo mensis Augusti (7.8.) regimen Russiae sanctiones oeconomicas, quae nationibus occidentalibus imponerentur, palam fecit. Hoc consilio capto sine dubio iis sanctionibus respondit, quas Unio Europaea et aliae quoque terrae Russis propter discrimen Ucrainae ingesserant. Itaque Russi decreverunt, ut Unioni Europaeae, Civitatibus Americae Unitis, Australiae, Canadae, Norvegiae interdiceretur, ne merces alimentarias neu alia producta rei rusticae in Russiam exportarent. Cum Finnia civitas socia Unionis Europaeae sit, dubium non est, quin novae sanctiones etiam nostrae oeconomiae detrimentum allaturae sint.

(Reijo Pitkäranta)

Quid Barack Obama nuntiaverit

Barack Obama, praesidens Civitatum Americae Unitarum, consilium approbavit, quemadmodum ictus aerii ad certa destinata directi in Iraquia fierent.  Americani iam cibum et aquam iis hominibus subministrare coeperunt, qui pugnatores Civitatis islamicae in Iraquia fugerunt. Praesidens firmissime negavit copias Americanas in Iraquiam redituras esse et bellum Iraquicum redintegratum iri.

(Reijo Pitkäranta)

Erdogan novus praesidens Turciae

Recep Tayyip Erdogan, diutinus princeps minister Turciae, novus praesidens civitatis electus est. Comitiis enim praesidentialibus die Dominico (10.8.) habitis apparuit ei contigisse, ut iam primo suffragio maiorem sententiarum partem sibi conciliaret. Pollicitus est se officium praesidentis corroboraturum et potestatem eius aucturum esse, cum munus illud hodie nonnisi caerimoniale esset. 

(Reijo Pitkäranta)

Remedium contra febrim Ebolam

Remedium, quod adhuc probatur, fortasse brevi curam febri haemorrhagica Ebola laborantium efficaciorem reddet. Officiales sanitarii Civitatum Americae Unitarum veniam extraordinariam ei medicamini utendo nuperrime dederunt, ut epidemia cito diffusa reprimeretur. Neque quisquam etiam nunc certum habet, num pharmacum novum tutum sit. Iam amplius mille homines ex viro Ebola mortui sunt.

(Saara Honkanen)

Inventum in Graecia archaeologicum

In urbe Amphipoli in Graecia septentrionali sita magnificum sepulcrum antiquum repertum est, ubi ossa personae alicuius magnae dignitatis condita esse videntur. Antonis Samaras, princeps minister Graeciae, qui hunc locum archaeologicum obiit, inventum maximi momenti esse dixit. Neque desunt, qui Roxanen, coniugem Alexandri Magni, in eo tumulo requiescere putent.

(Reijo Pitkäranta)

Ballaena in Mari Baltico visa

Custodes litorales Suetiae in Mari Baltico prope insulam Gotlandiam ballaenam natantem viderunt. Agitur de genere ceti, cuius nomen scientificum est Megaptera novae-angliae. Hoc mammale, quod ad longitudinem undeviginti metrorum crescere potest, in omnibus oceanis quidem vivit, sed rarissime in Mare Balticum aberrat. In aquis Finniae tale animal antea tantum bis animadversum est.

(Reijo Pitkäranta)

8.8.14

Arbitrium loquendi et scribendi in Russia retstringitur

Regimen Russiae arbitrium scribendi et loquendi restringit, quod praecipue ad interrete spectat. Antea homines admodum libere cogitare et vivere poterant, dummodo ne politicae administratorum intervenirent. Hodie informatio publica, a regimine administrata, cogitationes hominum gubernare conatur. Propositum est, ut omnis informatio, quae per interrete venit, a regimine recenseatur.  Lex, quae post duos annos valere incipiet, ad paginas interretiarias pertinebit, quibus informatio de civibus Russis colligitur. Tantum moderatra Russica permittentur et aditus ad paginas aliorum moderatrorum prohibebitur. Id si factum erit, Facebook, Twitter, Youtube, quae vix novae legi se submittent, in Russia operari non poterunt.

Conventio de violentia contra feminas prohibenda valere coepit

Conventio de violentia contra feminas et de violentia domestica  prohibenda, quam Consilium Europaeum praeparavit, Kalendis Augustis valere coepit. Conventio ad id spectat, ut violentia in familia, violentia sexualis, persecutio, matrimonia coacta atque circumcisio feminarum prohibeantur. Usque adhuc quattuordecim terrae conventionem confirmaverunt.

”Femina palam ne rideat”

Bülent Arinc, vicepraeses regiminis Turciae, feminas monuit, ne palam riderent. “Casta femina”, inquit, “palam non ridet. Mente non est invocatoria sed castitatem suam defendit.” At aemulus eius politicus Ekmeleddin Ihsanoglu respondit in Turcia feminis ridentibus opus esse, nam maximi esse nunc omnium risum laetum audire.

Natalitas in  Europa descendit

His viginti annis natalitas in multis Europae terris descendit. Si anno millesimo nongentesimo nonagesimo (1990) numerus infantium continentis inter feminas aequaliter divisus esset, singulis duo, quibusdam etiam tres infantes suppeditavissent. Ex statisticis autem anni bis millesimi duodecimi (2012) feminae Europaeae tantum unus infans et dimidius suppetivit. Natalitas imprimis propter instabilitatem oeconomicam et bella gesta deminuta est. Maxima deminutio facta est in regionibus  pristinae Iugoslaviae et Media Europa orientali atque in terris Balticis. Maior natalitas in terris septentrionalibus atque in Belgio et Francia causam habet partim in eo, quod societas civilis familiis liberos habentibus subvenit.

Jarmo Lindberg novus imperator exercitus Finniae

Dux generalis Ari Puheloinen, qui quinquennium imperator exercitus Finniae fuit, Kalendis Augustis rude donatus est. Illi successit Jarmo Lindberg, olim pilota aeroplani insectatorii et dux copiarum aeriarum. Novus imperator censet defensionem patriae statum habere sufficientem.

Magistri linguae Latinae in urbe Kuopio convenerunt

Hac septimana (4-5.8.) Societas Finnica magistrorum linguae Latinae in urbe Kuopio provinciae Savoniae septentrionalis conventum habuit. Tractabantur  res actuales ad institutionem Latinam pertinentes et virtutes, architectura iudiciaque Romanorum, Latinitas botanica aliaque. Conventum conclusit navigatio in lacu Kallavesi, quo urbs Kuopio cingitur.

Tuomo Pekkanen

1.8.14.

Bellum in Gaza geritur

Iam plus tres septimanae sunt, cum Israeliani in regione Gaza cum Palaestiniensibus bellum gerunt.  Conflictus postridie Nonas Iulias (8.7.) initium cepit, cum tres pueri Israeliani ab ordine Hamas interfecti essent. Impetus tam funesti fuerunt, ut adhuc circiter mille ducenti Palaestinienses et amplius quinquaginta Israeliani vitam amitterent. Benjamin Netanjahu, princeps minister Israelis, oratione die Lunae habita praemonuit fieri posse, ut bellum diutius traheretur.

(Reijo Pitkäranta)

Aeroplanum in terram decidit

Die septimo decimo mensis Iulii (17.7..) aeroplanum viatorium Malaesianum, dum Cualam Lumpuriam petens supra Ucrainam orientalem iter facit, missili antiaerio tactum in terram decidit.. Nec quisquam ex ducentis nonaginta octo viatoribus illi praecipitationi superfuit. Duae fere partes mortuorum cives Hollandienses erant, quia aeroplanum ab urbe Amstelodamo evolaverat. De strage illa interneciva separatistae Ucrainae Russis faventes accusantur, sed illi se eam commisisse negant. 

(Reijo Pitkäranta)

Sanctiones Russis impositae

Die Martis (29.7.) civitates Unionis Europaeae Russis novas sanctiones oeconomicas imponere  statuerunt. Pertinet hoc consilium ad varia negotiorum genera ut ad mercatum nummarium, ad commercium armorum, ad industriam petroleariam. Neque iam pecuniam iis mensis argentariis mutuam dabunt, quarum maiorem partem res publica Russia possidet. Emptio et venditio armorum Russis interdicitur.

(Reijo Pitkäranta)

Grex Germanorum victor

Die tertio decimo mensis Iulii (13.7.) in stadio urbis capitis Brasiliae inter Argentinam et Germaniam  certatum est, utra earum principatum mundi pedifollicum consequeretur. Victoriam reportavit grex nationalis Germaniae, postquam lusori Mario Götze tempore additicio contigit, ut follem in rete  adversariorum impingeret.  Argentini autem, quamquam hoc certamine inferiores discesserunt, Hollandiensibus tertium locum consecutis meliores erant.

(Reijo Pitkäranta)

Aedes Vicingorum inventae

Hoc autumno in Saltvik Alandiae effossiones ruinae ad aetatem Vicingorum pertinentis incohabuntur. Reliquiae aulae magnificae mense Maio repertae sunt unicae  in regione totius Maris Baltici orientalis. Vestigia aedium quadraginta metrorum invenit Kim Darmark, archaeologus musei Alandiae. Censet de praedio nobilium magno agi, quae una e sedibus Vicingorum fuerit.

(Satu Tuominen)

Tempestas aestatis in Finnia

Tempestas aestiva in Finnia hoc anno valde variavit. Pars posterior mensis Iulii calidior fuit quam umquam quinquaginta annis proxime praeteritis, cum calor in thermometro conspicuus compluribus diebus  usque ad triginta et etiam triginta duos gradus Celsianos ascendit. Aestus fervidi Finnis eo magis placebant, quod mensis Iunius apud nos solito frigidior fuit.

(Reijo Pitkäranta)

13.6.14

Quid sauli Niinistö dixerit

Sergei Lavrov, minister a rebus exteris Russiae, itinere biduano in Finniam suscepto praesidentem Sauli Niinistö in villa eius aestiva convenit. Qua occasione oblata Niinistö moderatores Russos appellavit, ut maximam operam discrimini Ucrainae componendo darent. Cum ille respondisset suos iam omnia pro ea re fecisse, praesidens eos ad maiores labores hortatus est. 

(Reijo Pitkäranta)

Colloquia cum Iranianis

Die Lunae (9.6.) Iraniani Vindobonae, in urbe Austriae, cum Americanis de programmate suo nucleari consultare coeperunt. Initio constitutum erat, ut colloquiis iam die vicesimo mensis Iulii (20.7.) finis imponeretur, sed postea nuntiatum est fieri posse, ut conventus dimidio anno longior esset. Etiam Russis et Francogallis in animo est cum Iranianis de rebus nuclearibus privatim colloqui.

(Reijo Pitkäranta)

Sollemnitas Civitatis Vaticanae

Hac septimana in hortis Civitatis Vaticanae eventus rarissimus celebrabatur, cum Ponfifex Maximus Franciscus praesidentem Israelis Shimon Peres et praesidentem Palaestinensium Mahmud Abbas hospitio recepit. Omnes sollemnitati precationis communi aderant, inter quam non solum ad ritum Christianorum, sed etiam more Iudaeorum et Musulmanorum pro pace orabatur.

(Reijo Pitkäranta)

Certamina mundi pedifollica

Die Iovis (12.6.) in Brasilia certamina de principatu mundi pedifollica inierunt. His ludis omnino triginta duo greges nationales e sex partibus terrarum oriundi intersunt. E quibus cohortibus tredecim  ex Europa veniunt, sex ex America Meridionali, quinque ex Africa, quattuor ex Asia, tres ex America Septentrionali et Media, una ex Oceania.

(Reijo Pitkäranta)

De praeda piscatorum Finniae

Anno proxime praeterito (2013) piscatores Finni e mari largiorem praedam abstulerunt quam umquam ante. Copia enim piscium, qui in retia eorum inciderant, quinque milionibus chiliogrammatum maior et decem milionibus euronum pretiosior erat quam anno superiore. Hoc innotuit e relatione, quam Institutum oeconomiae ferarum et piscium investigandae divulgavit.

(Reijo Pitkäranta)

Nova musci species reperta

Nova musci species in Finnia inventa est. Biologa Tiina Laitinen muscum in viridario nationali Oulanka Finniae septentrionalis casu repperit. Herba ea vix unum millimetrum longa in putri ligno humi iacente et humore circumfluente inter silvas coniferarum crescit. Species adhuc nomine caret; consuetudine licet inventrici denominationem Finnicam proponere.

(Saara Honkanen)

Nuntii Latini ad ferias abeunt

Nuntii Latini ob ferias aestivas ad septem septimanas intermittuntur, quam ob rem proxima emissio non ante quam Kalendis Augustis (1.8.) fiet. Restat, ut auscultatoribus nostris gratias quam maximas agamus et iis aestatem quam iucundissimam exoptemus.

(Reijo Pitkäranta)

6.6.14

Rex Hispaniae abdicaturus

Juan Carlos, rex Hispaniae, oratione televisifica nuntiavit se coronam esse abdicaturum, ut novae generationi locum daret. Novum regem fore principem hereditarium Felipe, qui ad regnum paratus esset et novum saeculum incoharet. Juan Carlos censebat illum in munere gerendo stabilitatem necessariam praelaturum esse. Abdicatio postulat, ut constitutio Hispaniae mutetur. Primus minister Mariano Rajoy dixit additione in constitutionem facta fieri posse, ut rex thronum filio cederet.  Juan Carlos, ante duodequadraginta annos rex Hispaniae coronatus,  initio  populo acceptus erat, sed his tribus annis gratia familiae regiae deminuta est.  In causa sunt suspiciones corruptionis, quibus Cristina, filia regis, et maritus eius implicati sunt.  Rex ipse indignationem civium movit, cum ante duos annos in Botswana venationi elephantium interesset et photographema inter superiorem safarim factum divulgaretur, in quo ille iuxta elephantem occisum superbiret.  Rex futurus Felipe VI fiduciam civium restituere debet, ad quod efficiendum maior pars Hispanorum eum sustinet. Est quadraginta sex annos natus, in universitate Matritensi legi studuit, in exercitu pilota helicopteri factus est. Coniux eius est Letizia Ortiz Rocasola, ex qua duas filias habet.

Memoria invasionis

Hodie (6.6.) anniversarium septuagesimum invasionis in Normandiam factae celebratur.  Mense Iunio anni millesimi nongentesimi quadragesimi quarti copiae foederatorum in litus Normandiae  a Germania nazistica occupatae invaserunt et aciem occidentalem creaverunt. Sollemnibus intersunt  milites veterani, qui invasioni interfuerunt,  et moderatores civitatum.  Adsunt inter alios Barack Obama praesidens Americanorum, Elisabeth regina Britannorum, Angela Merkel cancellaria foederalis  Germanorum. Neque discrimen Ucrainae obstiterat, quin praesidens Russiae Vladimir Putin ad anniversarium veniret. Praesidens Franciae Francois Hollande dixit se affirmavisse delegatum Russorum ad caerimoniam exoptatum esse.

Feriae scholarum inceperunt

Feriae aestivae scholarum in Finnia Kalendis Iuniis inierunt. Ad annum scholasticum conclundendum  in omnibus scholis hymnus “Advenit alma hora” (Jo joutui armas aika)  cantatus est. In examine maturitatis hoc anno viginti septem milia nongenti adulescentes probati sunt, qui studia in universitatibus aut aliis scholis superioribus pergent.

Vulpes urbana commeatum vehicularem non timet

Vulpes in urbibus Finniae factae sunt frequentiores. Odor carnis in craticula assatae et vita facilis vulpes audaciores in urbes alliciunt, ubi in commeatu vehiculari vivere didicerunt. Ad cibum etiam cuniculos et lepores in suburbiis invenire possunt.  Neque homines timent, quia venatio in urbibus vetita est.

Tuomo Pekkanen

30.5.14

Comitia Europaea

Septimana vergente comitia ad novum europarlamentum creandum facta sunt. Septingenti quinquaginta unus (751) delegati ad proximum quinquennium electi sunt. Ex Finnia europarlamentarii sunt tredecim:  conservatores et centrales trini, Finni fundamentales sive vere Finni et socio-democratae bini, ex factione populari Sueca, sinistra atque viridi singuli. In Finnia socio-democratae magnam cladem acceperunt. In multis terris partes extremae numerum fautorum auxerunt. In Francia Frons nationalis (FN) quartam fere partem suffragiorum obtinuit. Similiter in Graecia, Germania, Austria Suecia Daniaque factiones immigrationi resistentes maiorem quam ante gratiam apud populum invenerunt.

Russia gasum Sinensibus vendit

Russi et Sinenses inter se pacti sunt, ut Russia inter triginta annos gasum terrestre Sinis venderet. Illud pactum quadringentis milionibus dollarorum aestimatur. Ad gasum exportandum gasiductus sumptu Russorum ex Sibiria in Sinas est ducendus. Exportatio gasi anno bis millesimo duodevicesimo incipiet. Commercium utrique parti erit utile, nam Sinenses usum carbonis fossilis circumscribere volunt, ut inquinatio aeris deminuatur.  Cum USA et Europa propter discrimen Ucrainae Russis sanctiones imposuerint et nationes Europaeae de gaso Russiae minus quam ante pendere velint, Russi novis emptoribus indigent, quos apud Sinenses invenerunt.

Feminae de caelibatu sacerdotum ad Papam appellaverunt

Caelibatus est in ecclesia catholica translaticius  plus mille annos, qui, ut tolleretur,  frustra flagitatum est. Nunc viginti sex feminae in Italia habitantes, quae sacerdotes catholicos amant, ad papam Franciscum appellaverunt, ut caelibatus sacerdotum voluntarius fieret.  Scribunt viros melius ecclesiae servire posse, si coniugem et liberos habeant.

Grex Finnorum in hocceo glaciali secundus

Ludi mundani hoccei glacialis, qui in urbe Minsk Belorussiae fiebant, die Dominico (25.5.) ad finem venerunt. Grex Finnorum, qui initio duas clades passus erat, Canadensibus et Tzekis devictis usque ad certamen finale venit, in quo punctis duo ad quinque (2-5) Russis inferior fuit.

Promotiones Ordinis Philosophorum

Ordo Philosophorum sive Facultas Philosophica Universitatis Helsinkiensis maximas in historia sua promotiones (22-24.5.) celebravit, quibus plus mille homines intererant.  Ritu antiquo inde a septimo decimo saeculo tradito magistri et doctores, qui examinibus ad gradum obtinendum necessariis approbati erant, insignibus academicis ornati sunt.  Magistri coronam lauream et anulum aureum, doctores pileum et gladium, omnes diploma Latinum  acceperunt.  Qui ante quinquaginta annos in eadem facultate promoti erant, titulo magistri aut doctoris semisaecularis ornati sunt. Doctores honoris causa promoti sunt tredecim homines studiis scientificis insignes. Dies festos saltatio festiva clausit.

Tuomo Pekkanen

23.4.14

Inundationes Balcanicae

In Serbia et Bosnia paucis diebus maiores imbres quam umquam post hominum memoriam ceciderunt, quo factum est, ut flumen Savus amplissimas regiones inundaret. Illa clade naturae saltem quinquaginta homines vitam amiserunt et sexaginta milia civium domum relinquere coacta sunt. Damna agriculturae vix aestimari possunt.

(Reijo Pitkäranta)

Comitia in India facta

In India comitia parlamentaria facta sunt, quorum victoriam manifestam factio popularis hinduistarum reportavit. Conciliavit enim sibi tot legatorum sedes, ut iam sola de rebus Indiae decernere possit. Partes autem congressuales, quae familia Gandhi duce his decem annis civitati praefuerunt, cladem acerbissimam acceperunt. Novus Indiae princeps minister erit Narendra Mori, praeses factionis victricis.

(Reijo Pitkäranta)

Mubarak vinculis damnatus

Hosni Mubarak, pristinus praesidens Aegypti munere demotus, peculatus convictus vinculis trium annorum damnatus est. Filii eius Alaa et Gamal eiusdem criminis accusati poena quaternorum annorum afficientur. Huc accedit, quod Mubarak reus aliorum quoque corruptionis casuum factus est.

(Reijo Pitkäranta)

Iubilaeum Norvegorum

Die Saturni (17.5.) populus Norvegicus una cum familia regia iubilaeum independentiae suae bisaeculare celebrabat. Causa sollemnitatis erat, quod die septimo decimo mensis Maii anno millesimo octingentesimo quarto decimo (17.5.1814) in Eidsvoll, in paroechia prope Osloam sita, legi fundamentali Norvegiae subscriptum erat. Eodem tempore Norvegi a dominatione Danorum liberati sunt.

(Reijo Pitkäranta)

Actiones tutatorum pacis

Tutatores pacis Nationum Unitarum rarius, quam opus est, in discriminibus solvendis vim adhibent, ut patet e relatione huius Ordinis interna. Apparuit enim hos milites nonnisi quinto quoque casu cives ab aggressionibus armis defendisse, quamvis illorum esset eos contra violentiam protegere. In causa, cur tam caute egissent, fuisse metum, ne, si armis usi essent, in iudicium vocarentur.

(Reijo Pitkäranta)

Maximus dinosaurus inventus

Reliquiae animalis, quo maius in orbe terrarum fortasse numquam vixit, in Patagonia, in regione Argentinae Meridianae, inventae sunt. Ex osse femoris eius concluditur hanc dinosauri speciem, quae adhuc nomine caret, viginti metra altam et quadraginta metra longam fuisse et pondere septuaginta septem tonnarum magnitudinem quattuordecim elephantorum aequavisse.

(Reijo Pitkäranta)

Investigatio linguae Finnicae

Investigatores Aboae sive in urbe Turku operantes partem interretis lingua Finnica scriptam electronice deponendam et classificandam susceperunt. Corpus scriptorum hoc modo obtentum linguistis facultatem praebebit vocabularium et grammaticam textuum Finnicorum diversi generis investigandi. Materia tam ampla est, ut non nisi auxilio computatrorum pertractari possit.

(Antti Ijäs)

16.5.2014

UE suffragium Ucrainae orientalis damnavit

Die Dominico (11.5.) in partibus Ucrainae orientalibus separatistae suffragium populi de independentia regionis instituerunt. Unio Europaea et administratio Kioviae suffragium illegale declaraverunt neque eventum agnoverunt, ex quo maior pars independentiae favebat.  Antea praesidens Vladimir Putin petiverat, ut illud suffragium differretur.

Novum de pace consilium

Ordo de Securitate et Cooperatione Europaea (OSCE) consilium paravit, quo status rerum in Ucraina stabiliretur,  cum violentia deponeretur, dialogus nationalis susciperetur, regimen Ucrainae in comitiis praesidentialibus sustineretur. Unio Europaea, USA, Russia, Ucraina se consilio favere nuntiaverunt. Colloquiis praesidebit Wolfgang Ischinger, veteranus diplomaticus Germanus.

Dies victoriae in Platea Rubra celebratus

Die nono mensis Maii anno millesimo nongentesimo quadragesimo quinto (1945) bellum mundanum secundum finitum est. Illo die victoria de Germania nazistica reportata celebratur. In pompa militari, quae in Platea Rubra Moscuensi fiebat, intererant undecim milia militum, quibus praesidens Vladimir Putin, qui etiam imperator exercitus est, orationem habuit.  Laudavit amorem patriae, qui omnia vinceret, et monuit diem victoriae postulare fidelitatem erga patriam et ostendere, quanti esset illam defendere. Post pompam Moscuensem Putin in Crimaeam profectus est et pompam classis Maris Euxini Sebastopoli sequebatur. Regimen Ucrainae iter Putini provocationem habebat.

Conchita Wurst excellebat

Certamini finali cantionis, quod vespere Sabbati (10.5.) Hafniae factum est, intererant cantores vel cantatrices viginti sex terrarum.  De palma constituerunt omnium   terrarum participum delegationes atque singuli cives, qui sententias telephonice dederunt. Victoriam reportavit Austria, quam repraesentavit Conchita Wurst alias Tom Neuwirth, vir viginti quinque annorum. Modo feminae eleganter vestitus et nigra barba ornatus ille cantavit “Rise Like a Phoenix”, Surge modo Phoenicis, quod auditoribus tantopere placuit, ut Austria ducenta nonaginta puncta pararet. Secundum locum obtinuit Hollandia, tertium Suetia. Finnia septuaginta duobus punctis acceptis fuit in certamine undecima. Praesertim in Europa orientali Conchita Wurst reprehendebatur et in Russia, Belorussia Armeniaque  reprobatores efficere conabantur, ne cantio illius  omnino in televisione monstraretur. “Reprobatio nostra nullos habet fines”, scripsit Vladimir Zirinovski, politicus ultranationalis. Vitali Milonov,  delegatus communalis Petropolitanus, certamen Eurovisionis spectaculum Sodomiae et Conchitam exemplum perversionis appellavit. Etsi politici Russi Conchitam de homosexualitate propaganda accusaverunt, cives cum eis dissentire videntur, nam ex punctis telephonice ex Russia datis tantum Armenia et Belorussia plura obtinuerunt quam Austria.

(Tuomo Pekkanen)

09..5.14

Pactum Finniae et Suetiae

Ministri Finniae et Suetiae pacto de cooperatione defensionis augenda subscripserunt. Inter eos convenit, ut copiae utriusque civitatis magis quam ante exercitationes militares communi consilio instituerent et notitias per custodiam aeriam et maritimam acquisitas inter se communicarent. Praeterea propositum est cohortes communes creare, quae ad varia discrimina internationalia solvenda aptae essent.

(Reijo Pitkäranta)

Quid Odessae factum sit

Odessae, in urbe Ucrainae ad Pontum Euxinum sita, septimana vergente conflictus cruenti inter cives Ucrainae studiosos et reclamatores Russophilos orti sunt. Ex tumultibus viariis secutum est, ut amici Ucrainae impetum in aedes unionum opificum facerent, quo fautores Russiae confugerant. Incendio in eo aedificio conflato quadraginta fere homines miserrime interierunt.

(Reijo Pitkäranta)

Shinawatra munus deponit

Yingluck Shinawatra, princeps ministra Thailandiae, munus deponere coacta est. Tribunal enim constitutionale iudicavit eam contra legem fundamentalem egisse, cum ante tres annos praefectum securitatis, qui regimen reprehenderat, a magistratu amovisset.

(Reijo Pitkäranta)

De oeconomia Portugalliae

Portugallia die septimo decimo mensis Maii (17.5.) programmate internationali a pecunia credita desistet. Pedro Passos Coelho, princeps minister civitatis, ait nationem suam saltem in annum satis facultatum habere, quarum ope negotia sua necessaria probe exsequeretur. Quae cum ita essent, Portugalliam ad mercatum nummarium sine ullis opitulationibus redituram esse.

(Reijo Pitkäranta)

Puellae in Nigeria ereptae

Postridie Idus Apriles (14.4.) in Nigeria accidit, ut ex quadam schola amplius ducentae puellae vi abducerentur. Neque quisquam sciebat, qui essent auctores sceleris, donec Boko Haram, grex seditiosus islamiticus, hac septimana ineunte se illas scholares eripuisse nuntiavit. Goodluck Jonathan, praesidens Nigeriae, auxilium ad puellas inveniendas et liberandas tam ab Americanis quam a nationibus finitimis petivit.

(Satu Tuominen)

Quid Tayyip Erdogan dixerit

Recep Tayyip Erdogan, princeps minister Turciae, posteris eorum Armeniorum, qui internecione anno millesimo nongentesimo quinto decimo (1915) facta vitam amiserant, dolorem civitatis suae pronuntiavit. Illo enim anno ingens numerus Armeniorum a copiis Osmannorum, quorum imperium Turciae antecessit, interfectus est. Iam multi anni sunt, cum necessitudines inter Turciam et Armeniam intercedentes ex hac strage laborant.

(Reijo Pitkäranta)

Poliomyelitis nondum deleta

Ordo mundi sanitarius (WHO) monet periculum esse, ne poliomyelitis sanitati gentium rursus imminere incipiat. Morbus ille viralis, qui paralyses efficit, iam ex orbe terrarum evanuisse putabatur, sed his quoque temporibus homines eo laborantes in Pakistania, Camerunia Syriaque inventi sunt.

(Reijo Pitkäranta)

3.5.14

Duo papae canonizati

Die Dominico ecclesia catholica in Civitate Vaticana duos papas in Sanctorum numerum rettulit, scilicet Iohannem Paulum II, qui anno bis millesimo quinto (2005) diem obiit supremum, et Iohannem XXIII, qui fuerat summus pontifex per quinquennium  usque ad annum millesimum nongentesimum sexagesimum tertium (1958-1963). Eventus fuit exceptionalis, quia inter proximum saeculum tantum unus papa canonizatus est. Praeterea singulare erat, quod in Platea Petriana canonizationem concelebravit etiam Benedictus XVI, pontifex emeritus, quem papa Franciscus invitaverat. Complura centena milia peregrinorum Romam et in Civitatem Vaticanam ad caerimonias confluxerant. Aderant delegati plus quinquaginta nationum et plus viginti principes civitatum. Iohannes XXIII fuit pontifex liberalis, qui Concilium Vaticanum II convocavit. Iohannes Paulus II habebatur  charismaticus sed conservativus. Uterque post mortem miracula fecerat: Iohannes Paulus II duas feminas sanaverat, Iohannes XXIII unam.

Nationes Russiae confines sollicitantur

Propter  discrimen Ucrainae  nationes Russiae confines pro securitate sua sollicitantur. Radoslav Sikorski, minister a rebus exteris Poloniae, dixit Polonos propter sanctiones Russiae impositas plus laborare quam aliae nationes Unionis Europaeae, quia magnam cum Russia permutationem mercium haberent. Neque tamen optionem videt, si copiae Russorum Ucrainam invaserint. Sikorski sperat fore, ut NATO permanentem stationem militarem in Polonia collocet. In Poloniam quidem milites Americani ad exercitia militaria venerunt, sed stationes NATOnis perpetuae ibi non sunt. Etiam in terras Balticas,  scilicet in Lettoniam, Lituaniam Estoniamque greges militum Americanorum venerunt, ubi exercitia per totum annum pergerent. Confoederatio Atlantica etiam numerum aeroplanorum insectatoriorum auxit, quae spatium aerium Baltiae custodirent, et decrevit, ut classem quattuor navium in Mare Balticum mitteret. Americani (USA) nuntiaverunt copiis mittendis sibi propositum esse, ut praesentiam suam in illa regione augerent et animos sociorum sodaliumque NATOnis tranquillarent.

Praefecti militum Russiam suspectam habent

Mense Aprili praefecti militum Finnorum de politica securitatis per cursum electronicum interrogati sunt. Responsa sine nomine data sunt. Paene dimidia pars sive quadraginta septem centesimae (47%) ex illis, qui interrogati erant, responderunt. Ex responsis patet praefectos magnam de propositis Russiae suspicionem habere. Censebant  politicam Russiae, postquam Vladimir Putin praesidens denuo creatus esset, factam esse infestiorem. In universum Russia a militibus terra importuna et proterva describebatur, quae suo commodo, si opus esset, etiam vi militari  serviret. Nimiam credulitatem cavendam esse neque Russiam mensuris occidentalibus esse mensurandam.

Tuomo Pekkanen

25.4.14

Calamitas aeria in Jämijärvi

Die Dominico (20.4.) in Jämijärvi, quae est paroechia Finnica, calamitas aeria funestissima accidit. Aeroplanum parvum, quo decem saltatores decidui vehebantur, in terram decidit, quo factum est, ut octo homines, in quibus duae feminae, mortem occumberent. Magister autem aeronavis et duo insessores vitam servarunt. Quae fuerit causa illius mali, nondum constat. 

(Reijo Pitkäranta)

Quid Vladimir Putin dixerit

Vladimir Putin, praesidens Russiae, nihil impedire censuit, quin necessitudines inter Russiam et terras occidentales intercedentes ad pristinum statum restitui possent. Eam autem rem in solis Russis non positam esse, sed etiam aliis suum esse faciendum. Addidit se praesidem Consociationis Atlanticae designatum Jens Stoltenberg bene novisse et amice de eo cogitare.

(Reijo Pitkäranta)

Joe Biden Ucrainam visitavit

Joe Biden, vicepraesidens Civitatum Americae Unitarum, Ucrainis opitulationem quinquaginta milionum dollariorum pollicitus est. Russos autem severe monuit, ut copias suas ex confinio Ucrainae reducerent neve separatistis Ucrainae orientalis auxilium ferrent. Ait tempus eorum iam deficere ad discrimen Ucrainae solvendum.

(Reijo Pitkäranta)

Berlusconi fraudis damnatus

Silvio Berlusconi, pristinus princeps minister Italiae, propter fraudem tributariam labore publico unius anni damnatus est. Poenam ita luet, ut saltem semel in septimana in aliquo gerontocomio opus faciat.  Ad animadversionem eius id accessit, quod sedem in camera superiore parlamenti Italiae amisit et ius eius itinerandi circumscriptum est.  

(Satu Tuominen)

García Márquez vita decessit

Gabriel García Márquez, scriptor Columbianus, postquam aliquamdiu aegrotavit, die septimo decimo huius mensis (17.4.) de vita decessit. Laudem litterariam cum multis operibus tum eo, quae ‘Solitudo centum annorum’ inscribitur, sibi conciliavit. Merita eius tanti aestimabantur, ut ei anno millesimo nongentesimo octogesimo secundo (1982) praemium Nobelianum litteraturae concederetur.

(Reijo Pitkäranta)

De reliquiis Sancti Erici

Scrinium, in quo reliquiae Sancti Erici, regis olim Suetiae, asservantur, die Mercurii (23.4.) in ecclesia cathedrali Upsaliensi apertum est. Ossibus perscrutandis investigatores cognoscere volunt, utrum multae fabulae vitae et morti eius intextae fundo careant necne.

(Reijo Pitkäranta)

Ver in Finnia praematurum

Ver in Finnia hoc anno tam maturum fuit, ut agricolae duabus fere septimanis prius, quam fieri solet, in arvis operari inciperent. Neque hoc illis contigisset, nisi terra mire quam sicca machinas tractorias iam bene sustineret. Qui agris colendis operam dant, sperant fore, ut dies proximi calidiores fiant et postea imbres pluvii sationes vernas opportune irrigent.

(Reijo Pitkäranta)

18.4.2014

Inter discrimen Ucrainae apud Finnos disceptari coeptum est, an patriae opportunum esset membrum Confoederationis Atlanticae fieri. Martti Ahtisaari, pristinus Finniae praesidens praemio pacis Nobeliano ornatus, vult, ut Finnia una cum Suetia ad Natonem adiungatur, neque tamen  in condicionibus hodiernis sed inter regimina sequentia.

De hac re autem non tantum propter minas Russiae decernendum esse, sed quia sodalitate forsitan futurum sit, ut investiones in Finnia et fiducia erga Finnos augescant. Opinio praesidentis pristini  iam multos annos nota est.

Primus minister Jyrki Katainen censet sodalitatem Finniae profuturam esse. Sed affirmat hanc esse tantum suam opinionem neque regimen hodiernum sodalitatem NATOnis petiturum esse.

Erkki Tuomioja, minister a rebus exteris, dicit sufficere, quod Finnia sit in Unione Europaea,  sustineat politicam Europae externam et securitatis, cooperetur cum terris septentrionalibus atque cum NATOne  a pace sodalitatem habeat. Jutta Urpilainen, praeses factionis socio-democraticae, scribit statum rerum hodiernum flagitare, ut de Russia respectu tam politicae externae quam oeconomiae penitus disceptetur.

Relationes cum Russia oeconomicas Finnis magnam esse facultatem. Itemque magni esse in politica Finniae externa democratiam, iura humana, evolutionem durabilem defendere.

Papa excusationem abusus puerorum petivit

Papa Franciscus excusationem petivit damni, quod aliquot sacerdotes catholici, numero satis multi,  minorennibus  sexualiter abusi fecissent. Dixit ecclesiam consciam esse huius damni, quod esset personale et morale. Affirmavit problema tractari et sanctiones dari. “Debemus esse fortissimi”, inquit Papa. Et addidit: “Cum agitur de pueris, non iocamur.” 

Hollande minima apud populum gratia

Ex demoscopia proxime facta praesidens Francois Hollande minima apud Francos gratia valet. Tantum duodeviginti centesimae (18%) respondentium praesidentem sustinent, quod clarissime ostendit cives praesidentis pertaedere. At Manuel Valls, minister primarius nuper nominatus, a duodesexaginta  centesimis (58%) civium comprobatur.

Russophili in Ucraina orientali contumaces

In Ucraina orientali greges Russophilorum curias complurium urbium occupaverunt neque inducuntur, ut exeant, etsi regimen Kioviae illis impetum armatum saepius minitatus est.  Sunt in illis gregibus homines modo militum Russorum vestiti et armis Russicis praediti, ex quo suspicio orta est eos non sine auctoritate Russiae operari. Res a Russophilis gestae sunt regimini Kioviae intolerabiles, sed impetus contra eos efficere possit, ut bellum civile oriatur. Praeterea Russiae fictam causam det copias in Ucrainam mittendi, quae securitatem et iura Russorum tueantur, ex quo sequatur, ut Russia, sicut Crimaeam, etiam Ucrainam orientalem occupet.

(Tuomo Pekkanen)

11.4.2014

Quid Jyrki Katainen fecerit

Jyrki Katainen, princeps minister Finniae se mense Iunio a re publica administranda recessurum esse nuntiavit. Quae cum ita sint, iam quaeritur, num in Finnia comitia parlamentaria ante tempus instituenda sint. Katainen, cum ad maiores honores se provehi velit, sperat fore, ut sibi facultas munera internationalia apud Unionem Europaeam gerendi detur.

(Reijo Pitkäranta)

Tumultus Ucrainae orientalis

Die Lunae (7.4.) discrimen in Ucraina ortum in peius mutatum est. Tum enim aliquot homines seditiosi rerum Russicarum studentes nonnulla aedificia administrativa in Ucraina orientali occupaverunt et  illam regionem sui iuris esse renuntiaverunt. Arseni Jatsenjuk, princeps minister Ucrainae, Russos de illis tumultibus conflatis accusat.

(Reijo Pitkäranta)

Merces Americanae in Iraniam

In Civitatibus Americae Unitis primum post triginta annos accidit, ut aliquae merces in Iraniam exportari sinerentur. Haec licentia iis societatibus aeriis concessa est, quae Iranianis partes aeroplanorum subsidiarias ad securitatem volandi necessarias suppeditant. Quod consilium captum est, cum regimini Americano placuisset sanctiones Iraniae impositas aliquatenus remittere.

(Reijo Pitkäranta)

Elisabeth papam convenit

Elisabeth II, regina Britanniae, itinere Romam cum coniuge suscepto papam Franciscum in Civitate Vaticana convenit idque arbitris remotis et omni pompa detracta. Pontifex Romanus ab illa muneri accepit corbem iis cibis delicatis repletum, quos praedia domus regiae propria ferunt. In donis erat lagoena vischii in Balmoralia confecti.

(Reijo Pitkäranta)

Morbus bananae exitiosus

Morbus quidam plantarum bananis colendis in toto orbe imminet, ut referunt acta diurna Britannica ‘The Independent’. Quae mycosis perniciosissima, postquam sationes bananae in Asia Meridiana vastavit, iam in Mozambicum, Iordaniam Americamque Latinam diffusa esse videtur. Periculum eo gravius est, quod banana quadringentis fere milionibus hominum cibum praecipuum praebet.

(Reijo Pitkäranta)

De re viaria Portugalliae

Res viaria oeconomiae  Portugalliae recreandae multum prodest. Anno praeterito (2013) amplius quattuordecim miliones viatorum in deversoriis Portugallicis pernoctaverunt. Periegetae, quorum maior pars erant Britanni, Germani, Hispani,  plus novem miliarda euronum in terram attulerunt. Portugalli sperant oeconomiam publicam mense Maio satis confirmatum iri, ut auxilio Unionis Europaeae finis fiat.

(Saara Honkanen)

Progressus civium socialis

In comparatione, qua investigabatur, qualis esset progressus civium socialis in centum quinquaginta duabus civitatibus, Nova Zelandia primo loco posita est. Omnes terrae septentrionales, in iis Finnia, in decem primis numerantur.  Respiciebantur variae res, quae ad fortunam et ad condiciones vivendi civium pertinent.

(Reijo Pitkäranta)

4.4.14

John Kerry minister a rebus exteris Americanorum et Sergei Lavrov, collega eius Russus, Parisiis die Dominico (30.3.) convenerunt, ut de Ucraina colloquerentur, sed concordiam non invenerunt. Consentiebant tamen solutionem diplomaticam esse necessariam. Lavrov dixit etiam de regimine Ucrainae ad colloquia  advocando inter utrosque constitisse. De causis discriminis Ucrainae USA et Russia dissentiunt. Kerry narravit se ministro Lavrov affirmavisse Americanos res a Russis in Crimaea gestas illegales habere. Praeterea Americanos velle, ut Russia copias suas a confinio Ucrainae deduceret. Colloquia ministrorum plus quattuor horas duraverunt.

Tartari Crimaeae autonomiam volunt

Tartari Crimaeenses populo suo autonomiam ethnicam et regionalem sub novo regimine Russico volunt. Duces eorum die Sabbati (29.3.) in urbe Bahtisair convenerunt, ut de ea re sententiam dicerent. Conventui placuit, ut exploraretur, an autonomia fieri posset. Dux eorum Refat Tubarov censebat tempus esse historicum, quo de futuro nationis consilia caperentur.

Papa Franciscus mafiae infernum minitatur

Papa Franciscus mafiosos monuit eos in infernum ituros esse, nisi malum facere desissent. Petivit, ut paenitentiam agerent. “Est adhuc tempus”, inquit, “evitare, ne in infernum cadatis, quod vos exspectat, si in via mala ire pergetis. Haec vita, quam nunc vivitis, vobis gaudium aut felicitatem dare non potest.”

Matrimonium cordi prodest 

Ex investigatione Americana hominibus in matrimonio viventibus  minus periculum est in morbos cardiovasculares incidendi quam caelibibus, divortio digressis viduisque. Causa est, quod uxor et maritus de valetudine inter se solliciti sunt et vident, ut coniux salubres cibos sumat, corpus curet, medicum in tempore consulat. Divortium autem auget fumificationem, obesitatem, pressionem sanguinis, diabeten. Relatio inter matrimonium et bonam valetudinem clarissima est hominibus minus quinquaginta annorum. Investigationi  in Universitate Neo-Eboracensi (New York) factae intererant  plus quam quindecies centena milia (3,5 miliones) hominum  ex quinquaginta civitatibus Americae septentrionalis.

De intellegentia cornicis

Cornix Novae Caledoniae est nigra avis quadraginta centimetrorum, quae in duabus insulis Novae Caledoniae in Oceano Pacifico vivit. Antiquitus  notum erat cornicem esse intellegentem, sed investigatio in Universitate Aucklandiensi nuper facta ostendit illam speciem conclusiones tam bene facere quam puer quinque-septem annorum. Scit instrumenta adhibere, ut spinas aut surculos, quibus  cibum ex rimis angustis extrahit. Intellegit duras nuces in viam portandas esse, ut vehicula eas frangant. Cum cibus positus esset in hyalo aqua pleno, cornices cito reppererunt res graves in aqua demittendas esse, ut cibum capere possent.

(Tuomo Pekkanen)

28.3.14

Obama in Europam venit

Barack Obama, praesidens Civitatum Americae Unitarum, iter Europaeum quadriduanum suscepit, inter quod conventui de securitate nucleari in urbe Haga acto interfuit. Oratione habita ait Chersonesum ad Russiam adiunctam rem nondum finitam esse. Communitatem internationalem ad concordiam et ad constantiam hortatus est, ne Russiae occasio daretur alias quoque regiones Ucrainae occupandi.

(Reijo Pitkäranta)

Quid Niinistö dixerit

Praesidens Finniae Sauli Niinistö etiam posthac praesidentem Russiae Vladimir Putin conventurus est, dummodo talia colloquia commodis Finnorum inserviant. Unio Europaea quidem civitates socias monuit, ut a conventibus cum Russis separatim habendis abstinerent. Censuit tamen Niinistö Finnis moris fuisse consuetudine Russorum uti ad incolumitatem suam servandam.

(Reijo Pitkäranta)

De regimine Finniae

Die Martis vesperi (25.3.) coalitio regiminis Finniae e sex factionibus constans dissoluta est, cum ministri Foederis sinistri munus deponere decreverunt. Causa gravissima, cur a re publica administranda recederent, dicitur fuisse, quod condiciones vitae pauperum novis consiliis a regimine captis miseriores fieri viderentur.

(Reijo Pitkäranta)

Aeroplanum Malaesianum

Aeroplanum Malaesianum, de cuius sorte  amplius duabus septimanis nihil certi constabat, in Oceanum Indicum praecipitatum est. In his enim aquis aliquot fragmenta eius fluitantia reperta sunt. De ea re Najib Razak, princeps minister Malaesiae, die Lunae (24.3.) publice nuntiavit.  Calamitate accidente aeroplanum multa milia chiliometrorum a cursu suo usitato afuisse videtur.

(Reijo Pitkäranta)

Virus Ebola in Guinea

In Guinea, quae in Africa occidentali sita est, febris epidemica funestissima grassari coepit, cuius causa et origo virus Ebola esse dicitur. Hoc morbo, qui eo terribilior est, quod adhuc remedio omnino caret, iam sexaginta fere homines mortui sunt. Signa eius principalia sunt diarrhoea, nausea, profluvium sanguinis.

(Reijo Pitkäranta)

Cives sermonis peregrini

Numerus in Finnia eorum, qui lingua peregrina, id est alia atque lingua Finnica, Suetica aut Lapponica utuntur, mox numero civium Suetice loquentium maior erit. Anno praeterito exeunte in Finnia circiter trecenta milia eorum erant, quorum sermo patrius lingua Suetica est. Numerus autem hominum sermonis peregrini paene duobus milibus minor erat.

(Satu Tuominen)

Kaisa Mäkäräinen victrix

Kaisa Mäkäräinen, femina Finlandensis unum et triginta annos nata, in eo certandi genere, quod biathlon dicitur, hac hieme ceteris competitricibus praestantiorem se praebuit. Namque ex viginti duobus certaminibus internationalibus omnino octingenta sexaginta (860) puncta tulit, cum Tora Berger, femina Norvegiensis, quattuor punctis victrice inferior esset.

(Reijo Pitkäranta)

21.3.14

Russiam se ex communitate internationali seclusisse

Angela Merkel, cancellaria foederalis Germaniae, dixit Russiam se ex communitate internationali seclusisse, cum suffragium populi Crimaeensis agnosceret, quamquam communitas internationalis id  damnavisset. In Consilio securitatis Nationum Unitarum tredecim terrae suffragium illegale habebant, Sinenses recusaverunt, quominus sententiam darent.  Russia iure vetandi clausulam Consilii rescidit.

Sanctiones Russis impositae

Die Lunae (17.3.) Unio Europaea uni et viginti  magistratibus Russis et  Crimaeensibus propter res in Crimaea gestas sanctiones posuit. Opes, quas in occidente haberent, congelavit, ne eis uti possent, et itinera in terras occidentales illis interdixit. Sanctiones etiam ab USA, Iaponia Canadaque positae sunt. Fumio Kishida, minister a rebus exteris Iaponiae, nuntiavit consultationes de syngrapho viso Russis dando et colloquia  de rebus militaribus et spatialibus revocatum iri. Canada, sicut USA, magistratibus, qui de mutatione rerum Crimaeensium responsales essent, itinera interdicendo et opes congelando similes sanctiones posuit. Neque USA negavit illas postea etiam ad praesidentem Putin extendi posse. Praesidens Barack Obama, iam die Dominico (16.3.) cum Praesidente Putin  collocutus monuit Russiam supremitatem et integritatem regionalem Ucrainae violavisse, sed adhuc fieri posse, ut crisis Crimaeensis diplomatice solveretur.

Russos opes suas ex terris occidentalibus detrahere

Financial Times, commentarium de oeconomia periodicum, rettulit domos argentarias et magnas societates mercatorias Russorum opes suas praesertim ex USA detrahere coepisse. Valores bursarios societatum Russicarum hoc anno iam viginti centesimas descendisse et decem ditissimos oligarchos una septimana plus quam sex miliarda dollarorum ex valore possessionum suarum amisisse.

De Crimaea ad Russiam adiungenda    

Duma sive parlamentum Russiae die Martis (18.3.) de Crimaea  et urbe Sebastopoli ad Foederationem Russiae adiungendis egit. Primum praesidens Putin delegatis de petitione utriusque nuntiavit. Crimaeam ad Foederationem ita, ut statum rei publicae haberet, adiungi velle; Sebastopolim autem, ut urbs Foederationis cum statu speciali fieret.  Oratione admodum contumaci Putin affirmavit suffragium populi in Crimaea democratice et secundum ius gentium factum esse. Crimaeam fuisse et semper fore inseparabilem partem Russiae. Novos Ucrainae moderatores rerum potitos esse, in culpa esse etiam nationes occidentales, quae reclamatores incitavissent.

USA foederatos suos defendet

Joe Biden, vicepraesidens Americanorum, die Mercurii (19.3.) Russiam monuit Americanos ad foederatos suos defendendos plenissime obligatos esse. Americanos una cum terris Balticis Ucrainam contra aggressionem Russiae fulcire et sustinere. “Russia effugere non potest”, inquit Biden, “quod mundus mutatur et res ab illa gestas non probat.”

(Tuomo Pekkanen)

Nuntiis ita finitis gratias auscultatoribus agimus et valedicimus.

Verba in situ Finnica posita neque tamen in recitatione impressa inclusa: Concordia res parvae crescunt, discordia maximae dilabuntur. – Silent leges inter arma. – Melior certa pax quam sperata victoria.- Piscis magnus minutos comedit. – Sat sapienti.

14.3.14

Gravissima calamitas aeria

Die Saturni (8.3.) aeroplanum viatorium societatis Malaesianae, quod Cuala Lumpuria profectum Pekinum versus volabat, ex inopinato in mare praecipitatum est. Creditur omnes viatores, qui ducenti undequadraginta erant, eo malo vitam amisisse. Quae fuerit causa calamitatis, nondum constat, sed magistratus internationales inquirere coeperunt, num de scelere terroristico ageretur.

(Reijo Pitkäranta)

Suffragium populi Chersonesi

Parlamentum Chersonesi Tauricae regionale decrevit, ut Chersonesus ab Ucraina separaretur et Russiae adiungeretur. Suffragium populi de ea re proximo die Dominico habebitur. Olexander Turtshinov, qui munere praesidentis Ucrainae fungitur, illa comitia pro fraude habet dicens eventum eorum Moscuae iam statutum esse.

(Reijo Pitkäranta)

Colloquia primorum civitatum

Multi primores civitatum per colloquia telephonica deliberaverunt, quonam modo discrimen Ucrainae solveretur. Septimana vergente praesidens Russiae Vladimir Putin cum Angela Merkel et principe ministro Britanniae David Cameron collocutus est. Xi Jingping, praesidens Sinarum, cum collegam Americanum Barack Obama in consilium adhiberet, omnes partes ad temperantiam hortatus est.

(Reijo Pitkäranta)

Ab Americanis gasum petitur

Quattuor civitates, scilicet Tzekia, Polonia, Slovakia, Hungaria, ab Americanis petiverunt, ut exportationem gasi in Europam augerent. Si id fecissent, Europaeos in ea re dominationi Russorum non iam subiectos fore. Legati illarum terrarum litteris ad praesidem camerae delegatorum scriptis monuerunt energiam ad securitatem civitatum suarum praestandam multum conferre.

(Reijo Pitkäranta)

Reclamationes in Venetiola

Iam plus mensis est, cum in Venetiola vehementer reclamatur. Animi enim civium commoti sunt penuria alimentorum, delictis usque commissis, inflatione monetali. Septimana exeunte incolae, quorum maior pars feminae erant, magna multitudine in vias et plateas urbis Caracarum congregati sunt, ut lebetibus concussis iram et indignationem in moderatores civitatis ostenderent.

(Reijo Pitkäranta)

Sinae pollutionibus laborant

Li Kequiang, princeps minister Sinarum, dum in congressu populari verba facit, Sinenses bellum pollutionibus aeriis illaturos  esse dixit. Multae Sinarum partes inquinamentis iam tantopere laborant, ut salus publica in discrimen vocata sit. Sordes aeriae et cives irritant et administratores civitatis sollicitos reddunt. 

(Reijo Pitkäranta)

Res iudiciariae comparatae

Finnia ex nonaginta novem civitatibus quarto loco posita est, cum investigaretur, ubinam gentium res iudiciariae optime institutae essent. In illa comparatione a iuris consultis Americanis facta respiciebatur, quam aperte res cuiusque nationis administrarentur, quousque iura fundamentalia ubique ad effectum perducta essent, quo modo leges civibus praesidium darent, quantas partes corruptio in vita publica ageret.

(Reijo Pitkäranta)

7.3.14

Discrimen in Ucraina non remittit

Camerae superiori parlamenti Russiae placuit, ut copiae Russorum armatae ad stationem classis Russiae civesque Russos in Ucraina tutandos adhiberentur. Quo facto Arseni Jatsenjuk, novus minister primarius Ucrainae, censuit Russiam Ucrainae bellum indixisse. Tum Ucraini exercitus et copias subsidiarias convocare coeperunt, ut ad bellum parati essent. Tamen regimen Ucrainae repetebat se conflictum militarem non desiderare. Cremlinum autem nuntiavit praesidentem Vladimirum Putin de vi militari in Ucraina ilico adhibenda non decrevisse. Discrimine gravescente Ucraina ab Unione Europaea, USA, confoederatione Natone auxilium petivit. 

Occidentales res a Russia gestas  damnant

Moderatores occidentales  vim militarem damnant, qua Russia Ucrainae minitatur . Barack Obama, praesidens Americanorum, monuit legibus internationalibus a Russia violatis effectum iri, ut Russia et politice et oeconomice secluderetur.  John Kerry, minister a rebus exteris Americanorum, dixit Russiam agere, velut si adhuc duodevicesimo saeculo viveremus. Praesidens Finniae Sauli Niinistö censebat Russiam, cum bellum Ucrainae ostentaret,  res contra ius gentium gerere. Urgebat maximi esse, ut colloquia inter Unionem Europaeam et Russiam continuarentur. Finnis quidem nullam esse causam sollicitudinis, sed omnes partes ad temperantiam hortandas esse.

Bursa Moscuae et rublus deruunt

Propter crisim Ucrainae forum argentarium Moscuense et valor rubli deruerunt. Die Lunae (3.3.) bursa plus decem centesimas Moscuae descendit et unus euro plus quinquaginta rublis constabat. Causa est, quod investitores peregrini pecunias ex Russia detrahunt, cum Russiae in Ucrainam operationes in mercatu internationali non comprobentur. Vilior rublus oeconomiam Finniae multimodis afficit.  Exportatio  in Russiam deminuitur et multae societates mercatoriae et industriales, quae cum Russia negotia gerunt, damna capiunt.  Itinera, quae Russi in Finniam orientalem ad varias merces emendas facere solent, fiunt cariora ideoque rariora.

Putin: ”Bellum contra Ucrainam gerere nolumus”

Die Martis (4.3.) praesidens Vladimir Putin diurnariis convocatis affirmabat Russiam contra populum Ucrainae bellum gerere nolle neque propositum habere, ut Paeninsulam Tauricam Russiae adiungeret. Res militares esse tamen possibiles sed interim non necessarias. Censebat conversionem rerum in Ucraina contra legem fundamentalem factam esse. Concedebat quidem corruptionem in Ucraina culmen periculosum attigisse et Victorem Janukovits in politica posthac nihil valere. Sed monuit praesidentem suffragiis electum ex munere removere legibus contrarium esse. Interrogatus Putin respondit nullum in Ucraina hoc tempore esse praesidentem, unde patet Alexandrum Turtsinov, praesidentem ad interim, ab eo non agnosci.

Tuomo Pekkanen

28.2.2014

Rerum in Ucraina eversio

Res in Ucraina eversae sunt, cum praesidens Victor Janukovitsh die Saturni (22.2.) iussu parlamenti a magistratu amotus est. Eodem tempore convenit, ut comitia novo praesidenti eligendo die vicesimo quinto mensis Maii (25.5.) haberentur. Paulo post Janukovitsh, cui e domo sua privata in locum ignotum fugere contigit, a magistratibus comprehendi iussus est de strage suorum civium accusatus. 

(Reijo Pitkäranta)

Quid Medvedev dixerit

Dmitri Medvedev, princeps minister Russiae, in dubium vocavit, num regimen hodiernum Ucrainae legitimum haberi posset. “Moderatores Ucrainae”, inquit, “per seditionem  armatorum ex sua sede demoti sunt. Unio Europaea, si istos novos primores civitatis approbaverit, de via sanae rationis decedet.” Idem censuit ea, quae Kioviae accidissent, rebus Russis in Ucraina detrimento esse.

(Reijo Pitkäranta)

Reclamationes Reikiavicenses

In urbe Reikiavico vehementer reclamatum est multis milibus hominum postulantibus, ut de Islandia cum Unione Europaea coniungenda suffragium populi institueretur. Vulgus enim graviter tulit, quod regimen populo non audito colloquia de ea societate acta interruperat.

(Reijo Pitkäranta)

Ministerium Civitatis Vaticanae

Papa Franciscus nuntiavit in Civitate Vaticana collegium oeconomicum conditum iri, quod idem fere valeret ac ministerium aerarii publici. Munus eius erit diligenter custodire, ut opes fortunaeque eiusdem civitatis probe administrentur. Consilio, quod ex octo sacerdotibus et septem laicis rerum peritis constabit, praeerit George Pell, cardinalis Australianus.

(Reijo Pitkäranta)

Milites e Finnia in Africam

E Finnia maxime triginta milites paci tuendae in Rem publicam Africae Mediae mittentur, qui ibidem sex menses manebunt. Agitur de consilio internationali, quod eo tendit, ut auxilium humanitarium ad cives Africae Mediae expedite perveniat et res in illa terra multis pugnis perturbata paulatim sedentur.

(Reijo Pitkäranta)

De memoria Caroli Magni

Mense Ianuario exeunte mille ducenti anni acti erant, cum Carolus Magnus, imperator Europae occidentalis, Aquisgrani (Aachen) mortuus est. Sarcophagus aureus, ubi ossa eius condita sunt, in ecclesia cathedrali Aquisgranensi asservatur. Osteologi, cum has reliquias per viginti sex annos exploravissent, affirmaverunt veri simillimum esse, ut corpus Caroli Magni esset.

(Reijo Pitkäranta)

Mensis Februarius mitissimus

Mensis Februarius in Finnia hoc anno tam tepidus fuit, ut quaedam aves migratoriae iam e plagis meridianis domum redire inciperent. In numero earum sunt alaudae, columbae, vanelli, ut ornithophili caelum observantes rettulerunt. Sunt, qui dicant mensem Februarium aeque mitem Finniae nonnisi tricesimo quoque anno obtingere.

(Reijo Pitkäranta)

21.2.14

Rerum in Ucraina condicio

Tumultus Kioviae, in urbe Ucrainae, orti eo saevitiae progressi sunt, ut saltem quinquaginta homines iis vitam amitterent et amplius ducenti vulnerarentur. Testes oculati urbem in locum pugnae fere mutatam esse referunt. Ira plebis regimini adversantis denuo inflammata est, cum parlamentum recusavisset, quominus potestatem praesidentis Janukovytsh coerceret.

Reijo Pitkäranta

Quid Sauli Niinistö dixerit

Praesidens Finniae Sauli Niinistö sententiam de rerum in Ucraina condicione aperuit dicens violentiam, quae ibi saeviret, animos omnium Europaeorum commovere. Quo modo illud discrimen solveretur, in manu praesidentis Janukovytsh et ministrorum eius positum esse. Neque credit sanctiones, quas Unio Europaea Ucrainae minitetur, ad concordiam civitatis profuturas esse.

Reijo Pitkäranta

Conventus utriusque Coreae

Legati Coreae Septentrionalis et Meridianae primum post septem annos conventum egerunt, ut de relationibus mutuis consilia communicarent. In colloquiis consensum est, ut familiae bello Coreano separatae certis diebus mensis Februarii inter se videre sinerentur.  Partes de ea quoque re concordiam invenerunt, ne in orationibus publicis altera alteram iam probris insectarentur neve verbis indecoris uterentur.

Reijo Pitkäranta

Renzi primus minister Italiae

Italia novum regimen accipiet, cui praeerit Matteo Renzi, pristinus praefectus urbis Florentiae  undequadraginta  annos natus.  Hic vir factionis mediae sinistrae in locum principis ministri Enrico Letta succedet. Renzi eum de medio tollendum esse censebat, quod in consiliis capiendis lentior et parum audax fuisset. Ipse se celeres renovationes politicas facturum esse pollicetur.

Reijo Pitkäranta

Estonia et Russia concordes

Estoniae et Russiae contigit, ut controversiam finium per colloquia componerent. Pactum enim limitaneum fecerunt, cui Sergei Lavrov, minister a rebus exteris Russiae, et Urmas Paet, collega eius Estoniensis, Moscuae subscripserunt. Quo documento definitur, quibus locis termini agrorum et marium utriusque civitatis constituantur.

Reijo Pitkäranta

De novis Olympionicis Finniae

Die Mercurii (19.2.) in Olympiis Sotsiensibus  athletae Finni nomisma aureum et argenteum sibi acquisiverunt. In certamine enim alterno binorum scridatorum  Iivo Niskanen et Sami Jauhojärvi victoriam reportaverunt. Paulo ante Aino-Kaisa Saarinen et Kerttu Niskanen in eodem certamine feminarum nomisma argenteum consecutae erant.

Reijo Pitkäranta

Quid Renaud Lavillenie fecerit

Renaud Lavillenie, athleta Francogallus, in saltu perticario novum culmen mundanum sub tecto praestitit. Certamine enim Donetsci, in urbe Ucrainae posito altitudinem sescentorum sedecim centimetrorum (616) superavit. Prior principatus, quem Sergei Bubka, saltator perticarius Russus, uno et viginti annis ante  eodem loco fecerat, centimetro inferior erat.

Reijo Pitkäranta

15.2.14

Helvetii immigrationem circumscribunt

Helvetii  suffragio populi legem sciverunt, qua immigratio civium Unionis Europaeae coerceretur. Numerum clausum immigratoribus imponendum paulo plus quam dimidia pars (50,3%) suffragatorum  probavit. Helvetia non est membrum Unionis Europaeae, sed cum structuris illius multis pactis coniungitur, quae posthac retractari debent. Incolae Helvetiae sunt octo miliones, ex quibus peregrini viginti centesimas faciunt. Singulis annis in Helvetiam etiam octogena milia peregrinorum immigrant, quorum copia scholas, curam valetudinis, commeatumque publicum onerat atque tempore futuro gerontocomia onerabit.

Civitas Vaticana a Nationibus Unitis culpatur

Commissio Nationum Unitarum a Iuribus Pueri (The UN Committee on the Rights of the Child) verbis durissimis Civitatem Vaticanam culpat, quod de abusu minorennium sexuali, quem non impediverit, responsalis sit. Flagitat, ut Civitas Vaticana ilico omnes sacerdotes removeat, qui minorennibus abusi sunt aut de quibus talis est suspicio. Civitas Vaticana sacerdotes paedophilos defendere desinat eosque magistratibus civilibus iudicandos tradat. Ecclesiasticos magistratus sacerdotibus silentium imposuisse, ut eos impedirent, quominus casus abusionis vigilibus publicis deferrent. Praeterea, ad scelera huius generis tegenda, paedophilos sacerdotes ex una paroecia in alteram translatos esse.  Civitas Vaticana respondit ecclesiam ad iura puerorum defendenda se obligavisse.  Promisit Nationibus Unitis relationem de accuratissima inquisitione datum iri. Papa Franciscus paedophiliam ignominiam ecclesiae appellavit et iuravit se vestigia Benedicti XVI, praedecessoris sui, secuturum esse. Hic duobus annis quadringentos sacerdotes ex sacerdotio removit.

Cameron Scotos appellavit

David Cameron, primus  minister Britannorum, Scotos appellavit, ne in suffragio populi mense Septembri futuro pro independentia sententiam ferrent. Oratione nuper (7.2.) Londinii habita monuit multitudinem sexaginta trium milionum fortiorem esse, quippe quae oeconomiam apertam et mercatum in orbe terrarum vetustissimum et prosperrimum haberet. Si suffragatores separationi faverint, Scotia mense Martio anni bis millesimi sexti decimi (2016) fiet independens. Qui separationem volunt, Londinium accusant, quod oeconomiam Scotiae male curavit. Sperant fore, ut per independentiam novae facultates inveniantur, quibus occupatio et oeconomia augeantur atque iustitia socialis efficiatur.

Enni Rukajärvi nomisma argenteum cepit

In Olympiis Sotsiensibus primum Finnis nomisma reportavit Enni Rukajärvi, femina viginti trium annorum, quae in descensu per clivum artificioso (slopestyle) secundum locum obtinuit. Illa iam ante tres annos (2011) in hoc genere athletico magistra mundi facta est. Ceteris Finnorum athletis ludi Sotsienses mediocriter cesserunt.

(Tuomo Pekkanen)

7.2.14

Olymia hiemalia Ssotsiensia

Olympia hiemalia Sotsiensia hodie (7.2.) inaugurantur. Ludis intersunt duo milia octingenti octoginta quinque (2885) athletae ex octoginta quinque nationibus oriundi. Totidem fere sunt curatores eorum. Ludis instituendis et disponendis viginti quinque milia voluntariorum adsunt.

Securitati provident plus septuaginta milia vigilum vel militum. Ludi Sotsienses, quorum sumptus duodequadraginta miliardis euronum aestimantur, ex omnibus Olympiis hiemalibus hucusque celebratis  carissima sunt. Urbs ad ludos celebrandos inter sex annos renovata et reconstructa est.

In regionibus circumiacentibus novae viae stratae sunt, deversoria, vici, arenae stadiaque aedificata. Ad opera perficienda septuaginta milia operariorum conducti erant. Desultura aliaque certamina scridatoria et decursus sclodiae fiunt in Krasnaja Polnaja, in monte Caucaso sita, quae a litore quinquaginta chiliometra distat.

Commeatus inter Sotsim et Krasnajam Polnajam fit nova strata autocinetica et ferrivia, quae sex miliardis euronum constiterunt.

In Francia pro familia manifestationes

In urbibus Francorum die Dominico (2.2.) cives pro dignitate familiae translaticia  manifestaverunt. Parisiis et Lugduni circiter centum milia hominum in viis contra procreationem medicaliter  adiutam (PMA) et gestationem fetus pro alia (GPA) assumptam reclamitantes regimen accusaverunt, quod translaticiam familiae dignitatem reiecisset.

Italia diluviiis vexatur

Italia pessimis post multa decennia diluviis vexatur. Gravissima est condicio rerum in partibus terrae mediis et in septentrionem-orientem vergentibus. Flumen Tiberis minaciter ascendit et in urbe Roma septentrionali commeatus perturbatus est. In multis Italiae partibus ripae fluminum aquae cesserunt et imbres continui labinas terrae effecerunt.

Piscator XIV menses fluctibus iactatus

Piscator Salvatorianus Jose Salvador Albarengo quattuordecim menses in Oceano Pacifico iactabatur, donec ad insulas Marsallenses appulsus salvatus est. Cum comite iuniore ex Mexico piscatum navigio ex fibra vitrea facto profectus erat, cuius motrum, mense Decembri anno bis millesimo duodecimo ruptum, reparari non poterat. Comes sole implacabiliter  ardente perierat. Albarengo aquam pluvialem et sanguinem testudinum bibendo atque aves maritimas piscesque crudos edendo vitam sustinebat. Denique barbatus et tantum laceras bracas indutus in scopulum corallorum atolli  Ebon venit, unde in insulas Marsallenses portatus est.

Ante LXX annos Helsinki bombis verberata

Hodie (7.2.) septuaginta anni acti sunt ex nocte, qua exercitus aerius Unionis Sovieticae iussu Stalini  Helsinkium magna vi aggressus est. Etsi plus centum cives Helsinkienses tum mortui sunt, defensio urbis aeria hostes ita devertit, ut tantum quinque centesimae bombarum in ipsam urbem deciderent.

(Tuomo Pekkanen)

31.1.14

Colloquia de pace inierunt

Ordini Nationum Unitarum efficere contigit, ut partes Syriae belligerantes Genavam de pace inter se concilianda convenirent. Colloquia tamen minus prospere successerunt, ut vel inde apparet, quod ne ea quidem quaestio, quonam modo auxilium humanitarium in urbem Emesam perferretur, iam solvi potuit.

(Reijo Pitkäranta)

Rerum in Ucraina condicio

Die Martis (28.1.), cum parlamentum Ucrainae ad sessionem convenisset, Mykola Azarov, princeps minister civitatis, se magistratu abdicare nuntiavit. Dixit se hoc consilium ideo fecisse, ut discrimen politicum, in quo res publica iam duos menses versaretur, cum pace amoveretur. Paulo post totum regimen Ucrainae munus deposuit.

(Reijo Pitkäranta)

De obsidione Leninopolis

Die Lunae (27.1.) septuaginta anni acti erant, cum urbs Petropolis, quae non ita pridem Leninopolis appellabatur, obsidione Germanorum liberata est. Constat eam per octingentos septuaginta duos dies ab hostibus circumsessam esse ibique interea saltem sescenta quinquaginta milia hominum vitam amisisse. Memoria obsessionis amplis sollemnitatibus, quibus etiam praesidens Vladimir Putin intererat, Petropoli recolebatur. 

(Reijo Pitkäranta)

Norvegia incendiis vexata

Norvegia intra breve tempus compluribus incendiis terrestribus exitiosis afflicta est. Duo vici litorales in parte septentrionali urbis Trondheim siti omnino deleti sunt incendio, quod in illa regione die Lunae (27.1.) vesperi saevire coepit. Nonaginta fere domus combustae sunt, sed nemo incolarum interfectus est. Area igne absumpta circuitu ad quindecim chiliometra quadrata patet.

(Reijo Pitkäranta)

Quid Obama Russis promiserit

Barack Obama, praesidens Civitatum Americae Unitarum, auxilium omnis generis Russiae offert, ut  Olympia hiemalia, quae mense Februario in urbe Sotsi fient, tutissime celebrentur. Ludis appropinquantibus Russi actiones securitatis efficaciores reddiderunt, sed Americani dubitant, an illi satis sollertes sint certamina tuta instituendi. 

(Reijo Pitkäranta)

Quid civibus edendum sit

Collegium Finniae a re nutritoria novis praeceptis de alimentis datis civibus suadet, ut usum carnis rubrae et ciborum inde confectorum deminuant neve plus dimidio chiliogrammate carnis singulis septimanis edant. Hortantur rerum periti ad piscem magis atque magis consumendum. Praeterea monent, ut copia oleris, bacae, fructus in victu cotidiano augeatur.

(Reijo Pitkäranta)

Canis vultum hominis agnoscit

Ex investigatione in Universitate Helsinkiensi facta patet canem faciem humanam agnoscere. Motibus oculorum canum observandis investigatores ostenderunt canes et apud familias viventes et in saeptis commorantes pari modo vultus hominum animadvertere et vultus notos diligentius longiusque quam ignotos spectare. Ratione huius rei habita concluserunt canem hominis simillimum esse.

(Saara Honkanen)

24.1.14

Violentia in Ucraina crudescit

Postquam Victor Janukovits, praesidens Ucrainae, pactum de libero commercio et cooperatione cum Unione Europaea faciendum repudiavit, Ucraini contra praesidentem eiusque regimen iam mense Novembri reclamitare coeperunt. Janukovits autem leges perferendas nuper curavit, quibus reclamatores severissime  punirentur. Manifestationibus crudescentibus plus trecenti homines Kioviae vulnerati sunt.

Turcia medicos vetuit, ne reclamatores curarent

In Turcia lex lata est, quae medicos aliosque professionales sanitarios vetat, ne primam opem hominibus in reclamationibus vulneratis ferant. Qui id fecerint, carcere etiam trium annorum aut multa vel septingentorum euronum punientur. Delegatus Nationum Unitarum  et ordines medicorum multarum terrarum illam legem damnaverunt.

Fulmen summum Christi pollicem abstulit

In monte Corcovado urbis Rio de Janeiro est statua Christi Redemptoris, cum basi altitudinis quadraginta metrorum,  quae symbolum Christianitatis et insigne Brasiliae habetur. Nocte Iovis (16.1.) tempestate saeviente fulmen statuam ita percussit, ut summum Christi pollicem auferret. Damnum mense proximo reparabitur.

Vicus Norvegiae incendio vastatus

In vico Laerdalsoeyri Norvegiae occidentalis nocte Sabbati (18.1.) incendium ortum est, quo sedecim domus ligneae multaque alia aedificia deleta sunt. Damna duodecim milionibus euronum aestimantur. Laerdalsoeyri notissimus est veteribus aedificiis ligneis, quae ante incendium centum sexaginta numerabantur. Causa calamitatis est adhuc ignota.

Tramen gregi tarandrorum impactum

In Suecia septentrionali prope vicum Kaitum tramen  in gregem tarandrorum impegit, ex quibus paene quinquaginta mortui sunt. Tarandri tramine conspecto ante id currere coeperunt, sicut in viis ante autoraedas facere solent. Collisio vitari non potuit, nam tramini plus quam chiliometri spatium ad sistendum necesse est.

Aurora borealis Sinenses in Lapponiam allicit

Sinenses his annis frequentius quam ante in Finniam  itinera faciunt. Etsi saepissime Helsinkium aestivum petunt, etiam Lapponia hiemalis eos allicere coepit. Praesertim coniuges iuvenes  et greges feminarum  in Lapponiam veniunt, ut Auroram borealem videant, qua credunt  fecunditatem et spem infantis masculi augeri.

Frigus commeatu vehiculari periculosius

Aer frigidus pressionem sanguinis et laborem cordis auget. Itaque frigora morbis cardiovascularibus laborantibus periculosa esse possunt. Frigoris in mortalitatem effectus ex statistica clarissime apparet, nam funera hieme sunt frequentiora quam mitioribus anni temporibus. In Finnia singulis annis circiter quinquagena hominum milia mortem obeunt. Ex his sex centesimae (6%) sive circiter tria milia  (3000) tempore anni frigidissimo moriuntur. Frigus saluti hominis sine dubio periculosius est quam commeatus vehicularis, nam in calamitatibus vehicularibus  anno proximo tantum ducenti quinquaginta quattuor (254) homines in Finnia mortui sunt.

(Tuomo Pekkanen)

17.1.14

Ariel Sharon mortuus

Ariel Sharon, pristinus princeps minister Israelis octoginta quinque annos natus, die Saturni (11.1.) diem supremum obiit. Is, postquam anno bismillesimo sexto (2006) haemorrhagia cerebri oppressus est, per octo annos in comate iacebat. Sharon, qui socius partium dextrarum nomine Likud erat, comitiis parlamentaribus anno bismillesimo primo (2001) factis regimini Israelis praefectus est.

De rebus Thailandiae

Administratores Thailandiae confirmaverunt comitia parlamentaria ibidem, ut convenerat, postridie Kalendas Februarias (2.2.) institutum iri. Partes oppositae iam duas septimanas regimini acerbissime adversantur flagitantes, ut suffragium in posterius differatur et princeps ministra Yingluck Shinawatra munus deponat.

De armis chemicis

Prima navis oneraria, qua arma chemica e Syria delendi causa deportantur, ex emporio Latakia avecta est. Haec actio maritima internationalis tot et tantis periculis obici existimata est, ut necessarium haberetur ad eam tutandam naves longas ex quattuor civitatibus mittere. Terminus, ad quem Syria omni materia chemica ad bellum gerendum destinata vacuefacta erit, in Nonas Februarias (5.2.) constitutus est.

Niagara gelu concrevit

His septimanis regiones totius Americae Septentrionalis acerrimis frigoribus vexatae sunt. Huius rei testimonium id quoque est, quod Niagara, catarracta illa celeberrima, maximam partem gelu concrevit. Quo factum est, ut non iam aquae praeceps cadentes viatoribus admirationi essent, sed stiriae glaciales ingenti magnitudine et arcus caelestes multicolores in Niagara congelata nati.

Stratum ozonii crevit

Stratum ozonii, quod globum terrae a radiatione ultraviolacea protegit, iam deminui desiit et incrementum capere coepit. Hoc patet ex investigatione a Finnis et Americanis consilio communi facta. Mensurationibus viginti septem annis peractis probatum est illam mutationem ad annum millesimum nongentesimum nonagesimum septimum (1997) factam esse.

Novae animalium species

Investigatores maris profundi species animalium marinorum antea incognitas in Oceano Atlantico ante Scotiam circumfuso invenerunt. In novis molluscis, quae adhuc nomine scientifico carent, sunt vermis marinus, duae conchae diversi generis, cochlea marina decem centimetra longa. Zoologi, qui studiis invertebratorum in illa regione operam dant, has inventiones mirum quam inusitatas describunt.

Optimus in Finnia athleta

Redactores Finniae a rebus athleticis suffragium inierunt de quaestione, quis optimus athleta anni bismillesimi tertii decimi (2013) in Finnia iudicaretur. Victoriam reportavit Tero Pitkämäki, iaculator eximius unum et triginta annos natus, qui certaminibus mundanis mense Augusto Moscuae habitis nomisma argenteum consecutus est.

Reijo Pitkäranta

10.1.14

Russi Finniam frequentant

Anno proximo (2013) numerus Russorum, Finniam frequentantium, decem miliones superavit. Maxima frequentia eorum prima mensis Ianuarii septimana venire solet. Septimana vergente paene sexaginta milia periegetarum Russorum limitem Finniae orientalem tramine aut autoraedis transierunt. Societas mercatorum aestimat singulos Russos in Finnia cotidie centenos octogenos eurones consumere.

Asiatici meliora sperant quam Europaei

Ex demoscopia, quam societas Ipsos faciendam curavit, magna pars hominum credit novum annum meliorem futurum esse quam proxime praeteritum. Asiatici meliora sperant quam Europaei, praesertim quod ad evolutionem mundi oeconomicam pertinet. Ad interrogationem duodeviginti milia hominum, ex viginti tribus terris oriundorum, responderunt. In bonam oeconomiam praesertim Indi, Sinenses, Indonesiani credunt. Minime ab oeconomica evolutione exspectant Sueci, Franci, Itali.

Sarcophagus pharaonis agnitus

Investigatores Universitatis Pensilvaniensis sarcophagum pondo sexaginta metretarum, ex quarzita factum, iam ante unum annum in Aegypto reppererunt. Minister Mohamed Ibrahim, de antiquitatibus Aegypti responsalis, die Lunae (6.1.) nuntiavit investigatoribus septimana proxima contigisse, ut illum sarcophagum pharaonis Sobekhotep I esse agnoscerent. Id apparuisse ex fragmentis lapideis, in quibus pharao in solio sedens et nomen eius incisa erant. Sobekhotep ante circiter tria milia octingentos annos primus pharao tertiae decimae dynastiae fuisse creditur, qui Aegyptum quattuor annos et dimidium regnaverit. Antea de illo pharaone parum sciebatur.

Sinenses copiam eboris confregerunt

Plus quam sex metretae eboris, quod confiscatum erat, in urbe Dongguan Sinarum confringendo deletae sunt. Ita magistratus Sinenses homines tutationem bestiarum docere et cryptopolium minuere conabantur. Dentes elephantium a mercatoribus et venatoribus clandestinis confiscati multos per annos, antequam delerentur, collecti erant. Ex dentibus elephantium, qui illegaliter occisi sunt, septuaginta fere centesimae in Sinas perveniunt, ubi ebur est materia medicinae translaticiae et symbolum sociale magni aestimatum. Mercatus internationalis eboris ab anno millesimo nongentesimo undenonagesimo (1989) vetitus est.

Iuvenes Finni magistri hoccei glacialis

Iuvenes nondum viginti annorum de magistratu mundi hoccei glacialis in Suecia certaverunt. In certamine finali, quod sero die Dominico in urbe Malmö fiebat, greges Suecorum et Finnorum conflixerunt. Finni punctis tria ad duo (3-2) superiores exsultabant, dum Sueci, spe decepti, multis cum lacrimis inferiores discesserunt.

(Tuomo Pekkanen)

3.1.14

Oratio praesidentis Niinistö

Sauli Niinistö, praesidens rei publicae Finniae, novo anno ineunte orationem publicam nationi habuit, in qua praesertim res ad Unionem Europaeam et ad oeconomiam pertinentes tractabat. "Quam viam" inquit, "Unio Europaea iniit, eadem Finniae eundum est, dummodo sciamus, quorsum ituri simus."

Idem animos civium ad eas mutationes attendit, quibus tota civitas exposita esset: e progressu rerum technicarum secutum esse, ut complura munera et artes de medio omnino recederent.

(Reijo Pitkäranta)

Ictus terroristici in Russia

Volgogradi, quae urbs in Russia meridionali sita est, intra breve tempus duo ictus bombici acciderunt, quibus amplius triginta homines, in iis auctores sceleris, interfecti sunt. Quo facto huic urbi luctus publicus indictus est. Eodem tempore magistratus Russiae, cum timerent, ne violentia eius generis latius pateret, actiones tutelares tota civitate efficaciores reddiderunt.

(Reijo Pitkäranta)

Rerum in Sudania condicio

In Sudania Meridionali conflictus cruenti coorti sunt, quibus multa milia civium vitam amiserunt et amplius centum milia domo effugere coacta sunt. Itaque Consilium securitatis Nationum Unitarum decrevit, ut numerus tutatorum pacis in illa regione altero tanto augeretur. Iam duae septimanae sunt, cum partes praesidentis Salva Kiir et fautores pristini vicepraesidentis Riek Machari inter se acerrime pugnant.

(Reijo Pitkäranta)

Praesidatus Unionis Europaeae

Kalendis Ianuariis (1.1.2014) praesidatus Unionis Europaeae ex Lituania in Graeciam transiit. Quod eodem tempore fit, cum status huius ipsius civitatis admodum labefactus est propter recessionem oeconomicam et ob reclamationes tumultuosas vitam publicam iterum atque iterum pessime vexantes.

(Reijo Pitkäranta)

De rebus quibusdam historicís

Novus annus bismillesimus quartus decimus (2014) memoria multorum eventuum historicorum insignis est. Die undevicesimo mensis Augusti (19.8.) duo millennia exacta erunt, cum Augustus, imperator Romanus, diem supremum obiit. Abhinc quadringentos quinquaginta annos sive anno millesimo quingentesimo sexagesimo quarto (1564) Guilelmus Shakespeare et Galileo Galilei nati sunt, et eodem anno Michelangelo Buonarroti mortuus est. Neque obliviscendum est primum bellum mundanum ante centum annos initium cepisse.

(Reijo Pitkäranta)

Annus 2013 in Finnia calidus

Annus nuperrime praeteritus (2013) in Finnia solito calidior erat. Aestas maturior, quam exspectabatur, huc venit atque adeo, ut Lappones iam mense Maio exeunte aestibus fervidis sudarent. Etiam autumno aer mirum quam tepidus erat. Meteorologi tamen censent haec omnia variationi temperaturae annuae tribui posse neque credendum illas mutationes documentum climatis calefacti esse.

(Reijo Pitkäranta)

27.12.13

Papa nuntium de pace misit

Papa Franciscus moderatoribus nationum et ordinibus internationalibus nuntium de pace misit, quo avaritiam et mercedes immoderatas vituperavit. Flagitavit, ut nationes differentias condicionum vitae circumscriberent et coartarent. Tractavit etiam iniustitiam, mercaturam hominum et armorum, criminalitatem ordinatam.

Gaia viam lacteam scrutabitur

Ordo Europaeus Spatialis (ESA, European Space Agency) die Iovis (19.12.) ex oppido Kouru Guianae Gallicae missile Sojuz in spatium misit, quod portat satellitem Gaiam. Propositum est per satellitem tabulam tridimensionalem galaxiae describere, notitiam de structura, formatione evolutioneque eius acquirere. Moderator investigationis scientificus est Timo Prusti Finnus.

Populatio Unionis Europaeae augescit

Populatio terrarum Unionis Europaeae anno proximo (2012) undecies centenis milibus (1.100.000) crevit, maxime per immigrationem, nam in Unionem Europaeam nongenta milia (900.000) hominum immigraverunt. Maior pars eorum in Germaniam et Italiam venit. In Germania numerus immigratorum trecentis nonaginta milibus (390.000), in Italia trecentis septuaginta milibus (370.000) auctus est. Econtra ex Hispania, Graecia, Irlandia, Portugallia homines emigraverunt. In Finniam anno bis millesimo duodecimo tantum triginta unum milia ducenti octoginta (31 280) homines immigraverunt, quod mille octingentis plus est quam anno ante.

De area aeolica Normanniae

Regimen Francorum consilium habet magnas areas aeolicas apud oram maritimam aedificandi. Duas areas fore apud Normanniam, unam apud Aremoricam sive Britanniam minorem (vulgo Bretagne). Electrificinas aeolicas, numero sescentas, in mari undecim chiliometra a litore positum iri neque ex illis ullum detrimentum piscatoribus aut rei periegeticae futurum esse. At societas militibus veteranis sustinendis aegre fert, quod electrificinae apud litus aedificentur, in quod confoederati occidentales olim (6.6.1944) invaserint, atque censet et prospectum et naturam locorum electrificinis mutatum iri. Eiusdem opinionis sunt tutatores naturae, qui monuerunt fundum maris apud illa litora plenum esse proiectilium, quae non displosa essent. Aedificatores autem cum illis dissentiunt et monent novis electrificinis aeolicis vix quartam partem prospectus maritimi obtectum iri. Praeterea vi aeolica vim electricam eiectamentis liberam productum iri et aedificationem multis milibus operariorum illius regionis laborem daturam esse.

Cristiano Ronaldo optimus pedifollista

Cristiano Ronaldo Portugallus, qui in grege Real Madrid ludit, optimus huius anni pedifollista periodici World Soccer creatus est. Suffragiis inferiores erant Lionel Messi et Franck Ribery. Redactores et experti per orbem terrarum sententiam in hac electione habuerunt. Optimus grex pedifollicus iudicatus est Bayern München.

Tuomo Pekkanen

20.12.13

Amorella ad scopulos allisa

Non multum afuit, quin septimana vergente in finibus maritimis Finniae gravior calamitas navalis accideret. Nam postridie Idus Decembres (14.12.) navis itineraria nomine Viking Amorella, quae ex urbe Aboa Stockholmiam versus navigabat, prope Alandiam ad scopulos allisa est.

Paulo post tamen e vado elabi potuit et omnes viatores, quorum numerus paene duorum milium erat, e periculo incolumes evaserunt.

(Reijo Pitkäranta)

Statua praesidentis Mandela

Die Lunae (16.12.) Praetoriae, in urbe capite Rei publicae Africae Australis, statua praesidentis Nelson Mandela nuper vita defuncti revelata est. Caerimoniae praefuit Jacob Zuma, praesidens hodiernus eiusdem civitatis. Monumentum aeneum, quod in altitudinem novem metrorum erigitur, iuxta idem aedificium administrativum stat, ubi Mandela anno millesimo nongentesimo nonagesimo quarto (1994) munus suum praesidentiale suscepit.

(Reijo Pitkäranta)

Merkel ter cancellaria creata

In Germania Angela Merkel, quae iam regimini coalitionis democratarum Christianorum et socialistarum praeest, cancellaria foederalis ter creata est. Quam manifesta electio eius fuerit, inde patet, quod suffragiis in parlamento factis amplius quadringenti quinquaginta legati ei faverunt, centum quinquaginta adversati sunt. Officium cancellariae renovatum quattuor annorum erit.

(Reijo Pitkäranta)

Hiems dura Orientis Proximi

His diebus partes Orientis Proximi frigoribus insuetis afflictae sunt, quo factum est, ut Idibus Decembribus (13.12.) in urbe Cairo ningeret et etiam pyramides Aegypti nivibus obruerentur. Dicuntur iam centum duodecim anni elapsi esse, cum illa regio hiemem aeque duram experta est. Eodem tempore etiam in Israele tanta nivium copia cecidit, ut Hierosolyma, Bethlehem aliaque eius civitatis loca tegmine candido complura centimetra alto velarentur.

(Reijo Pitkäranta)

Shakespeare totus Finnice

Ludi scaenici Guilelmi Shakespeare nunc denique in sermonem Finnicum hodiernum translati sunt. Agitur de insigni facto culturali; hactenus enim Finni plerumque conversionibus iam ante initium saeculi vicesimi compositis uti coacti sunt. Translatores peritissimi decem annos laboraverunt, ut lectores subtilitate sententiarum, calliditate lusuum verborum, pulchritudine versuum rhythmicorum frui possent.

(Saara Honkanen)

Munera praesidentis natalicia

Die festo Christi nati appropinquante varii civium ordines ad praesidentem Finniae Sauli Niinistö et coniugem eius Jenni Haukio more solito salutandi causa venerunt. Studentes rerum silvestrium hoc quoque anno eos arbore natalicia donaverunt, cum piscatores eis lucium ex aquis Alandiae captum muneri darent. A pecuariis pernam suillam acceperunt.

(Reijo Pitkäranta)

13.12.13

Statua Lenini Kioviae deiecta

In Ucraina reclamationes contra regimen praesidentis Janukovich iam plus tres septimanas continuantur. Die Dominico (8.12.) statua Lenini, quae in Platea Independentiae urbis Kioviae stabat, a civibus deiecta est et ictibus mallei fracta.

Illa statua praesertim cives nationalistas irritavit, quia symbolum habebatur libertatis deficientis et Ucrainae cum Russia relationum. Die Iovis mane vigiles scutis et baculis muniti in curiam urbis penetrare conabantur, quam reclamatores occupaverant, sed aqua frigida syringis infusa ab his expulsi sunt. Postea Vitali Zahartshenko, minister a rebus Ucrainae exteris, nuntiavit vigiles iam non in plateam impetus facturos esse.

Nelson Mandela obiit

Nelson Mandela, pristinus praesidens Rei Publicae Africae Australis et vindex libertatis nigritarum, Nonis Decembribus (5.12.) diem obiit supremum. Postquam viginti septem annos in carcere fuit, de discriminatione phyletica finienda et de democratia in patriam inducenda cum carceratoribus suis albicoloribus sine amaritudine consulere potuit. Anno millesimo nongentesimo nonagesimo quarto (1994) primus praesidens nigricolor Africae Australis creatus est. Munus praesidentis post quinque annos deposuit. Causa mortis erat pleuritis, sed Mandela, iam nonaginta quinque annos natus, diu aegrotaverat. Publico sumptu die Dominico (15.12.) in vico suo natali Qunu efferetur. Memoria eius die Martis (10.12.) Johannisburgi in regione Soweto recolebatur. Aderant plus quam centum pristini aut hodierni moderatores nationum, qui ex diversis mundi partibus venerant, in his praesidentes Finniae Sauli Niinistö et Martti Ahtisaari. Culmen celebrationum erat oratio, quam praesidens Americanorum Barack Obama habuit.

Mali dentes haemorrhagiam cerebralem efficere possunt

Investigatores Finni conexum inter infectiones dentium et haemorrhagiam cerebralem invenerunt. Nam in sanguine, ex dirupta aorta cerebrali fuso, bacteria, quae originem in dentibus habent, reperta sunt. Ideo aorta cerebralis dirupta causam habere potest in dentium infectione. Ut res confirmetur, ampliores investigationes sunt necessariae. Examinandum est. quo modo dentes se habeant hominibus, quorum aorta cerebralis est dilatata. Apud Finnos circiter singula hominum milia haemorrhagia aortae cerebralis singulis annis afficiuntur, ex quibus dimidia fere pars moritur.

DNA hominis 400 000 annorum reperta

In spelunca Sima de los Huesos, prope urbem Burgos Hispaniae septentrionalis, reliquiae saltem duodeviginti hominum repertae sunt. Investigatoribus contigit, ut ex osse femoris ibi conservato moleculam DNA (deoxyribonucleicum acidum) segregarent, quae est hominis, qui ante quadringenta fere milia annorum vixit. Vetustior DNA hominis numquam antea segregata est.

(Tuomo Pekkanen)

6.12.13

Dies festus libertatis Finniae

Hodie sive postridie Nonas Decembres (6.12.) Finni anniversarium libertatis suae nonagesimum sextum caerimoniis consuetis egerunt, in quibus officia divina, pompae militares, candelae tam publice quam privatim accensae. Moris est praesidentis rei publicae hoc die nationali vesperi magnum numerum civium de patria bene meritorum hospitio recipere. Nunc primum fit, ut haec sollemnitas non Helsinkii sed in urbe Tampere celebretur. (Reijo Pitkäranta)

Tumultus in Ucraina orti

In Ucraina inter regimen et populum discordia vehemens orta est de quaestione, utrum huic civitati propius Unionem Europaeam accedendum esset necne. Res ad tumultus violentos venit, cum praesidens Victor Janukovytsh recusavisset, quominus ullae pactioni cum Unione Europaea faciendae subscriberet. Quo facto amplius trecenta milia hominum in vias et plateas urbis Kioviae confluxerunt flagitatum, ut Janukovytsh una cum administris et toto parlamento munus deponeret.

(Reijo Pitkäranta)

Res Coreae Septentrionalis

Inter primores civitatis Coreae Septentrionalis certamen potestatis erupisse videtur. Dicitur enim Jang Song-thaek, avunculus summi ducis Kim Jong-un et dignitate ab eo secundus, omni auctoritate privatus esse. Fama est etiam de aliquot adiutoribus eius supplicium sumptum esse. Nemo iam dubitat, quin regimen in duas partes aemulantes divisum sit.

(Reijo Pitkäranta)

De calamitate Tzernobylensi

Calamitas nuclearis, quae anno millesimo nongentesimo octogesimo sexto (1986) Tzernobyli accidit, nullam vim ad morbos cancrosos in Finnia natos habuisse videtur. Quod patet ex investigatione amplissima nuperrime divulgata. Constat ex radiatione nucleari plerumque sequi, ut periculum leucaemiae, cancri glandulae thyreoideae, carcinomatis mammae augeatur. Neque tamen morbi huius generis in Finnia post cladem Tzernobylensem increbruerunt.

(Reijo Pitkäranta)

Carlsen principatum adeptus

Magnus Carlsen, iuvenis Norvegus viginti duos annos natus, principatum ludi regii mundanum consecutus est. Is enim, postquam in certamen de gloria huius artis cum adversario Viswanathan Anand venit, victoriam ab eo cum discrimine trium punctorum reportavit. Ita fieri non potuit, quin Anand, qui primatum eiusdem ludi antea obtinebat, palmam illi traderet

(Reijo Pitkäranta)

Mensis November solito mitior

Mensis November in Finnia hoc anno et mitior et magis pluvius fuit quam fieri consuevit. Eius rei documentum est, quod hiems thermica, quae dicitur, in partibus terrae meridionalibus nondum iniit et etiam in Media Finnia serissimam se praebuit . Ex Instituto meteorologico nuntiatur menses Novembres aeque tepidos nonnisi semel in decem annis Finniae obtingere.

(Reijo Pitkäranta)

29.11.13

Concordia de programmate nucleari Iraniae

De programmate nucleari Iraniae concordia inventa est. Colloquiis cum delegatis Iraniae Genavae habitis interfuerunt ministri a rebus exteris Americanorum, Sinensium, Russorum, Britannorum, Germanorum Francorumque.

Iranis licebit uranium usque ad fortitudinem quinque centesimarum locupletare. Numerus et potentia centrifugarum, quibus locupletatio fit, circumscribetur. His condicionibus sanctiones Iraniae impositae gradatim laxabuntur. Nationes occidentales et Israel suspiciones habuerunt, ne programma Iraniae ad arma nuclearia praeparanda spectaret. Irani autem affirmaverunt propositum suum pacificum esse.

(Tuomo Pekkanen)

Berlusconi a senatu amotus

Senatus sive camera superior parlamenti Italiae decrevit, ut Silvio Berlusconi, pristinus primus minister, a senatu amoveretur. In causa est, quod Berlusconi de fraude fiscali carcere damnatus est. In Italia est lex, quae vetat, ne carcere plus duorum annorum damnati muneribus publicis inter sex annos fungantur. Ex senatu expulsus Berlusconi integritatem parlamentariam amittit, ex quo sequitur, ut in aliis quoque causis contra eum agendis deprehendi possit. Sunt complures causae, quae contra Berlusconi aguntur. Inter alia carcere septem annorum damnatus est, quod amores a puella nondum duodeviginti annorum emisset.

(Tuomo Pekkanen)

Reliquiae Sancti Petri primum expositae

Ad conclusionem anni ecclesiastici reliquiae, quae S. Petri esse creduntur, in platea Petriana urbis Romae die Dominico (24.11.) expositae sunt. Reliquiae constant ex novem ossiculis, quae in fundo eburneo reliquiarii aenei posita sunt. Reliquiarium conservatur in capella Summi Pontificis. De origine reliquiarum S. Petri diu disputatum est.

(Tuomo Pekkanen)

Sinenses excruciationem vetituri?

Supremum iudicium populare Sinensium nuntiavit necesse esse, ut excruciatio ad confessionem extorquendam finiretur. Etiam praedixit, ne frigus, fames, sitis, ambustiones, insomnia aliaque legibus contraria in interrogationibus adhiberentur. Praeterea supremum iudicium suasit, ut in poena capitis dicenda mitiores regulae quam ante observarentur.

(Tuomo Pekkanen)

Nucibus vescentes diu vivunt

Investigatio Americana, in periodico New England Journal of Medicine divulgata, indicat nuces esse salutares neque eis vescentes pinguescere, quamquam multum crassaminis et energiae contineant. Illae conclusiones diaeta nituntur sedecim milium feminarum et undecim milium virorum, qui per triginta annos observabantur. Qui nucibus cotidie vescebantur, inter tempus observationis mortem quinta parte verisimilius evitaverunt quam qui nuces omnino non comederunt. Letalitas nucibus vescentium fuit septem centesimis (7%) minor quam eorum, qui nuces in diaeta non habuerunt. Ex investigatione apparuit etiam, quod amici nucum non pinguescebant, immo graciliores erant quam ceteri.

(Tuomo Pekkanen)

22.11.13

Finnia tempestate vexata

Die Dominico mane (17.11.) tempestas saevissima in Mari Norvegico coorta per Suetiam in Finniam venit tantaque vi saeviebat, ut ducenta fere milia domuum electricitate privarentur. Pessima detrimenta ceperunt regiones inter Ostrobothniam et Savolaxiam patentes, ubi magnus numerus arborum turbinibus ventorum radicitus evulsus est et complura aedificia omnino destructa sunt. Mirum est neminem vitam in hac procella amisisse.

(Reijo Pitkäranta)

Rerum in Libya status

Tripoli, in urbe principe Libyae, his diebus tumultus tam violenti orti sunt, ut ibi iam bellum civile geri dixeris. In causa sunt copiae seditiosae semimilitares, quae inter se pugnantes recusaverunt, quominus arma deponerent. Quidam ex armatis haud ita pridem etiam ministrum principem Ali Zidani vi abduxerunt eumque aliquamdiu in potestate sua tenebant.

(Reijo Pitkäranta)

JFK abhinc L annos occisus

Hodie sive die vicesimo secundo mensis Novembris (22.11.) quinquaginta anni acti sunt, ex quo John. F. Kennedy, praesidens Civitatum Americae Unitarum, media urbe Dallasio caede ex insidiis facta occisus est. Interfectorem eius iuvenis nomine Lee Harvey Oswald se praebuit. Neque his decenniis defuerunt, qui negarent illud facinus ab eo solo commissum esse credentes eum socium alicuius coniurationis fuisse.

(Reijo Pitkäranta)

De sopore ursorum hiemali

Mense Novembri status caeli in urbe Moscua quinque aut etiam decem gradibus calidior fuit quam hoc anni tempore fieri solet. Inde secutum est, ut animalia, quae in vivario huius metropolis retinentur, miro modo se gerere inciperent. Quamquam ursis iam tempus ad soporem hiemalem proficiscendi adest, illi tamen nihil de ea re curant, sed vitam activam degere pergunt etiam arbores adhuc ascendentes.

(Reijo Pitkäranta)

Quomodo Sinus Finnicus valeat

Rei circumiectalis periti Sinum Finnicum peiore statu etiamnunc esse existimant. Quod apparet ex relatione hoc autumno divulgata. Quamquam aqua in partibus illius maris orientalibus vi purgationis defluviorum Petropolitanorum aucta purior facta sit, tamen septuaginta quinque (75 %) centesimas aquarum litoralium esse malae, mediocris aut summum probabilis qualitatis. Causam autem laetitiae praebere lacuum et fluminum bonam condicionem.

(Saara Honkanen)

Optimi athletae huius anni

Foedus internationale athleticae campestris (IAAF) conventu in urbe Monoecho habito quaestionem tractavit, qui essent omnium optimi athletae huius anni. Primas tulit Usain Bolt, cursor celeberrimus Iamaicanus. Etiam in serie feminarum Iamaica victoriam reportavit, cum Shelly Ann Frazer-Pryce inter ceteras eminuisse existimata est.

(Reijo Pitkäranta)

15.11.13

Typhon Haiyan Philippinas vastavit

Typhon Haiyan, qui ante finem septimanae Philippinas vastavit, est verisimiliter fortissimus ex turbinibus, quos ad terram appulisse constat. Sescenta sexaginta milia hominum domos suas amiserunt. Pessime inflicta est Tacloban, urbs ducentorum milium incolarum, ubi circiter duo milia quingenti homines perisse aestimantur.

Germani noctem crystallinam commemorabant

Nocte inter diem octavum et nonum mensis Novembris anno millesimo nongentesimo duodequadragesimo (1938) nazistae in Germania et Austria in tabernas Iudaeorum invaserunt, synagogas cremaverunt atque circiter triginta milia virorum deprehenderunt, qui in castra carceralia deportarentur. Illa nox persecutionum a vitris tabernarum confractis crystallina appellatur. Inter bellum mundanum secundum sex miliones Iudaeorum a nazistis occisi sunt. Septuagesimum quintum anniversarium diei, quo illud genocidium initium cepit, in Germania per expositiones et varios eventus agebatur. Angela Merkel, cancellaria foederalis, noctem crystallinam temporis momentum in historia Germaniae obscurissimum appellavit.

Russiae imminere terrorismum et dilatationem Natonis

Sergei Shoigu, minister defensionis Russorum, censet ex periculis Russiae imminentibus maxima esse terrorismum internationalem et quod confoederatio Nato ad confinium Russorum dilatetur. Itaque Russi pertinaciter resistunt, ne Georgia et Ukraina ad Natonem adiungantur neve missilia Americanorum in Europa orientali collocentur.

Arafat polonio venenatus

Investigatores Helvetii rettulerunt se in ossibus Jasseri Arafat, praesidentis Palaestinensium, tantam polonii copiam invenisse, ut duodevicies quantitatem normalem superaret. Idem iam antea dixerant polonium in vestibus eius repertum esse. Arafat anno bis millesimo quarto mortuus est neque medici causam mortis indicare potuerunt. Magistratus Palaestinenses Israelianos diu accusaverunt, quod praesidentem suum venenavissent. Hi autem crimen vehementer negaverunt. Suha Arafat, vidua praesidentis, persuasum habet maritum suum victimam fuisse sceleris horribilis. Auctorem quidem facinoris non nominavit, sed suspicabatur in culpa esse civitatem, quae arma nuclearia haberet.

Vicus Rjukan speculis illuminatur

Rjukan, vicus provinciae Norvegiae Telemark, hieme sex menses culmine montis obumbratus in tenebris iacebat. Nuper autem in monte tria specula ingentia sive heliostata ita posita sunt, ut radii solis in plateam vici hieme lucerent. Superficies totalis speculorum est unius et quinquaginta metrorum quadrorum. Et horizontaliter et verticaliter specula ita vertuntur, ut cursum solis usque sequantur. Area, quam radii solis speculis reflecti in ima valle illuminant, est circiter quingentorum metrorum quadrorum. Ita tenebrae, quibus incolae hieme laborabant, ad finem venerunt. Consilium feliciter perfectum sescentis viginti milibus euronum constitit.

Tuomo Pekkanen

8.11.13

Finni speculationi expositi

Rete informaticum ministerii a rebus exteris Finniae iam per multos annos speculationi externae expositum est. Programma exploratorium tanta rerum peritia excogitatum est, ut verisimile esset usurpatores nomine alicuius civitatis egisse. Aggressores in computatra ministerii imprimis per appendices nuntiorum electronicorum et claviculas memoriales penetravisse videntur.

(Reijo Pitkäranta)

Colloquia Russiae et Iaponiae

Moderatores Russiae et Iaponiae in urbe Tokio consultaverunt, quonam modo cooperationem politicam et militarem efficaciorem redderent. Ministris placuit communes exercitationes bellicas instituere ad terrorismum et piraticam avertendam. Mirum est Russos et Iaponienses, qui etiam nunc officialiter bellum gerunt, inter se tam familiariter uti.

(Reijo Pitkäranta)

Novus cuniculus submarinus

Die undetricesimo mensis Octobris (29.10.) Constantinopoli cuniculus submarinus inauguratus est, quo tramina per Bosporum Thracium ex Europa in Asiam transire possunt. Hic specus altius effossus undecim elementis ex chalybe et calcestro factis constat, et longitudo totius meatus quattuordecim fere chiliometra efficit. Ministri Turciae hunc cuniculum Asiam cum Europa coniungentem viam Sericam hodiernam appellaverunt.

(Reijo Pitkäranta)

De eiectamentis venenosis

Numerus hominum morbis cancrosis laborantium in urbibus et oppidis Neapoli adiacentibus his duobus decenniis valde crevit. Quae fuerit causa huius rei, ex confessionibus cuiusdam ducis mafiosi apparet: ingentem copiam eiectorum venenosorum in terra illarum regionum a sodaliciis scelestorum Italiae defossam esse. Ibi etiam purgamenta nuclearia inveniri, quae e Germania autocarris onerariis clam in Italiam apportata essent.

(Reijo Pitkäranta)

Libertas diurnariorum coercita

Moderatores Britanniae legem de diurnariis coercendis perferendam curaverunt. Decreverunt enim collegium instituere, cuius esset custodire, ne acta diurna in scriptis suis modum excederent. Neque desunt, qui huic renovationi ut linguae liberae repugnanti vehementer adversentur. Id tamen fieri necesse erat, postquam innotuit telephonula civium a quibusdam diurnariis clam auscultata esse.

(Reijo Pitkäranta)

Institutum Romanum Finlandiae

Pridie Nonas Novembres (4.11.) septuaginta quinque anni acti erant, cum Opus Institutum Romanum Finlandiae conditum est. Munus eius est studentibus et investigatoribus Finnis occasionem praebere studia antiquitatis et rerum humanarum Romae exercendi. Domicilium eius est Villa Lante, aedificium lautissimum Romanum in summo colle Ianiculo situm.

(Reijo Pitkäranta)

De die litterarum Sueticarum

Postridie Nonas Novembres (6.11.) in Finnia dies cultus civilis et littararum Sueticarum celebrabatur. Hoc festum ad memoriam regis Gustavi Adolfi II agi coeptum est, qui in Germania bellum gerens anno millesimo sescentesimo tricesimo secundo (1632) cecidit.

(Reijo Pitkäranta)

1.11.13

NSA colloquia telephonica auscultabat

Regimen Germaniae palam fecit suspicationes, quod telephonulum cancellariae Angela Merkel ab NSA, Nationali Securitatis Procuratoria Americanorum, clam auscultatum esset.

Acta diurna Britannica (The Guardian) postea rettulerunt auscultationem furtivam non tantum ad cancellariam Germanorum spectavisse sed triginta quinque moderatores nationum eodem modo speculationi telephonicae expositos fuisse. Periodicum Germanicum Der Spiegel narravit telephonemata Angelae Merkel plus decem annos ita auscultata esse.

Cum Merkel praesidenti Obama telephonavisset et explicationem speculationis quaesivisset, ille veniam petivit et negavit se de re antea comperisse. Si comperisset, se finem speculationi impositurum fuisse. Cognitum est in Hispania sexaginta miliones colloquiorum telephonicorum ab NSA auscultata esse, in Italia quadraginta sex miliones, plurima autem in Afganistania et Pakistania. Speculatio apud Americanos tam liberales quam conservatores damnatur. Washingtoniam die Sabbati (26.10.) duo milia hominum convenerunt, ut contra Procuratoriam Securitatis reclamitarent.

Episcopus prodigus

Franz-Peter Tebartz-van Elst, episcopus catholicus dioecesis Limburgensis, ab officio suspensus est. Vituperabatur, quod vivendo luxuriose opes ecclesiae dissipavisset. Ad residentiam episcopalem renovandam unam et triginta miliones euronum consummaverat, labrum balneare sibi quindecim milibus paraverat, centum milia ad fenestras sacelli sui consumpserat. Itaque Sanctae sedi placuit, ut episcopus prodigus ab officiis episcopalibus in dioecesi sua suspenderetur. Paulo ante Franz-Peter ad paenitentiam agendam Civitatem Vaticanam petiverat, ubi Papam Franciscum convenerat, qui in sermonibus suis humilitatem ecclesiasticis commendare noscitur et suadere, ut ecclesia imprimis pauperes tueatur.

Triginta miliones in servitute vivunt

In mundo hodierno sunt triginta hominum miliones, qui in servitute vivunt, ut nuperrime rettulit ordo The Walk Free Foundation. Pro servitute habentur mercatura hominum, labor coactus, matrimonia coacta, venditio abususque puerorum. Maximus servorum numerus, nempe quattuordecim miliones, in India invenitur. Optime res se habent in Islandia, ubi minus quam centum servi esse aestimantur. Sequuntur terrae opulentiores, ut Irlandia, Britannia, Nova Zelandia, Helvetia, Norvegia, Dania, Finnia, in quibus autem servitus opinione frequentior est. Plurimi servi in terris Asiae aut Africae vivunt.

Omnia fere ad Olympia hiemalia parata

Vicesima secunda Olympia hiemalia in urbe Sotshi Russiae mense Februario fient. Cum Thomas Bach, praesidens Commissionis Olympicae Internationalis, nuper loca certaminum visitaret, Russiae praesidens Vladimir Putin illi affirmavit omnia fere parata esse et omnes, qui ad ludos venissent, gratos exspectatosque fore, qualiscumque esset eorum origo ethnica vel inclinatio sexualis.

(Tuomo Pekkanen)

25.10.13

Prope Upsalam constructio praehistorica reperta

Prope urbem Upsalam nuper reperta est constructio, quae constat ex palis, in recta linea positis. Una linea est longitudine unius chiliometri, altera, rectangulariter ad illam constructa, paene dimidium chiliometri longa. Restant fossae palorum lapidibus firmatae, sena metra inter se distantes, et aliquantulum ex ligno palorum. In longiore linea pali, altitudine vel decem metrorum, fuerunt centum quadraginta quattuor (144). Ex reliquiis palorum archaeologi constituere potuerunt lineas quinto saeculo constitutas esse. Cum iuxta palos ossa animalium reperta essent, investigatores coniecerunt lineas aliquo modo ad religionem et sacrificia pertinere. Adam Bremensis, auctor undecimi saeculi (c. 1075), in opere, cui titulus est Gesta Hammaburgensis ecclesiae pontificum, de sacrificiis, in antiqua Upsala celebratis, narrat. Corpora deis oblata in sacro luco pependisse et aliquem Christianum ibi septuaginta duo (72) corpora hominum et animalium mixtim suspensa vidisse.

Berlusconi officiis publicis interdictus

Tribunal Mediolanense decrevit, ut Silvio Berlusconi, pristinus primus minister Italiae, in duos annos officiis publicis interdiceretur. Sententia partem facit poenae, qua Berlusconi propter fraudem fiscalem antea damnatus est. Interdictio autem non ante valebit quam senatus de illo ex senatu expellendo decreverit.

Romani contra austeritatem reclamitaverunt

Complura dena hominum milia contra oeconomiam austeram regiminis et magnam inopiam laboris in urbe Roma reclamitaverunt. Reclamitatores censebant populum austeritati oeconomiae publicae succumbere, dum politici suis privilegiis pristino modo fruerentur. Neque propositum, scilicet deminutionem publici aeris alieni, austeritate obtineri potuisse.

Poliomyelitis imminet

Ordo Mundi Sanitarius (WHO) de poliomyelitide monet, quae in Syria post quattuordecim annos rursus apparuit. Duo casus poliomyelitidis in provincia orientali Deir al-Zor mense Octobri ineunte occurrerunt. Propter bellum civile, quod iam tertium annum durat, magnum est periculum, ne morbus in Syria in epidemiam vertatur. Maius quam in Syria periculum epidemiae est in Pakistania, ubi Talebani vaccinationes vetuerunt, quia, ut declaraverunt, insidiae contra musulmanos nationum occidentalium essent. Hoc mense in Pakistania quattuor casus poliomyelitidis reperti sunt et in toto terrarum orbe hoc anno novi casus prope trecenti numerantur.

Microparticulae rhinocerotibus Keniae

Kenianis propositum est microparticulam in omnibus rhinocerotibus ponere, ut venatio clandestina, quae usque crescit, coerceatur. Particulae cornibus animalium inseruntur. Proposito favet Fundatio pro natura Mundialis (WWF), quae et microparticulas et instrumenta necessaria gratis ministrat. In Kenia sunt plus mille rhinocerotes.

Tuomo Pekkanen

20.9.13

Sarinum in Syria usurpatum

Mense Augusto prope urbem Damascum ictus militaris factus est, in quo gasum nervosum nomine sarinum usurpabatur. Quod apparet e relatione, quam investigatores Nationum Unitarum die Lunae (16.9.) divulgaverunt. Qui autem hoc facinus perpetraverint, e documento non patet, quam ob rem adhuc disceptatur, utrum ille impetus chemicus regimini Syriae an copiis seditiosorum crimini detur.

(Reijo Pitkäranta)

Costa Concordia sublevata

Costa Concordia, navis maxima Italiana, inde ab anno bis millesimo duodecimo (2012) ineunte ante oram Italiae ad scopulos allisa et uno latere innixa iacebat. Die Lunae (16.9.) autem opere undeviginti horis confecto feliciter sublevata est. Quanti laboris fuerit navem pessime inclinatam e mari erigere, inde intellegitur, quod latitudo eius trecentorum fere metrorum est.

(Reijo Pitkäranta)

Strages in urbe Washington

In urbe Washington, non procul ab Aedibus Albis, die Lunae (16.9.) strages sclopetaria facta est, qua tredecim homines vitam amiserunt et octo vulnerati sunt. Accidit caedes in Navy Yard, quod est praetorium administrativum classis Americanae. Etiam homicida ipse, vir quidam Texianus triginta quattuor annos natus, pugna cum custodibus publicis commissa occisus est.

(Reijo Pitkäranta)

De ecclesia Sacrata Familia

Iam speratur fore, ut ecclesia cathedralis nomine Sacrata Familia (Sagrada Familia), quae Barcinone iam plus centum annos aedificatur, anno bis millesimo vicesimo sexto (2026) ad finem perducatur. Tum enim unum saeculum elapsum erit a morte architecti Antonii Gaudi, qui, quoad vixit, illi ecclesiae construendae praefuit.

(Reijo Pitkäranta)

De certaminibus pulchritudinis

Senatus Francogalliae rogationem accepit, quae puellis sedecim annis minoribus certamina pulchritudinis denegat. Si quis legem violaverit, in periculum vocabitur, ne vinculis duorum annorum puniatur. Legem promulgavit pristina ministra Chantal Jouanno: “Caveant puellae”, inquit”, ne credant dignitatem suam non nisi ex forma aestimari.”

(Reijo Pitkäranta)

13.9.,13

Quid Barack Obama dixerit

Barack Obama, praesidens Civitatum Americae Unitarum, oratione nationi habita regimen Syriae usus armorum chemicorum noxium iudicavit. Ait ictum gasalem funestum, quem copiae Syriae fecissent, et legi internationali repugnare et etiam securitati Americanorum imminere. Obama cives Americanos petivit, ut consilio suo de impetu circumscripto in Syriam faciendo faverent.

(Reijo Pitkäranta)

De armis chemicis custodiendis

Moderatores Russiae proposuerunt, ut Syri arma sua chemica custodibus internationalibus traderent et tradita postea delerentur. Sergei Lavrov, minister Russiae a rebus exteris, cum collega suo Syro Walid al-Muallem de ea re Moscuae collocutus est. Quo facto Muallem nuntiavit Syriam ad illud consilium approbandum paratam esse.

(Reijo Pitkäranta)

Comitia in Norvegia habita

Die Lunae (9.9.) in Norvegia comitia parlamentaria instituta sunt. Sententiis computatis apparuit coalitionem partium mediarum et dextrarum victoriam reportavisse. Inde sequitur, ut Erna Solberg, praeses factionis conservativae, princeps ministra Norvegiae fiat et Jens Stoltenberg, qui civitati octo annos praefuit, principatum relinquere cogatur.

(Reijo Pitkäranta)

Pictura artificis van Gogh

Pictura artificis Vincent van Gogh, quae antea nonnisi e mentione quadam epistulari nota erat, nuperrime reperta et vera cognita est. In hoc opere, cui nomen 'Occasus solis in Montmajour', arbores et frutices et sol occidens coloribus crasso penicillo ductis describuntur.

(Reijo Pitkäranta)

Olympia Tokiensia anno 2020

Olympia aestiva anno bis millesimo vicesimo (2020) in urbe Tokio instituentur. Consilium Olympicum internationale de ea re decrevit conventu die septimo mensis Septembris (7.9.) Bonaeropoli in Argentina habito. Praeter Tokium duae aliae urbes, scilicet Madritum et Constantinopolis, de illo honore certabant, sed suffragiis inferiores discesserunt.

(Reijo Pitkäranta)

Ecclesia in Finnia vetustissima

Sanctae Catharinae (Kaarina), quod oppidum prope urbem Aboam situm est, fundamenta ecclesiae in Finnia omnium vetustussimae reperta sunt. In effossionibus archaeologicis in lucem venit substructio lapidea bene conservata, quae ad ecclesiam saeculo duodecimo constructam pertinet. Longitudo aedificii decem fere metrorum, latitudo autem sex metrorum fuisse aestimatur.

(Reijo Pitkäranta)

Sollemnitas 'Athenis Finlandiae'

Hac septimana in urbe Jyväskylä mediae Finniae dies festi culturales aguntur, quibus nomen 'Athenis Finlandiae'. Quae feriae auspice ministra Elisabet Rehn celebrantur. Curatores populo illustrare volunt, quantam vim lingua Latina et hereditas antiquitatis ad nostrum cultum civilem habeant. Hoc anno imprimis ea, quae ad Germaniam mediaevalem et civitates Hanseaticas attinent, in medium procedunt.

(Reijo Pitkäranta)

13.9.2013

6.9.13

Consensus se rebus contra syriam deest.

Praesidens Barack Obama censet impetum brevem et circumscriptum contra exercitum Syriae faciendum esse, ut intelligatur neminem armis chemicis impune uti posse. Kalendis Septembribus USA nuntiavit se comperisse sarinum, gasum infame et venenosissimum, contra oppositionem a copiis regiminis Syriae Damasci adhibitum esse.

Ictibus sarino factis plus mille quadringenti homines perierunt, sed consensus de rebus contra Syriam gerendis nondum inventus est. Praesidens Obama dixit se a Congressu Americano veniam velle, antequam copiis imperaret, ut impetum facerent. Congressus autem ante diem nonum mensis Septembris non conveniet.

In Britannia parlamentum prohibuit, ne Britanni ictibus interessent. Neque Russis et Sinensibus obstantibus fieri poterit, ut Consilium Securitatis Nationum Unitarum clausulae pro ictibus faciendae faveat. Etiam Germani extra consilia bellica manebunt, Franci autem, si ictus militares suscepti erunt, Americanos sustentabunt. Praesidens Russiae Vladimir Putin censet accusationes de armis chemicis nihil esse nisi provocationes. Etiam Irania regimen Syriae sustentat. Sed Akbar Hashemi Rafsanjani, olim (1989-1997) praesidens Iraniae, a ceteris patriae suae moderatoribus dissentit. Dixit cives Syriae victimas fuisse armorum chemicorum regiminis ipsorum atque ad impetum peregrinorum exspectandum coactos esse.

Nokia negotia telephonica societati Microsoft vendit

Die Martis (3.9.) mane inopinanter nuntiatum est Nokiam, societatem Finnicam, negotia telephonorum portatilium societati Americanae Microsoft vendere. Posthac Nokia, telephonulis faciendis olim princeps in mundo societas, imprimis retibus informaticis operam dabit, ex quibus dimidia fere pars negotiorum eius constat.

Viri Europaei centum annis undecim centimetris altiores

Ex investigatione recens divulgata media altitudo virorum Europaeorum inter annos millesimum octingentesimum septuagesimum et millesimum nongentesimum octogesimum (1870-1980) undecim centimetris crevit. Praeter opinionem media altitudo virorum etiam inter bella mundana et recessionem oeconomicam aucta est. Causa forsitan est, quod illis temporibus familiae erant minores. Nam iam antea notatum erat mediam altitudinem et minorem liberorum numerum relationem inter se habere. In investigatione altitudo virorum viginti unum annos natorum in quindecim terris Europaeis observabatur. Feminae omissae sunt, quia de altitudine illarum certae statisticae non suppeditant.

In Peruvia frigus insolitum

Frigus partes occidentales Americae Meridionalis his diebus temptavit. In montibus Andis plus triginta milia animalium domesticorum, in his pecora, lamae, alpacae, propter tempestates nivosas interierunt. In regiones montuosas Peruviae status necessitatis indictus est. Etiam Bolivia et Paraguaia, terrae vicinae, insolitis frigoribus laboraverunt.

(Tuomo Pekkanen)

30.8.13

Res ad syriam pertinentes

Suspicio non abest, quin copiae regiminis Syriae in bello cum seditiosis gerendo venenis chemicis usae sint. Quam ob rem Sergei Lavrov, minister a rebus exteris Russiae, collegam suum Americanum John Kerry telephonice adiit, quo in colloquio ait Russiam vehementer sollicitam esse, quidnam Americani de actionibus contra Syriam suscipiendis decernerent.

Si illi Syriam bello lacessere coepissent, inde secuturum esse, ut totus Oriens Proximus in maximum discrimen vocaretur.

(Reijo Pitkäranta)

Iudicium rarum in Sinis

Bo Xilai, dux politicus Sinensis magnae auctoritatis, in iudicium vocatus est. Quae res admodum mira habetur, cum respicitur eum socium Summi consilii factionis communisticae Sinarum fuisse. Agitur de scandalo politico, quo gravius his decenniis in Sinis non accidit. Apud iucides Xilai de peculatu, de largitione accepta, de abusu potestatis accusatur.

(Reijo Pitkäranta)

De incendiis silvestribus

In California incendia silvestria saevissima coorta sunt, quae in terra arida et ventis ignem usque conflantibus iam tam late patent, ut urbi Franciscopoli et circumiectis eius immineant. Ignes exstinguere eo difficilius est, quod vigiles in locis inaccessis fere laborare coguntur et omni tempore periculum subeunt, ne flammis effusis circumveniantur.

(Reijo Pitkäranta)

Praemium Polar datum

Die Martis vesperi (27.8.) Stockholmiae sollemnitas magna acta est, cum duo musici praemio celeberrimo Polar appellato affecti sunt. Una eorum erat Kaija Saariaho, femina Finlandensis de arte musica nova componenda optime merita, alter Youssou N’Dour, minister et musicus e Senegalia oriundus.

(Reijo Pitkäranta)

Itinera Finnorum in Aegyptum

Multae sedes viatoriae Finniae itinera in Aegyptum proxima hieme futura revocare decreverunt. Intermissio volatuum ad tempus inter mensem Octobrem et Aprilem intercedens valebit. Quo consilio capto magistratibus publicis morem gerunt, qui cives hortantur, ne frustra in Aegyptum proficiscantur.

(Reijo Pitkäranta)

Exportatio auri e Finnia

Aurum e Finnia magis atque magis peregre exportatur. E statisticis enim patet hoc metallum iam amplius dimidiam partem exportationis earum rerum constituere, quae terra eruuntur. Lucrum publicum ex eo negotio factum paene quadringenis milionibus euronum esse existimatur.

(Reijo Pitkäranta)

De rublis in Finnia accipiendis

In Finnia iam aliquot tabernae mercatoriae sunt, in quibus clientes Russi emptiones rublis sive suo proprio nummorum genere utendo solvere possunt. Quae mutatio rerum etiam in machinis arcarum conspicitur: in iis enim summa pecuniae, quae emptoribus mercatori pendenda est, tam euronibus quam rublis indicatur.

(Reijo Pitkäranta)

De rublis in Finnia accipiendis

In Finnia iam aliquot tabernae mercatoriae sunt, in quibus clientes Russi emptiones rublis sive suo proprio nummorum genere utendo solvere possunt. Quae mutatio rerum etiam in machinis arcarum conspicitur: in iis enim summa pecuniae, quae emptoribus mercatori pendenda est, tam euronibus quam rublis indicatur.

(Reijo Pitkäranta)

21.8.3

Advocatus diaboli obiit

Jacques Vergès, qui pessimos quoque criminosos pro tribunali defendebat ideoque advocatus diaboli appellabatur, Parisiis duodenonaginta annos natus cardioplegia diem spremum obiit. Erant inter clientes eius Klaus Barbie, praefectus nazista, carnifex Lugduniensis vocatus, Ilich Ramírez Sánchez alias Sciacallus, terrorismo damnatus, aliique scelerati.

Postquam Americani Iraquiam occupaverunt, Vergés dixit se etiam Saddamum Hussein pro tribunali defendere paratum esse. In periodico Germanico “Der Spiegel” interroganti responderat se etiam Adolphum Hitler apud iudices defensurum fuisse. Natus erat in Thailandia, studuit Parisiis, ubi iurista factus est.

Sinenses pinguescunt

Ex investigatione, quam Administratio athletica Sinarum nuper faciendam curavit, tertius quisque ex Sinensibus superpondium habet. Cum homines rure in urbes migrantes ex paupertate in meliores vitae condiciones surgunt, sequitur, ut melius vescantur, plus tabaco et alcoholo utantur atque minus corpus exerceant. Ratione vitae ita mutata pinguescunt et facilius incidunt in morbos cardiovasculares et pulmonales, cancrum, diabeten. Apud Sinenses iam octoginta centesimae mortium in mutatis vivendi condicionibus originem habere aestimantur, sed etiam inquinatio aeris, qua male laborant, periculum morborum pulmonalium et cardiovascularium apud eos auget.

Novum mammiferum repertum

Investigatores Americani affirmant se novum genus mammiferi repperisse, quod in silvis montanis Aequatoriae et Columbiae vivat. Animal, olinguito appellatum (scientifice Bassaricyon neblina), pondo unum fere chiliogramma, aspectu dicitur esse mixtum ursino et fele domestica. Vescitur imprimis fructibus sed etiam insectis. Loco movetur nocte et magna arte ex arbore in arborem saltat.

Seniores sunt feliciores

Investigatio interrogatoria, quae ad trecenta quadraginta milia hominum spectabat, responsa inopinata investigatoribus portavit. Aetas respondentium inter duodeviginti et octoginta quinque annos variabat. Etsi iuvenes haud male vivebant, senes octoginta quinque annorum erant feliciores. Sensus felicitatis post duodeviginti aetatis annos usque ad mediam aetatem deminuebat. Post quinquagesimum autem annum aetatis felicitas gradatim crescebat. In causa forsitan est, quod iuniores vita operaria et difficultas suum in mundo locum inveniendi gravant, sed seniores vitam ipsam magni facere didicerunt neque tantum a semet ipsis flagitant. Ergo senectutem frustra timeas.

Pitkämäki in iaculo secundus

In certaminibus mundanis athleticae campestris Tero Pitkämäki spem Finnorum non fefellit, cum octoginta septem metra iaculo superavit (87,07) et quater plus octoginta quinque metra vibravit. Obtinuit nomisma argenteum, sed Vitezslav Vesely, natione Tzekicus, decem centimetra longius iaculando factus est magister mundanus.

(Tuomo Pekkanen)

16.8.13

Quid in Aegypto acciderit

Castra reclamatorum, quae a fautoribus pristini praesidentis Mohamad Mursi in urbe Cairo posita erant, a copiis securitatis Aegypti deleta sunt. Custodes publici non tantum tentoria eorum machinis tractoriis solo aequaverunt, sed etiam sclopetis et gaso lacrimogeno contra populum utebantur. Quot homines illa actione violenta vitam amiserint, nondum constat.

De tensione Russo-Americana

Necessitudines inter Russiam et Civitates Americae Unitas intercedentes in peius conversae sunt. Causa et origo huius tensionis est Edward Snowden, vir Americanus, qui indicia Americanorum ad speculationem pertinentia toti orbi exposuit. Quo facto a Russis asylum politicum petivit idque in unum annum impetravit.

Rixa Hispanorum et Britannorum

Inter Hispaniam et Britanniam discordia de aquis piscatoriis Freti Gaditani sive Gibraltariensis orta est. Quae rixa mense Iulio initium cepit Hispanis contendentibus scopulos artificiales, quos Britanni in illa regione fecissent, suis piscatoribus obesse. Mariano Rajoy, princeps minister Hispaniae, iam minatus est iis, qui Gibraltariam adirent, portorium quinquaginta euronum impositum iri.

Flumina Germaniae puriora

Flumina Germaniae, quae non ita pridem cloacae maximae fere describebantur, his annis multo puriora et salubriora reddita sunt. Cives enim in naturam tutandam benigno animo sunt et legi oboediunt, quae eiectamenta in fluvios emittere vetat. Quo factum est, ut Albis aliaque flumina Germanica piscibus varii generis rursus scaterent.

Praemium Ars Fennica datum

Praemium artis figurativae, quae Ars Fennica appellatur, sculptori Dano Jeppe Hein attribuitur. Eum ex quinque candidatis elegit Akiko Miki, vir Iaponiensis artis peritus. Hein est artifex undequadraginta annos natus, qui iam antea operibus artis et installationibus sibi magnam laudem paravit.

De decerptoribus bacarum

In silvis Finniae hac aestate amplius decem milia hominum peregrinorum in bacis colligendis occupata sunt. Decerptores imprimis e Thailandia venerunt, quod cultus oryzae ibidem hoc tempore anni intermittitur. Intra octoginta fere dies, quos in Finnia manebunt, quaestus illorum operariorum gravi labore assuetorum etiam ternorum milium euronum fore aestimatur.

Certamina athleticae mundana

Inde a die decimo huius mensis (10.8.) in urbe Moscua certamina mundana athleticae campestris celebrantur. Longum est enarrare, quis in quoque ludendi genere inter ceteros eminuerit. Quod ad athletas Finnos pertinet, successus eorum modestus fuit, sed meliora de iaculo emittendo speratur, de cuius principatu die Saturni (17.8.) dimicabitur.

Reijo Pitkäranta

9.8.13

Mugabe potestatem non dimittit

Robertus Mugabe, undenonaginta annos natus, Zimbabuiae iam triginta tres annos praeest. Comitiis praesidentialibus nuper factis in novum quinquennium creatus est, cum unam et sexaginta centesimas (61%) suffragiorum accepisset. Morgan Tsvangirai, dux oppositionis, tantum triginta quattuor (34%) centesimas obtinuit. Oppositio vult, ut exitus comitiorum in tribunali examinetur.

Hasan Ruhani novus Iraniae praesidens

Nationes occidentales sperant fore, ut Hasan Ruhani, novus praesidens Iraniae, qui moderatior est praedecessore, consultationes de programmate nucleari promoveat. Credunt programma Iraniae ad arma nuclearia spectare, Irani autem dicunt propositum suum esse energiam producere. Propter sanctiones ab occidentalibus positas oeconomia Iraniae male vacillat. Praesidens Ruhani indicavit se velle relationes ad occidentem meliores reddere. Sanctiones autem ab occidentalibus non mitigabuntur, nisi Irania de uranio locupletando omnino desierit, sicut Consilium securitatis Nationum Unitarum flagitavit. De politica nucleari in Irania imprimis aiatolla Ali Khamenei constituet, quocum Ruhani esse videtur familiaris.

Berlusconi in carcerem damnatus

Iudicium supremum Italiae poenam carceris confirmavit, qua Silvio Berlusconi, pristinus minister primarius, in tribunali inferiore ob fraudes fiscales damnatus erat. Poena est unius anni. Berlusoni autem, cum sit iam septuaginta sex annorum, in carcerem non conicietur sed in custodia domestica retinebitur. Iudicio facto Berlusconi furibundus affirmavit se victimam innocentem esse et in accusationibus et iudiciis nihil veri esse. Cum iam timeretur, ne regimen coalitionis, in quo etiam factio Berlusconiana (PDL) sedet, in crisim incideret, Berlusconi fautoribus suis nuntiavit necesse esse, ut regimen opus suum pergeret.

Antisemitismus in Hungaria augetur

In Hungaria, ubi plus centum milia Iudaeorum vivunt, antisemitismus augetur. Praecipue Iudaei iuniores ideo patriam relinquunt. Etiam singulae contra Iudaeos aggressiones exstiterunt. Exeunte bello mundano secundo quingenta milia Iudaeorum inter paucas septimanas in castra carceralia ex Hungaria deportati sunt, ipsis Hungaris cooperantibus. Antisemitismus Hungariae veteres habet traditiones.

Conventus XIII ALF Vindobonae celebrabitur

Conventus XIII Academiae Latinitati Fovendae a die duodevicesimo usque ad diem vicesimum primum mensis Septembris (18-21.9.) in Universitate Vindobonensi celebrabitur. Conventus inaugurabitur in aula Academiae Scientiarum Austriacae, relationes autem et orationes, quarum argumentum generale est “De laudibus”, in sedibus Universitatis fient. Conventus concludetur excursione Carnuntina.

Annus scholasticus incipit

Feriis aestivis in Finnia transactis semestre autumnale scholarum his diebus incipit. In urbe Helsinki discipuli et magistri Idibus Augustis (13.8.) in scholas revertuntur. Nuntii Latini, qui anno millesimo nongentesimo undenonagesimo (1989) in Finnia initium habuerunt, vicesimum quintum annum iam septimana proxima incohaverunt.

Tuomo Pekkanen

2.8.13

His diebus in Europa duae calamitates viariae gravissimae intra breve tempus acciderunt. Primum quidem in Hispania undeoctoginta homines mortui sunt, cum tramen epibaticum in quendam anfractum ferriviarium tanta velocitate pervenit, ut statim exorbitaret et omnino subverteretur. In Italia autem autoraeda longa peregrinatores vehens e causa ignota prope urbem Abellinum de ponte praecipitata est, quo factum est, ut duodequadraginta vectores vitam amitterent.

(Reijo Pitkäranta)

De consultationibus pacis

Consultationes pacis, quae inter Israelianos et Palaestinenses abhinc tres annos agi desitae sunt, in urbe Washington rursus continuantur. Iis praeest John Kerry, minister a rebus exteris Civitatum Americae Unitarum. Benjamin Netanyahu, princeps minister Israelis, amplius centum milites Palaestinenses bello captos liberatum iri promisit, ut illa colloquia faciliora reddedentur. Sunt autem in utraque parte, qui paci in Oriente Proximo faciendae vehementer adversentur.

(Reijo Pitkäranta)

De armis chemicis Syriae

Ordo Nationum Unitarum a regimine Syriae licentiam arma chemica in Syria inspiciendi accepit. Quanam autem via et ratione examinatores rerum periti mandatum suum exsecuturi sint, nondum constat. Ban Ki-moon, secretarius illius ordinis generalis, a Syris identidem flagitavit, ne ullo modo impedirent, quominus Nationes Unitae in omnem armorum chemicorum usum in Syria inquirerent.

(Reijo Pitkäranta)

Papa Franciscus in Brasilia

Franciscus I, Pontifex Maximus in Argentina natus, iter quinque dierum in Brasiliam suscepit, ut fidem catholicam in terris Americae Latinae confirmaret. Die Dominico (28.7.) sermonem valedictorium in metropoli Flumine Ianuario habuit, quo tres fere miliones hominum ad eum audiendum convenerant. Ibi eodem tempore dies festi iuvenum orbis terrarum celebrabantur.

(Reijo Pitkäranta)

Princeps hereditarius Georgius

Die vicesimo secundo mensis Iulii (22.7.) Catherine, ducissa Cantabrigiensis, in nosocomio Londiniensi filium primigenitum peperit, qui tertius in ordine hereditario regni Britanniae est. Postea nuntiatum est principi recens nato nomen Georgium inditum iri. Neque multo post, quam mater cum infante e clinica domum reverterat, regina Elisabeth II ad filium nepotis sui videndum venit.

(Reijo Pitkäranta)

Error lunaticus res vera

Opinio eorum, qui errorem lunaticum rem fabulosam esse negant, fundo scientifico non carere videtur. Investigatores enim Universitatis Basileensis experimentis factis animadverterunt luna plena fere fieri, ut homines solito tardius somnum caperent et noctu brevius dormirent. Censent lunam ad mentem nostram tum quoque vim habere, cum eam non videamus aut cum ignoremus, quis modus eius sit.

(Reijo Pitkäranta)

7.6.13

De tempestate Europae

Hac aestate ineunte tempestas in Europa multum variavit. In Finnia, imprimis in partibus terrae septentrionalibus, aer tam calidus fuit, ut cives de aestibus molestis et saluti nocentibus publice praemonerentur.

Civitates autem mediae Europae, praesertim Tzekia, Austria, Germania, imbribus et inundationibus vexatae sunt, quibus complures homines vitam amiserunt et multa milia domum relinquere coacta sunt.

(Reijo Pitkäranta)

Tumultus in Turcia orti

In urbe Constantinopoli nec non Ancyrae, in capite Turciae, reclamationes violentae contra regimen et ministrum principem Recep Erdogan ortae sunt. Custodes publici, ut illos tumultus componerent, adversus populum gaso lacrimogeno et iaculatris aquaticis usi sunt, quo factum est, ut multa dena hominum graviter laederentur.

(Reijo Pitkäranta)

De statu Lettoniae novo

Nihil iam impedit, quin Lettonia anno proximo ad societatem euronis accedat. Censet enim Commissio Europaea illam civitatem condicionibus societatis ineundae iam satisfacere, sed decretum officiale de ea re non ante quam die nono mensis Iulii (9.7.) fiet.

(Reijo Pitkäranta)

Sarinum in Syria adhibitum

Bello civili Syriae sarinum sive gasum nervosum in usu fuit, si rerum peritis Francogalliae et Britanniae fides facienda est. Neque tamen cognosci potuit, utra pars belligerantium ad illud armorum chemicorum genus adhibendum confugisset. Americani autem adhuc dubitant, quidnam de re cogitent.

(Reijo Pitkäranta)

Jansa corruptionis convictus

Janez Jansa, pristinus princeps minister Sloveniae, iudicio eiusdem terrae largitionis acceptae convictus et vinculis duorum annorum damnatus est. Agitur de commerciis armorum, quae is anno bis millesimo sexto (2006) cum societate Finnica nomine Patria fecit. Crimen corruptionis ei illatum Slovenis, qui difficultatibus oeconomicis laborant, magno odio fuit.

(Reijo Pitkäranta)

De re scholastica Russiae

Ex lege a duma Russiae nuper perlata vestis scholaris omnibus scholis Russicis denuo proximo autumno usu recipienda erit. Unione Sovietica dissoluta discipuli ad libidinem suam vestiri siti sunt, nunc autem habitus scholaris obligatorius ad inaequalitatem inter familias divites et pauperes deminuendam necessarius vulgo putatur. De specie vestis novae nondum constat.

(Saara Honkanen)

Aquae ad natandum purissimae

Unio Europaea investigationem faciendam curavit ad cognoscendum, ubinam Europae aquae ad natandum purissimae invenirentur. In comparatione respiciebatur, quanta esset copia bacteriorum in lacubus, fluminibus, litoribus marinis singularum civitatum. Victoriam certaminis reportavit Cyprus, sed etiam lymphae natatoriae in Luxemburgo et Croatia limpidissimas se praebuerunt. Pessima autem rerum condicio in Belgio, Britannia Hollandiaque reperta est.

(Reijo Pitkäranta)

31.5.13

De inopia quaestus iuventutis Europaeae

Herman van Rompuy, praesidens Unionis Europaeae, moderatores civitatum membrorum hortatur, ut consilia capiant, quibus inopia quaestus iuventutis opprimatur. In Graecia et Hispania tertius quisque nondum viginti quinque annos natus opere caret, in tota Unione quintus quisque. Numerus iuvenum opere carentium quinque miliones et dimidium in Europa superat.

Ecclesia Angliae episcopos feminas proponit

Ecclesia Angliae suadet, ut ante annum bis millesimum quintum decimum (2015) feminae ad officium episcopi creari possint. Adhuc proximo mense Novembri ecclesia idem propositum reiecit. Novum consilium in synodo mense Iulio tractabitur. Quaestio de feminis episcopis ecclesiam Angliae per duo decennia divisit. Anno millesimo nongentesimo nonagesimo secundo (1992) ecclesia Angliae feminas in sacerdotium ordinandas probavit, sed episcopatum illis negavit. Ex demoscopia mense Martio in actis Sunday Times divulgato apparuit octoginta centesimas Britannorum feminas episcopos comprobare. Ecclesia Anglicana in Australia, Nova Zelandia, Canada USAque episcopos feminas iam habet.

An atheistae salventur necne

Summus Pontifex Franciscus nuper (22.5.) in homilia dixit etiam atheos, si bonum facerent, salvari. Deum hominem ad imaginem et similitudinem suam creavisse, sanguine Christi omnes redemptos esse, non tantum catholicos sed omnes, etiam atheistas. Quae verba Summi Pontificis per instrumenta communicativa ilico pervagata ab atheistis laudabantur. Postea autem Thomas Rosica, nuntius Vaticanus, in publicum prodiit et asseveravit verba papae perperam explanata esse. Propositum illius non fuisse colloquium theologicum de salvatione hominis excitare. Homines, qui quidem ecclesiam catholicam novissent sed ab illa separati manerent, salvari non posse.

Ova gallinacea saluti non nocent

Ex investigatione recens facta ova gallinacea, licet cotidie sumantur, homines morbis cardiovascularibus non exponunt. Fieri tamen potest, ut periculum diabetis aetatis adultae tum augeatur. Antea ova gallinacea corde laborantibus periculosa habebantur, sed hodie constat sanguinis cholesterolum nocivum per cholesterolum ex cibo sumptum minime aut non omnino augeri.

Magnus asteroides Terram praetervolat

Asteroides (1998 QE2), longitudine circiter duorum chiliometrorum septingentorum metrorum, hodie (31.5.) Terram praetervolat, ex qua, cum proximus est, paene sex milionibus chiliometrorum distat. Illa distantia quindecies tanta est quanta longitudo itineris ex Terra in Lunam. Itaque, quamvis in spatio cosmico relative prope Terram veniat, illi non imminet.

Vita Adelis palmam auream reportavit

In festivali cinematographico Cannesiano praemium principale sive palma aurea data est pelliculae La vie d’Adèle, Vita Adelis, in qua amores Adelis, puellae quindecim annorum, in Emmam, feminam iuvenem, sensualiter et audacter narrantur. Primas partes, moderante Abdellatif Kechiche, agunt Lèa Seydoux et Adèle Exarchopoulos.

Tuomo Pekkanen

24.5.31

Oclahoma procella afflicta

Oclahoma, urbs Civitatum Americae Unitarum, tantis venti turbinibus afflicta est, ut amplius viginti incolae vitam amitterent et etiam plures in nosocomia deportarentur. Aedificia, inter quae complures domus privatae et duae scholae erant, per singulos vicos deleta sunt. Praesidens Barack Obama decrevit, ut Oclahoma pro regione calamitatis magnae haberetur.

De tumultibus Stockholmiae

In suburbio Stockholmiae Husby appellato tumultus violenti coorti sunt, qui inde in alias quoque regiones manaverunt. Turbatores praecipui videntur fuisse iuvenes alienigenae, qui aedibus et autocinetis incensis atque lapidibus in custodes publicos coniectis magnum detrimentum attulerunt.

FAO: insecta edenda esse

Institutum Nationum Unitarum ab alimonia et agricultura (FAO) relationem divulgavit, qua docet, quam utile hominibus sit insecta edere. Eos, qui tali diaeta utantur, opes naturae minus consumere quam illos, qui carne vescantur. Huc accedere, quod ex insectis satis virium acquiratur et in iis magna copia proteini et aliarum rerum saluti necessariarum insit.

Memoria Richardi Wagner

Die Mercurii sive die vicesimo secundo mensis Maii (22.5.) ducenti anni praeterierant, cum Richard Wagner, musicographus celeberrimus Germanus, Lipsiae natus est. Constat eum magna opera musica toti fere orbi nota composuisse, e quibus hic non nisi tetralogiam commemoramus, cui nomen est Anulus Nibelungorum.

Kyllikki Saari 17.5.1953 occisa

Die septimo decimo huius mensis (17.5.) sexaginta anni acti erant ab homicidio in Finnia omnium famosissimo. Eo enim die anno millesimo nongentesimo quinquagesimo tertio (1953) Kyllikki Saari, puella septendecim annorum, omnino disparuit, donec corpus eius quinque mensibus post in fossam palustrem mersum et caespite coopertum inventum est. Neque investigatoribus umquam explorare contigit, quis illud scelus commisisset.

Dies heroum bello caducorum

Die Dominico (19.5.) in Finnia more solito memoria heroum bello caducorum celebrabatur. In urbe Lappeenranta ille dies eo sollemnior fuit, quod ibi quadraginta duobus viris fortibus bello occisis iusta funera data sunt. Quis autem quisque eorum esset, ex reliquiis non semper iam recognosci potuit.

Nox sine nocte initium cepit

Abhinc unam septimanam (17.5.) in paroechia Utsjoki, quae est pars Finniae maxime septentrionalis, aestas sine nocte, ut dicitur, initium cepit. Sol enim eo mane ortus per septuaginta duos dies continuos supra horizontem remanebit neque prius quam die vicesimo septimo mensis Iulii (27.7.) occidet.

Reijo Pitkäranta

17.5.13

Coniuges Finni ex Iemenia liberati

Coniuges Finni et vir Austriacus, qui mense Decembri in Iemenia vi abducti erant, post captivitatem fere centum quadraginta dierum liberati sunt. Magistratus Finni negant Finniam pretium redemptionis abductoribus solvisse.

Coniuges Leila et Atte Kaleva dicunt se inter abductionem bene tractatos esse. Se cibum bonum et aquam puram accepisse et medicamenta necessaria sibi ministrata esse. Redactor autem actorum Austriacorum "Kurier" rettulit se ab obsidibus audivisse illos interdum catenas habuisse, foris dormivisse et aquam impuram ad bibendum accepisse.

Pessimum fuisse, quod suras sive capitula Corani auscultare cogerentur. De liberatione abductorum, etsi singula nondum sunt nota, imprimis magistratus Omaniani cum abductoribus consultaverant. Omaniani etiam certa pecunia, cuius summa est ignota, illos tres obsides in libertatem redemisse narrantur. Magistratus Finniae civibus suaserunt, ne posthac itinera in Iemeniam temere susciperent.

Greges locustarum Madagascariam occupaverunt

Ingentes greges locustarum insulam Madagascariam occupavisse nuntiatur. Supra insulam circiter centum enormes greges visi sunt, in quibus quingenta miliarda locustarum esse aestimatum est. Unus grex etiam quindecim chiliometra longus esse potest. Agitur de pessima in Madagascaria invasione locustarum his sexaginta annis. Calamitatem effecit typhon, qui mense Februario in insulam incidit et magnas inundationes levavit, quibus condiciones procreationis optimae locustis generatae sunt. FAO (Institutum Nationum Unitarum ab alimonia et agricultura, Food and Agriculture Organization of the United Nations) aestimat locustas maiorem partem frumenti Madagascariensium devoravisse, ex quo penuria cibi dimidio incolarum sive tredecim milionibus hominum immineret.

Finni in Americam ante CCCLXXV annos

Primi Finni in Americam venerunt, cum nautae Sueci et Finni anno millesimo sescentesimo duodequadragesimo (1638) apud hodiernam urbem Wilmington civitatis Delaware in terram egressi sunt. Ibidem Sabbato (11.5.) anniversarius dies huius eventus trecentesimus septuagesimus quintus celebratus est praesentibus rege et regina Sueciae atque praeside parlamenti Finniae Eero Heinäluoma. Inter cenam festivam Joe Biden, vicepraesidens Civitatum Americae Unitarum, orationem habuit, qua audaciam et diligentiam Finnorum et Suecorum laudavit. Extollit Finniam etiam, quod feminas conspicuas inter duces politicos haberet, et Sueciam, quod matrimonia homosexualium inter primas civitates probavisset. Maior ex Finnia in Americam immigratio facta est exeunte saeculo undevicesimo et ineunte saeculo sequenti. Hereditas illorum colonorum adhuc est visibilis e.g. in aedificiis ex trabibus factis. Hodie coloni Finni posterique eorum in Civitatibus Americae Unitis numerantur circiter septingenta quinquaginta milia.

(Tuomo Pekkanen)

10.5.13

Giulio Andreotti mortuus

Giulio Andreotti, qui in negotiis publicis Italiae diutissime versatus erat, pridie Nonas Maias (6.5.) diem supremum obiit nonaginta quattuor annos natus. Socius factionis democratarum Christianorum in parlamentum Italiae iam anno millesimo nongentesimo quadragesimo sexto (1946) creatus est, donec anno nonagesimo primo (1991) titulum senatoris perpetui accepit. Quantum Andreotti in vita publica Italiae auctoritate valuerit, vel inde apparet, quod omnino septies munere ministri principis fungebatur.

Israeliani impetum fecerunt

Septimana vergente Israeliani regiones urbis Damasci septentrionales ictibus aeriis vehementissime lacessebant. Sunt, qui putent hunc impetum ab iis eo consilio factum esse, ut impediretur, ne missilia ex Irania bellatoribus motus Hizbollah suppeditata ad locum destinatum pervenirent. Israeliani autem ipsi recusaverunt, quominus aut aggressionem aut causam eius ullo modo explicarent.

(Reijo Pitkäranta)

Kierkegaard abhinc CC annos natus

Die quinto mensis Maii (5.5.) ducenti anni acti erant, cum Sören Kierkegaard, magnus philosophus et theologus Danus, Hafniae natus est. Longum est enarrare, quot eventis, expositionibus, conventibus memoria illius viri, qui pater existentialismi habetur, hoc anno in Dania recolatur. Sufficiat, ut mentionem faciamus sollemnitatis, qua res gestae eius die Dominico Hafniae honorabantur: huic festo etiam Margareta, regina Daniae, interfuit.

(Reijo Pitkäranta)

Athletica puellarum Saudianarum

Puellis Arabiae Saudianae scholas privatas frequentantibus licentia data est athleticam exercendi, dummodo veste satis tegente induerentur et locis idoneis illi studio operam navarent. Quaestio de hoc iure eis tribuendo aestate proxima orta est, cum ex Arabia Saudiana duae athletae feminae ad ludos Olympicos Londinienses missae essent.

(Reijo Pitkäranta)

De fossili in Brasilia exposito

In urbe Flumine Ianuarii sive Rio de Janeiro fossile integritate sua post hominum memoriam praestantissimum expositum est. Pertinent haec ossa centum decem milionum annorum ad pergrande reptile volatile, cui nomen scientificum est Tropeognatus mesembrinus. Visui nunc patet in Museo Nationali Brasiliae, in quo mense Maio expositio generum animalium emortuorum aperietur.

(Saara Honkanen)

Dies festus matrum celebrabitur

Die Dominico proxime futuro (12.5.) dies festus matrum celebrabitur. Eius rei memor praesidens Finniae Sauli Niinistö triginta quattuor matribus Finniae de liberis educandis optime meritis insigne honoris concessit. Agitur de nomismate primae classis Ordinis Equestris a Rosa Alba. Accipient matres illud ornamentum cruce inaurata decoratum inter caerimoniam publicam, quae Helsinkii ad honorem earum instituetur.

(Reijo Pitkäranta)

3.5.13

Dies veteranorum celebrabatur

Dies festus militum veteranorum in Finnia die vicesimo septimo mensis Aprilis (27.4.) quotannis celebratur. Illo enim die anno millesimo nongentesimo quadragesimo quinto (1945), cum copiae Germanorum ex Lapponia recessissent, pax post longinquum bellum restituta est. In festo veteranorum hornotino orationem habuit praesidens Sauli Niinistö.

Monuit fortitudinem veteranorum non tantum ex rebus fortiter gestis constitisse sed fuisse longinquam et cotidianam, cum per menses, immo annos, scirent quemvis diem ultimum esse posse, vitam iuvenem finiri, antequam bene coepisset. – Milites veterani adhuc superstites sunt in Finnia duodequadraginta milia (38.000). Aetas eorum media est nonaginta annorum.

Regina abdicavit, vivat rex!

Exeunte mense Ianuario Beatrix, regina Hollandiae, nuntiavit se regno abdicaturam esse. Pridie Kalendas Maias (30.4.) filio Villelmo-Alexandro, principi Oraniae (Orange), solium regale cessit. Ex demoscopio recens facto undenonaginta centesimae (89%) Nederlandiensium dicunt novum regem sibi gratum esse. Post plus centum viginti annos Hollandia primum a rege regnatur. Nam rege Villelmo III anno millesimo octingentesimo nonagesimo (1890) mortuo coniux eius Emma pro filia Villelmina regnavit, donec post octo annos (1898) illi potestatem regiam dedit; Villelmina post quinquaginta annos (1948) regnum filiae suae Iulianae cessit, illa autem anno millesimo nongentesimo octogesimo (1980) Beatrici filiae.

Novum regimen Italiae constitutum

Post longas et difficiles consultationes inter partes politicas Italiae de novo regimine constituendo tandem convenit. In regimine, cui praeest Enrico Letta, intersunt unus et viginti ministri ex factionibus sinistro-centralibus. Silvio Berlusconi non includitur, sed ex factione eius (PDL) regimini insunt quinque ministri. Novi ministri iusiurandum coram praesidente Napolitano die Dominico (28.4.) iuraverunt. Eo ipso tempore apud palatium Chigi, sedem regiminis, quae haud procul a palatio praesidentis abest, vir quidam pistolio duos vigiles vulneravit, antequam deprehensus est. Interrogatoribus confessus est se ira contra politicos inductum esse, ut id faceret.

De fraude fiscali coercenda

Jutta Urpilainen, ministra aerarii Finniae, colloquium internationale Helsinkium convocavit, in quo de fraude fiscali impedienda actum est. Commissio Unionis Europaeae iam mense Decembri bellum contra fraudes fiscales suscepit. Ministri aerarii et moderatores de consiliis contra paradisos fiscales utendis mense Maio constituent. Commissio aestimat terras Unionis propter evasionem et occultationem vectigalium quotannis millena miliarda euronum amittere. Ut fraudes impedirentur, programma adumbravit, sed vix umquam fieri poterit, ut omnes pecuniae absconditae recipiantur. Sed etiamsi pars tantum recuperata erit, Unio Europaea complura centena euronum miliarda accipiet.

(Tuomo Pekkanen)

26.4.13

Napolitano iterum praesidens Italiae

Moderatores Italiae politici praesidentem Giorgio Napolitano appellaverunt, ut ad crisim politicam solvendam candidatus praesidentatus esse dignaretur. Cum ille annuisset, delegatis parlamentariis sexto suffragio tandem contigit, ut praesidentem eligerent.

Napolitano, qui primus est praesidens Italiae iterum electus, ex mille septem (1007) votis septingenta duodequadraginta (738) accepit. Praesidens Napolitano, octoginta septem annos natus, anno bis millesimo sexto (2006) undecimus praesidens rei publicae Italiae in septem annos electus est. Iusiurandum praesidentiale eodem anno Idibus Maiis (15.5.) iuravit. Est primus praesidens Italiae, quod factionis communisticae membrum fuerat. Anno bis millesimo quinto (2005) senator in totam vitam nominatus est.

Iuvenis suspectus facinoris Bostoniensis captus est

Dzohar Tsarnajev, iuvenis undeviginti annorum, suspectus facinoris Bostoniensis, a custodibus publicis nocte Sabbati (20.4.) in suburbio Watertown deprehensus est. Frater eius Tamerlan, eiusdem facinoris suspectus, pridie, cum iam capiebatur, occisus erat. Quibus rebus cognitis, cives Bostonienses in viis urbis laetabantur et exsultabant. Si Dzohar Tsarnajev in iudicio sceleris Bostoniensis convictus erit, fieri poterit, ut capitis damnetur. Immanitas facinoris et magnus numerus victimarum poenam mortis commendant, sed contra sunt aetas eius iuvenilis, vita antea integra nec non quod excogitator ictuum principalis non habetur.

Ictus territorum in Canada impeditus

Duo viri, qui ictum contra tramen Canadense moliebantur, a custodibus publicis capti sunt. Unus deprehensus est in urbe Toronto, alter Monte Regali (Montreal). Consilia ad scelus praeparandum a gregibus cum al-Qaida iunctis, qui sunt in Irania, acceperant. Nihil tamen ostendit moderatores Iraniae cum illis viris cooperatos esse.

An delator sit iudicibus tradendus

Iudicium Hispanicum deliberat, an Hervé Falciani, designator programmatum, qui de furto clandestinarum rationum argentariarum accusatur, in Helvetiam tradendus sit. Illis rationibus palam factis ingentes pecuniae, ab exactoribus absconditae, in lucem venerunt. Itaque in Hispania, Francia Italiaque complures centeni miliones euronum in aerarium exigi potuerunt. Actor publicus Hispaniae iudicibus affirmavit illum Falciani eo ipso modo egisse, quo ex lege agendum esset.

Etiam ministerium exactorium Hispaniae resistit, ne Falciani magistratibus Helvetiae tradatur. Immo gratias illi agit, quod auxilio illius ducenti quinquaginta miliones in aerarium Hispaniae publicum pecuniis propemodum defectum recepti sint. In Francia et Italia exactores multo maiores pecunias clandestinas invenerunt. L’Express, acta diurna Francorum, scripsit delatorem Falciani esse virum, cuius revelationibus tota planeta concussa esset. Helvetii autem, quorum domus argentariae multa euronum miliarda ab exactoribus peregrinis abscondiderant, eum nefarium habent.

(Tuomo Pekkanen)

19.4.13 (Bulletins after this date have normally not been glossed on wordchamp)

Bombae Bostoniae displosae

Die Lunae (15.4.) Bostoniae, in urbe Civitatum Americae Unitarum, duae bombae displosae sunt, quibus tres homines occisi et saltem centum septuaginta graviter vulnerati sunt. Ictus terroristicus sub finem cursus Marathonii accidit, cum maior pars athletarum iam metam tetigisset.

Omnino viginti septem fere milia hominum ei certamini interfuerunt. Praesidens Barack Obama de caede certior factus in Aedibus Albis conventum nuntiis divulgandis habuit, inter quem dixit nondum liquere, utrum illud facinus ab aliquo grege domestico perpetratum esset an sceleris architectus inter terroristas peregrinos inveniretur.

(Reijo Pitkäranta)

Maduro praesidens electus

Novus praesidens Venetiolae electus est Nicolas Maduro, socius praesidentis Hugo Chavez, qui nuper e cancro mortuus est. Quam anceps victoria illius fuerit, inde apparet, quod suffragiorum unam et quinquaginta centesimas (51%) sibi paravit, cum adversarius eius Henricus Capriles circiter undequinquaginta centesimas (49%) obtineret.

(Reijo Pitkäranta)

Statua papae Ioannis Pauli II

Poloni ad honorem papae Iohannis Pauli II magnam statuam posituri sunt, quae in urbe Czestochova collocabitur. Hoc monumento paene quattuordecim metra alto ille vir passis manibus stans fingitur, tamquam omnes homines complexu et sinu suo recipiat. Constat papam Ioannem Paulum II anno bismillesimo quinto (2005) mortuum natione Polonum fuisse.

(Reijo Pitkäranta)

Inventa in Aegypto archaeologica

Archaeologi Francogalli et Aegyptii in litore Maris Rubri portum abhinc quattuor milia quingentos annos aedificatum invenerunt. Existimant eum eodem tempore in usu fuisse, quo Cheops, rex Aegypti, pyramidem Gizam erigendam curavit. Haud procul a portu idem investigatores etiam papyrym litteris hieroglyphicis exaratam reppererunt, qua vetustior papyrus ex Aegypto non est nota.

(Reijo Pitkäranta)

De aeriportu Helsinki-Vantaa

Aeriportus Helsinki-Vantaa optimus omnium in Europa septentrionali aerodromorum electus est. In comparatione autem totius Europae locum sextum sibi paravit. Talis erat eventus percontationis duodecim fere milionibus viatorum factae. Vectores interrogati sunt, quam commode se in diversis aeriportibus ministratos esse sentirent et quam expedite iter suum successisse putarent.

(Reijo Pitkäranta)

Vis vocis cuiusdam Anglicae

Momentum linguae Anglicae in Finnia effecit, ut vocabulum "pliis" in lingua vulgari non iam modo a feminis urbium Finniae australis adhiberetur. Secundum investigationem in Universitate Helsinkiensi peractam haec vox in tota terra Finnisque omnis aetatis cognita est. Dicit autem Elisabeth Peterson, lectrix philologiae Anglicae, Finnos hoc vocabulum maiore vi usurpare quam ipsos Anglos.

(Antti Ijäs)

12.4.13

Margaret Thatcher mortua

Margaret Thatcher, pristina princeps ministra Britanniae octoginta septem annos nata, die Lunae (8.4.) mane diem supremum obiit. Causa mortis nuntiatur fuisse infarctus cerebri. Thatcher, qua duce factio conservativa electiones parlamentares ter vicit, Britanniae duodecim annos praefuit, scilicet inde ab anno millesimo nongentesimo undeoctogesimo usque ad annum millesimum nonagesimum (1979-1990).

Niinistö in Sinas iter fecit

Praesidens Finniae Sauli Niinistö iter statale in Sinas suscepit. Ibi collegam suum Xi Jinping convenit et cum eo de necessitudinibus inter utramque civitatem intercedentibus, de oeconomia Unionis Europaeae, de rebus internationalibus collocutus est. Dum haec geruntur, orta est etiam quaestio, qualis esset rerum in Corea Septentrionali condicio. Censuit Xi Jinping Coreanis communistis orationes suas infestissimas temperandas esse.

De rebus politicis Francogalliae

Auctoritas regiminis Francogalliae valde deminuta est, postquam minister quidam se fraudatorem tributorum praebuit. Quae res non solum auram popularem omnium administratorum debilitavit, sed etiam praesidens Francois Hollande ex ira publica propter scandalum orta laborare coepit.

Pygmaei sibi iura postulant

Pygmaei, homines statura brevissimi, qui in dumetis Rei publicae Congoensis habitant, sibi iura politica flagitare coeperunt. Postulant enim, ut ex suis quoque tribubus delegati in consilium civitatis administrandae cooptentur. Ita fieri posse, ut opes naturae in Congoa repertae Pygmaeis quoque prosint et etiam in Congoa suum cuique tribuatur.

‘Heros laboris’ restitutus

Praesidens Russiae Vladimir Putin decrevit, ut titulus honorarius ‘Heros laboris’ nuncupatus in Russia usu reciperetur. “In Unione Sovietica”, inquit, “vocabulum ‘Herois laboris socialistici’ habebamus, et mihi quidem videtur id iustissimum fuisse.” Constat illum honorem annis nonagesimis, postquam Unio Sovietica collapsa est, oblitteratum et memoria privatum esse.

De victu salutari mediterraneo

Investigatores Hispani novis indiciis comparatis ostendere potuerunt genus victus mediterraneum multum ad salutem cordis conferre. Qui enim eam diaetam sequuntur, rarius morbis cardiovascularibus implicantur. Ad talem victum pertinent olus, oleum olivae, piscis, frumentum e granis integris constans.

Ver solito serius venire videtur

Quamvis magna pars mensis Aprilis iam praeterierit, vix ulla signa veris in natura Finniae conspiciuntur. Immo, etiam nunc agri silvaeque acervis nivium cooperta, flumina, lacus, maria glacie crassa concreta sunt. Neque aves migratoriae tempore solito huc reverterunt, sed in partibus Europae meridionalibus adhuc exspectant, donec hiems in terris septentrionalibus paululum mitescat.

(Reijo Pitkäranta)

5.4.13

Corea Septentrionalis Contumax

Cum Corea Septentrionalis mense Februario tertium experimentum nucleare fecisset, sanctiones contra eam a nationibus occidentalibus amplificatae sunt. Tum Coreani Septentrionales Americanis et confoederatis eorum verbis durissimis minitari coeperunt. Ira eorum aucta est, cum aeroplana Americana bombifera exercitia militaria in Corea Meridionali haberent. Illa aeroplana, quae radari propemodum invisibilia sunt, ex statione militari Missuriana surrexerunt et Oceano Pacifico transvolato bombas in insulam Pyeontaek demiserunt. Americani nuntiaverunt illis exercitiis demonstratum esse exercitum suum aërium, si opus esset, e longinquo ictus exactissimos celeriter efficere posse. Kim Jong-un, dictator Coreanorum Septentrionalium, iam suis praecepit, ut rochetae missiliaque in promptu ponerentur. Die Sabbati (29.3.) Corea Septentrionalis nuntiavit statum belli sibi cum Corea Meridionali esse et intentabat conflictum militarem et bellum nucleare, si provocationes hostiles in confinio terrarum fierent. Meridionales Coreani responderunt in illis minis nihil novi esse. Moderatores Americani censebant propositum Coreae Septentrionalis veri similiter nihil aliud esse, nisi potestatem dictatoris Kim Jong-un fulcire. Et Sinenses et Russi utramque partem hortati sunt, ut cooperarentur, ne status rerum in peius verteretur.

Urbi et orbi

Papa Franciscus missam paschalem in platea Petriana Civitatis Vaticanae Latine celebravit. Postea coram ducentis quinquaginta milibus hominum ex medio maeniano Basilicae Sancti Petri urbi et orbi sollemnem benedictionem Italice pronuntiavit. Imploravit pacem toti terrarum orbi, ut dissensiones superarentur et spiritus reconciliationis renovatus maturesceret. “Petamus a Iesu”, inquit, “ut mortem in vitam, odium in amorem, ultionem in veniam, bellum in pacem convertat.” Oravit pacem inter Israelianos et Palaestinenses, ut finem conflictui imponerent, in Iraquiam, ut violentia finiretur, in Syriam et numerosis profugis, auxilium et consolationem exspectantibus.

Oeconomia Germaniae crescit, Francia et Italia lente protrahuntur

In grege septem terrarum industrialium (G7) Iaponia et USA rebus oeconomicis excellunt. Terrae Eurozonae in duas partes divisae sunt, nam oeconomia Germaniae hoc anno plus quam duabus centesimis (2%) crescit, cum in Francia et Italia crementum adhuc haesitet. Apud Sinenses autem augmentum plus octo centesimarum (8%) fore praedictum est.

Louvre ex museis anno 2012 frequentissimum

Louvre, museum Parisiense, fuit anno proximo ex omnibus museis frequentissimum. Acta Britannica “Art Newspaper” rettulerunt prope decem miliones (9,7) hominum illud museum visitavisse. Hic numerus una fere milione maior fuit quam anno ante. Secundum locum tenebat New York Metropolitan Museum of Art, quod tria musea Londiniensia sequebantur.

Tuomo Pekkanen

22.3.13

Papa Franciscus inthronizatus

Papa Franciscus die Martis (19.3.) in Civitate Vaticana inthronizatus est. Missam inauguralem concelebraverunt omnes cardinales Romae praesentes, patriarchae, archiepiscopi non cardinales, magistri generales ordinum religiosorum, ut Societatis Iesu et Ordinis Fratrum Minorum. Aderant moderatores politici et centum triginta duae legationes ex variis orbis terrarum partibus.

Decies centena milia peregrinorum Romam ad inthronizationem Papae videndam advenisse aestimatur. Finniam repraesentavit Alpo Rusi, qui delegatus Finniae est tam in Helvetia quam apud Sanctam sedem. In Plateam Petrianam circiter ducenta milia hominum congregati erant. Securitatem tria milia custodum vigilabant.

Summa homiliae, quam Papa habuit

Anulo piscatoris accepto Papa homiliam viginti fere minutarum habuit. Gratias egit de praesentia moderatoribus variarum terrarum, operariis ecclesiae et repraesentatoribus societatum. Monuit Iosephum de Iesu curavisse et protectorem fuisse familiae. Ita homines Deo se ipsos protegere permitterent, ut alios adiuvare possent. Omnes de omni creatura tutanda responsales esse. Imprimis tutandos esse infantes, senes et pauperes atque naturam. Bonitatem non esse hominibus timendam sed bonitati et clementiae cor dandum esse. Summi Pontificis esse omnes protegere, praesertim pauperes et debiliores. Denique Papa petivit, ut omnes pro se orarent.

Cyprus condiciones auxilii reiecit

Ministri aerarii publici Eurozonae atque Fundus Monetarius Internationalis (FMI) ad oeconomiam Cypri salvandam decem miliarda dollarorum promiserant. Condicio autem erat, ut pecuniae in argentariis depositae vectigal imponeretur. Depositiones viginti milibus euronum minores vectigali liberae essent, summis inter viginti et centum milia euronum vectigal esset minus quam septem centesimae (6,75%), maioribus paene decem (9,9%). Parlamentum autem Cyprium hanc condicionem reiecit, etsi oeconomia insulae pessime vacillat. Cives apud parlamentum congregati, qui pro pecuniis suis timent, sententiam parlamenti exsultantes acceperunt. Maximum damnum ex novo vectigali caperent oligarchi Russi eorumque protectores, qui viginti septem miliarda dollarorum in Cypro deposuerunt.

Aurora borealis caelum Finniae illuminavit

Septimana ineunte Aurora borealis caelum nocturnum totius Finniae illuminavit. In Lapponia aliisque regionibus arcticis hoc phaenomenon est tempore hiemali commune, sed in Finnia meridiana admodum rarum. Aurora borealis oritur, cum particulae ex sole venientes in campum Terrae magneticum in altitudine amplius centum chiliometrorum irruunt. Res periegetica Finniae septentrionalis his annis quam maxime floret, cum Aurora borealis peregrinos attraxerit. Praecipue Iapones in Lapponiam influunt, ut ignes caeli nocturnos admirentur. Sed etiam ex Britannia plurimi imprimis propter Auroram borealem veniunt. Anno proximo numerus periegetarum in Finnia septentrionali triginta fere centesimis auctus est.

(Tuomo Pekkanen)

15.3.13

Novus papa Franciscus 1

Die Mercurii vesperi (13.3.) in Civitate Vaticana novus Pontifex Romanus creatus est Jorge Maria Bergoglio, cardinalis Argentinus septuaginta sex annos natus, qui antea munere archiepiscopi urbis Bonaeropolis fungebatur. Neque umquam ante accidit, ut aut sacerdos iesuita aut vir ex continenti Americana oriundus Sedi sanctae imponeretur. Nomen, quo Bergoglio papa factus se appellari vult, est Franciscus I.

In eo eligendo caerimoniae antiquitus traditae diligenter observabantur: primum quidem fumo albo e fornace Cappellae Sixtinae emisso suffragium papale feliciter peractum esse significabatur, et deinde campanae Basilicae Sancti Petri sonare coeperunt. Paulo post e maeniano eiusdem ecclesiae coram multis milibus hominum in aream Petrinam congregatorum haec verba Latina pronuntiata sunt: ”Annuntio vobis gaudium magnum: Habemus papam!”

(Reijo Pitkäranta)

Ira Coreanorum septentrionalium

Coreani septentrionales pactum bello abstinendi cum Corea Meridionali annis nonagesimis factum revocaverunt et lineam telephonicam necessitatis inter utramque civitatem intercedentem abruperunt. Ira enim incensi sunt propter sanctiones sibi impositas et exercitationes militares, quas Americani cum Corea Meridionali susceperunt.

(Reijo Pitkäranta)

Suffragium in Insulis Falclandicis

Incolae Insularum Falclandicarum paene ad unum omnes regionem suam partem Britanniae manere volunt. Nam suffragio populi ibidem habito non nisi tres homines ex mille sescentis insulanis, quibus ius suffragandi erat, contra statum quo sententiam tulerunt. Argentini autem, qui hoc archipelagus suae dicionis esse autumant, illud suffragium illegale habent.

(Reijo Pitkäranta)

Consultum Parlamenti Europaei

Propositum pecuniae dispensandae, quod Consilium Europaeum mense Februario fecerat, a Parlamento Europaeo reiectum est. Legati enim parlamentares flagitant, ut illa rogatio, antequam in septem annos proxime futuros (2014-2020) comprobari possit, compluribus locis mutatis corrigatur.

(Reijo Pitkäranta)

Programma quoddam linguisticum

Investigatores Americani et Canadenses programma computatorium composuerunt, cuius ope linguae primigeniae reconstrui possunt. Algorithmus vocabula cognata automatice agnoscit et ex mutationibus phonologicis compertis formam principalem methodis statisticis usus concludit. Programma in iis linguis, quibus incolae Oceaniae at Asiae inter meridiem et solis ortum sitae loquuntur, feliciter probatum est.

(Antti Ijäs)

Aer in Finnia valde posthiemat

Iam Idus Martias (15.3.) habemus et aequinoctium vernum appetit. Quae quamvis ita sint, aer in Finnia nondum vernat, sed potius valde posthiemat, si respicis, quanta frigora noctes diesque mensuremus et quam altae nives etiam in regionibus terrae meridionalibus adhuc remaneant. Credideris mensem Ianuarium aut Februarium apud nos usque continuari.

(Reijo Pitkäranta)

08.03.2013

Sedes Petriana vacat

Postquam Benedictus XVI pridie Kalendas Martias papa emeritus factus est, Sanctam Sedem curat atque administrat Camera Apostolica, donec novus summus pontifex eligatur. Illius Camerae praeses est cardinalis camerarius Tarcisio Bertone.

Congregationes cardinalium ad conclave praeparandum die Lunae (4.3.) in Civitate Vaticana initium ceperunt. Suffragium in conclavi habent omnes cardinales nondum octoginta annos nati, numero centum septendecim, ex quibus centum quindecim (115) adsunt. Cardinales in Residentia Vaticana Sanctae Marthae pernoctant, conclave in Cappella Sixtina habetur. Neque illis ex Civitate Vaticana exire licebit, antequam novus papa electus erit. Vetitum est etiam telephonulo vel interreti uti et acta diurna legere. Terrae, quarum repraesentatores conclavi intersunt, numerantur una et quinquaginta (51). Electores Europaei sunt sexaginta (60), ex quibus Itali undetriginta (29). Ad electionem necesse est accipere duodeoctoginta (78) vota sive duas tertias partes omnium suffragiorum. Veri simile est conclave inceptum iri proximo die Lunae, mensis Martii undecimo.

Hugo Chávez obiit

Hugo Chávez, praesidens Venezuelae duodesexaginta annos natus, postquam diu cancro laboravit, die Martis (5.3.) mortuus est. Venezuelae quattuordecim annos praefuit. Mense Octobri in novum praesidentatum electus est, sed viribus defectus ius praesidentiale non praestitit. Nova comitia praesidentialia intra triginta dies ex lege fieri debent.

Germania: Zona Schengen ne amplificetur

Germania non vult, ut Bulgaria et Romania ad pactum Schengen admittantur. Hans-Peter Friedrich, minister rerum interiorum Germaniae, dixit causam esse corruptionem illarum terrarum. Praeterea Germani timent, ne commeatu concesso magnus numerus immigratorum propter condiciones vitae imprimis Germaniam petant, ubi commoda socialia sunt meliora.

De exsistentiae Satanae

Qui apud ecclesiam Finnicam evangelico-lutheranam operantur, firmius quam populus Finnorum in exsistentiam Satanae credunt. Ex illis duodeseptuaginta centesimae (68%) Satanam existere firmiter credunt, tantum duae centesimae negant, quattuor centesimae dubitant. Ex populo autem tantum una et triginta centesimae (31%) Satanam existere putant.

Ambulatio medicina memoriae

Investigationes medicae ostendunt exercitationem corporis regularem non tantum valetudini corporis sed etiam cerebro utilem esse. Ambulationem strenuam esse optimam memoriae medicinam. In multis studiis tam Finnicis quam peregrinis notatum est hippocampum sive illam cerebri partem, quae memoriam dirigeret, motui corporis regulari ita respondere, ut tumesceret. Activitatem physicam retardare, ne memoria et actiones cum illa coniunctae debilitarentur, et ita periculum morbi Alzheimeriani deminuere. Itaque, si morbis memoriae, qui proprii sunt senectutis, obstare volumus, exercitatio corporis aetate media, si serissime, incipienda est. Ambulatio semihorae quinquies singulis septimanis est facile remedium.

(Tuomo Pekkanen)

01.03.2013

Comitia Italiae Parlamentaria

Septimana vergente in Italia comitia parlamentaria facta sunt. Pier Luigi Bersani, praeses coalitionis partium mediarum et sinistrarum, tam in senatu quam in camera parlamenti inferiore sibi et suis plurimas quidem sedes conciliavit, sed victoria minor erat quam ut ille novum regimen formare posset.

Nam pari fere fortuna certavit pristinus princeps minister Silvio Berlusconi cum confoederatione sua dextra. Etiam motus politicus ‘Quinque stellae’ appellatus, cuius conditor est comoedus Beppe Grillo, apud populum tanta gratia valebat, ut quartum quodque votum sibi pararet. Pessimum successum habuit Mario Monti, princeps minister Italiae hodiernus.

(Reijo Pitkäranta)

Benedictus XVI papa emeritus

Pontifex Romanus Benedictus XVI, qui pridie Kalendas Martias (28.2.) munus deposuit, iam papa emeritus officialiter vocatur. Ex Civitate Vaticana nuntiatum est eum etiam posthac veste alba indutum et nomine ‘Suae Sanctitatis’ appellatum iri. Anulum autem eius piscatorium more antiquitus tradito confractum iri, et novum papam suum anulum accepturum esse.

(Reijo Pitkäranta)

Raoul Castro iterum praesidens

Raoul Castro, qui Cubae iam septem annos praeest, comitiis ibidem congregatis praesidens civitatis in quinque annos proxime futuros creatus est. De ea re certior factus Castro oratione habita nuntiavit illud muneris tempus sibi ultimum fore, cum sibi propositum esset anno bis millesimo duodevicesimo (2018) in pensionem recedere.

(Reijo Pitkäranta)

Res Congoenses pacantur

Neanthopoli sive in urbe Addis Abeba pacto subscriptum est, quod eo spectat, ut pax in re publica democratica Congoensi concilietur. Conventum auspiciis Nationum Unitarum factum erat, quam ob rem etiam secretarius generalis Ban Ki-moon scribendo adfuit. Fieri potest, ut in partem Congoae orientalem, ubi complures greges seditiosi adhuc in armis sunt, copiae speciales mittantur.

(Reijo Pitkäranta)

De pagis in Sinis cancrosis

Magistratus Sinenses primum concesserunt in civitate sua pagos cancrosos inveniri. Hoc apparet ex proposito circumiectali in quinquennium facto. Ibi enim scriptum legitur chemicalibus venenosis et nocivis effectum esse, ut in Sinis loca morbis cancrosis afflicta exsisterent, ubi condiciones vitae periculosissimae essent.

(Reijo Pitkäranta)

22.2.13

De experimentis nuclearibus

Coreani septentrionales se unum aut etiam duo nova experimenta nuclearia facturos esse minitati sunt, nisi sanctiones sibi impositae mitigatae essent. Consilium suum eo spectare, ut Americani cum Coreanis ad colloquium mutuum cogerentur.

Novissimum experimentum atomicum, quod Coreani pridie Idus Februarias (12.2.) susceperant, in civitatibus occidentalibus vehementer condemnatum est.

(Reijo Pitkäranta)

Bulgaria regimine caret

Regimen Bulgariae munus deposuit, ut nuntiavit princeps minister Boiko Borisov. Rem patefecit, postquam in civitate vehementes tumultus propter pretia electricitatis valde aucta orti sunt. "Nolo", inquit, "cum talibus ministris operari, qui cives suos a custodibus publicis male tractari sinunt."

(Reijo Pitkäranta)

Chavez e Cuba domum revertit

Hugo Chavez, praesidens Venetiolae duodesexaginta annos natus, cum operationem cancri iam quartam in Cuba subisset, rursus domum revertit. "Deo gratias!, "inquit", "Posthac in patria mea curabor." Regimen Venetiolae nuntiavit praesidentem tubo respiratorio instructum esse, qui efficeret, ut ille difficilius loqueretur.

(Reijo Pitkäranta)

Ordo a Cruce Rubra CL annorum

Hoc anno sesquisaeculum praeteriit, cum Ordo a Cruce Rubra conditus est. Anno enim millesimo octingentesimo sexagesimo tertio (1863) Henry Dunant, negotiator Helvetius, collegium quinquevirale instituit, cuius esset homines bello vulneratos curare. Ex his initiis ortus est Ordo internationalis, qui vexillo Helvetiae coloribus inversis pro insigni utitur.

(Reijo Pitkäranta)

Portus Ostiae antiquae inventus

Archaeologi Francogalli et Italiani portum Ostiae antiquae invenerunt, cuius significatio mercatoria Romanis tanta fuit, ut potestatem totius Maris Interni consequerentur. Ex effossionibus ad ostium Tiberinum factis creditur portum abhinc circiter duo milia trecentos annos constructum esse. In portu sex metra alto capiebantur et naves onerariae, quibus frumentum ex Aegypto importabatur.

(Antti Ijäs)

Hiems in Finnia valde nubila

Caelum in Finnia hac hieme valde nubilum fuit. Constat enim solem inter Kalendas Decembres et diem duodevicesimum mensis Februarii (1.12.-18.2.) nonnisi quinquaginta horas in caelo apparuisse. Comparandi causa memorare licet hiemem abhinc sedecim annos tam lucidam fuisse, ut sol eodem temporis spatio centum undesexaginta horas conspiceretur.

(Reijo Pitkäranta)

Tulipa flos Finnis gratissima

Hac septimana in hibernario Universitatis Turkuensis expositio tuliparum publice aperta est. Princeps hortulanus Simo Laine docet tulipam Finnis e floribus gratissimam esse, cum in omnibus fere coloribus veneat et parvo pretio ematur. "Si tulipas" inquit, "domi tuae diu recentes servari vis, fasciculum earum in vas aqua frigidissima repletum imponito!".

(Reijo Pitkäranta)

Benedictus XVI ministerio renuntiavit

15.2.13

Inter Consistorium publicum die Lunae (11.2.) in Palatio Apostolico Vaticano habitum, Papa Benedictus XVI cardinalibus praesentibus declaravit se ministerio Episcopi Romae, Successoris Sancti Petri, renuntiare. Dixit se ad cognitionem certam pervenisse vires suas ingravescente aetate non iam aptas esse ad munus Petrinum aeque administrandum.

"Attamen", inquit, " in mundo nostri temporis rapidis mutationibus subiecto et quaestionibus magni ponderis ... perturbato ad navem Sancti Petri gubernandam et ad annuntiandum Evangelium etiam vigor quidam corporis et animae necessarius est, qui ultimis mensibus in me modo tali minuitur, ut incapacitatem meam … agnoscere debeam."

"Quapropter bene conscius ponderis huius actus plena libertate declaro me ministerio ... renuntiare, ita ut a die 28 Februarii MMXIII ... sedes Sancti Petri vacet, et Conclave ad eligendum novum Summum Pontificem ab his quibus competit convocandum esse."

His verbis dictis Summus Pontifex gratias egit et veniam pro defectibus suis petivit atque Sanctam Mariam imploravit, ut patribus Cardinalibus in eligendo novo Summo Pontifice materna sua caritate assisteret. Quod se attineret, dixit se in futuro vita orationi dedicata Sanctae Ecclesiae Dei ex corde servire velle.

Kumbha Mela in India celebratur

Magna peregrinatio hinduorum, quae Kumbha Mela appellatur, in urbe Allahabad apud flumen Gangem his diebus celebratur. Dies festi sunt quinquaginta quinque, ex quibus sanctissimus est hodie, quinto decimo mensis Februarii. Kumbha Mela est maximus in toto orbe terrarum conventus religiosus, nam usque ad centum miliones hinduorum Allahabadum visere aestimantur. Summa peregrinationis est, quod hindui in flumine Gange lavantur, cuius aquam credunt peccata tollere et benedictionem afferre. In ripa fluminis est insigne, in quo scriptum est: "Si in aqua tres minutas manseris et ter sub aquam te merseris, peccata tua ter purgabuntur."

Lasania ex equina

In Europa his diebus scandalum ortum est ex lasania congelata societatis Findus, in qua caro contrita equina reperta erat, etsi ad lasaniam bovina adhibetur et ita etiam in involucro mercis indicabatur. Cibum fecerat societas Francica Comigel, quae carnem per complures mediatores ex Romania paraverat. Lasania equina vendita est in Francia, Suetia Britanniaque, sed fraude palam facta Findus merces ex mercatu abstulit. In Romania nuper lata est lex, quae vetat in commeatu viario usum carrorum, quos asini et equi trahunt. Ideo animalia superflua mactantur et carnes eorum fraudulenter pro bovina venum dantur.

(Tuomo Pekkanen)

Proelium Stalingradense commemorabatur

13-02-08

Postridie Kalendas Februarias (2.2.2013) septuaginta anni acti erant, ex quo proelium Stalingradense in finem venit. In illo proelio, quod ducentos fere dies duraverat, Germani et confoederati eorum quartam partem copiarum amiserunt, quas in acie orientali habebant, neque ex illa clade se receperunt.

Post victoriam Stalingradensem exercitus Unionis Sovieticae ad Berolinum procedebat, quam urbem post viginti septem menses expugnavit. Cum cultus Iosephi Stalin destrueretur, nomen Stalingradi anno millesimo nongentesimo sexagesimo primo (1961) in Volgograd mutatum est, sed vetus nomen temporaliter quinque diebus memorialibus adhibetur. Ita primum factum est die memoriali septuagesimo, quo etiam praesidens Vladimir Putin ad anniversarium victoriae celebrandum in urbem imaginibus Stalini ornatam venit. "Stalingrad", inquit Putin, "symbolum unitatis populi nostri invincibilis in aeternum manebit." Proelium Stalingradense etiam maximum exemplum heroicae fortitudinis appellavit.

Mariano Rajoy corruptionis accusatus

Primus minister Hispaniae Mariano Rajoy cum factione sua (PP, Partido Popular) scandalo corruptionis implicitus est. Oppositio politica et populus flagitant, ut Rajoy ex munere discedat. Appellationi iam circiter octingenta milia hominum in interreti subscripserunt, et demoscopiae indicant minus quam viginti quattuor centesimas civium factioni populari favere. Postquam El Pais, acta diurna Hispanica, de mercedibus clandestinis primi ministri et consortium eius die Dominico (3.2.) narravit, multis in urbibus Hispaniae vehementes manifestationes ortae sunt, quibus flagitabatur, ut rationes factionis popularis penitus examinarentur. Rajoy autem in televisione affirmavit se nullas obscuras pecunias accepisse.

Ossa Richardi III reperta

Archaeologi Universitatis Licestriensis mense Septembri sub hodierno loco stativo, ubi fuit vetus monasterium Licestriense, reliquias viri reppererunt. Examinibus acidi deoxyribonucleici (DNA) factis confirmatum est reliquias esse Richardi III, regis Anglorum, qui anno millesimo quadringentesimo octogesimo quinto (1485) in pugna occisus est.

Matrimonium impetum cardiacum defendit

Ex investigatione Finnica, quae plus quindecim milia hominum corde laborantium complectebatur, apparuit viris et feminis omnium aetatum, si caelibes et vidui viverent, maius periculum esse, ne in impetum cardiacum incurrerent ideoque morirentur. Homines matrimonio iunctos etiam celerius ex cardiaco impetu sanari quam caelibes. Explicatio differentiae possit esse in eo, quod coniuges sanius vivunt atque maiores habent opes et plures familiares, qui laboranti succurrere et, si necesse est, reanimationem incipere possunt. Caelibes et vidui etiam saepius quam ceteri depressione mentis afficiuntur, quod in mortalitatem ex morbis cardiovascularibus vim habere videtur.

(Tuomo Pekkanen)

1.2.13

Timbuctum expugnatum est

Timbuctum, urbs Maliae septentrionalis, a copiis regiminis et Francogalliae cum magno incolarum gaudio expugnatum est. Victoria iis omnino incruenta erat, nam islamistae, qui urbem antea in potestate tenebant, inde aliquot diebus ante effugerant. Etiam Britanni copias in Maliam missuri sunt, quarum erit indigenas artem bellicam docere.

(Reijo Pitkäranta)

Incendium in Brasilia funestum

Septimana vergente in Brasilia meridionali amplius ducenti homines vitam amiserunt et totidem fere vulnerati sunt incendio in deverticulo quodam nocturno orto. Calamitate accidente circiter duo milia civium eodem constipata erant. Neque abest suspicio, quin clades e materia pyrotechnica, qua artifices musici in scaenam prodeuntes utebantur, initium ceperit.

(Reijo Pitkäranta)

Beatrix coronam deponet

Beatrix, regina Hollandiae septuaginta quinque annorum, postquam triginta tres annos regnavit, coronam deponere decrevit. Pridie Kalendas Maias (30.4.) ei in solio succedet Willem-Alexander, princeps hereditarius quadraginta quinque annos natus. Novus rex Hollandiae cum Finnis cognationem habere dicitur.

(Reijo Pitkäranta)

Portugalli peregre emigrant

His duobus annis plus ducenta quadraginta milia Portugallorum peregre emigraverunt, ut recessionem patriae oeconomicam evitarent. Multitudo civium e terra abeuntium iam duas centesimas (2%) totius populi efficit. Cupidissimi Portugalliam relinquendi sunt iuvenes atque homines eruditione et doctrina exculti, qui praesertim in Helvetiam et Angolam proficisci volunt.

(Reijo Pitkäranta)

Aer in Europa inquinatus

Hiems, quae media Europa solito frigidior fuit et adhuc est, effecit, ut qualitas aeris ibidem deterrima fieret. Quae cum ita essent, regimen Belgii non paucas leges perferendas curavit, quibus illa inquinamenta valetudini noxia deminuerentur. Viis autocineticis velocitas horalis maxima nonaginta chiliometrorum imposita est, et autoraedarii moniti sunt, ut proprio curru domi relicto vehicula publica eaque gratuito adhiberent.

(Reijo Pitkäranta)

Valetudo studentium Finniae

In Finnia investigatum est, quonam modo studentes universitarii valerent. Ex relatione apparet sanitatem mentis eorum admodum bonam esse, sed eos magis atque magis addictione interretiali affectos esse. Huc accedit, quod multi fatigatione laborant et dolores cervicales patiuntur. Haec mala plerumque ex angore animi oriuntur, qui cum studiis academicis coniunctus esse existimatur.

(Reijo Pitkäranta)

Leopardulis nomina data

Aestate proxime praeterita in vivario Helsinkiensi tres catulae leopardi Asiatici sive Unciae natae sunt. Curatores animalium, cum populum interrogavissent, quo nomine littera E incipiente illae vocarentur, paene quinque milia responsorum acceperunt. Ex magna nominum copia leopardulis haec tria delecta sunt: Eve, Esha, Eloisa.

(Reijo Pitkäranta)

25.1.13

Obama alterum quadriennium coepit

Barack Obama iusiurandum praesidentiale in caerimonia privata Washingtoniae dedit, cum alterum quadriennium in munere praesidentis Civitatum Unitarum Americae die Dominico (20.1.) iniit.

Iusiurandum repetiit die sequenti in caerimoniis publicis, quas septingenta milia hominum sequebantur. Ex constitutione Americanorum praesidentatus die vicesimo mensis Ianuarii clauditur.

Exercitus Algerianus aggressores occidit

Grex islamistarum, qui officinam gasi in Algeria orientali sitam die Mercurii (16.1.) occupaverat et prope octingentos operarios in obsidium sumpserat, a copiis specialibus exercitus Algeriani occisus est. Circiter octoginta homines, inter quos undetriginta islamistae et duodequadraginta obsides ex octo nationibus oriundi, mortui sunt. Saltem septem Iapones, tres Britanni et unus Americanus interisse creduntur. Propositum aggressorum fuisse dicitur Francos ulcisci, quod in Maliam, civitatem Algeriae vicinam, copias misissent et progressionem islamistarum ad meridiem versus prohibuissent.

In insulis Malvinis suffragium populi

In insulis Malvinis sive Falklandiensibus mense Martio suffragium populi fiet, quo insulani interrogabuntur, an velint statum suum ut dominium Britanniae transmarinum conservare. Praevisum est responsum fore positivum.

Insulae Malvinae, quae iacent prope partem Argentinae meridionalem, ab anno millesimo octingentesimo tricesimo tertio (1833) Britannorum sunt. Argentina insulas suas putat easque sibi flagitat. Discordia iam multa decennia durat. Triginta annis ante regimen militare Argentinae Falklandiam occupavit, sed brevi bello gesto insulae in potestatem Britanniae redierunt. Postquam aliquot annis ante petroleum in proximitate quaeri coeptum est, rixa de possessione Malvinarum denuo renovata est.

In Colosseo picturae parietales repertae

In Colosseo sive Amphitheatro Flavio urbis Romae repertae sunt picturae parietales, ex quibus apparet parietes theatri interiores variis coloribus distinctos fuisse. Inter reparationes et purgationes nuper susceptas etiam graphita et imagines vulgares in lucem venerunt. Picturae sunt in ambulacro, quod in summam caveam ducit.

Veri similiter factae sunt post annum ducentesimum septimum decimum (217), quo summa tabulata Colossei incendio deleta sunt. In ambulacro sunt etiam graphita saeculorum posteriorum. Picturae parietales nunc repertae visitatoribus iam aestate huius anni ostendentur, sed reparationes totius theatri adhuc duos annos durabunt.

Cantus avicularum iam augescit

Cum dies mense Ianuario fiant longiores, aviculae iam clarius et frequentius cantare incipiunt. Diebus hiemis brevioribus aviculae horis luminosis ad cibum quaerendum utuntur, sed luce solis longiore tempus etiam ad cantandum sufficit, quod ad nidificationem et amores spectat. Fames cupidinem cantandi tollit. Parus bene satur canere valet.

(Tuomo Pekkanen)

18.1.13

Quid Sueti proposuerint

Magistratus militares Suetiae proposuerunt, ut Finni et Sueti ad suam patriam defendendam consiliis communibus operarentur. Qua re audita Carl Haglund, minister Finniae, concessit fieri posse, ut inter utramque civitatem foedus quoddam defensionis iceretur.

Sed Jyrki Katainen, princeps minister Finniae, studium utriusque partis compescere voluit negans ullum pactum aut societatem necessariam esse ad cooperationem mutuam agendam.

(Reijo Pitkäranta)

Rerum in Malia condicio

Francogalli in Maliam, civitatem in Africa occidentali sitam, copias miserunt. Munus earum est prohibere, ne islamistae ex partibus terrae septentrionalibus ad meridiem versus progrediantur. Praesidens Francois Hollande ait milites Francogallos tamdiu in Malia mansuros esse, donec res ibidem pacarentur.

(Reijo Pitkäranta)

Reclamationes Moscuae ortae

Idibus Ianuariis (13.1.) viginti quinque fere milia hominum Moscuam confluxerunt, ut legi reclamarent, quae infantes Russos in Civitates Americae Unitas adoptari vetat. Quam legem praesidens Vladimir Putin mense Decembri exeunte perferendam curavit. Hoc modo Americanis respondisse videtur, qui Russos de iuribus humanis violatis accusaverunt.

(Reijo Pitkäranta)

Pekinum fumo cirxumfusum

Aer urbi Sinarum Pekino circumfusus his diebus tam inquinatus fuit, ut incolae salutis suae servandae causa domi manere monerentur. Quam difficilis rerum status sit, vel inde apparet, quod instrumenta alioquin opportuna non iam sufficiunt ad qualitatem aeris metiendam.

(Reijo Pitkäranta)

Quid in Canada acciderit

Aborigines Canadae sibi meliores vitae condiciones flagitant. Conventu cum principe ministro Stephen Harper habito legati eorum dixerunt indigenas graviter ferre, quod regimina Canadae iterum atque iterum ea pacta contemnerent, quae expugnatores Britanni cum iis olim fecissent. Illis enim conventis cautum esse, ut Canadenses primigenii ius suos agros possidendi haberent.

(Reijo Pitkäranta)

De nova charta nummaria

Die Iovis (10.1) nova chartula nummaria quinque euronum Francofurti ad Moenum in publico est exposita. Ita figurata est, ut in signo translucido et hologrammate facies Europae, virginis mythologiae Graecae, appareret. Praedita est etiam nota numeri fulgenti, cuius color inter violaceum et viriditatem smaragdineam variat. Illa scheda renovata postridie Kalendas Maias (2.5.) usu recipietur.

(Reijo Pitkäranta)

Insula apud Germaniam orta

In ora Slesviciae-Holsatiae, regionis Germaniae septentrionalis, his decem annis nova insula a mari assurrexit. Orta est ex harena ventis procellosis coacervata et circuitu quattuordecim fere hectareas patet. Aves hac syrte iam pridem pro loco quiescendi et nidificandi utuntur, quam ob rem homines eam obire vetantur.

(Reijo Pitkäranta)

11.1.13

Novae res ex Corea Septentrionali

Kim Jong-un, moderator Coreae Septentrionalis, in oratione Kalendis Ianuariis televisifice habita res novas nuntiavit. Locutus enim est, non tantum de armis efficacibus excogitandis et scientia technologiaque promovenda, sed etiam de rationibus cum Corea Meridionali meliorandis.

Orationes officiales his undeviginti annis in Corea Septentrionali per televisionem factae non sunt. Ad res mutatas pertinet etiam, quod novus annus festivitatibus et spectaculo pyrotechnico celebrabatur. Kim Jong-un dixit novum annum etiam in politicam agrariam mutationes radicitus allaturum esse. Acta diurna Germanica (Frankfurter Allgemeine Zeitung) affirmaverunt voluntatem rerum novarum esse sinceram, quia consilia de mutationibus auxilio oeconomistarum Germanicorum facta hoc anno divulgarentur.

Assad contumax

Bashar al-Assad, praesidens Syriae, oratione anno incipiente habita dixit se cum terroristis non esse consulturum. Suasit, ut nova lex fundamentalis fieret, postquam conflictus finitus esset. Oppositio autem recusavit, quominus de tali pacis consilio consuleret, ex quo al-Assad in regimine transitionis locum haberet. Americani iudicabant orationem al-Assadis mutationes politicas nullo modo adiuvare sed ad id tantum spectare, ut regimen eius in potestate haereret. Praesidenti, a veritate alienato, a munere discedendum esse.

Discrimen euronis nondum praeterisse

Dimidia pars Finnorum (50%) terras discrimine euronis laborantes amplius sustinere non vult, etiamsi eurozona dissolvatur. Tertia fere pars (33%) auxilium adhuc ministrare velit, ceteri (16%) dubii haerent. Duo ex tribus Finnis credunt pessimum discrimen nondum visum esse. Hic est eventus demoscopii a Radiophonia Finnica Generali recens facti, cui mille Finni interfuerunt.

Orthodoxi Nativitatem celebraverunt

Usus Calendarii Iuliani efficit, ut dies Nativitatis Domini apud Russos orthodoxos tredecim diebus post, quam in ceteris terris, celebretur. Die Dominico (6.1.) patriarcha Kirill (Cyrillos) vigiliam Nativitatis in Ecclesia Cathedrali Moscuensi celebravit. Eodem tempore festum Nativitatis etiam orthodoxi Georgiae, Serbiae Hierosolymorumque agebant.

Lupi famelici tarandris Iakutiae infesti

In Iakutia, quae est res publica foederationis Russiae in Sibiria orientali, greges luporum famelicorum tarandros magis quam ante lacerare coeperunt. Causa esse videtur, quod populatione leporum in montibus rarescente lupi in pascua tarandrorum descenderunt. Anno bis millesimo undecimo (2011) lupi in Iakutia plus sedecim milia tarandrorum dilaceraverunt. Ut populatio lupina coerceretur, tempus venationis in totum annum productum est et venatoribus, qui maximum numerum luporum prostravissent, proemia promissa sunt. In Iakutia sunt nunc circiter tria milia quingenti lupi et propositum est numerum eorum ad quingentos redigere.

(Tuomo Pekkanen)

4.1.13

Oratio praesidentis Niinistö

Sauli Niinisto, praesidens rei publicae Finniae, Kalendis Ianuariis suam primam incipientis anni orationem nationi habuit. In prima eius parte legatos parlamentares et ministros regiminis ad consilia audacia capienda hortatus est. Nisi id fecissent, quaestiones ad senescendum et aes alienum conflandum pertinentes solvi non posse.

Addidit se de integritate civitatis sollicitum esse: “Studium sui commodi”, inquit, “quin etiam avaritia in incremento est, cum iustitia et aequitas algeant.” Negavit se eos intellegere posse, qui putarent Finniam esse civitatem desidendi, ubi exspectaretur, ut unusquisque in mensa ab aliis ampliter exstructa accumberet. Idem monuit laborem pluris quam ante aestimandum esse. Ad extremum praesidens Niinistö civibus bonum annum novum et benedictionem Dei exoptavit.

(Reijo Pitkäranta)

Papa capitalismum condemnavit

Papa Benedictus XVI salutatione novi anni pronuntiata capitalismum effrenatum condemnavit dicens eum stabilitati internationali imminere. Animum suae utilitati inservientem, qui in capitalismo appareret, terrorismi et criminalitatis communem esse. Idem suasit, ut in mercatu nova exemplaria oeconomica et novae leges ethicae usu reciperentur.

(Reijo Pitkäranta)

Quid Angela Merkel dixerit

Angela Merkel, cancellaria foederalis Germaniae, oratione ante festum novi anni facta dixit se metuere, ne discrimen oeconomicum, quo terrae Unionis Europaeae laborarent, magis diutinum esset quam multi arbitrarentur. Praedixit annum proxime futurum Germaniae anno praeterito difficiliorem fore, cum incrementum oeconomicum ibidem iam retardatum esset.

(Reijo Pitkäranta)

Duo Finni in Iemenio vi abducti

Abhinc duas septimanas sive die vicesimo primo mensis Decembris (21.12.) in urbe principe Iemenii par coniugum ex Finnia oriundum et vir quidam Austriacus vi abducti sunt. Quo autem hi homines ablati sint et qui illud facinus commiserint, nondum constat.

(Reijo Pitkäranta)

De adiunctionibus municipalibus

Novo anno ineunte numerus communium, quae in Finnia sunt, ex trecentis triginta sex (336) ad trecenta viginti (320) redactus est. In causa sunt decem adiunctiones paroechiales, in quibus singula aut plura municipiola ad maiorem communitatem consociata sunt. Ita nata est verbi gratia Uloa nova, urbs iam amplissima, quippe cui quattuor communia circumiacentia coniungerentur.

(Reijo Pitkäranta)

De mortibus in Finnia viariis

Anno bismillesimo duodecimo (2012) circiter ducenti sexaginta homines in commeatu in Finnia vehiculario vitam amiserunt. Quae multitudo mortuorum decem fere centesimis (10%) minor est quam anno proximo. Pro eodem fere modo etiam numerus eorum, qui calamitatibus viariis vulnerati sunt, feliciter deminutus est.

(Reijo Pitkäranta)

28.12.12

Tria principia defensionis Finniae

Regimen Finnorum relationem de politica securitatis et defensionis comprobavit. Consilia de novis armis acquirendis in posterum differuntur sed tres rationes fundamentales integrae servantur. Pro primo: Finniam manere extra confoederationes militares, pro secundo: militiam esse obligatoriam, pro tertio: totam patriam esse defendendam.

Anno vergente Russi Finniam frequentant

Anno vergente circiter quadringenta milia viatorum Russorum in Finniam venire aestimantur. Numerus decem fere centesimis maior est quam anno ante. Veri similiter itinera in Finniam suscepta etiam proximis annis augebuntur, nam septuaginta fere centesimae Russorum nondum terras peregrinas visitaverunt. Finnia viatores Russos non tantum propter vicinitatem sed etiam pretiis opportunis et qualitate mercium attrahit . Maior pars hospitum Finniam orientalem et Lapponiam frequentare solet sed hoc anno novi viatores Russi aeroplanis et traminibus specialibus aut autoraedis etiam in regiones interiores veniunt.

Parlamentum Italiae dimissum

Postquam primus minister Marius Monti se munus depositurum esse nuntiavit, praesidens Georgius Napolitano parlamentum Italiae dimisit. Comitia parlamentaria praematura diebus viginti quarto et viginti quinto mensis Februarii fient. Moderatores Europaei Marium Monti appellaverunt, ut in comitiis proximis candidatus fieret et iterum summam in Italia potestatem peteret.

De bello Syriaco

In summo conventu Bruxellis habito, praesidens Vladimir Putin dixit Russos regimen Syriae non defendere sed democratiam et stabilitatem Syris desiderare. Affirmavit omnes velle, ut violentiae et stragi finis imponeretur. Exitum autem conflictus inveniendum esse in colloquiis, quibus omnes partes interessent, ut sententiae omnium Syrorum respicerentur. Sergei Lavrov, minister defensionis Russiae, censet in bello civili Syrorum nullum fore victorem. Praesidentem Bashar al-Assad bellum non esse depositurum, etiamsi Sinenses et Russi id illi persuadere temptaverint. Illum in nullam partem iturum esse, quidvis illi quivis dixerit. Summus Pontifex Benedictus XVI, cum vigilia Nativitatis Domini missam in basilica Sancti Petri Romae celebraret, orabat, ut concordia inter Israelianos et Palaestinenses inveniretur, et in Syriam, bello civili afflictatam, pacem sperabat. – Adhuc in bello Syriaco plus quadraginta milia hominum perierunt.

Ursus in abscondito moritur

Nemo umquam ursum naturaliter mortuum in silva repperit. Cum ursus vires deficere sentit, locum petit, ubi difficillime invenitur. Plerumque tempore hiemali senectute aut morbo in cubili suo secreto moritur. Itaque dici potest ursos sub terra in abscondito velut a se ipsis sepultos ex vita discedere.

(Tuomo Pekkanen)

21.12.2012

Strages in schola Americana

Complures moderatores politici Europaei, in iis praesidens Finniae Sauli Niinistö, Americanis dolorem suum ob stragem in civitate Connecticuta factam pronuntiaverunt.

Postridie enim Idus Decembres (14.12.) in oppido Newtown accidit, ut iuvenis quidam binis armis manuariis instructus in scholam inferiorem ingrederetur et viginti septem homines, e quibus viginti infantes quinque aut sex annorum erant, crudeliter occideret. Post caedem in America disceptari coeptum est, utrum lex de armis possidendis durior reddenda esset mecne.

(Reijo Pitkäranta)

Auxilium profugis petitur

Ordo Nationum Unitarum auxilium sesquimiliardi dollariorum petivit, cuius ope profugi tam intra quam extra Syriam constituti adiuvarentur. Nuntiavit condicionem eorum humanitariam in pessimum mutatam esse et monuit fieri posse, ut multitudo exulum ante mensem Iunium ex quingentis milibus ad decies centena milia cresceret. Turbae profugorum e Syria non solum in Turciam, Iordaniam, Libanum, sed etiam in Aegyptum confluxerunt.

(Reijo Pitkäranta)

Decretum senatus Nederlandiae

Die Martis (18.12.) senatus Nederlandiae suffragio facto decrevit, ut educationi pecoris pelligeri finis imponeretur. Nova lex tamen non statim, sed post tempus transitorium, id est anno bismillesimo vicesimo quarto (2024) valere incipiet. Senatores illum quaestum, quamquam cultoribus lucro esset, tamen principiis ethicis repugnare censebant, quam ob rem eum civibus interdicendum esse arbitrabantur.

(Reijo Pitkäranta)

Regina in sessione regiminis

Elisabeth II, regina Britanniae, hac septimana conventui regiminis interfuit, ut etiam hoc modo iubilaeum muneris sui ante sexaginta annos initi celebraret. Quam rarus ille eventus fuerit, inde apparet, quod post annum millesimum septingentesimum octogesimum primum (1781) nemo rex vel regina Britanniae in pace huiusmodi sessioni adfuit.

(Reijo Pitkäranta)

Diabetes celeriter crebrescit

Diabetes in Civitatibus Americae Unitis cursu horrendo crebrescit, nam ex statisticis officialibus numerus diabeticorum Americanorum ab anno millesimo nongentesimo nonagesimo quinto (1995) minimum quinquaginta centesimis (50 %) in omnibus fere regionibus auctus est. In duodeviginti civitatibus, quarum nonnullae in partibus terrae meridionalibus iacent, numerus morbo implicitorum duobus decenniis proxime praeteritis plus quam duplicatus est.

(Saara Honkanen)

Dies natalis in Finnia candidus

Meteorologi promiserunt Diem nativitatis Domini in Finnia candida nive ornatum fore. Negaverunt periculum esse, ne caelí status ante illam sollemnitatem ita mutaretur, ut nivium acervi, quorum altitudo inter decem et amplius quinquaginta centimetra variaret, subito solverentur. Imprimis in partibus Finniae meridianis copia nivium solito maior est.

(Reijo Pitkäranta)

14.12.2012

Anniversarium independentiae Finnorum

Postridie Nonas Decembres (6.12.) anniversarium independentiae Finnorum nonagesimum quintum a civibus caerimoniis translaticiis celebratum est. Praesidens rei publicae Sauli Niinistö cum coniuge Jenni Haukio in castellum praesidentiale circiter mille octingentos hospites invitaverat. Thema festivitatis vespertinae, a praesidente electum, erant opera et labor Finnorum.

Imprimis invitati erant homines, qui suis operibus suoque labore prosperitati patriae profuerant. Idem thema apparuit in programmate musicali et in ministratione ciborum, qui quantum fieri potuit a productoribus patriis empti erant. Emissionem directam ex castello praesidentis duo miliones quadringenta milia hominum per televisionem spectabant. Singulare erat, quod quattuor praesidentes rei publicae cum coniugibus diem independentiae una celebrabant. Aderant scilicet, praeter praesidentem Sauli Niinistö, pristini praesidentes Mauno Koivisto, Martti Ahtisaari, Tarja Halonen. Koivisto, qui hoc anno undenonaginta annos complevit, est inter omnes Finniae praesidentes longaevissimus.

Marius Monti munus depositurus

Marius Monti, primus minister Italiae, munus depositurus est. Praesidenti Georgio Napolitano dixit se, ubi primum nova de dispensatione oeconomica lex in annum proximum a parlamento accepta esset, discessionem confirmaturum esse. Silvius Berlusconi, cui Monti mense Novembri successerat, nuntiavit se munus primi ministri denuo petiturum esse.

Finnis palma de choreographia flamenco

Grex Finnicus de choreographia flamenco palmam maxime insignem obtinuit, cum de opere “Corvus et Horologium” in certamine Matriti facto praemiatus est. Dux gregis Kaari Martin de choreographia solitaria, Roni Martin de optima illius certaminis musica, Erica Turunen de optima vestium designatione primum praemium acceperunt. Victoria fuit insolita, nam in illo certamine, anno millesimo nongentesimo nonagesimo secundo condito, Hispani primos locos obtinere solent. Maior pars ex participibus certaminis Matritensis saltationem flamenco translaticiam confitebantur. Opus Finnorum autem, quod Mariana Collado Hispana saltabat, quiddam medium erat inter flamenco et saltationem hodiernam .

Superficies marium inaequaliter surgit

Investigationes recentes ostendunt superficiem marium propter calefactionem climatis opinione celerius surgere. Maximum periculum inundationum regionibus planioribus terrarum egentiorum imminet. Ante annum bis millesimum sexagesimum (2060) superficies maris a dimidio metro usque ad metrum surrectura esse aestimatur, ante finem saeculi etiam complura metra. Superficies levatur, quod glacies regionum arcticarum celerius quam ante solvitur et aqua maris calefactione amplificatur. Neque tamen id eodem modo ubique evenit, nam cursus aquarum marinarum, gradatio salina, variatio caloris, formaeque et metamorphoses crustae terrestris efficiunt, ut mutationes inaequaliter fiant.

(Tuomo Pekkkanen)

7.12.2012

Quid Sauli Niinistö dixerit

Praesidens Finniae Sauli Niinistö, cum Kalendis Decembribus (1.12.) diurnariis colloquium percontativum daret, ait se deliberavisse, quid esset, quod terrae septentrionales in suffragiis apud Nationes Unitas hoc anno factis clades acerbissimas accepissent.

Censuit fieri potuisse, ut Finni et Sueti formas civitatum suarum prosperarum nimis superbe prae se ferrent. Operae pretium esse quaerere, num talis modus vivendi, qui apud populos septentrionales valeret, a peregrinis tanti haberetur, quanti Hyperboraei cogitarent.

(Reijo Pitkäranta)

De rebus Proximi Orientis

Coetui generali Nationum Unitarum placuit, ut Palaestinenses ad illum ordinem tamquam observatores pro sua civitate agentes admitterentur. Israeliani de ea re certiores facti tantopere irati sunt, ut statim tria milia novarum coloniarum in Ripam occidentalem et Hierosolyma orientalia deducere decernerent. Consilium eorum a Civitatibus Americae Unitis condemnatum est, cum tale inceptum consultationibus pacis in Oriente Proximo continuandis parum utile esset.

(Reijo Pitkäranta)

Condicio Iranianis proposita

Regimen Civitatum Americae Unitarum nuntiavit Iranianos usque ad finem mensis Martii tempus habere ad dicendum, utrum Ordini internationali ab energia atomica (IAEA) re vera cooperari vellent necne. Nisi haec condicio ab eis accepta esset, rem ad Consilium securitatis Nationum Unitarum relatum iri.

(Reijo Pitkäranta)

Pahor praesidens Slovakiae

Praesidens Slovakiae electus est Borut Pahor, pristinus primus minister undequinquaginta annos natus. Conciliavit enim sibi suffragiorum sexaginta septem centesimas (67%), cum Danilo Türk, qui rei publicae hodie praeest, non nisi triginta duas centesimas (32%) votorum adipisceretur. Abhinc unum annum Pahor munus principis ministri propter sententiam de diffidentia relinquere coactus est.

(Reijo Pitkäranta)

Pertussis adhuc grassatur

Pertussis, quae imprimis infantibus periculosissima est, in terras occidentales denuo redire videtur. Hoc morbi genus, quamquam praesertim apud populos egentiores grassatur, etiam in Britannia et in America Septentrionali hoc anno ita increbruit, ut numerus infectionum tantus esset quantus ante quinguaginta annos fuit. Una e causis eius rei existimatur esse, quod multi parentes dubitant, optimumne factu sit an pessimum liberos adversus pertussim vaccinare.

(Reijo Pitkäranta)

Nuntius domus regiae Britanniae

Princeps Britanniae William et coniux eius Cathrine, ducissa Cantabrigiensis, infantem accipient. Talis nuntius die Lunae (3.12.) e domo regia cum magna civium Britannorum laetitia divulgatus est. Quando autem principissa vel princeps hereditarius nasciturus sit, nondum publice constat. Ducissa e nausea gravidarum tantopere laboravisse dicitur, ut in nosocomium deportanda esset.

(Reijo Pitkäranta)

30.11.2012

Separatistae in Catalonia victores

In comitiis Cataloniae partes politicae, quae ad independentiam spectant, maiorem partem delegatorum in parlamentum regionale acceperunt. Nihilo minus separatio Cataloniae non est probabilis, ut factiones principales iam nuntiaverunt. Inopia quaestus et depressio oeconomica usque gravescens voluntatem separationis apud Catalanos auxerunt.

Catalonia ex partibus Hispaniae oeconomiam habet validissimam, sed multi Catalani censent causam difficultatum oeconomicarum, quibus illi quoque gravantur, in eo esse, ut nimia pars pecuniarum regionis Matritum delabatur. Regimen Hispaniae centrale voluntati separatistarum vehementer resistit et habet proposita ad secessionem spectantia illegalia et constitutioni Hispaniae contraria.

Mursi novus pharao appellatus

Praesidens Aegypti Mohammed Mursi decrevit, ut leges et statuta a se data definitiva essent neque a tribunalibus repudiari possent. Ex quo cives in variis Aegypti regionibus vehementer et violenter reclamitaverunt. Mohammed El-Baradei, dux oppositionis, dixit Mursim se novum pharaonem fecisse, cum ita se supra leges et iudicia posuisset.

Arafat exhumatus

Corpus Jasseris Arafat, ducis Palaestinensium, qui anno bis millesimo quarto obiit, exhumatum est. Propositum est investigare, utrum causa mortis fuerit impetus cardiacus, ut officialiter nuntiabatur, an venenum. Investigationes susceptae sunt, cum polonium, venenum radioactivum, in rebus eius personalibus repertum esset. Sumptis probationibus corpus eodem die denuo sepultum est.

Medvedev aurigas ebrios coercet

Primus minister Dmitri Medvedev narravit in paginis regiminis interretiariis duodetriginta milia (28.000) Russorum per calamitates viarias anno proximo vitam amisisse. Ut disciplina in commeatu vehiculari restitueretur, nuntiavit legem latum iri, ex qua autoraedarii vinolenti, qui calamitatum letalium noxii essent, carcere vel quindecim annorum punirentur. Qui nimia velocitate aut contra semaphora rubra vecti essent, Moscuae et Petroburgi quingentis milibus rublorum (12.000 euronum) multatum iri. Alibi in Russia multam fore dimidio minorem sive ducentorum quinquaginta milium rublorum.

Tigres pauciores quam umquam ante

Ex relatione, quam Ordo naturae mundi tuendae (WWF) nuper divulgavit, numerus tigrium est hodie in orbe terrarum minor quam umquam ante. In libertate vivunt adhuc tria milia ducentae tigres. His centum annis numerus nonaginta septem centesimis deminutus est. Maximum periculum populationi tigrium recreandae est venatio clandestina.

In Utsjoki sol disparuit

In communi Utsjoki Finniae maxime septentrionalis sol die Lunae (26.11.) post horizontem disparuit non ante quam medio fere mense Ianuario rediturus. Tenebris hiemalibus obortis Finni septentrionales dicere solent solem in nidum suum se recepisse. In regionibus Finniae meridionalibus sol adhuc circiter sex horas supra horizontem manet.

(Tuomo Pekkanen)

23.11.2012

Bellum Proximi Orientis

Die Mercurii (21.11.) vesperi Israeliani et ordo Palaestinensis Hamas post aggressiones mutuas octo dies continuatas de ignistitio consenserunt. De re nuntiavit Mohammed Kamel Amr, princeps minister Aegypti, qui munere conciliatoris pacis fungebatur.

Conflictus militaris, quo centum quadraginta septem Palaestinenses et quinque Israeliani vitam amiserunt, initium ceperat, cum Palaestinenses missilia e regione Gaza in Israelem emisissent. Quo facto impediri non potuit, quin Israeliani incursioni ictibus aeriis vehementissimis responderent.

(Reijo Pitkäranta)

Novum regimen Sinarum

Res publica Sinarum a collegio septemvirum regi coepta est. Abhinc enim unam septimanam Pekini accidit, ut novi moderatores civitatis in publicum prodirent. Primus ordine dignitatis erat Xi Jinping, praeses factionis communisticae et praesidens Sinarum designatus undesexaginta annorum. Post eum in conspectum venit Li Keqiang, princeps minister quinquaginta septem annos natus. Eos sequebantur reliqui quinque sodales, qui una cum Xi et Li consilium politicum permanens efficiunt, penes quod summa potestas in Sinis his decem annis erit.

(Reijo Pitkäranta)

SAS e periculo servata

Septimana vergente Societas Aeria Scandinava (SAS) in magno periculo erat, ne omnino decoqueret. Die tamen Lunae (19.11.) ei contigit, ut post longas consultationes concordiam cum omnibus octo consociationibus opificum inveniret, quam ob rem ruina bonorum imminens evitari potuit. Neque hoc factum esset, nisi operarii condiciones sibi admodum incommodas accepissent.

(Reijo Pitkäranta)

Cura dentium neglecta

Ex studio Americano patet dentes incuratos periculum mortis augere. Investigatores narrant maiorem letalitatem imprimis ad eos homines attinere, quorum dentium cura tam graviter neglecta sit, ut nonnullos dentes iam amitterent. Adiciunt tamen hunc nexum statisticum magnam partem discriminibus ordinis et vitae consuetudinibus explicari posse. Eventus investigationis in actis Journal of Epidemiology and Community Health divulgatus est.

(Saara Honkanen)

De venatione luporum

In Finnia ducenti fere lupi versari existimantur. Quibus animalibus tanta tutela adversus venationem lege concessa est, ut nonnisi decem ex iis tempore venandi praesenti occidi sinerentur. Licet tamen venatoribus lupos in eis Lapponiae regionibus libere agitare, ubi tarandri pascuntur. Ita prohibetur, ne domini rangiferorum ex illis feris bestiis damna immoderata capiant.

(Reijo Pitkäranta)

Dies iurum liberorum

Die Martis (20.11.) dies internationalis iurum liberorum celebrabatur. Eius est cives ad colloquia de rebus ad prosperitatem liberorum pertinentibus evocare. In calendarium Finniae hic dies iam abhinc decem annos receptus est.

(Reijo Pitkäranta) occīdī

Pontificia Academia Latinitatis condita

16.11.2012

Summus Pontifex Benedictus XVI die decimo mensis vertentis litteras apostolicas dedit, quibus Pontificiam Academiam Latinitatis condidit.

In his litteris dicit: "Romano Imperio occidentali exstincto, Romana Ecclesia non modo lingua Latina uti perrexit, verum etiam quodammodo custos eiusdem et fautrix fuit… Nostris quoque temporibus Latinae linguae et cultus cognitio perquam est necessaria ad fontes vestigandos, ex quibus complures disciplinae ceteroqui hauriunt… In hodierno tamen cultu, humanarum litterarum extenuatis studiis, periculum adest levioris linguae Latinae cognitionis, quae in curriculis philosophicis theologicisque futurorum presbyterorum quoque animadvertitur…. Quapropter necessitas instare videtur, ut linguae Latinae altius cognoscendae eiusque congruenter utendae fulciatur cura, sive in ecclesiali sive in patentiore cultus campo. Ut hic nisus extollatur et evulgetur, consentaneum prorsus est docendi rationes adhibere aptas ad novas condiciones et provehere item necessitudines inter Academicas institutiones et inquisitores, ut copiosum ac multiforme Latini cultus patrimonium efferatur. Ad haec proposita assequenda, Decessorum Nostrorum semitas calcantes, hasce per Litteras Apostolicas Motu Proprio datas hodie Pontificiam Academiam Latinitatis condimus, quae Pontificio Consilio de Cultura erit obnoxia."

Quae sint proposita Academiae

In statuto, eisdem litteris apostolicis adnexo, proposita novae academiae ita definiuntur, ut studia totius Latinitatis ab antiquitate usque ad tempora hodierna provehantur. Quod consilium est laudandum, nam saepe in hodierna quoque institutione Latina tantum auctores classici digni habentur, qui legantur, mediaevales, humanistici recentissimique male negleguntur. (6) Laudamus etiam, quod Latinitas viva in litteris Summi Pontificis extollitur, cum dicit in diversis provinciis usum linguae “sive scribendo sive loquendo” promovendum esse. Salubriter etiam de hodiernis communicationis instrumentis in institutione Latina adhibendis, ut discipuli sermonem Latinum perdiscant, a Papa commonetur.

Quae membra habeat

Pontificia Academia Latinitatis complectitur praesidem, quem Summus Pontifex in quinquennium nominat, et secretarium, consilium academicum ac quinquaginta sodales academicos ordinarios, a secretario status Vaticani nominatos, qui studiosi cultoresque sunt linguae ac litterarum Latinarum. Praeter sodales ordinarios alii sodales “correspondentes” a praeside nominari possunt.

Opus Fundatum Latinitas exstinctum

In Civitate Vaticana de rebus Latinis hucusque imprimis curavit institutio, "Opus Fundatum Latinitas" appellatum, quod Papa Paulus VI die tricesimo mensis Iunii anno millesimo nongentesimo septuagesimo sexto (30.6.1976) constituit. Benedictus XVI illam institutionem exstinxit et abolevit praecepitque, ut patrimonium et incepta eius in novam Academiam transferrentur.

(Tuomo Pekkanen)

9.11.2012

Obama iterum praesidens

Praesidens Civitatum Americae Unitarum iterum designatus est Barack Obama, quippe qui comitiis die Martis (6.11.) factis amplius trecentos electores sibi conciliaret. Ubi primum eum in iis civitatibus superiorem esse innotuit, in quibus certamen aequissimum esse constabat, omnibus persuasum erat Obamam victoriam de adversario suo republicano Mitt Romney reportaturum esse. Neque Romney diu cunctatus est, quin novo praesidenti gratulatus se cladem in suffragio accepisse publice confiteretur.

(Reijo Pitkäranta)

Unio Europaea gratulabatur

Moderatores Unionis Europaeae de eventu comitiorum Americanorum certiores facti praesidenti Barack Obama omnia bona precati sunt. Censent cooperationem Europae et Americae Obama iterum praesidente artiorem et efficaciorem futuram esse. Existimant enim fieri posse, ut ille non iam solum rebus domesticis curandis operam det, sed animum magis quam ante ad negotia publica extera attendat.

(Reijo Pitkäranta)

Tawadros papa Coptorum

Die Dominico (4.11.) novus papa Coptorum Christianorum Aegypti creatus est Tawadros, episcopus provinciae Beheirae in ostio Nili sitae. Munere accepto ille vir sexaginta annorum ‘papa Alexandriae et antistes sanctae sedis totius Africae’ officialiter appellatur. Electionem fecit puer choralis, qui oculis obligatis e calice unam e tribus tabellis obsignatis temere sustulit eamque praefecto suffragii porrexit.

(Reijo Pitkäranta)

De libertate rei diurnariae

Institutum internationale ab actis diurnis (IPI) sollicitum est de progressu, qui eo tendere videatur, ut libertas rei diurnariae in Europa in periculum vocetur. Quod imprimis ad quattuor civitates valere videtur, quae sunt Belorussia, Ucraina, Hungaria, Turcia. Unum exemplum huiusmodi libertatis coercitae profertur lex in Hungaria perlata, qua magistratibus publicis bona opportunitas censuram agendi data est.

(Reijo Pitkäranta)

Memoria Friderici Magni

Hoc anno trecenti anni acti sunt, cum rex Fridericus II, cognomine Magnus, Berolini natus est. Sceptrum regni Borussiae anno millesimo septingentesimo quadragesimo (1740) adeptus terminos patriae ita propagare coepit, ut Silesiam in potestatem suam redigeret et bello septem annorum (1756-1763) cum populis Europae validissimis prospera fortuna certaret.

(Reijo Pitkäranta)

De die culturae Sueticae

Dies Martis sive postridie Nonas Novembres (6.11.) in Finnia cultui civili et litteris Sueticis celebrandis dedicatus erat. Primum quidem hoc festum ad memoriam Gustavi Adolfi II, regis Suetorum, agebatur. Is enim eo ipso die anno millesimo sescentesimo tricesimo secundo (1632), cum in Germania bellum gereret, pugna apud vicum nomine Lützen facta interfectus est.

(Reijo Pitkäranta)

2.11.2012

De comitiis Finniae communalibus

In comitiis Finniae communalibus maiore quam ceterae partes politicae gratia valebant Conservativi (21,9%), Democratae sociales (19,6%), Factio centralis (18,7%). Veri autem victores erant tantum Finni fundamentales (12,3%), qui post comitia communalia proxime (2008) facta septem centesimis numerum fautorum auxerunt.

Ex civibus suffragium habentibus tantum duodesexaginta centesimae (58,2%) ad urnas venerunt.

Berlusconi in carcerem damnatus

Silvio Berlusconi, pristinus primus minister Italiae, in tribunali Mediolanensi de fraude fiscali in carcerem quattuor annorum damnatus est. Statim postea ex lege, qua numerus carcere clausorum anno bis millesimo sexto restringebatur, illa poena in unum carceris annum deminuta est. Berlusconi culpam infitiatur. Iudicia in Italia data non sunt valida, antequam in duobus tribunalibus appellationis tractata sunt. Berlusconi antea iam ter damnatus est, sed carcerem evitavit per appellationes aut quia crimina iudiciis in multos annos prolatis obsoleverunt. Mense Novembri anni proximi munus primi ministri deponere coactus est.

Peregrinatores diabolum lapidaverunt

Peregrinatio annualis musulmanorum die Mercurii (24.10.) incohata est. Unusquisque ex musulmanis semel in vita Meccam peregrinari debet, si valetudine et opibus eius fieri potest. Hoc anno duo miliones peregrinatorum Meccam venerunt. Propter turbam hominum periculosissima est lapidatio diaboli, cum lapides contra tres columnas diabolum repraesentantes coniciuntur.

Alcoholum nocivius quam creditum est

Experimenta rattis facta demonstrant alcoholum nocivius esse quam creditur. Nam usus alcoholi vel modicus memoriam et facultatem discendi afficit. Effectus visibilis est in hippocampo cerebri, ubi rattis, qui alcoholum per duas septimanas ceperunt, numerus novarum cellularum quadraginta centesimis (40%) minor est quam aliis, qui nullum alcoholum sumpserunt. In eisdem experimentis notatum est, quod alcoholum rattos mares alio modo afficit quam rattos feminas. Nam mares alcoholo fieri videntur tranquilliores, feminae autem activiores. Utrum res ita se habeat etiam in hominibus, nondum pro certo confirmari potest. Investigatio in actis Neuroscience nuper divulgata est.

Fungus fraxinis imminet

Propter fungum in fraxinis vagantem periculum est, ne silvae fraxinorum Britanniae omnino intereant. Fungus nomine Chalara fraxinea, anno ineunte in Britannia observata, iam in silvas naturales Britanniae transisse confirmata est. Tertia pars silvarum Britanniae ex fraxinis constat. Britanni importationem fraxinorum ex Europa hac septimana vetituri sunt sed forsitan erit sero. In Dania ille fungus iam maiorem partem fraxinorum delevit. Idem etiam in Finniam transiit, sed in Finnia silvae fraxinorum sunt rarissimae et inveniuntur tantum in insulis Alandiae.

(Tuomo Pekkanen)

26.10.2012

Australia et Luxemburg in Consilium securitatis

Finnia in Consilium securitatis Nationum Unitarum non est electa. Ex grege terrarum occidentalium in proximum biennium (20013-14) electae sunt Australia et Luxemburg. Alia membra Consilii mutabilia creata sunt Argentina, Corea Meridiana, Ruanda. Membra perpetua sunt quinque, scilicet Britannia, Francia, Russia, Sinae, USA.

Finnia, quae bis antea (1969-70 et 1989-90) membrum Consilii securitatis fuit, multos annos apud ceteras nationes ambiverat, ut rursus eligeretur, et in antecessum, saltem apud politicos Finnos, a plerisque sustentari videbatur. Sed spe decepta est, nam in suffragio definitivo Luxemburg centum triginta unum vota cepit, Finnia sexaginta duo.

Ecclesia catholica septem novos sanctos accepit

Papa Benedictus XVI die Dominico (21.10.) septem novos homines ad sanctorum ordinem aggregavit. Inter canonizatos est Katerina Tekakwitha, prima sancta indigena Americana, quae saeculo septimo decimo in America septentrionali vixit. Tekakwitha, “Lilium Mohawkorum” appellata, per saecula symbolum spei multis indigenis Americae fuit. Sunt, qui censeant ecclesiam catholicam, hodie multis scandalis implicatam, novis sanctis canonizatis eo spectare, ut gratiam suam decrescentem augeat. In America Meridiana et in Africa ecclesia euangelica gratiam

catholicae ecclesiae extenuat, in terris autem occidentalibus religioni immimet saecularizatio.

De iuribus liberorum

Porta interretiaria Children’s Rights appellata, cuius est iura liberorum promovere et defendere, civitates mundi in ordinem redegit respiciens condiciones liberorum et modum, quo iura eorum ad effectum perducuntur. In hoc indice Finnia post Suetiam inter Hollandiam et Helvetiam octavo loco posita est. Primae sunt parvae civitates Lichtenstein, San Marino, Andorra, Monaco. Russia inter dictaturas et populos egentiores est loco nonagesimo sexto.

Värttinä praemium WOMEX 2012 accepit

Grex Finnicus Värttinä hornotinum praemium WOMEX ( ................
................